Chapter 27

[English text for this chapter is available]

pārvatyuvāca |
namaste devadeveśa praṇamatkaruṇānidhe |
vada kedāramāhātmyaṃ bhaktānāmanukaṃpayā || 1 ||
[Analyze grammar]

tasmiṃlliṃge mahāprītistava kāśyāmanuttamā |
tadbhaktāśca janā nityaṃ devadevamahādhiyaḥ || 2 ||
[Analyze grammar]

devadeva uvāca |
śṛṇvaparṇebhidhāsyāmi kedāreśvara saṃkathām |
samākarṇyāpi yāṃ pāpopyapāpo jāyate kṣaṇāt || 3 ||
[Analyze grammar]

kedāraṃ yātukāmasya puṃso niścitacetasaḥ |
ājanmasaṃcitaṃ pāpaṃ tatkṣaṇādeva naśyati || 4 ||
[Analyze grammar]

gṛhādvinirgate puṃsi kedāramabhiniścitam || janmadvayārjitaṃ pāpaṃ śarīrādapi nirvrajet || 5 ||
[Analyze grammar]

madhye mārgaṃ prapannasya trijanmajanitaṃ tvagham |
dehagehādviniḥsṛtya nirāśaṃ yāti niḥśvasat || 6 ||
[Analyze grammar]

sāyaṃkedārakedārakedāreti triruccaran |
gṛhepi nivasannūnaṃ yātrāphalamavāpnuyāt || 7 ||
[Analyze grammar]

dṛṣṭvā kedāraśikharaṃ pītvā tatratyamaṃbu ca |
saptajanmakṛtātpāpānmucyate nātra saṃśayaḥ || 8 ||
[Analyze grammar]

harapāpahrade snātvā kedāreśaṃ prapūjya ca |
koṭijanmārjitainobhirmucyate nātra saṃśayaḥ || 9 ||
[Analyze grammar]

sakṛtpraṇamya kedāraṃ harapāpakṛtodakaḥ |
sthāpya liṃgaṃ hṛdaṃbhoje prāṃte mokṣaṃ gamiṣyati || 10 ||
[Analyze grammar]

harapāpahrade śrāddhaṃ śraddhayā yaḥ kariṣyati |
uddhṛtya saptapuruṣānsa me lokaṃ gamiṣyati || 11 ||
[Analyze grammar]

purā rāthaṃtare kalpe yadabhūdatra tacchṛṇu |
aparṇe dattakarṇā tvaṃ varṇayāmi tavāgrataḥ || 12 ||
[Analyze grammar]

eko brāhmaṇadāyāda ujjayinyā ihāgataḥ |
kṛtopanayanaḥ pitrā brahmacaryavratesthitaḥ || 13 ||
[Analyze grammar]

sthalīṃ pāśupatīṃ kāśīṃ sa vilokya samaṃtataḥ |
dvijaiḥ pāśupataiḥ kīrṇāṃ jaṭāmukuṭabhūṣitaiḥ || 14 ||
[Analyze grammar]

kṛtaliṃgasamarcaiśca bhūtibhūṣitavarṣmabhiḥ |
bhikṣāhṛtānnasaṃtuṣṭaiḥ puṣṭairgaṃgāmṛtodakaiḥ || 15 ||
[Analyze grammar]

babhūvānaṃditamanā vrataṃ jagrāha cottamam |
hiraṇyagarbhādācāryānmahatpāśupatābhidham || 16 ||
[Analyze grammar]

sa ca śiṣyo vaśiṣṭhobhūtsarvapāśupatottamaḥ |
snātvā hrade harapāpe nityaprātaḥ samutthitaḥ || 17 ||
[Analyze grammar]

vibhūtyāharahaḥ snāti trikālaṃ liṃgamarcayan |
nāṃtaraṃ sa vijānāti śivaliṃge gurau tathā || 18 ||
[Analyze grammar]

sa dvādaśābdadeśīyo vaśiṣṭho guruṇā saha |
yayau kedārayātrārthaṃ giriṃ gaurīgurorgurum || 19 ||
[Analyze grammar]

yatra gatvā na śocaṃti kiṃcitsaṃsāriṇaḥ kvacita |
prāśyodakaṃ liṃgarūpaṃ liṃgarūpatvamāgatāḥ || 20 ||
[Analyze grammar]

asidhāraṃ giriṃ prāpya vaśiṣṭhasya tapasvinaḥ |
gururhiraṇyagarbhākhyaḥ paṃcatvamagamattadā || 21 ||
[Analyze grammar]

paśyatāṃ tāpasānāṃ ca vimāne sārvakāmike |
āropya taṃ pāriṣadāḥ kailāsamanayanmudā || 22 ||
[Analyze grammar]

yastu kedāramuddiśya gehādardhapathepyaho |
akātarastyajetprāṇānkailāse sa ciraṃ vaset || 23 ||
[Analyze grammar]

tadāścaryaṃ samālokya sa vaśiṣṭhastapodhanaḥ |
kedārameva liṃgeṣu bahvamaṃsta suniścitam || 24 ||
[Analyze grammar]

atha kṛtvā sa kaidārīṃ yātrāṃ vārāṇasīmagāt |
agrahīnniyamaṃ cāpi yathārthaṃ cākarotpunaḥ || 25 ||
[Analyze grammar]

prati caitraṃ sadā caitryāṃ yāvajjīvamahaṃ dhruvam |
vilokayiṣye kedāraṃ vasanvārāṇasīṃ purīm || 26 ||
[Analyze grammar]

tena yātrāḥ kṛtāḥ samyak ṣaṣṭirekādhikā mudā |
ānaṃdakānane nityaṃ vasatā brahmacāriṇā || 27 ||
[Analyze grammar]

punaryātrāṃ sa vai cakre madhau nikaṭavartini |
paramotsāhasaṃtuṣṭaḥ palitā kalitopyalam || 28 ||
[Analyze grammar]

tapodhanaistannidhanaṃ śaṃkamānairnivāritaḥ |
kāruṇyapūrṇahṛdayairanyairapi ca saṃgibhiḥ || 29 ||
[Analyze grammar]

tatopi na tadutsāhabhaṃgobhūddṛḍhacetasaḥ |
madhye mārgaṃ mṛtasyāpi guroriva gatirmama || 30 ||
[Analyze grammar]

iti niścitacetaske vaśiṣṭhe tāpase śucau |
aśūdrānna parīpuṣṭe tuṣṭohaṃ caṃḍike'bhavam || 31 ||
[Analyze grammar]

svapremayā sa saṃprokto vaśiṣṭhastāpasottamaḥ |
dṛḍhavrata prasannosmi kedāraṃ viddhi māmiha || 32 ||
[Analyze grammar]

abhīṣṭaṃ ca varaṃ mattaḥ prārthayasvāvicāritam |
ityuktavatyapi mayi svapno mithyeti sobravīt || 33 ||
[Analyze grammar]

tatopi sa mayā proktaḥ svapno mithyā'śuciṣmatām |
bhavādṛśāmamithyaiva svākhyā sadṛśavartinām || 34 ||
[Analyze grammar]

varaṃ brūhi prasannosmi svapnaśaṃkāṃ tyaja dvija |
tava sattvavataḥ kiṃcinmayādeyaṃ na kiṃcana || 35 ||
[Analyze grammar]

ityuktaṃ me samākarṇya varayāmāsa māmiti |
śiṣyo hiraṇyagarbhasya tapasvijanasattamaḥ || 36 ||
[Analyze grammar]

yadi prasanno deveśa tadā me sānugā ime |
sarve śūlinnugrāhyā eṣa eva varo mama || 37 ||
[Analyze grammar]

devi tasyedamākarṇya paropakṛtiśālinaḥ |
vacanaṃ nitarāṃ prītastatheti tamuvāca ha || 38 ||
[Analyze grammar]

punaḥ paropakaraṇāttattapo dviguṇīkṛtam |
tena puṇyena sa mayā punaḥ prokto varaṃ vṛṇu || 39 ||
[Analyze grammar]

sa vaśiṣṭho mahāprājño dṛḍha pāśupatavrataḥ |
devi me prārthayāmāsa himaśailādiha sthitim || 40 ||
[Analyze grammar]

tatastattapasākṛṣṭaḥ kalāmātreṇa tatra hi |
himaśaile tataścātra sarvabhāvena saṃsthitaḥ || 41 ||
[Analyze grammar]

tataḥ prabhāte saṃjāte sarveṣāṃ paśyatāmaham |
himādre prasthitaḥ prāptastūyamānaḥ surarṣibhiḥ || 42 ||
[Analyze grammar]

vaśiṣṭhaṃ purataḥ kṛtvā sarvasārthasamāyutam |
harapāpahrade tīrthe sthitohaṃ tadnugrahāt || 43 ||
[Analyze grammar]

matparigrahataḥ sarve harapāpe kṛtodakāḥ |
ārādhya māmanenaiva vapuṣā siddhimāgatāḥ || 44 ||
[Analyze grammar]

tadā prabhṛti liṃgesminsthitaḥ sādhakasiddhaye |
avimukte pare kṣetre kalikāle viśeṣataḥ || 45 ||
[Analyze grammar]

tuṣārādriṃ samāruhya kedāraṃ vīkṣya yatphalam |
tatphalaṃ saptaguṇitaṃ kāśyāṃ kedāradarśane || 46 ||
[Analyze grammar]

gaurīkuṃḍaṃ yathā tatra haṃsatīrthaṃ ca nirmalam |
yathā madhusravā gaṃgā kāśyāṃ tadakhilaṃ tathā || 47 ||
[Analyze grammar]

idaṃ tīrthaṃ harapāpaṃ saptajanmāghanāśanam |
gaṃgāyāṃ militaṃ paścājjanmakoṭikṛtāghaham || 48 ||
[Analyze grammar]

atra pūrvaṃ tu kākolau yudhyatau khānnipetatuḥ |
paśyatāṃ tatra saṃsthānāṃ haṃsau bhūtvā vinirgatau || 49 ||
[Analyze grammar]

gauri tvayā kṛtaṃ pūrvaṃ snānamatra mahāhrade |
gaurītīrthaṃ tataḥ khyātaṃ sarvatīrthottamottamam || 50 ||
[Analyze grammar]

atrāmṛtasravā gaṃgā mahāmohāṃdhakārahṛt |
anekajanmajanita jāḍyadhvaṃsavidhāyinī || 51 ||
[Analyze grammar]

sarasā mānasenātra pūrvaṃ taptaṃ mahātapaḥ |
atastu mānasaṃ tīrthaṃ jane khyātimidaṃ gatam || 52 ||
[Analyze grammar]

atra pūrvaṃ janaḥ snānamātreṇaiva pramucyate |
paścātprasāditaścāhaṃ tridaśairmuktidurdṛśaiḥ || 53 ||
[Analyze grammar]

sarve muktiṃ gamiṣyaṃti yadi deveha mānavāḥ |
kedārakuṃḍe susnātāstadocchittirbhaviṣyati || 54 ||
[Analyze grammar]

sarveṣāmeva varṇānāmāśramāṇāṃ ca dharmiṇām |
tasmāttanuvisargetra mokṣaṃ dāsyati nānyathā || 55 ||
[Analyze grammar]

tatastaduparodhena tatheti ca mayoditam |
tadārabhya mahādevi snānātkedārakuṃḍataḥ || 56 ||
[Analyze grammar]

samarcanācca bhaktyā vai mama nāma japādapi |
naiḥśreyasīṃ śriyaṃ dadyāmanyatrāpi tanutyajāma || 57 ||
[Analyze grammar]

kedāratīrthe yaḥ snātvā piṃḍāndāsyati cātvaraḥ |
ekottaraśataṃ vaṃśyāstasya tīrṇā bhavāṃbudhim || 58 ||
[Analyze grammar]

bhaumavāre yadā darśastadā yaḥ śrāddhado naraḥ |
kedārakuṃḍamāsādya gayāśrāddhena kiṃ tataḥ || 59 ||
[Analyze grammar]

kedāraṃ gaṃtukāmasya buddhirdeyā narairiyam |
kāśyāṃ spṛśaṃstvaṃ kedāraṃ kṛtakṛtyo bhaviṣyasi || 60 ||
[Analyze grammar]

caitrakṛṣṇacaturdaśyāmupavāsaṃ vidhāya ca |
trigaṃḍūṣānpibanprātarhṛlliṃgamadhitiṣṭhati || 61 ||
[Analyze grammar]

kedārodakapānena yathā tatra phalaṃ bhavet |
tathātra jāyate puṃsāṃ strīṇāṃ cāpi na saṃśayaḥ || 62 ||
[Analyze grammar]

kedārabhaktaṃ saṃpūjya vāsonnadraviṇādibhiḥ |
ājanmajanitaṃ pāpaṃ tyaktvā yāti mamālayam || 63 ||
[Analyze grammar]

āṣaṇmāsaṃ trikālaṃ yaḥ kedāreśaṃ namasyati |
taṃ namasyaṃti satataṃ lokapālā yamādayaḥ || 64 ||
[Analyze grammar]

kalau kedāramāhātmyaṃ yopi kopi na vetsyati |
yo vetsyati supuṇyātmā sarvaṃ vetsyati sa dhruvam || 65 ||
[Analyze grammar]

kedāreśaṃ sakṛddṛṣṭvā devi me'nucaro bhavet |
tasmātkāśyāṃ prayatnena kedāreśaṃ vilokayet || 66 ||
[Analyze grammar]

citrāṃgadeśvaraṃ liṃgaṃ kedārāduttare śubham |
tasyārcanānnaro nityaṃ svargabhogānupāśnute || 67 ||
[Analyze grammar]

kedārāddakṣiṇe bhāge nīlakaṃṭha vilokanāt |
saṃsāroragadaṣṭasya tasya nāsti viṣādbhayam || 68 ||
[Analyze grammar]

tadvāyavyaṃbarīṣeśo narastadavalokanāt |
garbhavāsaṃ na cāpnoti saṃsāre duḥkhasaṃkule || 69 ||
[Analyze grammar]

iṃdradyumneśvaraṃ liṃgaṃ tatsamīpe samarcya ca |
tejomayena yānena sa svarga bhuvi modate || 70 ||
[Analyze grammar]

taddakṣiṇe naro dṛṣṭvā liṃgaṃ kālaṃjareśvaram |
jarāṃ kālaṃ vinirjitya mama loke vasecciram || 71 ||
[Analyze grammar]

dṛṣṭvā kṣemeśvaraṃ liṃgamudkcitrāṃgadeśvarāt |
sarvatra kṣemamāpnoti loke'tra ca paratra ca || 72 ||
[Analyze grammar]

skaṃda uvāca |
devadevena viṃdhyāre kedāra mahimā mahān |
ityākhyāyi purāṃbāyai mayā tepi nirūpitaḥ || 73 ||
[Analyze grammar]

kedāreśvaraliṃgasya śrutvotpattiṃ kṛtī naraḥ |
śivalokamavāpnoti niṣpāpo jāyate kṣaṇāt || 74 ||
[Analyze grammar]

iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍa uttarārdhe kedāramahimākhyānaṃ nāma saptasaptatitamo'dhyāyaḥ || 77 ||
[Analyze grammar]