Chapter 24

[English text for this chapter is available]

skaṃda uvāca |
śṛṇu vātāpi saṃhartaḥ kāśyāṃ pātakataṃkinī |
padmakalpe tu yā vṛttā damanasya dvijanmanaḥ || 1 ||
[Analyze grammar]

bhāradvājasya tanayo damano nāma nāmataḥ |
kṛtamauṃjīvidhiḥ sotha vidyājātaṃ pragṛhya ca || 2 ||
[Analyze grammar]

saṃsāraduḥkhabahulaṃ jīvitaṃ cāpi caṃcalam |
vijñāya damano vidvānnirjagāma gṛhānnijāt || 3 ||
[Analyze grammar]

kāṃciddiśaṃ samālaṃbya nirvedaṃ paramaṃ gataḥ |
pratyāśramaṃ pratinagaṃ pratyabdhi pratikānanam || 4 ||
[Analyze grammar]

pratitīrthaṃ pratinadi sa babhrāma tapoyutaḥ |
yāvaṃtyāyatanānīha tiṣṭhaṃti parito bhuvam || 5 ||
[Analyze grammar]

adhyuvāsa sa tāvaṃti saṃyateṃdriyamānasaḥ |
paraṃ na manasaḥ sthairyaṃ kvāpi prāpi ca tena vai || 6 ||
[Analyze grammar]

manorathopadeṣṭā ca kutracitkvāpi nekṣitaḥ |
kadāciddaivayogātsa damano nāma tāpasaḥ || 7 ||
[Analyze grammar]

revātaṭe niraikṣiṣṭa tīrthaṃ cāmarakaṃṭakam |
mahadāyatanaṃ puṇyamoṃkārasyāpi tatra vai || 8 ||
[Analyze grammar]

dṛṣṭvā hṛṣṭamanā āsīccetaḥ sthairyamavāpa ha |
atha pāśupatāṃstatra sa nirīkṣya tapodhanān || 9 ||
[Analyze grammar]

vibhūtibhūṣitatanūnkṛtaliṃgasamarcanān |
vihitaprāṇayātrāṃśca kṛtāgamavicāraṇān || 10 ||
[Analyze grammar]

svasthopaviṣṭānsvapuroragrato'calamānasān |
praṇamyopāviśattatra tadācāryasya sannidhau || 11 ||
[Analyze grammar]

prabaddhahastayugalaḥ praṇamatarakaṃdharaḥ |
atha pāśupatācāryo gargo nāma mahāmuniḥ || 12 ||
[Analyze grammar]

vārdhakena samākrāṃtastapasā kṛśavigrahaḥ |
śaṃbhorārādhaneniṣṭhaḥ śreṣṭhaḥ sarvatapasviṣu || 13 ||
[Analyze grammar]

papraccha damanaṃ ceti kastvaṃ kasmādihāgataḥ |
taruṇopi viraktosi kutastadvada sattama || 14 ||
[Analyze grammar]

iti praṇayapūrvaṃ sa niśamya damano'bravīt |
bhagoḥ pāśupatācārya sarvajñārādhanapriya || 15 ||
[Analyze grammar]

kathayāmi yathārthaṃ te nijacetoviceṣṭitam |
ahaṃ brāhmaṇadāyādo vedaśāstrakṛtaśramaḥ || 16 ||
[Analyze grammar]

saṃsārāsāratāṃ jñātvā vānaprasthamaśiśriyam |
anenaiva śarīreṇa mahāsiddhimabhīpsatā || 17 ||
[Analyze grammar]

snātaṃ bahuṣu tīrtheṣu maṃtrā japtāstu koṭiśaḥ |
devatāḥ sevitā bahvyo havanaṃ ca kṛtaṃ bahu || 18 ||
[Analyze grammar]

śuśrūṣitāśca guravo bahavo bahvanehasam |
mahāśmaśāneṣu niśā bhūyasyopyativāhitāḥ || 19 ||
[Analyze grammar]

śikharāṇi girīṃdrāṇāṃ mayā cādhyuṣitānyaho |
divyauṣadhi sahasrāṇi mayā saṃsādhitānyapi || 20 ||
[Analyze grammar]

rasāyanāni bahuśaḥ sevitāni mayā punaḥ |
mahāsāhasamālaṃbya siddhādhyuṣitakaṃdarāḥ || 21 ||
[Analyze grammar]

mayā praviṣṭā bahuśaḥ kṛtāṃtavadanopamāḥ |
tapaścāpi mahattaptaṃ bahubhirniyamairyamaiḥ || 22 ||
[Analyze grammar]

paraṃ kiṃcitkvacinnaikṣi siddhyaṃkuramapi prabho |
idānīṃ tvāmanuprāpya mahīṃ paryaṭatā mayā || 23 ||
[Analyze grammar]

manasaḥ sthairyamāpannamiva saṃprāptasiddhinā |
avaśyaṃ tvanmukhāṃbhojādyadvaco niḥsariṣyati || 24 ||
[Analyze grammar]

tenaiva mahatī siddhirbhavitrī mama nānyathā |
tadbrūhi sūpadeśaṃ ca kathaṃ siddhirbhavenmama || 25 ||
[Analyze grammar]

anenaiva śarīreṇa pārthivena prathīyasī |
damanasya niśamyeti gargācāryo vacastadā || 26 ||
[Analyze grammar]

pratyakṣadṛṣṭaṃ provāca mahadāścaryamuttamam |
sarveṣāṃ śṛṇvatāṃ tatra śiṣyāṇāṃ sthiracetasām |
mumukṣūṇāṃ dhṛtavatāṃ mahāpāśupataṃ vratam || 27 ||
[Analyze grammar]

garga uvāca |
anenaiveha dehena yadi tvaṃ siddhikāmukaḥ |
śṛṇuṣvāvahito bhūtvā tadā te kathayāmyaham || 28 ||
[Analyze grammar]

avimukte mahākṣetre sarvasiddhiprade satām |
dharmārthakāmamokṣākhya ratnānāṃ paramākare || 29 ||
[Analyze grammar]

samāśritānāṃ jaṃtūnāṃ sarveṣāṃ sarvakarmaṇām |
śalabhānāṃ pradīpābhe tamaḥstoma mahādvipi || 30 ||
[Analyze grammar]

karmabhūruha dāvāgnau saṃsārābdhyaurvaśocipi |
nirvāṇalakṣmī kṣīrābdhau sukhasaṃketasadmani || 31 ||
[Analyze grammar]

dīrghanidrā prasuptānāṃ paramodbodhadāyini |
yātāyātaśramāpannaprāṇimārgamahīruhi || 32 ||
[Analyze grammar]

anekajanmajanita mahāpāpādrivajriṇi |
nāmoccārakṛtāṃ puṃsāṃ mahāśreyo vidhāyini || 33 ||
[Analyze grammar]

viśveśituḥ paredhāmni sīmni svargāpavargayoḥ |
svardhunī lolakallolā nityakṣālita bhūtale || 34 ||
[Analyze grammar]

evaṃvidhe mahākṣetre sarvaduḥkhaughahāriṇi |
pratyakṣaṃ mama yadvṛttaṃ tadbravīmi mahāmate || 35 ||
[Analyze grammar]

yatra kālabhayaṃ nāsti yatra nāstyenaso bhayam |
tatkṣetramahimānaṃ kaḥ samyagvarṇayituṃ kṣamaḥ || 36 ||
[Analyze grammar]

tīrthāni yāni lokesmiñjaṃtūnāmaghahānyaho |
tāni sarvāṇi śuddhyarthaṃ kāśīmāyāṃti nityaśaḥ || 37 ||
[Analyze grammar]

api kāśyāṃ vasedyastu sarvāśī sarvavikrayī |
sa yāṃ gatiṃ labhenmartyo yajñairdānairna sānyataḥ || 38 ||
[Analyze grammar]

rāgabījasamudbhūtaḥ saṃsāraviṭapo mahān |
dīrghasvāpa kuṭhāreṇa cchinnaḥ kāśyāṃ na vardhate || 39 ||
[Analyze grammar]

sarveṣāmūṣarāṇāṃ tu kāśī parama ūṣaraḥ |
vapturbījamidaṃ tasminnuptaṃ naiva prarohati || 40 ||
[Analyze grammar]

smariṣyaṃtīha ye kāśīmavaśyaṃ tepi sādhavaḥ |
tepyaghaugha vinirmuktā yāsyaṃti gatimuttamām || 41 ||
[Analyze grammar]

vibhūtiḥ sarvalokānāṃ satyādīnāṃ subhaṃgurā |
abhaṃgurā vimuktasya sā tu labhyā śivājñayā || 42 ||
[Analyze grammar]

kṛmikīṭapataṃgānāmavimukte tanutyajām |
vibhūtirdṛśyate yā sā kvāsti brahmāṃḍamaṃḍale || 43 ||
[Analyze grammar]

vārāṇasī yadā prāptā kadācitkālaparyayāt |
sa upāyo vidhātavyo yena no niṣkramo bahiḥ || 44 ||
[Analyze grammar]

pūrvato maṇikarṇīśo brahmeśo dakṣiṇe sthitaḥ |
paścime caiva gokarṇo bhārabhūtastathottare || 45 ||
[Analyze grammar]

ityetaduttamaṃ kṣetramavimukte mahāphalam |
maṇikarṇī hrade snātvā dṛṣṭvā viśveśvaraṃvibhum || 46 ||
[Analyze grammar]

kṣetraṃ pradakṣiṇīkṛtya rājasūyaphalaṃ labhet |
tatra śrāddhapradātuśca mucyaṃte prapitāmahāḥ || 47 ||
[Analyze grammar]

avimukta samaṃ kṣetramapi brahmāṃḍagolake |
na vidyate kvacitsatyaṃ satyaṃ sādhakasiddhidam || 48 ||
[Analyze grammar]

rakṣaṃti satataṃ kṣetraṃ yatra pāśāsipāṇayaḥ |
mahāpāriṣadā ugrāḥ krūrebhyo'krūrabuddhayaḥ || 49 ||
[Analyze grammar]

prāgdvāramaṭṭahāsaśca gaṇakoṭiparīvṛtaḥ |
rakṣedaharniśaṃ kṣetraṃ durvṛttebhyo vibhīṣaṇaḥ || 50 ||
[Analyze grammar]

tathaiva bhūtadhātrīśaḥ kṣetradakṣiṇarakṣakaḥ |
gokarṇaḥ paścimadvāraṃ pāti koṭigaṇāvṛtaḥ || 51 ||
[Analyze grammar]

udagdvāraṃ tathā rakṣedghaṃṭākarṇo mahāgaṇaḥ |
aiśaṃkoṇaṃ chāgavaktro bhīṣaṇo vahnidigdalam || 52 ||
[Analyze grammar]

rakṣaḥ kāṣṭhāṃ śaṃkukarṇo dṛmicaṃḍo maruddiśam |
itthaṃ kṣetraṃ sadā pāṃti gaṇā ete'ti bhāsvarāḥ || 853 ||
[Analyze grammar]

kālākṣoraṇa bhadrastu kauleyaḥ kālakaṃpanaḥ |
ete pūrveṇa rakṣaṃti gaṃgāpāre sthitā gaṇāḥ || 54 ||
[Analyze grammar]

vīrabhadro nabhaścaiva kardamāliptavigrahaḥ |
sthūlakarṇo mahābāhurasipāre vyavasthitāḥ || 55 ||
[Analyze grammar]

viśālākṣo mahābhīmaḥ kuṃḍodaramahodarau |
rakṣaṃti paścimadvāraṃ dehalīdeśasaṃsthitāḥ || 56 ||
[Analyze grammar]

naṃdisenaśca paṃcālaḥ kharapādakaraṃṭakaḥ |
ānaṃdogopako babhrū rakṣaṃti varaṇātaṭe || 57 ||
[Analyze grammar]

tasminkṣetre mahāpuṇye liṃgamoṃkārasaṃjñakam |
tatra siddhiṃ parāṃ prāptā dehenānena sādhakāḥ || 58 ||
[Analyze grammar]

kapilaścaiva sāvarṇiḥ śrīkaṃṭhaḥ pigaloṃśumān |
ete pāśupatāḥ siddhāstalliṃgārādhanena hi || 59 ||
[Analyze grammar]

ekadā tasya liṃgasya kṛtvā paṃcāpipūjanam |
nṛtyataḥ sahuḍutkāraṃ tasmiṃlliṃge layaṃ yayuḥ || 60 ||
[Analyze grammar]

anyacca te pravakṣyāmi tatra yadvṛttamadbhutam |
niśāmaya mahābuddhe damana dvijasattama || 61 ||
[Analyze grammar]

ekā bhekī mune tatra caraṃtī liṃga sannidhau |
pradakṣiṇaṃ sadā kuryānnirmālyākṣatabhakṣiṇī || 62 ||
[Analyze grammar]

sā tatra mṛtyuṃ na prāpa śivanirmālyabhakṣaṇāt |
kṣetrādanyatra maraṇaṃ jātaṃ tasyāstadenasaḥ || 63 ||
[Analyze grammar]

varaṃ viṣamapiprāśyaṃ śivasvaṃ naiva bhakṣayet |
viṣamekākinaṃ haṃti thivasvaṃ putrapauvakam || 64 ||
[Analyze grammar]

śivasya paripuṣṭāṃgāḥ sparśanīyā na sādhubhiḥ |
tena karmavipākena tataste rauravaukasaḥ || 65 ||
[Analyze grammar]

kaścitkākaḥ samālokya maṃḍūkīṃ tāmitastataḥ |
poplūyamānāmādāya caṃcvā kṣetrādbahirgataḥ || 66 ||
[Analyze grammar]

varṣābhvī tena sā kṣiptā kākena kṣetrabāhyataḥ |
atha sā kālato bhekī tatraiva kṣetrasattame || 67 ||
[Analyze grammar]

pradakṣiṇīkaraṇato liṃgasyasparśanādapi |
puṇyāpuṇyavatījātā kanyāpuṣpabaṭorgṛhe || 68 ||
[Analyze grammar]

śubhāvayavasaṃsthānā śubhalakṣaṇalakṣitā |
paraṃ gṛdhramukhī jātā nirmālyākṣatabhakṣaṇāt || 69 ||
[Analyze grammar]

samyaggītarahasyajñā nitarāṃ madhurasvarā |
saptasvarāstrayo grāmā mūrcchanāstvaikaviṃśatiḥ || 70 ||
[Analyze grammar]

tānā ekonapaṃcāśa tālā ekottaraṃśatam |
rāgāḥ ṣaḍeva teṣāṃ tu paṃcapaṃcāpi cāṃganāḥ || 71 ||
[Analyze grammar]

ṣaḍviṃśadrāgarāgiṇya iti rāgi mudāvahāḥ |
deśakāla vibhedena paṃcaṣaṣṭistathā parāḥ || 72 ||
[Analyze grammar]

yāvaṃta eva tālāḥ syu rāgāstāvaṃta eva hi |
iti gītopaniṣadā pratyahaṃ sā śubhavratā || 73 ||
[Analyze grammar]

mādhavī madhurālāpā sadoṃkāraṃ samarcayet |
prāpyāpyanarghyatāruṇyaṃ sā tu puṣpabaṭoḥ sutā || 74 ||
[Analyze grammar]

prāgjanmavāsanāyogādoṃkāraṃ bahvamaṃsta vai |
svabhāva caṃcalaṃ cetastasyāstalliṃga sevanāt || 75 ||
[Analyze grammar]

damanasthairyamagamadyogeneva mahātmanaḥ |
na divā bādhayāṃcakre kṣuttṛṇnidrā kṣapā sutām || 76 ||
[Analyze grammar]

ataṃdritamanā āsītsā talliṃga nirīkṣaṇe |
akṣṇornimeṣā yāvaṃtastasyā āsandivāniśam || 77 ||
[Analyze grammar]

tāvatkālastayā sādhvyā mahānvighno'numīyate |
nimeṣāṃtaritaḥ kālo yo yo vyathoṃgato mama |
liṃgānavekṣaṇāttatra prāyaścittaṃ kathaṃ bhaveta || 78 ||
[Analyze grammar]

iti saṃcitayaṃtyeva sevāṃ tatyāja noṃkṛteḥ |
jalābhilāṣiṇī sā tu liṃganāmāmṛtaṃ pibet || 79 ||
[Analyze grammar]

nānya ddidṛkṣiṇī tasyā akṣiṇī śrutige api |
vihāya liṃgamoṃkāraṃ hṛdvihāyaḥ sthitaṃ satām || 80 ||
[Analyze grammar]

tasyāḥ śabdagrahau nānya śabdagrahaṇatatparau |
atīva nipuṇau jātau tatsanmālyakaraukarau || 81 ||
[Analyze grammar]

nānyatra caraṇau tasyāścarataḥ sukhavāṃchayā |
tyaktvoṃkārājirakṣoṇīṃ kṣuṇṇāṃ nirvāṇapadmayā || 82 ||
[Analyze grammar]

oṃkāraṃ praṇavaṃ sāraṃ parabrahmaprakāśakam |
śabdabrahmatrayīrūpaṃ nādabiṃdukalālayam || 83 ||
[Analyze grammar]

sadakṣaraṃ cādirūpaṃ viśvarūpaṃ parāvaram |
varaṃ vareṇyaṃ varadaṃ śāśvataṃ śāṃtamīśvaram || 84 ||
[Analyze grammar]

sarvalokaikajanakaṃ sarvalokaikarakṣakam |
sarvalokaikasaṃhartṛ sarvalokaikavaṃditam || 85 ||
[Analyze grammar]

ādyaṃtarahitaṃ nityaṃ rśivaṃ śaṃkaramavyayam |
ekaguṇatrayātītaṃ bhaktasvāṃtakṛtāspadam || 86 ||
[Analyze grammar]

nirupādhiṃ nirākāraṃ nirvikāraṃ niraṃjanam |
nirmalaṃ nirahaṃkāraṃ niṣprapaṃcaṃ nijodayam || 87 ||
[Analyze grammar]

svātmārāmamanaṃtaṃ ca sarvagaṃ sarvadarśinam |
sarvadaṃ sarvabhoktāraṃ sarvaṃ sarvasukhāspadam || 88 ||
[Analyze grammar]

vāgiṃdriyaṃ tadīyaṃ ca proccarattadaharniśam |
nāmāṃtaraṃ na gṛhṇāti kvacidanyasyakasyacit || 89 ||
[Analyze grammar]

etannāmākṣararasaṃ rasayaṃtī divāniśam |
rasanā naiva jānāti tasyā anyadrasāṃtaram || 90 ||
[Analyze grammar]

saṃmārjanaṃ raṃgamālāḥ prāsādaṃ paritaḥ sadā |
vidadhyānmādhavī tatra tathārcā pātraśodhanam || 91 ||
[Analyze grammar]

tatra pāśupatā ye vai praṇaveśārcane ratāḥ |
tāṃśca śuśrūṣayennityaṃ pitṛbuddhyāti bhaktitaḥ || 92 ||
[Analyze grammar]

vaiśākhasya caturdaśyāmekadā sā tu mādhavī |
rātrau jāgaraṇaṃ kṛtvā divopavasānvitā || 93 ||
[Analyze grammar]

yātrāmilitabhakteṣu prātaryāteṣu sarvataḥ |
saṃmārjanādikaṃ kṛtvā liṃgamabhyarcya harṣataḥ || 94 ||
[Analyze grammar]

gāyaṃtī madhuraṃ gītaṃ nṛtyaṃtī nijalīlayā |
dhyāyaṃtī liṃgamoṃkāraṃ tatra liṃge layaṃ yayau || 95 ||
[Analyze grammar]

anenaiva śarīreṇa pārthivena mahāmatiḥ |
asmadācāryamukhyānāṃ paśyatāṃ ca tapasvinām || 96 ||
[Analyze grammar]

prādurbabhūva yalliṃgājjyotirjaṭilitāṃbaram |
tatra jyotiṣi sā bālā jyotirmayyapi sāpyabhūt || 97 ||
[Analyze grammar]

rādhaśuklacaturdaśyāmadyāpi kṣetravāsinaḥ |
tatra yātrāṃ prakurvaṃti mahotsavapuraḥsarāḥ || 98 ||
[Analyze grammar]

tatra jāgaraṇaṃ kṛtvā caturdaśyāmupoṣitāḥ |
prāpnuvaṃti paraṃ jñānaṃ yatrakutrāpi vai mṛtāḥ || 99 ||
[Analyze grammar]

brahmāṃḍodara madhye tu yāni tīrthāni sarvataḥ |
tāni vaiśākhabhūtāyāmāyāṃtyoṃkṛti darśane || 100 ||
[Analyze grammar]

liṃgāgre śrīmukhī nāmnī guhāsti paramottamā |
pātālasya ca taddvāraṃ tatra siddhā vasaṃti hi || 1 ||
[Analyze grammar]

tiṣṭheyuḥ paṃcarātraṃ ye guhāyāṃ tatra suvratāḥ |
te nāgakanyāḥ paśyaṃti brūyustāśca śubhāśubham || 2 ||
[Analyze grammar]

kaṃdarottaradigbhāge tatra kūpo rasodakaḥ |
āṣaṇmāsaṃ ca tatpītvā pibedbrahmarasāyanam || 3 ||
[Analyze grammar]

tatra nādeśvaraṃ liṃgaṃ dṛṣṭvā nādanidānabhūḥ |
sarvanādātmakaṃ viśvaṃ tacchravo gocarī bhavet || 4 ||
[Analyze grammar]

tatra matsyodarīṃ snātvā svardhunīṃ varuṇāplutām |
kṛtakṛtyo bhavejjaṃturnaiva śocati kutracit || 5 ||
[Analyze grammar]

asaṃkhyātā gatāḥ siddhimoṃkāreśvarasevakāḥ |
pārthivenaiva dehena divyabhūtena tatkṣaṇāt || 6 ||
[Analyze grammar]

avimuktaṃ paraṃ kṣetraṃ brahmāṃḍādapi sarvataḥ |
tatopi para oṃkāra ukto matsyodarī taṭe || 7 ||
[Analyze grammar]

praṇaveśoṃ'ga yaiḥ kāśyāṃ na nato nāpi cārcitaḥ |
kimarthaṃ te samutpannā mātṛtāruṇyahāriṇaḥ || 8 ||
[Analyze grammar]

yadā prabhṛti viśveśo maṃdarādāgato'bhavat |
tasminnānaṃda gahane tadāprabhṛti sattama || 9 ||
[Analyze grammar]

sarvāṇyāyatanānyāśu sābdhīni sa girīṇyapi |
sa nadīni sa tīrthāni sa dvīpāni yayustataḥ || 110 ||
[Analyze grammar]

idānīṃ mama bhāgyena smāritohaṃ tvayā mune |
ahamapyāgamiṣyāmi yāmaḥ kāśīṃ śanaiḥ śanaiḥ || 11 ||
[Analyze grammar]

etepi mama śiṣyā ye mahāpāśupatavratāḥ |
kāśīṃ yiyāsavastepi yataḥ sarve mumukṣavaḥ || 12 ||
[Analyze grammar]

api vārdhakamāsādya yaiḥ kāśī naiva śīlitā |
mānuṣe durlabhe naṣṭe kutasteṣāṃ mahāsukham || 13 ||
[Analyze grammar]

yāvanneṃdriya vaikalyaṃ yāvannaivāyuṣaḥ kṣayaḥ |
tāvatsevyaṃ prayatnena śaṃbhorānaṃdakānanam || 14 ||
[Analyze grammar]

ya ānaṃdavanaṃ śaṃbhoḥ śiśriyuḥ śrīniketanam |
acalāśrīrna muṃcettānmahāsaukhyaikaśevadhīn || 15 ||
[Analyze grammar]

ityākhyāya kathāṃ ramyāṃ gargaḥ pāśupatottamaḥ |
bhāradvājena sahitaḥ prāpa vārāṇasīṃ purīm || 16 ||
[Analyze grammar]

damanopi hi dharmātmā gargācāryeṇa saṃyutaḥ |
ārādhya śrīmadoṃkāraṃ tasmiṃlliṃge layaṃ gataḥ || 17 ||
[Analyze grammar]

skaṃda uvāca |
ilvalāre paraṃ sthānamoṃkāramavimuktake |
tatra siddhiparāṃ jagmuḥ sādhakā bahuśo mune || 18 ||
[Analyze grammar]

kalau kaluṣacittānāṃ puro nākhyeyameva hi |
praṇaveśvaramāhātmyaṃ nāstikānāṃ viśeṣataḥ || 19 ||
[Analyze grammar]

ye niṃdaṃti mahādevaṃ kṣetraṃ niṃdaṃti ye'dhiyaḥ |
purāṇaṃ ye ca niṃdaṃti te saṃbhāṣyā na kutracit || 120 ||
[Analyze grammar]

oṃkārasadṛśaṃ liṃgaṃ na kvacijjagatītale |
iti gauryai samākhyātaṃ devadevena niścitam || 121 ||
[Analyze grammar]

imamadhyāyamākarṇya narastadgatamānasaḥ |
vimuktaḥ sarvapāpebhyaḥ śivalokamavāpnuyāt || 122 ||
[Analyze grammar]

iti śrīskāṃde mahāpurāṇa ekāśīti sāhasryāṃ saṃhitāyāṃ caturthekāśīkhaṃḍa uttarārdha oṃkāramāhātmyaṃ nāma catuḥsaptatitamo'dhyāyaḥ || 74 ||
[Analyze grammar]