Chapter 17

[English text for this chapter is available]

agastya uvāca |
ratneśvarasamutpatiṃ kathayasva ṣaḍānana |
ratnabhūtaṃ mahāliṃgaṃ yatkāśyāṃ parivarṇyate || 1 ||
[Analyze grammar]

kosya liṃgasya mahimā kenaitacca pratiṣṭhitam |
etaṃ vistarato brūhi gaurīhṛdayanaṃdana || 2 ||
[Analyze grammar]

skaṃda uvāca |
ratneśvarasya māhātmyaṃ kathayiṣyāmi te mune |
yathā ca ratnaliṃgasya prādurbhāvo'bhavadbhuvi || 3 ||
[Analyze grammar]

śrutaṃ nāmāpi liṃgasya yasya janmatrayārjitam |
vṛjinaṃ nāśayettasya prādurbhāvaṃ bruve mune || 4 ||
[Analyze grammar]

śailarājena ratnāni yāni puṃjīkṛtānyaho |
uttare kālarājasya tāni tasya girervṛṣāt || 5 ||
[Analyze grammar]

sarvaratnamayaṃ liṃgaṃ jātaṃ tatsukṛtātmanaḥ |
śakracāpasamacchāyaṃ sarvaratnadyutiprabham || 6 ||
[Analyze grammar]

talliṃgadarśanādeva jñānaratnamavāpyate |
śaileśvaraṃ samālokya śivau tatra samāgatau || 7 ||
[Analyze grammar]

yatra ratnamayaṃ liṃgamāvirbhūtaṃ svayaṃ mune |
tasya sphuratprabhājālaistatamaṃbaramaṃḍalam || 8 ||
[Analyze grammar]

tatra dṛṣṭvā śubhaṃ liṃgaṃ sarvaratnasamudbhavam |
bhavānyadṛṣṭapūrvā hi paripapraccha śaṃkaram || 9 ||
[Analyze grammar]

devadeva jagannātha sarvabhaktābhayaprada |
kutastyametalliṃgaṃ dvisaptapātālamūlavat || 10 ||
[Analyze grammar]

jvālājaṭilitākāśaṃ prabhābhāsita diṅmukham |
kimākhyaṃ kiṃ svarūpaṃ ca kiṃ prabhāvaṃ bhavāṃtaka || 11 ||
[Analyze grammar]

yasya saṃvīkṣaṇādeva manometīva hṛṣṭavat |
ihaiva ramate nātha kathayaitatprasādataḥ || 12 ||
[Analyze grammar]

devadeva uvāca |
śṛṇvaparṇe samākhyāmi yattvayā pṛcchi pārvati |
svarūpametalliṃgasya sarvatejonidheḥ param || 13 ||
[Analyze grammar]

tava pitrā himavatā girirājena bhāmini |
tvāmuddiśya mahāratnasaṃbhārotrāpyanāyi hi || 14 ||
[Analyze grammar]

atra tāni ca ratnāni rāśīkṛtya himādriṇā |
sukṛtopārjitānyeva yayau svasadanaṃ punaḥ || 15 ||
[Analyze grammar]

tavārthaṃ vāmamārthaṃ vā śraddhayā yatsamarpyate |
kāśyāṃ tasya parīpāko bhavedīdṛgvidho'naghe || 16 ||
[Analyze grammar]

liṃgaṃ ratneśvarākhyaṃ vai matsvarūpaṃ hi kevalam |
asya prabhāvo hi mahānvārāṇasyāmume dhruvam || 17 ||
[Analyze grammar]

sarveṣāmiha liṃgānāṃ ratnabhūtamidaṃ param |
ato ratneśvaraṃ nāma paraṃ nirvāṇaratnadam || 18 ||
[Analyze grammar]

anenaiva suvarṇena pitrā rāśīkṛtena ca |
prāsādamasya liṃgasya vidhāpaya maheśvari || 19 ||
[Analyze grammar]

liṃgaprāsādakaraṇātkhaṃḍasphuṭita saṃskṛteḥ |
liṃgasthāpanajaṃ puṇyaṃ helayaiveha labhyate || 20 ||
[Analyze grammar]

tatheti bhagavatyoktvā gaṇāḥ prāsādanirmitau |
somanaṃdi prabhṛtayo 'saṃkhyā vyāpāritā mune || 21 ||
[Analyze grammar]

gaṇaiśca kāṃcanamayo nānākautukacitritaḥ |
nirmame yāmamātreṇa prāsādo meruśṛṃgavat || 22 ||
[Analyze grammar]

devī pradṛṣṭavadanā dṛṣṭvā prāsādanirmitim |
gaṇebhyo vyataradbhūri samānaṃ pāritoṣikam || 23 ||
[Analyze grammar]

punaśca devī papraccha praṇipātapuraḥsaram |
mahimānaṃ mahādevaṃ liṃgasyāsya mahāmune || 24 ||
[Analyze grammar]

devadeva uvāca |
liṃgaṃ tvanādisaṃsiddhametaddevi śubhapradam |
āvirbhūtamidānīṃ ca tvatpituḥ puṇyagauravāt || 25 ||
[Analyze grammar]

guhyānāṃ paramaṃ guhyaṃ kṣetre'smiściṃtitapradam |
kalau kaluṣabuddhīnāṃ gopanīyaṃ prayatnataḥ || 26 ||
[Analyze grammar]

yathā ratnaṃ gṛhe guptaṃ na kaiścijjñāyate paraiḥ |
avimukte tathā liṃgaṃ ratnabhūtaṃ gṛhe mama || 27 ||
[Analyze grammar]

yāni brahmāṃḍamadhyetra saṃti liṃgāni pārvati |
tairarcitāni sarvāṇi ratneśo yaiḥ samarcitaḥ || 28 ||
[Analyze grammar]

pramādenāpi yairgauri liṃgaṃ ratneśamarcitam |
te bhavaṃtyeva niyataṃ saptadvīpeśvarā nṛpāḥ || 29 ||
[Analyze grammar]

trailokye yāni vastūni ratnabhūtāni tāni tu |
ratneśvaraṃ samabhyarcya sakṛtprāpnoti mānavaḥ || 30 ||
[Analyze grammar]

pūjayiṣyaṃti ye liṃgaṃ ratneśaṃ kāmavarjitāḥ |
te sarve madgaṇā bhūtvā prāṃte drakṣyaṃti māmiha || 31 ||
[Analyze grammar]

rudrāṇāṃ koṭijapyena yatphalaṃ parikīrtitam |
tatphalaṃ labhyate devi ratneśasya samarcanāt || 32 ||
[Analyze grammar]

liṃge cānādisaṃsiddhe yadvṛttaṃ tadbravīmi te |
itihāsaṃ mahāścaryaṃ sarvapāpanikṛṃtanam || 33 ||
[Analyze grammar]

pureha nartakī kācidāsīnnāṭyārthakovidā |
saikadā phālgune māsi śivarātryāṃ kalāvatī || 34 ||
[Analyze grammar]

nanarta jāgaraṃ prāpya jagau gītaṃ ca peśalam |
svayaṃ ca vādayāmāsa nānāvādyāni vādyavit || 35 ||
[Analyze grammar]

tena tauryatrikeṇāpi prīṇayitvātha sā naṭī |
ratneśvaraṃ mahāliṃgaṃ deśamiṣṭaṃ jagāma ha || 36 ||
[Analyze grammar]

kāladharmavaśaṃyātā tatra sā varanartakī |
sutā gaṃdharvarājasya vasubhūterbabhūva ha || 37 ||
[Analyze grammar]

saṃgītasya savādyasya tasya lāsyasyapuṇyataḥ |
tatreśāgre kṛtasyeha jāgare śivarātrije || 38 ||
[Analyze grammar]

ramyā ratnāvalī nāma rūpalāvaṇyaśālinī |
kalākalāpakuśalā madhurālāpavādinī || 39 ||
[Analyze grammar]

piturānaṃdakṛnnityaṃ vasubhūterghaṭodbhava |
sarvagāṃdharvakuśalā guṇaratnamahākhaniḥ || 40 ||
[Analyze grammar]

mune sakhītrayaṃ tasyāścāru cāturyabhājanam |
śaśilekhānaṃgalekhā citralekheti nāmataḥ || 41 ||
[Analyze grammar]

tisṛbhistābhirekatra vāgdevīpariśīlitā |
tābhyaḥ sarvāḥ kalāḥ prādātpariprītā sarasvatī || 42 ||
[Analyze grammar]

prāpya ratnāvalī gauri sā janmāṃtaravāsanām |
ratneśvarasya liṃgasya jagrāha niyamaṃ śubham || 43 ||
[Analyze grammar]

ratnabhūtasya liṃgasya kāśyāṃ ratneśvarasya vai |
nityaṃ saṃdarśanaṃ prāpya vakṣyāmyapi vaco mukhe || 44 ||
[Analyze grammar]

itthaṃ niyamavatyāsītsā gaṃdharvasutottamā |
tābhiḥ sakhībhiḥ sahitā nityaṃ liṃgaṃ ca paśyati || 45 ||
[Analyze grammar]

ekadārādhya ratneśaṃ mamaitalliṃgamuttamam |
samānarca ca sā bālā ramyayā gītamālayā || 46 ||
[Analyze grammar]

sakhyaḥ pradakṣiṇīkartuṃ liṃgaṃ tisro'pyume gatāḥ |
tasyā gītena tuṣṭohaṃ liṃgastho varadobhavam || 47 ||
[Analyze grammar]

yastvayā raṃsyate rātrāvadya gaṃdharvakanyake |
tavanāmasamānākhyaḥ sa te bhartā bhaviṣyati || 48 ||
[Analyze grammar]

iti liṃgāṃbudherjātāṃ paripīya vacaḥsudhām |
babhūvānaṃdasaṃdoha maṃtharātīva hrīmatī || 49 ||
[Analyze grammar]

gatātha vyomamārgeṇa sakhībhiḥ svapiturgṛham |
kathayaṃtī nijodaṃtaṃ tamālīnāṃ puro mudā || 50 ||
[Analyze grammar]

tābhirdiṣṭyeti diṣṭyeti sakhībhiḥ parinaṃditā |
adya te vāṃchitaṃ bhāvi ratneśasya samarcanāt || 51 ||
[Analyze grammar]

yadyāyāti sa te rātrāvadya kaumārahārakaḥ |
coro bāhulatāpāśaiḥ pāśitavyotiyatnataḥ || 52 ||
[Analyze grammar]

gocarīkriyatesmābhiryathā sa sukṛtaikabhūḥ |
prātareva tava preyānratneśādiṣṭa iṣṭakṛt || 53 ||
[Analyze grammar]

yātāsvasmāsu hṛṣṭāsu bhavatī śayagauravāt |
aho ratneśvaraṃ liṃgaṃ pratyakṣīkṛtavatyasi || 54 ||
[Analyze grammar]

ahobhāgyodayo nṛṇāmaho puṇyasamucchrayaḥ |
ekasyaiva bhavetsiddhiryadekatrāpi tiṣṭhatām || 55 ||
[Analyze grammar]

satyaṃ vadaṃti nāsatyaṃ daivaprādhānyavādinaḥ |
daivameva phaledekaṃ nodyamo nāparaṃ balam || 56 ||
[Analyze grammar]

bhavatyā api cāsmākameka eva hi codyamaḥ |
paraṃ daivaṃ phalatyekaṃ yathā tava na naḥ puraḥ || 57 ||
[Analyze grammar]

lokānāṃ vyavahāroyamāliproktaprasaṃgataḥ |
paraṃ manorathāvāptistava yā saiva naḥ sphuṭam || 58 ||
[Analyze grammar]

iti saṃvyāharaṃtīnāmanaṃtodhvā'titucchavat |
kṣaṇāttāsāṃ vyatikrāṃtaḥ prāptāśca svaṃsvamālayam || 59 ||
[Analyze grammar]

atha prātaḥ samutthāya punarekatra saṃgatāḥ |
sā ca maunavatī tābhiḥ paribhukteva lakṣitā || 60 ||
[Analyze grammar]

tūṣṇīṃ prāpyātha kāśīṃ sā snātvā maṃdākinījale |
sakhībhiḥ sahitāpaśyalliṃgaṃ ratneśvaraṃ mama || 61 ||
[Analyze grammar]

nirvartya niyamaṃ sātha lajjāmukulitekṣaṇā |
nirbaṃdhena vayasyābhiḥ paripṛṣṭā jagāda ha || 62 ||
[Analyze grammar]

ratnāvalyuvāca |
atha ratneśa yātrāyāḥ prayātāsu svamaṃdiram |
bhavatīṣu smaraṃtyeva tadratneśavaco'mṛtam || 63 ||
[Analyze grammar]

saviśeṣāṃgasaṃskārā'viśaṃ saṃveśamaṃdiram |
nidrādaridranayanā tadvilokanalālasā || 64 ||
[Analyze grammar]

balātsvapnadaśāṃ prāptā bhāvinorthasya gauravāt |
ātmavismaraṇe hetū tato me dvau babhūvatuḥ || 65 ||
[Analyze grammar]

taṃdrī tadaṃgasaṃsparśau mama bodhāpahārakau |
taṃdryā paravaśā cāsaṃ tatastatsparśanena ca || 66 ||
[Analyze grammar]

na jāne tvatha kiṃ vṛttaṃ kāhaṃ kvāhaṃ sa cātha kaḥ |
taṃ nirjigamiṣuṃ sakhyo yāvaddhartuṃ prasāritaḥ || 67 ||
[Analyze grammar]

doḥ kaṃkaṇena ripuṇā kvaṇitaṃ tāvadutkaṭam |
mahatā siṃjitenāhaṃ tenālpaparibodhitā || 68 ||
[Analyze grammar]

sukhasaṃtānapīyūṣa hrade parinimajya vai |
kṣaṇena tadviyogāgnikīlāsu patitā balāt || 69 ||
[Analyze grammar]

kiṃkulīyaḥ sa no vedmi kiṃdeśīyaḥ kimākhyakaḥ |
dunoti nitarāṃ sakhyastadviśleṣānalo mahān || 70 ||
[Analyze grammar]

analpotkalitaṃ cetaḥ punastatsaṃgamāśayā |
prāṇānāṃ me yiyāsūnāmekameva mahauṣadham || 71 ||
[Analyze grammar]

vayasyā niśibhuktasya tasyaiva punarīkṣaṇam |
bhavatīnāmadhīnaṃ ca tatpunardarśanaṃ mama || 72 ||
[Analyze grammar]

kā'līkamālayo vakti snigdhamugdhesakhījane |
taddarśanena sthāsyaṃti prāṇā yāsyaṃti cānyathā || 73 ||
[Analyze grammar]

daśamyavasthā sannahyedbādhituṃ mādhunā bhṛśam |
iti tasyā giraḥ śrutvā dūnāyā nitarāṃ ca tāḥ || 74 ||
[Analyze grammar]

pravepamānahṛdayāḥ procurvīkṣya parasparam || 75 ||
[Analyze grammar]

sakhya ūcuḥ |
yasya grāmo na no nāma nānvayo nāpi budhyate |
sa kathaṃ prāpyate bhadre ka upāyo vidhīyatām || 76 ||
[Analyze grammar]

iti ratnāvalī śrutvā sasaṃdehāṃ ca tadgiram |
vayasyāstadavāptau me yūyaṃ kuṃṭhi mumūrcha ha || 77 ||
[Analyze grammar]

ityardhoktena sā bālā yūyaṃ kuṃṭhitaśaktayaḥ |
yadvaktavyaṃ tviti tayā yūyaṃ kuṃṭhīti bhāṣitam || 78 ||
[Analyze grammar]

tatastāstvaritāḥ sakhyaḥ paritāpopahārakān |
bahuśaḥ śītalopāyānvyadhurmohapraśāṃtaye || 79 ||
[Analyze grammar]

vyapaiti na yadā mūrchā tattacchītopacārataḥ |
tasyāstadaikayānītaṃ ratneśasnapanodakam || 80 ||
[Analyze grammar]

tadukṣaṇātkṣaṇādeva tanmūrchā virarāma ha |
suptotthiteva sāvādīnmuhuḥ śivaśiveti ca || 81 ||
[Analyze grammar]

skadaṃ uvāca |
śraddhāvatāṃ svabhaktānāmupasarge mahatyapi |
nopāyāṃtaramastyeva vineśa caraṇodakam || 82 ||
[Analyze grammar]

ye vyādhayopi duḥsādhyā bahiraṃtaḥ śarīragāḥ |
śraddhayeśodakasparśātte naśyaṃtyeva nānyathā || 83 ||
[Analyze grammar]

sevitaṃ yena satataṃ bhagavaccaraṇodakam |
taṃ bāhyābhyaṃtaraśuciṃ nopasarpati durgatiḥ || 84 ||
[Analyze grammar]

ādhibhautikatāpaṃ ca tāpaṃ vāpyādhidaivikam |
ādhyātmikaṃ tathā tāpaṃ harecchrīcaraṇodakam || 85 ||
[Analyze grammar]

vyapetasaṃjvarā cātha gaṃdharvatanayā mune |
ucitajñeti hovāca tāḥ sakhīḥ srigdhadho radhīḥ || 86 ||
[Analyze grammar]

ratnāvalyuvāca |
śaśilekhenaṃgalekhe citralekhe madīhitaṃ |
yūyaṃ kuṃṭhitasāmarthyāḥ kuto vastāḥ kalāḥ kva vā || 87 ||
[Analyze grammar]

matpriyaprāptaye samyagupāyo'sti mayekṣitaḥ |
ratneśvarānugrahato'nutiṣṭhata hi taṃ hitāḥ || 88 ||
[Analyze grammar]

śaśilekhebhilaṣitaprāptyai lekhāṃstvamālikha |
saṃlikhānaṃgalekhe tvaṃ yūnaḥ sarvāvanīcarān || 89 ||
[Analyze grammar]

citrage citralekhe tvaṃ pātālatalaśāyinaḥ |
kiṃcidāvirbhavaccāru tāruṇyālaṃkṛtīṃllikha || 90 ||
[Analyze grammar]

athākaṇyeti tāḥ sakhyastaccāturyaṃ pravarṇya ca |
lilikhuḥ kramaśaḥ sakhyo yūno yauvana śevadhīn || 91 ||
[Analyze grammar]

niryatkaumāralakṣmīkānpuṃvattva śrīsamāvṛtān |
prātaḥsaṃdhyeva gaṃdharvī nṛpādyāṃstānavaikṣata || 92 ||
[Analyze grammar]

sarvānsuranikāyānsā vyalokata śubhekṣaṇā |
na cāṃcalyaṃ jahāvakṣṇosteṣu svarlokavāsiṣu || 93 ||
[Analyze grammar]

tato madhyamalokasthānmunirājakumārakān |
vilokyāpi na sā prītiṃ kvāpyāpa premanirbharā || 94 ||
[Analyze grammar]

atha ratnāvalī bālā karṇābhyarṇavilocanā |
dṛśau vyāpārayāmāsa balisadmayuvasvapi || 95 ||
[Analyze grammar]

ditijāndanujānvīkṣya sā gaṃdharvī kumārakān |
ratiṃ babaṃdha na kvāpi tāpitā mānmathaiḥ śaraiḥ || 96 ||
[Analyze grammar]

sudhākara karaspṛṣṭāpyatidūnāṃgayaṣṭikā |
paśyaṃtī nāgayūnaḥ sā kiṃciducchvasitā'bhavat || 97 ||
[Analyze grammar]

bhoginastānvilokyāpi citraṃcitragatānatha |
manātsaṃbhuktabhogeva kṣaṇamāsītkumārikā || 98 ||
[Analyze grammar]

yūnaḥ pratyekamadrākṣīdaśeṣāñcheṣa vaṃśajān |
takṣakānvayagāṃstadvadatha vāsukigotrajān || 99 ||
[Analyze grammar]

pulīkānaṃta karkoṭa bhadrasaṃtānagānapi |
dṛṣṭvā nāgakumārāṃstāñchaṃkhacūḍamathaikṣata || 100 ||
[Analyze grammar]

śaṃkhacūḍekṣaṇādeva parāṃ lajjāṃ babhāra sā |
udbhinnapulakāpyāsīdaṃgapratyaṃga saṃdhiṣu || 1 ||
[Analyze grammar]

tattrapābharato'jñāyi tatkaumāraharo varaḥ |
tayā vaidagdhyavarayā kṣaṇataścitralekhayā || 2 ||
[Analyze grammar]

atha citrapaṭī citralekhā citrapaṭāṃcalam |
parikṣipyāvṛṇottūrṇaṃ parihāsaikapeśalā || 3 ||
[Analyze grammar]

ratnāvalī citralekhāṃ hriyā maunāvalaṃbinī |
dṛśā kuṭilayādrākṣītprasphuraddaśanāṃbarā || 4 ||
[Analyze grammar]

kaṭākṣitānaṃgalekhā tayātha śaśilekhayā |
citralekhāparikṣipta paṭāṃcalamapākarot || 5 ||
[Analyze grammar]

vasubhūtisutā sātha kanyā ratnāvalī śubhā |
śaṃkhacūḍānvavāye taṃ ratnacūḍamavaikṣata || 6 ||
[Analyze grammar]

tadīkṣaṇakṣaṇāddṛṣṭirānaṃdāśrubhirāvṛtā |
kapolabhittirabhavatsvedodakaṇikāṃcitā || 7 ||
[Analyze grammar]

cakaṃpe gātralatikā dhṛtaromāṃcakaṃcukā |
citranyasteva tastaṃbha kṣaṇaṃ mukulitānanā || 8 ||
[Analyze grammar]

tataḥ sā citralekhā tāmetyāśvāsayadāturām |
mautsukyaṃ vraja gaṃdharvi siddhastedya manorathaḥ || 9 ||
[Analyze grammar]

etasyāvagataṃ sarvaṃ deśanāmānvayādikam |
mā viṣīdālisulabhastveṣa ratneśvarārpitaḥ || 110 ||
[Analyze grammar]

aho sadṛgvarāvāptyā ratneśenāsi toṣitā |
uttiṣṭha yāmaḥ sadanaṃ ratneśaḥ sarvadohinaḥ || 11 ||
[Analyze grammar]

atha devavaśādyāṃtyastā dṛṣṭā gaganādhvagāḥ |
subāhunā dānavena pātālatalavāsinā || 12 ||
[Analyze grammar]

gṛhītvā tāścatasropi niragāddānavo gṛham |
harirvikaṭadaṃṣṭrāsyaḥ prāṃtare hariṇīriva || 13 ||
[Analyze grammar]

tāstaṃ vilokya gaṃdharvyo daṃṣṭrāvikaṭitānanam |
rudhirāruṇanetraṃ ca jātā vepathubhūmayaḥ || 14 ||
[Analyze grammar]

hā mātarhā pitastrāhi hā vidhe mā vidhehi tat |
yadetatkartumārabdhamanāthāsvatiniṣṭhuram || 15 ||
[Analyze grammar]

hā daiva maṃdabhāgyābhiḥ kimasmābhiranuṣṭhitam |
sukṛtetaravārtāpi no citte vyāhṛtā kvacit || 16 ||
[Analyze grammar]

śiśukrīḍanakaṃ hitvā hitvā ratneśvarārcanam |
pitroḥ svādhīna sacceṣṭā iṣṭaṃ vidmo na kiṃcana || 17 ||
[Analyze grammar]

adhobhuvanagā dīnā hīnānāthena kotra naḥ |
trāti trāṇārthinīrbālāḥ śaṃbho ratneśa sarvaga || 18 ||
[Analyze grammar]

itthaṃ gaṃdharvatanayā vilapaṃtīḥ kṛpāturam |
śuśrāva nāgarājosau ratnacūḍo mahāmanāḥ || 19 ||
[Analyze grammar]

kosau matsvāmino nāma ratneśasya maheśituḥ |
liṃgarājasya gṛhṇāti karmabaṃdhanabhedinaḥ || 120 ||
[Analyze grammar]

punarapyārtarāvaṃ sa śrutvā bālāmukheritam |
ratneśa rakṣarakṣeti gṛhītāstro viniryayau || 21 ||
[Analyze grammar]

taṃ vasārasapānena mahāmāṃsaniṣevaṇāt |
atyaṃtonmatta duśceṣṭaṃ ratnacūḍo niraikṣata || 22 ||
[Analyze grammar]

adhyākṣipacca re duṣṭa śiṣṭakanyāpahāraka |
maddṛṣṭigocaraṃ yātaḥ kva yāsyasyadya re'dhama || 23 ||
[Analyze grammar]

mama bāṇahataprāṇaḥ prayāṇaṃ kuru durmate |
ārtatrāṇodyatamate vaivasvatapuraṃ prati || 24 ||
[Analyze grammar]

ratneśvarasya yairnāma pralayāpadyapi sphuṭam |
gṛhītaṃ na bhavādṛgbhyasteṣu bhītirbhayātmasu || 25 ||
[Analyze grammar]

ratneśvaramahānāma kṛtatrāṇāstu ye narāḥ |
teṣāṃ janmajarāvyādhi kalikālabhayaṃ kutaḥ || 26 ||
[Analyze grammar]

ityuktvā tā bhayatrastāstanmukhaprahitekṣaṇāḥ |
vyāghraghrātā iva mṛgīrmābhaiṣiṣṭetyuvāca saḥ || 27 ||
[Analyze grammar]

ityāśvāsyātha gaṃdharvīḥ sa vai bhujagarājajaḥ |
ākarṇapūrṇamākṛṣya kodaṃḍaṃ prāhiṇoccharam || 28 ||
[Analyze grammar]

sopi kruddho danujarāṭpadāspṛṣṭabhujaṃgavat |
āviddhya kāladaṃḍābhaṃ parighaṃ vyasṛjanmahat || 29 ||
[Analyze grammar]

hṛdi ratneśvaraṃ liṃgaṃ yasya samyagvijṛṃbhate |
alātadaṃḍavattasminkāladaṃḍopi jāyate || 130 ||
[Analyze grammar]

aṃtareva sa ciccheda parighaṃ svamaheṣubhiḥ |
durvṛtasya yathehāyurvicchidyetāṃtaraiva hi || 31 ||
[Analyze grammar]

tatosya bāṇaṃ cikṣepa kālānalasamaprabham |
sa bāṇastasya hṛdayaṃ praviśya pragaveṣya ca || 32 ||
[Analyze grammar]

prāṇānasya viniryātya svayaṃ tūṇamagātpunaḥ |
hṛdisthaṃ tasya daurātmyaṃ sarvaṃ vijñāya tattvataḥ || 33 ||
[Analyze grammar]

digaṃganāpuraḥ khyātumiva nāgāśugo gataḥ || 34 ||
[Analyze grammar]

anyāyopārjitairdravyairyaḥ sukhaṃ bhoktumicchati |
tāni dravyāṇi yāṃtyeva sa prāṇāni kutaḥ sukhama || 35 ||
[Analyze grammar]

iti taṃ dānavaṃ hatvā nāgarājo mahābalī |
pratyuvācātha tāḥ kanyāḥ kā yūyaṃ kasya cātmajāḥ || 36 ||
[Analyze grammar]

durātmanā kutonena saṃgatā danujanmanā |
kva vā ratneśvaraṃ liṃgaṃ bhavatībhirvilokitam || 37 ||
[Analyze grammar]

yasya nāmākṣaroccārādvyapeta paramāpadaḥ |
yṛyamāśu tadākhyāta yena jānāmi tattvataḥ || 28 ||
[Analyze grammar]

iti śrutvā girastasya nitarāṃ premanirbharāḥ |
parasparaṃ mukhaṃ vīkṣya kosau syāddṛṣṭapūrvavat || 39 ||
[Analyze grammar]

akāraṇa sakhā kosau prāṃtare samupasthitaḥ |
nijaprāṇānpaṇīkṛtya yena trātā sma bālikāḥ || 140 ||
[Analyze grammar]

asya saṃdarśanādeva svabhāva capalānyapi |
maṃtharāṇīṃdriyāṇistu paripīya sudhāmiva || 41 ||
[Analyze grammar]

yātumanyatra no netre protsahete yathā tathā |
anyadvastvaṃtaraṃ prekṣya ramaṇīyataraṃtvapi || 42 ||
[Analyze grammar]

vacaḥpīyūṣamādhurya nitarāṃ prāpya naḥ śrutī |
śabdāṃtaragrahāpekṣāṃ na kurvāte svajanmanaḥ || 43 ||
[Analyze grammar]

āpnutaḥ paṃgutāmetau pādau naścaṃcalāvapi |
amuṃ yuvānamālokya coraṃ naḥ sanmanomaṇeḥ || 44 ||
[Analyze grammar]

iti bruvaṃtyastā bālāḥ parasparamanulbaṇam |
dṛṣṭvāpi citramadhyasthaṃ vividustanna bālikāḥ || 45 ||
[Analyze grammar]

atīva bhīṣaṇākāra danujasyātisādhvasāt |
aṃdhībhūtekṣaṇāstaṃ nājñāsiṣurhariṇīkṣaṇāḥ || 46 ||
[Analyze grammar]

ūcuśca taṃ yuvānaṃ tā nijajīvitarakṣiṇam |
yadaṃga bhavatā pṛṣṭaṃ snehanirbharacetasā || 47 ||
[Analyze grammar]

tadācakṣāmahe sarvamavadhehi kṣaṇaṃ manaḥ |
iyaṃ gaṃdharvarājasya vasubhūtestanūdbhavā || 48 ||
[Analyze grammar]

kanyā ratnāvalī nāma guṇaratnamahākhaniḥ |
vayaṃ vayasyā etasyāśchāyevānugatāḥ sadā || 49 ||
[Analyze grammar]

ārabhya bālyamapyeṣā liṃgaṃ ratneśvarābhidham |
yāṃti pitrāpyanujñātā kāśyāmarcayituṃ sadā || 150 ||
[Analyze grammar]

varopi dattastenāsyai prasannenātha śaṃbhunā |
hariṣyatīti yaḥ svapne kaumāraṃ te kumārike || 51 ||
[Analyze grammar]

tava nāmasamānākhyaḥ sa te bhartā bhaviṣyati |
yuvānaṃ svapnabhoktāraṃ prāpyāpyeṣā suduḥkhitā || 52 ||
[Analyze grammar]

punastadvirahotthena vahninātīva tāpitā |
kalākauśalyato'smābhiḥ sopi citre pradarśitaḥ || 53 ||
[Analyze grammar]

yasya na grāma nāmāpi nānvayopyavabudhyate |
taṃ dṛṣṭvā citralikhitamapyeṣā jīvitā punaḥ || 54 ||
[Analyze grammar]

tato ratneśvaraṃ natvā svagṛhāyotsukābhavat |
yāṃtīstato'nayā sārdhaṃ prāṃtare gaganā dhvani || 55 ||
[Analyze grammar]

atarkitā yamaścāsmāndhṛtvā pātālamāviśat |
anaṃtaraṃ bhavāneva taṃ vetti danujādhamam || 56 ||
[Analyze grammar]

aṃga ityeva vṛttāṃto nijo'smābhirudīritaḥ |
prasādaṃ kuru cāsmākaṃ puraḥ kosi kṛpānidhe || 57 ||
[Analyze grammar]

yadā prabhṛti cāsmābhiḥ sa dṛṣṭo duṣṭadānavaḥ |
tadāprabhṛti no netre vidyuteva hataprabhe || 58 ||
[Analyze grammar]

kāṃdiśīkā bhayatrātarna vidmaḥ kiṃcideva hi |
kva vayaṃ kā vayaṃ kastvaṃ kiṃ jātaṃ kiṃ bhaviṣyati || 59 ||
[Analyze grammar]

niśamyeti sa puṇyātmā nāgarājakumārakaḥ |
āśvāsya tā bhayatrastāḥ provācedaṃ ca puṇyadhīḥ || 160 ||
[Analyze grammar]

mayā saha samāyāta ratneśaṃ darthayāmi vaḥ |
ityāhūya sa tā ninye krīḍāvāpīṃ sukhodakām || 61 ||
[Analyze grammar]

vitritramaṇisopānāṃ haṃsakokakṛtāravām |
kavīnāṃ vāsitavyājātsvāgataṃ kurvatīmiva || 62 ||
[Analyze grammar]

tatra tenābhyanujñātāḥ krīḍāvāpyāṃ nimajjya tāḥ |
sacailapuṣpābharaṇāḥ pronmamajjustataḥ punaḥ || 63 ||
[Analyze grammar]

bahirnirgatya gaṃdharvyaḥ paśyaṃtyaḥ sthagitā iva |
ratneśālayamālokya kālarājasamīpataḥ || 64 ||
[Analyze grammar]

parasparaṃ tataḥ procurgaṃdharvyo vismitā iva |
svapnoyaṃ kiṃ nu vā satyaṃ khelo ratneśvarasya vā || 65 ||
[Analyze grammar]

vayameva hi vā bhrāṃtā gaṃdharvyo na vayaṃ kimu |
kimetannaiva jānīma aiṃdrajālika khelavat || 66 ||
[Analyze grammar]

eṣottaravahā gaṃgā sphuṭameva bhavediha |
śaṃkhacūḍasya vāpyeṣā śaṃkhacūḍālayastvasau || 67 ||
[Analyze grammar]

etatpaṃcanadaṃ tīrthameṣa vāgīśvarālayaḥ |
yasya saṃdarśanādeva vāgvibhūtirvijṛṃbhate || 68 ||
[Analyze grammar]

śaṃkhacūḍeśvaraścaiṣa śaṃkhacūḍapratiṣṭhitaḥ |
yasya saṃdarśanātpuṃsāṃ na bhayaṃ kālasarpajam || 69 ||
[Analyze grammar]

eṣā maṃdākinī nāma dīrghikā puṇyatoyabhūḥ |
yasyāṃ kṛtodakā martyā martyaloke viśaṃti na || 170 ||
[Analyze grammar]

asāvāśāpurī devī yā stutā tripurāriṇā |
tripuraṃ jetukāmena maṃdākinyāstaṭe śubhe || 71 ||
[Analyze grammar]

yādyāpi pūjitā martyairāśāṃ pūrayaterthinām |
maṃdākinyāḥ pratīcyāṃ tu eṣa siddhyaṣṭakeśvaraḥ || 72 ||
[Analyze grammar]

bhavedyasya saparyāto gṛhe siddhyaṣṭakaṃ sphuṭam |
kuṃḍasiddhyaṣṭakākhyaṃ ca tatraiva virajodakam || 73 ||
[Analyze grammar]

yatra snātvā kṛtaśrāddho virajasko divaṃ vrajet |
mūrtyastāḥ siddhayaścāṣṭau yāḥ kāśyāṃ sarvasiddhidāḥ || 74 ||
[Analyze grammar]

sarvasiddhipradaścāsau mahārājavināyakaḥ |
vināyakāḥ praṇaśyaṃti yasmai praṇamatāṃ nṛṇām || 75 ||
[Analyze grammar]

asau siddheśvarasyoccaiḥ prāsādaḥ kāṃcanojjvalaḥ |
ratnadhvajapatākāśca siddhiḥ syādyadvilokanāt || 76 ||
[Analyze grammar]

kṣetrasya madhyame || bhāge madhyameśvara eṣa vai |
madhyādholokayormadhye na vasedyasya vīkṣaṇāt || 77 ||
[Analyze grammar]

madhyameśaṃ samabhyarcya naro madhyamaviṣṭape |
āsamudrakṣitīṃdraḥ syāttato mokṣaṃ ca viṃdati || 78 ||
[Analyze grammar]

airāvateśvaraṃ liṃgaṃ tatprācyāmiṣṭasiddhikṛt |
dṛśyate yatpatākāyāṃ ramya airāvato gajaḥ || 79 ||
[Analyze grammar]

vṛddhakāleśvarasyaiṣa prāsādo ratnanirmitaḥ || |
pratidarśaṃ vasedyatra rātrau caṃdraḥ satārakaḥ || 180 ||
[Analyze grammar]

yasya saṃdarśanānnṛṇāṃ na kālaḥ prabhavedbhave |
na kaliḥ prabhavetsatyaṃ na ca kalmaṣarāśayaḥ || 81 ||
[Analyze grammar]

iti yāvatkathāṃ cakruḥ saṃbhrāṃtā iva bālikāḥ |
tāvadvasuvibhūtiḥ sa gaṃdharvastvarayā yayau || 82 ||
[Analyze grammar]

nāradācchrutavṛttāṃtaḥ subāhudanujanmanaḥ |
ratnāvalī sutā prītā sasakhīkā yathāhṛtā || 83 ||
[Analyze grammar]

ratneśvarātsamāyāṃtī śūnye gaganavartmani |
yathānayacca pātālaṃ yathā yuddhamabhūtpunaḥ || 84 ||
[Analyze grammar]

yathā ratneśa bhaktena ratnacūḍena ghātitaḥ |
sa subāhurdanujanurmaheṣvāsena ceṣuṇā || 85 ||
[Analyze grammar]

yathā ca pṛṣṭavṛttāṃto vāpīmārgeṇa cānayat |
śaṃkhacūḍasya vāpīṃ tāṃ pātāleṣu pravartinīm || 86 ||
[Analyze grammar]

yathā ca prāpya niryātāḥ kāśīṃ dṛṣṭvāpi bālikāḥ |
bhṛśaṃ saṃbhrāṃtimāpannāḥ paśyaṃtyopi samutsukāḥ || 87 ||
[Analyze grammar]

dṛṣṭvā gaṃdharvarājastāṃ punarjātāmivātmajām |
savayasyāmanāmlānamukhapaṃkajasuśriyam || 88 ||
[Analyze grammar]

pariṣvajya samāghrāya lalāṭaphalakaṃ muhuḥ |
aṃkamāropya papraccha sarvaṃ vṛttāṃtamādarāt || 89 ||
[Analyze grammar]

atha sā kathayāmāsa danujāpahṛteḥ kathām |
ratneśvaraṃ varāvāptiṃ svapnāvasthāṃ vihāya ca || 190 ||
[Analyze grammar]

ratnāvalīmanovṛttiṃ vijñāyātha mukheṃgitaiḥ || śaśilekhā samācaṣṭa spaṣṭavarṇaiḥ savistaram || 91 ||
[Analyze grammar]

tutoṣa nitarāṃ sotha gaṃdharvādhipatiḥ kṛtī |
prabhāvaṃ varṇayāmāsa mudā ratneśvarasya ca || 92 ||
[Analyze grammar]

skaṃda uvāca |
ākarṇaya muniśreṣṭha viṃdhyavṛddhi vivardhana |
pratyahaṃ ratnacūḍopi vāpīmārgeṇa saṃyamī || 93 ||
[Analyze grammar]

nāgalokātsamāgatya snātvā maṃdākinī jale |
ratneśvaraṃ samabhyarcya ratnāṃjalyaṣṭakena vai || 94 ||
[Analyze grammar]

suvarṇapaṃkajānyaṣṭau samarpayati hṛṣṭavat |
ekadā svapnasamaye ratneśo liṃgarūpadhṛk || 95 ||
[Analyze grammar]

ratnacūḍamuvācedaṃ nijabhaktaṃ dṛḍhavratam |
dānavena hṛtāṃ kanyāṃ mocayiṣyati yāṃ bhavān || 96 ||
[Analyze grammar]

taṃ dānavaṃ raṇe jitvā sā te patnī bhaviṣyati |
iti smaranvaraṃ sotha nāgarājo mahāmanāḥ || 97 ||
[Analyze grammar]

tāṃ kanyāṃ dānavaṃ hatvā vimocya nija vīryataḥ |
vāpīmārgeṇa pātālādānināya punarmahīm || 98 ||
[Analyze grammar]

svayaṃ ca sādhayāṃcakre pratyahaṃ niyamaṃ sudhīḥ |
liṃgaṃ samarcayitvātha kṛtvā cāpi pradakṣiṇam || 99 ||
[Analyze grammar]

yāvadbahiḥ samāgacchedramyādratneśamaṃḍapāta |
tāvadgaṃdharvarājāya tābhiḥ sa vasubhūtaye || 200 ||
[Analyze grammar]

soyaṃ soyaṃ yuvā dhanyastarjanyagreṇa darśitaḥ |
gaṃdharvarājastaṃ dṛṣṭvā nāgarājakumārakam || 1 ||
[Analyze grammar]

atīvasmeranayanaḥ saṃprahṛṣṭatanūruhaḥ |
manasyenaṃ ca saṃvarṇya tadrūpaṃ savayonvayam || 2 ||
[Analyze grammar]

dhanyosmyanugṛhītosmi ratneśena varārpaṇāt |
kanyā dhanyatarā ceyamanurūposti yatpatiḥ || 3 ||
[Analyze grammar]

saṃpradhāryeti hṛdyenaṃ samākārya ca suṃdaram |
pṛṣṭvā tannāmagotraṃ ca gaṇayitvā balābalam || 4 ||
[Analyze grammar]

ratneśvarasya puratastasmai kanyāṃ dadau mudā |
nītvā gaṃdharvalokaṃ ca kṛtakautukamaṃgalam || 5 ||
[Analyze grammar]

madhuparkeṇa saṃpūjya pāṇimagrāhayattataḥ |
vaivāhikena vidhinā dadau ratnānyanekaśaḥ || 6 ||
[Analyze grammar]

śaśilekhānaṃgalekhā citralekhāpi kuṃbhaja |
vijñāpya svajanetāraṃ varayāmāsa taṃ patim || 7 ||
[Analyze grammar]

upayamya catasropi sa gaṃdharvasutāḥ śubhāḥ |
ratnacūḍo jagāmātha tābhiḥ svapitṛmaṃdiram || 8 ||
[Analyze grammar]

yathā catasṛbhiḥ sārdhaṃ śrutibhiḥ praṇavaḥ śivam |
svapitroścaraṇau natvā navoḍhābhiḥ sa nāgarāṭ || 9 ||
[Analyze grammar]

viniveditavṛttāṃto ratneśānugrahasya ca |
uvāsa tābhiḥ sasukhaṃ pitṛbhyāmabhinaṃditaḥ || 210 ||
[Analyze grammar]

īśvara uvāca |
ratneśvarasya liṃgasya mama sthāvararūpiṇaḥ |
sarveṣāṃ sarvadasyāsya prabhāvo girije'tulaḥ || 11 ||
[Analyze grammar]

asmiṃlliṃge parāṃ siddhi prāptāḥ siddhāḥ sahasraśaḥ |
guptamāsīdidaṃ liṃgamadya yāvatsumadhyame || 12 ||
[Analyze grammar]

tava pitrā himavatā mama bhaktena sarvathā |
puṇyārjitairmahāratnai ratneśaḥ prakaṭīkṛtaḥ || 13 ||
[Analyze grammar]

asmiṃlliṃge mama prītirnitarāmadrirājaje |
vārāṇasyāmidaṃ liṃgaṃ pūjanīyaṃ prayatnataḥ || 14 ||
[Analyze grammar]

nānā ratnāni labhyaṃte ratneśānugrahādume |
strīratnaputraratnādi svargamokṣāvapi priye || 15 ||
[Analyze grammar]

yo'tra ratneśvaraṃ natvā mṛto deśāṃtareṣvapi |
na sa svargādihāgacchetkalpakoṭiśatairapi || 16 ||
[Analyze grammar]

asitāyāṃ caturdaśyāmupoṣya niśi jāgarāt |
ratneśasannidhau devi mama sānnidhyamāpnuyāt || 17 ||
[Analyze grammar]

asya liṃgasya pūrveṇa tvayā janmāṃtare priye |
dākṣāyaṇīśvaraṃ ligaṃ madbhaktyātra pratiṣṭhitam || 18 ||
[Analyze grammar]

tasya saṃdarśanādeva na naro yāti durgatim |
aṃbikā nāma gaurī tvaṃ tatrāhaṃ cāṃbikeśvaraḥ || 19 ||
[Analyze grammar]

mūrtaḥ ṣaḍānanastatra tava putraḥ sumadhyame |
etattrayaṃ naro dṛṣṭvā na garbhaṃ praviśedume || 220 ||
[Analyze grammar]

ratneśvarasya māhātmyaṃ mayā te samudīritam |
gopanīyaṃ prayatnena kalikalmaṣacetasām || 21 ||
[Analyze grammar]

idaṃ ratneśvarākhyānaṃ yaḥ paṭhiṣyati sarvadā |
saputrapautrapaśubhirna viyujyeta karhicit || 22 ||
[Analyze grammar]

śrutvā ratneśvarotpatiṃ setihāsāṃ narottamaḥ |
anūḍho labhate satyaṃ kanyāratnaṃ kulocitam || 23 ||
[Analyze grammar]

kanyāpīmaṃ samākarṇya tvitihāsaṃ manoramam |
śraddhayā satpatiṃ prāpya bhaviṣyati pativratā || 24 ||
[Analyze grammar]

itihāsamimaṃ śrutvā nārī vā puruṣopivā |
na jātviṣṭaviyogāgni tāpena paritapyate || 225 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍa uttarārdhe ratneśvarapraśaṃsanaṃ nāma saptaṣaṣṭitamo'dhyāyaḥ || 67 ||
[Analyze grammar]