Chapter 15

[English text for this chapter is available]

skaṃda uvāca |
jyeṣṭheśvarasya parito yāni liṃgāni kuṃbhaja |
tāni paṃcasahasrāṇi munīnāṃ siddhidānyalam || 1 ||
[Analyze grammar]

parāśareśvaraṃ liṃgaṃ jyeṣṭheśāduttare mahat |
tasya darśanamātreṇa nirmalaṃ jñānamāpyate || 2 ||
[Analyze grammar]

tatraiva siddhidaṃ liṃgaṃ māṃḍavyeśvarasaṃjñitam |
na tasya darśanājjātu durbuddhiṃ prāpnuyānnaraḥ || 3 ||
[Analyze grammar]

liṃgaṃ ca śaṃkareśākhyaṃ tatraiva śubhadaṃ sadā |
bhṛgunārāyaṇastatra bhaktānāṃ sarvasiddhidaḥ || 4 ||
[Analyze grammar]

jābālīśvara saṃjñaṃ ca liṃgaṃ tatrātisiddhidam |
tasya saṃdarśanājjātu na jaṃturdurgatiṃ vrajet || 5 ||
[Analyze grammar]

sumaṃtu muninā śreṣṭhastatrādityaḥ pratiṣṭhitaḥ |
tasya saṃdarśanādeva kuṣṭhavyādhiḥ praśāmyati || 6 ||
[Analyze grammar]

bhairevī bhīṣaṇā nāma tatra bhīṣaṇarūpiṇī |
kṣetrasya bhīṣaṇaṃ sarvaṃ nāśayedbhāvatorcitā || 7 ||
[Analyze grammar]

tatropajaṃghane liṃgaṃ karmabaṃdhavimokṣaṇam |
nṛbhiḥ saṃsevitaṃ bhaktyā ṣaṇmāsātsiddhidaṃ param || 8 ||
[Analyze grammar]

bhāradvājeśvaraṃ liṃgaṃ liṃgaṃ mādrīśvaraṃ varam |
ekatra saṃsthite dve tu draṣṭavye sukṛtātmanā || 9 ||
[Analyze grammar]

aruṇi sthāpitaṃ liṃgaṃ tatraiva kalaśodbhava |
tasya liṃgasya sevātaḥ sarvāmṛddhimavāpnuyāt || 10 ||
[Analyze grammar]

liṃgaṃ vājasaneyākhyaṃ tatrāstyatimanohṛram |
tasya saṃdarśanātpuṃsāṃ vājapeyaphalaṃ bhavet || 11 ||
[Analyze grammar]

kaṇveśvaraṃ śubhaṃ liṃgaṃ liṃgaṃ kātyāyaneśvaram |
vāmadeveśvaraṃ liṃgamautathyeśvarameva ca || 12 ||
[Analyze grammar]

hārīteśvarasaṃjñaṃ ca liṃgaṃ vai gālaveśvaram |
kuṃbherliṃgaṃ mahāpuṇyaṃ tathā vai kausumeśvaram || 13 ||
[Analyze grammar]

agnivarṇeśvaraṃ caiva naidhruveśvarameva ca |
vatseśvaraṃ mahāliṃgaṃ parṇādeśvarameva ca || 14 ||
[Analyze grammar]

saktuprastheśvaraṃ liṃgaṃ kaṇādeśaṃ tathaiva ca |
anyattatra mahāliṃgaṃ māṃḍūkāya nirūpitam || 15 ||
[Analyze grammar]

vābhraveyeśvaraṃ liṃgaṃ śilāvṛttīśvaraṃ tathā |
cyavaneśvara liṃgaṃ ca śālaṃkāyanakeśvaram || 16 ||
[Analyze grammar]

kaliṃdameśvaraṃ liṃgaṃ liṃgamakrodhaneśvaram |
liṃgaṃ kapotavṛttīśaṃ kaṃkeśaṃ kuṃtaleśvarama || 17 ||
[Analyze grammar]

kaṃṭheśvaraṃ kaholeśaṃ liṃgaṃ tuṃburupūjitam |
matageśaṃ marutteśaṃ magadheyeśvaraṃ tathā || 18 ||
[Analyze grammar]

jātūkarṇeśvaraṃ liṃgaṃ jaṃbūkeśvarameva ca |
jārudhīśaṃ jaleśaṃ ca jālmeśaṃ jālakeśvaram || 19 ||
[Analyze grammar]

evamādīni liṃgāni ayutārdhāni kuṃbhaja |
smaraṇāddarśanātsparśādarcanānnamanātstuteḥ || 20 ||
[Analyze grammar]

na jātu jāyate jaṃtoḥ kaluṣasya samudbhavaḥ |
eteṣāṃ śubhaliṃgānāṃ jyeṣṭhasthāneti pāvane || 21 ||
[Analyze grammar]

skaṃda uvāca |
ekadā tatra yadvṛttaṃ jyeṣṭhasthāne mahāmune |
tadahaṃ te pravakṣyāmi śṛṇuṣvāghavināśanam || 22 ||
[Analyze grammar]

svairaṃ viharatastatra jyeṣṭhasthāne maheśituḥ |
kautukenaiva cikrīḍa śivā kaṃdukalīlayā || 23 ||
[Analyze grammar]

udaṃca nnyaṃcadaṃgānāṃ lāghavaṃ paritanvatī |
niḥśvāsāmodamudita bhramarākulitekṣaṇā || 24 ||
[Analyze grammar]

bhraśyaddha mmillasanmālya sthapuṭīkṛta bhūmikā |
svidyatkapolapatrālī sravadaṃbukaṇojjvalā || 25 ||
[Analyze grammar]

sphuṭaccolāṃśukapathaniryadaṃgaprabhāvṛtā |
ullasatkaṃdukāsphālātiśoṇitakarāṃbujā || 26 ||
[Analyze grammar]

kaṃdukānuga sadṛṣṭi nartita bhrūcalatāṃcalā |
mṛḍānī kila khelaṃtī dadṛśe jagadaṃbikā || 27 ||
[Analyze grammar]

aṃtarikṣacarābhyāṃ ca ditijābhyāṃ manoharā |
kaṭākṣitābhyāmiva vai samupasthitamṛtyunā || 28 ||
[Analyze grammar]

vidalotpala saṃjñābhyāṃ dṛptābhyāṃ varato vidheḥ |
tṛṇīkṛtatrijagatī puruṣābhyāṃ svadorbalāt || 29 ||
[Analyze grammar]

devīṃ parijihīrṣū tau viṣameṣu prapīḍitau |
divovateratuḥ kṣipraṃ māyāṃ svīkṛtya śāṃbarīm || 30 ||
[Analyze grammar]

dhṛtvā pāraṣadīṃ mūrtimāyātāvaṃbikāṃtikam |
tāvatyaṃtaṃ sudurvṛttāvaticaṃcalamānasā || 31 ||
[Analyze grammar]

sarvajñena parijñātau cāṃcalyāllocanodbhavāt |
kaṭākṣitātha devena durgādurgārighātinī || 32 ||
[Analyze grammar]

vijñāya netrasaṃjñāṃ tu sarvajñārdha śarīriṇī |
tenaiva kaṃdukenātha yugapannijaghāna tau || 33 ||
[Analyze grammar]

mahābalau mahādevyā kaṃdukena samāhatau |
paribhramya paribhramya tau duṣṭau vinipetatuḥ || 34 ||
[Analyze grammar]

vṛṃtādiva phale pakve tālādanilalolite |
daṃbholinā parihate śṛṃgeiva mahāgireḥ || 35 ||
[Analyze grammar]

tau nipātya mahādaityāvakāryakaraṇodyatau |
tataḥ pariṇatiṃ yāto liṃgarūpeṇa kaṃdukaḥ || 36 ||
[Analyze grammar]

kaṃdukeśvarasaṃjñaṃ ca talliṃgamabhavattadā |
jyeṣṭheśvara samīpe tu sarvaduṣṭanivāraṇam || 37 ||
[Analyze grammar]

kaṃdukeśa samutpattiṃ yaḥ śroṣyati mudānvitaḥ |
pūjayiṣyati yo bhaktastasya duḥkhabhayaṃ kutaḥ || 38 ||
[Analyze grammar]

kaṃdukeśvara bhaktānāṃ mānavānāṃ nirenasām |
yogakṣemaṃ sadā kuryādbhavānī bhayanāśinī || 39 ||
[Analyze grammar]

mṛḍānī tasya liṃgasya pūjāṃ kuryātsadaiva hi |
tatraiva devyā sānnidhyaṃ pārvatyā bhaktasiddhidam || 40 ||
[Analyze grammar]

kaṃdukeśaṃ mahāliṃgaṃ kāśyāṃ yairna samarcitam |
kathaṃ teṣāṃ bhavanīśau syātāṃ sarvepsitapradau || 41 ||
[Analyze grammar]

draṣṭavyaṃ ca prayatnena talliṃgaṃ kaṃdukeśvaram |
sarvopasargasaṃghātavighātakaraṇaṃ param || 42 ||
[Analyze grammar]

kaṃdukeśvara nāmāpi śrutvā vṛjinasaṃtatiḥ |
kṣipraṃ kṣayamavāpnoti tamaḥ prāpyoṣṇaguṃ yathā || 43 ||
[Analyze grammar]

skaṃda uvāca |
saṃśṛṇuṣva mahābhāga jyeṣṭheśvara samīpataḥ |
yadvṛttāṃtamabhūdvipra paramāścaryakṛddhruvam || 44 ||
[Analyze grammar]

daṃḍakhāte mahātīrthe devarṣipitṛtṛptide |
tapyamāneṣu vipreṣu niṣkāmaṃ paramaṃ tapaḥ || 45 ||
[Analyze grammar]

daityo duṃdubhinirhrādo duṣṭaḥ prahlādamātulaḥ |
devāḥ kathaṃ sujeyāḥ syurityupāyamaciṃtayat || 46 ||
[Analyze grammar]

kiṃ balāśca kimāhārāḥ kimādhārā hi devatāḥ |
vicārya bahuśo daityastattvaṃ vijñāya niścitam || 47 ||
[Analyze grammar]

avaśyamagrajanmāno hetavotra vicārataḥ |
brāhmaṇānhaṃtumasakṛtkṛtavānudyamaṃ tataḥ || 48 ||
[Analyze grammar]

yataḥ kratubhujo devāḥ kratavo vedasaṃbhavāḥ |
te vedā brāhmaṇādhīnāstato devabalaṃ dvijāḥ || 49 ||
[Analyze grammar]

niścitaṃ brāhmaṇādhārāḥ sarve vedāḥ savāsavāḥ |
gīrvāṇā brāhmaṇabalā nātra kāryā vicāraṇā || 50 ||
[Analyze grammar]

brāhmaṇā yadi naṣṭāḥ syurvedā naṣṭāstataḥ svayam |
āmnāyeṣu praṇaṣṭeṣu vinaṣṭāḥ śatataṃtavaḥ || 51 ||
[Analyze grammar]

yajñeṣu nāśaṃ gacchatsu hṛtāhārāstataḥ surāḥ |
nirbalāḥ sukhajeyāḥ syurjiteṣu tridaśeṣvatha || 52 ||
[Analyze grammar]

ahameva bhaviṣyāmi mānyastrijagatīpatiḥ |
āhariṣyāmi devānāmakṣayāḥ sarvasaṃpadaḥ || 53 ||
[Analyze grammar]

nirvekṣyāmi sukhānyeva rājye nihatakaṃṭake |
iti niścitya durbuddhiḥ punaściṃtitavānmune || 54 ||
[Analyze grammar]

dvijāḥ kva saṃti bhūyāṃso brahmatejotibṛṃhitāḥ |
śrutyadhyayana saṃpannāstapobala samanvitāḥ || 55 ||
[Analyze grammar]

bhūyasāṃ brāhmaṇānāṃ tu sthānaṃ vārāṇasī bhavet |
tānādāvupasaṃhṛtya yāmi tīrthāṃtaraṃ tataḥ || 56 ||
[Analyze grammar]

yatrayatra hi tīrtheṣu yatrayatrāśrameṣu ca |
saṃti sarve'grajanmānaste mayādyāḥ samaṃtataḥ || 57 ||
[Analyze grammar]

iti duṃdubhinirhrādo matiṃ kṛtvā kulocitām |
prāpyāpi kāśīṃ durvṛtto māyāvī nyavadhīddvijān || 58 ||
[Analyze grammar]

samitkuśānsamādātuṃ yatra yāṃti ddhijottamāḥ |
araṇye tatra tānsarvānsa bhakṣayati durmatiḥ || 9 ||
[Analyze grammar]

yathā kopi na vettyeva tathācchanno'bhavatpunaḥ |
vane vanecaro bhūtvā yādorūpī jalāśaye || 60 ||
[Analyze grammar]

adṛśyarūpī māyāvī devānāmapyagocaraḥ |
divādhyānaparastiṣṭhenmunivanmunimadhyagaḥ || 61 ||
[Analyze grammar]

praveśamuṭajānāṃ ca nirgamaṃ ca vilokayan |
yāminyāṃ vyāghrarūpeṇa brāhmaṇānbhakṣayedbahūn || 62 ||
[Analyze grammar]

niḥśabdameva nayati natyajedapi kīkasam |
itthaṃ nipātitā viprāstena duṣṭena bhūriśaḥ || 63 ||
[Analyze grammar]

ekadā śivarātrau tu bhaktastveko nijoṭaje |
saparyāṃ devadevasya kṛtvā dhyānasthitobhavat || 64 ||
[Analyze grammar]

sa ca duṃdubhinirhrāda daityeṃdro baladarpitaḥ |
vyāghra rūpaṃ samāsthāya tamādātuṃ matiṃ dadhe || 65 ||
[Analyze grammar]

taṃ bhaktaṃ dhyānamāpannaṃ dṛḍhacittaṃ śivekṣaṇe |
kṛtāstramaṃtravinyāsaṃ taṃ krāṃtumaśakanna saḥ || 66 ||
[Analyze grammar]

atha sarvagataḥ śaṃbhurjñātvā tasyāśayaṃ haraḥ |
daityasya duṣṭarūpasya vadhāya vidadhe dhiyam || 67 ||
[Analyze grammar]

yāvadāditsati vyāghrastāvadāvirabhūddharaḥ |
jagadrakṣāmaṇistryakṣo bhaktarakṣaṇa dakṣadhīḥ || 68 ||
[Analyze grammar]

rudramāyāṃtamālokya tadbhaktārcita liṃgataḥ |
daityastenaiva rūpeṇa vavṛdhe bhūdharopamaḥ || 69 ||
[Analyze grammar]

sāvajñamathasarvajñaṃ yāvatpaśyati dānavaḥ |
tāvadāyāṃtamādāya kakṣāyaṃtre nyapīḍayat || 70 ||
[Analyze grammar]

paṃcāsyastvatha paṃcāsyaṃ muṣṭyā mūrdhanyatāḍayat |
sa ca tenaiva rūpeṇa kakṣāniṣpeṣaṇena ca || 71 ||
[Analyze grammar]

atyārtamaraṭadvyāghro rodasī paripūrayan |
tena nādena sahasā saṃ pravepitamānasāḥ || 72 ||
[Analyze grammar]

tapodhanāḥ samājagmurniśi śabdānusārataḥ |
tatreśvaraṃ samālokya kakṣīkṛta mṛgeśvaram || 73 ||
[Analyze grammar]

tuṣṭuvuḥ praṇatā sarve śarvaṃ jayajayākṣaraiḥ |
paritrātā jagattrātaḥ pratyūhāddāruṇāditaḥ || 74 ||
[Analyze grammar]

anugrahaṃ kurudhveśa tiṣṭhātraiva jagadguro |
anenaiva hi rūpeṇa vyāghreśa iti nāmataḥ || 75 ||
[Analyze grammar]

kuru rakṣāṃ mahādeva jyeṣṭhasthānasya sarvadā |
anyebhyopyupasargebhyo rakṣa nastīrthavāsinaḥ || 76 ||
[Analyze grammar]

iti śrutvā vacasteṣāṃ devaścaṃdravibhūṣaṇaḥ |
tathetyuktvā punaḥ prāha śṛṇudhvaṃ dvijapuṃgavāḥ || 77 ||
[Analyze grammar]

yo māmanena rūpeṇa drakṣyati śraddhayātra vai |
tasyopasargasaṃghātaṃ ghātayiṣyāmyasaṃśayam || 78 ||
[Analyze grammar]

etalliṃgaṃ samabhyarcya yo yāti pathi mānavaḥ |
cauravyāghrādisaṃbhūta bhayaṃ tasya kuto bhavet || 79 ||
[Analyze grammar]

maccaritramidaṃ śrutvā smṛtvā liṃgamidaṃ hṛdi |
saṃgrāme praviśanmartyo jayamāpnoti nānyathā || 80 ||
[Analyze grammar]

ityuktvā devadevaśastasmiṃlliṃge layaṃ yayau |
savismayāstato viprāḥ prātaryātā yathāgatam || 81 ||
[Analyze grammar]

skanda uvāca |
tadā prabhṛti kuṃbhottha liṃgaṃ vyāghreśvarābhidham |
jyeṣṭheśāduttarebhāge dṛṣṭaṃ spṛṣṭaṃ bhayāpaham || 82 ||
[Analyze grammar]

vyāghreśvarasya ye bhaktāstebhyo bibhyati kiṃkarāḥ |
yāmā api mahākrūrā jayajīveti vādinaḥ || 83 ||
[Analyze grammar]

parāśareśvarādīnāṃ liṃgānāmiha saṃbhavam |
śrutvā naro na lipyeta mahāpātakakardamaiḥ || 84 ||
[Analyze grammar]

kaṃdukeśa samutpattiṃ vyāghre śāvirbhavaṃ tathā |
samākarṇya naro jātu nopasargaiḥ pradūyate || 85 ||
[Analyze grammar]

uṭajeśvara liṃgaṃ tu vyāghreśātpaścime sthitam |
bhaktarakṣārthamudbhūtaṃ syātsamabhyarcya nirbhayaḥ || 86 ||
[Analyze grammar]

iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṇḍe uttarārdhe parāśareśvarādiliṃgasaṃbhavonāma paṃcaṣaṣṭitamo'dhyāyaḥ || 65 ||
[Analyze grammar]