Chapter 13

[English text for this chapter is available]

agastya uvāca |
dṛṣṭvā kāśīṃ dṛgānaṃdāṃ tārakāre purāriṇā |
kimakāri samācakṣva prāptāṃ bahumanorathaiḥ || 1 ||
[Analyze grammar]

skaṃda uvāca |
pativratāpate 'gastya śṛṇu vakṣyāmyaśeṣataḥ |
mṛgāṃkalakṣmaṇotkaṃṭhaṃ kāśī netrātithīkṛtā || 2 ||
[Analyze grammar]

atha sarvajñanāthena bhaktavatsalacetasā |
jaigīṣavyo muniśreṣṭho guhāṃ tastho nirīkṣitaḥ || 3 ||
[Analyze grammar]

yamanehasamārabhya madaṃrādriṃ viniryayau |
adrīṃdra sutayā sārdhaṃ rudreṇokṣeṃdragāminā || 4 ||
[Analyze grammar]

taṃ vāsaraṃ puraskṛtya jagrāha niyamaṃ dṛḍham |
jaigīṣavyo mahāmedhāḥ kuṃbhayone mahākṛtī || 5 ||
[Analyze grammar]

viṣamekṣaṇa pādābjaṃ samīkṣiṣye yadā punaḥ |
tadāṃbuvipruṣamapi bhakṣayiṣyāmi cetyaho || 6 ||
[Analyze grammar]

kutaściddhāraṇāyogādathavā śaṃbhvanugrahāta |
anaśnannapibanyogī jaigīṣavyaḥ sthito mune || 7 ||
[Analyze grammar]

taṃ śaṃbhureva jānāti nānyo jānāti kaścana |
ataeva tataḥ prāptaḥ prathamaṃ pramathādhipaḥ || 8 ||
[Analyze grammar]

jyeṣṭhaśuklacaturdaśyāṃ somavārānurādhayoḥ |
tatparvaṇi mahāyātrā kartavyā tatra mānavaiḥ || 9 ||
[Analyze grammar]

jyeṣṭhasthānaṃ tataḥ kāśyāṃ tadābhūdapi puṇyadam |
tatra liṃgaṃ samabhavatsvayaṃ jyeṣṭheśvarābhidham || 10 ||
[Analyze grammar]

talliṃgadarśanātpuṃsāṃ pāpaṃ janmaśatārjitam |
tamorkodayamāpyeva tatkṣaṇādeva naśyati || 11 ||
[Analyze grammar]

jyeṣṭhavāpyāṃ naraḥ snātvā tarpayitvā pitāmahān |
jyeṣṭheśvaraṃ samālokya na bhūyo jāyate bhuvi || 12 ||
[Analyze grammar]

āvirāsītsvayaṃ tatra jyeṣṭheśvara samīpataḥ |
sarvasiddhipradā gaurī jyeṣṭhāśreṣṭhā samaṃtataḥ || 13 ||
[Analyze grammar]

jyeṣṭhe māsi sitāṣṭamyāṃ tatra kāryo mahotsavaḥ |
rātrau jāgaraṇaṃ kāryaṃ sarvasaṃpatsamṛddhaye || 14 ||
[Analyze grammar]

jyeṣṭhāṃ gaurīṃ namaskṛtya jyeṣṭhavāpī pariplutā |
saubhāgyabhājanaṃ bhūyādyoṣā saubhāgyabhāgapi || 15 ||
[Analyze grammar]

nivāsaṃ kṛtavāñśaṃbhustasminsthāne yataḥ svayam |
nivāseśa iti khyātaṃ liṃgaṃ tatra paraṃ tataḥ || 16 ||
[Analyze grammar]

nivāseśvaraliṃgasya sevanātsarvasaṃpadaḥ |
nivasaṃti gṛhe nityaṃ nityaṃ pratipadaṃ punaḥ || 17 ||
[Analyze grammar]

kṛtvā śrāddhaṃ vidhānena jyeṣṭhasthāne narottamaḥ |
jyeṣṭhāṃ tṛptiṃ dadātyeva pitṛbhyo madhusarpiṣā || 18 ||
[Analyze grammar]

jyeṣṭhatīrthe naraḥ kāśyāṃ dattvā dānāni śaktitaḥ |
jyeṣṭhānsvargānavāpnoti naro mokṣaṃ ca gacchati || 19 ||
[Analyze grammar]

jyeṣṭheśvaro rcyaḥ prathamaṃ kāśyāṃ śreyorthibhirnaraiḥ |
jyeṣṭhāgaurī tatobhyarcyā sarvajyeṣṭhamabhīpsubhiḥ || 20 ||
[Analyze grammar]

atha naṃdinamāhūya dhūrjaṭiḥ sa kṛpānidhiḥ |
śṛṇvatāṃ sarvadevānāmidaṃ vacanamabravīt || 21 ||
[Analyze grammar]

īśvara uvāca |
śailāde praviśāśu tvaṃ guhāstyatra manoharā |
tadaṃtaresti me bhakto jaigīṣavyastapodhanaḥ || 22 ||
[Analyze grammar]

mahāniyamavānnaṃdistvagasthisnāyu śeṣitaḥ |
tamihānaya madbhaktaṃ maddarśana dṛḍhavratam || 23 ||
[Analyze grammar]

yadāprabhṛtyagāṃ kāśyā maṃdaraṃ sarvasuṃdaram |
mahāniyamavāneṣa tadārabhyojjhitāśanaḥ || 24 ||
[Analyze grammar]

gṛhāṇa līlākamalamidaṃ pīyūṣapoṣaṇam |
anena tasya gātrāṇi spṛśa sadyaḥ subṛṃhiṇā || 25 ||
[Analyze grammar]

tato naṃdī samādāya tallīlākamalaṃ vibhoḥ |
praṇamya devadeveśamāviśadgahvarāṃ guhām || 26 ||
[Analyze grammar]

naṃdī dṛṣṭvātha taṃ tatra dhāraṇādṛḍhamānasam |
tapogni pariśuṣkāṃgaṃ kamalena samaspṛśat || 27 ||
[Analyze grammar]

tapāṃte vṛṣṭisaṃyogācchālūra iva koṭare |
ullalāsa sa yogīṃdraḥ sparśamātrāttadabjajāt || 28 ||
[Analyze grammar]

atha naṃdī samādāya satvaraṃ munipuṃgavam |
devadevasya pādāgre namaskṛtya nyapātayat || 29 ||
[Analyze grammar]

jaigīṣavyotha saṃbhrāṃtaḥ purato vīkṣya śaṃkaram |
vāmāṃgasanniviṣṭādritanayaṃ praṇanāma ha || 30 ||
[Analyze grammar]

praṇamya daṃḍavadbhūmau pariluṭhya samaṃtataḥ |
tuṣṭāva parayā bhaktyā sa muniścaṃdraśekharam || 31 ||
[Analyze grammar]

jaigīṣavya uvāca |
namaḥ śivāya śāṃtāya sarvajñāya śubhātmane |
jagadānaṃdakaṃdāya paramānaṃdahetave || 32 ||
[Analyze grammar]

arūpāya sarūpāya nānārūpadharāya ca |
virūpākṣāya vidhaye vidhiviṣṇustutāya ca || 33 ||
[Analyze grammar]

sthāvarāya namastubhyaṃ jaṃgamāya namostute |
sarvātmane namastubhyaṃ namaste paramātmane || 34 ||
[Analyze grammar]

namastrailokyakāmyāya kāmāṃgadahanāya ca |
namo śeṣaviśeṣāya namaḥ śeṣāṃgadāya te || 35 ||
[Analyze grammar]

śrīkaṃṭhāya namastubhyaṃ viṣakaṃṭhāya te namaḥ |
vaikuṃṭhavaṃdyapādāya namo'kuṃṭhitaśaktaye || 36 ||
[Analyze grammar]

namaḥ śaktyardhadehāya videhāya sudehine |
sakṛtpraṇāmamātreṇa dehidehanivāriṇe || 37 ||
[Analyze grammar]

kālāya kālakālāya kālakūṭa viṣādine |
vyālayajñopavītāya vyālabhūṣaṇadhāriṇe || 38 ||
[Analyze grammar]

namaste khaṃḍaparaśo namaḥ khaṃḍeṃ dudhāriṇe |
khaṃḍitāśeṣa duḥkhāya khaḍgakheṭakadhāriṇe || 39 ||
[Analyze grammar]

gīrvāṇagītanāthāya gaṃgākallolamāline |
gaurīśāya girīśāya giriśāya guhāraṇe || 40 ||
[Analyze grammar]

caṃdrārdhaśuddhabhūṣāya caṃdrasūryāgnicakṣuṣe |
namaste carmavasana namo digvasanāyate || 41 ||
[Analyze grammar]

jagadīśāya jīrṇāya jarājanmaharāya te |
jīvāyate namastubhyaṃ jaṃjapūkādihāriṇe || 42 ||
[Analyze grammar]

namo ḍamaruhastāya dhanurhastāya te namaḥ |
trinetrāya namastubhyaṃ jagannetrāya te namaḥ || 43 ||
[Analyze grammar]

triśūlavyagrahastāya namastripathagādhara |
triviṣṭapādhināthāya trivedīpaṭhitāya ca || 44 ||
[Analyze grammar]

trayīmayāya tuṣṭāya bhaktatuṣṭipradāya ca |
dīkṣitāya namastubhyaṃ devadevāya te namaḥ || 45 ||
[Analyze grammar]

dāritāśeṣapāpāya namaste dīrghadarśine |
dūrāya duravāpyāya doṣanirdalanāya ca || 46 ||
[Analyze grammar]

doṣākara kalādhāra tyaktadoṣāgamāya ca |
namo dhūrjaṭaye tubhyaṃ dhattūrakusumapriya || 47 ||
[Analyze grammar]

namo dhīrāya dharmāya dharmapālāya te namaḥ |
nīlagrīva namastubhyaṃ namaste nīlalohita || 48 ||
[Analyze grammar]

nāmamātrasmṛtikṛtāṃ trailokyaiśvaryapūraka |
namaḥ pramathanāthāya pinākodyatapāṇaye || 49 ||
[Analyze grammar]

paśupāśavimokṣāya paśūnāṃ pataye namaḥ |
nāmoccāraṇamātreṇa mahāpātakahāriṇe || 50 ||
[Analyze grammar]

parātparāya pārāya parāparaparāya ca |
namo'pāracaritrāya supavitrakathāya ca || 51 ||
[Analyze grammar]

vāmadevāya vāmārdhadhāriṇe vṛṣagāmine |
namo bhargāya bhīmāya natabhītiharāya ca || 52 ||
[Analyze grammar]

bhavāya bhavanāśāya bhūtānāṃpataye namaḥ |
mahādeva namastubhyaṃ maheśa mahasāṃpate || 53 ||
[Analyze grammar]

namo mṛḍānīpataye namo mṛtyuṃjayāya te |
yajñāraye namastubhyaṃ yakṣarājapriyāya ca || 54 ||
[Analyze grammar]

yāyajūkāya yajñāya yajñānāṃ phaladāyine |
rudrāya rudrapataye kadrudrāya ramāya ca || 55 ||
[Analyze grammar]

śūline śāśvateśāya śmaśānāvanicāriṇe |
śivāpriyāya śarvāya sarvajñāya namostu te || 56 ||
[Analyze grammar]

harāya kṣāṃtirūpāya kṣetrajñāya kṣamākara |
kṣamāya kṣitihartre ca kṣīragaurāya te namaḥ || 57 ||
[Analyze grammar]

aṃdhakāre namastubhyamādyaṃtarahitāya ca |
iḍādhārāya īśāya upedreṃdrastutāya ca || 58 ||
[Analyze grammar]

umākāṃtāya ugrāya namaste ūrdhvaretase |
ekarūpāya caikāya mahadaiśvaryarūpiṇe || 59 ||
[Analyze grammar]

anaṃtakāriṇe tubhyamaṃbikāpataye namaḥ |
tvamoṃkāro vaṣaṭkāro bhūrbhuvaḥsvastvameva hi || 60 ||
[Analyze grammar]

dṛśyādṛśya yadatrāsti tatsarvaṃ tvamu mādhava |
stutiṃ kartuṃ na jānāmi stutikartā tvameva hi || 61 ||
[Analyze grammar]

vācyastvaṃ vācakastvaṃ hi vākca tvaṃ praṇatosmi te |
nānyaṃ vedmi mahādeva nānyaṃ staumi maheśvara || 62 ||
[Analyze grammar]

nānyaṃ namāmi gaurīśa nānyākhyāmādade śiva |
mūkonyanāmagrahaṇe badhironyakathāśrutau || 63 ||
[Analyze grammar]

paṃguranyābhigamane'smyaṃdho'nyaparivīkṣaṇe |
eka eva bhavānīśa ekakartā tvameva hi || 64 ||
[Analyze grammar]

pātā hartā tvamevaiko nānātvaṃ mūḍhakalpanā |
atastvameva śaraṇaṃ bhūyobhūyaḥ punaḥpunaḥ || 65 ||
[Analyze grammar]

saṃsārasāgare magnaṃ māmuddhara maheśvara |
iti stutvā maheśānaṃ jaigīṣavyo mahāmuniḥ || 66 ||
[Analyze grammar]

vācaṃyamo bhavatsthāṇoḥ purataḥ sthāṇusannibhaḥ |
 iti stutiṃ samākarṇya muneścaṃdravibhūṣaṇaḥ |
uvāca ca prasannātmā varaṃ brūhīti taṃ munim || 67 ||
[Analyze grammar]

jaigīṣavya uvāca |
yadi prasanno deveśa tatastava padāṃbujāt |
mā bhavāni bhavānīśa dūraṃ dūrapadaprada || 68 ||
[Analyze grammar]

aparaśca varo nātha deyoyamavicārataḥ |
yanmayā sthāpitaṃ liṃgaṃ tatra sānnidhyamastu te || 69 ||
[Analyze grammar]

īśvara uvāca |
jaigīṣavya mahābhāga yaduktaṃ bhavatānagha |
tadastu sarvaṃ tebhīṣṭaṃ varamanyaṃ dadāmi ca || 70 ||
[Analyze grammar]

yogaśāstraṃ mayā dattaṃ tava nirvāṇasādhakam |
sarveṣāṃ yogināṃ madhye yogācāryo'stu vai bhavān || 71 ||
[Analyze grammar]

rahasyaṃ yogavidyāyā yathāvattvaṃ tapodhana |
saṃvetsyase prasādānme yena nirvāṇamāpsyasi || 72 ||
[Analyze grammar]

yathā nadī yathā bhṛṃgī somanaṃdī yathā tathā |
tvaṃ bhaviṣyasi bhakto me jarāmaraṇavarjitaḥ || 73 ||
[Analyze grammar]

saṃti vratāni bhūyāṃsi niyamāḥ saṃtyanekadhā |
tapāṃsi nānā saṃtyatra saṃti dānānyanekaśaḥ || 74 ||
[Analyze grammar]

śreyasāṃ sādhanānyatra pāpaghnānyapi sarvathā |
paraṃ hi paramaścaiṣa niyamo yastvayā kṛtaḥ || 75 ||
[Analyze grammar]

paro hi niyamaścaiṣa māṃ vilokya yadaśyate |
māmanālokya yadbhuktaṃ tadbhuktaṃ kevalatvagham || 76 ||
[Analyze grammar]

asamarcya ca yo bhuṅkte patrapuṣpaphalairapi |
retobhakṣī bhavenmūḍhaḥ sa janmānyekaviṃśatim || 77 ||
[Analyze grammar]

mahato niyamasyāsya bhavatānuṣṭhitasya vai |
nārhaṃti ṣoḍaśī mātrāmapyanye niyamā yamāḥ || 78 ||
[Analyze grammar]

ato maccaraṇābhyāśe tvaṃ nivatsyasi sarvathā |
ato naiḥśreyasīṃ lakṣmīṃ tatraiva prāpsyasi dhruvam || 79 ||
[Analyze grammar]

jaigīṣavyeśvaraṃ nāma liṃgaṃ kāśyāṃ sudurlabham |
trīṇi varṣāṇi saṃsevya labhedyogaṃ na saṃśayaḥ || 80 ||
[Analyze grammar]

jaigīṣavyaguhāṃ prāpya yogābhyasanatatparaḥ |
ṣaṇmāsena labhetsiddhiṃ vāñchitāṃ madanugrahāt || 81 ||
[Analyze grammar]

tava liṃgamidaṃ bhaktaiḥ pūjanīyaṃ prayatnataḥ |
vilokyā ca guhā ramyā parāsiddhimabhīpsubhiḥ || 82 ||
[Analyze grammar]

atra jyeṣṭheśvarakṣetre tvalliṃgaṃ sarvasiddhidam |
nāśayedaghasaṃghāni dṛṣṭaṃ spṛṣṭaṃ samarcitam || 83 ||
[Analyze grammar]

asmiñjyeṣṭheśvarakṣetre saṃbhojya śivayoginaḥ |
koṭibhojyaphalaṃ samyagekaikaparisaṃkhyayā || 84 ||
[Analyze grammar]

jaigīṣavyeśvaraṃ liṃgaṃ gopanīyaṃ prayatnataḥ |
kalau kaluṣabuddhīnāṃ purataśca viśeṣataḥ || 85 ||
[Analyze grammar]

kariṣyāmyatra sāṃnidhyamasmiṃlliṃge tapodhana |
yogasiddhipradānāya sādhakebhyaḥ sadaiva hi || 86 ||
[Analyze grammar]

dade śṛṇu mahābhāga jaigīṣavyāparaṃ varam |
tvayedaṃ yatkṛtaṃ stotraṃ yogasiddhikaraṃ param || 87 ||
[Analyze grammar]

mahāpāpaughaśamanaṃ mahāpuṇyapravardhanam |
mahābhītipraśamanaṃ mahābhaktivivardhanam || 88 ||
[Analyze grammar]

etatstotrajapātpuṃsāmasādhyaṃ naiva kiṃcana |
tasmātsarvaprayatnena japanīyaṃ susādhakaiḥ 4 || 89 ||
[Analyze grammar]

iti dattvā varaṃ tasmai smarāriḥ smeralocanaḥ |
dadarśa brāhmaṇāṃ statra sametānkṣetravāsinaḥ || 90 ||
[Analyze grammar]

skaṃda uvāca |
niśamyākhyānamatulametatprājñaḥ prayatnataḥ |
niṣpāpo jāyate martyo nopasargaiḥ prabādhyate || 91 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍa uttarārdhe jyeṣṭheśākhyānaṃ nāma triṣaṣṭitamo'dhyāyaḥ || 63 ||
[Analyze grammar]