Chapter 10

[English text for this chapter is available]

skaṃda uvāca |
uktā paṃcanadotpattirmitrāvaruṇanaṃdana |
idānīṃ kathayiṣyāmi mādhavāviṣkṛtiṃ parām || 1 ||
[Analyze grammar]

yāṃ śrutvā śraddhayā dhīmānpāpebhyo mucyate kṣaṇāt |
na ca śriyā viyujyeta saṃyujyeta vṛṣeṇa ca || 2 ||
[Analyze grammar]

āgatya maṃdarādadrerupeṃdraścaṃdraśekharam |
āpṛcchya tārkṣyarathagaḥ kṣaṇādvārāṇasīṃ purīm || 3 ||
[Analyze grammar]

divo dāsaṃ mahīpālaṃ samuccāṭya svamāyayā |
sthitvā pādodake tīrthe keśavākhya svarūpataḥ || 4 ||
[Analyze grammar]

mahimānaṃ paraṃ kāśyāṃ vicārya suvicārya ca |
dṛṣṭvā paṃcanadaṃ tīrthaṃ parāṃ mudamavāpa ha || 5 ||
[Analyze grammar]

uvāca ca prasannātmā puṃḍarīkavilocanaḥ |
agaṇyā api vaikuṃṭha guṇā vigaṇitā mayā || 6 ||
[Analyze grammar]

kva kṣīranīradhau saṃti tāvaṃto nirmalā guṇāḥ |
yāvaṃto vijayaṃ tetra kāśyāṃ paṃcanade hrade || 7 ||
[Analyze grammar]

śvetadvīpepi sāmagrī kva guṇānāṃ garīyasī |
īdṛśī yādṛśī kāśyāṃ dhūtapāpesti pāvanī || 8 ||
[Analyze grammar]

mude kaumodakī sparśastathā na mama jāyate || dhūtapāpāṃbu saṃparko yathā bhavati sarvathā || 9 ||
[Analyze grammar]

na kṣīranīradhijayā sukhaṃ me śliṣṭagātrayā |
tathā bhavedyathātra syātspṛṣṭayā dhūtapāpayā || 10 ||
[Analyze grammar]

itthaṃ paṃcanade tīrthe kṣīranīradhijādhavaḥ |
saṃpreṣya tārkṣyaṃ tryakṣāgre vṛttāṃtaviniveditum || 11 ||
[Analyze grammar]

ānaṃdakānanabhavaṃ divodāsa kṣamāpateḥ |
saṃvarṇayanguṇagrāmaṃ puṇyaṃ pāṃcanadodbhavam || 12 ||
[Analyze grammar]

sukhopaviṣṭaḥ saṃhṛṣṭaḥ sudṛṣṭirviṣṭaraśravāḥ |
dṛṣṭavāṃstapasā juṣṭamapuṣṭāṃgaṃ tapodhanam || 13 ||
[Analyze grammar]

sa ṛṣistaṃ samabhyetya puṃḍarīkākṣamacyutam |
upopaviṣṭakamalaṃ vanamālāvirājitam || 14 ||
[Analyze grammar]

śaṃkhapadmagadācakra caṃcatkaracatuṣṭayam |
kaustubhodbhāsitoraskaṃ pītakauśeyavāsasam || 15 ||
[Analyze grammar]

sunīleṃdīvararuciṃ susnigdha madhurākṛtim |
nābhīhradalasatpadma supāṭalaradacchadam || 16 ||
[Analyze grammar]

dāḍimībījadaśanaṃ kirīṭadyotitāṃbaram |
deveṃdravaṃditapadaṃ sanakādipariṣṭutam || 17 ||
[Analyze grammar]

divyarṣibhirnāradādyaiḥ parigītamahodayam |
prahlādādyairbhāgavataiḥ parinaṃditamānasam || 18 ||
[Analyze grammar]

dhṛtaśārṅgadhanurdaṃḍaṃ daṃḍitākhiladānavam |
madhukaiṭabhahaṃtāraṃ kaṃsavidhvaṃsasūcakam || 19 ||
[Analyze grammar]

kaivalyaṃ yatparaṃ brahma nirākāramagocaram |
taṃ puṃ mūrtyā pariṇataṃ bhaktānāṃ bhaktihetutaḥ || 20 ||
[Analyze grammar]

vedāviduryadākāraṃ naivopaniṣadoditam |
brahmādyā na ca gīrvāṇāścakre netrātithiṃ satam || 21 ||
[Analyze grammar]

praṇanāma mudāyuktaḥ kṣitivinyastamastakaḥ |
sa ṛṣistaṃ hṛṣīkeśamagnibiṃdurmahātapāḥ || 22 ||
[Analyze grammar]

tuṣṭāva parayā bhaktyā maulibaddhakarāṃjaliḥ |
adhyastavistīrṇaśilaṃ balidhvaṃsinamacyutam || 23 ||
[Analyze grammar]

tatra paṃcanadābhyāśe mārkaṃḍeyādi sevite |
goviṃdamagnibiṃduḥ sa stutavāṃstuṣṭamānasaḥ || 24 ||
[Analyze grammar]

agnibiṃduruvāca |
oṃ namaḥ puṃḍarīkākṣa bāhyāṃtaḥ śaucadāyine |
sahasraśīrṣā puruṣaḥ sahasrākṣaḥ sahasrapāt || 25 ||
[Analyze grammar]

namāmi te padadvaṃdvaṃ sarvadvaṃdvanivārakam |
nirdvaṃdvayā dhiyā viṣṇo jiṣṇvādi suravaṃdita || 26 ||
[Analyze grammar]

yaṃ stotuṃ nādhigacchaṃti vāco vācaspaterapi |
tamīṣṭe ka iha stotuṃ bhaktiratra balīyasī || 27 ||
[Analyze grammar]

api yo bhagavānīśo manaḥprācāmagocaraḥ |
samādṛśairalpadhībhiḥ kathaṃ stutyo vacaḥ paraḥ || 28 ||
[Analyze grammar]

yaṃ vāco na viśaṃtīśaṃ manatīha mano na yam |
mano girāmatītaṃ taṃ kaḥ stotuṃ śaktimānbhavet || 29 ||
[Analyze grammar]

yasya niḥśvasitaṃ vedāḥ sa ṣaḍaṃgapadakramāḥ |
tasya devasya mahimā mahānkairavagamyate || 30 ||
[Analyze grammar]

ataṃdritamanobuddhīṃdriyā yaṃ sanakādayaḥ |
dhyāyaṃtopi hṛdākāśe na viṃdaṃti yathārthataḥ || 31 ||
[Analyze grammar]

nāradādyairmunivarairābāla brahmacāribhiḥ |
gīyamānacaritropi na samyagyodhigamyate || 32 ||
[Analyze grammar]

taṃsūkṣmarūpamajamavyayamekamādyaṃ bahmādyagocaramajeyamanaṃtaśaktim |
nityaṃ nirāmayamamūrtamaciṃtyamūrtiṃ kastvāṃ carācara carācarabhinna vetti || 33 ||
[Analyze grammar]

ekaikameva tava nāmaharenmurāre janmārjitāghamaghināṃ ca mahāpadāḍhyam |
dadyātphalaṃ ca mahitaṃ mahato makhasya japtaṃ mukuṃdamadhusūdanamādhaveti || 34 ||
[Analyze grammar]

nārāyaṇeti narakārṇava tāraṇeti dāmodareti madhuheti caturbhujeti |
viśvaṃbhareti virajeti janārdaneti kvāstīha janma japatāṃ kva kṛtāṃtabhītiḥ || 35 ||
[Analyze grammar]

ye tvāṃ trivikrama sadā hṛdi śīlayaṃti kādaṃbinī rucira rociṣamaṃbujākṣam |
saudāmanīvilasitāṃśukavītamūrte tepi spṛśaṃti tava kāṃtimaciṃtyarūpām || 36 ||
[Analyze grammar]

śrīvatsalāṃchanaharecyutakaiṭabhāre goviṃdatārkṣya rathakeśavacakrapāṇe |
lakṣmīpate danujasūdana śārṅgapāṇe tvadbhaktibhāji na bhayaṃkvacidasti puṃsi || 37 ||
[Analyze grammar]

yairarcitosi bhagavaṃstulasīprasūnairdūrīkṛtaiṇamadasaurabhadivyagaṃdhaiḥ |
tānarcayaṃti divi devagaṇāḥsamastā maṃdāradāmabhiralaṃ vimalasvabhāvān || 38 ||
[Analyze grammar]

yadvāci nāma tava kāmadamabjanetra yacchrotrayostava kathā madhurākṣarāṇi |
yaccittabhittilikhitaṃ bhavatosti rūpaṃ nīrūpabhūpapadavī nahi tairdurāpā || 39 ||
[Analyze grammar]

ye tvāṃ bhajaṃti satataṃ bhuviśeṣaśāyiṃstāñchrīpate pitṛpatīṃdra kuberamukhyāḥ |
vṛṃdārakā divi sadaiva sabhājayaṃti svargāpavargasukhasaṃtatidānadakṣa || 40 ||
[Analyze grammar]

ye tvāṃ stuvaṃti satataṃ divitānstuvaṃti siddhāpsaromaragaṇā lasadabjapāṇe |
viśrāṇayatyakhilasiddhidakovinā tvāṃ nirvāṇacārukamalāṃ kamalāyatākṣa || 41 ||
[Analyze grammar]

tvaṃ haṃsi pāsi sṛjasi kṣaṇataḥ svalīlā līlāvapurdhara viriṃcinatāṃghriyugma |
viśvaṃ tvameva paraviśvapatistvameva viśvasyabījamasi tatpraṇatosmi nityam || 42 ||
[Analyze grammar]

stotā tvameva danujeṃdraripo stutistvaṃ stutyastvameva sakalaṃ hi bhavānihaikaḥ |
tvatto na kiṃcidapi bhinnamavaimi viṣṇo tṛṣṇāṃ sadā kṛṇuhi me bhavajāṃbhavāre || 43 ||
[Analyze grammar]

iti stutvā hṛṣīkeśamagnibiṃdurmahātapāḥ |
tasthau tūṣṇīṃ tato viṣṇuruvāca varado munim || 44 ||
[Analyze grammar]

śrīviṣṇuruvāca |
agnibiṃdo mahāprājña mahatā tapasāṃnidhe |
varaṃ varaya suprītastavādeyaṃ na kiṃcana || 45 ||
[Analyze grammar]

agnibiṃduruvāca |
yadi prītosi bhagavanvaikuṃṭheśa jagatpate |
kamalākāṃta taddehi yadiha prārthayāmyaham || 46 ||
[Analyze grammar]

kṛtānujñotha hariṇā bhrūbhaṃgena sa tāpasaḥ |
kṛtapraṇāmo hṛṣṭātmā varayāmāsa keśavam || 47 ||
[Analyze grammar]

bhagavansarvagopīha tiṣṭha paṃcanade hrade |
hitāya sarva jaṃtūnāṃ mumukṣūṇāṃ viśeṣataḥ || 48 ||
[Analyze grammar]

lakṣmīśe na varo mahyameṣa deyo'vicārataḥ |
nānyaṃ varaṃ samīhehaṃ bhaktiṃ ca tvapadāṃbuje || 49 ||
[Analyze grammar]

iti śrutvā varaṃ tasyāgnibiṃdormadhusūdanaḥ |
prītaḥ paropakārārthaṃ tathetyāhābdhijāpatiḥ || 50 ||
[Analyze grammar]

śrīviṣṇuruvāca |
agnibiṃdo muniśreṣṭha sthāsyāmyahamiha dhruvam |
kāśībhaktimatāṃ puṃsāṃ muktimārgaṃ samādiśan || 51 ||
[Analyze grammar]

mune punaḥ prasannosmi varaṃ brūhi dadāmi te |
atīva mama bhaktosi bhaktistestu dṛḍhā mayi || 52 ||
[Analyze grammar]

ādāveva hi tiṣṭhāsurahamatra taponidhe |
tatastvayā samabhyarthi sthāsyāmyatra sadaiva hi || 53 ||
[Analyze grammar]

prāpya kāśīṃ sudurmedhāḥ kastyajejjñānavānyadi |
anarghyaṃ prāpya māṇikyaṃ hitvā kācaṃ ka īhate || 54 ||
[Analyze grammar]

alpīyasā śrameṇeha vapuṣo vyayamātrataḥ |
avaśyaṃ gatvarasyāśu yathāmuktistathā kva hi || 55 ||
[Analyze grammar]

vinimayya jarājīrṇaṃ dehaṃ pārthivamatra vai |
prājñāḥ kimu na gṛhṇīyuramṛtaṃ nairjaraṃ vapuḥ || 56 ||
[Analyze grammar]

na tapobhirna vā dānairna yajñairbahudakṣiṇaiḥ |
anyatra labhyate mokṣo yathā kāśyāṃ tanu vyayāt || 57 ||
[Analyze grammar]

api yogaṃ hi yuṃjānā yogino yatamānasāḥ |
naikenajanmanā muktāḥ kāśyāṃ muktā vapurvyayāt || 58 ||
[Analyze grammar]

idameva mahādānamidameva mahattapaḥ |
idameva vrataṃ śreṣṭhaṃ yatkāśyāṃ mriyate tanuḥ || 59 ||
[Analyze grammar]

sa eva vidvāñjagati sa eva vijiteṃdriyaḥ |
sa eva puṇyavāndhanyo labdhvā kāśīṃ na yastyajet || 60 ||
[Analyze grammar]

tāvatsthāsyāmyahaṃ cātra yāvatkāśī mune tviha |
pralayepi na nāśosyāḥ śivaśūlāgra susthiteḥ || 61 ||
[Analyze grammar]

ityākarṇya giraṃ viṣṇoragnibiṃdurmahāmuniḥ |
prahṛṣṭaromā provāca punaranyaṃ varaṃ vṛṇe || 62 ||
[Analyze grammar]

māpate mama nāmnātra tīrthe paṃcanade śubhe |
abhaktebhyopi bhaktebhyaḥ sthito muktiṃ sadādiśa || 63 ||
[Analyze grammar]

yetra paṃcanade snātvā gatvā deśāṃtareṣvapi |
narā paṃcatvamāpannā muktiṃ tebhyopi vai diśa || 64 ||
[Analyze grammar]

yetu paṃcanade snātvā tvāṃ bhajiṣyaṃti mānavāḥ |
calācalāpi dvairūpā mā tyākṣīcchrīśca tānnarān || 65 ||
[Analyze grammar]

śrīviṣṇuruvāca |
evamastvagnibiṃdotra bhavatā yadvṛtaṃmune |
tvannāmno'rdhena me nāma mayā saha bhaviṣyati || 66 ||
[Analyze grammar]

biṃdumādhava ityākhyā mama trailokyaviśrutā |
kāśyāṃ bhaviṣyati mune mahāpāpaugha ghātinī || 67 ||
[Analyze grammar]

ye māmatra narāḥ puṇyāḥ puṇye paṃcanade hrade |
sadā saparyayiṣyaṃti teṣāṃ saṃsārabhīḥ kutaḥ || 68 ||
[Analyze grammar]

vasusvarūpiṇī lakṣmīrlakṣmīrnirvāṇasaṃjñikā |
tatpārśvagā sadā yeṣāṃ hṛdi paṃcanade hyaham || 69 ||
[Analyze grammar]

yairna paṃcanadaṃ prāpya vasubhiḥ prīṇitā dvijāḥ |
āśulabhyavipattīnāṃ teṣāṃ tadvasuroditi || 70 ||
[Analyze grammar]

ta eva dhanyā lokesminkṛtakṛtyāsta eva hi |
prāpya yairmama sāṃnidhyaṃ vasavo mama sātkṛtāḥ || 71 ||
[Analyze grammar]

biṃdutīrthamidaṃ nāma tava nāmnā bhaviṣyati |
agnibiṃdo muniśreṣṭha sarvapātakanāśanam || 72 ||
[Analyze grammar]

kārtike biṃdutīrthe yo brahmacaryaparāyaṇaḥ |
snāsyatyanudite bhānau bhānujāttasya bhīḥ kutaḥ || 73 ||
[Analyze grammar]

api pāpasahasrāṇi kṛtvā mohena mānavaḥ |
ūrje dharmanade snāto niṣpāpo jāyate kṣaṇāt || || 74 ||
[Analyze grammar]

yāvatsvasthosti dehoyaṃ yāvanneṃdriyaviklavaḥ |
tāvadvratāni kurvīta yato dehaphalaṃ vratam || 75 ||
[Analyze grammar]

ekabhaktena naktena tathaivāyācitena ca |
upavāsena dehoyaṃ saṃśodhyo śucibhājanam || 76 ||
[Analyze grammar]

kṛcchracāṃdrāyaṇādīni kartavyāni prayatnataḥ |
aśuciḥ śucitāmeti kāyo yadvratadhāraṇāt || 77 ||
[Analyze grammar]

vrataiḥ saṃśodhite dehe dharmo vasati niścalaḥ |
arthakāmau sanirvāṇau tatra yatra vṛṣa sthitiḥ || 78 ||
[Analyze grammar]

tasmādvratāni satataṃ caritavyāni mānavaiḥ |
dharmasānnidhya kartṛṇi caturvargaphalepsubhiḥ || 79 ||
[Analyze grammar]

sadā kartuṃ na śaknoti vratāni yadi mānavaḥ |
cāturmāsyamanuprāpya tadā kuryātprayatnataḥ || 80 ||
[Analyze grammar]

bhūśayyā brahmacaryaṃ ca kiṃcidbhakṣyaniṣedhanam |
ekabhaktādi niyamo nityadānaṃ svaśaktitaḥ || 81 ||
[Analyze grammar]

purāṇaśravaṇaṃ caiva tadarthācaraṇaṃ punaḥ |
akhaṃḍadīpodbodhaśca mahāpūjeṣṭadaivate || 82 ||
[Analyze grammar]

prabhūtāṃkurabījāḍhye deśe cāpi gatāgatam |
yatnena varjayeddhīmānmahādharmavivṛddhaye || 83 ||
[Analyze grammar]

asaṃbhāṣyā na saṃbhāṣyāścāturmāsya vratasthitaiḥ |
maunaṃ cāpi sadā kāryaṃ tathyaṃ vaktavyameva vā || 84 ||
[Analyze grammar]

niṣpāvāṃśca masūrāṃśca kodravānvarjayedvratī |
sadā śucibhirāstheyaṃ spraṣṭavyo nāvratī janaḥ || 85 ||
[Analyze grammar]

daṃtakeśāṃbarādīni nityaṃ śodhyāni yatnataḥ |
aniṣṭaciṃtā no kāryā vratinā hṛdyapi kvacit || 86 ||
[Analyze grammar]

dvādaśasvapi māseṣu vratino yatphalaṃ bhavet |
cāturmāsyavratabhṛtāṃ tatphalaṃ syādakhaṃḍitam || 87 ||
[Analyze grammar]

caturṣvapi ca māseṣu na sāmarthyaṃ vrate yadi |
tadorje vratinā bhāvyamapyabdaphalamicchatā || 88 ||
[Analyze grammar]

avrataḥ kārtiko yeṣāṃ gato mūḍhadhiyāmiha |
teṣāṃ puṇyasya leśopi na bhavetsūkarātmanām || 89 ||
[Analyze grammar]

kṛcchraṃ vā cātikṛcchraṃ vā prājāpatyamathāpi vā |
saṃprāpte kārtike māsi kuryācchaktyāti puṇyavān || 90 ||
[Analyze grammar]

ekāṃtaraṃ vrataṃ kuryāttrirātra vratameva vā |
paṃcarātraṃ saptarātraṃ saṃprāpte kārtike vratī || 91 ||
[Analyze grammar]

pakṣavrataṃ vā kurvīta māsopoṣaṇameva vā |
norjo vaṃdhyo vidhātavyo vratinā kenacitkvacit || 92 ||
[Analyze grammar]

śākāhāraṃ payohāraṃ phalāhāramathāpi vā |
caredyavānnāhāraṃ vā saṃprāpte kārtike vratī || 93 ||
[Analyze grammar]

nityanaimittikaṃ snānaṃ kuryādūrje vratī naraḥ |
brahmacaryaṃ caredūrje mahāvrataphalārthavān || 94 ||
[Analyze grammar]

bāhulaṃ brahmacaryeṇa yaḥ kṣipecchucimānasaḥ |
samastaṃ hāyanaṃ tena brahmacaryakṛtaṃ bhavet || 95 ||
[Analyze grammar]

yastu kārtikikaṃ māsamupavāsaiḥ samāpayet |
apyabdamapi teneha bhavetsamyagupoṣitam || 96 ||
[Analyze grammar]

śākāhārapayohārairūrjoṃ yairativāhitaḥ |
akhaṃḍitā śarattena tadāhāreṇa yāpitā || 97 ||
[Analyze grammar]

patrabhojī bhavedūrje kāṃsyaṃ tyājyaṃ prayatnataḥ |
yo vratī kāṃsyabhojī syānna tadvrataphalaṃ labhet || 98 ||
[Analyze grammar]

kāṃsyasya niyame dadyātkāṃsyaṃ sarpiḥ prapūritam |
ūrje na bhakṣayetkṣaudramatikṣudragatipradam || 99 ||
[Analyze grammar]

madhutyāge ghṛtaṃ dadyātpāyasaṃ ca saśarkaram |
abhyaṃge'bhyavahāre ca tailamūrje vivarjayet || 100 ||
[Analyze grammar]

bhūyātsa nārakī dehī tatrābhyaṃgādyatonagha |
tailatyāge tilāndadyāddroṇamātrānsa kāṃcanān || 1 ||
[Analyze grammar]

kārtike matsyabhojī yaḥ sa taimīṃ yonimṛcchati |
bāhule māṃsabhojī yaḥ sa kṛmiḥpūyaśoṇite || 2 ||
[Analyze grammar]

māṃsāśinopi ye bhūpāstyajeyustepi kārtike |
matsyamāṃsāni saṃtyajya kārttike vratatatparaḥ || 3 ||
[Analyze grammar]

matsyamāṃsādanāddoṣādbahirbhavati niścitam |
niyame matsyamāṃsānāṃ dadyātkārtikike vratī |
kūśmāṃḍāni samāṣāṇi daśasvarṇayutānyapi || 4 ||
[Analyze grammar]

kārtike mīnabhojī yaḥ sośnātyamṛtamevahi |
sughaṃṭāṃ satilāṃ maunī sahiraṇyāṃ pradāpayet || 5 ||
[Analyze grammar]

kārtike lavaṇaṃ tyaktaṃ yena vratabhṛtā satā |
tyaktāḥ sarve rasāstena tattyāgī gāṃ pradāpayet || 6 ||
[Analyze grammar]

bhūśayyāṃ kārtike kurvanna bhuvaṃ saṃspṛśedvratī |
paryaṃkaṃ bhūśayo dadyātsatūlaṃ sopadhānakam || 7 ||
[Analyze grammar]

dīpaṃ yaḥ kārtike dadyādakhaṃḍaṃ ghṛtavartikam |
mohāṃdha tamasaṃ prāpya sa na gacchati durgatim || 8 ||
[Analyze grammar]

yaḥ kuryātkārtike māse rajanyāṃ dīpakaumudīm |
tāmisraṃ cāṃdhatāmisraṃ na sa paśyetkadācana || 9 ||
[Analyze grammar]

pāpāṃdhakārasaṃkruddhaḥ kārtike dīpadānataḥ |
krodhāṃdhakāritamukhaṃ bhāskariṃ sa na vīkṣate || 110 ||
[Analyze grammar]

sa uddyotamayaṃ paśyettrailokyaṃ sacarācaram |
prabodhayenmamāgre yo dīpaṃ sojvalavartikam || 11 ||
[Analyze grammar]

paṃcāmṛtānāṃ kalaśairūrje māṃ snāpayennaraḥ |
kṣīrābdhitaṭamāsādya vasetkalpaṃ sa puṇyavān || 12 ||
[Analyze grammar]

pratikṣapaṃ kārtikike kurvañjyotsnāṃ pradīpajām |
mamāgre bhaktisaṃyukto garbhadhvāṃtaṃ na saṃviśet || 13 ||
[Analyze grammar]

ājyavartikamūrje yo dīpaṃ megre prabodhayet |
buddhibhraṃśaṃ na cāpnoti mahāmṛtyubhaye sati || 14 ||
[Analyze grammar]

kārtike māsi me yātrā yaiḥ kṛtā bhaktitatparaiḥ |
biṃdutīrthe kṛtasnānaisteṣāṃ muktirna dūrataḥ || 15 ||
[Analyze grammar]

vratinaḥ kārtike māsi snātasya vidhivanmama |
dāmodaragṛhāṇārghyaṃ danujeṃdraniṣūdana || 16 ||
[Analyze grammar]

snāne naimittike kṛṣṇa kārtike pāpaśoṣaṇe |
gṛhṇātvarghyaṃ mayā dattaṃ rādhayā sahito bhavān || 17 ||
[Analyze grammar]

imau maṃtrau samuccārya yorghyaṃ mahyaṃ prayacchati |
suvarṇaratna puṣpāṃbu yujā śaṃkhena puṇyavān || 18 ||
[Analyze grammar]

suvarṇapūrṇapṛthivī saṃkalpodakapūrvakam |
tena dattā bhavetsamyaksupātrāya suparvaṇi || 19 ||
[Analyze grammar]

ekādaśīṃ samāsādya prabodhakaraṇīṃ mama |
biṃdutīrthakṛtasnāno rātrau jāgaraṇānvitaḥ || 120 ||
[Analyze grammar]

dīpānprobodhya bahuśo mamālaṃkṛtya śaktitaḥ |
tauryatrikavinodena purāṇaśravaṇādibhiḥ || 21 ||
[Analyze grammar]

mahāmahotsavaṃ kṛtvā yāvatpūrṇā tithirbhavet |
tatrānnadānaṃ bahuśaḥ kṛtvāmatprītaye naraḥ || 22 ||
[Analyze grammar]

mahāpātakayuktopi na viśetpramadodaram |
biṃdumādhavanāmānaṃ yo māmatra samarcayet || 23 ||
[Analyze grammar]

biṃdutīrthakṛtasnāno nirvāṇaṃ sa hi viṃdati |
ādimādhavanāmāhaṃ pūjyaḥ satyayuge mune || 24 ||
[Analyze grammar]

anaṃtamādhavo jñeyastretāyāṃ sarvasiddhidaḥ |
śrīdamādhavasaṃjñohaṃ dvāpare paramārthakṛt || 25 ||
[Analyze grammar]

kalau kalimaladhvaṃsī jñeyohaṃ biṃdumādhavaḥ |
kalau kalmaṣasaṃpannā na māṃ viṃdaṃti mānavāḥ || 26 ||
[Analyze grammar]

mamaiva māyayā mūḍhā bhedavādaparāyaṇāḥ |
mama bhaktiṃ prakurvāṇā ye viśveśaṃ dviṣaṃti vai || 27 ||
[Analyze grammar]

vidviṣo mama te jñeyāḥ piśācapadagāminaḥ |
paiśācīṃ yonimāpyāpi kālabhairavaśāsanāt || 28 ||
[Analyze grammar]

triṃśadvarṣa sahasrāṇi uṣitvā duḥkhasāgare |
viśveśānugrahādeva tato mokṣamavāpnuyuḥ || 29 ||
[Analyze grammar]

tasmāddveṣo na kartavyo viśveśe paramātmani |
viśveśa dveṣiṇāṃ puṃsāṃ prāyaścittaṃ yato nahi || 130 ||
[Analyze grammar]

manasāpi hi viśveśaṃ vidviṣaṃtīha ye'dhamāḥ |
adhyāsateṃdhatāmisraṃ mṛtāstenyatra saṃtatam || 31 ||
[Analyze grammar]

śivaniṃdāparā ye ca ye pāśupataniṃdakāḥ |
vidviṣo mama te jñeyā patato narake'śucau || 32 ||
[Analyze grammar]

aṣṭāviṃśati koṭīṣu narakeṣu krameṇa hi |
kalpaṃ kalpaṃ vaseyuste ye viśveśvaraniṃdakāḥ || 33 ||
[Analyze grammar]

viśveśānugrahaṃ prāpya munehamapi muktidaḥ |
madbhaktaistadviśeṣeṇa sevyo viśveśvaro'niśam || 34 ||
[Analyze grammar]

iyaṃ vārāṇasī jñeyā mune pāśupatasthalī |
tasmātpaśupatiḥ sevyaḥ kāśyāṃ niśreyasārthibhiḥ || 35 ||
[Analyze grammar]

atra paṃcanade tīrthe snāti viśveśvaraḥ svayam |
ūrje sadaiva sagaṇaḥ saskaṃdaḥ saparicchadaḥ || 36 ||
[Analyze grammar]

brahmā savedaḥ samakho brahmāṇyādyāśca mātaraḥ |
saptābdhayaḥ sasaritaḥ snāṃtyūrje dhūtapāpake || 37 ||
[Analyze grammar]

sacetanā hi yāvaṃtastrailokye dehadhāriṇaḥ |
tāvaṃtaḥ snātumāyāṃti kārtike dhūtapāpake || 38 ||
[Analyze grammar]

yairna paṃcanade snātaṃ prāpya kārtikikaṃ śubham |
jalabududavatteṣāṃ vṛthājanma śarīriṇām || 39 ||
[Analyze grammar]

ānaṃdakānanaṃ puṇyaṃ puṇyaṃ pāṃcanadaṃ tataḥ |
tatopi mama sānnidhyamagnibiṃdo mahāmune || 140 ||
[Analyze grammar]

anenaivānumānena viddhi paṃcanadasya vai |
mahimānaṃ mahāprājña sarvatīrthottamottamam || 41 ||
[Analyze grammar]

śrutvāpi yaṃ mahāprājño mahāpāpaiḥ pramucyate |
viṣṇormukhāditi śrutvā sognibiṃdurmahāmuniḥ || 42 ||
[Analyze grammar]

punaḥ praṇamya papraccha biṃdumādhavamacyutam || 43 ||
[Analyze grammar]

agnibiṃduruvāca |
bhagavañchrotumicchāmi biṃdumādhava tadvada |
katidhā tava rūpāṇi kāśyāṃ saṃti janārdana || 44 ||
[Analyze grammar]

bhaviṣyāṇyapi kānīha tāni me kathayācyuta |
yāni saṃpūjyate bhaktāḥ prāpsyaṃti kṛtakṛtyatām || 145 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍa uttarārdhe biṃdumādhavāvirbhāvonāma ṣaṣṭitamo'dhyāyaḥ || 60 ||
[Analyze grammar]