Chapter 9

[English text for this chapter is available]

agastya uvāca |
sarvajña hṛdayānaṃda gaurīcuṃbitamūrdhaja |
tārakāṃtaka ṣaḍvaktra tāriṇe bhadrakāriṇe || 1 ||
[Analyze grammar]

sarvajñānanidhe tubhyaṃ namaḥ sarvajñasūnave |
sarvathā jitamārāya kumārāya mahātmane || 2 ||
[Analyze grammar]

kāmārimardhanārīśaṃ vīkṣya kāmakṛtaṃ kila |
yo jigāya kumāropi māraṃ tasmai namostu te || 3 ||
[Analyze grammar]

yaduktaṃ bhavatā skaṃda māyādvijavapurhariḥ |
kāśyāṃ paṃcanadaṃ tīrthamadhyāsātīva pāvanam || 4 ||
[Analyze grammar]

bhūrbhuvaḥsvaḥ pradeśeṣu kāśīparamapāvanam |
tatrāpi hariṇājñāyi tīrthaṃ paṃcanadaṃ param || 5 ||
[Analyze grammar]

kutaḥ paṃcanadaṃ nāma tasya tīrthasya ṣaṇmukha |
kutaśca sarvatīrthebhyastadāsītpāvanaṃ param || 6 ||
[Analyze grammar]

kathaṃ ca bhagavānviṣṇuraṃtarātmā jagatpatiḥ |
sarveṣāṃ jagatāṃ pātā kartā hartā ca līlayā || 7 ||
[Analyze grammar]

arūpo rūpamāpanno hyavyakto vyaktatāṃ gataḥ |
nirākāropi sākāro niṣprapaṃcaḥ prapaṃcabhāk || 8 ||
[Analyze grammar]

ajanmānekajanmā ca tvanāmāsphuṭanāmabhṛt |
nirālaṃbo'khilālaṃbo nirguṇopi guṇāspadam || 9 ||
[Analyze grammar]

ahṛṣīkohṛṣīkeśo pyanaṃghrirapisarvagaḥ |
upasaṃhṛtya rūpaṃ svaṃ sarvavyāpī janārdanaḥ || 10 ||
[Analyze grammar]

sthitaḥ sarvātmabhāvena tīrthe paṃcanade pare |
etadākhyāhi ṣaḍvaktra paṃcavaktrādyathā śrutam || 13 ||
[Analyze grammar]

skaṃda uvāca |
kathayāmi kathāmetāṃ namaskṛtya maheśvaram |
sarvāghaugha praśamanīṃ sarvaśreyovidhāyinīm || 32 ||
[Analyze grammar]

yathā paṃcanadaṃ tīrthaṃ kāśyāṃ prathitimāgatam |
yannāmagrahaṇādeva pāpaṃ yāti sahasradhā || 13 ||
[Analyze grammar]

prayāgopi ca tīrtheśo yatra sākṣātsvayaṃ sthitaḥ |
pāpināṃ pāpasaṃghātaṃ prasahya nijatejasā || 14 ||
[Analyze grammar]

haraṃti sarvatīrthāni prayāgasya balena hi |
tāni sarvāṇi tīrthāni māghe makarage ravau || 15 ||
[Analyze grammar]

pratyabdaṃ nirmalāni syustīrtharāja samāgamāt |
prayāgaścāpi tīrtheṃdraḥ sarvatīrthārpitaṃ malam || 16 ||
[Analyze grammar]

mahāghināṃ mahāghaṃ ca haretpāṃcanadādbalāt |
yaṃ saṃcayati pāpaughamāvarṣaṃ tīrthanāyakaḥ |
tamekamajjanādūrje tyajetpaṃcanade dhruvam || 17 ||
[Analyze grammar]

yathā paṃcanadotpattistathā ca kathayāmyaham |
niśāmaya mahābhāga mitrāvaruṇanaṃdana || 18 ||
[Analyze grammar]

purā vedaśirā nāma munirāsīnmahātapāḥ |
bhṛguvaṃśa samutpanno mūrto veda ivāparaḥ || 19 ||
[Analyze grammar]

tapasyatastasya muneḥ purodṛggocaraṃ gatā |
śucirapsarasāṃ śreṣṭhā rūpalāvaṇyaśālinī || 20 ||
[Analyze grammar]

tasyā darśanamātreṇa parikṣubdhaṃ munermanaḥ |
caskaṃda sa munistūrṇaṃ sātha bhītā varāpsarāḥ || 21 ||
[Analyze grammar]

dūrādeva namaskṛtya tamṛṣiṃ sābhyabhāṣata |
atīva vepamānāṃgī śucistacchāpabhītitaḥ || 22 ||
[Analyze grammar]

nāparādhnomyahaṃ kiṃcinmahogratapasāṃnidhe |
kṣaṃtavyaṃ me kṣamādhāra kṣamārūpāstapasvinaḥ || 23 ||
[Analyze grammar]

munīnāṃ mānasaṃ prāyo yatpadmādapi tanmṛdu |
striyaḥ kaṭhorahṛdayāḥ svarūpeṇaiva sattama || 24 ||
[Analyze grammar]

iti śrutvā vacastasyāḥ śucerapsaraso muniḥ |
vivekasetunā staṃbhīnmahāroṣanadīrayam || 25 ||
[Analyze grammar]

uvāca ca prasannātmā śuce śucirasi dhruvam |
na me'lpopi hi doṣotra na te doṣosti suṃdari || 26 ||
[Analyze grammar]

vahnisvarūpā lalanā navanīta samaḥ pumān |
anabhijñā vadaṃtīti vicārānmahadaṃtaram || 27 ||
[Analyze grammar]

snihyeduddhṛtasāropi vahneḥ saṃsparśamāpya vai |
citraṃ stryākhyā samādānātpumānsnihyati dūrataḥ || 28 ||
[Analyze grammar]

ataḥ śuce na bhetavyaṃ tvayā śuci manogate |
atarkitopasthitayā tvayā ca skhalitaṃ mayā || 29 ||
[Analyze grammar]

skhalanānna tathā hānirakāmāttapaso muneḥ |
yathā kṣaṇāṃdhīkaraṇāddhāniḥ koparayādareḥ || 30 ||
[Analyze grammar]

kopāttapaḥ kṣayaṃ yāti saṃcitaṃ yatsukṛcchrataḥ |
yathābhrapaṭalaṃ prāpya prakāśaḥ puṣpavaṃtayoḥ || 31 ||
[Analyze grammar]

anarthakāriṇaḥ krodhātkvārthānāṃparijṛbhaṇam |
kva vā khalajanotsedhātsādhūnāṃ parivardhanam || 32 ||
[Analyze grammar]

amarṣe karṣati mano manobhū saṃbhavaḥ kutaḥ |
vidhuṃtude tudatyuccairvidhuṃ kutrāsti kaumudī || 33 ||
[Analyze grammar]

jvalato roṣadāvāgneḥ kva vā śāṃtitaroḥ sthitiḥ |
dṛṣṭā kenāpi kiṃ kvāpi siṃhātkalabhasusthatā || 34 ||
[Analyze grammar]

tasmātsarvaprayatnena pratīpaḥ pratighātukaḥ |
caturvargasya dehasya pariheyo vipaścitā || 35 ||
[Analyze grammar]

idānīṃ śṛṇu kalyāṇi kartavyaṃ yattvayā śuce |
amoghabījā hi vayaṃ tadbījamurarī kuru || 36 ||
[Analyze grammar]

etasminrakṣite vīrye pariskanne tvadīkṣaṇāt || tvayā tava bhavitrekaṃ kanyāratnaṃ mahāśuci || 37 ||
[Analyze grammar]

ityuktā tena muninā punarjāteva sāpsarāḥ |
mahāprasāda ityuktvā muneḥ śukramajīgilat || 38 ||
[Analyze grammar]

atha kālena divyastrī kanyāratnamajījanat |
atīva nayanānaṃdi nidhānaṃ rūpasaṃpadām || 39 ||
[Analyze grammar]

tasyaiva vedaśirasa āśrame tāṃ nidhāya sā |
śucirapsarasāṃ śreṣṭhā jagāma ca yathepsitam || 40 ||
[Analyze grammar]

tāṃ ca vedaśirāḥ kanyāṃ snehena samavardhayat |
kṣīreṇa svāśramasthāyā hariṇyā hariṇīkṣaṇām || 41 ||
[Analyze grammar]

munirnāma dadau tasyai dhūtapāpeti cārthavat |
yannāmoccāraṇenāpi kaṃpate pātakāvalī || 42 ||
[Analyze grammar]

sarvalakṣaṇaśobhāḍhyāṃ sarvāvayava suṃdarīm |
munistatyāja notsaṃgātkṣaṇamātramapi kvacit || 43 ||
[Analyze grammar]

dinedine vardhamānāṃ tāṃ paśyanmumude bhṛśam |
kṣīranīradhivadramyāṃ niśi cāṃdramasīṃ kalām || 44 ||
[Analyze grammar]

athāṣṭavārṣikīṃ dṛṣṭvā tāṃ kanyāṃ sa munīśvaraḥ |
kasmai deyeti saṃcitya tāmeva samapṛcchata || 45 ||
[Analyze grammar]

vedaśirā uvāca |
ayi putri mahābhāge dhūtapāpe śubhekṣaṇe |
kasmai dadyāvarāya tvāṃ tvamevākhyāhi taṃ varam || 46 ||
[Analyze grammar]

atisnehārdracittasya janetuśceti bhāṣitam |
niśamya dhūtapāpā sā provāca vinatānanā || 47 ||
[Analyze grammar]

dhūtapāpovāca |
janetaryadyahaṃ deyā suṃdarāya varāya te |
tadā tasmai prayaccha tvaṃ yamahaṃ kathayāmi te || 48 ||
[Analyze grammar]

tubhyaṃ ca rocate tāta śṛṇotvavahito bhavān |
sarvebhyotipavitro yo yaḥ sarveṣāṃ namaskṛtaḥ || 49 ||
[Analyze grammar]

sarve yamabhilaṣyaṃti yasmātsarvasukhodayaḥ |
kadācidyo na naśyeta yaḥ sadaivānuvartate || 50 ||
[Analyze grammar]

ihāmutrāpi yo rakṣenmahāpadudayāddhruvam |
sarve manorathā yasmātparipūrṇā bhavaṃti hi || 51 ||
[Analyze grammar]

dinedine ca saubhāgyaṃ vardhate yasya sannidhau |
nairaṃtaryeṇa yatsevāṃ kurvato na bhayaṃ kvacit || 52 ||
[Analyze grammar]

yannāmagrahaṇādeva kepi vādhāṃ na kurvate |
yadādhāreṇa tiṣṭhaṃti bhuvanāni caturdaśa || 53 ||
[Analyze grammar]

evamādyā guṇā yasya varasya varaceṣṭitam |
tasmai prayaccha māṃ tāta mama tepīhaśarmaṇe || 54 ||
[Analyze grammar]

etacchrutvāpi tā tasyā bhṛśaṃ mudamavāpa ha |
dhanyosmi dhanyā me pūrve yeṣāmaiṣā sutānvaye || 55 ||
[Analyze grammar]

dhruvā hi dhūtapāpāsau yasyā īdṛgvidhā matiḥ |
īdṛgvidhairguṇagaṇairgarimṇā kotra vai bhavet || 56 ||
[Analyze grammar]

athavā sa kathaṃ labhyo vinā puṇyabharodayam |
iti kṣaṇaṃ samādhāya manaḥ sa munipuṃgavaḥ || 57 ||
[Analyze grammar]

jñānena taṃ samālocya varamīdṛgguṇodayam |
dhanyāṃ kanyāṃ babhāṣetha śṛṇu vatse śubhaiṣiṇi || 58 ||
[Analyze grammar]

pitovāca |
varasya ye tvayā proktā guṇā ete vicakṣaṇe |
eṣāṃ guṇānāmādhāro varostīti viniścitam || 59 ||
[Analyze grammar]

paraṃ sa sukhalabhyo na nitarāṃ subhagākṛtiḥ |
tapaḥ paṇena sa krayyaḥ sutīrthavipaṇau kvacit || 60 ||
[Analyze grammar]

tīrthabhāraiḥ sa sulabho na kaulīnyena kanyake |
na vedaśāstrābhyasanairna caiśvaryabalena vai || 61 ||
[Analyze grammar]

na sauṃdaryeṇa vapuṣā na buddhyā na parākramaiḥ |
ekayaiva manaḥ śuddhyā karaṇānāṃ jayena ca || 62 ||
[Analyze grammar]

mahātapaḥ sahāyena damadānadayāyujā |
labhyate sa mahāprājño nānyathā sadṛśaḥ patiḥ || 63 ||
[Analyze grammar]

iti śrutvātha sā kanyā pitaraṃ praṇipatya ca |
anujñāṃ prārthayāmāsa tapase kṛtaniścayā || 64 ||
[Analyze grammar]

skaṃda uvāca |
kṛtānujñā janetrā sā kṣetre paramapāvane |
tapastatāpa paramaṃ yadasādhyaṃ tapasvibhiḥ || 65 ||
[Analyze grammar]

kva sā bālātimṛdvaṃgī kva ca tattādṛśaṃ tapaḥ |
kaṭhoravarṣmasaṃsādhyamaho saccetaso dhṛtiḥ || 66 ||
[Analyze grammar]

dhārāsārā suvarṣāsu mahāvātavatīṣvalam |
śilāsu sāvakāśāsu sā bahvīranayanniśāḥ || 67 ||
[Analyze grammar]

śrutvā garjaravaṃ ghoraṃ dṛṣṭvā vidyuccamatkṛtīḥ |
āsārasīkaraiḥ klinnā na cakaṃpe manākca sā || 68 ||
[Analyze grammar]

taḍitsphuraṃtītvasakṛttamisrāsu tapovane |
yātāyātaṃ karotīva draṣṭuṃ tattapasaḥ sthitim || 69 ||
[Analyze grammar]

tapartureva sākṣācca kumārī kaitavātkila |
paṃcāgnīnparidhāyātra tapasyati tapovane || 70 ||
[Analyze grammar]

jalābhilāṣiṇī bālā na manāgapi sā pibat |
kuśāgratoyapṛṣataṃ paṃcāgniparitāpitā || 71 ||
[Analyze grammar]

romāṃca kaṃcukavatī vepamānatanucchadā |
paryakṣipatkṣapāḥ kṣāmā tapasā haimanīśca sā || 72 ||
[Analyze grammar]

niśīthinīṣu śiśire śrayaṃtī sārasaṃ rasam |
mene sā sārasaiḥ keyamudyatādyeti padminī || 73 ||
[Analyze grammar]

manasvināmapi manorāgatāṃ sṛjate madhau |
tadoṣṭhapallavādrāgo jahre mākaṃdapallavaiḥ || 74 ||
[Analyze grammar]

vasaṃte nivasaṃtī sā vane bālācalaṃmanaḥ |
cakre tapasyapi śrutvā kokilā kākalīravam || 75 ||
[Analyze grammar]

baṃdhujīve'dhararuciṃ kalahaṃse kalāgatīḥ |
nikṣepamiva sā kṣiptvā śaradyāsīttaporatā || 76 ||
[Analyze grammar]

apāstabhogasaṃparkā bhogināṃ vṛttimāśritā |
kṣududbodhanirodhāya dhūtapāpā tapasvinī || 77 ||
[Analyze grammar]

śāṇena maṇivallīḍhā kṛśāpyāyādanarghatām |
tathāpi tapasā kṣāmā didīpe tattanustarām || 78 ||
[Analyze grammar]

nirīkṣya tāṃ tapasyaṃtīṃ vidhiḥ saṃśuddhamānasām |
upetyovāca suprajñe prasannosmi varaṃ vṛṇu || 79 ||
[Analyze grammar]

sā caturvaktramālokya haṃsayānoparisthitam |
praṇamya prāṃjaliḥ prītā provācātha prajāpatim || 80 ||
[Analyze grammar]

dhūtapāpovāca |
pitāmaha varo mahyaṃ yadi deyo varaprada |
sarvebhyaḥ pāvanebhyopi kuru māmatipāvanīm || 81 ||
[Analyze grammar]

sraṣṭā tadiṣṭamākarṇya nitarāṃ tuṣṭamānasaḥ |
pratyuvācātha tāṃ bālāṃ vimalāṃ vimaleṣiṇīm || 82 ||
[Analyze grammar]

brahmovāca |
dhūtapāpe pavitrāṇi yāni saṃtyatra sarvataḥ |
tebhyaḥ pavitramatulaṃ tvamedhi varato mama || 83 ||
[Analyze grammar]

tisraḥ koṭyo'rdhakoṭī ca saṃti tīrthāni kanyake |
divi bhuvyaṃtarikṣe ca pāvanānyuttarottaram || 84 ||
[Analyze grammar]

tāni sarvāṇi tīrthāni tvattanau pratiloma vai |
vasaṃtu mama vākyena bhava sarvātipāvanī || 85 ||
[Analyze grammar]

ityuktvāṃtardadhe vedhāḥ sāpi nirdhūtakalmaṣā |
dhūtapāpoṭajaṃ prāptātho vedaśirasaḥ pituḥ || 86 ||
[Analyze grammar]

kadācittāṃ samālokya khelaṃtīmuṭajājire |
dharmastattapasākṛṣṭaḥ prārthayāmāsa kanyakām || 87 ||
[Analyze grammar]

dharma uvāca |
pṛthuśroṇi viśālākṣi kṣāmodari śubhānane |
krītaḥ svarūpasaṃpattyā tvayāhaṃ dehi me rahaḥ || 88 ||
[Analyze grammar]

nitarāṃ bādhate kāmastvatkṛte māṃ sulocane |
ajñātanāmnā sā tena prārthitetyasakṛdgrahaḥ || 89 ||
[Analyze grammar]

uvāca sā pitā dātā taṃ prārthaya sudurmate |
pitṛpradeyā yatkanyā śrutireṣā sanātanī || 90 ||
[Analyze grammar]

niśamyeti vaco dharmo bhāvinorthasya gauravāt |
punarnibaṃdhayāṃcakre 'padhṛtirdhṛtiśālinīm || 91 ||
[Analyze grammar]

dharma uvāca |
na prārthayehaṃ subhage pitaraṃ tava suṃdari |
gāṃdharveṇa vivāhena kuru me tvaṃ samīhitam || 92 ||
[Analyze grammar]

iti nirbaṃdhavadvākyaṃ sā niśamya kumārikā |
pituḥ kanyāphalaṃditsuḥ punarāheti taṃ dvijam || 93 ||
[Analyze grammar]

are jaḍamate mā tvaṃ punarbrūhīti yāhyataḥ |
ityuktopi kumāryā sa nātiṣṭhanmadanāturaḥ || 94 ||
[Analyze grammar]

tataḥ śaśāpa taṃ bālā prabalā tapaso balāt |
jaḍosi nitarāṃ yasmājjalādhāro nado bhava || 95 ||
[Analyze grammar]

iti śaptastayā sotha tāṃ śaśāpa krudhānvitaḥ |
kaṭhorahṛdaye tvaṃ tu śilā bhava sudurmate || 96 ||
[Analyze grammar]

skaṃda uvāca |
ityanyonyasya śāpena mune dharmo nado'bhavat |
avimukte mahākṣetre khyāto dharmanado mahān || 97 ||
[Analyze grammar]

sāpyāha pitaraṃ trastā svaśilātvasya kāraṇam |
dhyānena dharmaṃ vijñāya muniḥ kanyāmathābravīt || 98 ||
[Analyze grammar]

mā bhaiḥ putri kariṣyāmi tava sarvaṃ śubhodayam |
tacchāpo nānyathā bhūyāccaṃdrakāṃtaśilā bhava || 99 ||
[Analyze grammar]

caṃdrodayamanuprāpya dravībhūtatanustataḥ |
dhunī bhava sute sādhvi dhūtapāpeti viśrutā || 100 ||
[Analyze grammar]

sa ca dharmanadaḥ kanye tava bhartā suśobhanaḥ |
tairguṇaiḥ paripūrṇāṃgo ye guṇāḥ prārthitāstvayā || 1 ||
[Analyze grammar]

anyacca śṛṇu sadbuddhe mamāpi tapaso balāt |
dvairūpyaṃ bhavatorbhāvi prākṛtaṃ ca dravaṃ ca vai || 2 ||
[Analyze grammar]

ityāśvāsya pitā kanyāṃ dhūtapāpāṃ paraṃtapa |
caṃdrakāṃtaśilābhūtāmanujagrāha buddhimān || 3 ||
[Analyze grammar]

tadārabhya mune kāśyāṃ khyāto dharmanado hradaḥ |
dharmo dravasvarūpeṇa mahāpātakanāśanaḥ || 4 ||
[Analyze grammar]

dhunī ca dhūtapāpā sā sarvatīrthamayī śubhā |
harenmahāghasaṃghātānkūlajāniva pādapān || 5 ||
[Analyze grammar]

tatra dharmanade tīrthe dhūtapāpā samanvite |
yadā na svardhunī tatra tadā bradhnastapo vyadhāt || 6 ||
[Analyze grammar]

gabhastimālī bhagavāngabhastīśvara sannidhau |
śīlayanmaṃgalāṃ gaurīṃ tapa ugraṃ cacāra ha || 7 ||
[Analyze grammar]

nāmnā mayūkhādityasya tīrthe tatra tapasyataḥ |
kiraṇebhyaḥ pravavṛte mahāsvedotikhedataḥ || 8 ||
[Analyze grammar]

kiraṇebhyaḥ pravṛttāyā mahāsvedasya saṃtatiḥ |
tataḥ sā kiraṇānāma jātā puṇyā taraṃgiṇī || 9 ||
[Analyze grammar]

mahāpāpāṃdhatamasaṃ kiraṇākhyā taraṃgiṇī |
dhvaṃsayetsnānamātreṇa militā dhūtapāpayā || 110 ||
[Analyze grammar]

ādau dharmanadaḥ puṇyo miśrito dhūtapāpayā |
yayā dhūtāni pāpāni sarvatīrthīkṛtātmanā || 11 ||
[Analyze grammar]

tatopi militāgatya kiraṇā raviṇaidhitā |
yannāmasmaraṇādeva mahāmohoṃdhatāṃ vrajet || 12 ||
[Analyze grammar]

kiraṇā dhūtapāpe ca tasmindharmanade śubhe |
sravaṃtyau pāpasaṃhartryau vārāṇasyāṃ śubhadrave || 13 ||
[Analyze grammar]

tato bhāgīrathī prāptā tena dailīpinā saha |
bhāgīrathī samāyātā yamunā ca sarasvatī || 14 ||
[Analyze grammar]

kiraṇā dhūtapāpā ca puṇyatoyā sarasvatī |
gaṃgā ca yamunā caiva paṃcanadyotra kīrtitāḥ || 15 ||
[Analyze grammar]

ataḥ paṃcanadaṃ nāma tīrthaṃ trailokyaviśrutam |
tatrāpluto na gṛhṇīyāddehaṃ nā pāṃcabhautikam || 16 ||
[Analyze grammar]

asminpaṃcanadīnāṃ ca saṃbhedeghaughabhedini |
snānamātrātprayātyeva bhittvā brahmāṃḍamaṃḍapam || 17 ||
[Analyze grammar]

tīrthāni saṃti bhūyāṃsi kāśyāmatra padepade |
 na paṃcanadatīrthasya koṭyaṃśena samānyapi || 18 ||
[Analyze grammar]

prayāge māghamāse tu samyaksnātasya yatphalam |
tatphalaṃ syāddinaikena kāśyāṃ paṃcanade dhruvam || 19 ||
[Analyze grammar]

snātvā paṃcanade tīrthe kṛtvā ca pitṛtarpaṇam |
biṃdumādhavamabhyarcya na bhūyo janmabhāgbhavet || 120 ||
[Analyze grammar]

yāvatsaṃkhyāstilādattāḥ pitṛbhyo jalatarpaṇe |
puṇye paṃcanade tīrthe tṛptiḥ syāttāvadābdikī || 21 ||
[Analyze grammar]

śraddhayā yaiḥ kṛtaṃ śrāddhaṃ tītheṃ paṃcanade śubhe |
teṣāṃ pitāmahā muktā nānāyoni gatā api || 22 ||
[Analyze grammar]

yamaloke pitṛgaṇairgātheyaṃ parigīyate |
mahimānaṃ pāṃcanadaṃ dṛṣṭvā śrāddhavidhānataḥ || 23 ||
[Analyze grammar]

asmākamapi vaṃśyotra kaścicchrāddhaṃ kariṣyati |
kāśyāṃ paṃcanadaṃ prāpya yena mucyāmahe vayam || 24 ||
[Analyze grammar]

iyaṃ gāthā pratidinaṃ śrāddhadevasya sannidhau |
pitṛbhiḥ parigīyeta kāśyāṃ paṃcanadaṃ prati || 25 ||
[Analyze grammar]

tatra paṃcanade tīrthe yatkiṃciddīyate vasu |
kalpakṣayepi na bhavettasya puṇyasya saṃkṣayaḥ || 26 ||
[Analyze grammar]

vaṃdhyāpi varṣaparyaṃtaṃ snātvā paṃcanade hrade |
samarcya maṃgalāṃ gauṃrīṃ putraṃ janayati dhruvam || 27 ||
[Analyze grammar]

jalaiḥ pāṃcanadaiḥ puṇyairvāsasā pāriśodhitaiḥ |
mahāphalamavāpnoti snapayitveṣṭadevatām || 28 ||
[Analyze grammar]

paṃcāmṛtānāṃ kalaśairaṣṭottaraśatonmitaiḥ |
tulitodhikatāṃ yāto biṃduḥ paṃcanadāṃbhasaḥ || 29 ||
[Analyze grammar]

paṃcakūrcena pītena yātra śuddhirudāhṛtā |
sā śuddhiḥ śraddhayā prāśya biṃduṃ pāṃcanadāṃbhasaḥ || 130 ||
[Analyze grammar]

bhavedavabhṛthasnānādrājasūyāśvamedhayoḥ |
yatphalaṃ tacchataguṇaṃ snānātpāṃcanadāṃbhasā || 31 ||
[Analyze grammar]

rājasūyāśvamedhau ca bhavetāṃ svargasādhanam |
ābrahmaghaṭikādvaṃdvaṃ muktyai pāṃcanadāplutiḥ || 32 ||
[Analyze grammar]

svargarājyābhiṣekopi na tathā saṃmataḥ satām |
abhiṣekaḥ pāṃcanado yathānalpasukhapradaḥ || 33 ||
[Analyze grammar]

varaṃ vārāṇasīṃ prāpya bhṛtyaḥ paṃcanadokṣiṇām |
nānyatra sevakībhūta bhūpakoṭirnareśvaraḥ || 34 ||
[Analyze grammar]

yairna paṃcanade snātaṃ kārtike pāpahāriṇi |
te'dyāpi garbhe tiṣṭhaṃti punaste garbhavāsinaḥ || 35 ||
[Analyze grammar]

kṛte dharmanadaṃ nāma tretāyāṃ dhūtapāpakam |
dvāpare biṃdutīrthaṃ ca kalau paṃcanadaṃ smṛtam || 36 ||
[Analyze grammar]

śataṃ samāstapastaptvā kṛte yatprāpyate phalam |
tatkārtike paṃcanade sakṛtsnānena labhyate || 37 ||
[Analyze grammar]

iṣṭāpūrteṣu dharmeṣu yāvajanmakṛteṣu yat |
anyatra syātphalaṃ tatsyādūrje dharmanadāplavāt || 38 ||
[Analyze grammar]

na dhūtapāpa sadṛśaṃ tīrthaṃ kvāpi mahītale |
yadekasnānato naśyedaghaṃ janmatrayārjitam || 39 ||
[Analyze grammar]

biṃdutīrthe naro dattvā kāṃcanaṃ kṛṣṇalonmitam |
na daridro bhavetkvāpi na svarṇena viyujyate || 140 ||
[Analyze grammar]

gobhūtilahiraṇyāśva vāsonnasragvibhūṣaṇam |
yatkiṃcidbiṃdutīrthetra dattvākṣayamavāpnuyāt || 41 ||
[Analyze grammar]

ekāmapyāhutiṃ dattvā samiddhegnau vidhānataḥ |
puṇye dharmanade tīrthe koṭihomaphalaṃ labhet || 42 ||
[Analyze grammar]

na paṃcanadatīrthasya mahimānamanaṃtakam |
kopi varṇayituṃ śaktaścaturvarga śubhaukasaḥ || 43 ||
[Analyze grammar]

śrutvākhyānamidaṃ puṇyaṃ śrāvayitvāpi bhaktitaḥ |
sarvapāpaviśuddhātmā viṣṇuloke mahīyate || 44 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ caturtheṃ kāśīkhaṃḍa uttarārdhe paṃcanadāvirbhāvo nāmaikonaṣaṣṭitamo'dhyāyaḥ || 59 ||
[Analyze grammar]