Chapter 2

[English text for this chapter is available]

skaṃda uvāca |
gabhastimālinigate kāśīṃ trailokyamohinīm |
punaściṃtāmavāpoccairmaṃdarastho mune haraḥ || 1 ||
[Analyze grammar]

nādyāpyāyāṃti yoginyo nādyāpyāyāti tigmaguḥ |
pravṛttirapi me kāśyāścitramatyaṃta durlabhā || 2 ||
[Analyze grammar]

kimatra citraṃ yatkāśī madīyamapimānasam |
niścalaṃ caṃcalayati gaṇanā ketaresure || 3 ||
[Analyze grammar]

adhākṣipamahaṃ kāmaṃ trijagajjittvaraṃdṛśā |
aho kāśyabhilāṣotra māmeva dunuyāttarām || 4 ||
[Analyze grammar]

kāśīpravṛttimanveṣṭuṃ kaṃ vā prahiṇuyāmitaḥ |
jñātuṃ ka eva nipuṇo yataḥ sa caturānanaḥ || 5 ||
[Analyze grammar]

ityāhūya vidhātāraṃ bahumānapuraḥsaram |
tatropaveśya śrīkaṃṭhaḥ provāca caturānanam || 6 ||
[Analyze grammar]

yoginyaḥ preṣitāḥ pūrvaṃ preṣitotha sahasraguḥ |
nādyāpi te nivartaṃte kāśyāḥ kalaśasaṃbhava || 7 ||
[Analyze grammar]

sā samutsukayetkāśī lokeśa mama mānasam |
prākṛtasya janasyeva caṃcalākṣīva kācana || 8 ||
[Analyze grammar]

maṃdaretra ratirme na bhṛśaṃ suṃdarakaṃdare |
anacchatucchapānīye nakrasyevālpapalvale || 9 ||
[Analyze grammar]

nā bādhiṣṭa tathā māṃ sa tāpo hālāhalodbhavaḥ |
kāśīvirahajanmātra yathā māmatibādhate || 10 ||
[Analyze grammar]

śītaraśmiḥ śiraḥsthopi varṣanpīyūṣasīkaraiḥ |
kāśīviśleṣajaṃ tāpaṃ nāho gamayituṃ prabhuḥ || 11 ||
[Analyze grammar]

vidhe vidhehi me kāryamārya dhurya mahāmate |
yāhi kāśīmitastūrṇaṃ yatasva ca mamehite || 12 ||
[Analyze grammar]

brahmaṃstvameva tadvetsi kāśī tyajanakāraṇam |
maṃdopi na tyajetkāśīṃ kimu yo vetti kiṃcana || 13 ||
[Analyze grammar]

adyaiva kiṃ na gaccheyaṃ kāśīṃ brahmansvamāyayā |
divodāsaṃ svadharmasthaṃ na tūllaṃghitumutsahe || 14 ||
[Analyze grammar]

vidhe sarvavidheyāni tvameva vidadhāsi yat |
iti ceti ca vaktavyaṃ tvayyapārthamatokhilam || 15 ||
[Analyze grammar]

ariṣṭaṃ gaccha paṃthāste śubhodarko bhavatvalam |
ādāyājñāṃ vidhi mūrdhni yayau vārāṇasīṃ mudā || 16 ||
[Analyze grammar]

sitahaṃsarathastūrṇaṃ prāpya vārāṇasīṃ purīm |
kṛtakṛtyamivātmānamamanyata tadātmabhūḥ || 17 ||
[Analyze grammar]

haṃsayānaphalaṃ medya jātaṃ kāśīsamāgame |
kāśī prāptau yataḥ proktā aṃtarāyāḥ padepade || 18 ||
[Analyze grammar]

dṛśi dhāturabhūdya madṛśo prāpya sānvayaḥ |
spaṣṭaṃ dṛṣṭipathaṃ prāptā yadeṣā'naṃdavāṭikā || 19 ||
[Analyze grammar]

svayaṃ siṃcati yā madbhiḥ svābhiḥ svargataraṃgiṇī |
yatrānaṃdamayā vṛkṣā yatrānaṃdamayā janāḥ || 20 ||
[Analyze grammar]

nirviśaṃti sadā kāśyāṃ phalānyānaṃdavaṃtyapi |
sadaivānaṃdabhūḥ kāśī sadaivānaṃdadaḥ śivaḥ || 21 ||
[Analyze grammar]

ānaṃdarūpā jāyaṃte tena kāśyāṃ hi jaṃtavaḥ |
caraṇau carituṃ vittastāveva kṛtināmiha || 22 ||
[Analyze grammar]

caraṇau vicaretāṃyau viśvabhartṛ purī bhuvi |
tāveva śravaṇau śrotuṃ saṃvidā te bahuśrutau || 23 ||
[Analyze grammar]

iha śrutimatāṃ puṃsāṃ yābhyāṃ kāśī śrutā sakṛt |
tadeva manute sarvaṃ manastviha manasvināma || 24 ||
[Analyze grammar]

yenānumanyate caiṣā kāśī sarvapramāṇabhūḥ |
buddhirbudhyati sā sarvamiha buddhimatāṃ satām |
yayaitaddhūrjaṭerdhāma dhṛtaṃ sva viṣayīkṛtam || 25 ||
[Analyze grammar]

varaṃ tṛṇāni dhānyāni tāni vātyāhatānyapi |
kāśyāṃ yānyā pataṃtīha na janāḥ kāśyadarśanāḥ || 26 ||
[Analyze grammar]

adya me saphalaṃ cāyuḥ parārdhadvaya saṃmitam |
yasminsati mayā prāpi duṣprāpā kāśikā purī || 27 ||
[Analyze grammar]

aho me dharmasaṃpattirahome bhāgyagauravam |
yadadrākṣiṣamadyāhaṃ kāśīṃ sucira ciṃtitām || 28 ||
[Analyze grammar]

adya me svatapo vṛkṣo manorathaphalairalam |
śivabhaktyaṃbunā siktaḥ phalitoti bṛhattaraiḥ || 29 ||
[Analyze grammar]

mayā vyadhāyi bahudhā sṛṣṭiḥ sṛṣṭiṃ vitanvatā |
paramanyādṛśī kāśī svayaṃ viśveśa nirmitiḥ || 30 ||
[Analyze grammar]

iti hṛṣṭamanā vedhā dṛṣṭvā vārāṇasīṃ purīm |
vṛddhabrāhmaṇarūpeṇa rājānaṃ ca dadarśa ha || 31 ||
[Analyze grammar]

jalārdrākṣatapāṇiśca svastyuktvā pṛthivībhuje |
kṛtapraṇāmo rājñātha bheje taddattamāsanam || 32 ||
[Analyze grammar]

kṛtamāno nṛpatinā sobhyutthānāsanādibhiḥ |
vipro vyajijñapadbhūpaṃ pṛṣṭāgamanakāraṇam || 33 ||
[Analyze grammar]

brāhmaṇa uvāca |
bhūpāla bahukālīnosmyahamatra ciraṃtanaḥ |
tvaṃ tu māṃ naiva jānāsi jāne tvāṃ hi ripuṃjayam || 34 ||
[Analyze grammar]

paraḥśatā mayā dṛṣṭā rājāno bhūridakṣiṇāḥ |
vijitānekasaṃgrāmā yāyajūkā jiteṃdriyāḥ || 35 ||
[Analyze grammar]

viniṣkṛtāriṣaḍvargāḥ suśīlāḥ sattvaśālinaḥ |
śrutasyapāradṛśvāno rājanītivicakṣaṇāḥ || 36 ||
[Analyze grammar]

dayādākṣiṇyanipuṇāḥ satyavrataparāyaṇāḥ |
kṣamayā kṣamayātulyā gāṃbhīryajitasāgarāḥ || 37 ||
[Analyze grammar]

jitaroṣarayāḥ śūrāḥ saumyasauṃdaryabhūmayaḥ |
ityādi guṇasaṃpannāḥ susaṃcitayaśodhanāḥ || 38 ||
[Analyze grammar]

paraṃ dvitrāḥ pavitrā ye rājarṣe tava sadguṇāḥ |
teṣveṣu rājasu mama prāyaśo na dṛśaṃ gatāḥ || 39 ||
[Analyze grammar]

prajānijakuṭuṃbastvaṃ tvaṃ tu bhūdevadaivataḥ |
mahātapaḥ sahāyastvaṃ pathānānye tathā nṛpāḥ || 40 ||
[Analyze grammar]

dhanyo mānyosi ca satāṃ pūjanīyosi sadguṇaiḥ |
devā api divodāsa tvattrāsānna vimārgagāḥ || 41 ||
[Analyze grammar]

kiṃ naḥ stutyā tava nṛpa dvijānāmaspṛhāvatām |
kiṃ kurmastvadguṇagrāmāḥ stāvakānnaḥ prakurvate || 42 ||
[Analyze grammar]

goṣṭhī tiṣṭhatviyaṃ tāvatprastutaṃ staumi sāṃpratam |
yaṣṭukāmosmyahaṃ rājaṃstvāṃ sahāyamato vṛṇe || 43 ||
[Analyze grammar]

tvayā rājanvatī caiṣā'vaniḥ sarvardhibhājanam |
ahaṃ cāstidhano rājannyāyopāttamahādhanaḥ || 44 ||
[Analyze grammar]

iyaṃ ca rājadhānī te karmabhūmāvanuttamā |
yasyāṃ kṛtānāṃ kāryāṇāṃ saṃvartepi na saṃkṣayaḥ || 49 ||
[Analyze grammar]

saṃcitaṃ yaddhanaṃ puṃbhirnayasanmārgagāmibhiḥ |
tatkāśyāṃ viniyujyeta kleśāyetarathā bhavet || 46 ||
[Analyze grammar]

mahimānaṃ paraṃ kāśyāḥ kopi veda na bhūpate |
ṛte trinayanācchaṃbhoḥ sarvajñānapradāyinaḥ || 47 ||
[Analyze grammar]

manye dhanyatarosi tvaṃ bahujanmaśatārjitaiḥ |
sukṛtaiḥ pāsi yatkāśīṃ viśvabhartuḥ parāṃ tanum || 48 ||
[Analyze grammar]

kāśī trijagatīsārastrivedī sāra eva vai |
trivargottarasāraśca nirṇīteti maharṣibhiḥ || 49 ||
[Analyze grammar]

viśveśānugraheṇaiva tvayaiṣā pālyate purī |
ekasyāpyavanātkāśyāṃ trailokyamavitaṃ bhavet || 50 ||
[Analyze grammar]

anyacca te hitaṃ vacmi yadi te rocate'nagha |
prīṇanīyaḥ sadaivaiko viśveśaḥ sarvakarmabhiḥ || 51 ||
[Analyze grammar]

anyadevadhiyā rājanviśveśaṃ paśya mā kvacit |
brahmaviṣṇviṃdra caṃdrārkā krīḍeyaṃ tasya dhūrjaṭeḥ || 52 ||
[Analyze grammar]

viprairudarkamicchadbhiḥ śikṣaṇīyā yato nṛpāḥ |
atastava hitaṃ khyātaṃ kiṃ vā me ciṃtayānayā || 53 ||
[Analyze grammar]

iti joṣaṃ sthitaṃ vipraṃ pratyuvāca nṛpottamaḥ |
sarvaṃ mayā hṛdi dhṛtaṃ yattvayoktaṃ dvijottama || 54 ||
[Analyze grammar]

rājovāca |
ahaṃ yiyakṣamāṇasya tava sāhāyyakarmaṇi |
dāsosmi yajñasaṃbhārānnayameko śato'khilān || 55 ||
[Analyze grammar]

yadasti mekhilaṃ tatra saptāṃgepi bhavānprabhuḥ |
yajasvaikamanābrahmansiddhaṃ manyasva vāṃchitam || 56 ||
[Analyze grammar]

rājyaṃ karomi yadbrahmansvārthaṃ tanna manāgapi |
putraiḥ kalatrairdehenaparopakṛtaye yate || 57 ||
[Analyze grammar]

rājñāṃ kratukriyābhyopi tīrthebhyopi samaṃtataḥ |
prajāpālanamevaiko dharmaḥ prokto manīṣibhiḥ || 58 ||
[Analyze grammar]

prajāsaṃtāpajovahnirvajrāgnerapi dāruṇaḥ |
dvitrāndahati vajrāgniḥ pūrvo rājyaṃ kulaṃ tanum || 59 ||
[Analyze grammar]

yadāvabhṛthasisrāsurbhaveyaṃ dvijasattama |
tadā viprapadāṃbhobhirabhiṣekaṃ karomyaham || 60 ||
[Analyze grammar]

havanaṃ brāhmaṇamukhe yatkaromi dvijottama |
manye kratukriyābhyopi tadviśiṣṭaṃ mahāmate || 61 ||
[Analyze grammar]

abhilāṣeṣu sarveṣu jāgartyeko hṛdīha me |
adyāpi mārgaṇaḥ kopi draṣṭavyaḥ svatanorapi || 62 ||
[Analyze grammar]

aho ahobhirbahubhiḥ phalito me manorathaḥ |
yattvaṃ medya gṛhe prāptaḥ kiṃcitprārthayituṃ dvija || 63 ||
[Analyze grammar]

ekāgramānaso vipra yajñānvipuladakṣiṇān |
bahūnyajakṛtaṃ viddhi sāhāyyaṃ sarvavastuṣu || 64 ||
[Analyze grammar]

iti rājño mahābuddherdharmaśīlasya bhāṣitam |
śrutvā tuṣṭamanāḥ sraṣṭā kratusaṃbhāramāharat || 65 ||
[Analyze grammar]

sāhāyyaṃ prāpya rājarṣerdivodāsasya padmabhūḥ |
iyāja daśabhiḥ kāśyāmaśvamedhairmahāmakhaiḥ || 66 ||
[Analyze grammar]

adyāpi homadhūmoghairyadvyāptaṃ gaganāṃtaram |
tadā prabhṛti na vyoma nīlimānaṃ jahātyadaḥ || 67 ||
[Analyze grammar]

tīrthaṃ daśāśvamedhākhyaṃ prathitaṃ jagatītale |
tadā prabhṛti tatrāsīdvārāṇasyāṃ śubhapradam || 68 ||
[Analyze grammar]

purā rudrasaro nāma tattīrthaṃ kalaśodbhava |
daśāśvamedhikaṃ paścājjātaṃ vidhiparigrahāt || 69 ||
[Analyze grammar]

svardhunyatha tataḥ prāptā bhagīrathasamāgamāt |
atīva puṇyavajjātamatastattīrthamuttamam || 70 ||
[Analyze grammar]

vidhirdaśāśvamedheśaṃ liṃgaṃ saṃsthāpya tatra vai |
sthitavānna gatodyāpi kvāpi kāśīṃ vihāya tu || 71 ||
[Analyze grammar]

rājño dharmaratestasya cchidraṃ nāvāpa kiṃcana |
ataḥ purāreḥ purato vrajitvā kiṃ vadedvidhiḥ || 72 ||
[Analyze grammar]

kṣetraprabhāvaṃ vijñāya dhyāyanviśveśvaraṃ śivam |
brahmeśvaraṃ ca saṃsthāpya vidhistatraiva saṃsthitaḥ || 73 ||
[Analyze grammar]

parātanuriyaṃ kāśī viśveśasyeti niścitam |
asyāḥ saṃsevanācchaṃbhurna kupyati puro mayi || 74 ||
[Analyze grammar]

kaḥ prāpya kāśīṃ durmedhāḥ punastyaktumiheha te |
anekajanmajanitakarmanirmūlanakṣamām || 75 ||
[Analyze grammar]

viśvasaṃtāpasaṃhartuḥ sthāne viśvapatestanuḥ |
saṃtāpyatetarāṃ kāśyā viśleṣaja mahāgninā || 76 ||
[Analyze grammar]

prāpya kāśīṃ tyajedyastu samastāghaughanāśinīm |
nṛpaśuḥ sa parijñeyo mahāsaukhyaparāṅamukhaḥ || 77 ||
[Analyze grammar]

nirvāṇalakṣmīṃ yaḥ kāṃkṣettyaktvā saṃsāradurgatim |
tena kāśī na saṃtyājyā yadyāptaiśādanugrahāt || 78 ||
[Analyze grammar]

yaḥ kāśīṃ saṃparityajya gacchedanyatra durmatiḥ |
tasya hastatalādgaccheccaturvargaphalodayaḥ || 79 ||
[Analyze grammar]

nibarhaṇī madhaughasya supuṇya paribṛṃhiṇīm |
kaḥ prāpya kāśīṃ durmedhāstyajenmokṣasukhapradām || 80 ||
[Analyze grammar]

satyaloke kva tatsaukhyaṃ kva saukhyaṃ vaiṣṇave pade |
yatsaukhyaṃ labhyate kāśyāṃ nimeṣārdhaniṣevaṇāt || 81 ||
[Analyze grammar]

vārāṇasīguṇagaṇānnirṇīya druhiṇastviti |
vyāvṛtya maṃdaragiriṃ na punaḥ pratyagānmune || 82 ||
[Analyze grammar]

skaṃda uvāca |
mitrāvaruṇayoḥ putra mahimānaṃ bravīmi te |
kāśyāṃ daśāśvamedhasya sarvatīrthaśiromaṇeḥ || 83 ||
[Analyze grammar]

daśāśvamedhikaṃ prāpya sarvatīrthottamottamam |
yatkiṃcitkriyate karma tadakṣayamiheritam || 84 ||
[Analyze grammar]

snānaṃ dānaṃ japo homaḥ svādhyāyo de vatārcanam |
saṃdhyopāstistarpaṇaṃ ca śrāddhaṃ pitṛsamarcanam || 85 ||
[Analyze grammar]

daśāśvamedhike tīrthe sakṛtsnātvā narottamaḥ || 9 ||
[Analyze grammar]

dṛṣṭvā daśāśvamedheśaṃ sarvapāpaiḥ pramucyate || 86 ||
[Analyze grammar]

jyeṣṭhe māsi site pakṣe prāpya pratipadaṃ tithim |
daśāśvamedhike snātvā mucyate janmapātakaiḥ || 87 ||
[Analyze grammar]

jyeṣṭhe śukla dvitīyāyāṃ snātvā rudrasarovare |
janmadvayakṛtaṃ pāpaṃ tatkṣaṇādeva naśyati || 88 ||
[Analyze grammar]

evaṃ sarvāsu tithiṣu kramasnāyī narottamaḥ |
āśuklapakṣadaśami pratijanmāghamutsṛjet || 89 ||
[Analyze grammar]

tithiṃ daśaharāṃ prāpya daśajanmāghahāriṇīm |
daśāśvamedhike snāto yāmīṃ paśyenna yātanām || 90 ||
[Analyze grammar]

liṃgaṃ daśāśvamedheśaṃ dṛṣṭvā daśaharā tithau |
daśajanmārjitaiḥ pāpaistyajyate nātra saṃśayaḥ || 91 ||
[Analyze grammar]

snāto daśaharāyāṃ yaḥ pūjayelliṃgamuttamam |
bhaktyā daśāśvamedheśaṃ na taṃ garbhadaśā spṛśet || 92 ||
[Analyze grammar]

jyeṣṭhe māsi site pakṣe pakṣaṃ rudrasare naraḥ |
kurvanvai vārṣikīṃ yātrāṃ na vighnairabhibhūyate || 93 ||
[Analyze grammar]

daśāśvamedhāvabhṛthairyatphalaṃ samyagāpyate |
daśāśvamedhe tannūnaṃ snātvā daśaharā tithau || 94 ||
[Analyze grammar]

svardhunyāḥ paścime tīre natvā daśahareśvaram |
na durdaśāmavāpnoti pumānpuṇyatamaḥ kvacit || 95 ||
[Analyze grammar]

yatkāśyāṃ dakṣiṇadvāramaṃtargehasya kīrtyate |
tatra brahmeśvaraṃ dṛṣṭvā brahmaloke mahīyate || 96 ||
[Analyze grammar]

iti brāhmaṇaveṣeṇa vārāṇasyāṃ mahādhiyā |
druhiṇena sthitaṃ tāvadyāvadviśveśvarāgamaḥ || 97 ||
[Analyze grammar]

divodāsopi rājeṃdro vṛddhabrāhmaṇarūpiṇe |
brahmaṇe kṛtayajñāya brahmaśālāmakalpayat || 98 ||
[Analyze grammar]

brahmeśvarasamīpe tu brahmaśālā manoharā |
brahmā tatrāvasadvyoma brahmaghoṣairninādayan || 99 ||
[Analyze grammar]

iti te kathito brahmanmahimātimahattaraḥ |
daśāśvamedhatīrthasya sarvāghaughavināśanaḥ || 100 ||
[Analyze grammar]

śrutvādhyāyamimaṃ puṇyaṃ śrāvayitvā tathaiva ca |
brahmalokamavāpnoti śraddhayā mānavottamaḥ || 101 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāmuttarārddhe caturthe kāśīkhaṃḍe daśāśvamedhavarṇanaṃnāma dvipaṃcāśattamo'dhyāyaḥ || 52 ||
[Analyze grammar]