Chapter 44

[English text for this chapter is available]

skaṃda uvāca |
atha maṃdarakaṃdarodarollasada samadyuti ratnamaṃdire |
paritaḥ samadhiṣṭhitāmare nijaśikharairvasanīkṛtāṃbare || 1 ||
[Analyze grammar]

nivasañjagadīśvaro haraḥ kṛśarajanīśa kalāmanoharaḥ || |
labhate sma na śarma śaṃkaraḥ prasaratkāśiviyogaja jvaraḥ || 2 ||
[Analyze grammar]

virahānalaśāṃtaye tadā samalepi tripurāriṇāpi yaḥ |
malayodbhava paṃka eṣa sa pratipedehyadhunā pipāṃsutām || 3 ||
[Analyze grammar]

paritāpaharāṇi padminīnāṃ mṛdulānyapi kaṃkaṇīkṛtāni |
gaditāni yadīśvareṇa sarpāstadabhūtsatyamahomaheśvarecchā || 4 ||
[Analyze grammar]

yadu dugdhanidhiṃ nimathyadevairmṛdusāraḥ samakarṣi pūrṇacaṃdraḥ |
sa babhūva kṛśo viyogatapteśvaramūrdhoṣmaparikṣaraccharīraḥ || 5 ||
[Analyze grammar]

yadadīdharadeṣa jātatāpaḥ pṛthule maulijaṭāni kuṃjakoṇe |
paritāpaharāṃ harastadānīṃ dyunadīṃ tāmadhunāpi nojjihīte || 6 ||
[Analyze grammar]

mahato virahasya śaṃkaraḥ prasabhaṃtasyavaśī vaśaṃgataḥ |
vividena suraiḥ sadogatairapi saṃvītasutāpaveṣṭitaḥ || 7 ||
[Analyze grammar]

aticitramidaṃ yadātmanā śucirapyeṣa kṛpīṭayoninā |
svapurīvirahodbhavena vai paritāpyeta jagattrayeśvaraḥ || 8 ||
[Analyze grammar]

nijabhālatalaṃ kalānidheḥ kalayā nityamalaṃkaroti yaḥ |
sa tadīśvaramapyatāpayadvidhureko viparīta eva tu || 9 ||
[Analyze grammar]

garalaṃ galanālikātale vilasedasya na tena tāpitaḥ |
amṛtāṃśu tuṣāradīdhiti pracayaireva tu tāpito'dbhutam || 10 ||
[Analyze grammar]

vilasaddharicaṃdanodakacchaṭayā tadvirahāpanuttaye |
hṛdayā hi tayāpyadūyata prasaradbhogiphaṭābhavairna tu || 11 ||
[Analyze grammar]

sakalabhramameṣa nāśayetsragahitvādyapadeśajaṃ haraḥ |
idamadbhutamasya yadbhramaḥ sphuṭamālyepi mahāhisaṃbhavaḥ || 12 ||
[Analyze grammar]

smṛtimātrapathaṃgatopi yastrividha tāpamapākarotyalam |
sa hi kāśiviyogatāpitaḥ svagataṃ kiṃcidajalpadityajaḥ || 13 ||
[Analyze grammar]

api kāśi samāgato'nilo yadi gātrāṇi pariṣvajenmama |
davathuḥ pariśāṃtimeti tannahi mānī parigāhanairapi || 14 ||
[Analyze grammar]

agamiṣyadahokathaṃ satāpo nanu dakṣāṃgajayāya edhitaḥ |
mamajīvātulatā jhaṭityalaṃ hyabhaviṣyanna himādrijā yadi || 15 ||
[Analyze grammar]

na tathojjhitadehayātayā mama dakṣodbhavayāmano'dunot |
avimuktaviyogajanmanāpari dūyeta yathā mahoṣmaṇā || 16 ||
[Analyze grammar]

ayi kāśi mudā kadā punastava lapsye sukhamaṃgasaṃgajam |
atiśītalitāni yena me'dbhutagātrāṇi bhavaṃti tatkṣaṇāt || 17 ||
[Analyze grammar]

ayi kāśi vināśitāghasaṃghe tavaviśleṣajaāśuśukṣaṇiḥ |
amṛtāṃśukalāmṛdudravairaticitraṃhaviṣeva vardhate || 18 ||
[Analyze grammar]

agamanmama dakṣajā viyogajo davathuḥ prāgghimavatsutauṣadhena |
adhunā khalu naiva śāṃtimīyāṃ yadi kāśīṃ na vilokayehamāśu || 19 ||
[Analyze grammar]

manaseti gṛṇaṃstadā śivaḥ sutarāṃ saṃvṛtatāpavaikṛtaḥ |
jagadaṃbikayā dhiyāṃ jananyā kathamapyeṣa viyukta ityamāni || 20 ||
[Analyze grammar]

priyayā vapuṣordhayānayāpyaparijñāta viyogakāraṇaḥ |
vacanairupacaryate sma sapraṇataprāṇinidāghadāraṇaḥ || 21 ||
[Analyze grammar]

śrīpārvatyuvāca |
tava sarvaga sarvamasti haste vilasadyoga viyoga eva kaste |
tava bhūtiraho vibhūtidātrī sakalāpatkalikāpi bhūtadhātrī || 22 ||
[Analyze grammar]

tvadanīkṣaṇataḥ kṣaṇādvibho pralayaṃ yāṃti jagaṃti śocyavat |
cyavate bhavataḥ kṛpālavāditaropīśanayastvayoṃkṛtaḥ || 23 ||
[Analyze grammar]

bhavataḥ paritāpahetavo na bhavaṃtīṃdu divākarāgnayaḥ |
nayanāniyatastrinetra te'mī praṇayinyastilasajjalā ca maulau || 24 ||
[Analyze grammar]

bhujagābhujagāḥ sadaiva te'mī na viṣaṃ saṃkramate ca nīlakaṃṭha |
ahamasmi ca vāmadeva vāmā tava vāmaṃvapuratra cittayuktā || 25 ||
[Analyze grammar]

iti saṃsṛtisaṃbījajananyābhihite hite |
girāṃ niguṃphe giriśo vaktumapyādade giram || 26 ||
[Analyze grammar]

īśvara uvāca |
ayi kāśītyaṣṭamūrtirbhavo bhāvāṣṭakobhavat |
satvaraṃ śivayājñāyi dhruvaṃ kāśyāhṛtoharaḥ || 27 ||
[Analyze grammar]

athabālasakhī bhūta tattatkānanavīrudham || śivāprastāvayāṃcakre vimuktāṃ muktidāṃ purīm || 28 ||
[Analyze grammar]

pārvatyuvāca |
gaganatalamilitasalile pralayepi bhava triśūlapari vidhṛtām |
kṛtapuṃḍarīkaśobhāṃ smaraharakāśīṃ purīṃ yāvaḥ || 29 ||
[Analyze grammar]

dharādhareṃdrasya dharātisuṃdarā na māṃ tathāsyāpi dhinoti dhūrjaṭe |
dharāgatāpīha na yā dhruvaṃdharā purīdhurīṇā tava kāśikā yathā || 30 ||
[Analyze grammar]

na yatra kāśyāṃ kalikālajaṃ bhayaṃ na yatra kāśyāṃ maraṇātpunarbhavaḥ |
na yatra kāśyāṃ kaluṣodbhavaṃ bhayaṃ kathaṃ vibho sā nayanātithirbhavet || 31 ||
[Analyze grammar]

kimatra no saṃti puraḥ sahasraśaḥ padepade sarvasamṛddhibhūmayaḥ |
paraṃ na kāśī sadṛśīdṛśoḥ padaṃ kvacidgatā me bhavatā śape śiva || 32 ||
[Analyze grammar]

triviṣṭape saṃti na kiṃ puraḥ śataṃ samastakautūhalajanmabhūmayaḥ |
tṛṇī bhavaṃtīha ca tāḥ puraḥpuraḥ padaṃ purāre bhavato bhavadviṣaḥ || 33 ||
[Analyze grammar]

na kevalaṃ kāśiviyogajo jvaraḥ prabādhate tvāṃ tu tathā yathātra mām |
upāya eṣotra nidāghaśāṃtaye purī tu sā vā mamajanmabhūratha || 34 ||
[Analyze grammar]

mayā na mene mamajanmabhūmikā viyogajanmā paridāghaīśitaḥ |
avāpyakāśīṃ paritaḥ praśāṃtidāṃ samastasaṃtāpavighātahetukām || 35 ||
[Analyze grammar]

na mokṣalakṣmyotra samakṣamīkṣitāstanūbhṛtā kenacideva kutracit |
avaimyahaṃ śarmada sarvaśarmadā sarūpiṇī muktirasau hi kāśikā || 36 ||
[Analyze grammar]

na muktirastīha tathā samādhinā sthireṃdriyatvojjhita tatsamādhinā |
kratukriyābhirna na vedavidyayā yathā hi kāśyāṃ parihāya vigraham || 37 ||
[Analyze grammar]

na nākaloke sukhamasti tādṛśaṃ kutastu pātālatale'tisuṃdare |
vārtāpi martye sukhasaṃśrayā kva vā kāśyāṃ hi yādṛktanumātradhāriṇi || 38 ||
[Analyze grammar]

kṣetre triśūlinbhavato'vimukte vimuktilakṣmyā na kadāpi mukte |
manopi yaḥ prāṇivaraḥ prayuṃkte ṣaḍaṃgayogaṃ sa sadaiva yuṃkte || 39 ||
[Analyze grammar]

ṣaḍaṃgayogānnahi tādṛśī nṛbhiḥ śarīrasiddhiḥ sahasātra labhyate |
sukhena kāśīṃ samavāpya yādṛśīdṛśau sthirīkṛtya śiva tvayi kṣaṇam || 40 ||
[Analyze grammar]

varaṃ hi tiryaktvamabuddhivaibhavaṃ na mānavatvaṃ bahubuddhibhājanam |
akāśisaṃdarśananiṣphalodayaṃ samaṃtataḥ puṣkarabudbudopamam || 41 ||
[Analyze grammar]

dṛśau kṛtārthe kṛtakāśidarśane tanuḥkṛtārthā śivakāśivāsinī |
manaḥkṛtārthaṃ dhṛtakāśisaṃśrayaṃ mukhaṃ kṛtārthaṃ kṛtakāśisaṃmukham || 42 ||
[Analyze grammar]

varaṃ hi tatkāśirajoti pāvanaṃ rajastamodhvaṃsi śaśiprabhojjvalam |
kṛtapraṇāmairmaṇikarṇikā bhuve lalāṭagaṃyadbahumanyate suraiḥ || 43 ||
[Analyze grammar]

na devaloko na ca satyaloko na nāgaloko maṇikarṇikāyāḥ |
tulāṃ vrajedyatra mahāprayāṇakṛcchrutirbhavedbrahmarasāyanāspadam || 44 ||
[Analyze grammar]

mahāmahobhūrmaṇikarṇikāsthalī tamastatiryatra sameti saṃkṣayam |
paraḥ śatairjanmabhiredhitāpi yā divākarāgnīṃdukarairanigrahā || 45 ||
[Analyze grammar]

kimu nirvāṇapadasya bhadrapīṭhaṃ mṛdulaṃ talpamathonumokṣalakṣmyāḥ |
athavā maṇikarṇikāsthalī paramānaṃdasukaṃdajanmabhūmiḥ || 46 ||
[Analyze grammar]

samatītavimuktajaṃtusaṃkhyā kriyate yatra janaiḥ sukhopaviṣṭaiḥ |
vilasaddyuti sūkṣmaśarkarābhiḥ svavapuḥpātamahotsavābhilāṣaiḥ || 47 ||
[Analyze grammar]

skaṃda uvāca |
aparṇāparivarṇyeti purīṃ vārāṇasīṃ mune |
punarvijñāpayāmāsa kāśīprāptyai pinākinam || 48 ||
[Analyze grammar]

śrīpārvatyuvāca |
pramathādhipa sarveśa nityasvādhīnavartana |
yathānaṃdavanaṃ yāyāṃ tathā kuru varaprada || 49 ||
[Analyze grammar]

skanda uvāca |
jitapīyūṣamādhuryāṃ kāśīstavanasuṃdarīm |
athākarṇyāhamudito giriśo girijāṃ giram || 50 ||
[Analyze grammar]

śrīdevadeva uvāca |
ayi priyatame gauri tvadvā gamṛtasīkaraiḥ |
āpyāyitosmi nitarāṃ kāśīprāptyai yatedhunā || 51 ||
[Analyze grammar]

tvaṃ jānāsi mahādevi mama yattanmahadvratam |
abhuktapūrvamanyena vastūpāśnāmi netarat || 52 ||
[Analyze grammar]

pitāmahasya vacanāddivodāse mahīpatau |
dharmeṇa śāsati purīṃ ka upāyo vidhīyatām || 53 ||
[Analyze grammar]

kathaṃ sa rājā dharmiṣṭhaḥ prajāpālanatatparaḥ |
viyojyate puraḥ kāśyā divodāso mahīpatiḥ || 54 ||
[Analyze grammar]

adharmavartino yasmādvighnaḥ syānnetarasya tu |
tasmātkaṃ preṣayāmīśe yastaṃ kāśyā viyojayet || 55 ||
[Analyze grammar]

dharmavartmānusaratāṃ yo vighnaṃ samupācaret |
tasyaiva jāyate vighnaḥ pratyuta premavardhini || 56 ||
[Analyze grammar]

vinācchidreṇa taṃ bhūpaṃ notsādayitumutsahe |
mayaiva hi yato rakṣyāḥ priye dharmadhuraṃdharāḥ || 57 ||
[Analyze grammar]

na jarā tamatikrāmenna taṃ mṛtyurjirghāṃsati |
vyādhayastaṃ na bādhaṃte dharmavartmabhṛdatrayaḥ || 58 ||
[Analyze grammar]

iti saṃciṃtayandevo yoginīcakramagrataḥ |
dadarśātimahāprauḍhaṃ gāḍhakāryasya sādhanam || 59 ||
[Analyze grammar]

atha devyā samālocya vyomakeśo mahāmune |
yoginīvṛṃdamāhūya jagau vākyamidaṃ haraḥ || 60 ||
[Analyze grammar]

satvaraṃ yāta yoginyo mama vārāṇasīṃ purīm |
yatra rājā divodāso rājyaṃ dharmeṇa śāstyalam || 61 ||
[Analyze grammar]

svadharmavicyutaḥ kāśīṃ yathā tūrṇaṃ tyajennṛpaḥ |
tathopacarata prājñā yogamāyābalānvitāḥ || 62 ||
[Analyze grammar]

yathā punarnavīkṛtya purīṃ vārāṇasīmaham |
itaḥ prayāmi yoginyastathā kṣipraṃ vidhīyatām || 63 ||
[Analyze grammar]

iti prasādamāsādya śāsanaṃ śirasā vahan |
kṛtapraṇāmo niryāto yoginīnāṃ gaṇastataḥ || 64 ||
[Analyze grammar]

yayurākāśamāviśya manasopya tiraṃhasā |
parasparaṃ bhāṣamāṇā yoginyastā mudānvitāḥ || 65 ||
[Analyze grammar]

adya dhanyatarāḥ smo vai devadevena yatsvayam |
kṛtaprasādāḥ prahitāḥ śrīmadānaṃdakānanam || 66 ||
[Analyze grammar]

adya sadyo mahālābhāvabhūtāṃ notidurlabhau |
trinetrarājasaṃmānastathā kāśī vilokanam || 67 ||
[Analyze grammar]

iti muditamanāḥ sa yoginīnāṃ nikuraṃvastvathamaṃdarādrikuṃjāt |
nabhasi laghukṛtaprayāṇavego nayanātithyamalaṃbhayatpurīṃ tām || 68 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍe pūvārddhe kāśīvarṇanaṃ nāma catuścatvāriṃśodhyāyaḥ || 44 ||
[Analyze grammar]