Chapter 43

[English text for this chapter is available]

agastiruvāca |
divodāsaṃ narapatiṃ kathaṃ devastrilocanaḥ |
kāśīṃ saṃtyājayāmāsa kathamāgācca maṃdarāt |
etadākhyānamākhyāhi śrotṝṇāṃ pramude bhagoḥ || 1 ||
[Analyze grammar]

skaṃda uvāca |
maṃdaraṃ gatavāndevo brahmaṇo vākya gauravāt |
tapasā tasya saṃtuṣṭo maṃdarasyaiva bhūbhṛtaḥ || 2 ||
[Analyze grammar]

gate viśveśvare deve maṃdaraṃ girisuṃdaram |
giriśena samaṃ jagmurapi sarve divaukasaḥ || 3 ||
[Analyze grammar]

kṣetrāṇi vaiṣṇavānīha tyaktvā viṣṇurapi kṣiteḥ |
prayāto maṃdaraṃ yatra devadeva umādhavaḥ || 4 ||
[Analyze grammar]

sthānāni gāṇapatyāni gaṇeśopi tato vrajat |
hitvāhamapi vipreṃdra gatavānmaṃdaraṃ prati || 5 ||
[Analyze grammar]

sūraḥ saurāṇi saṃtyajya gataścāyatanādaram |
svaṃsvaṃ sthānaṃ kṣitau tyaktvā yayuranyepi nirjarāḥ || 6 ||
[Analyze grammar]

gateṣu devasaṃgheṣu pṛthivyāḥ pṛthivīpatiḥ |
cakāra rājyaṃ nirdvaṃdvaṃ divodāsaḥ pratāpavān || 7 ||
[Analyze grammar]

vidhāya rājadhānīṃ sa vārāṇasyāṃ suniścalām |
edhāṃ cakre mahābuddhiḥ prajādharmeṇa pālayan || 8 ||
[Analyze grammar]

sūryavatsa pratapitā durhṛdāṃ hṛdi netrayoḥ |
somavatsuhṛdāmāsīnmānaseṣu svakeṣva'pi || 9 ||
[Analyze grammar]

akhaṃḍamākhaṃḍalavatkodaṃḍakalayanraṇe |
palāyamānairālokiśatrusainyabalāhakaiḥ || 10 ||
[Analyze grammar]

sa dharmarājavajjāto dharmādharmavivecakaḥ |
adaṃḍyānmaṇḍayanrājā daṃḍyāṃśca paridaṃḍayan || 11 ||
[Analyze grammar]

dhanaṃjaya ivādhākṣītparāraṇyānyanekaśaḥ |
pāśīva pāśayāṃcakre vairicakraṃ vidūragaḥ || 12 ||
[Analyze grammar]

sobhūtpuṇyajanādhīśo ripurākṣasavardhanaḥ |
jagatprāṇasamānaśca jagatprāṇanatatparaḥ || 13 ||
[Analyze grammar]

rājarājaḥ sa evābhūtsarveṣāṃ dhanadaḥ satām |
sa eva rudramūrtiśca prekṣiṣṭa ripubhī raṇe || 14 ||
[Analyze grammar]

viśveṣāṃ sa hi devānāṃ tapasā rūpadhṛgyataḥ |
viśvedevāstatastaṃ tu stuvaṃti ca bhajaṃti ca || 15 ||
[Analyze grammar]

asādhyaḥ sa hi sādhyānāṃ vasubhyo vasunādhikaḥ |
grahāṇāṃ vigrahadharo dasrato'jasrarūpabhāk || 16 ||
[Analyze grammar]

marudgaṇānagaṇayaṃstuṣitāṃstoṣayanguṇaiḥ |
sarvavidyādharo yastu sarvavidyādhareṣvapi || 17 ||
[Analyze grammar]

agarvāneva gaṃdharvānyaścakre nijagītibhiḥ |
rarakṣuryakṣarakṣāṃsi taddurgaṃ svargasodaram || 18 ||
[Analyze grammar]

nāgānāgāṃsi cakruśca tasya nāgabalīyasaḥ |
danujāmanujākāraṃ kṛtvā taṃ ca siṣevire || 19 ||
[Analyze grammar]

jātā guhyacarā yasya guhyakāḥ parito nṛṣu |
saṃseviṣyāmahe rājannasurāstvāṃ svavaibhavaiḥ || 20 ||
[Analyze grammar]

vayaṃ yatastvadviṣaye surāvāso'pi durlabhaḥ |
aśikṣayatkṣitipateriha yasya turaṃgamān |
āśugaścāśugāmitvaṃ pāvamāne pathisthitaḥ || 21 ||
[Analyze grammar]

agajānyasya tu gajānnagavarṣmasuvarṣmaṇaḥ |
ajasra dānino dṛṣṭvā bhavannanyepi dāninaḥ || 22 ||
[Analyze grammar]

sadojire ca boddhāro yoddhāraścaraṇājire |
na yasya śāstrairvijitā na śastraiḥ kenacitkvacit || 23 ||
[Analyze grammar]

na netraviṣaye jātā viṣaye yasyabhūbhṛtaḥ |
sadā naṣṭapadā dveṣyāstadā'naṣṭapadāḥ prajāḥ || 24 ||
[Analyze grammar]

kalāvāneka evāsti tridivepi divaukasām |
tasya kṣoṇibhṛtaḥ kṣoṇyāṃ janāḥ sarve kalālayāḥ || 25 ||
[Analyze grammar]

eka eva hi kāmosti svarge sopyaṃgavarjitaḥ |
sāṃgopāṃgāśca sarveṣāṃ sarve kāmā hi tadbhuvi || 26 ||
[Analyze grammar]

tasyopavartanepyeko na śruto gotrabhitkvacit |
svarge svargasadāmīśo gotrabhitparikīrtitaḥ || 27 ||
[Analyze grammar]

kṣayī ca tasya viṣaye kopyākarṇi na kenacit |
triviṣṭape kṣapānāthaḥ pakṣepakṣe kṣayīṣyate || 28 ||
[Analyze grammar]

nāke navagrahāḥ saṃti deśāstasyā'navagrahāḥ || 29 ||
[Analyze grammar]

hiraṇyagarbhaḥ svarlokepyeka eva prakāśate |
hiraṇyagarbhāḥ sarveṣāṃ tatpaurāṇāmihālayāḥ || 30 ||
[Analyze grammar]

saptāśva ekaḥ svarloke nitarāṃ bhāsateṃ'śumān |
sadaṃśukāḥ pratidinaṃ bahvaśvāstatpuraukasaḥ || 31 ||
[Analyze grammar]

sadapsarā yathāsvarbhūstatpuryapisadapsarāḥ |
ekaiva padmā vaikuṃṭhe tasya padmākarāḥ śatam || 32 ||
[Analyze grammar]

anītayaśca tadgrāmānārājapuruṣāḥ kvacit |
gṛhegṛhetra dhanadā nāka eko'lakāpatiḥ || 33 ||
[Analyze grammar]

divodāsasya tasyaivaṃ kāśyāṃ rājyaṃ praśāsataḥ |
gataṃ varṣaṃ dinaprāyaṃ śaradāmayutāṣṭakam || 34 ||
[Analyze grammar]

gīrvāṇā vipratīkāramatha tasya cikīrṣavaḥ |
guruṇā maṃtrayāṃcakrurdharmavartmānuyāyinaḥ || 35 ||
[Analyze grammar]

bhavādṛśāmiva mune prāyaśo dharmacāriṇām |
vibudhā vidadhatyeva mahatīrāpadāṃtatīḥ || 36 ||
[Analyze grammar]

yadyapyasau dharādhīśo vyādhinoddurdharādhvaraiḥ |
tānadhvarabhujo'tyaṃtaṃ tathāpi suhṛdo na te || 37 ||
[Analyze grammar]

svabhāva eva dyusadāṃ parotkarṣāsahiṣṇutā |
bali bāṇa dadhīcyādyairaparāddhaṃ kimatra taiḥ || 38 ||
[Analyze grammar]

aṃtarāyā bhavaṃtyeva dharmasyāpi padepade |
tathāpi na nijo dharmo dharmadhībhirvimucyate || 39 ||
[Analyze grammar]

adharmiṇaḥ samedhaṃte dhanadhānyasamṛddhibhiḥ |
adharmādeva ca paraṃ samūlaṃ yāṃtyadhogatim || 40 ||
[Analyze grammar]

prajāḥ pālayatastasya putrāniva nijaurasān |
ripuṃjayasya nālpopi babhūvādharmasaṃgrahaḥ || 41 ||
[Analyze grammar]

ṣāḍguṇyavedinastasya triśaktyūrjitacetasaḥ |
caturopāyavittasya na raṃdhraṃ vividuḥ surāḥ || 42 ||
[Analyze grammar]

buddhimaṃtopi vibudhā vipratīkartumudyatāḥ |
manāgapi na saṃśekurapakartuṃ tadīśituḥ || 43 ||
[Analyze grammar]

ekapatnīvratāḥ sarve pumāṃsastasya maṃḍale |
nārīṣu kācinnaivāsīdapativratadharmiṇī || 44 ||
[Analyze grammar]

anadhīto na viprobhūdaśūronaiva bāhujaḥ |
vaiśyonabhijño naivāsīdarthopārjanakarmasu || 45 ||
[Analyze grammar]

ananyavṛttayaḥ śūdrā dvijaśuśrūṣaṇaṃ prati |
tasya rāṣṭre samabhavandivodāsasya bhūpateḥ || 46 ||
[Analyze grammar]

avipluta brahmacaryāstadrāṣṭre brahmacāriṇaḥ |
nityaṃ gurukulādhīnā vedagrahaṇatatparāḥ || 47 ||
[Analyze grammar]

ātithyadharmapravaṇā dharmaśāstravicakṣaṇāḥ |
nityasādhusamācārā gṛhasthāstasya sarvataḥ || 48 ||
[Analyze grammar]

tṛtīyāśramiṇo yasminvanavṛttikṛtādarāḥ |
niḥspṛhā grāmavārtāsu vedavartmānusāriṇaḥ || 49 ||
[Analyze grammar]

sarvasaṃgavinirmuktā nirmuktā niṣparigrahāḥ |
vāṅmanaḥkarmadaṃḍāḍhyā yatayo yatra niḥspṛhāḥ || 50 ||
[Analyze grammar]

anyenulomajanmānaḥ pratilo mabhavā api |
svapāraṃparyato dṛṣṭaṃ manāgvartma na tatyajuḥ || 51 ||
[Analyze grammar]

anapatyā na tadrāṣṭre dhanahīnopi kopi na |
avṛddhasevī no kaścidakāṃḍamṛtibhākca na || 52 ||
[Analyze grammar]

na cāṭā naiva vācāṭā vaṃcakā no na hiṃsakāḥ |
na pāṣaṃḍā na vai bhaṃḍā na raṃḍā na ca śauṃḍikāḥ || 53 ||
[Analyze grammar]

śrutighoṣo hi sarvatra śāstravādaḥ padepade |
sarvatra subhagālāpā mudāmaṃgalagītayaḥ || 54 ||
[Analyze grammar]

vīṇāveṇupravādāśca mṛdaṃgā madhurasvanāḥ |
somapānaṃ vinānyatra pānagoṣṭhī na karṇagā || 55 ||
[Analyze grammar]

māṃsāśinaḥ puroḍāśe naivānyatra kadācana |
na durodariṇo yatra nādhamarṇā na taskarāḥ || 56 ||
[Analyze grammar]

putrasya pitroḥ padayoḥ pūjanaṃ devapūjanam |
upavāso vrataṃ tīrthaṃ devatārādhanaṃ param || 57 ||
[Analyze grammar]

nārīṇāṃ bhartṛpad yorarcanaṃ tadvacaḥśrutiḥ |
samarcayaṃti satatamanujā nijamagrajam || 58 ||
[Analyze grammar]

saparyayaṃti muditā bhṛtyāḥ svāmipadāṃbujam |
hīnavarṇairagravarṇo varṇyate guṇagauravaiḥ || 59 ||
[Analyze grammar]

varivasyaṃti bhūyopi trikālaṃ kāśidevatāḥ |
sarvatra sarve vidvāṃsaḥ samarcyaṃte manorathaiḥ || 60 ||
[Analyze grammar]

vidvadbhiśca taponiṣṭhāstaponiṣṭhairjiteṃdriyāḥ |
jiteṃdriyairjñānaniṣṭhā jñānibhiḥ śivayoginaḥ || 61 ||
[Analyze grammar]

maṃtrapūtaṃ mahārhaṃ ca vidhiyuktaṃ susaṃskṛtam |
vāḍavānāṃ mukhāgnau ca hūyate'harniśaṃ haviḥ || 62 ||
[Analyze grammar]

vāpīkūpataḍāgānāmārāmāṇāṃ padepade |
śucibhirdravyasaṃbhāraiḥ kartāro yatra bhūriśaḥ || 63 ||
[Analyze grammar]

yadrāṣṭre hṛṣṭapuṣṭāśca dṛśyaṃte sarvajātayaḥ |
aniṃdyasevā saṃpannā vināmṛgayu saunikān || 64 ||
[Analyze grammar]

itthaṃ tasya mahījāneḥ sarvatra śucivartinaḥ |
unmiṣaṃtopyanimiṣā manākchidraṃ na lebhire || 65 ||
[Analyze grammar]

athovācāmara gururdevānapacikīrṣukān |
tasminrājani dharmiṣṭhe variṣṭhe maṃtravediṣu || 68 ||
[Analyze grammar]

gururuvāca |
saṃdhivigrahayānāsti saṃ śrayaṃ dvaidhabhāvanam |
yathā sa rājā saṃvetti na tathātrāpi kaścana || 67 ||
[Analyze grammar]

upāyopyeka evāsti caturṣviha divaukasaḥ |
bhedo nāma sa cetsidhyettapobalini tatra hi || 68 ||
[Analyze grammar]

tena yadyapi bhūbhartrā bhūmerdevā vivāsitāḥ |
tathāpi bhūriśastatra saṃtyasmatpakṣapātinaḥ || 69 ||
[Analyze grammar]

kālo nimiṣamātropi yānvinā na sukhaṃ vrajet |
asmākamapi tasyāpi saṃti te tatra mānitāḥ || 70 ||
[Analyze grammar]

aṃtarbahiścarā nityaṃ sarvaviśraṃbha bhūmayaḥ |
samāgateṣu teṣvatra sarvaṃ naḥ setsyati priyam || 71 ||
[Analyze grammar]

samākarṇya ca te sarve tridaśā gīṣpatīritam |
nirṇītavaṃtastasyārthaṃ tasmādaṃtarbahiścarān |
abhinaṃdyātha taṃ sarve procuritthaṃ bhavediti || 72 ||
[Analyze grammar]

tataḥ śakraḥ samāhūya vītihotraṃ puraḥsthitam |
ūce madhurayā vācā bahumānapuraḥsaram || 73 ||
[Analyze grammar]

havyavāhana yā mūrtistava tatra pratiṣṭhitā |
tāmupāsaṃhara kṣipraṃ viṣayāttasya bhūpateḥ || 74 ||
[Analyze grammar]

samāgatāyāṃ tanmūrtau sarvānaṣṭāgrayaḥ prajāḥ |
havyakavyakriyāśūnyā virajiṣyaṃti rājani || 75 ||
[Analyze grammar]

prajāsu ca viraktāsu rājyakāmadughāsu vai |
kṛcchreṇopārjito'pārtho rājaśabdo bhaviṣyati || 76 ||
[Analyze grammar]

prajānāṃ raṃjanādrājā yeyaṃ rūḍhirupārjitā |
tasyāṃ rūḍhyāṃ pranaṣṭāyāṃ rājyameva vinaṃkṣyati || 77 ||
[Analyze grammar]

prajāvirahito rājā kośadurgabalādibhiḥ |
samṛddhopyacirānnaśyetkūlasaṃstha iva drumaḥ || 78 ||
[Analyze grammar]

trivargasādhanāhetuḥ prākprajaiva mahīpateḥ |
kṣīṇavṛttyāṃ prajāyāṃ vai trivargaḥ kṣīyate svayam || 79 ||
[Analyze grammar]

kṣīṇe trivarge saṃkṣīṇā gatirlokadvayātmikā || 80 ||
[Analyze grammar]

itīṃdravacanādvahnirahnāya kṣoṇimaṃḍalāt |
ācakarṣa nijāṃ mūrtiṃ yogamāyā balānvitaḥ || 81 ||
[Analyze grammar]

ninye na kevalaṃ tretāṃ jāṭharāgnimapi prabhuḥ |
vajriṇo vacasā vahnirnijaśaktisamanvitam || 82 ||
[Analyze grammar]

vahnau svarlokamāpanne jāte madhyaṃdine nṛpaḥ |
kṛtamādhyāhnikastūrṇaṃ prāviśadbhojyamaṃḍapam || 83 ||
[Analyze grammar]

mahānasādhikṛtayo vepamānāstato muhuḥ |
kṣudhārtamapi bhūpālamidaṃ maṃdaṃ vyajijñapan || 84 ||
[Analyze grammar]

sūpakārā ūcuḥ |
atyahaskaratejaska pratāpavijitānala |
kiṃcidvijñaptukāmāḥ smopyakāṃḍeraṇapaṃḍita || 85 ||
[Analyze grammar]

yadi viśruṇayedrājanbhavānabhayadakṣiṇām |
tadā vijñāpayiṣyāmaḥ prabaddhakarasaṃpuṭāḥ || 86 ||
[Analyze grammar]

bhrūsaṃjñayākṛtādeśāḥ praśastāsyenabhūbhujā |
mṛdu vijñāpayāṃcakruḥ pākaśālādhikāriṇaḥ || 87 ||
[Analyze grammar]

na jānīmo vayaṃ nātha tvatpratāpabhayārditaḥ |
kusṛtyātha kayā vidvānnaṣṭo vaiśvānaraḥ purāt || 88 ||
[Analyze grammar]

kṛśānau kṛśatāṃ prāpte kathaṃ pākakriyā bhavet |
tathāpi sūryapākena siddhā paktirhi kācana || 89 ||
[Analyze grammar]

prabhorādeśamāsādya tāmihaivānayāmahe |
manyāmahe ca bhūjāne paktiradyatanī śubhā || 90 ||
[Analyze grammar]

śrutvāṃdhasikavākyaṃ sa mahāsattvo mahāmatiḥ |
nṛpatiściṃtayāmāsa devānāṃ vai kṛtaṃ tvidam || 91 ||
[Analyze grammar]

kṣaṇaṃ saṃśīlayaṃstatra dadarśa tapasobalāt |
na kevalaṃ jahau gehaṃ hutabhukcaudarīrdarīḥ || 92 ||
[Analyze grammar]

apyahāsīditolokājjagāma ca surālayam |
bhavatviha hi kā hānirasmākaṃ jvalane gatai || 93 ||
[Analyze grammar]

teṣāmevavicārācca hānireṣā suparvaṇām |
tadbalena ca kiṃ rājyaṃ mayedamurarīkṛtam || 94 ||
[Analyze grammar]

pitāmahena mahato gauravātpratipāditam |
iti ciṃtayatastasya madhyalokaśatakratoḥ || 95 ||
[Analyze grammar]

paurāḥ samāgatā dvāri saha jānapadairnaraiḥ |
dvāsthena cājñayā rājñastatasteṃtaḥ praveśitāḥ || 96 ||
[Analyze grammar]

dattvopadaṃ yathārhaṃ te praṇemuḥ kṣoṇivajriṇam |
kecitsaṃbhāṣitā rājñādarasodarayā girā || 97 ||
[Analyze grammar]

kecicca samudā dṛṣṭyā kecicca karasaṃjñayā |
visarjitā sanā rājñā bahumānapuraḥsaram || 98 ||
[Analyze grammar]

tejire bhejire sarve ratnārciḥ parisevite |
vijitāmodasaṃdohe surānokahasaurabhaiḥ |
rājñaḥ śataśalākasthacchatrasyacchāyayāśubhe || 99 ||
[Analyze grammar]

viśāṃpatirathovāca tanmukhacchāyayeritam |
vijñāya tadabhiprāyamalaṃbhītyā puraukasaḥ || 100 ||
[Analyze grammar]

vikārakāribhirlekhairyadinīto'nalo bhuvaḥ |
etāvataiva kiṃ siddhayenmayi teṣāṃ parābhavaḥ || 1 ||
[Analyze grammar]

cikīrṣurahamevāsaṃ paurāḥ kāryamidaṃpurā |
paraṃ hyupekṣitaprāyaṃ diṣṭyā taiḥ smāritaṃ cirāt || 2 ||
[Analyze grammar]

gato'nalo'bhavadbhadraṃ jagatprāṇopi yātvitaḥ |
varuṇaḥ puṣpavaṃtābhyāmavilaṃbaṃ prayātvitaḥ || 3 ||
[Analyze grammar]

ahameva hi parjanyo bhaviṣyāmi tapobalāt |
mude janapadānāṃ ca sarvasasyasamṛddhidaḥ || 4 ||
[Analyze grammar]

tapoyogabalenāhamātmānaṃ parikalpya ca |
tridhāvahnisvarūpeṇa paktīṣṭivyuṣṭikṛttamaḥ || 5 ||
[Analyze grammar]

aṃtarbahiśca yo dvedhā nabhasvatpadavī dadhat |
sarveṣāmeva vetsyāmi tvaṃtaḥkaraṇaceṣṭitam || 6 ||
[Analyze grammar]

vidhāya cāṃbhasīṃ mūrtiṃ sarvajīvaikajīvanīm |
prajāḥ saṃjīvayipyāmi kiṃ jaḍairviṣaye mama || 7 ||
[Analyze grammar]

yadā khe tamasā paurā grasyete śaśibhāskarau |
tadā na kiṃ vinā tābhyāṃ jīvāmaḥ kṣitimaṃḍale || 8 ||
[Analyze grammar]

śriyaṃ cāṃdramasīṃ prāpya hlādayiṣyāmyahaṃ prajāḥ |
niśācareṇa kimiha kṣayiṇā ca kalaṃkinā || 9 ||
[Analyze grammar]

asmatkule mūlabhūto bhāskaro mānya eva naḥ |
sa tiṣṭhatu sukhenātra yātāyātaṃ karotu ca || 110 ||
[Analyze grammar]

sa eko jagatāmātmā viśeṣātkuladevatā |
sopakartuṃ na vettyeva tasyedaṃ vratamuttamam || 11 ||
[Analyze grammar]

iti narapativāksudhārasaughaṃ śrutipuṭakaiḥ paripīya pauravargaḥ |
vikasitavadanāṃbujo jagāmanijanijamālayamādhimuktacittaḥ || 12 ||
[Analyze grammar]

kṣitipatirapi tattathā vidhāya tapasosādhyamihāsti kiṃ trilokyām |
ativahnyarkamasau dadhaccatejo dyusadāṃ śalyamivoccakairbabhūva || 13 ||
[Analyze grammar]

iti śrīskāṃde mahāpuraṇa ekāśītisāhasryāṃ saṃhitāyāṃ caturthe kāśīkhaṃḍe pūrvārddhe divodāsapratāpavarṇanaṃnāma tricatvāriṃśodhyāyaḥ || 43 ||
[Analyze grammar]