Chapter 40

[English text for this chapter is available]

skaṃda uvāca |
avimukteśa māhātmyaṃ varṇitaṃ tegrato mayā |
atho kimasi śuśrūṣuḥ kathayiṣyāmi tatpunaḥ || 1 ||
[Analyze grammar]

agastya uvāca |
avimukteśa māhātmyaṃ śrāvaṃ śrāvaṃ śrutī mama |
atīva suśrute jāte tathāpi na dhinomyaham || 2 ||
[Analyze grammar]

avimukteśvaraṃ liṃgaṃ kṣetraṃ cāpyavimuktakam |
etayostu kathaṃ prāptirbhavetṣaṇmukha tadvada || 3 ||
[Analyze grammar]

skaṃda uvāca |
śṛṇu kuṃ bhaja vakṣyāmi yathā prāptirbhavediha |
svaśreyo dāturetasyā vimuktasya mahāmate || 4 ||
[Analyze grammar]

samīhitārtha saṃsiddhirlabhyate puṇyabhārataḥ |
tacca puṇyaṃ bhavedvipra śrutivartmasabhājanāt || 5 ||
[Analyze grammar]

śrutivartmajuṣaḥ puṃsaḥ saṃsparśānnaśyato mune |
kalikālāvapi sadā chidraṃ prāpya jighāṃsataḥ || 6 ||
[Analyze grammar]

varjitasya vidhānena proktasyākaraṇena vai |
kalikālāvapi hato brāhmaṇaṃ raṃdhradarśanāt || 7 ||
[Analyze grammar]

niṣiddhācaraṇaṃ tasmātkathayiṣye tavāgrataḥ |
taddūrataḥ parityajya naro na nirayī bhavet || 8 ||
[Analyze grammar]

palāṃḍuṃ viḍvarāhaṃ ca śeluṃ laśuna gṛṃjane |
gopīyūṣaṃ taṃḍulīyaṃ varjyaṃ ca kavakaṃ sadā || 9 ||
[Analyze grammar]

vraścanānvṛkṣaniryāsānpāyasāpūpaśaṣkulīḥ |
adevapitryaṃ palalamavatsāgopayastyajet || 10 ||
[Analyze grammar]

paya aikaśaphaṃ heyaṃ tathā krāmelakāvikam |
rātrau na dadhi bhoktavyaṃ divā na navanītakam || 11 ||
[Analyze grammar]

ṭiṭṭibhaṃ kalaviṃkaṃ ca haṃsaṃ cakraṃ plavaṃbakam |
tyajenmāṃsāśinaḥ sarvānsārasaṃ kukkuṭaṃ śukam || 12 ||
[Analyze grammar]

jālapādānkhaṃjarīṭānbuḍitvā matsyabhakṣakān |
matsyāśī sarvamāṃsāśī tanmatsyānsarvathā tyajet || 13 ||
[Analyze grammar]

havyakavyaniyuktau tu bhakṣyau pāṭhīnarohitau |
māṃsāśibhistvamī bhakṣyāḥ śaśa śallaka kacchapāḥ || 14 ||
[Analyze grammar]

śvāvidgodhe praśaste ca jñātāśca mṛgapakṣiṇaḥ |
āyuṣkāmaiḥ svargakāmaistyājyaṃ māṃsaṃ prayatnataḥ || 15 ||
[Analyze grammar]

yajñārthaṃ paśuhiṃsā yā sā svargyā netarā kvacit |
tyajetparyuṣitaṃ sarvamakhaṃḍasneha varjitam || 16 ||
[Analyze grammar]

prāṇātyaye kratau śrāddhe bhaiṣaje viprakāmyayā |
alaulyamitthaṃ palalaṃ bhakṣayannaiva doṣabhāk || 17 ||
[Analyze grammar]

na tādṛśaṃ bhavetpāpaṃ mṛgayāvṛttikāṃkṣiṇaḥ |
yādṛśaṃ bhavati pretya laulyānmāṃsopasevinaḥ || 18 ||
[Analyze grammar]

makhārthaṃ brahmaṇā sṛṣṭāḥ paśu druma mṛgauṣadhīḥ |
nighnannahiṃsako viprastāsāmapi śubhā gatiḥ || 19 ||
[Analyze grammar]

pitṛdevakratukṛte madhuparkārthameva ca |
tatra hiṃsāpyahiṃsā syāddhiṃsānyatra sudustarā || 20 ||
[Analyze grammar]

yo jaṃtūnātmapuṣṭyarthaṃ hinasti jñānadurbalaḥ |
durācārasya tasyeha nāmutrāpi sukhaṃ kvacit || 21 ||
[Analyze grammar]

bhoktānumaṃtā saṃskartā krayivikrayi hiṃsakāḥ |
upahartā ghātayitā hiṃsakāścāṣṭadhā smṛtāḥ || 22 ||
[Analyze grammar]

pratyabdamaśvamedhena śataṃ varṣāṇi yo yajet |
amāṃsabhakṣako yaśca tayoraṃtyo viśiṣyate || 23 ||
[Analyze grammar]

yathaivātmā parastadvaddraṣṭavyaḥ sukhamicchatā |
sukhaduḥkhāni tulyāni yathātmani tathā pare || 24 ||
[Analyze grammar]

sukhaṃ vā yadi vā cānyadyatkiṃcitkriyate pare |
tatkṛtaṃ hi punaḥ paścātsarvamātmani saṃbhavet || 25 ||
[Analyze grammar]

na kleśena vinā dravyamarthahīne kutaḥ kriyāḥ |
kriyāhīne kuto dharmo dharmahīne kutaḥ sukham || 26 ||
[Analyze grammar]

sukhaṃ hi sarvairākāṃkṣyaṃ tacca dharmasamudbhavam |
tasmāddharmotra kartavyaścāturvarṇyena yatnataḥ || 27 ||
[Analyze grammar]

nyāyāgatena dravyeṇa kartavyaṃ pāralaukikam |
dānaṃ ca vidhinā deyaṃ kāle pātre ca bhāvataḥ || 28 ||
[Analyze grammar]

vidhihīnaṃ tathā'pātre yo dadāti pratigraham |
na kevalaṃ hi tadyāti śeṣaṃ tasya ca naśyati || 29 ||
[Analyze grammar]

vyasanārthe kuṭuṃbārthe yadṛṇārthe ca dīyate |
tadakṣayaṃ bhavedatra paratra ca na saṃśayaḥ || 30 ||
[Analyze grammar]

mātāpitṛvihīnaṃ yo mauṃjīpāṇigrahādibhiḥ |
saṃskārayennijairarthaistasya śreyastvanaṃtakam || 31 ||
[Analyze grammar]

agnihotrairna tacchreyo nāgniṣṭomādibhirmakhaiḥ |
yacchreyaḥ prāpyate martyairdvije caike pratiṣṭhite || 32 ||
[Analyze grammar]

yo hyanāthasya viprasya pāṇiṃ grāhayate kṛtī |
iha saukhyamavāpnoti sokṣayaṃ svargamāpnuyāt || 33 ||
[Analyze grammar]

pitṛgehe tu yā kanyā rajaḥ paśyedasaṃskṛtā |
bhrūṇahā tatpitā jñeyo vṛṣalī sāpi kanyakā || 34 ||
[Analyze grammar]

yastāṃ pariṇayenmohātsa bhavedvṛṣalīpatiḥ |
tena saṃbhāṣaṇaṃ tyājyamapāṅkteyena sarvadā || 35 ||
[Analyze grammar]

vijñāya doṣamubhayoḥ kanyāyāśca varasya ca |
saṃbaṃdhaṃ racayetpaścādanyathā doṣabhākpitā || 36 ||
[Analyze grammar]

striyaḥ pavitrāḥ satataṃ naitā duṣyaṃti kenacit |
māsimāsi rajastāsāṃ duṣkṛtānyapakarṣati || 37 ||
[Analyze grammar]

pūrvaṃ striyaḥ surairbhuktāḥ somagaṃdharva vahnibhiḥ |
bhuṃjate mānuṣāḥ paścānnaitāduṣyaṃ ti kenacit || 38 ||
[Analyze grammar]

strīṇāṃ śaucaṃ dadau somaḥ pāvakaḥ sarvamedhyatām |
kalyāṇavāṇīṃ gaṃdharvāstena medhyāḥ sadā striyaḥ || 39 ||
[Analyze grammar]

kanyāṃ bhuṃkte rajaḥkāle'gniḥ śaśī lomadarśane |
stanodbhedeṣu gaṃdharvāstatprāgeva pradīyate || 40 ||
[Analyze grammar]

dṛśyaromātvapatyaghnī kulaghnyudgatayauvanā |
pitṛghnyāviṣkatarajāstatastāḥ parivarjayet || 41 ||
[Analyze grammar]

kanyādānaphalaprepsustasmādda dyādanagnikām |
anyathā na phalaṃ dātuḥ pratigrāhī patedadhaḥ || 42 ||
[Analyze grammar]

kanyāmabhuktāṃ somādyairdadaddānaphalaṃ labhet |
devabhuktāṃ dadaddātā na svargamadhigacchati || 43 ||
[Analyze grammar]

śayanāsanayānāni kuṇapaṃ strīmukhaṃ kuśāḥ |
yajñapātrāṇi sarvāṇi na duṣyaṃti budhāḥ kvacit || 44 ||
[Analyze grammar]

vatsaḥ prasravaṇe madhye śakuniḥ phalapātane |
nāryo ratiprayogeṣu śvā mṛga grahaṇe śuciḥ || 41 ||
[Analyze grammar]

ajāśvayormukhaṃ medhyaṃ gāvo medhyāstu pṛṣṭhataḥ |
pādato brāhmaṇā medhyāḥ striyo medhyāstu sarvataḥ || 45 ||
[Analyze grammar]

balātkāropabhuktā vā corahastagatāpi vā |
na tyājyā dayitā nārī nāsyāstyāgo vidhīyate || 47 ||
[Analyze grammar]

āmlena tāmraśuddhiḥ syācchuddhiḥ kāṃsyasya bhasmanā |
saṃśuddhī rajasā nāryāstaṭinyā vegataḥ śuciḥ || 48 ||
[Analyze grammar]

manasāpi hi yā neha ciṃtayetpuruṣāṃtaram |
somayā saha saukhyāni bhuṃkte cātrāpi kīrtibhāk || 49 ||
[Analyze grammar]

pitā pitāmaho bhrātā sakulyo jananī tathā |
kanyāpradaḥ pūrvanāśe prakṛtisthaḥ paraḥparaḥ || 50 ||
[Analyze grammar]

aprayacchansamāpnoti bhūṇahatyāmṛtāvṛtau |
svayaṃ tvabhāve dātṝṇāṃ kanyā kuryātsvayaṃ varam || 51 ||
[Analyze grammar]

hṛtādhikārāṃ malināṃ piṃḍamātropajīvinīm |
paribhūtāmadhaḥśayyāṃ vāsayedvyabhicāriṇīm || 52 ||
[Analyze grammar]

vyabhicārādṛtau śuddhirgarbhe tyāgo vidhīyate |
garbhabhartṛvadhādau tu mahatyapi ca kalmaṣe || 53 ||
[Analyze grammar]

śūdrasya bhāryā śūdraiva sā ca svā ca viśaḥ smṛte |
te ca svā caiva rājñastu tāśca svācāgrajanmanaḥ || 54 ||
[Analyze grammar]

āropya śūdrāṃ śayane vipro gacchedadhogatim |
utpādya putraṃ śūdrāyāṃ brāhmaṇyādeva hīyate || 55 ||
[Analyze grammar]

daivapitryātitheyāni tatpradhānāni yasya tu |
devādyāstanna cāśnaṃti sa ca svargaṃ na gacchati || 56 ||
[Analyze grammar]

jāmayo yāni gehāni śapaṃtyapratipūjitāḥ |
kṛtyābhirnihatānīva naśyeyustānyasaṃśayam || 57 ||
[Analyze grammar]

tadabhyarcyāḥ suvāsinyo bhūṣaṇācchādanāśanaiḥ |
bhūtikāmairnarairnityaṃ satkāreṣūtsaveṣu ca || 58 ||
[Analyze grammar]

yatra nāryaḥ pramuditā bhūṣaṇācchādanāśanaiḥ |
ramaṃte devatāstatra syustatra saphalāḥ kriyāḥ || 59 ||
[Analyze grammar]

yatra tuṣyati bhartrā strī striyā bhartā ca tuṣyati |
tatra veśmani kalyāṇaṃ saṃpadyeta pade pade || 60 ||
[Analyze grammar]

ahutaṃ ca hutaṃ caiva prahutaṃ prāśitaṃ tathā |
brāhmaṃ hutaṃ paṃcamaṃ ca paṃcayajñā ime śubhāḥ || 61 ||
[Analyze grammar]

japo'hutohuto homaḥ prahuto bhautiko baliḥ |
prāśitaṃ pitṛsaṃtṛptirhutaṃ brāhmaṃ dvijārcanam || 62 ||
[Analyze grammar]

paṃcayajñānimānkurvanbrāhmaṇo nāvasīdati |
eteṣāmananuṣṭhānātpaṃcasūnā avāpnuyāt || 63 ||
[Analyze grammar]

brāhmaṇaṃ kuśalaṃ pṛcchedbāhujātamanāmayam |
vaiśyaṃ sukhaṃ samāgamya śūdraṃ saṃtoṣameva ca || 64 ||
[Analyze grammar]

jātamātraḥ śiśustāvadyāvadaṣṭau samāḥ smṛtāḥ |
bhakṣyābhakṣyeṣu no du्ṣyedyāvannaivopanīyate || 65 ||
[Analyze grammar]

bharaṇaṃ poṣyavargasya dṛṣṭādṛṣṭaphalodayam |
pratyavāyo hyabharaṇe bhartavyastatprayatnataḥ || 66 ||
[Analyze grammar]

mātāpitāgurupatnīḥ tvapatyāni samāśritāḥ |
abhyāgatotithiścāgniḥ poṣyavargā amī nava || 67 ||
[Analyze grammar]

sa jīvati pumānyo'tra bahubhiścopajīvyate |
jīvanmṛtotha vijñeyaḥ puruṣaḥ svodaraṃbhariḥ || 68 ||
[Analyze grammar]

dīnānāthaviśiṣṭebhyo dātavyaṃ bhūtikāmyayā |
adattadānā jāyaṃte parabhāgyopajīvinaḥ || 69 ||
[Analyze grammar]

vibhāgaśīlasaṃyukto dayāvāṃśca kṣamāyutaḥ |
devatātithibhaktastu gṛhastho dhārmikaḥ smṛtaḥ || 70 ||
[Analyze grammar]

śarvarīmadhya yāmau yau hutaśeṣaṃ ca yaddhaviḥ |
tatra svapaṃstadaśnaṃśca brāhmaṇo nāvasīdati || 71 ||
[Analyze grammar]

navaitāni gṛhasthasya kāryāṇyabhyāgate sadā |
sudhā vyayāni yatsaumyaṃ vākyaṃ cakṣurmanomukham || 72 ||
[Analyze grammar]

abhyutthānamihāyāta sasnehaṃ pūrvabhāṣaṇam |
upāsanamanuvrajyā gṛhasthonnati hetave || 73 ||
[Analyze grammar]

tatheṣadvyayayuktāni kāryāṇyetāni vai nava |
āsanaṃ pādaśaucaṃ ca yathāśaktyāśanaṃ kṣitiḥ || 74 ||
[Analyze grammar]

śayyātṛṇajalābhyaṃga dīpā gārhasthya siddhidāḥ |
tathā nava vikarmāṇi tyājyāni gṛhamedhinām || 75 ||
[Analyze grammar]

paiśunyaṃ paradārāśca drohaḥ krodhānṛtāpriyam |
dveṣo daṃbhaśca māyā ca svargamārgārgalāni hi || 76 ||
[Analyze grammar]

navāvaśyakakarmāṇi kāryāṇi prativāsaram |
snānaṃ saṃdhyā japo homaḥ svādhyāyo devatārcanam || 77 ||
[Analyze grammar]

veśvadevaṃ tathātithyaṃ navamaṃ pitṛtarpaṇam |
nava gopyāni yānyatra mune tāni niśāmaya || 78 ||
[Analyze grammar]

janmarkṣaṃ maithunaṃ maṃtro gṛhacchidraṃ ca vaṃcanam |
āyurdhanāpamānaṃ strī na prakāśyāni sarvathā || 79 ||
[Analyze grammar]

navaitāni prakāśyāni rahaḥ pāpamakutsitam |
prāyogyamṛṇaśuddhiśca sānvayaḥ krayavikrayau |
kanyādānaṃ guṇotkarṣo nānyatkenāpi kutracit || 80 ||
[Analyze grammar]

pātra mitra vinīteṣu dīnānāthopakāriṣu |
mātāpitugurūṣvetannavakaṃ dattamakṣayam || 81 ||
[Analyze grammar]

niṣphalaṃ navasūtsṛṣṭaṃ cāṭacāraṇataskare |
kuvaidye kitave dhūrte śaṭhe malle ca baṃdini || 82 ||
[Analyze grammar]

āpastvapi na deyāni navavastūni sarvathā |
anvaye sati sarvasvaṃ dārāṃśca śaraṇāgatān || 83 ||
[Analyze grammar]

nyāsādhīkulavṛttiṃ ca nikṣepaṃ strīdhanaṃ sutam |
yo dadāti sa mūḍhātmā prāyaścittairviśudhyati || 84 ||
[Analyze grammar]

etannavānāṃ navakaṃ jñātvā priyamavāpnuyāt |
anyacca navakaṃ vacmi sarveṣāṃ svargamārgadam || 85 ||
[Analyze grammar]

satyaṃ śaucamahiṃsā ca kṣāṃtirdānaṃ dayā damaḥ |
asteyamiṃdriyākocaḥ sarveṣāṃ dharmasādhanam || 86 ||
[Analyze grammar]

abhyasya navatiṃ caitāṃ svargamārgapradīpikām |
satāmabhimatāṃ puṇyāṃ gṛhastho nāvasīdati || 87 ||
[Analyze grammar]

jihvā bhāryā suto bhrātā mitra dāsa samāśritāḥ |
yasyaite vinayāḍhyāśca tasya sarvatra gauravam || 88 ||
[Analyze grammar]

pānaṃ durjana saṃsargaḥ patyā ca virahoṭanam |
svapnonyagṛhavāsaśca nārīṇāṃ dūṣaṇāni ṣaṭ || 89 ||
[Analyze grammar]

samarghaṃ dhānyamuddhatya maharghaṃ yaḥ prayacchati |
sa hi vārdhuṣiko nāma tasyānnaṃ naiva bhakṣayet || 90 ||
[Analyze grammar]

agre māhiṣikaṃ dṛṣṭvā madhye ca vṛṣalīpatim |
aṃte vārdhuṣikaṃ caiva nirāśāḥ pitaro gatāḥ || 91 ||
[Analyze grammar]

mahiṣītyucyate nārī yā ca syādvyabhicāriṇī |
tāṃ duṣṭāṃ kāmayedyastu sa vai māhiṣikaḥ smṛtaḥ || 92 ||
[Analyze grammar]

sva vṛṣaṃ yā parityajya paravṛṣe vṛṣāyate |
vṛṣalī sā hi vijñeyā na śūdrī vṛṣalī bhavet || 93 ||
[Analyze grammar]

yāvaduṣṇaṃ bhavatyannaṃ yāvanmaunena bhujyate |
tāvadaśnaṃti pitaro yāvannoktā havirguṇāḥ || 94 ||
[Analyze grammar]

vidyāvinayasaṃpanne śrotriye gṛhamāgate |
krīḍaṃtyauṣadhayaḥ sarvā yāsyāmaḥ paramāṃ gatim || 95 ||
[Analyze grammar]

bhraṣṭaśaucavatācāre vipre vedavivarjite |
rodityannaṃ dīyamānaṃ kiṃ mayā duṣkṛtaṃ kṛtam || 96 ||
[Analyze grammar]

yasya koṣṭhagataṃ cānnaṃ vedābhyāsena jīryati |
sa tārayati dātāraṃ daśapūrvāndaśāparān || 97 ||
[Analyze grammar]

na strīṇāṃ vapanaṃ kāryaṃ na ca gāḥ samanuvrajet |
na ca rātrau vasedgoṣṭhe na kuryādvaidikīṃ śrutim || 98 ||
[Analyze grammar]

sarvānkeśānsamuddhṛtya cchedayedaṃguladvayam |
evameva tu nārīṇāṃ śiraso muṃḍanaṃ bhavet || 99 ||
[Analyze grammar]

rājā vā rājaputro vā brāhmaṇo vā bahuśrutaḥ |
akārayitvā vapanaṃ prāyaścittaṃ vinirdiśet || 100 ||
[Analyze grammar]

keśānāṃ rakṣaṇārthāya dviguṇaṃ vratamādiśet |
dviguṇā dakṣiṇā deyā brāhmaṇe vedapārage || 1 ||
[Analyze grammar]

yo'gṛhītvā vivāhāgniṃ gṛhastha iti manyate |
annaṃ tasya na bhoktavyaṃ vṛthā pāko hi sa smṛtaḥ || 2 ||
[Analyze grammar]

dārāgnihotra dīkṣāṃ ca kurute yo'graje sthite |
parivettā sa vijñeyaḥ parivittistu pūrvajaḥ || 3 ||
[Analyze grammar]

parivittiḥ parivettā yayā ca parividyate |
sarve te narakaṃ yāṃti dātṛyājakapaṃcamāḥ || 4 ||
[Analyze grammar]

klībe deśāṃtarasthe ca mūke pratrajite jaḍe |
kubje kharve ca patite na doṣaḥ parivedane || 5 ||
[Analyze grammar]

vedākṣaraṇi yāvaṃti niyuṃjyādarthakāraṇe |
tāvatīrvai bhrūṇahatyā vedavikrayakṛllabhet || 6 ||
[Analyze grammar]

yastu pravrajito bhūtvā sevate maithunaṃ punaḥ |
ṣaṣṭirvarṣasahasrāṇi viṣṭhāyāṃ jāyate kṛmiḥ || 7 ||
[Analyze grammar]

śūdrānnaṃ śūdrasaṃparkaḥ śūdreṇa ca sahāsanam |
śūdrādvidyāgamaḥ kaścijjvalaṃtamapi pātayet || 8 ||
[Analyze grammar]

śūdrādāhṛtya nirvāpaṃ ye pacaṃtyabudhā dvijāḥ |
te yāṃti narakaṃ ghoraṃ brahmatejovivarjitāḥ || 9 ||
[Analyze grammar]

mākṣikaṃ phāṇitaṃ śākaṃ gorasaṃ lavaṇaṃ ghṛtam |
hastadattāni bhuktāni dinamekamabhojanam || 110 ||
[Analyze grammar]

hastadattāśca ye snehā lavaṇaṃ vyajanāni ca |
dātāraṃ nopatiṣṭhaṃte bhoktā bhuṃkte tu kilbiṣam || 11 ||
[Analyze grammar]

āyasenaiva pātreṇa yadannamupadīyate |
bhoktā tadviṭsamaṃ bhuṃkte dātā ca narakaṃ vrajet || 12 ||
[Analyze grammar]

aṃgulyā daṃtakāṣṭhaṃ ca pratyakṣalavaṇaṃ ca yat |
mṛttikābhakṣaṇaṃ yacca samaṃ gomāṃsabhakṣaṇaiḥ || 13 ||
[Analyze grammar]

pānīyaṃ pāyasaṃ bhaikṣaṃ ghṛtaṃ lavaṇameva ca |
hastadattaṃ na gṛhṇīyāttulyagomāṃsabhakṣaṇaiḥ || 14 ||
[Analyze grammar]

agrato nivasenmūrkho dūrataśca guṇānvitaḥ |
guṇānvitāya dātavyaṃ nāsti mūrkhe vyatikramaḥ || 15 ||
[Analyze grammar]

brāhmaṇātikramo nāsti vipre vedavivarjite |
jvalaṃtamagnimutsṛjya nahi bhasmani hūyate || 16 ||
[Analyze grammar]

sannikṛṣṭamadhīyānaṃ brāhmaṇaṃ yo vyatikramet |
bhojane caiva dāne ca dahedāsaptamaṃ kulam || 17 ||
[Analyze grammar]

gorakṣakānvāṇijakāṃstathā kārukuśīlavān |
preṣyānvārdhuṣikāṃścaiva viprāñśūdravadācaret || 18 ||
[Analyze grammar]

devadravyavibhāgena brahmasva haraṇena ca |
kulānyāśu vinaśyaṃti brāhmaṇātikrameṇa ca || 19 ||
[Analyze grammar]

mā dehīti ca yo brūyādgavāgnibrāhmaṇeṣu ca |
tiryagyoniśataṃ gatvā cāṃḍāleṣvabhijāyate || 120 ||
[Analyze grammar]

vācā yacca pratijñātaṃ karmaṇānopapāditam |
ṛṇaṃ taddharmasaṃyuktamihaloke paratra ca || 21 ||
[Analyze grammar]

vighasāśī bhavennityaṃ nityaṃ cāmṛtabhojanaḥ |
yajñaśeṣo'mṛtaṃbhuktaśeṣaṃ tu vighasaṃ viduḥ || 22 ||
[Analyze grammar]

savyādaṃsātparibhraṣṭe nābhideśe vyavasthite |
vastre sa ekavāsāstaṃ deve pitrye ca varjayet || 23 ||
[Analyze grammar]

yadeva tarpayatyadbhiḥ pitṝnsnātvā dvijottamaḥ |
tenaiva sarvamāpnoti pitṛyajñakriyāphalam || 24 ||
[Analyze grammar]

hastau prakṣālya gaṃḍūṣaṃ yaḥ pibedbhojanottaram |
daivaṃ pitryaṃ tathātmānaṃ trayaṃ sa upaghātayet || 15 ||
[Analyze grammar]

gaṇānnaṃ gaṇikānnaṃ ca yadannaṃ grāmayājake |
strīṇāṃ prathamagarbheṣu bhuktvā cāṃdrāyaṇaṃ careta || 26 ||
[Analyze grammar]

pakṣe vā yadi vā māse yasya gehetti na dvijaḥ |
bhuktvā durātmanastasya careccāṃdrāyaṇavratam || 27 ||
[Analyze grammar]

satriṇāṃ dīkṣitānāṃ ca yatīnāṃ brahmacāriṇām |
eteṣāṃ sūtakaṃ nāsti ṛtvijāṃ karmakurvatām || 28 ||
[Analyze grammar]

ajīrṇe'bhyudite vāte śmaśrukarmaṇi maithune |
duḥsvapne durjanasparśe snānameva vidhīyate || 29 ||
[Analyze grammar]

caityavṛkṣaṃ citiṃ yūpaṃ śivanirmālyabhojinam |
vedavikrayiṇaṃ spṛṣṭvā sacailo jalamāviśet || 130 ||
[Analyze grammar]

agnyagāre gavāṃ goṣṭhe deva brāhmaṇasannidhau |
svādhyāye bhojane pāne pāduke vai visarjayet || 31 ||
[Analyze grammar]

khalakṣetragataṃ dhānyaṃ kūpavāpīṣu yajjalam |
agrāhyādapi tadgrāhyaṃ yacca goṣṭhagataṃ payaḥ || 32 ||
[Analyze grammar]

yadveṣṭitaśirā bhuṃkte yo bhuṃkte dakṣiṇāmukhaḥ |
sopānatkaśca yadbhuṃkte tadvai rakṣāṃsi bhuṃjate || 33 ||
[Analyze grammar]

yātudhānāḥ piśācāśca rākṣasāḥ krūrakarmiṇaḥ |
haraṃti rasamannasya maṃḍalena vivarjitam || 34 ||
[Analyze grammar]

brahmādyāśca surāḥ sarve vasiṣṭhādyā maharṣayaḥ |
maṃḍalaṃ copajīvaṃti tataḥ kurvīta maṃḍalam || 35 ||
[Analyze grammar]

brāhmaṇe caturasraṃ syāttryasraṃ vai bāhujanmanaḥ |
vartulaṃ ca viśaḥ proktaṃ śūdrasyābhyukṣaṇaṃ smṛtam || 36 ||
[Analyze grammar]

notsaṃge bhojanaṃ kṛtvā no pāṇau naiva karpaṭe |
nāsanena ca śayyāyāṃ bhuṃjīta na malārditaḥ || 37 ||
[Analyze grammar]

dharmaśāstra rathārūḍhā vedakhaḍgadharā dvijāḥ |
krīḍārthamapi yadbrūyuḥ sa dharmaḥ paramaḥ smṛtaḥ || 38 ||
[Analyze grammar]

rātrau dhānā dadhiyutaṃ dharmakāmo na bhakṣayet |
aśnato dharmahāniḥ syādvyādhibhiścopapīḍyate || 39 ||
[Analyze grammar]

phāṇitaṃ gorasaṃ toyaṃ lavaṇaṃ madhukāṃjikam |
hastena brāhmaṇo dattvā kṛcchraṃ cāṃdrāyaṇaṃ caret || 140 ||
[Analyze grammar]

gaṃdhābharaṇamālyāni yaḥ prayacchati dharmavit |
sasugaṃdhiḥ sadā hṛṣṭo yatrayatropajāyate || 41 ||
[Analyze grammar]

nīlīraktaṃ tu yadvastraṃ dūrataḥ parivarjayet |
strīṇāṃ krīḍārthasaṃyoge śayanīyena duṣyati || 42 ||
[Analyze grammar]

pālanādvikrayāccaiva tadvṛtterupajīvanāt |
apavitro bhavedviprastribhiḥ kṛcchrairviśudhyati || 43 ||
[Analyze grammar]

snānaṃ dānaṃ tapo homaḥ svādhyāyaḥ pitṛtarpaṇam |
vṛthā tasya mahāyajñā nīlī vāso bibharti yaḥ || 44 ||
[Analyze grammar]

nīlīraktaṃ yadāvastraṃ vipraḥ svāṃgeṣu dhārayet |
taṃ tu saṃtatisaṃkhyāke narake sa vaseddhruvam || 45 ||
[Analyze grammar]

ahorātroṣito bhūtvā paṃcagavyena śudhyati || 46 ||
[Analyze grammar]

nīlīraktena vastreṇa yadannamupakalpayet |
bhoktā viṣṭhāsamaṃ bhuṃkte dātā ca narakaṃ vrajet || 47 ||
[Analyze grammar]

amṛtaṃ brāhmaṇasyānnaṃ kṣattriyānnaṃ payaḥ smṛtam |
vaiśyasya cānnamevānnaṃ śūdrasya rudhiraṃ smṛtam || 48 ||
[Analyze grammar]

vaiśvadevena homena devatābhyarcanairjapaiḥ |
amṛtaṃ tena viprānnamṛgyajuḥsāmasaṃskṛtam || 49 ||
[Analyze grammar]

vyavahārānurūpeṇa nyāyena tu yadarjanam |
kṣatriyasya payastena prajāpālanato bhavet || 150 ||
[Analyze grammar]

praharānaddhavāhādyadannamutpādya yacchati |
sītāyajñavidhānena vaiśyānnaṃ tena saṃskṛtam || 51 ||
[Analyze grammar]

ajñānatimirāṃdhasya madyapānaratasya ca |
rudhiraṃ tena śūdrānnaṃ vedamaṃtravivarjitam || 52 ||
[Analyze grammar]

na vṛthā śapathaṃ kuryātsvalpepyarthe narottamaḥ |
vṛthā hi śapathaṃ kurvanpretya ceha vinaśyati || 53 ||
[Analyze grammar]

kāminīṣu vivāhe ca gavāṃ bhukte dhanakṣaye |
brāhmaṇābhyupapattau ca śapathairnāsti pātakam || 54 ||
[Analyze grammar]

satyena śāpayedvipraṃ kṣatriyaṃ vāhanāyudhaiḥ |
gobījakāṃcanairvaiśyaṃ śūdraṃ sarvaistu pātakaiḥ || 55 ||
[Analyze grammar]

agniṃ vā hārayedenamapsu cainaṃ nimajjayet |
sparśayetputradārāṇāṃ śirāṃsyenaṃ ca vā pṛthak || 56 ||
[Analyze grammar]

na yamaṃ yamamityāhurātmā vai yama ucyata |
ātmā saṃyamito yena taṃ yamaḥ kiṃ kariṣyati || 57 ||
[Analyze grammar]

na nistriṃśastathā tīkṣṇaḥ phaṇī vā duratikramaḥ |
ripurvā nityasaṃkuddho yathātmā duradhiṣṭhitaḥ || 58 ||
[Analyze grammar]

ekaḥ kṣamāvatāṃ doṣo na dvitīyaḥ kathaṃcana |
yadenaṃ kṣamayā yuktamaśaktaṃ manyate janaḥ || 59 ||
[Analyze grammar]

na śabdaśāstrābhiratasya mokṣo na caiva ramyā vasathapriyasya |
na bhojanācchādana tatparasya na lokavitta grahaṇe ratasya || 160 ||
[Analyze grammar]

ekāṃtaśīlasya sadaiva tasya sarveṃdriyaprīti nivartakasya |
svādhyāyayoge gatamānasasya mokṣo dhuvaṃ nityamahiṃsakasya || 61 ||
[Analyze grammar]

kvaikāṃtaśīlatvamihāsti puṃsaḥ kva ceṃdriyaprītinivṛttirasti |
kva yogayuktiḥ kva ca daivatejyā kāśyāṃ vinaibhiḥ sahajena muktiḥ || 62 ||
[Analyze grammar]

viśveśa saṃśīlanamevayogastapaśca viśveśapurīnivāsaḥ |
vratāni dānaṃ niyamā yamāśca snānaṃ dyunadyāṃ yadudagvahāyām || 63 ||
[Analyze grammar]

skaṃda uvāca |
nyāyāgatadhanastattvajñānaniṣṭhotithipriyaḥ |
śrāddhakṛtsatyavādī ca gṛhasthopīha mucyate || 64 ||
[Analyze grammar]

dīnāṃdhakṛpaṇārthibhyo dattvānnāni viśeṣataḥ |
kṛtvā gārhyāṇi karmāṇi gṛhasthaḥ śreya āpnuyāt || 65 ||
[Analyze grammar]

itthamācaratāṃ puṃsāṃ kāśīnāthaḥ prasīdati |
kāśīnāthaprasādena kāśīprāptistu mokṣakṛt || 66 ||
[Analyze grammar]

sa sarvatīrthasusnātaḥ sa sarvakratudīkṣitaḥ |
sa dattasarvadānastu kāśī yena niṣevitā || 167 ||
[Analyze grammar]

iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍe pūrvāddhe gṛhasthadharmākhyānaṃnāma catvāriṃśodhyāyaḥ || 40 ||
[Analyze grammar]