Chapter 38

[English text for this chapter is available]

skaṃda uvāca |
vivāhā brāhma daivārṣāḥ prājāpatyāsurau tathā |
gāṃdharvo rākṣasaścāpi paiśāco'ṣṭama ucyate || 1 ||
[Analyze grammar]

sa brāhmo varamāhūya yatra kanyā svalaṃkṛtā |
dīyate tatsutaḥ pūyātpuruṣānekaviṃśatim || 2 ||
[Analyze grammar]

yajñasthāyartvije daivastajjaḥpāti caturdaśa |
varādādāya godvaṃdvamārṣastajjaḥ punāti ṣaṭ || 3 ||
[Analyze grammar]

sahobhau caratāṃ dharmamityuktvā dīyaterthine |
yatra kanyā prājāpatyastajjo vaṃśānpunāti ṣaṭ || 4 ||
[Analyze grammar]

catvāra ete viprāṇāṃ dharmyāḥ pāṇigrahāḥ smṛtāḥ |
āsuraḥ krayaṇāddravyairgāṃdharvonyonya maitrataḥ || 5 ||
[Analyze grammar]

prasahyakanyāharaṇādrākṣaso niṃditaḥ satām |
chalena kanyāharaṇātpaiśāco garhito'ṣṭamaḥ || 6 ||
[Analyze grammar]

prāyaḥ kṣatraviśoruktā gāṃdharvāsurarākṣasāḥ |
aṣṭamastveṣa pāpiṣṭhaḥ pāpiṣṭhānāṃ ca saṃbhavet || 7 ||
[Analyze grammar]

savarṇayā karo grāhyo dhāryaḥ kṣatriyayā śaraḥ |
pratodo vaiśyayā dhāryo vāsoṃtaḥ pajjayā tathā || 8 ||
[Analyze grammar]

asavarṇastveṣa vidhiḥ smṛto dṛṣṭaśca vedane |
savarṇābhistu sarvābhiḥ pāṇirgrāhyastvayaṃ vidhiḥ || 9 ||
[Analyze grammar]

dharmyairvivāhairjāyaṃte dharmyā eva śatāyuṣaḥ |
adharmyairdharmarahitā maṃdabhāgyadhanāyuṣaḥ || 10 ||
[Analyze grammar]

ṛtukālābhigamanaṃ dharmoyaṃ gṛhiṇaḥ paraḥ |
strīṇāṃ varamanusmṛtya yathākāmyathavā bhavet || 11 ||
[Analyze grammar]

divābhigamanaṃ puṃsāmanāyuṣyaṃ paraṃ matam |
śrāddhāhaḥ sarvaparvāṇi yatnāttyājyāni dhīmatā || 12 ||
[Analyze grammar]

tatra gacchanstriyaṃ mohāddharmātpracyavate parāt || 13 ||
[Analyze grammar]

ṛtukālābhigāmī yaḥ svadāranirataśca yaḥ |
sa sadā brahmacārī ca vijñeyaḥ sadgṛhāśramī || 14 ||
[Analyze grammar]

ṛtuḥ ṣoḍaśayāminyaścatasrastā sugarhitāḥ |
putrāstāsvapi yā yugmā ayugmāḥ kanyakā prajāḥ || 15 ||
[Analyze grammar]

tyaktvā caṃdramasaṃ duḥsthaṃ maghāṃ pauṣṇaṃ vihāya ca |
śuciḥ sannirviśetpatnīṃ punnāmarkṣe viśeṣataḥ |
śuciṃ putraṃ prasūyeta puruṣārthaprasādhakam || 16 ||
[Analyze grammar]

ārṣe vivāhe godvaṃdvaṃ yaduktaṃ tanna śasyate |
śulkamaṇvapi kanyāyāḥ kanyā vikrayapāpakṛt || 17 ||
[Analyze grammar]

apatyavikrayī kalpaṃ vasedviṭkṛmibhojane |
ato nāṇvapi kanyāyā upajīvetpitā dhanam || 18 ||
[Analyze grammar]

strīdhanānyupajīvaṃti ye mohādiha bāṃdhavāḥ |
na kevalaṃ nirayagāsteṣāmapi hi pūrvajāḥ || 19 ||
[Analyze grammar]

patyā tuṣyati yatra strī tuṣyedyatra striyā patiḥ |
tatra tuṣṭā mahālakṣmīrnivaseddānavā'riṇā || 20 ||
[Analyze grammar]

vāṇijyaṃ nṛpateḥ sevā vedānadhyāpanaṃ tathā |
kuvivāhaḥ kriyālopaḥ kule patanahetavaḥ || 21 ||
[Analyze grammar]

kuryādvaivāhike vahnau gṛhyakarmānvahaṃ gṛhī |
paṃcayajñakriyāṃ cāpi paktiṃ dainaṃdinīmapi || 22 ||
[Analyze grammar]

gṛhasthāśramiṇaḥ paṃca sūnā karma dine dine |
kaṃḍanī peṣaṇī cullī hyudakuṃbhastu mārjanī || 23 ||
[Analyze grammar]

tāsāṃ ca paṃcasūnānāṃ nirākaraṇahetavaḥ |
kratavaḥ paṃca nirdiṣṭā gṛhi śreyobhivardhanāḥ || 24 ||
[Analyze grammar]

pāṭhanaṃ brahmayajñaḥ syāttarpaṇaṃ ca pitṛ kratuḥ |
homo daivo balirbhauto'tithyarcā nṛkratuḥ kramāt || 25 ||
[Analyze grammar]

pitṛprītiṃ prakurvāṇaḥ kurvīta śrāddhamanvaham |
annodakapayomūlaiḥ phalairvāpi gṛhāśramī || 26 ||
[Analyze grammar]

godānena ca yatpuṇyaṃ pātrāya vidhipūrvakam |
satkṛtya bhikṣave bhikṣāṃ dattvā tatphalamāpnuyāt || 27 ||
[Analyze grammar]

tapovidyāsamiddīpte hutaṃ viprāsya pāvake |
tārayedvighnasaṃghebhyaḥ pāpābdherapi dustarāt || 28 ||
[Analyze grammar]

anarcito'tithirgehādbhagnāśo yasya gacchati |
ājanmasaṃcitātpuṇyātkṣaṇātsa hi bahirbhavet || 29 ||
[Analyze grammar]

sāṃtvapūrvāṇi vākyāni śayyārthe bhūstṛṇodake |
etānyapi pradeyāni sadābhyāgata tuṣṭaye || 30 ||
[Analyze grammar]

gṛhasthaḥ parapākādī pretya tatpaśutāṃ vrajet |
śreyaḥ parānnapuṣṭasya gṛhṇīyādannado yataḥ || 31 ||
[Analyze grammar]

ādityoḍho'tithiḥ sāyaṃ satkartavyaḥ prayatnataḥ |
asatkṛtonyato gacchanduṣkṛtaṃ bhūri yacchati || 32 ||
[Analyze grammar]

bhuṃjāno'tithiśeṣānnamihāyurdhanabhāgbhavet |
praṇodyātithimannāśī kilbiṣī ca gṛhāśramī || 33 ||
[Analyze grammar]

vaiśvadevāṃta saṃprāptaḥ sūryoḍho vātithiḥ smṛtaḥ |
na pūrvakāla āyāto na ca dṛṣṭacaraḥ kvacit || 34 ||
[Analyze grammar]

balipātrakare vipre yadyanyotithirāgataḥ |
adattvā taṃ baliṃ tasmai yathāśaktyānnamarpayet || 35 ||
[Analyze grammar]

kumārāśca svavāsinyo garbhiṇyo'tirujānvitāḥ |
atitherāditopyete bhojyā nātra vicāraṇā || 36 ||
[Analyze grammar]

pitṛdevamanuṣyebhyo dattvāśnātyamṛtaṃ gṛhī |
svārthaṃ pacannaghaṃ bhuṃkte kevalaṃ svodaraṃbhariḥ || 37 ||
[Analyze grammar]

mādhyāhnikaṃ vaiśvadevaṃ gṛhasthaḥ svayamācaret |
patnī sāyaṃ baliṃ dadyātsiddhānnairmaṃtravarjitam || 38 ||
[Analyze grammar]

etatsāyaṃtanaṃ nāma vaiśvadevaṃ gṛhāśrame |
sāyaṃprātarbhavedeva vaiśvadevaṃ prayatnataḥ || 39 ||
[Analyze grammar]

vaiśvadevena ye hīnā ātithyena vivarjitāḥ |
sarve te vṛṣalā jñeyāḥ prāptavedā api dvijāḥ || 40 ||
[Analyze grammar]

akṛtvā vaiśvadevaṃ tu bhuṃjate ye dvijādhamāḥ |
iha lokennahīnāḥ syuḥ kākayoniṃ vrajaṃtyatha || 41 ||
[Analyze grammar]

vedoditaṃ svakaṃ karma nityaṃ kuryādataṃdritaḥ |
taddhi kurvanyathāśakti prāpnuyātsadgatiṃ parām || 42 ||
[Analyze grammar]

ṣaṣṭhyaṣṭamyorvasetpāpaṃ taile māṃse sadaiva hi |
paṃcadaśyāṃ caturdaśyāṃ tathaiva ca bhagekṣure || 43 ||
[Analyze grammar]

udayaṃ taṃ na cekṣeta nāstaṃ yaṃtaṃ na madhyagam |
na rāhuṇopasṛṣṭaṃ ca nāṃbusaṃsthaṃ divākaram || 44 ||
[Analyze grammar]

na vīkṣetātmamanorūpamāśudhāvenna varṣati |
nollaṃghayedvatsataṃtrīṃ na nagno jalamāviśet || 45 ||
[Analyze grammar]

devatāyatanaṃ vipraṃ dhenuṃ madhumṛdaṃ ghṛtam |
jātivṛddhaṃ vayovṛddhaṃ vidyāvṛddhaṃ tapasvinam || 46 ||
[Analyze grammar]

aśvatthaṃ caityavṛkṣaṃ ca guruṃ jalabhṛtaṃ ghaṭam |
siddhānnaṃ dadhisiddhārthaṃ gacchankuryātpradakṣiṇam || 47 ||
[Analyze grammar]

rajasvalāṃ na seveta nāśnīyātsaha bhāryayā |
ekavāsā na bhuṃjīta na bhuṃjītotkaṭāsane || 48 ||
[Analyze grammar]

nāśnaṃtīṃ strīṃ samīkṣeta tejaskāmo dvijottamaḥ |
asaṃtarpya pitṝndevānnādyādannaṃ navaṃ kvacit || 49 ||
[Analyze grammar]

pakvānnaṃ cāpi no māṃsaṃ dīrghakālaṃ jijīviṣuḥ |
na mūtraṃ govraje kuryānna valmīke na bhasmani || 50 ||
[Analyze grammar]

na garteṣu sasatveṣu na tiṣṭhanna vrajannapi |
goviprasūryavāyvagni caṃdrarkṣāṃbu gurūnapi || 51 ||
[Analyze grammar]

abhipaśyanna kurvīta malamūtravisarjanam |
tiraskṛtyāvaniṃ loṣṭakāṣṭhaparṇatṛṇādibhiḥ || 52 ||
[Analyze grammar]

prāvṛtya vāsasā mauliṃ maunī viṇmūtramutsṛjet |
yathāsukhamukho rātrau dinecchāyāṃdhakārayoḥ || 53 ||
[Analyze grammar]

bhītiṣu prāṇabādhāyāṃ kuryānmalavisarjanam |
mukhenopadhamennāgniṃ nagnāṃ nekṣeta yoṣitam || 54 ||
[Analyze grammar]

nāṃghrī pratāpayedagnau na vastvaśuci nikṣipet |
prāṇihiṃsāṃ na kurvīta nāśnīyātsaṃdhyayordvayoḥ || 55 ||
[Analyze grammar]

na saṃviśeta saṃdhyāyāṃ pratyaksaumyaśirā api |
viṇmūtraṣṭhīvanaṃ nāpsu kuryāddīrghajijīviṣuḥ || 56 ||
[Analyze grammar]

nācakṣīta dhayaṃtīṃ gāṃ neṃdracāpaṃ pradarśayet |
naikaḥ supyātkvacicchūnye na śayānaṃ prabodhayet || 57 ||
[Analyze grammar]

paṃthānaṃ naikalo yāyānna vāryaṃjalinā pibet |
na divodbhūta sāraṃ ca bhakṣayeddadhino niśi || 58 ||
[Analyze grammar]

strīdharmiṇyā nābhivadennādyādātṛpti rātriṣu |
tauryatrika priyo na syātkāṃsye pādau na dhāvayet || 59 ||
[Analyze grammar]

śrāddhaṃ kṛtvā para śrāddhe yo'śnīyājjñānavarjitaḥ |
dātuḥ śrāddhaphalaṃ nāsti bhoktā kilbiṣabhugbhavet || 60 ||
[Analyze grammar]

na dhārayedanyabhuktaṃ vāsaśco pānahāvapi |
na bhinna bhājaneśnīyānnāsītāgnyādi dūṣite || 61 ||
[Analyze grammar]

ārohaṇaṃ gavāṃ pṛṣṭhe pretadhūmaṃ sarittaram |
bālātapaṃ divāsvāpaṃ dyajeddīrghaṃ jijīviṣuḥ || 62 ||
[Analyze grammar]

snātvā na mārjayedgātraṃ visṛjenna śikhāṃ pathi |
hastau śiro na dhunuyānnākarṣedāsanaṃ padā || 63 ||
[Analyze grammar]

notpāṭayellomanakhaṃ daśanena kadācana |
karajaiḥ karajacchedaṃ tṛṇacchedaṃ vivarjayet || 64 ||
[Analyze grammar]

śubhāyana yadāyatyāṃ tyajettatkarma yatnataḥ |
advāreṇa na gaṃtavyaṃ svaveśmaparaveśmanoḥ || 65 ||
[Analyze grammar]

krīḍennākṣaiḥ sahāsīta na dharmaghnairna rogibhiḥ |
na śayīta kvacinnagnaḥ pāṇau bhuṃjīta naiva ca || 66 ||
[Analyze grammar]

ārdrapādakarāsyośnandīrghakālaṃ ca jīvati |
saṃviśennārdracaraṇo nocchiṣṭaḥ kvacidāvrajet || 67 ||
[Analyze grammar]

śayanastho na cāśnīyānnapibenna japeddvijaḥ |
sopānatkaścanācāmenna tiṣṭhandhārayā pibet || 68 ||
[Analyze grammar]

sarvaṃ tilamayaṃ nādyātsāyaṃ śarmābhilāṣukaḥ |
na nirīkṣeta viṇmūtre nocchiṣṭaḥ saṃspṛśecchiraḥ || 69 ||
[Analyze grammar]

nādhitiṣṭhettuṣāṃgāra bhasmakeśakapālikāḥ |
patitaiḥ saha saṃvāsaḥ patanāyaiva jāyate || 70 ||
[Analyze grammar]

śrāvayedvaidikaṃ maṃtraṃ na śūdrāya kadācana |
brāhmaṇyāddhīyate vipraḥ śūdro dharmācca hīyate || 71 ||
[Analyze grammar]

dharmopadeśaḥ śūdrāṇāṃ svaśreyaḥ pratighātayet |
dvijaśuśrūṣaṇaṃ dharmaḥ śūdrāṇāṃ hi paro mataḥ || 72 ||
[Analyze grammar]

kaṃḍūyanaṃ hi śirasaḥ pāṇibhyāṃ na śubhaṃ matam |
ātāḍanaṃ karābhyāṃ ca krośanaṃ keśaluṃcanam || 73 ||
[Analyze grammar]

aśāstravartino bhūpāllubdhātkṛtvā pratigraham |
brāhmaṇaḥ sānvayo yāti narakānekaviṃśatim || 74 ||
[Analyze grammar]

akālavidyutstanite varṣartau pāṃsuvarṣaṇe |
mahāvātadhvanau rātrāvanadhyāyāḥ prakīrtitāḥ || 75 ||
[Analyze grammar]

ulkāpāte ca bhūkaṃpe digdāhe madhyarātriṣu |
saṃdhyayorvṛṣalopāṃte rājñorāhośca sūtake || 76 ||
[Analyze grammar]

darśāṣṭakāsu bhūtāyāṃ śrāddhikaṃ pratigṛhya ca |
pratipadyapi pūrṇāyāṃ gajoṣṭrābhyāṃ kṛtāṃtare || 77 ||
[Analyze grammar]

kharoṣṭrakroṣṭra virute samavāye rudatyapi |
upākarmaṇi cotsarge nāvimārge tarau jale || 78 ||
[Analyze grammar]

āraṇyakamadhītyāpi bāṇasāmnorapi dhvanau |
anadhyāyeṣu caiteṣu nādhīyīta dvijaḥ kvacit || 79 ||
[Analyze grammar]

kṛtāṃtarāyo na paṭhedbhekākhu śvāhi babhrubhiḥ |
bhūtāṣṭamyoḥ paṃcadaśyorbrahmacārī sadā bhavet || 80 ||
[Analyze grammar]

anāyuṣyakaraṃ caiva paradāropasarpaṇam |
tasmāttaddūratastyājyaṃ vairiṇāṃ copasevanam || 81 ||
[Analyze grammar]

pūrvarddhibhiḥ parityaktamātmānaṃ nāvamānayet |
sadodyamavatāṃ yasmācchriyo vidyā na durlabhāḥ || 82 ||
[Analyze grammar]

satyaṃ brūyātpriyaṃ brūyānnabrūyātsatyamapriyam |
priyaṃ ca nānṛtaṃ brūyādeṣa dharmo ghaṭodbhava || 83 ||
[Analyze grammar]

bhadrameva vadennityaṃ bhadrameva viciṃtayet |
bhadraireveha saṃsargo nābhadraiśca kadācana || 84 ||
[Analyze grammar]

rūpavittakulairhīnānsudhīrnādhikṣipennarān |
puppavaṃtau na cekṣeta tvaśucirjyotiṣāṃ gaṇam || 85 ||
[Analyze grammar]

vācovegaṃ manovegaṃ jihvāvegaṃ ca varjayet |
utkoca dyūta dautyārta dravyaṃ dūrātparityajet || 86 ||
[Analyze grammar]

gobrāhmaṇāgnīnucchiṣṭa pāṇinā naiva saṃspṛśet |
na spṛśedanimitte nakhāni svāni tvanāturaḥ || 87 ||
[Analyze grammar]

guhyajānyapi lomāni tatsparśādaśucirbhavet |
pādadhautodakaṃ mūtramucchiṣṭānnodakāni ca || 88 ||
[Analyze grammar]

niṣṭhīvanaṃ ca śleṣmāṇaṃ gṛhāddūraṃ vinikṣipet |
aharniśaṃ śruterjāpyācchaucācāraniṣevaṇāt |
adrohavatyā buddhyā ca pūrvaṃ janma smareddvijaḥ || 89 ||
[Analyze grammar]

vṛddhānprayatnādvaṃdeta dadyātteṣāṃ svamāsanam |
vinamradhamanistasmādanuyāyāttataśca tān || 90 ||
[Analyze grammar]

śruti bhūdeva devānāṃ nṛpa sādhu tapasvinām |
pativratānāṃ nārīṇāṃ niṃdāṃ kuryānna karhicit || 91 ||
[Analyze grammar]

na manuṣyastutiṃ kuryānnātmānamapamānayet |
abhyudyataṃ na praṇudetparamarmāṇi noccaret || 92 ||
[Analyze grammar]

adharmādedhate pūrvaṃ vidveṣṭṝnapi saṃjayet |
sarvatobhadramāpyāpi tato naśyecca sānvayaḥ || 93 ||
[Analyze grammar]

uddhṛtya paṃca mṛtpiṃḍānsnāyātparajalāśaye |
anuddhṛtya ca tatkarturenasaḥ syātturīyabhāk || 94 ||
[Analyze grammar]

śraddhayā pātramāsādya yatkiṃciddīyate vasu |
deśe kāle ca vidhinā tadānaṃtyāya kalpate || 95 ||
[Analyze grammar]

bhūprado maṃḍalādhīśaḥ sarvatrasukhinonnadāḥ |
toyadātā sadā tṛpto rūpavānrūpyado bhavet || 96 ||
[Analyze grammar]

pradīpado nirmalākṣo godātā'ryamalokabhāk |
svarṇadātā ca dīrghāyustiladaḥ syāttu suprajāḥ || 97 ||
[Analyze grammar]

veśmado 'tyuccasaudheśo vastradaścaṃdralo kabhāk |
hayaprado divyayāno lakṣmīvānvṛṣabhapradaḥ || 98 ||
[Analyze grammar]

subhāryaḥ śibikā dātā suparyaṃka pradopi ca |
dhānyaiḥ samṛddhimānnityamabhayaprada īśitā || 99 ||
[Analyze grammar]

brahmado brahmalokejyo brahmadaḥ sarvado mataḥ |
upāyenāpi yo brahma dāpayetsopi tatsamaḥ || 100 ||
[Analyze grammar]

śraddhayā pratigṛhṇāti śraddhayā yaḥ prayacchati |
svargiṇau tāvubhau syātāṃ patato'śraddhayātyadhaḥ || 1 ||
[Analyze grammar]

anṛtena kṣaredyajñastapo vismayataḥ kṣaret |
kṣaretkīrtanatodānamāyurviprāpavādataḥ || 2 ||
[Analyze grammar]

gaṃdhapuṣpakuśāñchayyāṃ śākaṃ māṃsaṃ payo dadhi |
maṇi matsya gṛhaṃ dhānyaṃ grāhyametadupasthitam || 3 ||
[Analyze grammar]

madhūdakaṃ phalaṃ mūlamedhāṃsyabhayadakṣiṇā |
abhyudyatāni grāhyāṇi tvetānyapinikṛṣṭataḥ || 4 ||
[Analyze grammar]

dāsa nāpita gopāla kulamitrārdhasīriṇaḥ |
bhojyānnāḥ śūdravargemī tathātmavinivedakaḥ || 5 ||
[Analyze grammar]

itthamānṛṇyamāsādya devarṣipitṛjādṛṇāt |
mādhyasthyamāśrayedgehe sute viṣvagvisṛjya ca || 6 ||
[Analyze grammar]

gehepi jñānamabhyasyetkāśīṃ vātha samāśrayet |
samyagjñānena vā muktiḥ kiṃvā viśveśaveśmani || 7 ||
[Analyze grammar]

samyagjñānaṃ bhavetpuṃsāṃ kuta ekena janmanā |
vārāṇasyāṃ dhruvā muktiḥ śarīratyāgamātrataḥ || 8 ||
[Analyze grammar]

adya śvo vā paraśvo vā kālādvātha paraḥśatāt |
satvaro gatvaro dehaḥ kāśyāṃ cedamṛtī bhavet || 9 ||
[Analyze grammar]

sā ca vārāṇasī labhyā sadācāravatā sadā |
manasāpi sadācāramato vidvānna laṃghayet || 110 ||
[Analyze grammar]

ākarṇyeti tatogastyaḥ punaḥ prāha ṣaḍānanam |
punaḥ kāśīṃ samācakṣva sadācāreṇa yāpyate || 11 ||
[Analyze grammar]

kāni kāni ca liṃgāni skaṃda jñānapradāni ca |
vārāṇasyāṃ paribrūhi tāni me paripṛcchataḥ || 12 ||
[Analyze grammar]

vinā kāśīṃ na me prītirvinākāśīṃ na me ratiḥ |
citraputrakavaccāsmi vinā kāśī ṣaḍānana || 13 ||
[Analyze grammar]

na nidrāmi na jāgarmi nāśnāmi na pibāmyapaḥ |
kāśīṃ dvyakṣarapīyūṣaṃ pibāmi hi ca kevalam || 14 ||
[Analyze grammar]

iti śrutvā vacaḥ skaṃdo maitrāvaruṇibhāṣitam |
avimuktasya māhātmyaṃ vaktuṃ samupacakrame || 115 ||
[Analyze grammar]

iti śrī skāṃde mahāpurāṇa ekāśītisāhasryāṃ saṃhitāyāṃ kāśīkhaṃḍe pūrvārddhe sadācāravarṇanaṃ nāmāṣṭatriṃśo'dhyāyaḥ || 38 ||
[Analyze grammar]