Chapter 37

[English text for this chapter is available]

skaṃda uvāca |
sadā gṛhī sukhaṃ bhuṃkte strī lakṣaṇavatī yadi |
ataḥ sukhasamṛddhyarthamādau lakṣaṇamīkṣayet || 1 ||
[Analyze grammar]

vapurāvartagaṃdhāścacchāyā satvaṃ svaro gatiḥ |
varṇaścetyaṣṭadhā proktā budhairlakṣaṇabhūmikā || 2 ||
[Analyze grammar]

āpādatalamārabhya yāvanmauliruhaṃ kramāt |
śubhāśubhāni vakṣyāmi lakṣaṇāni mune śṛṇu || 3 ||
[Analyze grammar]

ādau pādatalaṃ rekhāstatoṃguṣṭhāṃgulī nakhāḥ |
pṛṣṭhagulphadvayaṃ pārṣṇī jaṃghe romāṇi jānunī || 4 ||
[Analyze grammar]

ūrū kaṭī nitaṃbasphigbhago jaghana bastike |
nābhiḥ kukṣidvayaṃ pārśvodaramadhya valitrayam || 5 ||
[Analyze grammar]

romālī hṛdayaṃ vakṣo vakṣojadvayacūcukam |
jatruskaṃdhāṃ sakakṣādormaṇibaṃdha karadvayam || 6 ||
[Analyze grammar]

pāṇipṛṣṭhaṃ pāṇitalaṃ rekhāṃguṣṭhāṃgulī nakhāḥ |
pṛṣṭhiḥ kṛkāṭikā kaṃṭhe cibukaṃ ca hanudvayam || 7 ||
[Analyze grammar]

kapolau vaktramadharottaroṣṭhau dvijajihvikāḥ |
ghaṃṭikā tāluhasitaṃ nāsikākṣutamakṣiṇī || 8 ||
[Analyze grammar]

pakṣma bhrūkarṇabhālāni mauli sīmaṃtamaulijāḥ |
ṣaṣṭiḥ ṣaḍuttarāyoṣidaṃgalakṣaṇasatkhaniḥ || 9 ||
[Analyze grammar]

strīṇāṃ pādatalaṃ snigdhaṃ māṃsalaṃ mṛdulaṃ samam |
asvedamuṣṇamaruṇaṃ bahubhogocitaṃ smṛtam || 10 ||
[Analyze grammar]

rūkṣaṃ vivarṇaṃ paruṣaṃ khaṃḍitapratibiṃbakam |
śūrpākāraṃ viśuṣkaṃ ca duḥkhadaurbhāgyasūcakam || 11 ||
[Analyze grammar]

cakra svastika śaṃkhābja dhvajamīnātapatravat |
yasyāḥ pādatale rekhā sā bhavetkṣitipāṃganā || 12 ||
[Analyze grammar]

bhavedakhaṃḍabhogāyorddhvāmadhyāṃgulisaṃgatā |
rekhākhu sarpakākābhā duḥkhadāridryasūcikā || 13 ||
[Analyze grammar]

unnato māṃsaloṃguṣṭho vartulotulabhogadaḥ |
vakro hrasvaśca cipiṭaḥ sukhasaubhāgyabhaṃjakaḥ || 14 ||
[Analyze grammar]

vidhavā vipulena syāddīrghāṃguṣṭhena durbhagā |
mṛdavoṃgulayaḥ śastā ghanāvṛttāḥ samunnatāḥ || 15 ||
[Analyze grammar]

dīrghāṃgulībhiḥ kulaṭā kṛśābhiratinirdhanā |
hrasvāyuṣyā ca hrasvābhirbhugnābhirbhugnavartinī || 16 ||
[Analyze grammar]

cipiṭābhirbhaveddāsī viralābhirdaridriṇī |
parasparaṃ samārūḍhāḥ pādāṃgulyo bhavaṃti hi || 17 ||
[Analyze grammar]

hatvā bahūnapi patīnparapreṣyā tadā bhavet |
yasyāḥ pathi samāyāṃtyā rajobhūmeḥ samucchalet || 18 ||
[Analyze grammar]

sā pāṃsulā prajāyeta kulatrayavināśinī |
yasyāḥ kaniṣṭhikā bhūmiṃ na gacchaṃtyāḥ parispṛśet || 19 ||
[Analyze grammar]

sā nihatya patiṃ yoṣā dvitīyaṃ kurute patim |
anāmikā ca madhyā ca yasyā bhūmiṃ na saṃspṛśet || 20 ||
[Analyze grammar]

patidvayaṃ nihaṃtyādyā dvitīyā ca patitrayam |
patihīnatvakāriṇyau hīne te dve ime yadi || 21 ||
[Analyze grammar]

pradeśinī bhavedyasyā aṃguṣṭhāvyatirekiṇī |
kanyaiva kulaṭā sā syādeṣa eva viniścayaḥ || 22 ||
[Analyze grammar]

snigdhāḥ samunnatāstāmrā vṛttāḥ pādanakhāḥ śubhāḥ || 23 ||
[Analyze grammar]

rājñītvasūcakaṃ strīṇāṃ pādapṛṣṭhaṃ samunnatam |
asvedamaśirāḍhyaṃ ca masṛṇaṃ mṛdumāṃsalam || 24 ||
[Analyze grammar]

daridrā madhyanamreṇa śirālena sadādhvagā |
romāḍhyena bhaveddāsī nirmāṃsena ca durbhagā || 25 ||
[Analyze grammar]

gūḍhau gulphau śivāyoktāvaśirālau suvartulau |
sthapuṭau śithilau dṛśyau syātāṃ daurbhāgyasūcakau || 26 ||
[Analyze grammar]

samapārṣṇiḥ śubhā nārī pṛthupārṣṇiśca durbhagā |
kulaṭonnatapārṣṇi syāddīrghapārṣṇiśca duḥkhabhāk || 27 ||
[Analyze grammar]

romahīne same snigdhe yajjaṃghe kramavartule |
sā rājapatnī bhavati viśiresumanohare || 28 ||
[Analyze grammar]

ekaromā rājapatnī dviromā ca sukhāvahā |
triromā romakūpeṣu bhavedvaidhavyaduḥkhabhāk || 29 ||
[Analyze grammar]

vṛttaṃ piśitasaṃlagnaṃ jānuyugmaṃ praśasyate |
nirmāṃsaṃ svairacāriṇyā daridrā yāśca viślatham || 30 ||
[Analyze grammar]

viśiraiḥ karabhākārairūrubhirmasṛṇairghanaiḥ |
suvṛttairomarahitairbhaveyurbhūpavallabhāḥ || 31 ||
[Analyze grammar]

vaidhavyaṃ romaśairuktaṃ daurbhāgyaṃ cipiṭairapi |
madhyacchidrairmahāduḥkhaṃ dāridryaṃ kaṭhinatvacaiḥ || 32 ||
[Analyze grammar]

caturbhiraṃgulaiḥ śastā kaṭirviṃśatisaṃyutaiḥ |
samunnatanitaṃbāḍhyā caturasrā mṛgīdṛśām || 33 ||
[Analyze grammar]

vinatā cipiṭā dīrghā nirmāṃsāsaṃkaṭākaṭiḥ |
hrasvā romayutā nāryā duḥkhavaidhavyasūcikā || 34 ||
[Analyze grammar]

nitaṃbabiṃbo nārīṇāmunnato māṃsalaḥ pṛthuḥ |
mahābhogāya saṃproktastadanyo'śarmaṇe mataḥ || 35 ||
[Analyze grammar]

kapitthaphalavadvṛttau mṛdulau māṃsalau ghanau |
sphicau valivinirmuktau ratisaukhyavivardhanau || 36 ||
[Analyze grammar]

śubhaḥ kamaṭhapṛṣṭhābho gajaskaṃdhopamo bhagaḥ |
vāmonnatastu kanyājaḥ putrajo dakṣiṇonnataḥ || 37 ||
[Analyze grammar]

ākhuromā gūḍhamaṇiḥ suśliṣṭaḥ saṃhataḥ pṛthuḥ |
tuṃgaḥ kamalaparṇābhaḥ śubhośvatthadalākṛtiḥ || 38 ||
[Analyze grammar]

kuraṃgakhurarūpoyaścullikodarasannibhaḥ |
romaśo vivṛtāsyaśca dṛśyanāsotidurbhagaḥ || 39 ||
[Analyze grammar]

śaṃkhāvarto bhago yasyāḥ sā garbhamiha necchati |
cipiṭaḥ kharparākāraḥ kiṃkarī padado bhagaḥ || 40 ||
[Analyze grammar]

vaṃśavetasapatrābho gajaromoccanāsikaḥ |
vikaṭaḥ kuṭilākāro laṃbagallastathā'śubhaḥ || 41 ||
[Analyze grammar]

bhagasya bhālaṃ jaghanaṃ vistīrṇaṃ tuṃgamāṃsalam |
mṛdulaṃ mṛdulomāḍhyaṃ dakṣiṇāvartamīḍitam || 42 ||
[Analyze grammar]

vāmāvartaṃ ca nirmāṃsaṃ bhugnavaidhavyasūcakam |
saṃkaṭasthapuṭaṃ rūkṣaṃ jaghanaṃ duḥkhadaṃ sadā || 43 ||
[Analyze grammar]

bastiḥ praśastā vipulā mṛdvīstokasamunnatā |
romaśā ca śirālā ca rekhāṃkā naiva śobhanā || 44 ||
[Analyze grammar]

gaṃbhīrā dakṣiṇāvartā nābhī syātsukhasaṃpade |
vāmāvartā samuttānā vyaktagraṃthirna śobhanā || 45 ||
[Analyze grammar]

sūte sutānbahūnnārī pṛthukukṣiḥ sukhāspadam |
kṣitīśaṃ janayetputraṃ maṃḍūkābhena kukṣiṇā || 46 ||
[Analyze grammar]

unnatena valībhājā sāvartenāpi kukṣiṇā |
vaṃdhyā pravrajitā dāsī kramādyoṣā bhavediha || 47 ||
[Analyze grammar]

samaiḥ samāṃsairmṛdubhiryoṣinmagnāsthibhiḥ śubhaiḥ |
pārśveḥ saubhāgyasukhayornidhānaṃ syādasaṃśayam || 48 ||
[Analyze grammar]

yasyādṛśya śire pārśve unnate romasaṃyute |
nirapatyā ca duḥśīlā sā bhavedduḥkhaśevadhiḥ || 49 ||
[Analyze grammar]

udareṇātitucchena viśireṇa mṛdutvacā |
yoṣidbhavati bhogāḍhyā nityaṃ miṣṭānnasevinī || 50 ||
[Analyze grammar]

kuṃbhākāraṃ daridrāyā jaṭharaṃ ca mṛdaṃgavat |
kūṣmāṃḍābhaṃ yavābhaṃ ca duṣpūraṃ jāyate striyāḥ || 51 ||
[Analyze grammar]

suviśālodarī nārī nirapatyā ca durbhagā |
pralaṃbajaṭharā haṃti śvaśuraṃ cāpi devaram || 52 ||
[Analyze grammar]

madhyakṣāmā ca subhagā bhogāḍhyā savalitrayā |
ṛjvī tanvī ca romālī yasyāḥ sā śarmanarmabhūḥ || 53 ||
[Analyze grammar]

kapilā kuṭilā sthūlā vicchinnā romarājikā |
caura vaidhavya daurbhāgyaṃ vidadhyādiha yoṣitām || 54 ||
[Analyze grammar]

nirlomahṛdayaṃ yasyāḥ samaṃ nimnatva varjitam |
aiśvaryaṃ cāpyavaidhavyaṃ priyaprema ca sā labhet || 55 ||
[Analyze grammar]

vistīrṇahṛdayā yoṣā puṃścalī nirdayā tathā |
udbhinnaromahṛdayā patiṃ haṃti viniścitam || 56 ||
[Analyze grammar]

aṣṭādaśāṃgulatatamuraḥ pīvaramunnatam |
sukhāya duḥkhāya bhavedromaśaṃ viṣamaṃ pṛthu || 57 ||
[Analyze grammar]

ghanau vṛttau dṛḍhau pīnau samau śastau payodharau |
sthūlāgrau viralau śuṣkau vāmorūṇāṃ na śarmadau || 58 ||
[Analyze grammar]

dakṣiṇonnata vakṣojā putriṇī tvagraṇīrmatā |
vāmonnatakucā sūte kanyāṃ saubhāgyasuṃdarīm || 59 ||
[Analyze grammar]

araghaṭṭaghaṭītulyau kucau dauḥśīlyasūcakau |
pīvarāsyau sāṃtarālau pṛthūpāṃtau na śobhanau || 60 ||
[Analyze grammar]

mūle sthūlau kramakṛśāvagre tīkṣṇau payodharau |
sukhadau pūrvakāle tu paścādatyaṃta duḥkhadau || 61 ||
[Analyze grammar]

sudṛḍhaṃ cūcukayugaṃ śastaṃ śyāmaṃ suvartulam |
aṃtarmagnaṃ ca dīrghaṃ ca kṛśaṃ kleśāya jāyate || 62 ||
[Analyze grammar]

pīvarābhyāṃ ca jatrubhyāṃ dhanadhānyanidhirvadhūḥ |
ślathāsthibhyāṃ ca nimnābhyāṃ viṣamābhyāṃ daridriṇī || 63 ||
[Analyze grammar]

abaddhāvanatau skaṃdhāvadīrghāvakṛśau śubhau |
vakrau sthūlau ca romāḍhyau preṣya vaidhavyasūcakau || 64 ||
[Analyze grammar]

nigūḍhasaṃdhī srastāgrau śubhāvaṃsau susaṃhatau |
vaidhavyadau samuccāgrau nirmāṃsāvatiduḥkhadau || 65 ||
[Analyze grammar]

kakṣesu sūkṣmarome tu tuṃge snigdhe ca māṃsale |
śastena śaste gaṃbhīre śirāle svedamedure || 66 ||
[Analyze grammar]

syātāṃ doṣau sunirdoṣau gūḍhāsthi graṃthikomalau |
viśirau ca viromāṇau saralau hariṇīdṛśām || 67 ||
[Analyze grammar]

vaidhavyaṃ sthūlaromāṇau hrasvau daurbhāgyasūcakau |
parikleśāya nārīṇāṃ paridṛśyaśirau bhujau || 68 ||
[Analyze grammar]

aṃbhoja mukulākāramaṃguṣṭhāṃgulisaṃmukham |
hastadvayaṃ mṛgākṣīṇāṃ bahubhogāya jāyate || 69 ||
[Analyze grammar]

mṛdumadhyonnataṃ raktaṃ talaṃ pāṇyoraraṃdhrakam |
praśastaṃ śastarekhāḍhyamalparekhaṃ śubhaśriyam || 70 ||
[Analyze grammar]

vidhavā bahurekheṇa virekheṇa daridriṇī |
bhikṣukī suśirāḍhyena nārī karatalena vai || 71 ||
[Analyze grammar]

viroma viśiraṃ śastaṃ pāṇipṛṣṭhaṃsamunnatam |
vaidhavyaheturomāḍhyaṃ nirmāṃsaṃ snāyumattyajet || 72 ||
[Analyze grammar]

raktā vyaktā gabhīrā ca snigdhā pūrṇā ca vartulā |
kararekhāṃganā yāḥ syācchubhā bhāgyānusārataḥ || 73 ||
[Analyze grammar]

matsyena subhagā nārī svastikena vasupradā |
padmena bhūpateḥ patnī janayedbhūpatiṃ sutam || 74 ||
[Analyze grammar]

cakravartistriyāḥ pāṇau naṃdyāvartaḥ pradakṣiṇaḥ |
śaṃkhātapatraka maṭhā nṛpamātṛtvasūcakāḥ || 75 ||
[Analyze grammar]

tulāmānākṛtīrekhe vaṇikpatnītvahetuke |
gajavājivṛṣākārāḥ kare vāme mṛgīdṛśām || 76 ||
[Analyze grammar]

rekhā prāsādavajrābhā brūyustīrthakaraṃ sutam |
kṛṣīvalasya patnī syācchakaṭena yugena vā || 77 ||
[Analyze grammar]

cāmarāṃkuśakodaṃḍai rājapatnī bhaveddhruvam |
aṃguṣṭhamūlānnirgatya rekhā yāti kaniṣṭhikām || 78 ||
[Analyze grammar]

yadi sā patihaṃtrī syāddūratastāṃ tyajetsudhīḥ |
triśūlāsigadāśakti duṃdubhyākṛti rekhayā |
nitaṃbinī kīrtimatī tyāgena pṛthivītale || 79 ||
[Analyze grammar]

kaṃka jaṃbūka maṃḍūka vṛka vṛścika bhoginaḥ |
rāsabhoṣṭra biḍālāḥ syuḥ karasthā duḥkhadāḥ striyāḥ || 80 ||
[Analyze grammar]

śubhadaḥ saraloṃguṣṭho vṛtto vṛttanakho mṛduḥ || 81 ||
[Analyze grammar]

aṃgulyaśca suparvāṇo dīrghāvṛttāḥ kramātkṛśāḥ |
cipiṭāḥsthapuṭā rūkṣāḥ pṛṣṭharomayujo'śubhāḥ || 82 ||
[Analyze grammar]

atihrasvāḥ kṛśā vakrā viralā rogahetukāḥ |
duḥkhāyāṃgulayaḥ strīṇāṃ bahuparvasamanvitāḥ || 83 ||
[Analyze grammar]

aruṇāḥ saśikhāstuṃgāḥ karajāḥ sudṛśāṃśubhāḥ |
nimnā vivarṇāḥ śuktyābhāḥ pītā dāridryadāyakāḥ || 84 ||
[Analyze grammar]

nakheṣu biṃdavaḥ śvetāḥ prāyaḥ syuḥ svairiṇī striyāḥ |
puruṣā api jāyaṃte duḥkhinaḥ puṣpitairnakhaiḥ || 85 ||
[Analyze grammar]

aṃtarnimagnavaṃśāsthiḥ pṛṣṭhiḥ syānmāṃsalā śubhā |
pṛṣṭhena romayuktena vaidhavyaṃ labhate dhruvam || 86 ||
[Analyze grammar]

bhugnena vinatenāpi saśireṇāpi duḥkhitā |
ṛjvī kṛkāṭikā śreṣṭhā samāṃsā ca samunnatā || 87 ||
[Analyze grammar]

śuṣkā śirālā romāḍhyā viśālā kuṭilāśubhā |
māṃsalo vartulaḥ kaṃṭhaḥ praśastaścaturaṃgulaḥ || 88 ||
[Analyze grammar]

śastā grīvā trirekhāṃkā tvavyaktāsthiḥ susaṃhatā |
nirmāṃsā cipiṭā dīrghāsthapuṭā na śubhapradā || 89 ||
[Analyze grammar]

sthūlagrīvā ca vidhavā vakragrīvā ca kiṃkarī |
vaṃdhyā dvicipiṭagrīvā hrasvagrīvā ca niḥsutā || 90 ||
[Analyze grammar]

cibukaṃdvayaṃgulaṃ śastaṃ vṛttaṃ pīnaṃ sukomalam |
sthūlaṃ dvidhā saṃvibhaktamāyataṃ romaśaṃ tyajet || 91 ||
[Analyze grammar]

hanuścibukasaṃlagnā nirlomā sughanāśubhā |
vakrā sthūlā kṛśā hrasvā romaśā na śubhapradā || 92 ||
[Analyze grammar]

śastau kapolau vāmākṣyāḥ pīnau vṛttau samunnatau |
romaśau paruṣau nimnau nirmāṃsau parivarjayet || 93 ||
[Analyze grammar]

samaṃ samāṃsaṃ susnigdhaṃ svāmodaṃ vartulaṃ mukham |
janetṛvadanacchāyaṃ dhanyānāmiha jāyate || 94 ||
[Analyze grammar]

pāṭalo vartulaḥ snigdho lekhābhūṣitamadhyabhūḥ |
sīmaṃtinī nāmadharo dharājāni priyo bhavet || 95 ||
[Analyze grammar]

kṛśaḥ pralaṃbaḥ sphuṭito rūkṣo daurbhāgyasūcakaḥ |
śyāvaḥ sthūlo'dharoṣṭhaḥ syādvaidhavya kalahapradaḥ || 96 ||
[Analyze grammar]

masṛṇo mattakāśinyāścottaroṣṭhaḥ subhogadaḥ |
kiṃcinmadhyonnato'romā viparīto viruddhakṛt || 97 ||
[Analyze grammar]

gokṣīrasannibhāḥ snigdhā dvātriṃśaddaśanāḥ śubhāḥ |
adhastādupariṣṭācca samāḥ stokasamunnatāḥ || 98 ||
[Analyze grammar]

pītāḥ śyāvāśca daśanāḥ sthūlādīrghādvipaṃktayaḥ |
śuktyākārāśca viralā duḥkhadaurbhāgyakāraṇam || 99 ||
[Analyze grammar]

adhastādadhikairdaṃtairmātaraṃ bhakṣayetsphuṭam |
patihīnā ca vikaṭaiḥ kulaṭā viralairbhavet || 100 ||
[Analyze grammar]

jihveṣṭamiṣṭabhoktrī syācchoṇāmṛdvī tathāsitā |
duḥkhāya madhyasaṃkīrṇā purobhāgasavistarā || 1 ||
[Analyze grammar]

sitayā toyamaraṇaṃ śyāmayā kalahapriyā |
daridriṇī māṃsalayā laṃbayā'bhakṣyabhakṣiṇī || 2 ||
[Analyze grammar]

viśālayā rasanayā pramadātipramādabhāk |
snigdhaṃ kokanadābhāsaṃ praśastaṃ tālukomalam || 3 ||
[Analyze grammar]

site tāluni vaidhavyaṃ pīte pravrajitā bhavet |
kṛṣṇe'patyaviyogārtā rūkṣe bhūrikuṭuṃbinī || 4 ||
[Analyze grammar]

kaṃṭhe sthūlā suvṛttā ca kramatīkṣṇā sulohitā |
apralaṃbā śubhā ghaṃṭī sthūlā kṛṣṇā ca duḥkhadā || 5 ||
[Analyze grammar]

alakṣitadvijaṃ kiṃcitkiṃcitphulla kapolakam |
smitaṃ praśastaṃ sudṛśāmanimīlitalocanam || 6 ||
[Analyze grammar]

samavṛttapuṭānāsā laghucchidrā śubhāvahā |
sthūlāgrā madhyanamrā ca na praśastā samunnatā || 7 ||
[Analyze grammar]

ākuṃcitāruṇāgrā ca vaidhavyakleśadāyinī |
parapreṣyā ca cipiṭā hrasvā dīrghā kalipriyā || 8 ||
[Analyze grammar]

dīrghāyuḥ kṛtkṣutaṃ dīrghaṃ yugapaddvitripiṃḍitam |
lalanā locane śaste raktāṃte kṛṣṇatārake || 9 ||
[Analyze grammar]

gokṣīravarṇaviśade susnigdhe kṛṣṇapakṣmaṇī |
unnatākṣī na dīrghāyurvṛttākṣī kulaṭā bhavet || 110 ||
[Analyze grammar]

meṣākṣīmahiṣākṣī ca kekarākṣī na śobhanā |
kāmagṛhīlā nitarāṃ gopiṃgākṣī sudurvṛtā || 11 ||
[Analyze grammar]

pārāvatākṣī duḥśīlā raktākṣī bhartṛghātinī |
koṭarā nayanā duṣṭā gajanetrā na śobhanā || 12 ||
[Analyze grammar]

puṃścalī vāmakāṇākṣī vaṃdhyā dakṣiṇakāṇikā |
madhupiṃgākṣī ramaṇī dhanadhānyasamṛddhibhāk || 13 ||
[Analyze grammar]

pakṣmabhiḥ sughanaiḥ snigdhaiḥ kṛṣṇaiḥ sūkṣmaiḥ subhāgyabhāk |
kapilairviralaiḥ sthūlairniṃdyā bhavati bhāminī || 14 ||
[Analyze grammar]

bhruvau suvartule tanvyāḥ snigdhe kṛṣṇe asaṃhate |
praśaste mṛduromāṇau subhruvaḥ kārmukākṛtī || 15 ||
[Analyze grammar]

khararomā ca pṛthulā vikīrṇā saralā striyāḥ |
na bhrūḥ praśastā militā dīrgharomā ca piṃgalā || 16 ||
[Analyze grammar]

laṃbau karṇau śubhāvartau sukhadau ca śubhapradau |
śaṣkulīrahitau niṃdyau śirālau kuṭilau kṛśau || 17 ||
[Analyze grammar]

bhālaḥ śirāvirahito nirlomārdheṃdu sannibhaḥ |
animnastryaṃgulo nāryāḥ saubhāgyārogyakāraṇam || 18 ||
[Analyze grammar]

vyakta svastikarekhaṃ ca lalāṭaṃ rājyasaṃpade |
pralaṃbaṃ mastakaṃ yasyā devaraṃ hanti sā dhruvam || 19 ||
[Analyze grammar]

romaśena śirālena prāṃśunā rogiṇī matā || 120 ||
[Analyze grammar]

sīmantaḥ saralaḥ śasto mauliḥ śastaḥ samunnataḥ |
gajakuṃbhanibhāvṛttaiḥ saubhāgyaiśvaryasūcakaiḥ || 21 ||
[Analyze grammar]

sthūlamūrdhā ca vidhavā dīrghaśīrṣā ca baṃdhakī |
viśālenāpi śirasā bhaveddaurbhāgyabhājanam || 22 ||
[Analyze grammar]

keśā alikulacchāyāḥ sūkṣmāḥ snigdhāḥ sukomalāḥ |
kiṃcidākuṃcitāgrāśca kuṭilāścātiśobhanāḥ || 23 ||
[Analyze grammar]

paruṣāḥ sphuṭitāgrāśca viralāśca śiroruhāḥ |
piṃgalā laghavo rūkṣā duḥkhadāridryabaṃdhadāḥ || 24 ||
[Analyze grammar]

bhruvorantarlalāṭe vā maśako rājyasūcakaḥ |
vāme kapole maśakaḥ śoṇo miṣṭānnadaḥ striyāḥ || 25 ||
[Analyze grammar]

tilakaṃ lāṃchanaṃ vāpi hṛdi saubhāgyakāraṇam |
yasyā dakṣiṇavakṣoje śoṇe tilakalāṃchane || 26 ||
[Analyze grammar]

kanyā catuṣṭayaṃ sūte sūte sā ca sutatrayam |
tilakaṃ lāṃchanaṃ śoṇaṃ yasyā vāme kuce bhavet || 27 ||
[Analyze grammar]

ekaṃ putraṃ prasūyādau tataḥ sā vidhavā bhavet |
guhyasya dakṣiṇe bhāge tilakaṃ yadi yoṣitaḥ || 28 ||
[Analyze grammar]

tadā kṣitipateḥ patnī sūte vā kṣitipaṃ sutam |
nāsāgre maśakaḥ śoṇo mahiṣyā eva jāyate || 29 ||
[Analyze grammar]

kṛṣṇaḥ sa eva bhartṛghnyāḥ puṃścalyāśca prakīrtitaḥ |
nābheradhastāttilakaṃ maśako lāṃchanaṃ śubham || 130 ||
[Analyze grammar]

maśakastilakaṃ cihnaṃ gulphadeśe daridrakṛta |
kare karṇe kapole vā kaṇṭhe vāme bhavedyadi || 31 ||
[Analyze grammar]

eṣāṃ trayāṇāmekaṃ tu prāggarbhe putradaṃ bhavet |
bhālagena triśūlena nirmitena svayaṃbhuvā || 32 ||
[Analyze grammar]

nitaṃbinī sahasrāṇāṃ svāmitvaṃ yoṣidāpnuyāt |
suptā parasparaṃ yātu daṃtānkiṭikiṭāyate || 33 ||
[Analyze grammar]

sulakṣmāpi na sā śastā yā kiṃcitpralapettathā |
pāṇau pradakṣiṇāvarto dharmyo vāmo na śobhanaḥ || 34 ||
[Analyze grammar]

nābhau śrutāvurasi vā dakṣiṇāvarta īḍitaḥ |
sukhāya dakṣiṇāvartaḥ pṛṣṭhavaṃśasya dakṣiṇe || 35 ||
[Analyze grammar]

antaḥpṛṣṭhaṃ nābhisamo bahvāyuḥ putravardhanaḥ |
rājapatnyāḥ pradṛśyeta bhagamaulau pradakṣiṇaḥ || 36 ||
[Analyze grammar]

sacecchakaṭabhaṃgaḥsyādbahvapatyasukhapradaḥ |
kaṭigo guhyavedhena patyapatyanipātanaḥ || 37 ||
[Analyze grammar]

syātāmudaravedhena pṛṣṭhāvartau na śobhanau |
ekena haṃti bhartāraṃ bhavedanyena puṃ ścalī || 38 ||
[Analyze grammar]

kaṇṭhago dakṣiṇāvarto duḥkhavaidhavyahetukaḥ |
sīmantetha lalāṭe vā tyājyo dūrātprayatnataḥ || 39 ||
[Analyze grammar]

sā patiṃ haṃti varṣeṇa yasyā madhye kṛkāṭikam |
pradakṣiṇo vā vāmo vā romṇāmāvarttakaḥ striyāḥ || 140 ||
[Analyze grammar]

eko vā mūrdhani dvau vā vāme vāmagatī yadi |
ādaśāhaṃ patighnau tau tyājyau dūrātsubuddhinā || 41 ||
[Analyze grammar]

kaṭyāvartā ca kulaṭā nābhyāvartā pativratā |
pṛṣṭhāvartā ca bhartṛghnī kulaṭā vātha jāyate || 42 ||
[Analyze grammar]

skaṃda uvāca |
sulakṣaṇāpi duḥśīlā kulakṣaṇa śiromaṇiḥ |
alakṣaṇāpi sā sādhvī sarvalakṣaṇabhūstu sā || 43 ||
[Analyze grammar]

sulakṣaṇā sucāritrā svādhīnā patidevatā |
viśveśānugrahādeva gṛhe yoṣidavāpyate || 44 ||
[Analyze grammar]

alakṛtāḥ svavāsinyo yābhiḥ prāktanajanmani |
nānāvidhairalaṃkāraistāḥ surūpā bhavaṃti hi || 45 ||
[Analyze grammar]

sutīrtheṣu vapuryābhiḥ kṣayitaṃ vā vihāyitam |
tā lāvaṇyataraṃgiṇyo bhavaṃtīha sulakṣaṇāḥ || 46 ||
[Analyze grammar]

arcitā jagatāṃ mātā yābhirmṛḍavadhūriva |
tā bhavaṃti sucāritrā yoṣāḥ svādhīnabha rtṛkāḥ || 47 ||
[Analyze grammar]

svādhīna patikānāṃ ca suśīlānāṃ mṛgīdṛśām |
svargāpavargāvatraiva sulakṣaṇa phalaṃ hi tat || 48 ||
[Analyze grammar]

sulakṣaṇaiḥ sucaritairapi maṃdāyuṣaṃ patim |
dīrghāyuṣaṃ prakurvaṃti pramadāḥ pramadāspadam || 49 ||
[Analyze grammar]

ataḥ sulakṣaṇā yoṣā pariṇeyā vicakṣaṇaiḥ |
lakṣaṇāni parīkṣyādau hitvā durlakṣaṇānyapi || 150 ||
[Analyze grammar]

lakṣaṇāni mayoktāni sukhāya gṛhamedhinām |
vivāhānapi vakṣyāmi tannibodha ghaṭodbhava || 151 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍe pūrvārddhe strīlakṣaṇavarṇanaṃnāma saptatriṃśo'dhyāyaḥ || 37 ||
[Analyze grammar]