Chapter 27

[English text for this chapter is available]

skaṃda uvāca |
vārāṇasīti prathitaṃ yathā cānaṃdakānanam |
tathā ca kathayāmīha devadevenabhāṣitam || 1 ||
[Analyze grammar]

īśvara uvāca |
niśāmaya mahābāho viṣṇo trailokyasuṃdara |
prāptaṃ vārāṇasītyākhyāmavimuktaṃ yathā tathā || 2 ||
[Analyze grammar]

nirdagdhānsāgarāñchrutvā kapilakrodhavahninā |
aśvamedhāśvasaṃyuktānpūrvajānsvānbhagīrathaḥ || 3 ||
[Analyze grammar]

sūryavaṃśe mahātejā rājā paramadhārmikaḥ |
ārirādhayiṣurgaṃgāṃ tapase kṛtaniścayaḥ || 4 ||
[Analyze grammar]

himavaṃtaṃ nagaśreṣṭhamamātya nyastarājyadhūḥ |
jagāma yaśasāṃ rāśiruddidhīrṣuḥ pitāmahān || 5 ||
[Analyze grammar]

brahmaśāpāgninirdagdhānmahādurgatigānapi |
vinā trimārgagāṃ viṣṇo ko jaṃtūṃstridivaṃ nayet || 6 ||
[Analyze grammar]

mamaiva sā parāmūrtistoyarūpā śivātmikā |
brahmāṃḍānāmanekānāmādhāraḥ prakṛtiḥ parā || 7 ||
[Analyze grammar]

śuddhavidyāsvarūpā ca triśaktiḥ karuṇātmikā |
ānaṃdāmṛtarūpā ca śuddhadharmasvarūpiṇī || 8 ||
[Analyze grammar]

yāmetāṃ jagatāṃ dhātrīṃ dhārayāmi svalīlayā |
viśvasya rakṣaṇārthāya parabrahmasvarūpiṇīm || 9 ||
[Analyze grammar]

trailokye yāni tīrthāni puṇyakṣetrāṇi yāni ca |
sarvatra sarve ye dharmāḥ sarvayajñāḥ sadakṣiṇāḥ || 10 ||
[Analyze grammar]

tapāṃsi viṣṇo sarvāṇi śrutiḥ sāṃgā caturvidhā |
ahaṃ ca tvaṃ ca kaścāpi devatānāṃ gaṇāśca ye || 11 ||
[Analyze grammar]

puruṣārthāśca sarve vai śaktayo vividhāśca yāḥ |
gaṃgāyāṃ sarva evaite sūkṣmarūpeṇa saṃsthitāḥ || 12 ||
[Analyze grammar]

sa snātaḥ sarvatīrtheṣu sarvakratuṣu dīkṣitaḥ |
cīrṇasarvavrataḥ sopi yastu gaṃgāṃ niṣevate || 13 ||
[Analyze grammar]

tapāṃsi tena taptāni sarvadānapradaḥ sa ca |
sa prāpta yoganiyamo yastu gaṃgāṃ niṣevate || 14 ||
[Analyze grammar]

sarvavarṇāśramebhyaśca vedavidbhyaśca vai tathā |
śāstrārthapāragebhyaśca gaṃgāsnāyī viśiṣyate || 15 ||
[Analyze grammar]

manovākkāyajairdoṣairduṣṭo bahuvidhairapi |
vīkṣya gaṃgāṃ bhavetpūtaḥ puruṣo nātra saṃśayaḥ || 16 ||
[Analyze grammar]

kṛte sarvatra tīrthāni tretāyāṃ puṣkaraṃ param |
dvāpare tu kurukṣetraṃ kalau gaṃgaiva kevalam || 17 ||
[Analyze grammar]

pūrvajanmāṃtarābhyāsa vāsanāvaśato hare |
gaṃgātīre nivāsaḥ syānmadanugrahataḥ parāt || 18 ||
[Analyze grammar]

dhyānaṃ kṛte mokṣahetustretāyāṃ tacca vai tapaḥ |
dvāpare taddvayaṃ yajñāḥ kalau gaṃgaiva kevalam || 19 ||
[Analyze grammar]

yo dehapatanādyāvadgaṃgātīraṃ na muṃcati |
sa hi vedāṃtavidyogī brahmacaryavratī sadā || 20 ||
[Analyze grammar]

kalau kaluṣacittānāṃ paradravyaratātmanām |
vidhihīnakriyāṇāṃ ca gatirgaṃgā vinā nahi || 21 ||
[Analyze grammar]

alakṣmīḥ kālakarṇī ca duḥsvapno durviciṃtitam |
gaṃgāgaṃgeti japanāttāni nopaviśaṃti hi || 22 ||
[Analyze grammar]

gaṃgā hi sarvabhūtānāmihāmutra phalapradā |
bhāvānurūpato viṣṇo sadā sarvajagaddhitā || 23 ||
[Analyze grammar]

yajña dāna tapo yoga japāḥ saniyamā yamāḥ |
gaṃgāsevāsahasrāṃśaṃ na labhaṃte kalau hare || 24 ||
[Analyze grammar]

kimaṣṭāṃgena yogena kiṃ tapobhiḥ kimadhvaraiḥ |
vāsa eva hi gaṃgāyāṃ brahmajñānasya kāraṇam || 25 ||
[Analyze grammar]

api dūrasthitasyāpi gaṃgāmāhātmyavedinaḥ |
ayogyasyāpi goviṃdabhaktyā gaṃgā prasīdati || 26 ||
[Analyze grammar]

śraddhā dharmaḥ paraḥ sūkṣmaḥ śraddhā jñānaṃ paraṃ tapaḥ |
śraddhā svargaśca mokṣaśca śraddhayā sā prasīdati || 27 ||
[Analyze grammar]

ajñānarāgalobhādyaiḥ puṃsāṃ saṃmūḍhacetasām |
śraddhā na jāyate dharme gaṃgāyāṃ ca viśeṣataḥ || 28 ||
[Analyze grammar]

bahiḥ sthitaṃ jalaṃyadvannārikelāṃtare sthitam |
tathā brahmāṃḍabāhyasthaṃ parabrahmāṃbu jāhnavī || 29 ||
[Analyze grammar]

gaṃgālābhātparo lābhaḥ kvacidanyo na vidyate |
tasmādgaṃgāmupāsīta gaṃgaiva paramaḥ pumān || 30 ||
[Analyze grammar]

śaktasya paṃḍitasyāpi guṇino dānaśīlinaḥ |
gaṃgāsnānavihīnasya hare janma nirarthakam || 31 ||
[Analyze grammar]

vṛthā kula vṛthā vidyā vṛthā yajñā vṛthātapaḥ |
vṛthā dānāni tasyeha kalau gaṃgāṃ na yo bhajet || 32 ||
[Analyze grammar]

guṇavatpātrapūjāyāṃ na syādvai tādṛśaṃ phalam |
yathā gaṃgājalasnāna pūjane vidhinā phalam || 33 ||
[Analyze grammar]

mamatejognigarbheyaṃ mamavīryātisaṃvṛtā |
dāhikā sarvadoṣāṇāṃ sarvapāpavināśinī || 34 ||
[Analyze grammar]

smaraṇādeva gaṃgāyāḥ pāpasaṃghātapaṃjaram |
śatadhā bhedamāyāti girirvajrahato yathā || 35 ||
[Analyze grammar]

gaṃgāṃ gacchati yastveko yastu bhaktyānumodayet |
tayostulyaphalaṃ prāhurbhaktirevātra kāraṇam || 36 ||
[Analyze grammar]

gacchaṃstiṣṭhañjapandhyānbhuṃjañjāgratsvapanvadan |
yaḥ smaretsatataṃ gaṃgāṃ sa hi mucyeta baṃdhanāt || 37 ||
[Analyze grammar]

pitṝnuddiśya yobhaktyā pāyasaṃ madhusaṃyutam |
guḍasarpistilaiḥsārdhaṃ gaṃgāṃbhasi vinikṣipet || 38 ||
[Analyze grammar]

tṛptā bhavaṃti pitarastasya varṣaśataṃ hare |
yacchaṃti vividhānkāmānparituṣṭāḥ pitāmahāḥ || 39 ||
[Analyze grammar]

liṃge saṃpūjite sarvamarcitaṃ syājjagadyathā |
gaṃgāsnānena labhate sarvatīrthaphalaṃ tathā || 40 ||
[Analyze grammar]

gaṃgāyāṃ tu naraḥ snātvā yo liṃgaṃ nityamarcati |
ekena janmanā muktiṃ parāṃ prāpnoti sa dhruvam || 41 ||
[Analyze grammar]

agnihotraṃ ca yajñāśca vratadānatapāṃsi ca |
gaṃgāyāṃ liṃgapūjāyāḥ koṭyaṃśenāpi no samāḥ || 42 ||
[Analyze grammar]

gaṃgāṃ gaṃtuṃ viniścitya kṛtvā śrāddhādikaṃ gṛhe |
sthitasya samyaksaṃkalpāttasya naṃdaṃti pūrvajāḥ || 43 ||
[Analyze grammar]

pāpāni ca rudaṃtyāśu hā kva yāsyāma ityalam |
lobhamohādibhiḥ sārdhaṃ maṃtrayaṃti punaḥpunaḥ || 44 ||
[Analyze grammar]

yathā na gaṃgāṃ yātyeṣa tathā vighnaṃ prakurmahe |
gaṃgāṃ gato yathā caiṣa na ucchittiṃ vidhāsyati || 45 ||
[Analyze grammar]

gṛhādgaṃgāvagāhārthaṃ gacchatastu padepade |
nirāśāni vrajaṃtyeva pāpānyasya śarīrataḥ || 46 ||
[Analyze grammar]

pūrvajanmakṛtaiḥ puṇyaistyaktvā lobhādikaṃ hare |
vyudasya sarvavighnaughāngaṃgāṃ prāpnoti puṇyavān || 47 ||
[Analyze grammar]

anuṣaṃgeṇa maulyena vāṇijyenāpi sevayā |
kāmāsaktopi vā martyo gaṃgāsnāto divaṃ vrajet || 48 ||
[Analyze grammar]

anicchayāpi saṃspṛṣṭo dahano hi yathā dahet |
anicchayāpi saṃsnātā gaṃgā pāpaṃ tathā dahet || 49 ||
[Analyze grammar]

tāvaddhamati saṃsāre yāvadgaṃgāṃ na sevate |
saṃsevya gaṃgāṃ no jaṃturbhavakleśaṃ prapaśyati || 50 ||
[Analyze grammar]

yo gaṃgāṃbhasi nisnāto bhaktyā saṃtyaktasaṃśayaḥ |
manuṣyacarmaṇā naddhaḥ sa devo nātra saṃśayaḥ || 51 ||
[Analyze grammar]

gaṃgāsnānārthamudyukto madhyemārgaṃ mṛto yadi |
gaṃgāsnānaphalaṃ sopi tadāpnoti na saṃśayaḥ || 52 ||
[Analyze grammar]

māhātmyaṃ ye ca gaṃgāyāḥ śṛṇvaṃti ca paṭhaṃti ca |
tepyaśeṣairmahāpāpairmucyaṃte nātra saṃśayaḥ || 53 ||
[Analyze grammar]

durbuddhayo durācārā haitukā bahusaṃśayāḥ |
paśyaṃti mohitā viṣṇo gaṃgāmanya nadīmiva || 54 ||
[Analyze grammar]

janmāṃtarakṛtairdānaistapobhirniyamairvrataiḥ |
iha janmani gaṃgāyāṃ nṛṇāṃ bhaktiḥ prajāyate || 55 ||
[Analyze grammar]

gaṃgābhaktimatāmarthe maheṃdrādi pureṣu ca |
harmyāṇi ramyabhogāni nirmitāni svayaṃbhuvā || 56 ||
[Analyze grammar]

siddhayaḥ siddhiliṃgāni sparśaliṃgānyanekaśaḥ |
prāsādā ratnaracitāściṃtāmaṇigaṇā api || 57 ||
[Analyze grammar]

gaṃgājalāṃtastiṣṭhaṃti kalikalmaṣabhītitaḥ |
ataeva hi saṃsevyā kalau gaṃgeṣṭasiddhidā || 58 ||
[Analyze grammar]

sūryodaye tamāṃsīva vajrapātabhayānnagāḥ |
tārkṣyekṣaṇādyathāsarpā meghā vātāhatā iva || 59 ||
[Analyze grammar]

tattvajñānādyathā mohaḥ siṃhaṃ dṛṣṭvā yathā mṛgāḥ |
tathā sarvāṇi pāpāni yāṃti gaṃgekṣaṇātkṣayam || 60 ||
[Analyze grammar]

divyauṣadhairyathā rogā lobhena ca yathā guṇāḥ |
yathā grīṣmoṣmasaṃpattiragādhahrada majjanāt || 61 ||
[Analyze grammar]

tūlaśailaḥ sphuliṃgena yathā naśyati tatkṣaṇāt |
tathā doṣāḥ praṇaśyaṃti gaṃgāṃbhaḥ sparśanāddhruvam || 62 ||
[Analyze grammar]

krodhena ca tapo yadvatkāmena ca yathā matiḥ |
anayena yathā lakṣmīrvidyā mānena vai yathā || 63 ||
[Analyze grammar]

daṃbha kauṭilya māyābhiryathādharmo vinaśyati |
tathā naśyaṃti pāpāni gaṃgāyā darśanena tu || 64 ||
[Analyze grammar]

mānuṣyaṃ durlabhaṃ prāpya vidyutsaṃpātacaṃcalam |
gaṃgāṃ yaḥ sevate sotra buddheḥ pāraṃ paraṃ gataḥ || 65 ||
[Analyze grammar]

vidhūtapāpā ye martyāḥ paraṃ jyotiḥsvarūpiṇīm |
sahasrasūryapratimāṃ gaṃgāṃ paśyaṃti te bhuvi || 66 ||
[Analyze grammar]

sādhāraṇāṃbhasā pūrṇāṃ sādhāraṇa nadīmiva |
paśyaṃti nāstikā gaṃgāṃ pāpopahatalocanāḥ || 67 ||
[Analyze grammar]

saṃsāramocakaścāhaṃ janānāmanukaṃpayā |
gaṃgātaraṃgarūpeṇa sopānaṃ nirmame divaḥ || 68 ||
[Analyze grammar]

sarva eva śubhaḥ kālaḥ sarvo deśastathā śubhaḥ |
sarvo jano dānapātraṃ śrīmatī jāhnavī taṭe || 69 ||
[Analyze grammar]

yathāśvamedho yajñānāṃ nagānāṃ himavānyathā |
vratānāṃ ca yathā satyaṃ dānānāmabhayaṃ yathā || 70 ||
[Analyze grammar]

prāṇāyāmaśca tapasāṃ maṃtrāṇāṃ praṇavo yathā |
dharmāṇāmapyahiṃsā ca kāmyānāṃ śrīryathā varā || 71 ||
[Analyze grammar]

yathātmavidyā vidyānāṃ strīṇāṃ gaurī yathottamā |
sarvardavegaṇānāṃ ca yathā tvaṃ puruṣottama || 72 ||
[Analyze grammar]

sarvaṣāmeva pātrāṇāṃ śivabhakto yathā varaḥ |
tathā sarveṣu tīrtheṣu gaṃgātīrthaṃ viśiṣyate || 73 ||
[Analyze grammar]

hareyaścāvayorbhedaṃ na karoti mahāmatiḥ |
śivabhaktaḥ sa vijñeyo mahāpāśupataśca saḥ || 74 ||
[Analyze grammar]

pāpapāṃsumahāvātyā pāpadrumakuṭhārikā |
pāpeṃdhanadavāgniśca gaṃgeyaṃ puṇyavāhinī || 75 ||
[Analyze grammar]

nānārūpāśca pitaro gāthā gāyaṃti sarvadā |
api kaścitkulesmākaṃ gaṃgāsnāyī bhaviṣyati || 76 ||
[Analyze grammar]

devarṣīnparisaṃtarpya dīnānāthāṃśca duḥkhitān |
śraddhayā vidhinā snātvā dāsyate salilāṃjalim || 77 ||
[Analyze grammar]

api naḥ sa kule bhūyācchive viṣṇau ca sāmyadṛk |
tadālayakaro bhaktyā tasya saṃmārjanādikṛt || 78 ||
[Analyze grammar]

akāmo vā sakāmo vā tiryagyonigatopi vā |
gaṃgāyāṃ yo mṛto martyo narakaṃ sa na paśyati || 79 ||
[Analyze grammar]

tīrthamanyatpraśaṃsaṃti gaṃgātīre sthitāśca ye |
gaṃgāṃ na bahu manyaṃte te syurnirayagāminaḥ || 80 ||
[Analyze grammar]

māṃ ca tvāṃ caiva yo dveṣṭi gaṃgāṃ ca puruṣādhamaḥ |
svakīyaiḥ puruṣaiḥ sārdhaṃ sa ghoraṃ narakaṃ vrajet || 81 ||
[Analyze grammar]

ṣaṣṭirgaṇasahasrāṇi gaṃgāṃ rakṣaṃti sarvadā |
abhaktānāṃ ca pāpānāṃ vāse vighnaṃ prakurvate || 82 ||
[Analyze grammar]

kāmakrodhamahāmohalobhādi niśitaiḥ śaraiḥ |
ghnaṃti teṣāṃ manastatra sthitiṃ cāpanayaṃti ca || 83 ||
[Analyze grammar]

gaṃgāṃ samāśrayedyastu sa muniḥ sa ca paṃḍitaḥ |
kṛtakṛtyaḥ sa vijñeyaḥ puruṣārthacatuṣṭaye || 84 ||
[Analyze grammar]

gaṃgāyāṃ ca sakṛtsnāto hayamedhaphalaṃ labhet |
tarpayaṃśca pitṝṃstatra tārayennarakārṇavāt || 85 ||
[Analyze grammar]

nairaṃtaryeṇa gaṃgāyāṃ māsaṃ yaḥ snāti puṇyavān |
śakraloke sa vasati yāvacchakraḥ sapūrvajaḥ || 86 ||
[Analyze grammar]

abdaṃ yaḥ snāti gaṃgāyāṃ nairaṃtaryeṇa puṇyabhāk |
viṣṇorlokaṃ samāsādya sa sukhaṃ saṃvasennaraḥ || 87 ||
[Analyze grammar]

gaṃgāyāṃ snāti yo martyo yāvajjīvaṃ dinedine |
jīvanmuktaḥ sa vijñeyo dehāṃte mukta eva saḥ || 88 ||
[Analyze grammar]

tithinakṣatraparvādi nāpekṣyaṃ jāhnavī jale |
snānamātreṇa gaṃgāyāṃ saṃcitāghaṃ vinaśyati || 89 ||
[Analyze grammar]

paṃḍitopi sa mūrkhaḥ syācchaktiyuktopyaśaktikaḥ |
yastu bhāgīrathītīraṃ sukhasevyaṃ na saṃśrayet || 90 ||
[Analyze grammar]

kiṃvāyupāpyarogeṇa vikāsinyātha kiṃ śriyā |
kiṃ vā buddhyā vimalayā yadi gaṃgāṃ na sevate || 91 ||
[Analyze grammar]

yaḥ kārayedāyatanaṃ gaṃgāpratikṛternaraḥ |
bhuktvā sa bhogānpretyāpi yāti gaṃgā salokatām || 92 ||
[Analyze grammar]

śṛṇvaṃti mahimānaṃ ye gaṃgāyā nityamādarāt |
gaṃgāsnānaphalaṃ teṣāṃ vācakaprīṇanāddhanaiḥ || 93 ||
[Analyze grammar]

pitṝnuddiśya yo liṃgaṃ snapayedgāṃga vāriṇā |
tṛptāḥ syustasya pitaro mahānirayagā api || 94 ||
[Analyze grammar]

aṣṭakṛtvo maṃtrajaptairvastrapūtaiḥ sugaṃdhibhiḥ |
procurgāṃgajalaiḥ snānaṃ ghṛtasnānādhikaṃ budhāḥ || 95 ||
[Analyze grammar]

aṣṭadravyavimiśreṇa gaṃgātoyena yaḥ sakṛt |
māgadhaprasthamātreṇa tāmrapātrasthitena ca || 96 ||
[Analyze grammar]

bhānave'rghaṃ pradadyācca svakīya pitṛbhiḥ saha |
sotitejo vimānena sūryaloke mahīyate || 97 ||
[Analyze grammar]

āpaḥ kṣīraṃ kuśāgrāṇi ghṛtaṃ madhugavāṃdadhi |
raktāni karavīrāṇi raktacaṃdanamityapi || 98 ||
[Analyze grammar]

aṣṭāṃgārgho yamuddiṣṭastvatīva ravitoṣaṇaḥ |
gāṃgairvārbhiḥ koṭiguṇo jñeyo viṣṇo'nyavāritaḥ || 99 ||
[Analyze grammar]

gaṃgātīre svaśaktyā yaḥ kuryāddevālayaṃ sudhīḥ |
anyatīrthapratiṣṭhāto bhavetkoṭiguṇaṃ phalaṃ || 100 ||
[Analyze grammar]

aśvatthavaṭacūtādi vṛkṣāropeṇa yatphalam |
kūpavāpītaḍāgādi prapā satrādibhistathā || 1 ||
[Analyze grammar]

anyatra yadbhavetpuṇyaṃ tadgaṃgādarśanādbhavet |
puṣpavāṭyādibhiścāpi gaṃgāsparśaṃ tato'dhikam || 2 ||
[Analyze grammar]

kanyādānena yatpuṇyaṃ yatpuṇyaṃ go'nnadānataḥ |
tatpuṇyaṃ syācchataguṇaṃ gaṃgāgaṃḍūṣapānataḥ || 3 ||
[Analyze grammar]

cāṃdrāyaṇasahasreṇa yatpuṇyaṃ syājjanārdana |
tato'dhikaphalaṃ gaṃgā'mṛtapānādavāpnuyāt || 4 ||
[Analyze grammar]

bhaktyā gaṃgāvagāhasya kimanyatphalamucyate |
akṣayaḥ svargavāsopi nirvāṇamathavā hare || 5 ||
[Analyze grammar]

gaṃgāyāḥ pādukāyugmaṃ nityamarcati yo naraḥ |
āyuḥ puṇyaṃ dhanaṃ putrānsvargamokṣau ca viṃdati || 6 ||
[Analyze grammar]

nāsti gaṃgāsamaṃ tīrthaṃ kalikalmaṣanāśanam |
nāsti muktipradaṃ kṣetramavimuktasamaṃ hare || 7 ||
[Analyze grammar]

gaṃgāsnānarataṃ martyaṃ dṛṣṭvaiva yamakikarāḥ |
diśo daśa palāyaṃte siṃhaṃ dṛṣṭvā yathā mṛgāḥ || 8 ||
[Analyze grammar]

gaṃgābhajanaśīlasya gaṃgātaṭanivāsinaḥ |
arcāṃ kṛtvā yathānyāyamaśvamedhaphalaṃ labhet || 9 ||
[Analyze grammar]

gobhūhiraṇyadānena bhaktyā gaṃgātaṭe śubhe |
naro na jāyate bhūyaḥ saṃsāre duḥkhakaṃṭake || 110 ||
[Analyze grammar]

dīrghāyuṣyaṃ ca vāsobhirjñānaṃ pustakadānataḥ |
annadānena saṃpattiṃ kīrtiṃ kanyāpradānataḥ || 11 ||
[Analyze grammar]

anyatra yatkṛtaṃ karma vrataṃ dānaṃ japastapaḥ |
gaṃgātaṭe tu tatsarvaṃ hare koṭiguṇaṃ bhavet || 12 ||
[Analyze grammar]

dhenuṃ savatsā yo dadyād gaṃgātīre vidhānataḥ |
goromasaṃkhyayā viṣṇo yugānsarvasamṛddhimān || 13 ||
[Analyze grammar]

goloke mama loke vā kāmadhenupradānataḥ |
bhuṃjānaḥ sarvakāmāṃstu divyānnānāvidhānbahūn || 14 ||
[Analyze grammar]

devānāmapyalabhyāṃśca bhuktvā tu saha bāṃdhavaiḥ |
pitṛbhiśca suhṛdbhiśca sarvaratnavibhūṣitaḥ || 15 ||
[Analyze grammar]

jāyate satkule paścāddhanadhānyasamākule |
ratnakāṃcanasaṃpanne śīlavidyāsamanvite || 16 ||
[Analyze grammar]

bhuktvā sa vipulānbhogānputrapautrasamanvitaḥ |
punargaṃgāṃ samāsādya kāśyāmuttaravāhinīm || 17 ||
[Analyze grammar]

viśveśvaraṃ samārādhya prāgjanurvāsanāvaśāt |
kālāddehāṃtamāsādya brahma saṃpadyate tataḥ || 18 ||
[Analyze grammar]

vivartanadvayamapi bhūmerbhāgīrathītaṭe |
naro dadāti yo bhaktyā tasya puṇyaphalaṃ śṛṇu || 19 ||
[Analyze grammar]

tadbhūmitrasareṇūnāṃ saṃkhyayā yugamānayā |
maheṃdra caṃdralokeṣu bhuktvā bhogānmanaḥpriyān || 120 ||
[Analyze grammar]

saptadvīpapatirbhūtvā mahādharmaparāyaṇaḥ |
narakasthānpitṝnsarvānprāpayettridivaṃ hare || 21 ||
[Analyze grammar]

svargasthāṃśca pitṝnsarvānmocayitvā mahādyutiḥ |
aṃte jñānāsinā chittvā hyavidyāṃ pāṃcabhautikīm || 22 ||
[Analyze grammar]

paravaiṃrāgyamāpanno yuṃjāno yogamuttamam |
prāpyāthavā vimuktaṃ ca paraṃ brahmādhigacchati || 23 ||
[Analyze grammar]

suvarṇamātramapi yaḥ suvarṇaṃ saṃprayacchati |
suvarṇāya suvarṇaṃ ca hare bhāgīrathītaṭe || 24 ||
[Analyze grammar]

sa hemaratnakhacite vimāne sarvage śubhe |
sarvaiśvaryasamāyuktaḥ sarvalokeṣu pūjitaḥ || 25 ||
[Analyze grammar]

brahmāṃḍāṃtarasaṃstheṣu bhuṃjanbhogānmanoramān |
sarvaiḥ saṃpūjito viṣṇo yāvadābhūtasaṃplavam || 205 ||
[Analyze grammar]

ekarāṭca tato bhūtvā jaṃbūdvīpe pratāpavān |
tato'vimuktamāsādya padaṃ nirvāṇamṛcchati || 27 ||
[Analyze grammar]

janmarkṣe tu kṛte snāne gaṃgāyāṃ bhaktipūrvakam |
janmaprabhṛtipāpaughātsaṃcitānmucyate kṣaṇāt || 28 ||
[Analyze grammar]

vaiśākhe kārtike māghe gaṃgāsnānaṃ sudurlabham |
darśe śataguṇaṃ puṇyaṃ saṃkrātau ca sahasrakam || 29 ||
[Analyze grammar]

caṃdrasūryagrahe lakṣaṃ vyatīpātetvanaṃtakam |
ayutaṃ viṣuve caiva niyutaṃ tvayanadvaye || 130 ||
[Analyze grammar]

somagrahaḥ somadine ravivāraravagrahaḥ |
taccūḍāmaṇiparvākhyaṃ tatrasnānamasaṃkhyakam || 31 ||
[Analyze grammar]

snānaṃ dānaṃ japo homo yadyaccūḍāmaṇau kṛtam |
tadakṣayaṃ sarvamiha viṣṇo bhāgīrathītaṭe || 32 ||
[Analyze grammar]

śraddhayā bhaktiyuktastu gaṃgāṃ snātvā vidhānataḥ |
brahmahāpi viśuddhyeta kiṃpunastvanya pātakī || 33 ||
[Analyze grammar]

kṛmikīṭapataṃgādyā ye mṛtā jāhnavītaṭe |
kūlātpataṃti ye vṛkṣāstepi yāṃti parāṃ gatim || 34 ||
[Analyze grammar]

jyeṣṭhe māsi site pakṣe daśamyāṃ hastasaṃyute |
gaṃgātīre tu puruṣo nārī vā bhaktibhāvataḥ || 35 ||
[Analyze grammar]

niśāyāṃ jāgaraṃ kuyādgaṃgāṃ daśavidhairhare |
puṣpaiḥ sugaṃdhairnaivedyaiḥ phalairdaśadaśonmitaiḥ || 36 ||
[Analyze grammar]

pradīpairdaśabhirdhūpairdaśāṃgairgaruḍadhvaja |
pūjayecchraddhayā dhīmāndaśakṛtvo vidhānataḥ || 37 ||
[Analyze grammar]

sājyāṃstilānkṣipettoye gaṃgāyāḥ prasṛtīrdaśa |
guḍasaktumayānpiṃḍāndadyācca daśamaṃtrataḥ || 38 ||
[Analyze grammar]

namaḥ śivāyai prathamaṃ nārāyaṇyai padaṃ tataḥ |
daśaharāyai padamiti gaṃgāyai maṃtra eṣa vai || 39 ||
[Analyze grammar]

svāhāṃtaḥ praṇāvādiśca bhavedviṃśākṣaro manuḥ |
pūjādānaṃ japo homo 'nenaiva manunā smṛtaḥ || 140 ||
[Analyze grammar]

hemnā rūpyeṇa vā śaktyā gaṃgāmūrtiṃ vidhāya ca |
vastrācchāditavaktrasya pūrṇakuṃbhasya copari || 41 ||
[Analyze grammar]

pratiṣṭhāpyārcayeddevīṃ paṃcāmṛtaviśodhitām |
caturbhujāṃ trinetrāṃ ca nadīnadaniṣevitām || 42 ||
[Analyze grammar]

lāvaṇyāmṛtaniṣpaṃda saṃśīladgātrayaṣṭikām |
pūrṇakuṃbhasitāṃbhoja varadābhayasatkarām || 43 ||
[Analyze grammar]

tato dhyāyetsusaumyā ca caṃdrāyutasamaprabhām |
cāmarairvījyamānāṃ ca śvetacchatropaśobhitāma || 44 ||
[Analyze grammar]

sudhāplāvitabhūpṛṣṭhāṃ divyagaṃdhānulepanām |
trailaukyapūjitapadāṃ devarṣibhirabhiṣṭutām || 45 ||
[Analyze grammar]

dhyātvā samarcya maṃtreṇa dhūpadīpopahārataḥ |
māṃ ca tvāṃ ca vidhiṃ bradhnaṃ himavaṃtaṃ bhagīratham || 46 ||
[Analyze grammar]

pratimāgre samabhyarcya caṃdanākṣatanirmitān |
daśaprasthatilāndadyāddaśaviprebhya ādarāt || 47 ||
[Analyze grammar]

palaṃ ca kuḍavaḥ prastha āḍhako droṇa eva ca |
dhānyamānena boddhavyāḥ kramaśomī caturguṇāḥ || 48 ||
[Analyze grammar]

matsya kacchapa maṃḍūka makarādi jalecarān |
haṃsakāraṃḍava baka cakraṭiṭṭibhasārasān || 49 ||
[Analyze grammar]

yathāśakti svarṇarūpya tāmrapṛṣṭhavinirmitān |
abhyarcya gaṃdhakusumairgaṃgāyāṃ prakṣipedvratī || 150 ||
[Analyze grammar]

evaṃ kṛtvā vidhānena vittaśāṭhyaṃ vivarjitaḥ |
upavāsī vakṣyamāṇairdaśapāpaiḥ pramucyate || 51 ||
[Analyze grammar]

adattānāmupādānaṃ hiṃsācaivāvidhānataḥ |
paradāropasevā ca kāyikaṃ trividhaṃ smṛtam || 52 ||
[Analyze grammar]

pāruṣyamanṛtaṃ caiva paiśunyaṃ caiva sarvaśaḥ |
asaṃbaddha pralāpaśca vāṅmayaṃsyāccaturvidham || 53 ||
[Analyze grammar]

paradravyeṣvabhidhyānaṃ manasāniṣṭaciṃtanam |
vitathābhiniveśaśca mānasaṃ trividhaṃ smṛtam || 54 ||
[Analyze grammar]

etairdaśavidhaiḥ pāpairdaśajanmasamudbhavaiḥ |
mucyate nātra saṃdehaḥ satyaṃ satyaṃ gadādhara || 55 ||
[Analyze grammar]

uttarennarakātpūrvāndaśaghorāddaśāvarān |
vakṣyamāṇamidaṃ stotraṃ gaṃgāgre śraddhayā japet || 56 ||
[Analyze grammar]

oṃ namaḥ śivāyai gaṃgāyai śivadāyai namonamaḥ |
namaste viṣṇurūpiṇyai brahmamūrttyai namostu te || 57 ||
[Analyze grammar]

namaste rudrarūpiṇyai śāṃkaryai te namonamaḥ |
sarvadevasvarūpiṇyai namo bheṣajamūrttaye || 58 ||
[Analyze grammar]

sarvasyasarvavyādhīnāṃ bhiṣakśreṣṭhyai namostu te |
sthāsnujaṃgamasaṃbhūta viṣahaṃtryai namostu te || 59 ||
[Analyze grammar]

saṃsāraviṣanāśinyai jīvanāyai namostu te |
tāpatritaya saṃhaṃtryai prāṇeśyai te namonamaḥ || 160 ||
[Analyze grammar]

śāṃti saṃtānakāriṇyai namaste śuddhamūrtaye |
sarvasaṃśuddhikāriṇyai namaḥ pāpārimūrtaye || 61 ||
[Analyze grammar]

bhuktimuktipradāyinyai bhadradāyai namonamaḥ |
bhogopabhogadāyinyai bhogavatyai namostu te || 62 ||
[Analyze grammar]

maṃdākinyai namastestu svargadāyai namonamaḥ |
namastrailokyabhūṣāyai tripathāyai namonamaḥ || 63 ||
[Analyze grammar]

namastriśuklasaṃsthāyai kṣamāvatyai namonamaḥ |
trihutāśanasaṃsthāyai tejovatyai namonamaḥ || 64 ||
[Analyze grammar]

naṃdāyai liṃgadhāriṇyai sudhādhārātmane namaḥ |
namaste viśvamukhyāyai revatyai te namonamaḥ || 65 ||
[Analyze grammar]

bṛhatyai te namastestu lokadhātryai namostu te |
namaste viśvamitrāyai naṃdinyai te namonamaḥ || 66 ||
[Analyze grammar]

pṛthvyai śivāmṛtāyai ca suvṛṣāyai namonamaḥ |
parāparaśatāḍhyāyai tārāyai te namonamaḥ || 67 ||
[Analyze grammar]

pāśajālanikṛṃtinyai abhinnāyai namostu te |
śāṃtāyai ca variṣṭhāyai varadāyai namonamaḥ || 68 ||
[Analyze grammar]

ugrāyai sukhajagdhyai ca saṃjīvinyai namostu te |
brahmiṣṭhāyai brahmadāyai duritaghnyai namonamaḥ || 69 ||
[Analyze grammar]

praṇatārti prabhaṃjinyai jaganmātre namostute |
sarvāpatpratipakṣāyai maṃgalāyai namonamaḥ || 170 ||
[Analyze grammar]

śaraṇāgatadīnārta paritrāṇaparāyaṇe |
sarvasyārti hare devi nārāyaṇi namostu te || 71 ||
[Analyze grammar]

nirlepāyai durgahaṃtryai dakṣāyai te namonamaḥ |
parāparaparāyai ca gaṃge nirvāṇadāyini || 72 ||
[Analyze grammar]

gaṃge mamāgrato bhūyā gaṃge me tiṣṭha pṛṣṭhataḥ |
gaṃge me pārśvayoredhi gaṃge tvayyastu me sthitiḥ || 73 ||
[Analyze grammar]

ādau tvamaṃte madhye ca sarvaṃ tvaṃ gāṃ gate śive |
tvameva mūlaprakṛtistvaṃ pumānpara eva hi |
gaṃge tvaṃ paramātmā ca śivasvatubhyaṃ namaḥ śive || 74 ||
[Analyze grammar]

ya idaṃ paṭhate stotraṃ śṛṇuyācchraddhayāpi yaḥ |
daśadhā mucyate pāpaiḥ kāyavākcittasaṃbhavaiḥ || 75 ||
[Analyze grammar]

rogastho rogato mucyedvipadbhyaśca vipadyutaḥ |
mucyate baṃdhanādbaddho bhīto bhītaḥ pramucyate || 76 ||
[Analyze grammar]

sarvānkāmānavāpnoti pretya ca tridivaṃ vrajet |
divyaṃ vimānamāruhya divyastrīparivījitaḥ || 77 ||
[Analyze grammar]

gṛhepi likhitaṃ yasya sadā tiṣṭhati dhāritama |
nāgnicorabhayaṃ tasya na sarpādi bhayaṃ kvacita || 78 ||
[Analyze grammar]

jyeṣṭhe māse site pakṣe daśamī hastasaṃyutā |
saṃharettrividhaṃ pāpaṃ budhavāreṇa saṃyutā || 79 ||
[Analyze grammar]

tasyāṃ daśamyāmetacca stotraṃ gaṃgājale sthitaḥ |
yaḥ paṭheddaśakṛtvastu daridro vāpi cākṣamaḥ || 180 ||
[Analyze grammar]

sopi tatphalamāpnoti gaṃgāṃ saṃpūjya yatnataḥ |
pūrvoktena vidhānena yatphalaṃ saṃprakīrtitama || 81 ||
[Analyze grammar]

yathā gaurī tathā gaṃgā tasmādgauryāstu pūjane |
yo vidhirvihitaḥ samyaksopi gaṃgāprapūjane || 82 ||
[Analyze grammar]

yathā'haṃ tvaṃ tathā viṣṇo yathā tvaṃ tu tathāhyumā |
umā yathā tathā gaṃgā catūrūpaṃ na bhidyate || 83 ||
[Analyze grammar]

viṣṇurudrāṃ taraṃ caiva śrīgauryoraṃtaraṃ tathā |
gaṃgāgauryaṃtaraṃ caiva yo brūte mūḍhadhīstu saḥ || 84 ||
[Analyze grammar]

iti śrīskāṃde mahāpurāṇe ekāśītisāhasryāṃ saṃhitāyāṃ caturthe kāśīkhaṃḍe pūrvārddhe gaṃgāmahimavarṇanapūrvaka daśaharā stotrakathanaṃnāma saptaviṃśatitamo'dhyāyaḥ || 27 ||
[Analyze grammar]