Chapter 22

[English text for this chapter is available]

śivaśarmovāca |
dhruvākhyānamidaṃ ramyaṃ mahāpātakanāśanam |
mahāścaryakaraṃ puṇyaṃ śrutvā tṛptosmi bho gaṇau || 1 ||
[Analyze grammar]

agastya uvāca |
itthaṃ yāvaddvijo brūte vimānaṃ vāyuvegagam |
tāvatprāpa maharlokaṃ svarlokātparamādbhutam || 2 ||
[Analyze grammar]

dvijo'tha lokaṃ saṃvīkṣya sarvato mahasā vṛtam |
tau gaṇau pratyuvācedaṃ koyaṃ loko manoharaḥ || 3 ||
[Analyze grammar]

tāvūcatustato vipraṃ niśāmaya mahāmate |
ayaṃ sa hi maharlokaḥ svarlokātparamādbhutaḥ || 4 ||
[Analyze grammar]

kalpāyuṣo vasaṃtyatra tapasā dhūtakalmaṣāḥ |
viṣṇusmaraṇa saṃkṣīṇa samastakleśasaṃcayāḥ || 5 ||
[Analyze grammar]

nirvyājapraṇidhānena dṛṣṭvā tejomayaṃ jagat |
mahāyogasamāyuktā vasaṃtyatra surottamāḥ || 6 ||
[Analyze grammar]

itthaṃ kathāṃ kathayatorbhagavadgaṇayoḥ priye |
kṣaṇārdhena vimānaṃ tajjanalokaṃ nināyatān || 7 ||
[Analyze grammar]

nivasaṃtyamalā yatra mānasā bahmaṇaḥ sutāḥ |
sanaṃdanādyā yogīṃdrāḥ sarve te hyūrdhvaretasaḥ || 8 ||
[Analyze grammar]

anye tu yogino ye vai hyaskhaladbrahmacāriṇaḥ |
sarvadvaṃdvavinirmuktāste vasaṃtyatinirmalāḥ || 9 ||
[Analyze grammar]

janalokāttapolokasteṣāṃ locanagocaraḥ |
kṛtastena vimānena manovegena gacchatā || 10 ||
[Analyze grammar]

vairājā yatra te devā vaseyurdāhavarjitāḥ |
vāsudeve mano yeṣāṃ vāsudevārpitakriyāḥ || 11 ||
[Analyze grammar]

tapasā toṣya goviṃdamabhilāṣavivarjitāḥ |
tapolokamimaṃ prāpya vasaṃti vijiteṃdriyāḥ || 12 ||
[Analyze grammar]

śiloṃcha vṛttayā ye vai daṃtolūkhalikāśca ye |
aśmakuṭṭāśca munayaḥ śīrṇaparṇāśinaśca ye || 13 ||
[Analyze grammar]

grīṣme paṃcāgnitapaso varṣāsu sthaṃḍileśayāḥ |
hemaṃtaśiśirārdhe ye kṣapaṃti salile kṣapāḥ || 14 ||
[Analyze grammar]

kuśāgranīraviprūṣastṛṣitā yatayo'piban |
vātāśinotikṣudhitāḥ pādāgrāṃguṣṭha bhūspṛśaḥ || 15 ||
[Analyze grammar]

ūrdhvadoṣo ravidṛśastvekāṃghri sthāṇu niścalāḥ |
ye vai divā nirucchvāsā māsocchvāsāśca ye punaḥ || 16 ||
[Analyze grammar]

māsopavāsavratinaścāturmāsya vratāśca ye |
ṛtvaṃtatoyapānā ye ṣaṇmāsopavāsakāḥ || 17 ||
[Analyze grammar]

ye ca varṣanimeṣā vai varṣadhārāṃbu tarṣakāḥ |
ye ca sthāṇūpamāṃ prāptā mṛgakaṃḍūti saukhyadāḥ || 18 ||
[Analyze grammar]

jaṭāṭavī koṭarāṃtaḥ kṛtanīḍāṃḍajāśca ye |
prarūḍhavāmalūrāṃgāḥ snāyunaddhāsthisaṃcayāḥ || 19 ||
[Analyze grammar]

latāpratānaiḥ parito veṣṭitāvayavāśca ye |
sasyāni ca prarūḍhāni yadaṃgeṣu cirasthiti || 20 ||
[Analyze grammar]

ityādi sutapaḥ kliṣṭavarṣmāṇo ye tapodhanāḥ |
brahmāyuṣastapoloke te vasaṃtyakutobhayāḥ || 21 ||
[Analyze grammar]

yāvaditthaṃ sa puṇyātmā śṛṇoti gaṇayormukhāt |
tāvannetrātithībhūtaḥ satyaloko mahojjvalaḥ || 22 ||
[Analyze grammar]

tvarāvaṃtau gaṇau tatra vimānādavaruhya tau |
sraṣṭāraṃ sarvalokānāṃ tena sārdhaṃ praṇematuḥ || 23 ||
[Analyze grammar]

brahmovāca |
gaṇāvasau dvijo dhīmānvedavedāṃgapāragaḥ |
smṛtyuktācāracaṃcuśca pratīpaḥ pāpakarmasu || 24 ||
[Analyze grammar]

ayi dvija mahāprājña jāne tvāṃ śivaśarmaka |
sādhūkṛtaṃ tvayā vatsa sutīrthaprāṇamokṣaṇāt || 25 ||
[Analyze grammar]

satvaraṃ gatvaraṃ sarvaṃ yaccaitadbhavatekṣitam |
dainaṃdinapralayataḥ sṛjāmi ca punaḥ punaḥ || 26 ||
[Analyze grammar]

ā vairājaṃ pratipadamupasaṃharate haraḥ |
kā kathā maśakābhānāṃ nṛṇāṃ maraṇadharmiṇām || 27 ||
[Analyze grammar]

caturṣu bhūtagrāmeṣu hyeka eva guṇo nṛṇām |
tasminvai bhārate varṣe karmabhūmau mahīyasi || 28 ||
[Analyze grammar]

capalāni vinirjityeṃdriyāṇi manasā saha |
vihāya vairiṇaṃ lobhaṃ viṣvagguṇagaṇasya ca || 29 ||
[Analyze grammar]

dharmavaṃśaharaṃ kāmamarthasaṃcayahāriṇam |
jarāpalitakartāraṃ viniṣkṛtya vicārataḥ || 30 ||
[Analyze grammar]

jitvā krodharipuṃ dhairyāttapaso yaśasaḥ śriyaḥ |
śarīrasyāpi hartāraṃ netāraṃ tāmasīṃ gatim || 31 ||
[Analyze grammar]

sadā madaṃ parityajya pramādaikapadapradam |
pramādaikaśaraṇyaṃ ca saṃpadāṃ vinivartakam || 32 ||
[Analyze grammar]

sarvatra laghutā hetumahaṃkāraṃ vihāya ca |
dūṣaṇāropaṇe yatnaṃ kurvāṇaṃ sajjaneṣvapi || 33 ||
[Analyze grammar]

hitvā mohaṃ mahādroharopaṇaṃ matighātinam |
atyaṃtamaṃdhīkaraṇamaṃdhatāmisradarśakam || 34 ||
[Analyze grammar]

śrutismṛtipurāṇoktaṃ parikṣuṇṇaṃ mahājanaiḥ |
dharmasopānamāruhya yadihāyāṃti helayā || 35 ||
[Analyze grammar]

karmabhūmiṃ samīhaṃte sarve svargaukaso dvija |
yattatrārjitabhoktāraḥ padeṣūccāvaceṣvamī || 36 ||
[Analyze grammar]

nāryāvartasumo deśo na kāśī sadṛśī purī |
na viśveśa samaṃ liṃgaṃ kvāpi bahmāṃḍamaṃḍale || 37 ||
[Analyze grammar]

saṃti svargā bahuvidhāḥ sukhetara vivarjitā |
sukṛtaikaphalāḥ sarve yuktāḥ sarvasamṛddhibhiḥ || 38 ||
[Analyze grammar]

svarlokādadhikaṃ ramyaṃ nahi brahmāṃḍagolake |
sarve yataṃte svargāya tapodānavratādibhiḥ || 39 ||
[Analyze grammar]

svarlokādapiramyāṇi pātālānīti nāradaḥ |
prāha svargasadāṃ madhye pātālebhyaḥ samāgataḥ || 40 ||
[Analyze grammar]

āhlādakāriṇaḥ śubhrā maṇayo yatra suprabhāḥ |
nāgāṃgābharaṇaprotāḥ pātālaṃ kena tatsamam || 41 ||
[Analyze grammar]

daityadānavakanyābhiritaścetaśca śobhite |
pātāle kasya na prītirvimuktasyāpi jāyate || 42 ||
[Analyze grammar]

divārkaraśmayastatra prabhāṃ tanvaṃti nātapam |
śaśinaśca na śītāya niśi dyotāya kevalam || 43 ||
[Analyze grammar]

yatra na jñāyate kālo gatopi danujādibhiḥ |
vanāni nadyo ramyāṇi sadaṃbhāṃsi sarāṃsi ca || 44 ||
[Analyze grammar]

kalāḥ puṃsko kilālāpāḥ sucailāni śucīni ca |
bhūṣaṇānyatiramyāṇi gaṃdhādyamanulepanam || 45 ||
[Analyze grammar]

vīṇāveṇumṛdaṃgādi nisvanāḥ śrutihāriṇaḥ |
hāṭakeśaṃ mahāliṃgaṃ yatra vai sarvakāmadam || 46 ||
[Analyze grammar]

etānyanyāni ramyāṇi bhogyogyāni dānavaiḥ |
daityoragaiśca bhujyaṃte pātālāṃtaragocaraiḥ || 47 ||
[Analyze grammar]

pātālebhyopi vai ramyaṃ dvija varṣamilāvṛtam |
ratnasānuṃ samāśritya paritaḥ parisaṃsthitam || 48 ||
[Analyze grammar]

sadā sukṛtino yatra sarvabhogabhujo dvija |
navayauvanasaṃpannā nityaṃ yatra mṛgīdṛśaḥ || 49 ||
[Analyze grammar]

bhogabhūmiriyaṃ proktā śreyo vinimayārjitā |
bhujyate tvadvidhairlokaistīrthābhityakta dehakaiḥ || 50 ||
[Analyze grammar]

aklībabhāṣibhiścāpi putrakṣetrādyahīnakaiḥ |
paropakārasaṃkṣīṇasukhāyurdhanasaṃcayaiḥ || 51 ||
[Analyze grammar]

saṃti dvīpā hyanekā vai pārāvārāṃtarasthitāḥ |
jaṃbūdvīpasamo dvīpo na kvāpi jagatītale || 52 ||
[Analyze grammar]

tatrāpi navavarṣāṇi bhārataṃ tatra cottamam |
karmabhūmiriyaṃ proktā devānāmapidurlabhā || 53 ||
[Analyze grammar]

aṣṭau kiṃpuruṣādīni devabhogyāni tāni tu |
teṣu svargātsamāgatya ramaṃte tridivaukasaḥ || 54 ||
[Analyze grammar]

yojanānāṃ sahasrāṇi navavistāratastvidam |
bhārataṃ prathamaṃ varṣaṃ merordakṣiṇataḥ sthitam || 55 ||
[Analyze grammar]

tatrāpi himaviṃdhyādreraṃtaraṃ puṇyadaṃ param |
gaṃgāyamunayormadhye hyaṃtarvedī bhuvaḥ parāḥ || 56 ||
[Analyze grammar]

kurukṣetraṃ hi sarveṣāṃ kṣetrāṇāmadhikaṃ tataḥ |
tatopi naimiṣāraṇyaṃ svargasādhanamuttamam || 57 ||
[Analyze grammar]

naimiṣāraṇyatopīha sarvasminkṣitimaṃḍale |
sarvebhyopi hi tīrthebhyastīrtharājo viśiṣyate || 58 ||
[Analyze grammar]

svargadomokṣadaścaiva sarvakāmaphalapradaḥ |
prayāgastanmahatkṣetraṃ tīrtharāja iti smṛtaḥ || 69 ||
[Analyze grammar]

yāgāḥ sarve mayā pūrvaṃ tulayā vidhṛtā dvija |
tacca tīrthavaraṃ ramyaṃ kāmikaṃ kāmapūraṇāta || 60 ||
[Analyze grammar]

dṛṣṭvā prakṛṣṭayāgebhyaḥ puṣṭebhyo dakṣiṇādibhiḥ |
prayāgamiti tannāma kṛtaṃ hariharādibhiḥ || 61 ||
[Analyze grammar]

nāmamātrasmṛteryasya prayāgasya trikālataḥ |
smartuḥ śarīre no jātu pāpaṃ vasati kutracit || 62 ||
[Analyze grammar]

saṃti tīrthānyanekāni pāpatrāṇakarāṇi ca |
na śaktānyadhikaṃ dātuṃ kṛtainaḥ pariśuddhitaḥ || 63 ||
[Analyze grammar]

janmāṃtareṣvasaṃkhyeṣu yaḥ kṛtaḥ pāpasaṃcayaḥ |
duṣpraṇodyo hi nitarāṃ vratairdānaistapojapaiḥ || 64 ||
[Analyze grammar]

sa tīrtharājagamanodyatasya śubhajanmanaḥ |
aṃgeṣu vepate'tyaṃtaṃ drumo vātahato yathā || 65 ||
[Analyze grammar]

tataḥ krāṃtārdhamārgasya prayāga dṛḍhacetasaḥ |
puṃsaḥ śarīrānniryātumapekṣeta padāṃtaram || 66 ||
[Analyze grammar]

bhāgyānnetrātithībhūte tīrtharāje mahātmanaḥ |
palāyate drutataraṃ tamaḥ sūryodaye yathā || 67 ||
[Analyze grammar]

saptadhātumayī bhūtatanau pāpāni yāni vai |
keśeṣu tāni tiṣṭhaṃti vapanādyāṃti tānyapi || 68 ||
[Analyze grammar]

evaṃ niṣkaluṣībhūya tataḥ snāyātsitāsite |
yaṃyaṃ kāmamabhidhyāyaṃstaṃ tamāpnoti nānyathā || 69 ||
[Analyze grammar]

puṇyarāśiṃ ca vipulaṃ puṇyānbhogānyathepsitān |
svargaṃ prāpnoti tatpuṇyānniṣkāmo mokṣamāpnuyāt || 70 ||
[Analyze grammar]

snāyādyobhilaṣanmokṣaṃ kāmānanyānvihāya ca |
sopi mokṣamavāpnoti kāmadāttīrtharājataḥ || 71 ||
[Analyze grammar]

tīrtharājaṃ parityajya yo'nyasmātkāmamicchati |
bhāratākhye mahāvarṣe sa kāmaṃ nāpnuyātsphuṭam || 72 ||
[Analyze grammar]

satyaloke prayāge ca nāṃtaraṃ vedmyahaṃ dvija |
tatra ye śubhakarmāṇaste mallokanivāsinaḥ || 73 ||
[Analyze grammar]

tīrthābhilāṣibhirmartyaissevyaṃ tīrthāṃtaraṃ nahi |
anyatra bhūmivalaye tīrtharājātprayā gataḥ || 74 ||
[Analyze grammar]

yathāṃtaraṃ dvijaśreṣṭha bhūpetvitarasevake |
dṛṣṭāṃtamātraṃ kathitaṃ prayāgetara tīrthayoḥ || 75 ||
[Analyze grammar]

yathākathaṃcittīrthe'sminprāṇatyāgaṃ karoti yaḥ |
tasyātmaghātadoṣo na prāpnuyādīpsitānyapi || 76 ||
[Analyze grammar]

yasya bhāgyavataścātra tiṣṭhaṃtyasthīnyapi dvija |
na tasya duḥkhaleśopi kvāpi janmani jāyate || 77 ||
[Analyze grammar]

brahmahatyādi pāpānāṃ prāyaścittaṃ cikīrṣuṇā |
prayāgaṃ vidhivatsevyaṃ dvijavākyānna saṃśayaḥ || 78 ||
[Analyze grammar]

kiṃ bahūktena vipreṃdra mahodayamabhīpsunā |
sevyaṃ sitāsitaṃ tīrthaṃ prakṛṣṭaṃ jagatītale || 79 ||
[Analyze grammar]

prayāgatopi tīrtheśātsarveṣu bhuvaneṣvapi |
anāyāsena vai muktiḥ kāśyāṃ dehāvasānataḥ || 80 ||
[Analyze grammar]

prayāgādapi vai ramyamavimuktaṃ na saṃśayaḥ |
yatra viśveśvaraḥ sākṣātsvayaṃ samadhitiṣṭhati || 81 ||
[Analyze grammar]

avimuktānmahākṣetrādviśveśa samadhiṣṭhitāt |
na ca kiṃcitkvacidramyamiha brahmāṃḍagolake || 82 ||
[Analyze grammar]

avimuktamidaṃ kṣetramapi brahmāṃḍamadhyagam |
brahmāṃḍamadhye na bhavetpaṃcakrośapramāṇataḥ || 83 ||
[Analyze grammar]

yathāyathā hi vardheta jalamekārṇavasya ca |
tathātathonnayedīśastatkṣetraṃ pralayādapi || 84 ||
[Analyze grammar]

kṣetrametattriśūlāgre śūlinastiṣṭhati dvija |
aṃtarikṣena bhūmiṣṭhaṃ nekṣaṃte mūḍhabuddhayaḥ || 85 ||
[Analyze grammar]

sadā kṛtayugaṃ cātra mahāparvasadā'tra vai |
na grahā'stodayakṛto doṣo viśveśvarāśrame || 86 ||
[Analyze grammar]

sadā saumyāyanaṃ tatra sadā tatra mahodayaḥ |
sadaiva maṃgalaṃ tatra yatra viśveśvarasthitiḥ || 87 ||
[Analyze grammar]

yathābhūmitale vipra puryaḥ saṃti sahasraśaḥ |
tathā kāśī na maṃtavyā kvāpi lokottarātviyam || 88 ||
[Analyze grammar]

mayā sṛṣṭāni vipreṃdra bhuvanāni caturdaśa |
asyāḥ puryā vinirmātā svayaṃ viśveśvaraḥ prabhuḥ || 89 ||
[Analyze grammar]

purā yamastapastaptvā bahukālaṃ suduṣkaram |
trailokyādhikṛtiṃ prāptastyaktvā vārāṇasīṃ purīm || 90 ||
[Analyze grammar]

carācarasya sarvasya yāni karmāṇi tāni vai |
gocare citraguptasya kāśīvāsikṛtādṛte || 91 ||
[Analyze grammar]

praveśo yamadūtānāṃ na kadāciddvijottama |
madhye kāśīpurī kvāpi rakṣiṇastatra tadgaṇāḥ || 92 ||
[Analyze grammar]

svayaṃ niyaṃtā viśveśastatra kāśyāṃ tanutyajām |
tatrāpi kṛtapāpānāṃ niyaṃtā kālabhairavaḥ || 93 ||
[Analyze grammar]

tatra pāpaṃ na kartavyaṃ dāruṇā rudrayātanā |
aho rudrapiśācatvaṃ narakebhyopi duḥsaham || 94 ||
[Analyze grammar]

pāpameva hi kartavyaṃ matirasti yadīdṛśī |
sukhenānyatra kartavyaṃ mahī hyasti mahīyasī || 95 ||
[Analyze grammar]

api kāmāturo jaṃturekāṃ rakṣati mātaram |
api pāpakṛtā kāśī rakṣyā mokṣārthinaikikā || 96 ||
[Analyze grammar]

parāpavādaśīlena paradārābhilāṣiṇā |
tena kāśī na saṃsevyā kva kāśī nirayaḥ kva saḥ || 97 ||
[Analyze grammar]

abhilaṣyaṃti ye nityaṃ dhanaṃ cātra pratigrahaiḥ |
parasvaṃ kapaṭairvāpi kāśī sevyā na tairnaraiḥ || 98 ||
[Analyze grammar]

parapīḍākaraṃ karma kāśyāṃ nityaṃ vivarjayet |
tadeva cetkimatra syātkāśīvāso durātmanām || 99 ||
[Analyze grammar]

tyaktvā vaiśveśvarīṃ bhaktiṃ ye'nyadevaparāyaṇāḥ |
sarvathā tairna vastavyā rājadhānī pinākinaḥ || 100 ||
[Analyze grammar]

arthārthinastu ye vipra ye ca kāmārthino narāḥ |
avimuktaṃ na taiḥ sevyaṃ mokṣakṣetramidaṃ yataḥ || 1 ||
[Analyze grammar]

śivaniṃdāparā ye ca vedaniṃdā parāśca ye |
vedācārapratīpā ye sevyā vārāṇasī na taiḥ || 2 ||
[Analyze grammar]

paradrohadhiyo ye ca parerṣyākāriṇaśca ye |
paropatāpino ye vai teṣāṃ kāśī na siddhaye || 3 ||
[Analyze grammar]

manasāpi na ye kāśīmabhinaṃdaṃti durdhiyaḥ |
teṣāṃ nirvāṇavārtāpi dūre durvṛttacetasām || 4 ||
[Analyze grammar]

jñānena na vinā mokṣaḥ kvacidastīha bhūtale |
tajjñānaṃ na vratairlabhyamapi cāṃdrāyaṇādibhiḥ || 5 ||
[Analyze grammar]

tulāpuruṣamukhyaiśca dānaiśca śraddhayānvitaiḥ |
deśakāle ca vidhinā pātrebhyaḥ pratipāditaiḥ || 6 ||
[Analyze grammar]

na yamairbrahmacaryādyairniyamairnārcanādibhi |
śarīraśoṣaṇairugrairna tapobhirdvijottama || 7 ||
[Analyze grammar]

na mahāmaṃtrajapyaiśca gurubhiḥ pratipāditaiḥ |
na svādhyāyairyathoktaiśca nāgniśuśrūṣaṇaiḥ paraiḥ || 8 ||
[Analyze grammar]

na sevayā gurūṇāṃ ca na śrāddhairdevatārcanaiḥ |
na nānātīrthayātrābhirjñānaṃ samadhigamyate || 9 ||
[Analyze grammar]

na yogena vinā jñānaṃ yogastattvārthaśīlanam |
gurūpadiṣṭamārgeṇa sadābhyāsavaśena ca || 110 ||
[Analyze grammar]

tasyāṃtarāyā bahavaḥ sudūraśravaṇādayaḥ |
ato na prāpyate jñānaṃ yogādekena janmanā || 11 ||
[Analyze grammar]

vinā tapo japādyaiśca vinā yogena suvrata |
niḥśreyo labhyate kāśyāmihaikenaiva janmanā || 12 ||
[Analyze grammar]

tvayā śuddhadhiyā kāśyāṃ yacchreyaḥ samupārjitam |
tacchreyasopyudarkaste mahānasti dvijottama || 13 ||
[Analyze grammar]

ukteti virarāmājaḥ śṛṇvatorgaṇayostayoḥ |
sopi pramuditaścābhūcchivaśarmā mahāmanāḥ || 114 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍe pūrvārddhe brahmakṛtakāśīpraśaṃsānāma dvāviṃśatitamo'dhyāyaḥ || 22 ||
[Analyze grammar]