Chapter 7

[English text for this chapter is available]

sūta uvāca |
ityuktā muninā sādhvī sā vipravanitā punaḥ |
taṃ praṇamyātha papraccha śivapūjāvidheḥ kramam || 1 ||
[Analyze grammar]

śāṃḍilya uvāca |
pakṣadvaye trayodaśyāṃ nirāhāro bhavedyadā |
ghaṭītrayādastamayātpūrvaṃ snānaṃ samācaret || 2 ||
[Analyze grammar]

śuklāṃbaradharo dhīro vāgyato niyamānvitaḥ |
kṛtasaṃdhyājapavidhiḥ śivapūjāṃ samārabhet || 3 ||
[Analyze grammar]

devasya purataḥ samyagupalipya navāṃbhasā |
vidhāya maṃḍalaṃ ramyaṃ dhautavastrādibhirbudhaḥ || 4 ||
[Analyze grammar]

vitānādyairalaṃkṛtya phalapuṣpanavāṃkuraiḥ |
vicitrapadmamuddhṛtya varṇapaṃcakasaṃyutam || 5 ||
[Analyze grammar]

tatropaviśya suśubhe bhaktiyuktaḥ sthirāsane |
samyaksaṃpāditāśeṣa pūjopakaraṇaḥ śuciḥ || 6 ||
[Analyze grammar]

āgamoktena maṃtreṇa pīṭhamāmaṃtrayetsudhīḥ |
tataḥ kṛtvātmaśuddhiṃ ca bhūtaśuddhyādikaṃ kramāt || 7 ||
[Analyze grammar]

prāṇāyāmatrayaṃ kṛtvā bījavarṇaiḥ sabiṃdukaiḥ |
mātṛkā nyasya vidhivaddhyātvā tāṃ devatāṃ parām || 8 ||
[Analyze grammar]

samāpya mātṛkā bhūyo dhyātvā caiva paraṃ śivam |
vāmabhāge guruṃ natvā dakṣiṇe gaṇapaṃ namet || 9 ||
[Analyze grammar]

aṃsoruyugme dharmādīnnyasya nābhau ca pārśvayoḥ |
adharmādīnanaṃtādīnhṛdi pīṭhe manuṃ nyaset || 10 ||
[Analyze grammar]

ādhāraśaktimārabhya jñānātmānamanukramāt |
uktakrameṇa vinyasya hṛtpadme sādhubhāvite || 11 ||
[Analyze grammar]

navaśaktimaye ramye dhyāyeddevamumāpatim |
candrakoṭipratīkāśaṃ trinetraṃ candraśekharam || 12 ||
[Analyze grammar]

āpiṃgalajaṭājūṭaṃ ratnamaulivirājitam |
nīlagrīvamudārāṃgaṃ nāgahāropaśobhitam || 13 ||
[Analyze grammar]

varadābhayahastaṃ ca dhāriṇaṃ ca paraśvadham |
dadhānaṃ nāgavalayakeyūrāṃgadamudrikam || 14 ||
[Analyze grammar]

vyāghracarmaparīdhānaṃ ratnasiṃhāsane sthitam |
dhyātvā tadvāma bhāge ca ciṃtayedgirikanyakām || 15 ||
[Analyze grammar]

bhāsvajjapāprasūnābhāmudayārkasamaprabhām |
vidyutpuṃjanibhāṃ tanvīṃ manonayananaṃdinīm || 16 ||
[Analyze grammar]

bāleṃdu śekharāṃ snigdhāṃ nīlakuṃcitakuntalām |
bhṛṃgasaṃghātarucirāṃ nīlālakavirājitām || 17 ||
[Analyze grammar]

maṇikuṃḍalavidyotanmukhamaṃḍalavibhramām |
navakumkumapaṃkāṃka kapoladaladarpaṇām || 18 ||
[Analyze grammar]

madhurasmitavibhrājadaruṇādharapallavām |
kaṃbukaṃṭhīṃ śivāmudyatkucapaṃkajakuḍmalām || 19 ||
[Analyze grammar]

pāśāṃkuśābhayābhīṣṭavila satsu caturbhujām |
anekaratnavilasatkaṃkaṇāṃkitamudrikām || 20 ||
[Analyze grammar]

valitrayeṇa vilasaddhemakāṃcīguṇānvitām |
raktamālyāṃbaradharāṃ divyacaṃdanaca rcitām || 21 ||
[Analyze grammar]

dikpālavanitāmaulisannatāṃghrisaroruhām |
ratnasiṃhāsanārūḍhāṃ sarparājaparicchadām || 21 ||
[Analyze grammar]

evaṃ dhyātvā mahādevaṃ devīṃ ca giri kanyakām |
nyāsakrameṇa saṃpūjya devaṃ gaṃdhādibhiḥ kramāt || 23 ||
[Analyze grammar]

paṃcabhirbrahmabhiḥ kuryātproktasthāneṣu vā hṛdi |
pṛthakpuṣpāṃjaliṃ dehe mūlena ca hadi tridhā || 24 ||
[Analyze grammar]

punaḥ svayaṃ śivo bhūtvā mūlamaṃtreṇa sādhakaḥ |
tataḥ saṃpūjayeddevaṃ bāhyapīṭhe punaḥ kramāt || 25 ||
[Analyze grammar]

saṃkalpaṃ pravadettatra pūjāraṃbhe samāhitaḥ |
kṛtāṃjalipuṭo bhūtvā ciṃtayeddhṛdi śaṃkaram || 26 ||
[Analyze grammar]

ṛṇapātakadaurbhāgyadāridryavinivṛttaye |
aśeṣāghavināśāya prasīda mama śaṃkara || 27 ||
[Analyze grammar]

duḥkhaśokāgnisaṃtaptaṃ saṃsārabhayapīḍitam |
bahurogākulaṃ dīnaṃ trāhi māṃ vṛṣavāhana || 28 ||
[Analyze grammar]

āgaccha devadeveśa mahādevābhayaṃkara |
gṛhāṇa saha pārvatyā tava pūjāṃ mayā kṛtām || 29 ||
[Analyze grammar]

iti saṃkalpya vidhivadbrāhmapūjāṃ samācaret |
guruṃ gaṇapatiṃ caiva yajetsavyāpasavyayoḥ || 30 ||
[Analyze grammar]

kṣetreśamīśakoṇe tu yajedvāstoṣpatiṃ kramāt |
vāgdevīṃ ca yajettatra tataḥ kātyāyanīṃ yajet || 31 ||
[Analyze grammar]

dharmaṃ jñānaṃ ca vairāgyamaiśvaryaṃ ca namoṃ'takaiḥ |
svarairīśādikoṇeṣu pīṭhapādānanukramāt |
ābhyāṃ biṃduvisargābhyāmadharmādīnprapūjayet || 32 ||
[Analyze grammar]

sattvarūpaiścaturdikṣu madhye'naṃtaṃ satārakam |
sattvādīṃstriguṇāṃstaṃ tu rūpānpīṭheṣu vinyaset || 33 ||
[Analyze grammar]

ata ūrdhvacchade māyāṃ saha lakṣmyā śivena ca || 34 ||
[Analyze grammar]

tadaṃte cāṃbujaṃ bhūyaḥ sakalaṃ maṃḍalatrayam |
patrakesarakiṃjalkavyāptaṃ tārākṣaraiḥ kramāt || 35 ||
[Analyze grammar]

padmatrayaṃ tathābhyarcya madhye maṃḍalamādarāt |
vāmāṃ jyeṣṭhāṃ ca raudrīṃ ca bhāgādyairdikṣu pūjayet || 36 ||
[Analyze grammar]

vāmādyā nava śaktīśca navasvarayutā yajet |
hṛdi bījatrayādyena pīṭhamaṃtreṇa cārcayet || 37 ||
[Analyze grammar]

āvṛttaiḥ prathamāṃgaiśca paṃcabhirmūrttiśaktibhiḥ |
triśaktimūrttibhiścānyairnidhidvayasamanvitaiḥ || 38 ||
[Analyze grammar]

anaṃtādyaiḥ parītāśca mātṛbhiśca vṛṣādibhiḥ |
siddhibhiścāṇimādyābhiriṃdrādyaiśca sahāyudhaiḥ || 39 ||
[Analyze grammar]

vṛṣabhakṣetracaṃḍeśadurgāśca skaṃdanaṃdinau |
gaṇeśaḥ sainyapaścaiva svasvalakṣaṇalakṣitāḥ || 40 ||
[Analyze grammar]

aṇimā mahimā caiva garimā laghimā tathā |
īśitvaṃ ca vaśitvaṃ ca prāptiḥ prākāmyameva ca || 41 ||
[Analyze grammar]

aṣṭaiśvaryāṇi coktāni tejorūpāṇi kevalam |
paṃcabhirbrahmabhiḥ pūrvaṃ hṛllekhādyādibhiḥ kramāta || 42 ||
[Analyze grammar]

aṃgairumādyairiṃdrādyaiḥ pūjoktā munibhistu taiḥ |
umācaṃḍeśvarādīṃśca pūjayeduttarāditaḥ || 43 ||
[Analyze grammar]

evamāvaraṇairyuktaṃ tejorūpaṃ sadāśivam |
umayā sahitaṃ devamupacāraiḥ prapūjayet || 44 ||
[Analyze grammar]

supratiṣṭhitaśaṃkhasya tīrthaiḥ paṃcāmṛtairapi |
abhiṣicya mahādevaṃ rudrasūktaiḥ samāhitaḥ || 45 ||
[Analyze grammar]

kalpayedvividhairmaṃtrairāsanādyupacārakān |
āsanaṃ kalpayeddhaimaṃ divyavastrasamanvitam || 46 ||
[Analyze grammar]

arghyamaṣṭaguṇopetaṃ pādyaśuddhodakena ca |
tenaivācamanaṃ dadyānmadhuparkaṃ madhūttaram || 47 ||
[Analyze grammar]

punarācamanaṃ dattvā snānaṃ maṃtrai prakalpayet |
upavītaṃ tathā vāso bhūṣaṇāni nivedayet |
gaṃdhamaṣṭāṃgasaṃyuktaṃ supūtaṃ vinivedayet || 48 ||
[Analyze grammar]

tataśca bilvamaṃdārakahlārasarasīruham |
dhattūrakaṃ karṇikāraṃ śaṇapuṣpaṃ ca mallikām || 49 ||
[Analyze grammar]

kuśāpāmārgatulasīmādhavīcaṃpakādikam |
bṛhatīkaravīrāṇi yathālabdhāni sādhakaḥ || 50 ||
[Analyze grammar]

nivedayetsugaṃdhīni mālyāni vividhāni ca |
dhūpaṃ kālāgarūtpannaṃ dīpaṃ ca vimalaṃ śubham || 51 ||
[Analyze grammar]

viśeṣakam |
atha pāyasanaivedyaṃ saghṛtaṃ sopadaṃśakam |
modakāpūpasaṃyuktaṃ śarkarāguḍasaṃyutam || 52 ||
[Analyze grammar]

madhunāktaṃ dadhiyutaṃ jalapānasamanvitam |
tenaiva haviṣā vahnau juhuyānmaṃtrabhāvite || 53 ||
[Analyze grammar]

āgamoktena vidhinā guruvākyaniyaṃtritaḥ |
naivedyaṃ śaṃbhave bhūyo dattvā tāṃbūlamuttamam || 54 ||
[Analyze grammar]

dhūpaṃ nīrājanaṃ ramyaṃ chatraṃ darpaṇamuttamam |
samarpayitvā vidhivanmaṃtrairvedikatāṃtrikaiḥ || 55 ||
[Analyze grammar]

yadyaśaktaḥ svayaṃ niḥsvo yathāvibhavamarcayet |
bhakttyā dattena gaurīśaḥ puṣpamātreṇa tuṣyati || 56 ||
[Analyze grammar]

athāṃgabhūtānsakalāngaṇeśādīnprapūjayet |
stavairnānāvidhaiḥ stutvā sāṣṭāṃgaṃ praṇamedbudhaḥ || 57 ||
[Analyze grammar]

tataḥ pradakṣiṇīkṛtya vṛṣacaṃḍeśvarādikān |
pūjāṃ samarpya vidhivatprārthayedgirijāpatim || 58 ||
[Analyze grammar]

jaya deva jagannātha jaya śaṃkara śāśvata |
jaya sarva surādhyakṣa jaya sarvasurārcita || 59 ||
[Analyze grammar]

jaya sarvaguṇātīta jaya sarvavaraprada |
jaya nitya nirādhāra jaya viśvaṃbharāvyaya || 60 ||
[Analyze grammar]

jaya viśvaikavedyeśa jaya nāgeṃdrabhūṣaṇa |
jaya gaurīpate śaṃbho jaya caṃdrārdhaśekhara || 61 ||
[Analyze grammar]

jaya koṭyarkasaṃkāśa jayānaṃtaguṇāśraya || 62 ||
[Analyze grammar]

jaya rudra virūpākṣa jayāciṃtya niraṃjana |
jaya nātha kṛpāsiṃdho jaya bhaktārtibhañjana |
jaya dustarasaṃsārasāgarottāraṇa prabho || 63 ||
[Analyze grammar]

prasīda me mahādeva saṃsārārttasya khidyataḥ |
sarvapāpabhayaṃ hṛtvā rakṣa māṃ parameśvara || 64 ||
[Analyze grammar]

mahādāridryamagnasya mahāpāpahatasya ca |
mahāśokavinaṣṭasya mahārogāturasya ca || 65 ||
[Analyze grammar]

ṛṇabhāraparītasya dahyamānasya karmabhiḥ |
grahaiḥ prapīḍyamānasya prasīda mama śaṃkara || 66 ||
[Analyze grammar]

daridraḥ prārthayedevaṃ pūjāṃte girijāpatim |
arthāḍhyo vāpi rājā vā prārthayeddevamīśvaram || 67 ||
[Analyze grammar]

dīrghamāyuḥ sadārogyaṃ kośavṛddhirbalonnatiḥ |
mamāstu nityamānandaḥ prasādāttava śaṃkara || 68 ||
[Analyze grammar]

śatravaḥ saṃkṣayaṃ yāṃtu prasīdantu mama grahāḥ |
naśyantu dasyavo rāṣṭre janāḥ saṃtu nirāpadaḥ || 69 ||
[Analyze grammar]

durbhikṣamārīsaṃtāpāḥ śamaṃ yāṃtu mahītale |
sarvasasyasamṛddhiśca bhūyātsukhamayā diśaḥ || 70 ||
[Analyze grammar]

evamārādhayeddevaṃ pradoṣe girijāpatim |
brāhmaṇānbhojayetpaścāddakṣiṇābhiśca toṣayet || 71 ||
[Analyze grammar]

sarvapāpakṣayakarī sarvadāridryanāśinī |
śivapūjā mayā khyātā sarvābhīṣṭavarapradā || 72 ||
[Analyze grammar]

mahāpātakasaṃghātamadhikaṃ copapātakam |
śivadravyāpaharaṇādanyatsarvaṃ nivārayet || 73 ||
[Analyze grammar]

brahmahatyādipāpānāṃ purāṇeṣu smṛtiṣvapi |
prāyaścittāni dṛṣṭāni na śivadravyahāriṇām || 74 ||
[Analyze grammar]

bahunātra kimuktena ślokārdhena bravīmyaham |
brahmahatyāśataṃ vāpi śivapūjā vināśayet || 75 ||
[Analyze grammar]

mayā kathitametatte pradoṣe śivapūjanam |
rahasyaṃ sarvajaṃtūnāmatra nāstyeva saṃśayaḥ || 76 ||
[Analyze grammar]

etābhyāmapi bālābhyāmevaṃ pūjā vidhīyatām |
ataḥ saṃvatsarādeva parāṃ siddhimavāpsyatha || 77 ||
[Analyze grammar]

iti śāṃḍilyavacanamākarṇya dvijabhāminī |
tābhyāṃ tu saha bālābhyāṃ praṇanāma muneḥ padam || 78 ||
[Analyze grammar]

viprastryuvāca |
ahamadya kṛtārthāsmi tava darśanamātrataḥ |
etau kumārau bhagavaṃstvāmeva śaraṇaṃ gatau || 79 ||
[Analyze grammar]

eṣa me tanayo brahmañchucivrata itīritaḥ |
eṣa rājasuto nāmnā dharmaguptaḥ kṛto mayā || 80 ||
[Analyze grammar]

etāvahaṃ ca bhagavanbhavaccaraṇakiṃkarāḥ |
samuddharāsminpatitānghore dāridryasāgare || 81 ||
[Analyze grammar]

iti prapannāṃ śaraṇaṃ dvijāṃganāmāśvāsya vākyairamṛtopamānaiḥ |
upādideśātha tayoḥ kumārayormuniḥ śivārādhanamaṃtra vidyām || 82 ||
[Analyze grammar]

athopadiṣṭau muninā kumārau brāhmaṇī ca sā |
taṃ praṇamya samāmaṃtrya jagmuste śivamaṃdirāt || 83 ||
[Analyze grammar]

tataḥ prabhṛti tau bālau munivaryopadeśataḥ |
pradoṣe pārvatīśasya pūjāṃ cakraturaṃjasā || 84 ||
[Analyze grammar]

evaṃ pūjayatordevaṃ dvijarājakumārayoḥ |
sukhenaiva vyatīyāya tayormāsacatuṣṭayam || 85 ||
[Analyze grammar]

kadācidrājaputreṇa vināsau dvijanaṃdanaḥ |
snātuṃ gato nadītīre cacāra bahulīlayā || 86 ||
[Analyze grammar]

tatra nirjharanirghātanirbhinne vapra kuṭṭime |
nidhānakalaśaṃ sthūlaṃ prasphuraṃtaṃ dadarśa ha || 87 ||
[Analyze grammar]

taṃ dṛṣṭvā sahasāgatya harṣakautukavihvalaḥ |
daivopapannaṃ manvāno gṛhītvā śirasā yayau || 88 ||
[Analyze grammar]

sasaṃbhramaṃ samānīya nidhāya kalaśaṃ balāt |
nidhāya bhavanasyāṃte mātaraṃ samabhāṣata || 89 ||
[Analyze grammar]

mātarmātarimaṃ paśya prasādaṃ girijāpateḥ |
nidhānaṃ kumbharūpeṇa darśitaṃ karuṇātmanā || 90 ||
[Analyze grammar]

atha sā vismitā sādhvī samāhūya nṛpātmajam |
svaputraṃ pratinaṃdyāha mānayantī śivārcanam || 91 ||
[Analyze grammar]

śṛṇutāṃ me vacaḥ putrau nidhānakalaśīmimām |
samaṃ vibhajya gṛhṇītaṃ mama śāsanagauravāt || 92 ||
[Analyze grammar]

iti māturvacaḥ śrutvā tutoṣa dvija naṃdanaḥ |
pratyāha rājaputrastāṃ visrabdhaḥ śaṃkarārcane || 93 ||
[Analyze grammar]

mātastava sutasyaiva sukṛtena samāgatam |
nāhaṃ grahītumicchāmi vibhaktaṃ dhanasaṃca yam || 94 ||
[Analyze grammar]

ātmanaḥ sukṛtāllabdhaṃ svayameva bhunaktvasau |
sa eva bhagavānīśaḥ kariṣyati kṛpāṃ mayi || 95 ||
[Analyze grammar]

evamarcayatoḥ śaṃbhuṃ bhūyopi parayā mudā |
saṃvatsaro vyatīyāya tasminneva gṛhe tayoḥ || 96 ||
[Analyze grammar]

athaikadā rājasūnuḥ saha tena dvijanmanā |
vasaṃtasamaye prāpte vijahāra vanāṃ tare || 97 ||
[Analyze grammar]

atha dūraṃ gatau kvāpi vane dvijanṛpātmajau |
gandharvakanyāḥ krīḍaṃtī śataśastāvapaśyatām || 98 ||
[Analyze grammar]

tāḥ sarvāścārusarvāṃgyo viharaṃtyo manoharam |
dṛṣṭvā dvijātmajo dūrāduvāca nṛpanaṃdanam || 99 ||
[Analyze grammar]

itaḥ puro na gaṃtavyaṃ viharaṃtyagrataḥ striyaḥ |
strīsaṃnnidhānaṃ vibudhāstyajaṃti vimalāśayāḥ || 100 ||
[Analyze grammar]

etāḥ kaitavakāriṇyo dhanayauvanadurmadāḥ |
mohayantyo janaṃ dṛṣṭvā vācānunayakovidāḥ || 1 ||
[Analyze grammar]

ataḥ parityajettstrīṇāṃ sannidhiṃ sahabhāṣaṇam |
nija़dharmarato vidvanbrahmacārī viśeṣataḥ || 3 ||
[Analyze grammar]

atohaṃ notsahe gantuṃ krīḍāsthānaṃ mṛgīdṛśām |
ityuktvā dvijaputrastu nivṛtto dūrataḥ sthitaḥ || 3 ||
[Analyze grammar]

athāsau rājaputrastu kautukāviṣṭamānasaḥ |
tāsāṃ vihārapadavīmeka evābhayo yayau || 1 ||
[Analyze grammar]

tatra gaṃdharvakanyānāṃ madhye tvekā varānanā |
dṛṣṭvā'yāṃtaṃ rājaputraṃ ciṃtayāmāsa cetasā || 9 ||
[Analyze grammar]

aho koyamudārāṃgo yuvā sarvāṃgasundaraḥ |
mattamātaṃga gamano lāvaṇyāmṛtavāridhiḥ || 6 ||
[Analyze grammar]

līlālolaviśālākṣī madhurasmitapeśalaḥ |
madanopamarūpaśrīḥ sukumārāṃgalakṣaṇaḥ || 7 ||
[Analyze grammar]

ityāścaryayutā bālā dūrāddṛṣṭvā nṛpātmajam |
sarvāḥ sakhīḥ samālokya vacanaṃ cedamabravīt || 8 ||
[Analyze grammar]

ito vidūre he sakhyo vanamastyekamuttamam |
vicitracaṃpakāśokapunnāgabakulairyutam || 9 ||
[Analyze grammar]

tatra gatvā vanaṃ sarvāḥ saṃcīya kusumotkaram |
bhavatyaḥ punarāyāṃtu tāvattiṣṭhāmyahaṃ tviha || 110 ||
[Analyze grammar]

ityādiṣṭaḥ sakhīvargo jagāma vipināṃtaram |
sāpi gaṃdharvajā tasthau nyastadṛṣṭirnṛpātmaje || 11 ||
[Analyze grammar]

tāṃ samālokya tanvaṃgīṃ navayauvanaśālinīm |
bālāṃ svarūpasaṃpattyā paraiिbhūtatilottamām || 12 ||
[Analyze grammar]

rājaputraḥ samāgamya kautukotphullalocanaḥ |
avāpa daivayogena madanasya śaravyathām || 13 ||
[Analyze grammar]

gandharvatanayā sāpi prāptāya nṛpasūnave |
utthāya tarasā tasmai pradadau pallavāsanam || 14 ||
[Analyze grammar]

kṛtopacāramāsīnaṃ tamāsādya sumadhyamā |
papraccha tadrūpaguṇairdhvastadhairyākuleṃdriyā || 19 ||
[Analyze grammar]

kastvaṃ kamalapatrākṣa kasmāddeśādihāgataḥ |
kasya putra iti premṇā pṛṣṭaḥ sarvaṃ nyavedayat || 16 ||
[Analyze grammar]

vidarbha rājatanayaṃ vidhvastapitṛmātṛkam |
śatrubhiśca hṛtasthānamātmānaṃ pararāṣṭragam || 17 ||
[Analyze grammar]

sarvamāvedya bhūyastāṃ papraccha nṛpanaṃdanaḥ |
kā tvaṃ vāmoru kiṃ cātra kāryaṃ te kasya cātmajā || 18 ||
[Analyze grammar]

kimavadhyāyasi hṛdā kiṃ vā vaktumihecchasi |
ityuktā sā punaḥ prāha śṛṇu rājeṃdrasattama || 19 ||
[Analyze grammar]

astyeko dravikonāma gaṃdharvāṇāṃ kulāgraṇīḥ |
tasyāhamasmi tanayā nāmnā cāṃśumatī smṛtā || 120 ||
[Analyze grammar]

tvāmāyāṃtaṃ vilokyāhaṃ tvatsaṃbhāṣaṇa lālasā |
tyaktvā sakhījanaṃ sarvamekaivāsmi mahāmate || 21 ||
[Analyze grammar]

sarvasaṃgītavidyāsu na matto'nyāsti kācana |
mama yogena tuṣyaṃti sarvā api surastriyaḥ || 22 ||
[Analyze grammar]

sāhaṃ sarvakalābhijñā jñātasarvajaneṃgitā |
tavāhamīpsitaṃ vedmi mayi te saṃgataṃ manaḥ || 23 ||
[Analyze grammar]

tathā mamāpi cautsukyaṃ daivena pratipāditam |
āvayoḥ snehabhedo'tra nābhibhūyāditaḥ param || 24 ||
[Analyze grammar]

iti saṃbhāṣya tenāśu premṇā gandharvanaṃdinī |
muktāhāraṃ dadau tasmai svakucāṃtarabhūṣaṇam || 25 ||
[Analyze grammar]

tamādāyādbhutaṃ hāraṃ sa tasyāḥ praṇayākulaḥ |
gāḍhaharṣabharotsiktāmidamāha nṛpātmajaḥ || 26 ||
[Analyze grammar]

satyamuktaṃ tvayā bhīru tathāpyekaṃ vadāmyaham |
tyaktarājyasya niḥsvasya kathaṃ me bhavasi priyā || 27 ||
[Analyze grammar]

sā tvaṃ pitṛmatī bālā vilaṃghya pitṛśāsanam |
svacchaṃdā caraṇaṃ kartuṃ mūḍheva kathamarhasi || 28 ||
[Analyze grammar]

iti tasya vacaḥ śrutvā taṃ pratyāha śucismitā |
astu nāma tathaivāhaṃ kariṣye paśya kautukam || 29 ||
[Analyze grammar]

gaccha svabhavanaṃ kāṃta paraśvaḥ prātareva tu |
āgaccha punaratraiva kāryamasti ca no mṛṣā || 130 ||
[Analyze grammar]

ityuktvā taṃ nṛpasutaṃ sā saṃgatasakhījanā |
apākrāmata cārvaṃgī sa cāpi nṛpanandanaḥ || 31 ||
[Analyze grammar]

sa samabhyetya harṣeṇa dvijaputrasya sannidhim |
sarvamākhyāya tenaiva sārdhaṃ svabhavanaṃ yayau || 32 ||
[Analyze grammar]

tāṃ ca viprasatīṃ bhūyo harṣayitvā nṛpātmajaḥ |
paraśvo dvijaputreṇa sārdhaṃ tena vanaṃ yayau || 33 ||
[Analyze grammar]

sa tayā pūrvanirdiṣṭaṃ sthānaṃ prāpya nṛpātmajaḥ |
gandharvarājamadrākṣītsvaduhitrā samanvitam || 34 ||
[Analyze grammar]

sa gaṃdharvapatiḥ prāptāvabhinaṃdya kumārakau |
upaveśyāsane ramye rājaputramabhāṣata || 35 ||
[Analyze grammar]

gaṃdharva uvāca |
rājeṃdraputra pūrvedyuḥ kailāsaṃ gatavānaham |
tatrāpaśyaṃ mahādevaṃ pārvatyā sahitaṃ prabhum || 36 ||
[Analyze grammar]

āhūya māṃ sa deveśaḥ sarveṣāṃ tridivaukasām |
sannidhāvāha bhagavānkaruṇāmṛtavāridhiḥ || 37 ||
[Analyze grammar]

dharmaguptāhvayaḥ kaścidrājaputro'sti bhūtale |
akiñcano bhraṣṭarājyo hṛtadeśaśca śatrubhiḥ || 38 ||
[Analyze grammar]

sa bālo guruvākyena madarccāyāṃ rataḥ sadā |
adya tatpitaraḥ sarve māṃ prāptāstatprabhāvataḥ || 39 ||
[Analyze grammar]

tasya tvamapi sāhāyyaṃ kuru gandharvasattama |
athāsau nijarājyastho hataśatrurbhaviṣyati || 140 ||
[Analyze grammar]

ityājñapto maheśena saṃprāpto nijamadiram |
anayā madduhitrā ca bahuśo'bhyarthitastathā || 41 ||
[Analyze grammar]

jñātvemaṃ sakalaṃ śaṃbhorniyogaṃ karuṇātmanaḥ |
ādāyemāṃ duhitaraṃ prāpto'smīdaṃ vanāṃtaram || 42 ||
[Analyze grammar]

ata enāṃ prayacchāmi kanyāmaṃśumatīṃ tava |
hatvā śatrūnsvarāṣṭe tvāṃ sthāpayāmi śivājñayā || 43 ||
[Analyze grammar]

tasminpure tvamanayā bhuktvā bhogānyathepsitān |
daśavarṣasahasrānte gantāsi giriśālayam |
tatrāpi mama kanyeyaṃ tvāmeva pratipatsyate |
anenaiva svadehena divyena śivasannidhau || 45 ||
[Analyze grammar]

iti gandharvarājastamābhāṣya nṛpanandanam |
tasminvane svaduhituḥ pāṇigrahamakārayat || 46 ||
[Analyze grammar]

pāribarhamadāttasmai ratnabhārānmahojjvalān |
cūḍāmaṇiṃ candranibhaṃ muktāhārāṃśca bhāsurān || 47 ||
[Analyze grammar]

divyālaṃkāravāsāṃsi kārttasvaraparicchadān |
gajānāmayutaṃ bhūyo niyutaṃ nīlavājinām || 48 ||
[Analyze grammar]

syandanānāṃ sahasrāṇi sauvarṇāni mahāṃti ca |
punarekaṃ rathaṃ divyaṃ dhanuścendrāyudhopamam || 49 ||
[Analyze grammar]

astrāṇāṃ ca sahasrāṇi tūṇī cākṣayyasāyakau |
abhedyaṃ varma sauvarṇaṃ śaktiṃ ca ripumardinīm || 150 ||
[Analyze grammar]

duhituḥ paricaryārthaṃ dāsīpañcasahasrakam |
dadau prītamanāstasmai dhanāni vividhāni ca || 51 ||
[Analyze grammar]

gaṃdharvasainyamatyugraṃ caturaṃgasamamanvitam |
punaśca tatsahāyārthe gandharvādhipatirdadau || 52 ||
[Analyze grammar]

itthaṃ rājendratanayaḥ saṃprāptaḥ śriyamuttamām |
abhīṣṭajāyāsahito mumude nijasaṃpadā || 53 ||
[Analyze grammar]

kārayitvā svaduhiturvivāhaṃ samayocitam |
yayau vimānamāruhya gaṃdharvādhipatirdivam || 54 ||
[Analyze grammar]

dharmaguptaḥ kṛtodvāhaḥ saha gaṃdharvasenayā |
punaḥ svanagaraṃ prāpya jaghāna ripuvāhinīm || 55 ||
[Analyze grammar]

durdharṣaṇaṃ raṇe hatvā śaktyā gaṃdharvasenayā |
niḥ śeṣitārātibalaḥ praviveśa nijaṃ puram || 56 ||
[Analyze grammar]

tatobhiṣiktaḥ sacivairbrāhmaṇaiśca mahottamaiḥ |
ratnasiṃhāsanārūḍhaścakre rājyamakaṇṭakam || 57 ||
[Analyze grammar]

yā vipravanitā pūrvaṃ tamapuṣṇātsvaputravat |
saiva mātābhavattasya sa bhrātā dvijanandanaḥ || 58 ||
[Analyze grammar]

gaṃdharvatanayā jāyā vidarbhanagareśvaraḥ |
ārādhya devaṃ giriśaṃ dharmagupto nṛpo'bhavat || 59 ||
[Analyze grammar]

evamanye samārādhya pradoṣe girijāpatim |
labhaṃtebhīpsitānkāmāndehāṃte tu parāṃ gatim || 160 ||
[Analyze grammar]

sūta uvāca |
etanmahāvrataṃ puṇyaṃ pradoṣe śaṃkarārcanam |
dharmārthakāmamokṣāṇāṃ yadetatsādhanaṃ param || 61 ||
[Analyze grammar]

ya etacchṛṇuyātpuṇyaṃ māhātmyaṃ paramādbhutam |
pradoṣe śivapūjāṃte kathayedvā samāhitaḥ || 62 ||
[Analyze grammar]

bhavenna tasya dāridryaṃ janmāntaraśateṣvapi |
jñānaiśvaryasamāyuktaḥ sonte śivapuraṃ vrajet || 63 ||
[Analyze grammar]

ye prāpya durlabhataraṃ manujāḥ śarīraṃ kurvaṃti haṃta parameśvarapādapūjām |
dhanyāsta eva nijapuṇyajitatrilokāsteṣāṃ padāṃbujarajo bhuvanaṃ punāti || 164 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ tṛtīye brahmottarakhaṇḍe pradoṣamahimāvarṇanaṃ nāma saptamo 'dhyāyaḥ || 7 ||
[Analyze grammar]