Chapter 3

[English text for this chapter is available]

rājovāca |
kiṃ dṛṣṭaṃ bhavatā brahmannāścaryaṃ pathi kutra vā |
tanmamākhyāhi yenāhaṃ kṛtakṛtyatvamāpnuyām || 1 ||
[Analyze grammar]

gautama uvāca |
gokarṇādahamāgacchankvāpi deśe viśāṃpate |
jāte madhyāhnasamaye labdha vānvimalaṃ saraḥ || 2 ||
[Analyze grammar]

tatropaspṛśya salilaṃ vinīya ca pathiśramam |
susnigdhaśītalacchāyaṃ nyagrodhaṃ samupāśrayam || 3 ||
[Analyze grammar]

athāvidūre cāṃḍālīṃ vṛddhāmaṃdhāṃ kṛśākṛtim |
śuṣyanmukhīṃ nirāhārāṃ bahuroganipīḍitām || 4 ||
[Analyze grammar]

kuṣṭhavraṇaparītāṃgīmudyatkṛmikulākulām |
pūyaśoṇitasaṃsaktajaratpaṭala satkaṭīm || 5 ||
[Analyze grammar]

mahāyakṣmagalasthena kaṃṭhasaṃrodhavihvalām |
vinaṣṭadaṃtāmavyaktāṃ viluṭhaṃtīṃ muhurmuhuḥ || 6 ||
[Analyze grammar]

caṃḍārkakiraṇaspṛṣṭakharoṣṇarajasāplutām |
viṇmūtrapūyadigdhāṃgīmasṛggaṃdhadurāsadām || 7 ||
[Analyze grammar]

kapharogabahuśvāsaślathannāḍībahuvyathām |
vidhvastakeśāvayavāmapaśyaṃ maraṇonmukhīm || 8 ||
[Analyze grammar]

tādṛgvyathāṃ ca tāṃ vīkṣya kṛpayāhaṃ pariplutaḥ |
pratīkṣanmaraṇaṃ tasyāḥ kṣaṇaṃ tatraiva saṃsthitaḥ || 9 ||
[Analyze grammar]

athāṃtarikṣapadavīṃ siṃcaṃtamiva raśmibhiḥ |
divyaṃ vimānamānītamadrākṣaṃ śivakiṃkaraiḥ || 10 ||
[Analyze grammar]

tasminravīṃduvahnīnāṃ tejasāmiva paṃjare |
vimāne sūryasaṃkāśānapaśyaṃ śivakiṃkarān || 11 ||
[Analyze grammar]

te vai triśūlakhaṭvāṃgaṭaṃkacarmāsipāṇayaḥ |
caṃdrārdhabhūṣaṇāḥ sāṃdracaṃdrakuṃdoruvarcasaḥ || 12 ||
[Analyze grammar]

kirīṭakuṃḍalabhrājanmahāhivalayojjvalāḥ |
śivānugā mayā dṛṣṭā ścatvāraḥ śubhalakṣaṇāḥ || 13 ||
[Analyze grammar]

tānāpatata ālokya vimānasthānsuvismitaḥ |
upasṛtyāṃtike vegādapṛcchaṃ gagane sthitān || 14 ||
[Analyze grammar]

namonamo vastridaśottamebhyastrilocanaśrīcaraṇānugebhyaḥ |
trilokarakṣāvidhimāvahadbhyastriśūlacarmāsigadādharebhyaḥ || 15 ||
[Analyze grammar]

viditā hi mayā yūyaṃ maheśvarapadā nugāḥ |
iyaṃ vo lokarakṣārthā gatirāho vinodajā || 6 ||
[Analyze grammar]

uta sarvajanāghaughavijayāya kṛtodyamāḥ |
brūta kāruṇyato mahyaṃ yasmādyūyamihāgatāḥ || 17 ||
[Analyze grammar]

śivadūtā ūcuḥ |
eṣāgre dṛśyate vṛddhā cāṃḍālī maraṇonmukhī |
etāmānetumāyātāḥ saṃdiṣṭā prabhuṇā vayam || 18 ||
[Analyze grammar]

ityukte śivadūtaistairapṛcchaṃ punarapyaham |
vismayāviṣṭacittastānkṛtāṃjaliravasthitaḥ || 19 ||
[Analyze grammar]

aho pāpīyasī ghorā cāṃḍālī kathamarhati |
divyaṃ vimānamāroḍhuṃ śunīvādhvaramaṃḍalam || 20 ||
[Analyze grammar]

ājanmato'śuciprāyā pāpāṃ pāpā nugāminīm |
kathamenāṃ durācārāṃ śivalokaṃ ninīṣatha || 21 ||
[Analyze grammar]

asyā nāsti śivajñānaṃ nāsti ghorataraṃ tapaḥ |
satyaṃ nāsti dayā nāsti kathamenāṃ ninīṣatha || 22 ||
[Analyze grammar]

paśumāṃsakṛtāhārā vāruṇīpūritodarām |
jīvahiṃsāratāṃ nityaṃ kathamenāṃ ninīṣatha || 23 ||
[Analyze grammar]

na ca paṃcākṣarī japtā na kṛtaṃ śivapūjanam |
na dhyāto bhagavāñchaṃbhuḥ kathamenāṃ ninīṣatha || 24 ||
[Analyze grammar]

nopoṣitā śivatithirna kṛtaṃ śivapūjanam |
bhūtasauhṛdaṃ na jānāti na ca bilvaśivārpaṇam |
neṣṭāpūrtādikaṃ vāpi kathamenāṃ ninīṣatha || 25 ||
[Analyze grammar]

na ca snātāni tīrthāni na dānāni kṛtāni ca |
na ca vratāni cīrṇāni kathamenāṃ ninīṣatha || 26 ||
[Analyze grammar]

īkṣaṇe pariharttavyā kimu saṃbhāṣaṇādiṣu |
satsaṃgarahitāṃ caṃḍāṃ kathamenāṃ ninīṣatha || 27 ||
[Analyze grammar]

janmāṃtarārjitaṃ kiṃcidasyāḥ sukṛtamasti vā |
tatkathaṃ kuṣṭharogaṇa kṛmibhiḥ paribhūyate || 28 ||
[Analyze grammar]

aho īśvaracaryeyaṃ durvibhāvyā śarīriṇām |
pāpātmāno'pi nīyaṃte kāruṇyātparamaṃ padam || 29 ||
[Analyze grammar]

ityuktāste mayā dūtā devadevasya śūlinaḥ |
pratyūcurmāmatha prītyā sarvasaṃśayabhedinaḥ || 30 ||
[Analyze grammar]

śivadūtā ūcuḥ |
brahmansumahadāścaryaṃ śṛṇu kautūhalaṃ yadi |
imāmuddiśya cāṃḍālīṃ yaduktaṃ bhavatādhunā || 31 ||
[Analyze grammar]

āsīdiyaṃ pūrvabhave kācidbrāhmaṇakanyakā |
sumitrānāma saṃpūrṇasomabimbasamānanā || 32 ||
[Analyze grammar]

utphullamallikādāmasukumārāṃgalakṣaṇā |
kaikeyadvijamukhyasya kasyacittanayā satī || 33 ||
[Analyze grammar]

tāṃ sarvalakṣaṇopetāṃ ratermūrtimivāparām |
varddhamānāṃ piturgehe vīkṣyāsanvismitā janāḥ || 34 ||
[Analyze grammar]

dinedine vardhamānā baṃdhubhirlālitā bhṛśam |
sā śanairyauvanaṃ bheje smarasyeva mahādhanuḥ || 35 ||
[Analyze grammar]

atha sā baṃdhuvargaiśca sametena kumārikā |
pitrā pradattā kasmaicidvidhinā dvijasūnave || 36 ||
[Analyze grammar]

sā bharttāramanuprāpya navayauvanaśālinī |
kaṃcitkālaṃ śubhācārā reme baṃdhubhirāvṛtā || 37 ||
[Analyze grammar]

atha kālavaśāttasyāḥ patistīvra rujārditaḥ |
rūpayauvanakāṃtopi paṃcatvamagamanmune || 38 ||
[Analyze grammar]

mṛte bharttari duḥkhena vidagdhahadayā satī |
uvāsa katicinmāsānsuśīlā vijiteṃ driyā || 39 ||
[Analyze grammar]

atha yauvanabhāreṇa jṛṃbhamāṇena nityaśaḥ |
babhūva hṛdayaṃ tasyāḥ kaṃdaparparikaṃpitam || 40 ||
[Analyze grammar]

sā guptā bandhuvargeṇa śāsitāpi mahottamaiḥ |
na śaśāka mano roddhaṃ madanākṛṣṭamaṃganā || 41 ||
[Analyze grammar]

sā tīvramanmathāviṣṭā rūpayauvanaśālinī |
vidhavāpi viśeṣeṇa jāramārgaratābhavat || 42 ||
[Analyze grammar]

na jñātā kenacidapi jāriṇīti vicakṣaṇā |
jugūhātmadurācāraṃ kaṃcitkālamasattamā || 43 ||
[Analyze grammar]

tāṃ dohadasamākrāṃtāṃ ghananīlamukhastanīm |
kālena baṃdhuvargopi bubodha viṭadūṣitām || 44 ||
[Analyze grammar]

iti bhīto mahākleśācciṃtā lebhe duratyayām |
striyaḥ kāmena naśyaṃti brāhmaṇā hīnasevayā || 45 ||
[Analyze grammar]

rājāno brahmadaṃḍena yatayo bhogasaṃgrahāt |
līḍhaṃ śunā tathaivānnaṃ surayā vārpitaṃ payaḥ || 46 ||
[Analyze grammar]

rūpaṃ kuṣṭharujāviṣṭaṃ kulaṃ naśyati kustriyā |
iti sarve samālocya sametāḥ patisodarāḥ || 47 ||
[Analyze grammar]

tatyajurgotrato dūraṃ gṛhītvā sakacagraham |
saghaṭotsargamutsṛṣṭā sā nārī sarvabandhubhiḥ || 48 ||
[Analyze grammar]

vicaraṃtī ca śūdreṇa ramamāṇā ratipriyā |
sā yayau strī bahiryāmā dṛṣṭā śūdreṇa kenacit || 49 ||
[Analyze grammar]

sa tāṃ dṛṣṭvā varārohāṃ pīnonnatapayodharām |
gṛhaṃ nināya sāmnā ca vidhavāṃ śūdranāyakaḥ |
sā nārī tasya mahiṣī bhūtvā tena divāniśam || 50 ||
[Analyze grammar]

ramamāṇā kvaciddeśe nyavasadgṛhavallabhā |
tatra sā piśitāhārā nityamāpītavāruṇī || 51 ||
[Analyze grammar]

lebhe sutaṃ ca śūdreṇa ramamāṇā ratipriyā |
kadācidbharttari kvāpi yāte pītasurā tu sā || 52 ||
[Analyze grammar]

iyeṣa piśitāhāraṃ madirāmadavihvalā |
atha meṣeṣu baddheṣu gobhiḥ saha bahirvraje || 53 ||
[Analyze grammar]

yayau kṛpāṇamādāya sā tamīṃdhe niśāmukhe |
avimṛśya madāveśānmeṣabuddhyāmiṣapriyā || 54 ||
[Analyze grammar]

ekaṃ jaghānaṃ govatsaṃ krośaṃtaṃ niśi durbhagā |
nihataṃ gṛhamānīya jñātvā govatsamaṃganā || 55 ||
[Analyze grammar]

bhītā śivaśivetyāha kenacitpuṇyakarmaṇā |
sā muhūrtamiti dhyātvā piśitāsavalālasā || 56 ||
[Analyze grammar]

chittvā tameva govatsaṃ cakārāhāramīpsitam |
govatsārdhaśarīreṇa kṛtāhārātha sā punaḥ || 57 ||
[Analyze grammar]

tadardhadehaṃ nikṣipya bahiścukrośa kaitavāt |
aho vyāghreṇa bhagno'yaṃ jagdho govatsako vraje || 58 ||
[Analyze grammar]

iti tasyāḥ samākraṃdaḥ sarvageheṣu śuśruve |
atha sarve śūdrajanāḥ samāgamyāṃtike sthitāḥ || 59 ||
[Analyze grammar]

hataṃ govatsamālokya vyāghreṇeti śucaṃ yayuḥ |
gateṣu teṣu sarveṣu vyuṣṭāyāṃ ca tato niśi || 60 ||
[Analyze grammar]

tadbhartā gṛhamāgatya dṛṣṭavāngṛhaviḍvaram |
evaṃ bahutithe kāle gate sā śūdvavallabhā || 61 ||
[Analyze grammar]

kālasya vaśamāpannā jagāma yamamaṃdiram |
yamopi dharmamālokya tasyāḥ karma ca paurvikam || 62 ||
[Analyze grammar]

nirvatrya nirayāvāsāñcakre caṃḍālajātikām |
sāpi bhraṣṭā yamapurāccāṃḍālīgarbhamāśritā || 63 ||
[Analyze grammar]

tato babhūva jātyaṃdhā praśāṃtāṃgāramecakā |
tatpitā kopi cāṃḍālo deśe kutracidāsthitaḥ || 64 ||
[Analyze grammar]

tāṃ tādṛśīmapi sutāṃ kṛpayā paryapoṣayat |
abhojyena kadannena śunā līḍhena pūtinā || 65 ||
[Analyze grammar]

apeyaiśca rasairmātrā poṣitā sā dinedine |
jātyaṃdhā sāpi kālena bālye kuṣṭharujārditā || 66 ||
[Analyze grammar]

ūḍhā na kenacidvāpi cāṃḍālenātidurbhagā |
atītabālye sā kāle vidhvastapitṛmātṛkā || 67 ||
[Analyze grammar]

durbhageti parityaktā baṃdhubhiśca sahodaraiḥ |
tataḥ kṣudhārditā dīnā śocantī vigatekṣaṇā || 68 ||
[Analyze grammar]

gṛhītayaṣṭiḥ kṛcchreṇa saṃcacāla saloṣṭikā |
pattaneṣvapi sarveṣu yācamānā dinedine || 69 ||
[Analyze grammar]

cāṃḍālocchiṣṭapiṃḍena jaṭharāgnimatarpayat |
evaṃ kṛcchreṇa mahatā nītvā subahulaṃ vayaḥ || 70 ||
[Analyze grammar]

jarayā grastasarvāṃgī duḥkhamāpa duratyayam |
nirannapānavasanā sā kadācinmahājanān || 71 ||
[Analyze grammar]

āyāsyaṃtyāṃ śivatithau gacchato bubudhe'dhvagān |
tasyāṃ tu devayātrāyāṃ deśadeśāṃtayāyinām || 72 ||
[Analyze grammar]

viprāṇāṃ sāgnihotrāṇāṃ sastrīkāṇāṃ mahātmanām |
rājñāṃ ca sāvarodhānāṃ sahastirathavājinām || 73 ||
[Analyze grammar]

saparīvāraghoṣāṇāṃ yānacchatrādiśobhinām |
tathānyeṣāṃ ca viṭśūdrasaṃkīrṇānāṃ sahasraśaḥ || 74 ||
[Analyze grammar]

hasatāṃ gāyatāṃ kvāpi nṛtyatāmatha dhāvatām |
jighratāṃ pibatāṃ kāmādgacchatāṃ pratigarjatām || 75 ||
[Analyze grammar]

saṃprayāṇe manuṣyāṇāṃ saṃbhramaḥ sumahānabhūt |
iti sarveṣu gacchatsu gokarṇaṃ śivamaṃdiram || 76 ||
[Analyze grammar]

paśyaṃti divijāḥ sarve vimānasthāḥ sakautukāḥ |
atheyamapi cāṃḍālī vasanāśanatṛṣṇayā || 77 ||
[Analyze grammar]

mahājanānyācayituṃ cacāla ca śanaiḥśanaiḥ |
karāvalaṃbenānyasyāḥ prāgjanmārjitakarmaṇā |
dinaiḥ katipayairyātī gokarṇaṃ kṣetramāyayau || 78 ||
[Analyze grammar]

tato vidūre mārgasya niṣaṇṇā vivṛtāṃjaliḥ |
yācamānā muhuḥ pāṃthānbabhāṣe kṛpaṇaṃ vacaḥ || 79 ||
[Analyze grammar]

prāgjanmārjitapāpaughaiḥ pīḍitāyāściraṃ mama |
āhāramātradānena dayāṃ kuruta bho janāḥ || 80 ||
[Analyze grammar]

trātāraḥ paramārtānāṃ dātāraḥ paramāśiṣām |
kartāro bahupuṇyānāṃ dayāṃ kuruta bho janāḥ || ra || 1 ||
[Analyze grammar]

vasanāśanahīnāyāṃ svapitāyāṃ mahītale |
mahāpāṃsunimagnāyāṃ dayāṃ kuruta bho janāḥ || 82 ||
[Analyze grammar]

mahāśītātapārttāyāṃ pīḍitāyāṃ mahārujā |
andhāyāṃ mayi vṛddhāyāṃ dayāṃ kuruta bho janāḥ || 83 ||
[Analyze grammar]

ciropavāsadīptāyāṃ jaṭharāgnivivardhanaiḥ |
saṃdahyamānasarvāṃgyāṃ dayāṃ kuruta bho janāḥ || 84 ||
[Analyze grammar]

anupārjitapuṇyāyāṃ janmāṃtaraśateṣvapi |
pāpāyāṃ maṃdabhāgyāyāṃ dayāṃ kuruta bho janāḥ || 85 ||
[Analyze grammar]

evamabhyarthayaṃtyāstu cāṃḍālyāḥ prasṛteṃ'jalau |
ekaḥ puṇyatamaḥ pāṃthaḥ prākṣipadbilvamaṃjarīm || 86 ||
[Analyze grammar]

tāmaṃcalau nipatitāṃ sā vimṛśya punaḥ punaḥ |
abhakṣyetyeva matvātha dūre prākṣipadāturā || 87 ||
[Analyze grammar]

tasyāḥ kareṇa nirmuktā rātrau sā bilvamaṃjarī |
papāta kasyaciddiṣṭyā śivaliṃgasya mastake || 88 ||
[Analyze grammar]

saivaṃ śivacaturdaśyāṃ rātrau pāṃthajanānmuhuḥ |
yācamānāpi yatkiṃcinna lebhe daivayogataḥ || 89 ||
[Analyze grammar]

tatroṣitānayā rātrirbhadrakālyāstu pṛṣṭhataḥ |
kiṃciduttarataḥ sthānaṃ tadardhenātidūrataḥ || 90 ||
[Analyze grammar]

tataḥ prabhāte bhraṣṭāśā śokena mahatāplutā |
śanairnivavṛte dīnā svadeśāyaiva kevalā || 91 ||
[Analyze grammar]

śrāṃtā ciropavāsena nipatantī padepade |
kraṃdaṃtī vahurogārtā vepamānā bhṛśāturā || 92 ||
[Analyze grammar]

dahyamānārkatāpena nagnadehā sayaṣṭikā |
atītyaitāvatīṃ bhūmiṃ nipapāta vicetanā || 93 ||
[Analyze grammar]

atha viśveśvaraḥ śaṃbhuḥ karuṇāmṛtavāridhiḥ |
enāmānayatettyasmānyuyuje savimānakān || 94 ||
[Analyze grammar]

eṣā pravṛttiścāṃḍālyāstaveha parikīrttitā |
tathā saṃdarśitā śaṃbhoḥ kṛpaṇeṣu kṛpālutā |
karmaṇaḥ paripākotthāṃ gatiṃ paśya mahāmate |
adhamāpi paraṃ sthānamārohati nirāmayam || 96 ||
[Analyze grammar]

yadetayā pūrvabhave nānnadānādikaṃ kṛtam |
kṣutpipāsādibhiḥ kleśaistasmādiha nipīḍyate || 97 ||
[Analyze grammar]

yadeṣā madavegāṃdhā cakre pāpaṃ maholbaṇam |
karmaṇā tena jātyaṃdhā babhūvātraiva janmani || 98 ||
[Analyze grammar]

api vijñāya govatsaṃ yadeṣā'bhakṣayatpurā |
karmaṇā tena cāṃḍālī babhūveha vigarhitā || 99 ||
[Analyze grammar]

yadeṣāryapathaṃ hitvā jāramārgaratā purā |
tena pāpena kenāpi durvṛttā durbhagāpi vā || 100 ||
[Analyze grammar]

yadāśliṣya madāviṣṭā jāreṇa vidhavā purā |
tena pāpena mahatā bahukuṣṭhavraṇānvitā || 101 ||
[Analyze grammar]

kāmārttā yadiyaṃ svairaṃ śūdreṇa ramitā purā |
mahāsṛkpūyakṛmibhiḥ pīḍyate tena pāpmanā || 2 ||
[Analyze grammar]

suvratāni na cīrṇāni neṣṭāpūtārdikaṃ kṛtam |
sarvabhogavihīneyaṃ dūyate tena pāpmanā || 3 ||
[Analyze grammar]

yadetayā pūrvabhave surā pītā vimūḍhayā |
mahāyakṣmārtihṛcchūlaiḥ pīḍyate tena pāpmanā || 4 ||
[Analyze grammar]

atraiva sarvamartyeṣu pāpacihnāni kṛtsnaśaḥ |
lakṣyate muniśārdūla savivekairmahātmabhiḥ || 5 ||
[Analyze grammar]

atra ye bahurogārttā ye putradhanavarjitāḥ || 6 ||
[Analyze grammar]

ye ca durlakṣaṇakliṣṭā yācakā vigatahriyaḥ |
vāsonnapānaśayanabhūṣaṇābhyaṃjanādibhiḥ || 7 ||
[Analyze grammar]

hīnā virūpā nirvidyā vikalāṃgāḥ kubhojanāḥ |
ye durbhāgyā niṃditāśca ye cānye parasevakāḥ || 8 ||
[Analyze grammar]

ete pūrvabhave sarve sumahatpāpakāriṇaḥ |
evaṃ vimṛśya yatnena dṛṣṭvā lokajanasthitim || 9 ||
[Analyze grammar]

budho na kurute pāpaṃ yadi kuryātsa ātmahā |
deho'yaṃ mānuṣo jaṃtorbahukarmaikabhājanam || 110 ||
[Analyze grammar]

sadā satkarma seveta duṣkarma satataṃ tyajet |
puṇyaṃ sukhārthī kurvīta duḥkhārthī pāpamācaret || 11 ||
[Analyze grammar]

dvayorekatare loke gṛhīte kuśalo janaḥ |
imaṃ mānuṣamāśritya dehaṃ paramadurlabham || 12 ||
[Analyze grammar]

ya ātmahitavānkaściddevamekaṃ samāśrayet |
atha pāpāni sarvāṇi kurvannapi sadā naraḥ || 13 ||
[Analyze grammar]

śivamekamatirdhyāyetsa saṃtarati pātakam |
mṛtā pūrvabhave tveṣā yadā prāptā yamālaye || 14 ||
[Analyze grammar]

tadā vitarkaḥ sumahānāsīdyamasabhāsadām |
yadyapi brāhmaṇī tveṣā satkulācāradūṣitā || 15 ||
[Analyze grammar]

ato'smābhirihānītā nirayaṃ yātu vā na vā |
anayā sādhito bālye puṇyaleśo'sti vā na vā || 16 ||
[Analyze grammar]

athāpi suvimṛśyaivaṃ dhāryo daṃḍo'tra nānyathā |
bahujanmasahasreṣu kṛtapuṇyavipākataḥ || 17 ||
[Analyze grammar]

nṛṇāṃ brahmakule janma labhyate hi kathaṃcana |
atosyāḥ pūrvapūrveṣu kṛtāghaṃ nāsti janmasu || 18 ||
[Analyze grammar]

anyathā satkule janma kathameṣā prapadyate |
atraiva janmanyanayā kṛtamaṃho duratyayam || 19 ||
[Analyze grammar]

athāpi narakāvāsaṃ prāyaśo neyamarhati |
kiṃtu govatsakaṃ hatvā vimṛśyāgatasādhvasā || 120 ||
[Analyze grammar]

eṣā śivaśivetyāha prāgjanmārjitakarmaṇā |
yadeṣā pāpavicchittyai sakṛdapyurumaṃgalam || 21 ||
[Analyze grammar]

śivanāma vadedbhaktyā tarhi gacchetparaṃ padam |
ekajanmakṛtasyāsya dāruṇasyāpi yatphalam || 22 ||
[Analyze grammar]

krameṇānubhavatveṣā bhūtvā cāṃḍālajātikā |
asmādanyatamaḥ ko vā narako'sti nṛṇā miha || 23 ||
[Analyze grammar]

anekakleśasaṃghātairyanmuhuḥ paripīḍanam |
duṣkule janma dāridryaṃ mahāvyādhirvimūḍhatā || 24 ||
[Analyze grammar]

ekaika eva narakaḥ sarve vā cātha kiṃ punaḥ |
prāgjanmapuṇyabhāreṇa yannāma vivaśā'bravīt || 25 ||
[Analyze grammar]

tenaiṣānyabhave bhūri puṇyamaṃte kariṣyati |
tena puṇyena mahatā nistīryāghaughayā tanāḥ || 26 ||
[Analyze grammar]

nītā tatpuruṣairaṃte prayāsyati paraṃ padam |
etādṛśānāṃ martyānāṃ śāstāro na vayaṃ kvacit |
vicārya svayameveśo yadyuktaṃ tatkarotu saḥ || 27 ||
[Analyze grammar]

evaṃ vaivasvatapure sarvairyamapurogamaiḥ |
vimṛśya citraguptādyairiyaṃ muktā'patadbhuvi || 28 ||
[Analyze grammar]

ādau yadeṣā śivanāma nārī pramādato vāpya satī jagāda |
teneha bhūyaḥ sukṛtena śaṃbhorbilvāṃkurārādhanapuṇyamāpa || 29 ||
[Analyze grammar]

śrīgokarṇe śivatithāvupoṣya śivamastake |
kṛtvā jāgaraṇaṃ hyeṣā cakre bilvārpaṇaṃ niśi || 130 ||
[Analyze grammar]

akāmataḥ kṛtasyāsya puṇyasyaiva ca yatphalam |
adyaiva bhokṣyate seyaṃ paśyatastava no mṛṣā || 31 ||
[Analyze grammar]

gautama uvāca |
ityuktvā śivadūtāste tasyāścāṃḍālayonitaḥ |
jīvaleśaṃ samākṛṣya yuyujurdivyatejasā || 32 ||
[Analyze grammar]

tāṃ divyadehasaṃkrāṃtāṃ tejorāśisamujjvalām |
vimāne sthāpayāmāsuḥ prītāste śivakiṃkarāḥ || 33 ||
[Analyze grammar]

atha sā paramodārarūpalāvaṇyaśālinī |
divyabhūṣaṇadīptāṃgī divyāṃbaravidhāriṇī || 34 ||
[Analyze grammar]

dehena divyagaṃdhena divyatejovikāśinā |
divyamālyāvataṃsena virarāja vimānagā || 35 ||
[Analyze grammar]

ratnacchatrapatākādyairgītavāditranisvanaiḥ |
madhye sā śivadūtānāṃ modamānā varānanā || 36 ||
[Analyze grammar]

anubhūtāni janmāni smṛtvāsmṛtvā punaḥpunaḥ |
bhītā trastā dṛḍhā ścaryaṃ dṛṣṭvā svapnamivotthitā || 37 ||
[Analyze grammar]

kāhaṃ ke'mī mahāsiddhāḥ koyaṃ loko manoramaḥ |
kva gataṃ me vapuḥ kaṣṭaṃ caṃḍacāṃḍālagotrajam || 38 ||
[Analyze grammar]

aho sumahadāścaryaṃ dṛṣṭaṃ māyāvilāsajam |
yanme bhavasahasreṣu bhrātaṃbhrāṃtaṃ punaḥpunaḥ || 39 ||
[Analyze grammar]

aho īśvarapūjāyā māhātmyaṃ vismayāvaham |
patramātreṇa saṃtuṣṭo yo dadāti nijaṃ padam || 140 ||
[Analyze grammar]

iti tāṃ jātanirvedāṃ smarantīṃ bhagavatpadam |
divyaṃ vimānamāropya te maheśvarakiṃkarāḥ || 41 ||
[Analyze grammar]

ālokayatsu sarveṣu lokeśeṣu savismayam |
āmaṃtrya tāmathāninyuḥ parameśvarasannidhim || 42 ||
[Analyze grammar]

rājansumahadāścaryamākhyātaṃ girijā pateḥ |
māhātmyaṃ bhaktileśasya sarvāghaughavināśanam || 43 ||
[Analyze grammar]

rājovāca |
bhagavanparameśasya kīdṛśo loka uttamaḥ |
tasya me lakṣaṇaṃ brūhi yadyasti mayi te dayā || 44 ||
[Analyze grammar]

gautama uvāca |
brahmādisuranāthānāṃ lokeṣvapi sudurlabhaḥ |
ya ānaṃdaḥ sadā yatra sa lokaḥ pārameśvaraḥ || 45 ||
[Analyze grammar]

sarvātigamanaṃ yatra jyotiryatra pratiṣṭhitam |
kvāpi nāsti tamoyogaḥ sa lokaḥ pārameśvaraḥ || 46 ||
[Analyze grammar]

guṇavṛtti vinistīrya saṃprāptā yatra yoginaḥ |
na pateyuḥ punaḥ sarve sa lokaḥ pārameśvaraḥ || 47 ||
[Analyze grammar]

yatra vāsaṃ na kurvaṃti krodhalobhamadādayaḥ |
yatrāvasthā na janmādyāḥ sa lokaḥ pārameśvaraḥ || 48 ||
[Analyze grammar]

sarveṣāṃ nigamānāṃ ca yadekaṃ kṣetramucyate |
yasmānnāsti paraṃ vittaṃ tatpadaṃ pārameśvaram || 49 ||
[Analyze grammar]

pratyāhārāsana dhyānaprāṇasaṃyamanādibhiḥ |
yatra yogapathaiḥ prāptuṃ yatate yoginaḥ sadā || 150 ||
[Analyze grammar]

yatra devaḥ sadānaṃdanirmalajñānarūpayā |
asti devyā saha krīḍañsa lokaḥ pārameśvaraḥ || 51 ||
[Analyze grammar]

janmānekasahasreṣu saṃbhṛtaiḥ puṇyarāśibhiḥ |
ārūḍhāḥ puruṣā nāryaḥ krīḍante yatra saṃgatāḥ || 52 ||
[Analyze grammar]

tejo rāśau samālīnā durvibhāvye manorame |
ahorātrādisaṃsthānaṃ na viṃdaṃti kadācana || 53 ||
[Analyze grammar]

sa lokaḥ parameśasya durlabho hi kuyoginaḥ |
etadbhakti supūrṇā ye taireva pratipadyate || 54 ||
[Analyze grammar]

ye tatkathāśravaṇakīrtanajātaharṣā ye sarvabhūtasuhṛdaḥ praśamaikaniṣṭhāḥ |
saṃsāracakramativāhya nirastamohāste śāṃkaraṃ padamavāpya sukhaṃ ramante || 55 ||
[Analyze grammar]

tathā tvamapi rājeṃdra gokarṇaṃ giriśālayam |
gatvā praśamitāghaughaḥ kṛtakṛtyatvamāpnuhi || 56 ||
[Analyze grammar]

tatra sarveṣu kāleṣu snātvābhyarcya mahābalam |
kṛtvā śivacaturdaśyāmupavāsaṃ samāhitaḥ || 57 ||
[Analyze grammar]

kṛtvā jāgaraṇaṃ rātrau bilvairabhyarcya śaṃkaram |
sarvapāpavinirmuktaḥ śivalokamavāpsyasi || 58 ||
[Analyze grammar]

eṣa te vimalo rājannupadeśo mayā kṛtaḥ |
svasti te'stu gamiṣyāmi mithilādhipateḥ purīm || 59 ||
[Analyze grammar]

ityāmantrya muniḥ prītyā gautamo mithilāṃ yayau |
so'pi hṛṣṭamanā rājā gokarṇaṃ pratyapadyata || 160 ||
[Analyze grammar]

tatra dṛṣṭvā mahādevaṃ snātvābhyarcya mahābalam |
nirdhūtāśeṣapāpaugho lebhe śambhoḥ paraṃ padam || 61 ||
[Analyze grammar]

ya imāṃ śṛṇuyānnityaṃ kathāṃ śaivīṃ manoharām |
śrāvayedvā jano bhaktyā sa yāti paramāṃ gatim || 62 ||
[Analyze grammar]

śraddadhānaḥ sakṛdvāpi ya imāṃ śṛṇuyātkathām |
triḥsaptakulajaiḥ sārdhaṃ śivalokamavāpnuyāt || 63 ||
[Analyze grammar]

iti kathitamaśeṣaṃ śreyasāmādibījaṃ bhavaśataduritaghnaṃ dhvastamohāṃdhakāram |
caritamamarageyaṃ manmathārerudāraṃ satatamapi niṣevyaṃ svastimadbhiśca lokaiḥ || 164 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ tṛtīye brahmottarakhaṇḍe śivacaturdaśīgokarṇamāhātmyavarṇanaṃnāma tṛtīyo'dhyāyaḥ || 3 ||
[Analyze grammar]