Chapter 22

[English text for this chapter is available]

sūta uvāca |
evaṃ śivatamaḥ paṃthāḥ śivenaiva pradarśitaḥ |
nṛṇāṃ saṃsṛtibaddhānāṃ sadyomuktikaraḥ paraḥ || 1 ||
[Analyze grammar]

atha durmedhasāṃ puṃsāṃ vedeṣvanadhikāriṇām |
strīṇāṃ dvijātibaṃdhūnāṃ sarveṣāṃ ca śarīriṇām || 2 ||
[Analyze grammar]

eṣa sādhāraṇaḥ paṃthāḥ sākṣātkaivalyasādhanaḥ |
mahāmunijanaiḥ sevyo devairapi supūjitaḥ || 3 ||
[Analyze grammar]

yatkathāśravaṇaṃ śaṃbhoḥ saṃsārabhayanāśanam |
sadyomuktikaraṃ ślāghyaṃ pavitraṃ sarvadehinām || 4 ||
[Analyze grammar]

ajñānatimirāṃdhānāṃ dīpo'yaṃ jñānasiddhidaḥ |
bhavaroganibaddhānāṃ susevyaṃ paramauṣadham || 5 ||
[Analyze grammar]

mahāpātakaśailānāṃ vajraghātasudāruṇam |
bharjanaṃ karmabījānāṃ sādhanaṃ sarva saṃpadām || 6 ||
[Analyze grammar]

ye śṛṇvaṃti sadā śambhoḥ kathāṃ bhuvanapāvanīm |
te vai manuṣyā lokesminrudrā eva na saṃśayaḥ || 7 ||
[Analyze grammar]

śṛṇvatāṃ śūlino gāthāṃ tathā kīrtayatāṃ satām |
teṣāṃ pādarajāṃsyeva tīrthāni munayo jaguḥ || 8 ||
[Analyze grammar]

tasmānniśreyasaṃ gantuṃ yebhivāṃchaṃti dehinaḥ |
te śṛṇvaṃtu sadā bhaktyā śaivīṃ paurāṇikīṃ kathām || 9 ||
[Analyze grammar]

yadyaśaktaḥ sadā śrotuṃ kathāṃ paurāṇikīṃ naraḥ |
muhūrtaṃ vāpi śṛṇuyānniyatātmā dinedine || 10 ||
[Analyze grammar]

atha pratidinaṃ śrotumaśakto yadi mānavaḥ |
puṇyamāseṣu vā puṇye dine puṇyatithiṣvapi || 11 ||
[Analyze grammar]

yaḥ śṛṇoti kathāṃ ramyāṃ purāṇaiḥ samudīritām |
sa nistarati saṃsāraṃ dagdhvā karmamahāṭavīm || 12 ||
[Analyze grammar]

muhūrttaṃ vā tadarddhaṃ vā kṣaṇaṃ vā pāvanīṃ kathām |
ye śṛṇvaṃti sadā bhaktyā na teṣāmasti durgatiḥ || 13 ||
[Analyze grammar]

yatphalaṃ sarvayajñeṣu sarvadāneṣu yatphalam |
sakṛtpurāṇaśravaṇāttatphalaṃ viṃdate naraḥ || 14 ||
[Analyze grammar]

kalau yuge viśeṣeṇa purāṇaśravaṇādṛte |
nāsti dharmaḥ paraḥ puṃsāṃ nāsti muktipathaḥ paraḥ || 15 ||
[Analyze grammar]

purāṇaśravaṇācchaṃbhornāsti saṃkīrtanaṃ param |
ata eva manuṣyāṇāṃ kalpadrumamahāphalam || 16 ||
[Analyze grammar]

kalau hīnāyuṣo martyā durbalāḥ śramapīḍitāḥ |
durmedhaso duḥkhabhājo dharmācāravivarjitāḥ || 17 ||
[Analyze grammar]

iti saṃciṃtya kṛpayā bhagavānbādarāyaṇaḥ |
hitāya teṣāṃ vidadhe purāṇākhyaṃ sudhārasam || 18 ||
[Analyze grammar]

pibannevāmṛtaṃ yatnādetatsyādajarāmaraḥ |
śambhoḥ kathāmṛtaṃ kuryātkulamevājarāmaram || 19 ||
[Analyze grammar]

bālo yuvā daridro vā vṛddho vā durbalo'pi vā |
purāṇajñaḥ sadā vandyaḥ pūjyaśca sukṛtārthibhiḥ || 20 ||
[Analyze grammar]

nīcabuddhiṃ na kurvīta purāṇajñe kadācana |
yasya vaktrāṃbujādvāṇī kāmadhenuḥ śarīriṇām || 21 ||
[Analyze grammar]

guravaḥ saṃti lokeṣu janmato guṇatastathā |
teṣāmapi ca sarveṣāṃ purāṇajñaḥ paro guruḥ || 22 ||
[Analyze grammar]

bhavakoṭisahasreṣu bhūtvābhūtvāvasīdati |
yo dadātyapunarvṛttiṃ ko'nyastasmātparo guruḥ || 23 ||
[Analyze grammar]

purāṇajñaḥ śucirdāṃtaḥ śāṃto vijitamatsaraḥ |
sādhuḥ kāruṇyavānvāgmī vadetpuṇyakathāṃ sudhī || 24 ||
[Analyze grammar]

vyāsāsanaṃ samārūḍho yadā paurāṇiko dvijaḥ |
asamāptaprasaṃgaśca namaskuryānna kasya cit || 25 ||
[Analyze grammar]

ye dhūrtā ye ca durvṛttā ye cānye vijigīṣavaḥ |
teṣāṃ kuṭilavṛttīnāmagre naiva vadetkathām || 26 ||
[Analyze grammar]

na durjanasamākīrṇe na śūdraśvāpadāvṛte |
deśe na dyūtasadane vadetpuṇyakathāṃ sudhīḥ || 27 ||
[Analyze grammar]

sadgrāme sujanākīrṇe sukṣetre devatālaye |
puṇye nadanadītīre vadetpuṇyakathāṃ sudhīḥ || 28 ||
[Analyze grammar]

śivabhaktisamāyuktā nānyakāryeṣu lālasā |
vāgyatāḥ suśravo'vyagrāḥ śrotāraḥ puṇyabhāginaḥ || 29 ||
[Analyze grammar]

abhaktā ye kathāṃ puṇyāṃ śṛṇvaṃti manujādhamāḥ |
teṣāṃ puṇyaphalaṃ nāsti duḥkhaṃ syājjanmajanmani || 30 ||
[Analyze grammar]

purāṇaṃ ye tvasaṃpūjya tāṃbūlādyairupāyanaiḥ |
śṛṇvaṃti ca kathāṃ bhaktyā daridrāḥ syurna pāpinaḥ || 31 ||
[Analyze grammar]

kathāyāṃ kīrtyamānāyāṃ ye gacchaṃtyanyato narāḥ |
bhogāṃtare praṇaśyaṃti teṣāṃ dārāśca saṃpadaḥ || 32 ||
[Analyze grammar]

soṣṇīṣamastakā ye ca kathāṃ śṛṇvaṃti pāvanīm |
te balākāḥ prajāyante pāpino manujādhamāḥ || 33 ||
[Analyze grammar]

tāṃbūlaṃ bhakṣayanto ye kathāṃ śṛṇvaṃti pāvanīm |
svaviṣṭhāṃ khādayaṃtyetānnarake yamakiṃkarāḥ || 34 ||
[Analyze grammar]

ye ca tuṃgāsanārūḍhāḥ kathāṃ śṛṇvaṃti dāṃbhikāḥ |
akṣayānnarakānbhuktvā te bhavaṃtyeva vāyasāḥ || 35 ||
[Analyze grammar]

ye ca vīrāsanārūḍhā ye ca maṃcakasaṃsthitāḥ |
śṛṇvaṃti satkathāṃ te vai bhavaṃtyanṛjupādapāḥ || 36 ||
[Analyze grammar]

asaṃpraṇamya śṛṇvaṃto viṣavṛkṣā bhavaṃti te |
kathāṃ śayānāḥ śṛṇvanto bhavaṃtyajagarā narāḥ || 37 ||
[Analyze grammar]

yaḥ śṛṇoti kathāṃ vaktuḥ samānāsanamāśritaḥ |
gurutalpasamaṃ pāpaṃ saṃprāpya narakaṃ vrajet || 38 ||
[Analyze grammar]

ye niṃdaṃti purāṇajñaṃ kathāṃ vā pāpahāriṇīm |
te vai janmaśataṃ martyāḥ śunakā saṃbhavaṃti ca || 39 ||
[Analyze grammar]

kathāyāṃ vartamānāyāṃ ye vadaṃti narādhamāḥ |
te gardabhāḥ prajāyante kṛkalāsāstataḥ param || 40 ||
[Analyze grammar]

kadācidapi ye puṇyāṃ na śṛṇvaṃti kathāṃ narāḥ |
te bhuktvā narakānghorānbha vaṃti vanasūkarāḥ || 41 ||
[Analyze grammar]

ye kathāmanumodante kīrtyamānāṃ narottamāḥ |
aśṛṇvaṃto'pi te yāṃti śāśvataṃ paramaṃ padam || 42 ||
[Analyze grammar]

kathāyāṃ kīrtyamānāyāṃ vighnaṃ kurvaṃti ye śaṭhāḥ |
koṭyabdānnarakānbhuktvā bhavaṃti grāmasūkarāḥ || 43 ||
[Analyze grammar]

ye śrāvayaṃti manujānpuṇyāṃ paurāṇikīṃ kathām |
kalpakoṭiśataṃ sāgraṃ tiṣṭhaṃti brahmaṇaḥ padam || 44 ||
[Analyze grammar]

āsanārthaṃ prayacchaṃti purāṇajñasya ye narāḥ |
kambalājinavāsāṃsi mañcaṃ phalakameva ca || 45 ||
[Analyze grammar]

svargalokaṃ samāsādya bhuktvā bhogānyathepsitān |
sthitvā brahmādilokeṣu padaṃ yāṃti nirāmayam || 46 ||
[Analyze grammar]

purāṇajñasya yacchaṃti ye sūtravasanaṃ navam |
bhogino jñānasaṃpannāste bhavaṃti bhavebhave || 47 ||
[Analyze grammar]

ye mahāpātakairyuktā upapātakinaśca ye |
purāṇaśravaṇādeva te yāṃti paramaṃ padam || 48 ||
[Analyze grammar]

atra vakṣye mahāpuṇyamitihāsaṃ dvijottamāḥ |
śṛṇvatāṃ sarvapāpaghnaṃ vicitraṃ sumanoharam || 49 ||
[Analyze grammar]

dakṣiṇāpathamadhye vai grāmo bāṣkalasaṃjñitaḥ |
tatra saṃti janāḥ sarve mūḍhāḥ karmavivarjitāḥ || 50 ||
[Analyze grammar]

na tatra brāhmaṇācārāḥ śrutismṛtiparāṅmukhāḥ |
japasvādhyāyarahitāḥ parastrī viṣayāturāḥ || 51 ||
[Analyze grammar]

kṛṣīvalāḥ śastradharā nirdevā jihmavṛttayaḥ |
na jānaṃti paraṃ dharmaṃ jñānavairāgyalakṣaṇam || 52 ||
[Analyze grammar]

striyaśca pāpaniratāḥ svairi ṇyaḥ kāmalālasāḥ |
durbuddhayaḥ kuṭilagāḥ sadgatācāravarjitāḥ || 53 ||
[Analyze grammar]

tatraiko viduro nāma durātmā brāhmaṇādhamaḥ |
āsīdveśyāpatiryo'sau sadāro'pi kumārgagaḥ || 54 ||
[Analyze grammar]

svapatnīṃ baṃdulāṃ nāma hitvā pratiniśaṃ tathā |
veśyābhavanamāsādya ramate smarapīḍitaḥ || 55 ||
[Analyze grammar]

sāpi tasyāṃganā rātrau viyuktā navayauvanā |
asahaṃtī smarāveśaṃ reme jāreṇa saṃgatā || 56 ||
[Analyze grammar]

tāṃ kadāciddurācārāṃ jāreṇa saha saṃgatām |
dṛṣṭvā tasyāḥ patiḥ krodhādabhi dudrāva satvaraḥ || 57 ||
[Analyze grammar]

jāre palāyite patnīṃ gṛhītvā sa durāśayaḥ |
saṃtāḍya muṣṭibaṃdhena muhurmuhuratāḍayat || 58 ||
[Analyze grammar]

sā nārī pīḍitā bhartrā kupitā prāha nirbhayā |
bhavānpratiniśaṃ veśyāṃ ramate kā gatirmama || 59 ||
[Analyze grammar]

ahaṃ rūpavatī yoṣā navayauvanaśālinī |
kathaṃ sahiṣye kāmārtā tava saṃgativarjitā || 60 ||
[Analyze grammar]

ityuktaḥ sa tayā tanvyā provāca brāhmaṇādhamaḥ |
yuktameva tvayoktaṃ hi tasmādvakṣyāmi te hitam || 61 ||
[Analyze grammar]

jārebhyo dhanamākṛṣya tebhyo dehi parāṃ ratim |
taddhanaṃ dehi me sarvaṃ paṇyastrīṇāṃ dadāmi tat || 62 ||
[Analyze grammar]

evaṃ saṃpūryate kāmo mamāpi ca varānane |
tatheti bhartṛvacanaṃ pratijagrāha sā vadhūḥ || 63 ||
[Analyze grammar]

evaṃ tayostu daṃpatyordurācārapravṛttayoḥ |
kālena nidhanaṃprāptaḥ sa vipro vṛṣalīpatiḥ || 64 ||
[Analyze grammar]

mṛte bhartari sā nārī putraiḥ saha nijālaye |
uvāsa suciraṃ kālaṃ kiṃcidutkrāṃtayauvanā || 65 ||
[Analyze grammar]

ekadā daivayogena saṃprāpte puṇyaparvaṇi |
sā nārī baṃdhubhiḥ sārdhaṃ gokarṇaṃ kṣetra māyayau || 66 ||
[Analyze grammar]

tatra tīrthajale snātvā kasmiṃściddevatālaye |
śuśrāva devamukhyānāṃ puṇyāṃ paurāṇikīṃ kathām || 67 ||
[Analyze grammar]

yoṣitāṃ jārasaktānāṃ narake yamakiṃkarāḥ |
saṃtaptalohaparighaṃ kṣipaṃti smaramaṃdire || 68 ||
[Analyze grammar]

iti paurāṇikenoktāṃ sā śrutvā dharmasaṃhitām |
tamuvāca rahasyeṣā bhītā brāhmaṇapuṃgavam || 69 ||
[Analyze grammar]

brahmanpāpamajānaṃtyā mayācaritamulbaṇam |
yauvane kāmacāreṇa kauṭilyena pravartitam || 70 ||
[Analyze grammar]

idaṃ tvadvacanaṃ śrutvāpurāṇārthavijṛṃbhi tam |
bhītirme mahatī jātā śarīraṃ vepate muhuḥ || 71 ||
[Analyze grammar]

dhiṅmāṃ duriṃdriyāsaktāṃ pāpāṃ smaravimohitām |
alpasya yatsukhasyārthe ghorāṃ yāsyāmi durgatim || 72 ||
[Analyze grammar]

kathaṃ paśyāmi maraṇe yamadūtānbhayaṃkarān |
kathaṃ pāśairbalātkaṃṭhe badhyamānā dhṛtiṃ labhe || 73 ||
[Analyze grammar]

kathaṃ sahiṣye narake khaṃḍaśo dehakṛṃtanama |
punaḥ kathaṃ patiṣyāmi saṃtaptā kṣārakardame || 74 ||
[Analyze grammar]

kathaṃ ca yonilakṣeṣu krimikīṭakhagādiṣu |
paribhramāmi duḥkhaughātpīḍyamānā niraṃtaram || 75 ||
[Analyze grammar]

kathaṃ ca rocate mahyamadyaprabhṛti bhojanam |
rātrau kathaṃ ca seviṣye nidrāṃ duḥkhapariplutā || 76 ||
[Analyze grammar]

hāhā hatāsmi dagdhāsmi vidīrṇahṛdayāsmi ca |
hā vidhe māṃ mahāpāpe dattvā buddhimapātayaḥ || 77 ||
[Analyze grammar]

patatastuṃgaśailāgrācchūlākrāṃtasya dehinaḥ |
yadduḥkhaṃ jāyate ghoraṃ tasmātkoṭiguṇaṃ mama || 78 ||
[Analyze grammar]

aśvamedhāyutaṃ kṛtvā gaṃgāṃ snātvā śataṃ samāḥ |
na śuddhirjāyate prāyo matpāpasya garīyasaḥ || 79 ||
[Analyze grammar]

kiṃ karomi kva gacchāmi kaṃ vā śaraṇamāśraye |
ko vā māṃ trāyate loke pataṃtī narakārṇave || 80 ||
[Analyze grammar]

tvameva me gururbrahmaṃstvaṃ mātā tvaṃ pitāsi ca |
uddharoddhara māṃ dīnāṃ tvāmeva śaraṇaṃ gatām || 81 ||
[Analyze grammar]

iti tāṃ jātanirvedāṃ patitāṃ caraṇadvaye |
utthāpya kṛpayā dhīmānbabhāṣe dvijapuṃgavaḥ || 82 ||
[Analyze grammar]

brāhmaṇa uvāca |
diṣṭyā kāle prabuddhāsi śrutvemāṃ mahatīṃ kathām |
mā bhaiṣīstava vakṣyāmi gatiṃ caiva sukhāvahām || 83 ||
[Analyze grammar]

satkathāśravaṇādeva jātā te matirīdṛśī |
iṃdriyārtheṣu vairāgyaṃ paścāttāpo mahānabhūt || 84 ||
[Analyze grammar]

paścāttāpo hi sarveṣāmaghānāṃ niṣkṛtiḥ parā |
tenaiva kurute sadyaḥ prāyaścittaṃ sudhīrnaraḥ || 85 ||
[Analyze grammar]

prāyaścittāni sarvāṇi kṛtvā ca vidhivatpunaḥ |
apaścāttāpino nāryā na yāṃti gatimuttamām || 86 ||
[Analyze grammar]

satkathāśravaṇānnityaṃ saṃyāti paramāṃ gatim |
puṇyakṣetranivāsācca cittaśuddhiḥ prajāyate || 87 ||
[Analyze grammar]

yathā satkathayā nityaṃ saṃyāti paramāṃ gatim |
tathānyaiḥ sadvratairjaṃtornabhavenmatiruttamā || 88 ||
[Analyze grammar]

yathā muhuḥ śodhyamāno darpaṇo nirmalo bhavet |
tathā satkathayā ceto viśuddhiṃ paramāṃ vrajet || 89 ||
[Analyze grammar]

viśuddhe cetasi nṛṇāṃ dhyānaṃ sidhyatyumāpateḥ |
dhyānena sarvaṃ malinaṃ manovākkāyasaṃbhṛtam || 90 ||
[Analyze grammar]

sadyo vidhūya kṛtino yāṃti śambhoḥ paraṃ padam |
ataḥ saṃnyastapuṇyānāṃ satkathā sādhanaṃ param || 91 ||
[Analyze grammar]

kathayā sidhyati dhyānaṃ dhyānātkaivalyamuttamam |
asiddhaparamadhyānaḥ kathāmetāṃ śṛṇoti yaḥ |
so'nyajanmani saṃprāpya dhyānaṃ yāti parāṃ gatim || 92 ||
[Analyze grammar]

nāmoccāraṇamātreṇa japtvā maṃtramajāmilaḥ |
paścāttāpasamāyuktastvavāpa paramāṃ gatim || 93 ||
[Analyze grammar]

sarveṣāṃ śreyasāṃ bījaṃ satkathāśravaṇaṃ nṛṇām |
yastadvihīnaḥ sa paśuḥ kathaṃ mucyeta bandhanāt || 94 ||
[Analyze grammar]

atastvamapi sarvebhyo viṣayebhyo nivṛttadhīḥ |
bhaktiṃ parāṃ samādhāya satkathāṃ śṛṇu sarvadā |
śṛṇvaṃtyāḥ satkathāṃ nityaṃ cetaste śuddhimeṣyati || 95 ||
[Analyze grammar]

tena dhyāyasi viśveśaṃ tato muktimavāpsyasi |
dhyāyataḥ śivapādābjaṃ muktirekena janmanā || 96 ||
[Analyze grammar]

bhaviṣyati na sandehaḥ satyaṃ satyaṃ vadāmyaham |
ityuktā tena vipreṇa sā nārī bāṣpasaṃkulā || 97 ||
[Analyze grammar]

patitvā pādayostasya kṛtārthāsmītyabhāṣata |
tasminneva mahākṣetre tasmādeva dvijottamāt || 98 ||
[Analyze grammar]

śuśrāva satkathāṃ sādhvīṃ kaivalyaphala dāyinī |
sa uvāca dvijastasyai kathāṃ vairāgyabṛṃhitām || 99 ||
[Analyze grammar]

yāṃ śrutvā manujaḥ sadyastyajedviṣayavāsanām |
tasyāścittaṃ yathā śuddhaṃ vairāgyarasagaṃ yathā || 100 ||
[Analyze grammar]

tathovāca dvijaḥ śaivīṃ kathāṃ bhaktisamanvitām |
yathāyathā manastasyāḥ prasādamabhigacchati |
tathātathā śanaiḥ śaṃbhordhyānayogamupādiśat || 1 ||
[Analyze grammar]

śanaiḥ śanairdhvastarajastamomalaṃ vimuktasarvendriyabhogavigraham |
viśuddhatattvaṃ hṛdayaṃ dvijastriyā viveśa viśveśvara rūpaciṃtanam || 2 ||
[Analyze grammar]

itthaṃ sadgurumāśritya sā nārī prāptasanmatiḥ |
dadhyau muhurmuhuḥ śaṃbhościdānaṃdamayaṃ vapuḥ || 3 ||
[Analyze grammar]

nityaṃ tīrthajale snātvā jaṭāvalkaladhāriṇī |
bhasmoddhūlitasarvāṃgī rudrākṣakṛtabhūṣaṇā || 4 ||
[Analyze grammar]

śivanāmajapāsaktā vāgyatā mitabhojanā |
baddhapadmāsanā'vyagrā satkathā śravaṇotsukā || 5 ||
[Analyze grammar]

guruśuśrūṣaṇaratā tyaktāpatyasuhṛjanā |
gurūpadiṣṭayogena śivamevamatoṣayat || 6 ||
[Analyze grammar]

viśveśa viśvavilayasthitijanmaheto viśvaikavaṃdya śiva śāśvata viśvarūpa |
vidhvastakālaviparītaguṇāvabhāsa śrīmanmaheśa mayi dhehi kṛpākaṭākṣam || 7 ||
[Analyze grammar]

śaṃbho śaśāṃkakṛtaśekhara śāṃtamūrte gaṃgādharāmaravarārcitapādapadma |
nāgeṃdrabhūṣaṇa nageṃdraniketaneśa bhaktārtihanmayi nidhehi kṛpākaṭākṣam || 8 ||
[Analyze grammar]

śrīviśvanātha karuṇākara śūlapāṇe bhūteśa bharga bhuvanatrayagītakīrte |
śrīnīlakaṇṭha madanāntaka viśvamūrte gaurīpate mayi nidhehi kṛpākaṭākṣam || 9 ||
[Analyze grammar]

itthaṃ pratidinaṃ bhaktyā prārthayaṃtī maheśvaram |
śṛṇvaṃtī satkathāṃ samyakkarmabaṃdhaṃ samācchinat || 110 ||
[Analyze grammar]

atha kālena sā nārī samutsṛjya kalevaram |
maheśānucarairnītā saṃprāptā śiva maṃdiram || 11 ||
[Analyze grammar]

tatra devairmahādevaṃ sevyamānaṃ sahomayā |
gaṇeśanaṃdibhṛṃgyādyairvīrabhadreśvarādibhiḥ || 12 ||
[Analyze grammar]

upāsyamānaṃ gaurīśaṃ koṭisūryasamaprabham |
trilocanaṃ paṃcamukhaṃ nīlagrīvaṃ sadāśivam || 13 ||
[Analyze grammar]

vāmāṃke bibhrataṃ gaurīṃ vidyuccaṃdrasamaprabhām |
dṛṣṭvā sasaṃbhramaṃ nārī sā praṇamya punaḥpunaḥ || 14 ||
[Analyze grammar]

ānandāśrujalotsiktā romaharṣasamākulā |
saṃmānitā karuṇayā pārvatyā śaṃkareṇa ca || 15 ||
[Analyze grammar]

tasmiṃlloke parānandaghanajyotiṣi śāśvate |
labdhvā nivāsamacalaṃ lebhe sukhamanāhatam || 16 ||
[Analyze grammar]

sā kadācidumāṃ devīmupasṛtya praṇamya ca |
paryapṛcchata me bharttā kāṃ gatiṃ gatavāniti || 17 ||
[Analyze grammar]

tāmuvāca mahādevī sa te bharttā durāśayaḥ |
bhuktvā narakaduḥkhāni viṃdhye jātaḥ piśācakaḥ || 18 ||
[Analyze grammar]

punaḥ prapaccha sā nārī devīṃ tribhuvaneśvarīm |
kenopāyena me bharttā sadgatiṃ prāpnuyāditi || 19 ||
[Analyze grammar]

devyuvāca |
so'smatkathāṃ mahāpuṇyāṃ kadācicchṛṇuyādyadi |
nistīrya durgatiṃ sarvāmimaṃ lokaṃ prayāsyati || 120 ||
[Analyze grammar]

iti gauryā vacaḥ śrutvā sā nārī vihitāṃjaliḥ |
prārthayāmāsa tāṃ devīṃ bhartuḥ pāpaviśodhane || 21 ||
[Analyze grammar]

tayā muhuḥ prārthyamānā pārvatīkaruṇāyutā |
tuṃburuṃ nāma gaṃdharvamāhūyedamathābravīt || 22 ||
[Analyze grammar]

tuṃburo gaccha bhadraṃ te viṃdhyaśailaṃ sahānayā |
āste piśācakastatra yo'syāḥ patirasanmatiḥ || 23 ||
[Analyze grammar]

tasyāgre paramāṃ puṇyāṃ kathāmasmadguṇairyutām |
ākhyāya durgatermuktaṃ tamānaya śivāṃtikam || 24 ||
[Analyze grammar]

iti devyā samādiṣṭastuṃburustāṃ praṇamya ca |
tayā saha vimānena viṃdhyādriṃ sahasā yayau || 25 ||
[Analyze grammar]

tatrāpaśyanmahākāyaṃ raktanetraṃ mahāhanum |
prahasaṃtaṃ rudaṃtaṃ ca valgaṃtaṃ ca piśācakam || 26 ||
[Analyze grammar]

balādgṛhītvā taṃ pāśairbaddhvā vai saṃniveśya ca |
tuṃbururvallakīhasto jagau gaurīpateḥ kathām || 27 ||
[Analyze grammar]

sa piśāco mahāpuṇyāṃ kathāṃ śrutvā puradviṣaḥ |
vidhūya kaluṣaṃ sarvaṃ saptāhātprāpa saṃsmṛtim || 28 ||
[Analyze grammar]

sa paiśācaṃ vapustyaktvā svarūpaṃ divyamāpya ca |
jagau svayamapi śrīmaccaritaṃ pārvatīpateḥ || 29 ||
[Analyze grammar]

vimānamāruhya sa divyarūpadhṛksa tuṃburuḥ pārśvagataḥ svakāṃtayā |
gāyanmaheśasya guṇānmanoramāñjagāma kaivalyapadaṃ sanātanam || 130 ||
[Analyze grammar]

sūta uvāca |
ityetatkathitaṃ puṇyamākhyānaṃ duritāpaham |
maheśvaraprītikaraṃ nirmalajñānasādhanam || 31 ||
[Analyze grammar]

ya idaṃ śṛṇuyānmartyaḥ kīrtayedvā samāhitaḥ |
śaṃbhorguṇānukathanaṃ vicitraṃ pāpanāśanam || 32 ||
[Analyze grammar]

paramānandajanakaṃ bhavarogamahauṣadham || |
bhuktveha vividhānbhogānmukto yāti parāṃ gatim || 33 ||
[Analyze grammar]

sūta uvāca |
yūyaṃ khalu mahābhāgāḥ kṛtārthā munisattamāḥ |
ye sevaṃte sadā śaṃbhoḥ kathāmṛtarasaṃ navam || 34 ||
[Analyze grammar]

te janmabhājaḥ khalu jīvaloke yeṣāṃ mano dhyāyati viśvanātham |
vāṇī guṇānstauti kathāṃ śṛṇoti śrotradvayaṃ te bhavamuttaraṃti || 35 ||
[Analyze grammar]

vividhaguṇavibhedairnityamaspṛṣṭarūpaṃ jagati ca bahiraṃtarvā samānaṃ mahimnā |
svamahasi viharaṃtaṃ vāṅmanovṛttidūraṃ paramaśivamanaṃtānaṃdasāṃdraṃ prapadye || 136 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmotarakhaṇḍe purāṇaśravaṇamahimavarṇanaṃnāma dvāviṃśo 'dhyāyaḥ || 22 ||
[Analyze grammar]

iti skānde tṛtīyaṃ brāhmakhaṇḍaṃ saṃpūrṇam || 3 ||
[Analyze grammar]