Chapter 34

[English text for this chapter is available]

vyāsa uvāca |
evaṃ rāmeṇa dharmajña jīrṇoddhāraḥ purā kṛtaḥ |
dvijānāṃ ca hitārthāya śrīmāturvacanena ca || 1 ||
[Analyze grammar]

yudhiṣṭhira uvāca |
kīdṛśaṃ śāsanaṃ brahmanrāmeṇa likhitaṃ purā |
kathayasva prasādena tretāyāṃ satyamaṃdire || 2 ||
[Analyze grammar]

vyāsa uvāca |
dharmāraṇye vare divye bakulārke svadhiṣṭhite |
śūnyasvāmini vipreṃdra sthite nārāyaṇe prabhau || 3 ||
[Analyze grammar]

rakṣaṇādhipatau deve sarvajñe guṇanāyake |
bhavasāgara magnānāṃ tāriṇī yatra yoginī || 4 ||
[Analyze grammar]

śāsanaṃ tatra rāmasya rāghavasya ca nāmataḥ |
śṛṇu tāmrāśrayaṃ tatra likhitaṃ dharmaśāstrataḥ || 5 ||
[Analyze grammar]

mahāścaryakaraṃ tacca hyanekayugasaṃsthitam |
sarvo dhātuḥ kṣayaṃ yāti suvarṇaṃ kṣayameti ca || 6 ||
[Analyze grammar]

pratyakṣaṃ dṛśyate putra dvijaśāsanamakṣayam |
avināśo hi tāmrasya kāraṇaṃ tatra vidyate || 7 ||
[Analyze grammar]

vedoktaṃ sakalaṃ yasmādviṣṇureva hi kathyate |
purāṇeṣu ca vedeṣu dharmaśāstreṣu bhārata || 8 ||
[Analyze grammar]

sarvatra gīyate viṣṇurnānā bhāvasamāśrayaḥ |
nānādeśeṣu dharmeṣu nānādharmaniṣevibhiḥ || 9 ||
[Analyze grammar]

nānābhedaistu sarvatra viṣṇureveti ciṃtyate |
avatīrṇaḥ sa vai sākṣātpurāṇapuruṣo ttamaḥ || 10 ||
[Analyze grammar]

devavairivināśāya dharmasaṃrakṣaṇāya ca |
tenedaṃ śāsanaṃ dattamavināśātmakaṃ suta || 11 ||
[Analyze grammar]

yasya pratāpādṛṣada stāritā jalamadhyataḥ |
vānarairveṣṭitā laṃkā helayā rākṣasā hatāḥ || 12 ||
[Analyze grammar]

muniputraṃ mṛtaṃ rāmo yamalokādupānayat |
duṃdubhirnihato yena kabaṃdho'bhihatastathā || 13 ||
[Analyze grammar]

nihatā tāḍakā caiva saptatālā vibheditāḥ |
kharaśca dūṣaṇaścaiva triśirāśca mahāsuraḥ || 14 ||
[Analyze grammar]

caturdaśasahasrāṇi javena nihatā raṇe |
tenedaṃ śāsanaṃ dattamakṣayaṃ na kathaṃ bhavet || 15 ||
[Analyze grammar]

svavaṃśavarṇanaṃ tatra likhitvā svayameva tu |
deśakālādikaṃ sarvaṃ lilekha vidhipūrvakam || 16 ||
[Analyze grammar]

svamudrācihnitaṃ tatra traividyebhyastathā dadau |
catuścatvāriṃśavarṣo rāmo daśarathātmajaḥ || 17 ||
[Analyze grammar]

tasminkāle mahāścaryaṃ saṃdattaṃ kila bhārata |
tatra svarṇopamaṃ cāpi raupyopamama thāpi ca || 18 ||
[Analyze grammar]

uvāha salilaṃ tīrthe devarṣipitṛtṛptidam |
svavaṃśanāyakasyāgre sūryeṇa kṛtameva tat || 19 ||
[Analyze grammar]

taddṛṣṭvā mahadāścaryaṃ rāmo viṣṇuṃ prapūjya ca |
rāmalekhavicitraistu likhitaṃ dharmaśāsanam || 20 ||
[Analyze grammar]

yaddṛṣṭvātha dvijāḥ sarve saṃsārabhayabaṃdhanam |
kurvate naiva yasmācca tasmānnikhilarakṣakam || 21 ||
[Analyze grammar]

ye pāpiṣṭhā durācārā mitradroharatāśca ye |
teṣāṃ prabodhanārthāya prasiddhimakarotpurā || 22 ||
[Analyze grammar]

rāmalekhavicitraistu vicitre tāmrapaṭṭake |
vākyānīmāni śrūyaṃte śāsane kila nārada || 23 ||
[Analyze grammar]

āsphoṭayaṃti pitaraḥ kathayaṃti pitāmahāḥ |
bhūmido'smatkule jātaḥ so'smānsaṃtārayiṣyati || 24 ||
[Analyze grammar]

bahubhirbahudhā bhuktā rājabhiḥ pṛthivī tviyam |
yasyayasya yadā bhūmistasyatasya tadā phalam || 25 ||
[Analyze grammar]

ṣaṣṭivarṣasahasrāṇi svarge vasati bhūmidaḥ |
ācchettā cānumaṃtā ca tānyeva narakaṃ vrajet || 26 ||
[Analyze grammar]

saṃdaṃśaistudyamānastu mudgarairvinihatya ca |
pāśaiḥ subadhyamānastu roravīti mahāsvaram || 27 ||
[Analyze grammar]

tāḍyamānaḥ śire daṃḍaiḥ samāliṃgya vibhāvasum |
kṣurikayā chidyamāno roravīti mahāsvanam || 28 ||
[Analyze grammar]

yamadūtairmahāghorairbrahmavṛttivilopakaḥ |
evaṃvidhairmahāduṣṭaiḥ pīḍyaṃte te mahāgaṇaiḥ || 29 ||
[Analyze grammar]

tatastiryaktvamāpnoti yoniṃ vā rākṣasīṃ śunīm |
vyālīṃ śṛgālīṃ paiśācīṃ mahābhūtabhayaṃkarīm || 30 ||
[Analyze grammar]

bhūmeraṃgulahartā hi sa kathaṃ pāpamācaret |
bhūmeraṃguladātā ca sa kathaṃ puṇyamācaret || 31 ||
[Analyze grammar]

aśvamedhasahasrāṇāṃ rājasūyaśatasya ca |
kanyāśatapradānasya phalaṃ prāpnoti bhūmidaḥ || 32 ||
[Analyze grammar]

āyuryaśaḥ sukhaṃ prajñā dharmo dhānyaṃ dhanaṃ jayaḥ |
saṃtānaṃ varddhate nityaṃ bhūmidaḥ sukhamaśmute || 33 ||
[Analyze grammar]

bhūmeraṃgulamekaṃ tu ye haraṃti khalā narāḥ |
vaṃdhyāṭavīṣvatoyāsu śuṣkakoṭaravāsinaḥ |
kṛṣṇasarpāḥ prajāyaṃte dattadāyāpahārakāḥ || 34 ||
[Analyze grammar]

taḍāgānāṃ sahasreṇa aśvamedhaśatena vā |
gavāṃ koṭipradānena bhūmiharttā viśudhyati || 35 ||
[Analyze grammar]

yānīha dattāni punardhanāni dānāni dharmārthayaśaskarāṇi |
audāryato vipraniveditāni ko nāma sādhuḥ punarādadīta || 36 ||
[Analyze grammar]

caladaladalalīlācaṃcale jīvaloke tṛṇalavalaghusāre sarvasaṃsārasaukhye |
apaharati durāśaḥ śāsanaṃ brāhmaṇānāṃ narakagahanagarttāvartapātotsuko yaḥ || 37 ||
[Analyze grammar]

ye pāsyaṃti mahībhujaḥ kṣitimimāṃ yāsyaṃti bhuktvākhilāṃ no yātā na tu yāti yāsyati na vā kenāpi sārddhaṃ dharā |
yatkiṃcidbhuvi tadvināśi sakalaṃ kīrtiḥ paraṃ sthāyinī tvevaṃ vai vasudhāpi yairupakṛtā lopyā na satkīrtayaḥ || 38 ||
[Analyze grammar]

ekaiva bhaginī loke sarveṣāmeva bhūbhujām |
na bhojyā na karagrāhyā vipradattā vasuṃdharā || 39 ||
[Analyze grammar]

dattvā bhūmiṃ bhāvinaḥ pārthiveśānbhūyobhūyo yācate rāmacandraḥ |
sāmānyo'yaṃ dharmaseturnṛpāṇāṃ sve sve kāle pālanīyo bhavadbhiḥ || 40 ||
[Analyze grammar]

asminvaṃśe kṣitau kopi rājā yadi bhaviṣyati |
tasyāhaṃ karalagnosmi maddattaṃ yadi pālyate || 41 ||
[Analyze grammar]

likhitvā śāsanaṃ rāmaścāturvedyadvijottamān |
saṃpūjya pradadau dhīmānvasiṣṭhasya ca sannidhau || 42 ||
[Analyze grammar]

te vāḍavā gṛhītvā taṃ paṭṭaṃ rāmājñayā śubham |
tāmraṃ haimākṣarayutaṃ dharmyaṃ dharmavibhūṣaṇam || 43 ||
[Analyze grammar]

pūjārthaṃ bhaktikāmārthāstadrakṣaṇamakurvata |
caṃdanena ca divyena puṣpeṇa ca sugandhinā || 44 ||
[Analyze grammar]

tathā suvarṇapuṣpeṇa rūpyapuṣpeṇa vā punaḥ |
ahanyahani pūjāṃ te kurvate vāḍavāḥ śubhām || 45 ||
[Analyze grammar]

tadagre dīpakaṃ caiva ghṛtena vimalena hi |
saptavartiyutaṃ rājannarghyaṃ prakurvate dvijāḥ || 46 ||
[Analyze grammar]

naivedyaṃ kurvate nityaṃ bhaktipūrvaṃ dvijottamāḥ |
rāmarāmeti rāmeti mantramapyuccaraṃti hi || 47 ||
[Analyze grammar]

aśane śayane pāne gamane copaveśane |
sukhe vāpyathavā duḥkhe rāmamantraṃ samuccaret || 48 ||
[Analyze grammar]

na tasya duḥkhadaurbhāgyaṃ nādhivyādhibhayaṃ bhavet |
āyuḥ śriyaṃ balaṃ tasya varddhayaṃti dine dine || 49 ||
[Analyze grammar]

rāmeti nāmnā mucyeta pāpādvai dāruṇādapi |
narakaṃ nahi gaccheta gatiṃ prāpnoti śāśvatīm || 50 ||
[Analyze grammar]

vyāsa uvāca |
iti kṛtvā tato rāmaḥ kṛtakṛtyamamanyata |
pradakṣiṇīkṛtya tadā praṇamya ca dvijānbahūn || 51 ||
[Analyze grammar]

dattvā dānaṃ bhūritaraṃ gavāśvamahiṣīratham |
tataḥ sarvānnijāṃstāṃśca vākyametaduvāca ha || 52 ||
[Analyze grammar]

atraiva sthīyatāṃ sarvairyāvaccaṃdradivākarau |
yāvanmerurmahīpṛṣṭhe sāgarāḥ sapta eva ca || 53 ||
[Analyze grammar]

tāvadatraiva sthātavyaṃ bhavadbhirhi na saṃśayaḥ |
yadā hi śāsanaṃ viprā na manyaṃte nṛpā bhuvi || 54 ||
[Analyze grammar]

athavā vaṇijaḥ śūrā madamāyāvimohitāḥ |
madājñāṃ na prakurvaṃti manyaṃte vā na te janāḥ || 55 ||
[Analyze grammar]

tadā vai vāyuputrasya smaraṇaṃ kriyatāṃ dvijāḥ |
smṛtamātro hanūmānvai samāgatya kariṣyati || 56 ||
[Analyze grammar]

sahasā bhasma tānsatyaṃ vacanānme na saṃśayaḥ |
ya idaṃ śāsanaṃ ramyaṃ pālayiṣyati bhūpatiḥ || 57 ||
[Analyze grammar]

vāyuputraḥ sadā tasya saukhyamṛddhiṃ pradāsyati |
dadāti putrānpautrāṃśca sādhvīṃ patnīṃ yaśo jayam || 58 ||
[Analyze grammar]

ityevaṃ kathayitvā ca hanumaṃtaṃ prabodhya ca |
nivartito rāmadevaḥ sasainyaḥ saparicchadaḥ || 59 ||
[Analyze grammar]

vāditrāṇāṃ svanairviṣvaksūcyamānaśubhāgamaḥ |
śvetātapatrayukto'sau cāmarairvī jito naraiḥ |
ayodhyāṃ nagarīṃ prāpya ciraṃ rājyaṃ cakāra ha || 60 ||
[Analyze grammar]