Chapter 52

[English text for this chapter is available]

śrīsūta uvāca |
bhūyo'pyahaṃ pravakṣyāmi setumuddiśya vaibhavam |
yuṣmākamādareṇāhaṃ śṛṇudhvaṃ munipuṃgavāḥ || 1 ||
[Analyze grammar]

sthānānāmapi sarveṣāmetatsthānaṃ mahattaram |
atra japtaṃ hutaṃ taptaṃ dattaṃ cākṣaya mucyate || 2 ||
[Analyze grammar]

asminneva mahāsthāne dhanuṣkoṭau nimajjanāt |
vārāṇasyāṃ daśasamāvāsapuṇyaphalaṃ bhavet || 3 ||
[Analyze grammar]

tasmiṃsthale dhanuṣkoṭau snātvā rāmeśvaraṃ śivam |
dṛṣṭvā naro bhaktiyuktastridināni vaseddvijāḥ || 4 ||
[Analyze grammar]

puṇḍarīkapure tena daśavatsaravāsajam |
puṇyaṃ bhavati vipreṃdrā mahāpātakanāśa nam || 5 ||
[Analyze grammar]

aṣṭottarasahasraṃ tu maṃtramādyaṃ ṣaḍakṣaram |
atra japtvā naro bhaktyā śivasāyujyamāpnuyāt || 6 ||
[Analyze grammar]

madhyārjune kuṃbhakoṇe māyūre śvetakānane |
hālāsye ca gajāraṇye vedāraṇye ca naimiṣe || 7 ||
[Analyze grammar]

śrīparvate ca śrīraṃge śrīmadvṛddhagirau tathā |
cidaṃbare ca valmīke śeṣādrāvaruṇācale || 8 ||
[Analyze grammar]

śrīmaddakṣiṇakailāse veṃkaṭādrau haristhale |
kāṃcīpure brahmapure vaidyeśvarapure tathā || 9 ||
[Analyze grammar]

anyatrāpi śivasthāne viṣṇusthāne ca sattamāḥ |
varṣavāsabhavaṃ puṇyaṃ dhanuṣkoṭau naro mudā || 10 ||
[Analyze grammar]

māghamāse yadi snāyādāpnotyeva na saṃśayaḥ |
imaṃ setuṃ samuddiśya dvau samudrāviti śrutiḥ || 11 ||
[Analyze grammar]

vidyate brāhmaṇaśreṣṭhā mātṛbhūtā sanātanī |
ado yaddārurityanyā yatrāsti munipuṃgavāḥ || 12 ||
[Analyze grammar]

viṣṇoḥ karmāṇi paśyaṃtī setuvaibhavaśaṃsinī |
śrutirasti tathānyāpi tadviṣṇoriti cāparā || 13 ||
[Analyze grammar]

itihāsapurāṇāni smṛtayaśca tapodhanāḥ |
ekavākyatayā setumāhātmyaṃ prabuvaṃti hi || 14 ||
[Analyze grammar]

caṃdrasūryoparāgeṣu kurva nsetvavagāhanam |
avimukte daśābdaṃ tu gaṃgāsnānaphalaṃ labhet || 15 ||
[Analyze grammar]

koṭijanmakṛtaṃ pāpaṃ tatkṣaṇenaiva naśyati |
aśvamedhasahasrasya phalamāpnotya nuttamam || 16 ||
[Analyze grammar]

viṣuvāyanasaṃkrāṃtau śaśivāre ca parvaṇi |
setudarśanamātreṇa saptajanmārjitāśubham || 17 ||
[Analyze grammar]

naśyate svargatiṃ caiva prayāṃti dvijapuṃgavāḥ |
makarasthe ravau māghe kiṃcidabhyudite ravau || 18 ||
[Analyze grammar]

snātvā dinatrayaṃ martyo dhanuṣkoṭau vipātakaḥ |
gaṃgādisarvatīrtheṣu snānapuṇyamavāpnuyāt || 19 ||
[Analyze grammar]

dhanuṣkauṭau naraḥ kuryātsnānaṃ paṃcadineṣu yaḥ |
aśvamedhādipuṇyaṃ ca prāpnuyādbrāhmaṇottamāḥ || 20 ||
[Analyze grammar]

cāṃdrāyaṇādikṛcchrāṇāmanuṣṭhānaphalaṃ labhet |
caturṇāmapi vedānāṃ pārāyaṇaphalaṃ tathā || 21 ||
[Analyze grammar]

māghamāse daśāhaḥsu dhanuṣkoṭau nimajjanāt |
brahmahatyāyutaṃ naśyennātra kāryā vicāraṇā || 22 ||
[Analyze grammar]

māghamāse dhanuṣkoṭau daśapaṃcadināni yaḥ |
snānaṃ karoti manujaḥ sa vaikuṃṭhamavāpnuyāt || 23 ||
[Analyze grammar]

māghamāse rāmasaitau snānaṃ viṃśaddi naṃ caran |
śivasāmīpyamāpnoti śivena saha modate || 24 ||
[Analyze grammar]

paṃcaviṃśaddinaṃ snānaṃ kurvansārūpyamāpnuyāt |
snānaṃ triṃśaddinaṃ kurvansāyujyaṃ labhate dhruvam || 25 ||
[Analyze grammar]

ato'vaśyaṃ rāmasetau māghamāse dvijottamāḥ |
snānaṃ samācaredvidvānkiṃcidabhyudite ravau || 26 ||
[Analyze grammar]

caṃdrasūryoparāge ca tathaivārddhodaye dvijāḥ |
mahodaye rāmasetau snānaṃ kurvandvijottamāḥ || 27 ||
[Analyze grammar]

anekakleśasaṃyuktaṃ garbhavāsaṃ na paśyati |
brahmahatyādipāpānāṃ nāśakaṃ ca prakīrtitam || 28 ||
[Analyze grammar]

sarveṣāṃ narakāṇāṃ ca bādhakaṃ parikīrtitam |
saṃpadāmapi sarvāsāṃ nidānaṃ parikīrtitam || 29 ||
[Analyze grammar]

indrādisarvalokānāṃ sālokyādipradaṃ tathā |
caṃdrasūryoparāge ca tathaivārddhodaye dvijāḥ || 30 ||
[Analyze grammar]

mahodaye dhanuṣkoṭau majjanaṃ tvatiniścitam |
rāvaṇasya vināśārthaṃ purā rāmeṇa nirmi tam || 31 ||
[Analyze grammar]

siddhacāraṇagaṃdharvakinnaroragasevitam |
brahmadevarṣirājarṣipitṛsaṃghaniṣevitam || 32 ||
[Analyze grammar]

brahmādidevatāvṛṃdaissevitaṃ bhaktipūrvakam |
puṇyaṃ yo rāmasetuṃ vai saṃsmaranpuruṣo dvijāḥ || 33 ||
[Analyze grammar]

snāyācca yatra kutrāpi taṭākādau jalāśaye |
na tasya duṣkṛtaṃ kiṃcidbhaviṣyati kadācana || 34 ||
[Analyze grammar]

setumadhyasthatīrtheṣu muṣṭimātrapradānataḥ |
naśyaṃti sakalā rogā bhrūṇahatyādayastathā || 35 ||
[Analyze grammar]

rāmeṇa dhanuṣaḥ puṇyāṃ yo rekhāṃ paśyate kṛtām |
na tasya punarāvṛttirvaikuṃṭhātsyātkadācana || 36 ||
[Analyze grammar]

dhanuṣkoṭiriti khyātā yā loke pāpanāśinī |
vibhīṣaṇaprārthanayā kṛtā rāmeṇa dhīmatā || 37 ||
[Analyze grammar]

dhanuṣkoṭirmahāpuṇyā tasyāṃ snātvā sabhaktikam |
dadyāddānāni vittānāṃ kṣetrāṇāṃ ca gavāṃ tathā || 38 ||
[Analyze grammar]

tilānāṃ taṃḍulānāṃ ca dhānyānāṃ payasāṃ tathā |
vastrāṇāṃ bhūṣaṇānāṃ ca māṣāṇāmodanasya ca || 39 ||
[Analyze grammar]

dadhnāṃ ghṛtānāṃ vārīṇāṃ śākānāmapyudaśvitām |
śuddhānāṃ śarkarāṇāṃ ca sasyānāṃ madhunāṃ tathā || 40 ||
[Analyze grammar]

modakānāmapūpānāmanyeṣāṃ dānamevaca |
rāmasetau dvijāḥ proktaṃ sarvābhīṣṭapradāyakam || 41 ||
[Analyze grammar]

ato dadyādrāmasetau vittalobha vivarjitaḥ |
dattaṃ hutaṃ ca taptaṃ ca japaśca niyamādikam || 42 ||
[Analyze grammar]

śrīrāmadhanuṣaḥ koṭāvanaṃtaphaladaṃ bhavet |
tena vedāśca tuṣyaṃti tuṣyaṃti pitarastathā || 43 ||
[Analyze grammar]

tuṣyaṃti munayaḥ sarve brahmāviṣṇuḥ śivastathā |
nāgāḥ kiṃpuruṣā yakṣāḥ sarve tuṣyaṃti niścitam || 44 ||
[Analyze grammar]

svayaṃ ca pūto bhavati dhanuṣkoṭyavalo kanāt |
svavaṃśajānnarānsarvānpāvayecca pitāmahān || 45 ||
[Analyze grammar]

tārayecca kulaṃ sarvaṃ dhanuṣkoṭyavalokanāt |
rāmasya dhanuṣaḥ koṭyā kṛtarevāvagāhanāt || 46 ||
[Analyze grammar]

paṃcapātakakoṭīnāṃ nāśaḥ syāttatkṣaṇe dhruvam |
śrīrāmadhanuṣaḥ koṭyā rekhāṃ yaḥ paśyate kṛtām || 47 ||
[Analyze grammar]

anekakleśasaṃpūrṇaṃ garbhavāsaṃ na paśyati |
yatra sītā'nalaṃ prāptā tasminkuṃḍe nimajjanāt || 48 ||
[Analyze grammar]

bhrūṇahatyāśataṃ viprā naśyati kṣaṇamātrataḥ |
yathā rāmastathā seturyathā gaṃgā tathā hariḥ || 49 ||
[Analyze grammar]

gaṃge hare rāmaseto tviti saṃkīrtayannaraḥ |
yatra kvāpi bahiḥ snāyāttena yāti parāṃ gatim || 50 ||
[Analyze grammar]

setāvardhodaye snātvā gandhamādanaparvate |
pitṝnuddiśya yaḥ piṃḍāndadyātsarṣapamātrakān || 51 ||
[Analyze grammar]

pitarastṛptimāyāṃti yāvaccaṃdradivākarau |
śamīpatrapramāṇaṃ tu pitṝnuddiśya bhaktitaḥ || 52 ||
[Analyze grammar]

dvijena piṇḍaṃ dattaṃ cetsarvapāpavimocitaḥ |
svargastho muktimāyāti narakastho divaṃ vrajet || 53 ||
[Analyze grammar]

setau ca padmanābhe ca gokarṇe puruṣottame |
udanvadaṃbhasi snānaṃ sārvakālikamīpsitam || 54 ||
[Analyze grammar]

śukrāṃgārakasaurīṇāṃ vāreṣu lavaṇāṃbhasi |
saṃtānakāmī na snāyā tsetoranyatra karhicit || 55 ||
[Analyze grammar]

akṛtapretakāryo vā garbhiṇīpatireva vā |
na snāyādudadhau vidvānsetoranyatra karhicit || 56 ||
[Analyze grammar]

na kālāpekṣaṇaṃ setornityasnānaṃ praśasyate |
vāratithyṛkṣaniyamāḥ setoranyatra hi dvijāḥ || 57 ||
[Analyze grammar]

uddiśya jīvataḥ snāyānna tu snāyānmṛtānprati |
kuśaiḥ pratikṛtiṃ kṛtvā snāpayettīrthavāribhiḥ || 58 ||
[Analyze grammar]

imaṃ maṃtraṃ samuccārya prasanneṃdriyamānasaḥ |
kuśo'si tvaṃ pavitro'si viṣṇunā vidhṛtaḥ purā || 59 ||
[Analyze grammar]

tvayi snāte sa ca snāto yasyaitadgraṃdhivandhanam |
sarvatra sāgaraḥ puṇyaḥ sadā parvaṇi parvaṇi || 60 ||
[Analyze grammar]

setau sindhvabdhisaṃyoge gaṃgāsāgara saṃgame |
nityasnānaṃ hi nirdiṣṭaṃ gokarṇe puruṣottame || 61 ||
[Analyze grammar]

nāparvaṇi sarinnāthaṃ spṛśedanyatra karhicit |
pitṝṇāṃ sarvadevānāṃ munīnāmapi śṛṇvatām || 62 ||
[Analyze grammar]

pratijñāmakarodrāmaḥ sītālakṣmaṇasaṃyutaḥ |
mayā hyatra kṛte setau snānaṃ kurvaṃti ye narāḥ || 63 ||
[Analyze grammar]

matprasādena te sarve yāsyaṃti punarbhavam |
naśyaṃti sarvapāpāni matsetoravalokanāt || 64 ||
[Analyze grammar]

rāmanāthasya māhātmyaṃ matsetorapi vaibhavam |
nāhaṃ varṇayituṃ śakto varṣakoṭiśatairapi || 65 ||
[Analyze grammar]

iti rāmasya vacanaṃ śrutvā devamaharṣayaḥ |
sādhusādhviti saṃtuṣṭāḥ praśaśaṃsuśca tadvacaḥ || 66 ||
[Analyze grammar]

setumadhye caturvaktraḥ sarvadevasamanvitaḥ |
adhyāste tasya rakṣārthamīśvarasyājñayā sadā || 67 ||
[Analyze grammar]

rakṣārthaṃ rāmasetau hi setumādhavasaṃjñayā |
mahāviṣṇuḥ samadhyāste nibaddho nigaḍena vai || 68 ||
[Analyze grammar]

maharṣayaśca pitaro dharmaśāstrapravartakāḥ |
devāśca sahagandharvāḥ sakinnaramahoragāḥ || 69 ||
[Analyze grammar]

vidyādharāścāraṇāśca yakṣāḥ kiṃpuruṣāstathā |
anyāni sarvabhūtāti vasaṃtyasminnaharniśam || 70 ||
[Analyze grammar]

so'haṃ dṛṣṭaḥ śruto vāpi smṛtaḥ spṛṣṭo'vagāhitaḥ |
sarvasmādduritā tpāti rāmaseturdvijottamāḥ || 71 ||
[Analyze grammar]

setāvardhodaye snānamānaṃdaprāptikāraṇam |
muktipradaṃ mahāpuṇyaṃ mahānarakanāśanam || 72 ||
[Analyze grammar]

pauṣe māse viṣṇubhasthe dineśe bhānorvāre kiṃcidudyaddineśe |
yuktā'mā cennāgahīnā tu pāte viṣṇorṛkṣe puṇyamardhodayaṃ syāt || 73 ||
[Analyze grammar]

tasminnardhodaye setau snānaṃ sāyujyakāraṇam |
vyatīpātasahasreṇa darśamekaṃ samaṃ smṛtam || 74 ||
[Analyze grammar]

darśāyutasamaṃ puṇyaṃ bhānuvāro bhavedyadi |
śravaṇarkṣa yadi bhave dbhānuvāreṇa saṃyutam || 75 ||
[Analyze grammar]

puṇyameva tu vijñeyamanyonyasyaiva yogataḥ |
ekaikamapyamṛtadaṃ snānadānajapārcanāt || 76 ||
[Analyze grammar]

paṃcasvapi ca yukteṣu kimu vaktavyamatra hi |
śravaṇaṃ jyotiṣāṃ śreṣṭhamamā śreṣṭhā tithiṣvapi || 77 ||
[Analyze grammar]

vyatīpāta tu yogānāṃ vāraṃ vāreṣu vai raveḥ |
caturṇāmapi yo yogo makarasthe ravau bhavet || 78 ||
[Analyze grammar]

tasminkāle rāmasetau yadi snāyāttu mānavaḥ |
garbhaṃ na māturāpnoti kintu sāyujyamāpnuyāt || 79 ||
[Analyze grammar]

ardhodayasamaḥ kālo na bhūto na bhaviṣyati |
evaṃ mahodayaḥ kālo dharmakālaḥ prakīrtitaḥ || 80 ||
[Analyze grammar]

eteṣu puṇyakāleṣu setau dānaṃ prakīrtitam |
ācāraśca tapo vedo vedāṃtaśravaṇaṃ tathā || 81 ||
[Analyze grammar]

śivaviṣṇvādipūjāpi purāṇārthapravaktṛtā |
yasminvipre tu vidyaṃte dānapātraṃ taducyate || 82 ||
[Analyze grammar]

pātrāya tasmai dānāni setau dadyāddvijātaye |
yadi pātraṃ na labhyeta setāvācārasaṃyutam || 83 ||
[Analyze grammar]

saṃkalpyoddiśya satpātraṃ pradadyādgrāmamāgataḥ |
ato nādhamapātrāya dātavyaṃ phalakāṃkṣibhiḥ |
uttamaṃ setumāhātmyaṃ vakturdeyaṃ na cānyataḥ || 84 ||
[Analyze grammar]

atretihāsaṃ vakṣyāmi vasiṣṭhoktamanuttamam |
dilīpāya mahārājñe dānapātravi vitsave || 85 ||
[Analyze grammar]

dilīpa uvāca |
dānāni kasmai deyāni brahmaputra purohita |
etanme tattvato brūhi tvacchiṣyasya mahāmune || 86 ||
[Analyze grammar]

vasiṣṭha uvāca |
pātrāṇāmuttamaṃ pātraṃ vedācāraparāyaṇam |
tasmādapyadhikaṃ pātraṃ śūdrānnaṃ yasya nodare || 87 ||
[Analyze grammar]

vedāḥ purāṇamaṃtrāśca śivaviṣṇvādipūjanam |
varṇāśramādyanuṣṭhānaṃ vartate yasya saṃtatam || 88 ||
[Analyze grammar]

daridraśca kuṭuṃbī ca tatpātraṃ śreṣṭhamucyate |
tasminpātre pradattaṃ vai dharma kāmārthamokṣadam || 89 ||
[Analyze grammar]

puṇyasthale viśeṣeṇa dānaṃ satpātragarhitam |
anyathā daśajanmāni kṛkalāso bhaviṣyati || 90 ||
[Analyze grammar]

janmatrayaṃ rāsabhaḥ syānmaṃḍūkaśca dvijanmani |
ekajanmani cāṇḍālastataḥ śūdro bhaviṣyati || 91 ||
[Analyze grammar]

tataśca kṣatriyo vaiśyaḥ kramādvipraśca jāyate |
daridraśca bhavettatra bahurogasamanvitaḥ || 92 ||
[Analyze grammar]

evaṃ bahuvidhā doṣā duṣṭapātrapradānataḥ |
tasmātsarvaprayatnena satpātreṣu pradāpayet || 93 ||
[Analyze grammar]

na labhyate cettatpātraṃ tadā saṃkalpapūrvakam |
ekaṃ satpātramuddiśya prakṣipedudakaṃ bhuvi || 94 ||
[Analyze grammar]

uddiṣṭapātrasya mṛtau tatputrāya samarpayet |
tasyāpi maraṇe prāpte mahādeve samarpa yet |
atonādhamapātrāya dadyāttīrthe viśeṣataḥ || 95 ||
[Analyze grammar]

śrīsūta uvāca |
evamukto vasiṣṭhena dilīpaḥ sa dvijottamāḥ || 96 ||
[Analyze grammar]

tadā prabhṛti satpātre prāyacchaddānamuttamam |
ataḥ puṇyasthale setāvatrāpi munipuṃgavāḥ || 97 ||
[Analyze grammar]

yadi labhyeta satpātraṃ tadā dadyāddhanādikam |
no cetsaṃkalpapūrvaṃ tu viśiṣṭaṃ pātramuttamam || 98 ||
[Analyze grammar]

samuddiśya jalaṃ bhūmau prakṣipedbhaktisaṃyutaḥ |
svagrāmamāgataḥ paścāttasminpātre samarpayet || 99 ||
[Analyze grammar]

pūrvaṃsaṃkalpitaṃ vittaṃ dharmalopo'nyathā bhavet |
na duḥkhaṃ punarāpnoti kiṃ tu sāyujyamāpnuyāt || 100 ||
[Analyze grammar]

ardhodayasamaḥ kālo na bhūto na bhavi ṣyati |
kumbhakoṇaṃ setumūlaṃ gokarṇaṃ naimiṣe tathā || 1 ||
[Analyze grammar]

ayodhyā daṃḍakāraṇyaṃ virūpākṣaṃ ca veṃkaṭam |
śāligrāmaṃ prayāgaṃ ca kāṃcī dvārāvatī tathā || 2 ||
[Analyze grammar]

madhurā padmanābhaṃ ca kāśī viśveśvarālayā |
nadyaḥ sarvāḥ samudrāśca parvataṃ bhāskaraṃ smṛtam || 3 ||
[Analyze grammar]

muṃḍanaṃ copavāsaśca kṣetreṣveṣu prakīrtitam |
lobhānmohādakṛtvā yaḥ svagṛhaṃ yāti mānavaḥ || 4 ||
[Analyze grammar]

sahaiva yāṃti tadgehe pātakāni ca tena vai |
caturviṃśatitīrthāni parvate gandha mādane || 5 ||
[Analyze grammar]

tatra lakṣmaṇatīrthe tu vapanaṃ munibhiḥ smṛtam |
tīre lakṣmaṇatīrthasya lomavarjyaṃ śivājñayā || 6 ||
[Analyze grammar]

śiromātrasya vapanaṃ kṛtvā dattvā ca dakṣiṇām |
snātvā lakṣmaṇatīrthe ca dṛṣṭvā lakṣmaṇaśaṃkaram || 7 ||
[Analyze grammar]

sarvapāpavinirmuktaḥ śaṃkaraṃ yāti mānavaḥ |
ardhodaye sadā snānaṃ setāvevaṃ samācaret || 8 ||
[Analyze grammar]

nāsti setusamaṃ tīrthaṃ nāsti setusamaṃ tapaḥ |
nāsti setusamaṃ puṇyaṃ nāsti setusamā gatiḥ || 9 ||
[Analyze grammar]

uparāgasahasreṇa samamardhodadayaṃ smṛtam |
ardhodayasamaḥ kālo nāsti saṃsāramocakaḥ || 110 ||
[Analyze grammar]

tasminnardhodaye rāmasetau snānaṃ tu yadbhavet |
na tattulyaṃ bhavetpuṇyaṃ sarvaśāstreṣu sarvadā || 11 ||
[Analyze grammar]

ṣaṣṭivarṣasahasrāṇi bhāgīrathyavagāhanāt |
yatpuṇyamṛṣinirdiṣṭaṃ tatpuṇyaṃ munipuṃgavāḥ || 12 ||
[Analyze grammar]

ekavāraṃ rāmasetau snānātsidhyati niścitam |
arddhodaye viśeṣeṇa tathaiva ca mahodaye || 13 ||
[Analyze grammar]

makarasthe ravau māghe prayāge pāpamocane |
māghasnānasahasreṇa yatpuṇyaṃ labhate naraḥ || 14 ||
[Analyze grammar]

tasminnardhodaye viprā rāmasetau nimajjanāt |
ekavāreṇa tatpuṇyaṃ labhate nātra saṃśayaḥ || 15 ||
[Analyze grammar]

trailokyastheṣu tīrtheṣu snātānāṃ yatphalaṃ bhavet |
sakṛdarddhodaye setau snātvā tatpuṇyabhāgbhavet || 16 ||
[Analyze grammar]

brahmajñānavihīnānāṃ kṛtaghnānāṃ durā tmanām |
pāpināmitareṣāṃ ca mahāpātakināṃ tathā || 17 ||
[Analyze grammar]

setāvarddhodaye snānādviśuddhiriti niścitā |
sthalāṃtare kṛtaghnānāṃ niṣkṛtirnāsti karhicit || 18 ||
[Analyze grammar]

setāvardhodaye snānātteṣāmapi hi niṣkṛtiḥ |
setāvarddhodaye snānaṃ ye na kurvaṃti mohataḥ || 19 ||
[Analyze grammar]

saṃsāreṣu nimajjaṃti te yathāṃdhāḥ pataṃtyadhaḥ |
setāvardhodaye snātvā bhittvā bhāskaramaṇḍalam || 120 ||
[Analyze grammar]

brahmalokaṃ prayāsyaṃti nātra kāryā vicāraṇā |
arddhodaye tu saṃprāpte snātvā setau vimuktide || 21 ||
[Analyze grammar]

snātvā samyagjagannāthaṃ rāghavaṃ sītayā saha |
rāmeśvaraṃ mahādevaṃ sugrīvādimukhānkapīn || 22 ||
[Analyze grammar]

dhyātvā devānṛṣīṃścāpi tathā pitṛgaṇānapi |
tarpayedapi tānsarvānsvadāridryavimuktaye || 23 ||
[Analyze grammar]

arddhodayākhyamamalaṃ jagannāthaṃ samarcayet |
setāvarddhodaye kāle tena prīṇāti keśavaḥ || 24 ||
[Analyze grammar]

divākara namaste'stu tejorāśe jagatpate |
atrigotrasamutpanna lakṣmī devyāḥ sahodara || 25 ||
[Analyze grammar]

arghaṃ gṛhāṇa bhagavansudhākumbha namostu te |
vyatīpātamahāyoginmahāpātakanāśana || 26 ||
[Analyze grammar]

sahasrabāho sarvātma ngṛhāṇārghyaṃ namo'stu te |
tithinakṣatravārāṇāmadhīśa parameśvara || 27 ||
[Analyze grammar]

māsarūpa gṛhaṇārghyaṃ kālarūpa namo'stu te |
iti dattvā pṛthaṅmaṃtrairarghyamarddhodaye naraḥ || 28 ||
[Analyze grammar]

upāyanāni viprebhyo dadyādvittānusārataḥ |
caturdaśa dvādaśāṣṭau sapta ṣaṭ paṃca vā dvijān || 29 ||
[Analyze grammar]

yathāśaktyannapānādyaiḥ pṛthaṅmaṃtraiḥ samarcayet |
kāṃsyapātraṃ samādāya nūtanaṃ dāravaṃ tu vā || 130 ||
[Analyze grammar]

viprāṇāṃ purataḥ sthāpya payasā paripūritam |
saphalaṃ saguḍaṃ sājyaṃ satāṃbūlaṃ sadakṣiṇam || 31 ||
[Analyze grammar]

dadyādyajñopavītaṃ ca gāṃ savatsāṃ payasvinīm |
alaṃkṛtebhyo viprebhyo yathāśakti vadedidam || 32 ||
[Analyze grammar]

śravaṇarkṣe jaga nnātha janmarkṣe tava keśava |
yanmayā dattamarthibhyastadakṣayamihāstu me || 33 ||
[Analyze grammar]

nakṣatrāṇāmadhipate devānāmamṛtaprada |
trāhi māṃ rauhiṇīkāṃta kalā śeṣanamo'stu te || 34 ||
[Analyze grammar]

dīnanātha jagannātha kalānātha kṛpākara |
tvatpādapadmayugalabhaktirastvacalā mama || 35 ||
[Analyze grammar]

vyatīpāta namaste'stu soma sūryognisaṃnibha |
yaddānādikṛtaṃ kicittadakṣayamihāstu te || 36 ||
[Analyze grammar]

arthināṃ kalpavṛkṣo'si vāsudeva janārdana |
māsartvayanakāleśa pāpaṃ śamaya me hare || 37 ||
[Analyze grammar]

ityarcayitvā vipreṃdrāstataḥ śrāddhaṃ samācaret |
hiraṇyaśrāddhamāmaṃ vā pākaśrāddhamathāpi vā || 38 ||
[Analyze grammar]

pārvaṇaṃ ca tataḥ kuryādvitta śāṭhayaṃ na kārayet |
ācāryaṃ pūjayetpaścādvastrabhūṣaṇakuṇḍalaiḥ || 39 ||
[Analyze grammar]

pratimāmarpayettasmai gāṃ ca chatramupānaham |
evamarddhodaye setau vrataṃ kuryāddvi jottamāḥ || 140 ||
[Analyze grammar]

tenaiva kṛtakṛtyaḥ syātkartavyaṃ nāsti kiṃcana |
sthalāṃtare'pyevametadvratamardhodaye caret || 41 ||
[Analyze grammar]

setuḥ samudre rāmeṇa nirmito gandhamādane |
setuḥ seturiti prājñāstasya nātra prakīrtanāt || 42 ||
[Analyze grammar]

snānakāle manuṣyāṇāṃ pātakānāṃ tu koṭayaḥ |
tatkṣaṇādeva naśyaṃti yāsyaṃtyapyatyutaṃ padam || 43 ||
[Analyze grammar]

nimiṣaṃ nimiṣārddhaṃ vā setau tiṣṭhati yo naraḥ |
taddṛṣṭigocaraṃ gaṃtuṃ na śaktā yamakiṃkarāḥ || 44 ||
[Analyze grammar]

rāmasetuṃ dhanu ṣkoṭiṃ rāmaṃ sītāṃ ca lakṣmaṇam |
rāmanāthaṃ hanūmaṃtaṃ sugrīvādimukhānkapīn || 45 ||
[Analyze grammar]

vibhīṣaṇaṃ nāradaṃ ca viśvāmitraṃ ghaṭodbhavam |
vasiṣṭhaṃ vāmadevaṃ ca jābālimatha kāśyapam || 46 ||
[Analyze grammar]

rāmabhaktāstathā cānyāṃściṃtayanmanasā tadā |
sarvaduḥkhādvimucyeta prayāti paramaṃ padam || 47 ||
[Analyze grammar]

satya kṣetre harikṣetre kṛṣṇakṣetre ca naimiṣe |
śālagrāme badaryyāṃ ca hastiśaile vṛṣācale || 48 ||
[Analyze grammar]

śeṣādrau citrakūṭe ca lakṣmīkṣetre kuraṃgake |
kāṃcike kumbhakoṇe ca mohinīpura eva ca || 49 ||
[Analyze grammar]

aindre śvetācale puṇye padmanābhe mahāsthale |
phullākhye ghaṭikādrau ca sārakṣetre hari sthale || 150 ||
[Analyze grammar]

śrīnivāse mahākṣetre bhaktanāthamahāsthale |
aliṃdākhye mahākṣetre śukakṣetre ca vāruṇe || 51 ||
[Analyze grammar]

madhurāyāṃ harikṣetre śrīgoṣṭhyāṃ puruṣottame |
śrīraṃge puṇḍarīkākṣe tathānyatra haristhale || 52 ||
[Analyze grammar]

snānena yāni pāpāni vinaśyanti dvijottamāḥ |
tāni sarvāṇi naśyaṃti setusnānena niścitam || 53 ||
[Analyze grammar]

raghunāthakṛte setau mahāmuniniṣevite |
na snāṃti ye narāsteṣāṃ na saṃsāranivartanam || 54 ||
[Analyze grammar]

ye vā namaḥ śivāyeti mantraṃ pañcākṣaraṃ śubham |
na vadanti na śṛṇvanti na smaranti munīśvarāḥ || 55 ||
[Analyze grammar]

namo nārāya ṇāyeti praṇavena samanvitam |
maṃtramaṣṭākṣaraṃ vāpi na japaṃti smaraṃti vā || 56 ||
[Analyze grammar]

evaṃ śrīrāmacaṃdrasya ṣaḍakṣaramanu tathā |
na japaṃti na śṛṇvaṃti na smaraṃti ca sattamāḥ || 57 ||
[Analyze grammar]

teṣāṃ pāpāni naśyaṃti rāmasetau nimajjanāt |
upoṣaṇaṃ na kurvaṃti ye vā haridine śubhe || 58 ||
[Analyze grammar]

na dhārayaṃti ye bhasma tripuṃḍroddhūlanādinā |
jābālopaniṣanmaṃtraissaptabhirmastakādike || 59 ||
[Analyze grammar]

śivaṃ vā keśavaṃ vāpi tathānyānapi vai surān |
na pūjayaṃti vedokta mārgeṇa dvijapuṃgavāḥ || 160 ||
[Analyze grammar]

teṣāṃ pāpāni naśyaṃti rāmasetau nimjanāt |
śivaviṣṇvādidevebhyo dhūpaṃ dīpaṃ ca caṃdanam || 61 ||
[Analyze grammar]

puṣpāṇi na pra yacchaṃti bhaktipūrvaṃ dvijottamāḥ |
śivaviṣṇvādidevānāṃ śrīrudraiścamakaistathā || 62 ||
[Analyze grammar]

śrīmatpuruṣasūktena pāvamāyādi sūktakaiḥ |
trimadhu trisuparṇaiśca paṃca śāṃtyādinā tathā || 63 ||
[Analyze grammar]

nābhiṣekaṃ prakurvaṃti ye narāḥ pāpacetasaḥ |
teṣāṃ pāpāni naśyaṃti dhanuṣkoṭau nimajjanāt || 64 ||
[Analyze grammar]

śivaviṣṇvādi devānāṃ namaskārapradakṣiṇe |
na prakurvaṃti bhaktyā ye pāpopahatabuddhayaḥ || 65 ||
[Analyze grammar]

dhanurmāse'pyuṣaḥkāle na pūjāṃ ca prakurvate |
śivaviṣṇvādidevānāṃ mahānaivedyapūrvakam || 66 ||
[Analyze grammar]

teṣāṃ pāpāni naśyaṃti rāmasetau nimajjanāt |
kīrtayaṃti na ye viṣṇornāmāni tu harasya vā || 67 ||
[Analyze grammar]

śāligrāmaśilā cakraṃ śivanābhaṃ ca ye narāḥ |
na pūjayaṃti mohena dvārakācakrameva vā || 68 ||
[Analyze grammar]

gaṃgāmṛdaṃ ca tulasīmṛttikāṃ gopicaṃdanam |
na dhārayaṃti ye mūḍhā lalāṭe corasi dvijāḥ || 69 ||
[Analyze grammar]

dordvaṃdve ca gale samyaksarvapāpaughaśāṃtaye |
rudrākṣaṃ tulasīkāṣṭhaṃ yo na dhārayate naraḥ || 170 ||
[Analyze grammar]

tasya pāpāni naśyaṃti dhanuṣkoṭau nimajjanāt |
brāhme muhūrte saṃprāpte nidrāṃ tyaktvā prasannadhīḥ || 71 ||
[Analyze grammar]

hariśaṃkaranāmāni tatstotrāṇyatha vā dvijāḥ |
yo hi ciṃtayate nityaṃ viśiṣṭaṃ maṃtrameva vā || 72 ||
[Analyze grammar]

tasya pāpāni naśyaṃti dhanuṣkoṭau nimajjanāt |
prātarjalāśaye gatvā snātvā'camya viśuddhadhīḥ || 73 ||
[Analyze grammar]

prasannātmā muniśreṣṭhāḥ saṃdhyopāsanapūrvakam |
nopāste ca naro yastu gāyatrīṃ vedamātaram || 74 ||
[Analyze grammar]

naupāsanaṃ vā kurvaṃti sāyaṃprātarataṃdritāḥ |
mādhyāhnikaṃ na kurvaṃti ye vā pāpahatāśayāḥ || 75 ||
[Analyze grammar]

brahmayajñaṃ vaiśvadevaṃ madhyāhne'tithipūjanam |
nācaraṃti ca sāyaṃ ye pūjāmatithisaṃmatām || 76 ||
[Analyze grammar]

teṣāṃ pāpāni naśyaṃti dhanuṣkoṭau nimajjanāt |
bhikṣāṃ yatīnāṃ madhyāhne na prayacchaṃti ye narāḥ || 77 ||
[Analyze grammar]

ye'pyadhītāṃ trayīṃ viprā vismaraṃti kubuddhayaḥ |
nādhīyate trayīṃ vāpi vedāṃgāni tathā punaḥ || 78 ||
[Analyze grammar]

pratyābdikaṃ mātṛpitroḥ śrāddhaṃ ye nācaraṃti vai |
śrāddhaṃ mahālayaṃ nityamaṣṭakāśrāddha meva vā || 79 ||
[Analyze grammar]

anyannaimittikaṃ śrāddhaṃ ye na kurvaṃti lobhataḥ |
ye caitre tu paurṇamāsyāṃ citraguptasya tuṣṭaye || 180 ||
[Analyze grammar]

pānakaṃ kadalīpakvaṃ pāyasānnaṃ saśarkaram |
saguḍaṃ sāmraphalakaṃ panasādiphalairyutam || 81 ||
[Analyze grammar]

tāṃbūlaṃ pāduke chatraṃ vastrapuṣpāṇi caṃdanam |
viprebhyo na prayacchaṃti lobhopahatabuddhayaḥ || 82 ||
[Analyze grammar]

teṣāṃ pāpāni naśyaṃti dhanuṣkoṭau nimajjanāt |
durvṛtto vā suvṛtto vā yo dhanuṣkoṭisevakaḥ || 83 ||
[Analyze grammar]

tasya saṃsāravicchittiḥ puna rjanma vinā bhavet |
saṃsārasāgaraṃ tartuṃ ya icchenmunipuṃgavāḥ || 84 ||
[Analyze grammar]

rāmacandradhanuṣkoṭiṃ sa gacchedavilaṃbitam |
satyaṃ vacmi hitaṃ vacmi sāraṃ vacmi hitaṃ punaḥ || 85 ||
[Analyze grammar]

rāmacandradhanuṣkoṭiṃ gacchadhvaṃ muktisiddhaye |
rāmacandradhanuṣkoṭau kuryātsnānaṃ vimuktaye || 86 ||
[Analyze grammar]

nāstyupāyāṃtaraṃ viprā bhūyobhūyo vadāmyaham |
rāmacaṃdradhanuṣkoṭau snānaṃ kurvaṃti ye narāḥ || 87 ||
[Analyze grammar]

teṣāmayatnataḥ sidhyetsaṃsārabhaya nāśanam |
satyaṃ jñānamanaṃtaṃ yatpūrṇaṃ brahma sanātanam || 88 ||
[Analyze grammar]

tatprāptiḥ syāddhanuṣkoṭau majjanānnātra saṃśayaḥ |
śrīsūta uvāca |
evaṃ vaḥ kathitaṃ viprāḥ setumāhātmyamuttamam || 89 ||
[Analyze grammar]

mahāduḥkhapraśamanaṃ mahāroganibarhaṇam |
duḥsvapnanāśanaṃ puṇyamapamṛ tyunivāraṇam || 190 ||
[Analyze grammar]

mahāśāṃtikaraṃ puṃsāṃ paṭhatāṃ śṛṇvatāmapi |
svargāpavargadaṃ puṇyaṃ sarvatīrthaphalapradam || 91 ||
[Analyze grammar]

kīrtayedya idaṃ puṇyaṃ śṛṇu yādvā samāhitaḥ |
so'gniṣṭomādiyajñānāṃ phalamāpnoti puṣkalam || 92 ||
[Analyze grammar]

caturṇāṃ sāṃgavedānāṃ śatāvṛtyā tu yatphalam |
tatphalaṃ samavāpnoti hyetanmāhātmyakīrtanāt || 93 ||
[Analyze grammar]

atraikādhyāyapaṭhanācchravaṇādvā munīśvarāḥ |
aśvamedhasya yajñasya prāpnotyavikalaṃ phalam || 94 ||
[Analyze grammar]

adhyāyadvayapāṭhena śravaṇena tathaiva ca |
gomedhākhyasya yajñasya phalamāpnotyanuttamam || 95 ||
[Analyze grammar]

daśādhyāyānpaṭhedyastu śṛṇuyādvā sabhaktikam |
svargalokamavāpnoti śakreṇa saha modate || 96 ||
[Analyze grammar]

viṃśatyadhyāyapaṭhanācchravaṇācca munīśvarāḥ |
brahmalokamavāpnoti brahmaṇā saha modate || 97 ||
[Analyze grammar]

triṃśadadhyāyapaṭhanācchravaṇācca munīśvarāḥ |
viṣṇulokamavāpnoti viṣṇunā saha modate || 98 ||
[Analyze grammar]

catvāriṃśattamādhyāyānpaṭhedvā śṛṣuyādapi |
rudralokamavāpnoti rudreṇa saha modate || 99 ||
[Analyze grammar]

yaḥ paṃcāśattamādhyāyānpaṭhate śṛṇute'pi vā |
sa sāṃbaṃ haramāpnoti śivaṃ candrārdhaśekharam || 200 ||
[Analyze grammar]

yaḥ paṭhecchraṇuyāccedaṃ kṛtsnaṃ māhātmyamuttamam |
sa sāṃbaśivasālokyamāpnotyeva na saṃśayaḥ || 1 ||
[Analyze grammar]

yaḥ paṭhecchraṇuyāccedaṃ dvivāraṃ munisatamāḥ |
sa yāti śivasāmīpyaṃ vimānavarasaṃsthitaḥ || 2 ||
[Analyze grammar]

yastrivāraṃ paṭhedetacchṛṇuyādvā samāhitaḥ |
śivasārūpyamāpnoti śivasya prītimāvahan || 3 ||
[Analyze grammar]

caturvāraṃ paṭhedyastu śṛṇuyādvedamuttamam |
sa sāyujyamavāpnoti śivasya girijāpateḥ || 4 ||
[Analyze grammar]

dinedine paṭhenmartyaḥ ślokaṃ ślokārdhameva vā |
pādaṃ vā pādamātraṃ vā akṣaraṃ varṇameva vā || 5 ||
[Analyze grammar]

tattaddinakṛtaṃ pāpaṃ tatkṣaṇādeva naśyati |
kṛtsne'sminsetumāhātmye paṭhite'pi śrute'pi vā || 6 ||
[Analyze grammar]

ślokeṣvatraiva vartaṃte varṇā yāvaṃta eva hi |
tāvatyo brahmahatyāśca tāvanmadyaniṣevaṇam || 7 ||
[Analyze grammar]

tāvatsuvarṇasteyaṃ ca tāvāngurvaṃganāgamaḥ |
tāvatsaṃsargadoṣāśca naśyaṃtyevaṃ hi tatkṣaṇāt || 8 ||
[Analyze grammar]

yāvato'sminmahāpuṇye vartaṃte varṇarāśayaḥ |
tāvatkṛtvaścaturviṃśattīrtheṣu snānajaṃ phalam || 9 ||
[Analyze grammar]

tathānyeṣvapi tīrtheṣu setumadhyagateṣu vai |
tatphalaṃ samavāpnoti pāṭhena śravaṇena vā || 210 ||
[Analyze grammar]

yenedaṃ likhitaṃ bhaktyā setumāhātmyamuttamam |
vinaṣṭājñānasaṃtānaḥ śivasāyujyamāpnuyāt || 11 ||
[Analyze grammar]

yasyedaṃ vartate gehe māhātmyaṃ likhitaṃ śubham |
bhūtavetālakādibhyo bhītistatra na vidyate || 12 ||
[Analyze grammar]

vyādhipīḍā na tatrāsti nāsti corabhayaṃtathā |
śanyaṃgārakamukhyānāṃ grahāṇāṃ nāsti pīḍanam || 13 ||
[Analyze grammar]

yadgṛhe vartate puṇyamidaṃ māhā tmyamuttamam |
rāmasetuṃ vijānīta tadgṛhaṃ munipuṃgavāḥ || 14 ||
[Analyze grammar]

caturviṃśati tīrthāni tatraiva nivasaṃti hi |
tatraiva vartate puṇyo gandhamādanaparvataḥ || 15 ||
[Analyze grammar]

brahmaviṣṇumaheśāśca vartaṃte tatra sādaram |
likhitvā setumāhātmyaṃ brāhmaṇāya nivedayet |
catuḥsāgaraparyaṃtā tena dattā vasuṃdharā || 16 ||
[Analyze grammar]

setumāhātmyadānamantraḥ |
setumāhātmyadānasya kalā nārhaṃti ṣoḍaśīm |
dānānyanyāni sarvāṇi hyataḥ śāntiṃ prayaccha me |
kiṃ punarbahu noktena vasatyatra jagattrayam || 17 ||
[Analyze grammar]

śrāvayecchrāddhakāle yo hyekamadhyāyamatra vai |
naśyecchrāddhasya vaikalyaṃ pitaro'pyatiharṣitāḥ || 18 ||
[Analyze grammar]

yaḥ parvakāle saṃprāpte brāhmaṇāñchrāvayedidam |
adhyāyamekaṃ ślokaṃ vā gāvosya nirupadravāḥ |
bahukṣīrā savatsāśca mahiṣyo'sya bhavaṃti hi || 19 ||
[Analyze grammar]

paṭhanīyamidaṃ puṇyaṃ maṭhe devālaye'pi vā |
nadītaṭākatīreṣu puṇye vāraṇyabhūtale |
śrotriyāṇāṃ gṛhe vāpi naivānyatra tu karhicit || 220 ||
[Analyze grammar]

viṣuvāyana kāleṣu puṇye ca harivāsare |
aṣṭamyāṃ ca caturdaśyāṃ paṭhanīyaṃ viśeṣataḥ || 21 ||
[Analyze grammar]

idaṃ hi pāṭhyaṃ śrāvaṇyāṃ māsi bhādrapade tathā |
dhanurmāse ca pāṭhyaṃ syātpāṭhyaṃ caivottarāyaṇe || 22 ||
[Analyze grammar]

niyamenaiva māhātmyaṃ paṭhanīyamidaṃ dvijāḥ |
śrotāro niyamairyuktāḥ śṛṇuyuścedamuttamam || 23 ||
[Analyze grammar]

kīrtyaṃte puṇyatīrthāni māhātmye'sminbahūni vai |
kīrtyaṃte puṇyaśīlāśca tathā rājarṣisattamāḥ || 24 ||
[Analyze grammar]

ṛṣayaśca mahābhāgāḥ kīrtyaṃte'sminnanuttame |
dharmādharmau ca kīrtyete puṇyesmindvijapuṃgavāḥ || 25 ||
[Analyze grammar]

brahmā viṣṇuśca rudraśca kīrtyaṃte'tra trimūrtayaḥ |
idaṃ pavitraṃ pāpaghnaṃ śrutyarthairupabṛṃhi tam || 26 ||
[Analyze grammar]

saṃmataṃ smṛtikartṝṇāṃ dvaipāyanamunipriyam |
śrotavyaṃ paṭhitavyaṃ ca ātmanaḥ śreya icchatā || 27 ||
[Analyze grammar]

śrāvakāya ca dātavyaṃ yatkiṃcitkāṃcanādikam |
svasvaśaktyanurodhena vittaśāṭhyaṃ na kārayet || 28 ||
[Analyze grammar]

vastraṃ hiraṇyaṃ dhānyaṃ vā bhūmiṃ gāṃ ca yathābalam |
dattvā saṃbhāvanīyo'yaṃ śrāvakaḥ śrotṛbhirjanaiḥ || 29 ||
[Analyze grammar]

pūjite śrāvake tasminpūjitāḥ syustrimūrtayaḥ |
jagattrayaṃ pūjitaṃ syātpūjitāsu trimūrtiṣu || 230 ||
[Analyze grammar]

avatīrṇo mahīṃ sākṣādrāmo dāśarathirhariḥ |
sasītālakṣmaṇo nityaṃ śrotṛbhyaḥ śrāvakāya ca || 31 ||
[Analyze grammar]

dattveha loke bhogāṃśca muktiṃ cāṃte prayacchati |
dvaipāyanamukhāṃbhojānniḥsṛtaṃ śubhadaṃ param || 32 ||
[Analyze grammar]

idaṃ vai setumāhātmyaṃ dharmarājo yudhiṣṭhiraḥ |
bhīmasenādibhiḥ sarvairanujairapi saṃvṛtaḥ || 33 ||
[Analyze grammar]

niyamācārasaṃyuktaḥ sasainyaśca dinedine |
śṛṇoti paṭhato dhaumyamaharṣeḥ svapurodhasaḥ || 34 ||
[Analyze grammar]

śrīsūta uvāca |
bhobho stapodhanāḥ sarve naimiṣāraṇyavāsinaḥ |
matsakāśādidaṃ guhyaṃ māhātmyaṃ śrutisaṃmitam || 35 ||
[Analyze grammar]

śrutaṃ bhavadbhirniyatairnityaṃ paṭhata sādaram |
pāṭhayadhvaṃ svaśiṣyebhyo niyatebhyo nirantaram || 36 ||
[Analyze grammar]

ityuktvā tānmunīnsūto romāṃcitakalevaraḥ |
guruṃ hṛdā smaranvyāsaṃ nanartāśrūṇi vartayan || 37 ||
[Analyze grammar]

atrāṃtare mahāvidvānpārāśaryo mahāmuniḥ |
āśu prādurabhūttatra śiṣyānugrahakāṃkṣayā || 38 ||
[Analyze grammar]

tamāgataṃ vilokyātha muniṃ satyavatīsutam |
sūtaḥ sarvaiśca sahito naimiṣāraṇyavāsibhiḥ || 39 ||
[Analyze grammar]

vyāsasya caraṇāṃbhoje daṃḍavatpraṇipatya tu |
jalamānaṃdajaṃ tatra netrābhyāṃparyavartayat || 240 ||
[Analyze grammar]

praṇataṃ priyaśiṣyaṃ taṃ dorbhyāmutthāpya vai muniḥ |
āśīrbhirabhinaṃdyainamāliṃgya ca muhurmuhuḥ || 41 ||
[Analyze grammar]

naimiṣāraṇyamunibhirānīte paramāsane |
dvaipāyano mahātejā niṣasāda tapodhanaḥ || 42 ||
[Analyze grammar]

muniṣvapyupaviṣṭeṣu sūte'pi ca nijājñayā |
śaunakādīnmunīnsarvāñchakteḥ pautro'bhyabhāṣata || 43 ||
[Analyze grammar]

mayā jñātamidaṃ sarvaṃ naimiṣāraṇyavāsinaḥ |
mama śiṣyeṇa sūtena setumāhātmyamuttamam |
kathitaṃ bhavatāmadya mahāpātakanāśanam || 44 ||
[Analyze grammar]

śrutīnāṃ ca smṛtīnāṃ ca purāṇānāṃ tathaiva ca |
śāstrāṇāṃ cetihāsānāmanyeṣāmapi kṛtsnaśaḥ || 45 ||
[Analyze grammar]

eṣa paryavasanno'rtho māhātmyaṃ yattvidaṃ mahat |
sarveṣvapi purāṇeṣu idaṃ bahumataṃ mama || 46 ||
[Analyze grammar]

śṛṇoti dharmajo dhaumyādidaṃ nityaṃ mamājñayā |
ato bhavaṃto'pi sadā setumāhātmyamuttamam || 47 ||
[Analyze grammar]

paṭhaṃtu śṛṇvaṃtu tathā śiṣyāṇāṃ pāṭhayaṃtu ca |
tacchrutvā vacanaṃ tasya te prāhurbāḍhamityapi || 48 ||
[Analyze grammar]

tato vyāso'pi sūtena śiṣyeṇa ca samanvitaḥ |
anujñāpya munīntsarvānkailāsaṃ parvataṃ yayau || 49 ||
[Analyze grammar]

ṛṣayo naimiṣāraṇyanilayāstuṣṭimāgatāḥ |
pratyahaṃ setumāhātmyaṃ śṛṇvaṃti ca paṭhaṃti ca || 250 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe setumāhātmye dvipaṃcāśattamo'dhyāyaḥ || 52 ||
[Analyze grammar]