Chapter 46

[English text for this chapter is available]

śrīrāma uvāca |
paṃpāraṇye vayaṃ dīnāstvayā vānarapuṃgava |
āśvāsitāḥ kārayitvā sakhyamādityasūnunā || 1 ||
[Analyze grammar]

tvāṃ dṛṣṭvā pitaraṃ bandhūnkausalyāṃ jananīmapi |
na smarāmo vayaṃ sarvānme tvayopakṛtaṃ bahu || 2 ||
[Analyze grammar]

madarthaṃ sāgarastīrṇo bhavatā bahu yojanaḥ |
talaprahārābhihato maināko'pi nagottamaḥ || 3 ||
[Analyze grammar]

nāgamātā ca surasā madarthaṃ bhavatā jitā |
chāyāgrahāṃ mahākrūrāma vadhīdrākṣasīṃ bhavān || 4 ||
[Analyze grammar]

sāyaṃ suvelamāsādya laṃkāmāhatya pāṇinā |
ayāsī rāvaṇagṛhaṃ madarthaṃ tvaṃ mahākape || 5 ||
[Analyze grammar]

sītāmanviṣya laṃkāyāṃ rātrau gatabhayo bhavān |
adṛṣṭvā jānakīṃ paścādaśokavanikāṃ yayau || 6 ||
[Analyze grammar]

namaskṛtya ca vaidehīmabhijñānaṃ pradāya ca |
cūḍāmaṇiṃ samādāya madarthaṃ jānakīkarāt || 7 ||
[Analyze grammar]

aśokavanikāvṛkṣānabhāṃkṣīstvaṃ mahākape |
tatastvaśītisāhasrānkiṃkarānnāma rākṣasān || 8 ||
[Analyze grammar]

rāvaṇapratimānyuddhe patyaśvebharathākulān |
avadhīstvaṃ madarthe vai mahābalaparākramān || 9 ||
[Analyze grammar]

tataḥ prahastatanayaṃ jaṃbumālinamāgatam |
avadhīnmaṃtritanayānsapta saptārcivarcasaḥ || 10 ||
[Analyze grammar]

paṃca senāpatīnpaścādanayastvaṃ yamālayam |
kumāramakṣamavadhīstatastvaṃ raṇamūrdhani || 11 ||
[Analyze grammar]

tata indrajitā nīto rākṣaseṃdra sabhāṃ śubhām |
tatra laṃkeśvaraṃ vācā tṛṇīkṛtyāvamanya ca || 12 ||
[Analyze grammar]

abhāṃkṣīstvaṃ purīṃ laṃkāṃ madarthaṃ vāyunaṃdana |
punaḥ pratinivṛttastvamṛṣyamūkaṃ mahāgirim || 13 ||
[Analyze grammar]

evamādi mahāduḥkhaṃ madarthaṃ prāptavānasi |
tvamatra bhūtale śeṣe mama śokamudīrayan || 14 ||
[Analyze grammar]

ahaṃ prāṇānparityakṣye mṛto'si yadi vāyuja |
sītayā mama kiṃ kāryaṃ lakṣmaṇenānujena vā || 15 ||
[Analyze grammar]

bharatenāpi kiṃ kāryaṃ śatrughnena śriyāpi vā |
rājyenāpi na me kāryaṃ paretastvaṃ kape yadi || 16 ||
[Analyze grammar]

uttiṣṭha hanumanvatsa kiṃ śeṣe'dya mahītale |
śayyāṃ kuru mahābāho nidrārthaṃ mama vānara || 17 ||
[Analyze grammar]

kandamūlaphalāni tvamāhārārthaṃ mamāhara |
snātumadya gamiṣyāmi śīghraṃ kalaśamānaya || 18 ||
[Analyze grammar]

ajināni ca vāsāṃsi darbhāṃśca samupāhara |
brahmāstreṇāvabaddho'haṃ mocitaśca tvayā hare || 19 ||
[Analyze grammar]

lakṣmaṇena saha bhrātrā hyauṣadhānayanena vai |
lakṣmaṇaprāṇadātā tvaṃ paulastyamadanāśanaḥ || 20 ||
[Analyze grammar]

sahāyena tvayā yuddhe rākṣasā nrāvaṇādikān |
nihatyātibalānvīrānavāpaṃ maithilīmaham || 21 ||
[Analyze grammar]

hanūmannaṃjanāsūno sītāśokavināśana |
kathamevaṃ parityajya lakṣmaṇaṃ māṃ ca jānakīm || 22 ||
[Analyze grammar]

aprāpayitvāyodhyāṃ tvaṃ kimarthaṃ gatavānasi |
kva gatosi mahāvīra mahārākṣasakaṇṭaka || 23 ||
[Analyze grammar]

iti paśyanmukhaṃ tasya nirvākyaṃ raghunaṃdanaḥ |
prarudannaśrujālena secayāmāsa vāyujam || 24 ||
[Analyze grammar]

vāyuputrastato mūrcchāmapahāya śanairdvijāḥ |
paulastyabhayasaṃtrastalokarakṣārthamāgatam || 25 ||
[Analyze grammar]

āśritya mānuṣaṃ bhāvaṃ nārāyaṇamajaṃ vibhum |
jānakīlakṣmaṇayutaṃ kapibhiḥ parivāritam || 26 ||
[Analyze grammar]

kālāṃbhodharasaṃkāśaṃ raṇadhūlisamukṣitam |
jaṭāmaṇḍalaśobhāḍhyaṃ puṇḍarīkāyatekṣaṇam || 27 ||
[Analyze grammar]

khinnaṃ ca bahuśo yuddhe dadarśa raghunaṃdanam |
stūyamānamamitraghnaṃ devarṣipitṛkinnaraiḥ || 28 ||
[Analyze grammar]

dṛṣṭvā dāśarathiṃ rāmaṃ kṛpābahulacetasam |
raghunāthakarasparśapūrṇagātraḥ sa vānaraḥ || 29 ||
[Analyze grammar]

patitvā daṇḍavadbhūmau kṛtāṃjalipuṭo dvijāḥ |
astauṣījjānakīnāthaṃ stotraiḥ śrutimanoharaiḥ || 30 ||
[Analyze grammar]

hanūmānuvāca |
namo rāmāya haraye viṣṇave prabhaviṣṇave |
ādidevāya devāya purāṇāya gadābhṛte || 31 ||
[Analyze grammar]

viṣṭare puṣpakaṃ nityaṃ niviṣṭāya mahātmane |
prahṛṣṭavānarānīkajuṣṭapādāṃbujāya te || 32 ||
[Analyze grammar]

niṣpiṣṭa rākṣaseṃdrāya jagadiṣṭavidhāyine |
namaḥ sahasraśirase sahasracaraṇāya ca || 33 ||
[Analyze grammar]

sahasrākṣāya śuddhāya rāghavāya ca viṣṇave |
bhaktārtihāriṇe tubhyaṃ sītāyāḥ pataye namaḥ || 34 ||
[Analyze grammar]

haraye nārasiṃhāya daityarājavidāriṇe |
namastubhyaṃ varāhāya daṃṣṭroddhṛtavasundhara || 35 ||
[Analyze grammar]

trivikramāya bhavate baliyajña vibhedine |
namo vāmanarūpāya namo maṃdaradhāriṇe || 36 ||
[Analyze grammar]

namaste matsyarūpāya trayīpālanakāriṇe |
namaḥ paraśurāmāya kṣatriyāṃtakarāya te || 37 ||
[Analyze grammar]

namaste rākṣasaghnāya namo rāghavarūpiṇe |
mahādeva mahābhīma mahākodaṇḍabhedine || 38 ||
[Analyze grammar]

kṣatriyāṃtakarakrūrabhārgavatrāsakāriṇe |
namo'stvahilyā saṃtāpahāriṇe cāpahāriṇe || 39 ||
[Analyze grammar]

nāgāyutavalopetatāṭakādehahāriṇe |
śilākaṭhinavistāravālivakṣovibhedine || 40 ||
[Analyze grammar]

namo māyā mṛgonmāthakāriṇe'jñānahāriṇe |
daśasyaṃdanaduḥkhābdhiśoṣaṇāgastyarūpiṇe || 41 ||
[Analyze grammar]

anekormisamādhūtasamudramadahāriṇe |
maithilīmānasāṃ bhojabhānave lokasākṣiṇe || 42 ||
[Analyze grammar]

rājeṃdrāya namastubhyaṃ jānakīpataye hare |
tārakabrahmaṇe tubhyaṃ namo rājīvalocana || 43 ||
[Analyze grammar]

rāmāya rāmacandrāya vareṇyāya sukhātmane |
viśvāmitrapriyāyedaṃ namaḥ kharavidāriṇe || 44 ||
[Analyze grammar]

prasīda devadeveśa bhaktānāmabhayaprada |
rakṣa māṃ karu ṇāsiṃdho rāmacandra namo'stu te || 45 ||
[Analyze grammar]

rakṣa māṃ vedavacasāmapyagocara rāghava |
pāhi māṃ kṛpayā rāma śaraṇaṃ tvāmupaimyaham || 46 ||
[Analyze grammar]

raghuvīra mahāmohamapākuru mamādhunā |
snāne cācamane bhukto jāgratsvapnasuṣuptiṣu || 47 ||
[Analyze grammar]

sarvāvasthāsu sarvatra pāhi māṃ raghunaṃdana |
mahimānaṃ tava stotuṃ kaḥ samartho jagattraye || 48 ||
[Analyze grammar]

tvameva tvanmahattvaṃ vai jānāsi raghunaṃdana |
iti stutvā vāyuputro rāmacaṃdraṃ ghṛṇānidhim || 49 ||
[Analyze grammar]

sītāmapyabhituṣṭāva bhaktiyuktena cetasā |
jānaki tvāṃ namasyāmi sarvapāpapraṇāśinīm || 50 ||
[Analyze grammar]

dāridryaraṇasaṃhartrīṃ bhaktānāmiṣṭadāyinīm |
videharājatanayāṃ rāghavānaṃdakāriṇīm || 51 ||
[Analyze grammar]

bhūmerduhitaraṃ vidyāṃ namāmi prakṛtiṃ śivām |
paulastyaiśvaryasaṃhartrīṃ bhaktābhīṣṭāṃ sarasvatīm || 52 ||
[Analyze grammar]

pativratādhurīṇāṃ tvāṃ namāmi janakātmajām |
anugrahaparāmṛddhimanaghāṃ harivallabhām || 53 ||
[Analyze grammar]

ātmavidyāṃ trayīrūpāmumārūpāṃ namāmya ham |
prasādābhimukhīṃ lakṣmīṃ kṣīrābdhitanayāṃ śubhām || 54 ||
[Analyze grammar]

namāmi candrabhaginīṃ sītāṃ sarvāṃgasuṃdarīm |
namāmi dharmanilayāṃ karuṇāṃ vedamātaram || 55 ||
[Analyze grammar]

padmālayāṃ padmahastāṃ viṣṇuvakṣasthalālayām |
namāmi candranilayāṃ sītāṃ candranibhānanām || 56 ||
[Analyze grammar]

āhlādarūpiṇīṃ siddhiṃ śivāṃ śivakarīṃ satīm |
namāmi viśvajananīṃ rāmacandreṣṭavallabhām |
sītāṃ sarvānavadyāṃgīṃ bhajāmi satataṃ hṛdā || 57 ||
[Analyze grammar]

śrīsūta uvāca |
stutvaivaṃ hanumānsītārāmacandrau sabhaktikam || 58 ||
[Analyze grammar]

ānaṃdāśrupariklinnastūṣṇīmāste dvijottamāḥ |
ya idaṃ vāyuputreṇa kathitaṃ pāpanāśanam || 59 ||
[Analyze grammar]

stotraṃ śrīrāmacaṃdrasya sītāyāḥ paṭhate'nvaham |
sa naro mahadaiśvaryamaśnute vāṃchitaṃ sa dā || 60 ||
[Analyze grammar]

anekakṣetradhānyāni gāśca dogdhrīḥ payasvinīḥ |
āyurvidyāśca putrāṃśca bhāryāmapi manoramām || 61 ||
[Analyze grammar]

etatstotraṃ sakṛ dviprāḥ paṭhannāpnotyasaṃśayaḥ |
etatstotrasya pāṭhena narakaṃ naiva yāsyati || 62 ||
[Analyze grammar]

brahmahatyādipāpāni naśyaṃti sumahāṃtyapi |
sarvapāpavinirmukto dehāṃte muktimāpnuyāt || 63 ||
[Analyze grammar]

iti stuto jagannātho vāyuputreṇa rāghavaḥ |
sītayā sahito viprā hanūmaṃtamathābravīt || 64 ||
[Analyze grammar]

śrīrāma uvāca |
ajñānādvā naraśreṣṭha tvayedaṃ sāhasaṃ kṛtam |
brahmaṇā viṣṇunā vāpi śakrāditridaśairapi || 65 ||
[Analyze grammar]

nedaṃ liṃgaṃ samuddhartuṃ śakyate sthāpitaṃ mayā |
mahādevāparādhena patito'syadya mūrcchitaḥ || 66 ||
[Analyze grammar]

itaḥ paraṃ mā kriyatāṃ drohaḥ sāṃbasya śūlinaḥ |
adyārabhya tvidaṃ kuṃḍaṃ tava nāmnā jagattraye || 67 ||
[Analyze grammar]

khyātiṃ prayātu yatra tvaṃ patito vānarottama |
mahāpātakasaṃghānāṃ nāśaḥ syādatra majjanāt || 68 ||
[Analyze grammar]

mahādevajaṭājātā gautamī saritāṃ varā |
aśvamedhasahasrasya phaladā snāyināṃ nṛṇām || 69 ||
[Analyze grammar]

tataḥ śataguṇā gaṃgā yamunā ca sarasvatī |
etannadītrayaṃ yatra sthale pravahate kape || 70 ||
[Analyze grammar]

militvā tatra tu snānaṃ sahasraguṇitaṃ smṛtam |
nadīṣvetāsu yatsnānātphalaṃ puṃsāṃ bhavetkape || 71 ||
[Analyze grammar]

tatphalaṃ tava kuṃḍe'sminsnānātprāpnotyasaṃśayam |
durlabhaṃ prāpya mānuṣyaṃ hanūmatkuṃḍatīrataḥ || 72 ||
[Analyze grammar]

śrāddhaṃ na kurute yastu bhaktiyuktena cetasā |
nirāśāstasya pitaraḥ prayāṃti kupitāḥ kape || 73 ||
[Analyze grammar]

kupyaṃti munayo'pyasmai devāḥ seṃdrāḥ sacāraṇāḥ |
na dattaṃ na hutaṃ yena hanūmatkuṃḍatīrataḥ || 74 ||
[Analyze grammar]

vṛthājīvita evāsāvihāmutra ca duḥkhabhāk |
hanūmatkuṃḍasavidhe yena dattaṃ tilodakam |
modaṃte pitarastasya ghṛtakulyāḥ pibaṃti ca || 75 ||
[Analyze grammar]

śrīsūta uvāca |
śrutvaitadvacanaṃ viprā rāmeṇoktaṃ sa vāyujaḥ || 76 ||
[Analyze grammar]

uttare rāmanāthasya liṃgaṃ svenāhṛtaṃ mudā |
ājñayā rāmacandrasya sthāpayāmāsa vāyujaḥ || 77 ||
[Analyze grammar]

pratyakṣameva sarveṣāṃ kapilāṃgūlaveṣṭitam |
haropi tatpucchajā taṃ bibharti ca valitrayam |
taduttarāyāṃ kakubhi gaurīṃ saṃsthāpayanmudā || 78 ||
[Analyze grammar]

śrīsūta uvāca |
evaṃ vaḥ kathitaṃ viprā yadarthaṃ rāghaveṇa tu || |
liṃgaṃ pratiṣṭhitaṃ setau bhuktimuktipradaṃ nṛṇām || 79 ||
[Analyze grammar]

yaḥ paṭhedimamadhyāyaṃ śṛṇuyādvā samāhitaḥ |
sa vidhūyeha pāpāni śivaloke mahīyate || 80 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe setumāhātmye rāmanāthaliṃgapratiṣṭhākāraṇavarṇanaṃnāma ṣaṭcatvāriṃśo'dhyāyaḥ || 46 ||
[Analyze grammar]