Chapter 30

[English text for this chapter is available]

śrīsūta uvāca |
vihitābhiṣavo martyaḥ sarvatīrthe'tipāvane |
brahmahatyādipāpaghnīṃ dhanuṣkoṭiṃ tato vrajet || 1 ||
[Analyze grammar]

yasyāḥ smaraṇamātreṇa muktaḥ syānmānavo bhuvi |
dhanuṣkoṭiṃ prapaśyaṃti snāṃti vā kathayaṃti ye || 2 ||
[Analyze grammar]

aṣṭāviṃśatibhedāṃste narakānnopabhuṃjate |
tāmisramaṃdhatāmisraṃ mahārauravarauravau || 3 ||
[Analyze grammar]

kumbhīpākaṃ kālasūtramasipatravanaṃ tathā |
kṛmibhakṣoṃ'dhakūpaśca saṃdaṃśaṃ śālmalī tathā || 4 ||
[Analyze grammar]

sūrmirvaitaraṇī prāṇarodho viśasanaṃ tathā |
lālābhakṣo'pyavīciśca sārameyādanaṃ tathā || 5 ||
[Analyze grammar]

tathaiva vajrakaṇakaṃ kṣārakardamapātanam |
rakṣogaṇāśanaṃ cāpi śūlaprotaṃ vitodanam || 6 ||
[Analyze grammar]

daṃdaśūkāśanaṃ cāpi paryāvartanasaṃjñitam |
tirodhānābhidhaṃ viprāstathā sūcīmukhābhidham || 7 ||
[Analyze grammar]

pūyaśoṇitabhakṣaṃ ca viṣāgniparipīḍanam |
aṣṭāviṃśatisaṃkhyākamevaṃ narakasaṃcayam || 8 ||
[Analyze grammar]

na yāti manujo viprā dhanuṣkoṭau nimajjanāt |
vittāpatyakalatrāṇāṃ yo'nyeṣāmapahārakaḥ || 9 ||
[Analyze grammar]

sa kālapāśanirbaddho yamadūtairbhayānakaiḥ |
tāmisranarake ghore pātyate bahuvatsaram || 10 ||
[Analyze grammar]

snāti ceddhanuṣaḥ koṭau tasminnāsau nipātyate |
yo nihatya tu bhartāraṃ bhuṃkte tasya dhanādikān || 11 ||
[Analyze grammar]

pātyate soṃ'dhatāmisre mahāduḥkhasamākule |
snāti ceddhanuṣaḥ koṭau tasminnāsau nipātyate || 12 ||
[Analyze grammar]

bhūtadroheṇa yo martyaḥ puṣṇāti svakuṭuṃbakam |
sa tāniha vihāyāśu raurave pātyate dhruvam || 13 ||
[Analyze grammar]

viṣolbaṇamahāsarpasaṃkule yamapūruṣaiḥ |
snāti ceddhanuṣaḥ koṭau tasminnāsau nipātyate || 14 ||
[Analyze grammar]

yaḥ svadehaṃbharo martyo bhāryāputrādikaṃ vinā |
sa mahāraurave ghore pātyate nijamāṃsabhuk || 15 ||
[Analyze grammar]

snāti ceddhanuṣaḥ koṭau tasmi nnāsau nipātyate |
yaḥ paśūnpakṣiṇo vāpi saprāṇānniruṇaddhi vai || 16 ||
[Analyze grammar]

kṛpāleśavihīnaṃ taṃ kravyādairapi niṃditam |
kuṃbhīpāke taptataile pāta yaṃti yamānugāḥ || 17 ||
[Analyze grammar]

snāti ceddhanuṣaḥ koṭau tasminnāsau nipātyate |
mātaraṃ pitaraṃ viprānyo dveṣṭi puruṣādhamaḥ || 18 ||
[Analyze grammar]

sa kālasūtra narake vistṛtāyutayojane |
adhastādagnisaṃtapta uparyarkamarīcibhiḥ || 19 ||
[Analyze grammar]

khale tāmramaye viprāḥ pātyate kṣudhayārditaḥ |
snāti ceddhanuṣaḥ koṭau tasminnāsau nipātyate || 20 ||
[Analyze grammar]

yo vedamārgamullaṃghya vartate kupathe naraḥ |
so'sipatravane ghore pātyate yamakiṃkaraiḥ || 21 ||
[Analyze grammar]

snāti ceddhanuṣaḥ koṭau tasminnāsau nipātyate |
yo rājā rājabhṛtyo vā hyadaṃḍye daṃḍamācaret || 22 ||
[Analyze grammar]

śarīradaṃḍaṃ vipre vā sa śūkaramukhe dvijāḥ |
pātyate narake ghore ikṣuvadyaṃtrapīḍitaḥ || 23 ||
[Analyze grammar]

snāti ceddhanuṣaḥ koṭau tasminnāsau nipātyate |
īśvarādhīnavṛttīnāṃ hiṃsāṃ yaḥ prāṇināṃ caret || 24 ||
[Analyze grammar]

taireva pīḍyamāno'yaṃ jaṃtubhiḥ svena pīḍitaiḥ |
aṃdhakūpe mahābhīme pātyate yamakiṃkaraiḥ || 25 ||
[Analyze grammar]

tatrāṃdhakārabahule vinidro nirvṛtaścaret |
ceddhanuṣaḥ koṭau tasminnāsau nipātyate || 26 ||
[Analyze grammar]

yo'śnāti paṃktibhedena sasyasūpādikaṃ naraḥ |
akṛtvā paṃcayajñaṃ vā bhuṃkte mohena sa dvijāḥ || 27 ||
[Analyze grammar]

prapātyate yamabhaṭairnarake kṛmibhojane |
bhakṣyamāṇaḥ kṛmiśatairbhakṣayankṛmisaṃca yān || 28 ||
[Analyze grammar]

svayaṃ ca kṛmibhūtaḥ saṃstiṣṭhedyāvadaghakṣayam |
snāti ceddhanuṣaḥ koṭau tasminnāsau nipātyate || 29 ||
[Analyze grammar]

yo haredvipravittāni steyena balato'pi vā |
anyeṣāmapi vittāni rājā tatpuruṣo'pi vā || 30 ||
[Analyze grammar]

ayasmayāgnikuṃḍeṣu saṃdaṃśaiḥ so'tipīḍitaḥ |
saṃdaṃśe narake ghore pātyate yamapūruṣaiḥ || 31 ||
[Analyze grammar]

snāti ceddhanuṣaḥ koṭau tasminnāsau nipātyate |
agamyāṃ yobhigaccheta striyaṃ vai puruṣādhamaḥ || 32 ||
[Analyze grammar]

agamyaṃ puruṣaṃ yoṣidabhigaccheta vā dvijāḥ |
tāvayasmayanārīṃ ca puruṣaṃ cāpyayasmayam || 33 ||
[Analyze grammar]

taptāvāliṃgya tiṣṭhaṃtau yāvaccaṃdradivākarau |
sūrmyākhye narake ghore pātyete bahukaṃṭake || 34 ||
[Analyze grammar]

snāti ceddhanuṣaḥ koṭau tasminnāsau nipātyate |
bādhate sarvajaṃtūnyo nāno pāyairupadravaiḥ || 35 ||
[Analyze grammar]

śālmalīnarake ghore pātyate bahukaṃṭake |
snāti ceddhanuṣaḥ koṭau tasminnāsau nipātyate || 36 ||
[Analyze grammar]

rājā vā rājabhṛtyo vā yaḥ pāṣaṃḍamanuvrataḥ |
bhedako dharmasetūnāṃ vaitaraṇyāṃ nipātyate || 37 ||
[Analyze grammar]

snāni ceddhanuṣaḥ koṭau tasminnāsau nipātyate |
vṛṣalīsaṃgaduṣṭo yaḥ śaucādyācāravarjitaḥ || 38 ||
[Analyze grammar]

tyaktalajjastyaktavedaḥ paśucaryārata stathā |
sa pūyaviṣṭhāmūtrāsṛkchleṣmapittādipūrite || 39 ||
[Analyze grammar]

atibībhatsanarake pātyate yamakiṃkaraiḥ |
snāti ceddhanuṣaḥ koṭau tasminnāsau nipātyate || 40 ||
[Analyze grammar]

aśmabhirmṛgayurhanyādbāṇai rvā bādhate mṛgān |
sa vidhyamāno bāṇaughaiḥ paratra yamakiṃkaraiḥ || 41 ||
[Analyze grammar]

prāṇarodhākhyanarake pātyate yamakiṃkaraiḥ |
snāti ceddhanuṣaḥ koṭau tasminnāsau nipātyate || 42 ||
[Analyze grammar]

dāṃbhiko yaḥ paśūnyajñe vidhyanuṣṭhānavarjitaḥ |
haṃtyasau paralokeṣu vaiśase narake dvijāḥ || 43 ||
[Analyze grammar]

kṛntyamāno yamabhaṭaiḥ pātyate duḥkhasaṃkule |
snāti ceddhanuṣaḥ koṭau tasminnāsau nipātyate || 44 ||
[Analyze grammar]

ātmabhāryāṃ savarṇāṃ yo retaḥ pāyayate tu saḥ |
paratra retaḥpāyī sanretaḥkuṃḍe nipātyate || 45 ||
[Analyze grammar]

snāti ceddhanuṣaḥ koṭau tasminnāsau nipātyate |
yo dasyumārga māśritya garado grāmadāhakaḥ || 46 ||
[Analyze grammar]

vaṇigdravyāpahārī ca sa paratra dvijottamāḥ |
vajradaṃṣṭrāhikābhikhye narake pātyate ciram || 47 ||
[Analyze grammar]

snāti ceddhanuṣaḥ koṭau tasminnāsau nipātyate |
vidyaṃte yāni cānyāni narakāṇi paratra vai || 48 ||
[Analyze grammar]

tāni nāpnoti manujo dhanuṣkoṭinimajjanāt |
dhanuṣkoṭau sakṛtsnā nādaśvamedhaphalaṃ labhet || 49 ||
[Analyze grammar]

ātmavidyā bhavetsākṣānmuktiścāpi caturvidhā |
na pāpe ramate buddhirna bhavedduḥkhameva vā || 50 ||
[Analyze grammar]

buddheḥ prīti rbhavetsamyagdhanuṣkoṭau nimajjanāt |
tulāpuruṣadānena yatphalaṃ labhyate naraiḥ || 51 ||
[Analyze grammar]

tatphalaṃ labhyate puṃbhirdhanuṣkoṭau nimajjanāt |
gosahasra pradānena yatpuṇyaṃ hi bhavennṛṇām || 52 ||
[Analyze grammar]

tatpuṇyaṃ labhate martyo dhanaṣkoṭau nimajjanāt |
dharmārthakāmamokṣeṣu yaṃyamicchati pūruṣaḥ || 53 ||
[Analyze grammar]

taṃtaṃ sadyaḥ samāpnoti dhanuṣkoṭau nimajjanāt |
mahāpātakayukto vā yukto vā sarvapātakaiḥ || 54 ||
[Analyze grammar]

sadyaḥ pūto bhavedviprā dhanuṣkoṭau nimajjanāt |
prajñālakṣmīryaśaḥ saṃpajjñānaṃ dharmo viraktatā || 55 ||
[Analyze grammar]

manaḥśuddhirbhavennṝṇāṃ dhanuṣkoṭinimajjanāt |
brahmahatyāyutaṃ cāpi surāpānāyutaṃ tathā || 56 ||
[Analyze grammar]

ayutaṃ gurudārāṇāṃ gamanaṃ pāpakāraṇam |
steyāyutaṃ suvarṇānāṃ tatsaṃsargaśca koṭiśaḥ || 57 ||
[Analyze grammar]

śīghraṃ vilayamāpnoti dhanuṣkoṭau nimajjanāt |
brahmahatyāsamānāni surāpānasamāni ca || 58 ||
[Analyze grammar]

gurustrīgamanenāpi yāni tulyāni cāstikāḥ |
suvarṇasteyatulyāni tatsaṃsargasamāni ca || 59 ||
[Analyze grammar]

tāni sarvāṇi naśyaṃti dhanuṣko ṭi nimajjanāt |
ukteṣveteṣu saṃdeho na kartavyaḥ kadācana || 60 ||
[Analyze grammar]

jihvāgre paraśuṃ taptaṃ dhārayāmi na saṃśayaḥ |
arthavādamimaṃ sarvaṃ bruvanvai nārakī bhavet || 61 ||
[Analyze grammar]

saṃkaraḥ sa hi vijñeyaḥ sarvakarmabahiṣkṛtaḥ |
aho maurkhyamaho maurkhyamaho maurkhyaṃ dvijottamāḥ || 62 ||
[Analyze grammar]

dhanuṣkoṭyabhidhe tīrthe sarvapātakanāśane |
advaitajñānade puṃsāṃ bhuktimuktipradāyini || 63 ||
[Analyze grammar]

iṣṭakāmyaprade nityaṃ tathaivājñānanāśane |
sthite'pi tadvihāyāyaṃ ramate'nyatra vai janaḥ || 64 ||
[Analyze grammar]

aho mohasya māhātmyaṃ mayā vaktuṃ na śakyate |
snātasya dhanuṣaḥ koṭau nāṃtakādbhayamasti vai || 65 ||
[Analyze grammar]

dhanuṣkoṭiṃ prapaśyaṃti tatra snāṃti ca ye narāḥ |
stuvaṃti ca praśaṃsaṃti spṛśaṃti ca namaṃti ca |
na pibaṃti hi te stanyaṃ mātṝṇāṃ dvijapuṃgavāḥ || 66 ||
[Analyze grammar]

ṛṣaya ūcuḥ |
dhanuṣkoṭyābhidhā tasya kathaṃ sūta samāgatā || 67 ||
[Analyze grammar]

tatsarvaṃ brūhi tattvena vistarānmunipuṃgava |
iti pṛṣṭo naimiṣīyairāha sūtaḥ punaśca tān || 68 ||
[Analyze grammar]

śrīsūta uvāca |
rāmeṇa nihate yuddhe rāvaṇe lokakaṇṭake |
bibhīṣaṇe ca laṃkāyāṃ rājani sthāpite tataḥ || 69 ||
[Analyze grammar]

vaidehīlakṣmaṇayuto rāmo daśarathā tmajaḥ |
sugrīvapramukhairvīrairvānarairapi saṃvṛtaḥ || 70 ||
[Analyze grammar]

siddhacāraṇagandharvadevavidyādhararṣibhiḥ |
apsarobhiśca satataṃ stūyamānanijādbhutaḥ || 71 ||
[Analyze grammar]

līlāvidhṛtakodaṇḍastripuraghno yathā śivaḥ |
sarvaiḥ parivṛto rāmo gaṃdhamādanamanvagāt || 72 ||
[Analyze grammar]

tatra sthitaṃ mahātmānaṃ rāghavaṃ rāvaṇāṃtakam |
prāṃjaliḥ prārthayāmāsa dharmajño'tha vibhīṣaṇaḥ || 73 ||
[Analyze grammar]

setunānena te rāma rājānaḥ sarva eva hi |
balodriktāḥ samabhyetya pīḍayeyuḥ purīṃ mama || 74 ||
[Analyze grammar]

ataḥ setumimaṃ bhiṃdhi dhanuṣkoṭyā raghūdvaha |
iti saṃprārthitastena paulastyena sa rāghavaḥ || 79 ||
[Analyze grammar]

bibheda dhanuṣaḥ koṭyā svasetuṃ raghunaṃ danaḥ |
ato dvijāstatastīrthaṃ dhanuṣkoṭiritiśrutam || 76 ||
[Analyze grammar]

śrīrāmadhanuṣaḥ koṭyā yo rekhāṃ paśyate kṛtām |
anekakleśasaṃyuktaṃ garbhavāsaṃ na paśyati || 77 ||
[Analyze grammar]

dhanuṣkoṭyāṃ kṛtā rekhā rāmeṇa lavaṇāṃbudhau |
taddarśanādbhavenmuktirna jāne snānajaṃ phalam || 78 ||
[Analyze grammar]

narmadārodhasi tapo mahāpātaka nāśanam |
gaṃgātīre tu maraṇamapavargaphalapradam || 79 ||
[Analyze grammar]

dānaṃ dvijāḥ kurukṣetre brahmahatyādiśodhakam |
tapaśca maraṇaṃ dānaṃ dhanuṣkoṭau kṛtaṃ naraiḥ || 80 ||
[Analyze grammar]

mahāpātakanāśāya muktyai cābhīṣṭasiddhaye |
bhavetsamarthaṃ vipreṃdrā nātra kāryā vicāraṇā || 81 ||
[Analyze grammar]

tāvatsaṃpīḍyate jaṃtuḥ pātakaiścopapā takaiḥ |
yāvannālokyate rāma dhanuṣkoṭirvimuktidā || 82 ||
[Analyze grammar]

bhidyate hṛdayagraṃthiśchidyaṃte sarvasaṃśayāḥ |
kṣīyaṃte pāpakarmāṇi dhanuṣkoṭyavalo kinaḥ || 83 ||
[Analyze grammar]

dakṣiṇāṃbhonidhau setau rāmacandreṇa nirmitā |
yā rekhā dhanuṣaḥ koṭyā vibhīṣaṇahitāya vai || 84 ||
[Analyze grammar]

saiva kailāsapadavīṃ vaikuṇṭhabra hmalokayoḥ |
mārgaḥ svargasya lokasya nātra kāryā vicāraṇā || 85 ||
[Analyze grammar]

tulyaṃ yajñaphalaiḥ puṇyairdhanuṣkoṭyavagāhanam |
sarvamaṃtrādhikaṃ puṇyaṃ sarvadā naphalapradam || 86 ||
[Analyze grammar]

kāyakaleśakaraiḥ puṃsāṃ kiṃ tapobhiḥ kimadhvaraiḥ |
kiṃ vedaiḥ kimu vā śāstrairdhanuṣkoṭyavalokinaḥ || 87 ||
[Analyze grammar]

rāmacaṃdradhanuṣkoṭau snānaṃ cellabhyate nṛṇām |
sitāsitasaritpuṇyavāribhiḥ kiṃ prayojanam || 88 ||
[Analyze grammar]

rāmacaṃdradhanuṣkoṭidarśanaṃ labhyate yadi |
kāśyāṃ tu maraṇānmuktiḥ prārthyate kiṃ vṛthā naraiḥ || 89 ||
[Analyze grammar]

animajjya dhanuṣkoṭāvanupoṣya dinatrayam |
adattvā kāṃcanaṃ gāṃ ca daridraḥ syānna saṃśayaḥ || 90 ||
[Analyze grammar]

dhanuṣkoṭya vagāhena yatphalaṃ labhate naraḥ |
agniṣṭomādibhiryajñairiṣṭvāpi bahudakṣiṇaiḥ || 91 ||
[Analyze grammar]

na tatphalamavāpnoti satyaṃsatyaṃ vadāmyaham |
dhanuṣkoṭyabhidhaṃ tīrthaṃ sarvatīrthādhikaṃ viduḥ || 92 ||
[Analyze grammar]

daśakoṭisahasrāṇi saṃti tīrthāni bhūtale |
teṣāṃ sānnidhyamastyatra dhanuṣkoṭau dvijottamāḥ || 93 ||
[Analyze grammar]

aṣṭau vasava ādityā rudrāśca marutastathā |
sādhyāśca saha gandharvāḥ siddhavidyādharāstathā || 94 ||
[Analyze grammar]

ete cānye ca ye devāḥ sānnidhyaṃ kurvate sadā |
tīrthe'tra dhanuṣaḥ koṭau nityameva pitāmahaḥ || 95 ||
[Analyze grammar]

sannidhatte śivo viṣṇurumā mā ca sarasvatī |
dhanuṣkoṭau tapastaptvā devāśca ṛṣayastathā || 96 ||
[Analyze grammar]

vipulāṃ siddhimagamaṃstatphalena munīśvarāḥ |
snāyāttatra naro yastu pitṛdevāṃśca tarpayet || 97 ||
[Analyze grammar]

sarvapāpavinirmukto brahmaloke mahīyate |
atraikaṃ bhojayedvipraṃ yo naro bhaktisaṃyutaḥ || 98 ||
[Analyze grammar]

iha loke paratrāpi sonaṃtasukhamaśnute |
śākamūlaphale vṛttiṃ yo na vartayate naraḥ || 99 ||
[Analyze grammar]

sa naro dhanuṣaḥkoṭau snāyātta tphalasiddhaye |
aśvamedhakratuṃ kartuṃ śaktiryasya na vidyate || 100 ||
[Analyze grammar]

dhanuṣkoṭau sa hi snāyāttena tatphalamaśnute |
brāhmaṇaḥ kṣatriyo vaiśyaḥ śūdro vāpi munī śvarāḥ || 1 ||
[Analyze grammar]

niṃdyayonau na jāyaṃte dhanuṣkoṭvagāhanāt |
makarasthe ravau māghe dhanuṣkoṭau tu yo naraḥ || 2 ||
[Analyze grammar]

snāyātpuṇyaṃ nigadituṃ tasyāhaṃ na kṣamo dvijāḥ |
māghamāse dhanuṣkoṭāvavagāheta yo naraḥ || 3 ||
[Analyze grammar]

sa snātaḥ sarvatīrtheṣu gaṃgādiṣu munīśvarāḥ |
prāpnuyādakṣayāṃllokānmokṣaṃ cāpi labheta saḥ || 4 ||
[Analyze grammar]

janmaprabhṛti yatpāpaṃ striyo vā puruṣasya vā |
tatsarvaṃ māghamāse'tra majjanādvilayaṃ vrajet || 5 ||
[Analyze grammar]

yathā surāṇāṃ sarveṣāmuttamo raghunaṃdanaḥ |
tathaiva ca dhanuṣkoṭiḥ sarvatīrthottamā smṛtā || 6 ||
[Analyze grammar]

tatra snānaṃ māghamāse sarvābhīṣṭapradāyakam |
triṃśaddinaṃ māghamāse niyato'pi jiteṃdriyaḥ || 7 ||
[Analyze grammar]

dhanuṣkoṭau naraḥ snāyādapunarbhavasiddhaye |
ekabhukto jitakrodho māghamāse'tra yo naraḥ || 8 ||
[Analyze grammar]

snānaṃ karoti vipreṃdrā mucyate brahmahatyayā |
śrīrāmadhanuṣaḥ koṭī māghamāse narastu yaḥ || 9 ||
[Analyze grammar]

snātvāṃte śivarātrau ca nirāhāro jiteṃdriyaḥ |
kṛtvā jāgaraṇaṃ rātrau pratiyāmaṃ viśeṣataḥ || 110 ||
[Analyze grammar]

rāma nāthaṃ mahādevamabhyarcya vidhipūrvakam |
paredyurudite sūrye dhanuṣkoṭau nimajya ca || 11 ||
[Analyze grammar]

anyeṣvapi ca tīrtheṣu snātvā niyatamānasaḥ |
nirvartya nityakarmāṇi rāmanāthaṃ niṣevya ca || 12 ||
[Analyze grammar]

yathāśakti dvijānannairbhojayitvā dvijottamāḥ |
bhūmiṃ gāṃ ca tilāndhānyaṃ dattvā vittaṃ ca śaktitaḥ || 13 ||
[Analyze grammar]

brāhmaṇairapyanujñātaḥ svayaṃ bhuṃjati vāgyataḥ |
evaṃ kṛtavataḥ puṃso rāmanātho maheśvaraḥ || 14 ||
[Analyze grammar]

vimocya sarvapāpāni bhuktiṃ muktiṃ prayacchati |
ataḥ sarvaprayatnena māghamāse munīśvarāḥ || 15 ||
[Analyze grammar]

snātavyaṃ hi dhanuṣkoṭau narairatra mumukṣubhiḥ |
dhanuṣkoṭau naraḥ snānaṃ setāvardhodaye tu yaḥ || 16 ||
[Analyze grammar]

karoti tasya pāpāni naśyaṃtyeva kṣaṇāddvijāḥ |
snānaṃ mahodaye cātra bhuktimuktiphalapradam || 17 ||
[Analyze grammar]

yaḥ snāyāddhanuṣaḥ koṭāvarddhodayamaho daye |
tasya vaśyāstrayo devā brahmaviṣṇumaheśvarāḥ || 18 ||
[Analyze grammar]

dhanuṣkoṭau dvijāḥ snānamarddhodayamahodaye |
vināpyadvaitavijñānaṃ sāyujyaprāptikāraṇam || 19 ||
[Analyze grammar]

tatra snānaṃ dvijāḥ puṃsāmarddhodayamahodaye |
manvādyuktaṃ vinā satyaṃ prāyaścittaṃ hi pāpinām || 120 ||
[Analyze grammar]

atra setau dhanuṣkoṭāvardhodayamaho daye |
snāti cenmanujo viprāḥ satyaṃ yajñaṃ vināpyayam || 21 ||
[Analyze grammar]

yajñānāṃ phalamāpnoti saṃpūrṇaṃ nātra saṃśayaḥ |
caṃdrasūryoparāgeṣu yaḥ snāyādatra mānavaḥ || 22 ||
[Analyze grammar]

tasya puṇyaphalaṃ vaktuṃ śeṣeṇāpi na śakyate |
caṃdrasūryoparāgeṣu dhanuṣkoṭyavagāhanam || 23 ||
[Analyze grammar]

brahmahatyādipāpānāṃ prāyaścitta mudīritam |
śrīrāmadhanuṣaḥ koṭau caṃdrasūryoparāgayoḥ || 24 ||
[Analyze grammar]

snānaṃ sāyujyadaṃ proktaṃ sarvatīrthaphalapradam |
caṃdrasūryoparāgeṣu ardhodayamahodaye || || 25 ||
[Analyze grammar]

snātavyamatra manujairbhuktimuktiphalecchubhiḥ |
ataḥ sarvaṃ parityajya gacchadhvaṃ munipuṃgavāḥ || 26 ||
[Analyze grammar]

dhanuṣkoṭiṃ mahāpuṇyāṃ bhuktimuktiphala pradām |
tatra gatvā pitṛbhyaśca kurudhvaṃ piṃḍadāpanam || 27 ||
[Analyze grammar]

ākalpaṃ pitṛtṛptiḥ syādatra piṃḍanivāpanāt |
pitṝṇāṃ tṛptidaṃ sthānatrayaṃ rāmeṇa nirmitam || 28 ||
[Analyze grammar]

setumūle dhanuṣkoṭyāṃ gaṃdhamādanaparvate |
piṃḍaṃ dattvā pitṛbhyo'tra ṛṇānmukto bhaviṣyati || 29 ||
[Analyze grammar]

setumūlaṃ dhanuṣkoṭiṃ gaṃdhamādanameva ca |
ṛṇamokṣa iti khyātaṃ tristhānaṃ devanirmitam || 130 ||
[Analyze grammar]

ataḥ sarvaprayatnena dhanuṣkoṭirniṣevyatām |
atrāgatya dhanuṣkoṭau snātvā niyamapūrva kam || 31 ||
[Analyze grammar]

droṇācāryasutaḥ śrīmānaśvatthāmā munīśvarāḥ |
suptamāraṇadoṣeṇa ghoreṇa mumuce kṣaṇāt || 32 ||
[Analyze grammar]

evaṃ vaḥ kathitaṃ viprā dhanuṣkoṭestu vaibhavam |
bhuktimuktipradaṃ nṛṇāṃ sarvapāpanibarhaṇam || 133 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe setu māhātmye dhanuṣkoṭipraśaṃsāyāṃ dhanuṣkoṭivaibhavakathanavarṇanaṃnāma triṃśo'dhyāyaḥ || 30 ||
[Analyze grammar]