Chapter 32

[English text for this chapter is available]

skanda uvāca |
iti stutvā tamīśānaṃ nāradaḥ sa yayau tataḥ |
śamyāprāsābhidhaṃ brahmanvyāsasyāśramamāditaḥ || 1 ||
[Analyze grammar]

sādaraṃ mānitastena pratyutthānāsanādibhiḥ |
tasmā ekāntikaṃ dharmmaṃ prāha jijñāsave sa ca || 2 ||
[Analyze grammar]

tato brahmasabhāṃ gatvā brahmaṇaḥ śṛṇvato muniḥ |
devānpitṝnmaharṣīṃśca tatrasthāṃstamupādiśat || 3 ||
[Analyze grammar]

tatrasthito bhāskaraśca dharmmametaṃ punarmmune |
śuśrāva nāradātsarvaṃ śrutaṃ nārāyaṇātpurā || 4 ||
[Analyze grammar]

sa prāhātmāgrayāyibhyo vālakhilyebhya ādarāt |
merau te saṃgatāndevānindrādīṃśca nyaśāmayan || 5 ||
[Analyze grammar]

tebhyo'sito muniḥ śrutvā dharmametaṃ dvijottama |
pitṛbhyaḥ kathayāmāsa pitṛlokaṃ gataḥ kvacit || 6 ||
[Analyze grammar]

pitaraste tvaryamādyā ūcire śaṃtanuṃ nṛpam |
sa bhīṣmāya svaputrāya kathayāmāsa tattvataḥ || 7 ||
[Analyze grammar]

sopi bhāratayuddhānte dharmmarājāya pṛcchate |
śayānaḥ śaraśayyāyāṃ prāha saṃsadi bhūyasi || 8 ||
[Analyze grammar]

tatra śrutvā nāradopi sthitaḥ sadasi sādaram |
kailāse śaṃkaraṃ prāha sa ca māṃ munisattama || 9 ||
[Analyze grammar]

mayā te kathitaṃ brahmanpṛcchate dharmmavarttine |
pātrāyaitatpradātavyamiti māṃ hi pitābravīt || 10 ||
[Analyze grammar]

yenayena śrutaṃ hyetanmāhātmyaṃ sātvatāṃpateḥ |
sa sa tasminparāṃ bhaktiṃ cakāra svavimuktaye || 11 ||
[Analyze grammar]

yudhiṣṭhiropi rājarṣiḥ śrutvā bhīṣmeṇa kīrttitam |
māhātmyaṃ devakīsūnormmumude bhrātṛbhiḥ saha || 12 ||
[Analyze grammar]

tamātmano mātuleyaṃ sarvakāraṇakāraṇam |
niśamyāścaryyajaladhau nimamajja mahāmatiḥ || 13 ||
[Analyze grammar]

vāsudevādikaṃ vyūha vārāhādīṃśca sarvvaśaḥ |
avatārānapi nṛpo mene'syaiva ramāpateḥ || 14 ||
[Analyze grammar]

tataḥ sahānujo rājā divyamānuṣavigrahe |
atyantaṃ bhaktimānkṛṣṇe babhūva dvijasattama || 15 ||
[Analyze grammar]

śrutvemāṃ ca kathāṃ sarvve brahmarājasurarṣayaḥ |
sabhāyāṃ tatra ye cāsaṃstepyabhūvansavismayāḥ || 16 ||
[Analyze grammar]

kṛṣṇameva paraṃ brahma viditvā te narākṛti |
bhaktiṃ prapedire tasminpraṇamantastamādarāt || 17 ||
[Analyze grammar]

itthaṃ tasyāsti māhātmyamatastvamapi sanmate |
sarvātmanā vāsudevaṃ tameva bhaja bhaktitaḥ || 18 ||
[Analyze grammar]

śrīvāsudevamāhātmyametatte kathitaṃ mayā |
durvāsanopaśamanaṃ bhagavadbhaktivarddhanam || 19 ||
[Analyze grammar]

kathitāni purāṇe'tra mayākhyānāni yāni te |
teṣāṃ sāra idaṃ brahmannirmmathyaiva samuddhṛtaḥ || 20 ||
[Analyze grammar]

vedopaniṣadāṃ caitadraso vai sāṃkhyayogayoḥ |
pañcarātrasya kṛtsnasya dharmaśāstrasya cānagha || 21 ||
[Analyze grammar]

dhanyaṃ yaśasyaṃ cāyuṣyametatparamamaṅgalam |
sākṣādbhagavatā gītaṃ sarvābhadravināśanam || 22 ||
[Analyze grammar]

ya etacchṛṇuyātpuṇyaṃ kīrttayedatha yaḥ paṭhet |
vāsudeve bhavetteṣāmacalā nirmalā matiḥ || 23 ||
[Analyze grammar]

bhaktā ekāntikāste ca bhaveyustasya mānavāḥ |
brahmarūpā vrajantyante brahmadhāma tamaḥparam || 24 ||
[Analyze grammar]

dharmārthī labhate'nena dharmaṃ kāmaṃ ca kāmukaḥ |
dhanārthī dhanamāpnoti mokṣārthī mokṣamuttamam || 25 ||
[Analyze grammar]

labheta vidyāṃ vidyārthī mucyedrugṇaśca rogataḥ |
etacchravaṇamātreṇa sarvapāpakṣayo bhavet || 26 ||
[Analyze grammar]

brāhmaṃ tejo labhedvipraḥ kṣatriyaśca nareśatām |
dhanaṃ vaiśyaḥ sukhaṃ śūdraḥ śravaṇādasya cāpnuyāt || 27 ||
[Analyze grammar]

etacchrutvā raṇaṃ gacchanvijayaṃ cāpnuyānnṛpaḥ |
prāpnuyātstrī ca saubhāgyaṃ kanyā ca svepsitaṃ varam || 28 ||
[Analyze grammar]

etasya śrutikīrttibhyaḥ śāstrajātaśiromaṇeḥ |
yaṃ yaṃ yaḥ kāmayetkāmaṃ taṃtaṃ prāpnoti mānavaḥ || 29 ||
[Analyze grammar]

tasmāttvaṃ sarvadā bhaktyā paṭhannetaddvijottama |
kāyavāṇīmanobhistaṃ bhajethā bhaktavatsalam || 30 ||
[Analyze grammar]

sautiruvāca |
etanmahāsenamukhābjaniḥsṛtaṃ sāvarṇirāpīya vacomṛtaṃ saḥ |
cakāra bhaktiṃ vasudevanandane narākṛtibrahmaṇi sarvamaṅgale || 31 ||
[Analyze grammar]

yūyaṃ ca sarve nigamāgamajñā brahmaṇyadevaṃ bhajanīyamīśam |
bhajadhvamekaṃ tamudārakīrttiṃ śrīvāsudevaṃ nijadharmasaṃsthāḥ || 32 ||
[Analyze grammar]

golokadhāmapataye prakāśacayamūrttaye || namostu vāsudevāya bhaktyānandavivṛddhaye || 33 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye granthasaṃpradāyapravṛttinirūpaṇaṃ nāma dvātriṃśo'dhyāyaḥ || 32 ||
[Analyze grammar]

iti śrīskānde mahāpurāṇe dvitīye vaiṣṇavakhaṇḍe vāsudevamāhātmyaṃ sampūrṇam || 9 ||
[Analyze grammar]

iti śrīskānde mahāpurāṇe dvitīyaṃ vaiṣṇavakhaṇḍaṃ sampūrṇam || 2 ||
[Analyze grammar]