Chapter 19

[English text for this chapter is available]

skanda uvāca |
tataḥ sa dadṛśe devau purāṇāvṛṣisattamau |
tapaścarantau sumahadātmaniṣṭhau mahāvratau || 1 ||
[Analyze grammar]

tejasāpyadhikau sūryātsarvalokavirocanāt |
śrīvatsalakṣaṇau pūjyau jaṭāmaṇḍaladhāriṇau || 2 ||
[Analyze grammar]

padmacihnabhujau tau ca pādayoścakralakṣaṇau |
vyūḍhoraskau dīrghabhujau sitasūkṣmaghanāṃśukau || 3 ||
[Analyze grammar]

svāsyau pṛthulalāṭau ca subhruvau śubhanāsikau |
śubhalakṣaṇasaṃpannau divyamūrttī ghanaprabhau || 4 ||
[Analyze grammar]

vinayenāntikaṃ prāpya tayoḥ kṛtvā pradakṣiṇām |
bhaktyā praṇamya sāṣṭāṅgaṃ tasthau prāñjaliragrataḥ || 5 ||
[Analyze grammar]

tatastau tapasāṃ vāsau yaśasāṃ tejasāmapi |
ṛṣī paurvāhṇikasyānte vidhermaunaṃ vihāya ca || 6 ||
[Analyze grammar]

prītyā nāradamavyagrau pādyārghyābhyāṃ samārcatām |
pīṭhayorupaviṣṭau tau kauśayornāradaśca saḥ || 7 ||
[Analyze grammar]

teṣu tatropaviṣṭeṣu sa deśobhivyarājata |
ājyāhutimahājvālairyajñavāṭognibhiryathā || 8 ||
[Analyze grammar]

atha nārāyaṇastatra nāradaṃ vākyamabravīt |
sukhopaviṣṭaṃ viśrāntaṃ kṛtātithyaṃ susatkṛtam || 9 ||
[Analyze grammar]

śrīnārāyaṇa uvāca |
api brahmansa bhagavānparamātmā sanātanaḥ |
brahmadhāmni tvayā dṛṣṭa āvayo kāraṇaṃ param || 10 ||
[Analyze grammar]

nārada uvāca |
bhagavaṃstvatprasādena tamahaṃ parameśvaram |
vāsudevaṃ samāloke sthitamakṣaradhāmani || 11 ||
[Analyze grammar]

iha caivāgatastena visṛṣṭo vāṃ niṣevitum |
āsiṣye tatparo bhūtvā yuvābhyāṃ saha nityaśaḥ || 12 ||
[Analyze grammar]

śrīnārāyaṇa uvāca |
dhanyosyanugṛhītosi yatte dṛṣṭaḥ svayaṃ prabhuḥ |
nahi taṃ dṛṣṭavānbrahmankaściddevopi vā ṛṣiḥ || 13 ||
[Analyze grammar]

bhaktyaikāntikayā tasya prāptā akṣarasāmyatām |
ye hi bhaktāsta evainaṃ paśyantyakhilakāraṇam || 14 ||
[Analyze grammar]

sa divyamūrttirbhagavāndurddarśaḥ puruṣottamaḥ |
nāradaitaddhi me satyaṃ vacanaṃ samudāhṛtam || 15 ||
[Analyze grammar]

nānyo bhaktātpriyataro loke tasyāsti kaścana |
tataḥ svayaṃ darśitavāṃstavātmānaṃ dvijottama || 16 ||
[Analyze grammar]

tejaḥpuñjābhiruddhāṃgo guṇātītādbhutākṛtiḥ |
akhaṇḍānandarūpaśca sadā śuddho'cyutosti saḥ || 17 ||
[Analyze grammar]

rūpavarṇavayovasthāḥ prākṛtā naiva tasya hi |
sarvaṃ tasyāsti taddivyaṃ sarvopakaraṇāni ca |
ekāntikānāṃ bhaktānāṃ sa eva paramā gatiḥ || 18 ||
[Analyze grammar]

ātmabrahmaikyasaṃpannairvinivṛttaguṇairapi |
kriyate vāsudevasya bhaktiritthaṃguṇo hi saḥ || 19 ||
[Analyze grammar]

māhātmyamasya ko vaktuṃ śaknuyātparamātmanaḥ |
acintyānantaśaktīnāmadhipasya mahāmune || 20 ||
[Analyze grammar]

ātmātmā cākṣarātmā ca hyeṣa ākāśanirmalaḥ |
divyadṛgīkṣyaḥ sanmātraḥ puruṣo vasudevajaḥ || 21 ||
[Analyze grammar]

samastakalyāṇaguṇo nirguṇaśceśvareśvaraḥ |
parayā vidyayā vedya upāsyo brahmavitprabhuḥ || 22 ||
[Analyze grammar]

divyamūrttiṃ tamīśānaṃ tapasaikāntikena ca |
yaḥ prīṇayati dharmeṇa sa dhanyatama ucyate || 23 ||
[Analyze grammar]

tasmāttvamapi devarṣe dharmeṇaikāntikena tam |
ārādhayannihaivāṃga kaṃcitkālaṃ tapaḥ kuru || 24 ||
[Analyze grammar]

tapasaivā'tiśuddhātmā māhātmyaṃ tasya satpateḥ |
yathāvajjñāsyati bhavānprocyamānaṃ mayā'khilam || 25 ||
[Analyze grammar]

sarvārthasādhanaṃ viddhi tapastaddhṛdayaṃ mune |
nātaptabhūritapasā sa vaśīkriyate prabhuḥ || 26 ||
[Analyze grammar]

skanda uvāca |
evamukto bhagavatā naranārāyaṇena saḥ |
prītastapaḥ karttumicchaṃstamuvāca mahāmatiḥ || 27 ||
[Analyze grammar]

iti śrīskande mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsu'devamāhātmye nāradanaranārāyaṇasamāgamo nāmaikonaviṃśo'dhyāyaḥ || 19 ||
[Analyze grammar]