Chapter 11

[English text for this chapter is available]

skanda uvāca |
brahmarudrau mahendrādīnsaṃdhānāyā'suraiḥ saha |
ājñāpya jagmatuḥ svaṃsvaṃ dhāma devā rasāṃ mune || 1 ||
[Analyze grammar]

samayocitabhāṣāvidvāsavo nītiyuktibhiḥ |
pralobhya phalabhāgena sandhiṃ cakre'suraiḥ saha || 2 ||
[Analyze grammar]

tato devāsuragaṇā militā vāridhestaṭe |
mahauṣadhīrupānīya bahuśo nidadhurdrutam || 3 ||
[Analyze grammar]

mandarādrimupetyā'tha nānauṣadhivirājitam |
mūlādutpāṭya te sarve netumabdhiṃ samudyatāḥ || 4 ||
[Analyze grammar]

ekādaśasahasrāṇi yojanānāṃ bhuvi sthitam |
noddhartumaśakaṃste taṃ tadānīṃ tuṣṭuvurharim || 5 ||
[Analyze grammar]

etadviditvā bhagavānsaṃkarṣaṇamahīśvaram |
ajijñapattamuddhartuṃ baddhamūlaṃ mahīdharam || 6 ||
[Analyze grammar]

phūtkāramātreṇaikena sa tu sadyastamīśvaraḥ |
bahiścikṣepa tatsthānādyojanadvitayāntare || 7 ||
[Analyze grammar]

atyāścaryaṃ tadālokya hṛṣṭāḥ sarve surāsurāḥ |
tadantikamupājagmurddhāvantaśca kṛtāravāḥ || 8 ||
[Analyze grammar]

balino yatnavantopi parighopamabāhavaḥ |
uddhṛtya netuṃ no śekurviṣaṇṇā viphalaśramāḥ || 9 ||
[Analyze grammar]

jñātvā suragaṇānkhinnānbhagavānsarvadarśanaḥ |
tārkṣyamājñāpayāmāsa netuṃ tamudadhiṃ drutam || 10 ||
[Analyze grammar]

sahāvaraṇamapyaṇḍaṃ līlayā dharttumīśvaraḥ |
manovegaḥ sa tatretya nijatroṭyaiva taṃ girim |
utpāṭya sāgarataṭe nidhāya harimāyayau || 11 ||
[Analyze grammar]

tataḥ saṃhṛṣṭamanasaḥ sarve kaśyapanandanāḥ |
vāsukiṃ cāhvayāmāsuḥ sudhābhāgapratijñayā || 12 ||
[Analyze grammar]

sa tatrāgādatho sarve te'bdhiṃ manthitumudyatāḥ |
tānapānnidhirāgatya mūrttimānabravīdvacaḥ || 13 ||
[Analyze grammar]

yadi dāsyatha me yūyamamṛtāṃśaṃ surāsurāḥ |
soḍhāsmi vipulaṃ tarhi mandarabhramaṇārddanam || 14 ||
[Analyze grammar]

tatheti te pratijñāya kṣiptvādāvoṣadhīlatāḥ |
parivivyurnnāgarājaṃ tasminkāñcanaparvate || 15 ||
[Analyze grammar]

tato devā hṛdi hariṃ sasmaruḥ kāryasiddhaye |
smṛtamātraḥ sa tatrā'gādacyutaḥ sarvadarśanaḥ || 16 ||
[Analyze grammar]

tamālokyāmaragaṇā muditāḥ phaṇināṃ pateḥ |
purobhāgaṃ gṛhītvaiva tasthustenānumoditāḥ || 17 ||
[Analyze grammar]

devatāpakṣapātitvaṃ sūcayansvasya ca prabhuḥ |
yatra devāstatra tasthau tato daityāstu cukrudhuḥ || 18 ||
[Analyze grammar]

tapovidyāvayojyeṣṭhā adhobhāgamamaṅgalam |
kathaṃ tiraśco gṛhṇīmo nedṛṅmūrkhā vayaṃ tviti || 19 ||
[Analyze grammar]

saha devaistato viṣṇuḥ svayaṃ tānmānayanniva |
prahasya dattvā prāgbhāgaṃ surānpucchamajigrahat || 20 ||
[Analyze grammar]

mahāhiviṣaphūtkāradāhādamararakṣaṇam |
caritrametacchrībharturiti daityā na te viduḥ || 21 ||
[Analyze grammar]

tata uttolayāmāsuḥ svarṇasānvālibhāsvaram |
mandaraṃ kāśyapeyāste carmikābaddhakacchakāḥ || 22 ||
[Analyze grammar]

dvāviṃśatisahasrāṇi yojanānāṃ tamucchritam |
ambhonidhau nidadhire krośantotyarthamutsukāḥ || 23 ||
[Analyze grammar]

dhāryamāṇopyanādhārastairadriratigauravāt |
yayāvadhastalaṃ sadyastadāsaṃste'tivihvalāḥ || 24 ||
[Analyze grammar]

tadā sa bhagavānsākṣātsarvathā bhaktakāryakṛt |
stūyamānomarairadrimuddaghre kamaṭhākṛtiḥ || 25 ||
[Analyze grammar]

utthitaṃ tamavekṣyāśu sarve phullahṛdānanāḥ |
babhūvuśca sthiraḥ so'bhūtkūrmapṛṣṭhetivistṛte || 26 ||
[Analyze grammar]

tato mamanthustarasā yāvadbalamapāṃnidhim |
śramaphūtkāravadanā devādayo'dayam || 27 ||
[Analyze grammar]

bhrāmyamāṇāttatastvadrerbahavonyapatandumāḥ |
ūrddhvadrugharṣajo vahnistatstha siṃhādimādahat || 28 ||
[Analyze grammar]

tatra nānā jalacarā vinipiṣṭā mahādriṇā |
vilayaṃ samupājagmuḥ śataśaḥ kṣīravāridhau || 29 ||
[Analyze grammar]

sāṃvarttakamahāmeghasaṅghagarjjitavanmahān |
āsīnmaṃthananādaśca pratidhvanivivarddhitaḥ || 30 ||
[Analyze grammar]

atyākarṣaṇakhinnāṅgavāsukarmmukhakṛtkṛtaiḥ |
hataujaso'tikhinnāśca daityā niṅgālavadbabhuḥ || 31 ||
[Analyze grammar]

aviṣahyaṃ viṣāgniṃ ca marṣanti bahudhā muhuḥ |
lambante smāhirājasya sahasraṃ vadanānyadhaḥ || 32 ||
[Analyze grammar]

dadhāra sahasā tāni bhagavanprerito vibhuḥ |
saṃkarṣaṇo mahātejāḥ sahamāno viṣānalam || 33 ||
[Analyze grammar]

sahasramekaṃ varṣāṇāṃ mathyamānātpayonidheḥ |
hālāhalaṃ viṣamabhūdutsarpadvidiśo diśaḥ || 34 ||
[Analyze grammar]

yadāhuḥ kālakūṭākhyaṃ sarvalokātidāhakam |
tena dandahyamānāṅgāste tu cakruḥ palāyanam || 35 ||
[Analyze grammar]

tato brahmā prajeśāśca devāḥ sarvepyumāpatim |
prārthayaṃstasya pānārthaṃ stuvantaḥ stutibhirmune || 36 ||
[Analyze grammar]

bhagavānatha taṃ prāha surāṇāmagrajo bhavān |
bhavatītyagrajaṃ vārddhergṛhāṇedaṃ viṣaṃ śiva || 37 ||
[Analyze grammar]

devānāṃ sa bhayaṃ dṛṣṭvā karuṇaścājñayā hareḥ |
ākarṣadyogakalayā viṣaṃ pāṇitale'khilam || 38 ||
[Analyze grammar]

papau tatkaṇṭhamadhye ca śoṣayāmāsa tatkṣaṇam |
nīlakaṇṭha iti khyātaḥ śaṃkarākhyaśca pa'bhavat || 39 ||
[Analyze grammar]

pāsyatastasya pāṇerye patitā bhuvibindavaḥ |
tānnāgā vṛścikādyāśca jagṛhuḥ kāścanauṣadhīḥ || 40 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye'mṛtamanthane viṣotpattirnāmaikādaśo'dhyāyaḥ || 11 ||
[Analyze grammar]