Chapter 3

[English text for this chapter is available]

nārada uvāca |
vedeṣu sapurāṇeṣu sāṃgopāṃgeṣu gīyase |
tvameva śāśvato dhātā niyantāmṛtamacyuta |
tvaṃ vidhātā ca satataṃ tvayi sarvamidaṃ jagat || 1 ||
[Analyze grammar]

catvāro hyāśramā deva sarve varṇāśca karmabhiḥ |
yajante tvāmaharaharnnānāmūrttisamāsthitam || 2 ||
[Analyze grammar]

pitā mātā ca sarvasya daivataṃ tvaṃ hi śāśvatam |
kaṃ tvaṃ ca yajase devaṃ pitaraṃ vā na vidmahe || 3 ||
[Analyze grammar]

śrīnārāyaṇa uvāca |
naitadrahasyaṃ vaktavyamātmaguhyamathāpi te |
mayi bhaktimate brahmanpravakṣyāmi yathātatham || 4 ||
[Analyze grammar]

satyaṃ jñānamanantaṃ yo brahmeti śrutivarṇitaḥ |
triguṇavyatiriktaśca puruṣo divyavigrahaḥ || 5 ||
[Analyze grammar]

mahāpuruṣa ityukto vāsudevaśca yaḥ prabhuḥ |
nārāyaṇa ṛṣirviṣṇuḥ kṛṣṇaśca bhagavāniti || 6 ||
[Analyze grammar]

ekaḥ sa eva devo nau pitarau ceti viddhi bhoḥ |
āvābhyāṃ pūjyate'sau hi daive pitrye ca kalpite || 7 ||
[Analyze grammar]

nāsti tasmātparataraḥ pitā devo'tha vā dvija |
ātmā hi nau sa vijñeyaḥ kṛṣṇo brahmapureśvaraḥ || 8 ||
[Analyze grammar]

tenaiṣā prathitā brahmanmaryādā lokabhāvanī |
daivaṃ pitryaṃ ca kartavyamiti lokahitaiṣiṇā || 9 ||
[Analyze grammar]

pravṛttaṃ ca nivṛttaṃ ca dvedhā karmāsti vaidikam |
yathādhikāraṃ vihitaṃ puruṣārthopalabdhaye || 10 ||
[Analyze grammar]

tantravedoktavidhinā svocitastrīparigrahaḥ |
vittārjanaṃ ca nyāyena dravyayajñāḥ sakāmanāḥ || 11 ||
[Analyze grammar]

vāso grāme ca nagare pūrtamiṣṭaṃ ca karma yat |
pravṛttaṃ tattu sakalamaśāntikṛdudīritam || 12 ||
[Analyze grammar]

strīdravyayoḥ parityāgaḥ kāmalobhakrudhāṃ tathā |
vanavāsaśca vairāgyaṃ tapaḥ kṣāntiḥ śamo damaḥ || 13 ||
[Analyze grammar]

brahmayajñā yogayajñā jñānayajñāśca sarvaśaḥ |
japayajñāśceti mune nivṛttaṃ karma kīrtitam || 14 ||
[Analyze grammar]

trilokyāṃ gatayo dharmaṃ pravṛttamanutiṣṭhatām |
svargalokāvadhi mune manuṣyāṇāṃ bhavanti vai || 15 ||
[Analyze grammar]

indracandrāgnilokādau svasvapuṇyaphalaṃ ca te |
bhogaiśvaryaṃ vahuvidhamabhīṣṭaṃ bhuñjate khalu || 16 ||
[Analyze grammar]

yāvatpuṇyaṃ tāvadeva bhuktvā tatte surā'stataḥ |
kṣīṇe tu sukṛte bhūyaḥ patanti vivaśā bhuvi || 17 ||
[Analyze grammar]

bhogaiśvaryādināśo hi kālavegena jāyate |
anicchatāmapi mune teṣāṃ puṇyakṣaye sati || 18 ||
[Analyze grammar]

ādhikārikadevānāmapi brahmadine muhuḥ |
iṣṭabhogaiśvaryanāśo jāyate kālaraṃhasā || 19 ||
[Analyze grammar]

nivṛttadharmaniṣṭhā ye yoginaśca tapasvinaḥ |
janādīnyānti lokāṃstrīṃste tu trailokyato bahiḥ || 20 ||
[Analyze grammar]

tattallokaiśvaryabhogānbhuñjate te nijepsitān |
dainandinepi pralaye varttante te yathāsukham || 21 ||
[Analyze grammar]

brahmaṇo dviparārddhānte tadbhogaiśvaryasaṃpadaḥ |
naśyanti kālaśaktyaiva lokāsteṣāṃ ca nārada || 22 ||
[Analyze grammar]

athaitadvividhaṃ karma guṇātmakamapi dvija |
kṛtaṃ cedviṣṇusaṃbaddhaṃ nirguṇaṃ syāttadā tu tat || 23 ||
[Analyze grammar]

tatphalaṃ cākṣayaṃ syāddhi sveṣṭādapyadhikaṃ nṛṇām |
bhaktāste bhagavaddhāma yāntyaṣṭāvṛttitaḥ param || 24 ||
[Analyze grammar]

ato vivekino nityaṃ viṣṇubhaktyanvitāḥ kriyāḥ |
pravṛttā vā nivṛttā vā kurvate sakalā api || 25 ||
[Analyze grammar]

brahmā sthāṇurmanurddakṣo bhṛgurddharmastathā yamaḥ |
marīciraṅgirāścātriḥ pulastyaḥ pulahaḥ kratuḥ || 26 ||
[Analyze grammar]

vaibhrājaśca vasiṣṭhaśca vivasvānsoma eva ca |
kaśyapaḥ karddamādyāśca prajānāṃ patayo mune || 27 ||
[Analyze grammar]

devāśca ṛṣayaḥ sarve sarve varṇāstathāśramāḥ |
pūjayanti tameveśaṃ pravṛttaṃ dharmamāsthitāḥ || 28 ||
[Analyze grammar]

sanaḥ sanatsujātaśca sanakaḥ sa sanandanaḥ |
sanatkumāraḥ kapila āruṇiśca sanātanaḥ || 29 ||
[Analyze grammar]

ṛbhuryatiśca haṃsādyā munayo naiṣṭhikavratāḥ |
tameva pūjayantīśaṃ nivṛttaṃ dharmamāsthitāḥ || 30 ||
[Analyze grammar]

vāsudevasyāṅgatayā bhāvayitvā surānpitṝn |
ahiṃsapūjāvidhinā yajante cānvahaṃ hi te || 31 ||
[Analyze grammar]

yathādhikāramete hi tena yatra niyojitāḥ |
pravṛtte vā nivṛtte vā dharme te pālayanti tam |
tasya devasya maryādāṃ na krāmantyubhayepi te || 32 ||
[Analyze grammar]

caturvarge teṣu yasya yadyadiṣṭatamaṃ bhavet |
tattatsaṃpūrayatyeva sarva śaktipatiḥ prabhuḥ || 33 ||
[Analyze grammar]

bhaktyā kṛtasyāpyalpasya bhagavānpuṇyakarmaṇaḥ |
prīto dadātyeva phalaṃ mahadakṣayamīpsitam || 34 ||
[Analyze grammar]

teṣu tadbhaktito loke ye tvekāntitvamāsthitāḥ |
vāsudevaṃ vinānyatra saṃkṣīṇāśeṣavāsanāḥ || 35 ||
[Analyze grammar]

dehānte te tu saṃprāpya tasya dhāma tamaḥparam |
dehairaprākṛtaireva premṇā paricaranti tam || 36 ||
[Analyze grammar]

anye tu bhaktāḥ kālena tadupāsanadārḍhyataḥ |
vāsanānāṃ kṣaye jāte yāntyekāntikavaddhi tam || 37 ||
[Analyze grammar]

yena kenāpi bhāvena tena saṃbadhyate tu yaḥ |
saṃsṛtiṃ na prayātyeva sa tu kvāpyanyajīvavat || 38 ||
[Analyze grammar]

karmayogasya saṃsiddhirjñānayogasya cepsitā |
tasyāśrayādeva nṛṇāṃ nirvighnaṃ bhavati drutam || 39 ||
[Analyze grammar]

tasmātsa eva bhagavānsavarraipi janairiha |
svābhīṣṭaphalasiddhyarthaṃ prītyopāsyo yathāvidhi || 40 ||
[Analyze grammar]

brahmaikyamāptā nirvighnā api brahmaśivādayaḥ |
śrīviṣṇoḥ kurvate bhaktiṃ santītthaṃ tanmahāguṇāḥ || 41 ||
[Analyze grammar]

iti guhyasamuddeśastava nārada kīrttitaḥ |
atipremṇā hi satataṃ mayi bhaktimato'khilaḥ || 42 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye śrīvāsudevasarvopāsyatvanirūpaṇaṃ nāma tṛtīyo'dhyāyaḥ || 3 ||
[Analyze grammar]