Chapter 1

[English text for this chapter is available]

śaunaka uvāca |
jīvānāṃ śreyase saute bahudhā sādhanāni te |
dharmo jñānaṃ ca vairāgyaṃ yogādīnyuditāni naḥ || 1 ||
[Analyze grammar]

itihāsairbahuvidhairvispaṣṭārthāni tāni ca |
sarvāṇyapi mahābuddhe śrutānyasmābhirādarāt || 2 ||
[Analyze grammar]

sarveṣāṃ manujānāṃ tu duṣkarāṇyeva tāni tu |
bāhulyāccāntarāyāṇāṃ tatsiddhirapi durllabhā || 3 ||
[Analyze grammar]

prayatnenāti mahatā puruṣaiddheṃryyaśālibhiḥ |
sādhitānyapi sidhyanti tāni kālena bhūyasā || 4 ||
[Analyze grammar]

ato bhavāndvijātīnāmāśramāṇāṃ ca sarvaśaḥ |
bravītu sukaropāyaṃ strīśūdrāderapīha naḥ || 5 ||
[Analyze grammar]

kṛtena yenāpyalpena yena kenāpi dehinā |
antarāyairavihataṃ mahadeva phalaṃ bhavet || 6 ||
[Analyze grammar]

mokṣasya sādhanaṃ tādṛksuvicāryya mahāmate |
hitāya sarvajīvānāṃ kṛpayā vaktumarhasi || 7 ||
[Analyze grammar]

prasādādbaladevasya vyāsasya janakasya ca |
jānāsi sarvameva tvaṃ tanno brūhi bubhutsataḥ || 8 ||
[Analyze grammar]

sautiruvāca |
maharṣirapi sāvarṇirevameva hi śaunaka |
vinītaḥ skandamaprākṣītpunaḥ śaṅkaranandanam || 9 ||
[Analyze grammar]

sāvarṇiruvāca |
śrutā nānāvidhā dharmmāḥ sāṅkhyajñānaṃ ca naikadhā |
yogādīni tvaduktāni sādhanāni mayā guha || 10 ||
[Analyze grammar]

suduṣkarāṇi manye'haṃ tāni tvasmādṛśāṃ kila |
mahatāmapi cānyeṣāṃ kṛcchrasādhyāni vai cirāt || 11 ||
[Analyze grammar]

ato varṇāśramavatāṃ śreyaskṛtsukaraṃ ca yat |
sādhanaṃ tacchreṣṭhatamaṃ vaktumarhasi me'dhunā || 12 ||
[Analyze grammar]

sautiruvāca |
iti pṛṣṭo munīndreṇa tena jijñāsunā guhaḥ |
vāsudevaṃ hṛdi dhyāyankārttikeyaḥ sa ūcivān || 13 ||
[Analyze grammar]

skanda uvāca || śṛṇu brahmanpravakṣye'haṃ śrutaṃ pitṛmukhānmayā |
sarveṣāmapi jīvānāṃ sukaraṃ mokṣasādhanam || 14 ||
[Analyze grammar]

devatāprīṇanasamaṃ sveṣṭasiddhimabhīpsatām |
nāstyanyasādhanaṃ kiñcidvarṇāśramavatāmiha || 15 ||
[Analyze grammar]

apyalpaṃ sukṛtaṃ karmma devasaṃbandhataḥ kṛtam |
phalaṃ dadāti nirvighnaṃ mahadeva hi tannṛṇām || 16 ||
[Analyze grammar]

daivaṃ pitryaṃ svadharmmaśca kāmyaṃ karmmāpi yacca tat |
devatāyāstu saṃbandhātsadyaḥ syādiṣṭasiddhidam || 17 ||
[Analyze grammar]

sāṅkhyayoga virāgādi prāguktaṃ yacca duṣkaram |
tadapi syāddhi sukaramanenaivāśu siddhidam || 18 ||
[Analyze grammar]

devasyārādhanenaiva yataḥ siddhyati vāñchitam |
ataḥ sarvairyyathāśakti prītyārādhyaḥ sa mānavaiḥ || 19 ||
[Analyze grammar]

sāvarṇiruvāca |
devā vahuvidhā proktāstvayā ṣaṇmukha me purā |
nānāvidhā varṇitāśca tadārādhanarītayaḥ || 20 ||
[Analyze grammar]

tatphalāni ca sarvāṇi tvayoktāni pṛthakpṛthak |
svargādiprāptimukhyāni kālagrastāni tāni tu || 21 ||
[Analyze grammar]

nivṛttidharmmiṇāṃ brahmā hyupāsteryyogināṃ guha |
janādilokāptiphalaṃ dviparārddhāntanaśvaram || 22 ||
[Analyze grammar]

duṣkarāṇīha saṃsādhya karmmāṇi purukṛcchrataḥ |
kṣayiṣṇuphalalābhaścettarhi kiṃ tadupārjanaiḥ || 23 ||
[Analyze grammar]

kālena nāśyate yeṣāṃ vapuḥ sthānabalādikam |
teṣāṃ na rocate mahyamupāsā'tra divaukasām || 24 ||
[Analyze grammar]

yaḥ svayaṃ nirbhayo'nyeṣāṃ bhayaharttā sanātanaḥ |
nityadhāmā'kṣayaphalapradātā bhaktavatsalaḥ || 25 ||
[Analyze grammar]

yasya prasādātsarveṣāṃ sarva eva manorathāḥ |
 siddhyeyuścāñjasaivā'tra taṃ devaṃ vada me guha || 26 ||
[Analyze grammar]

tadārādhanarītiṃ ca sukarāṃ śiṣṭasaṃmatām |
brūhi sarvāṃ viśeṣeṇa jijñāsāmīdamañjasā || 27 ||
[Analyze grammar]

sautiruvāca |
itthaṃ maharṣiṇā tena saṃpṛṣṭo bhagavānguhaḥ |
suprasanna uvācedaṃ mānayaṃstamudāradhīḥ || 28 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye sāvarṇipraśno nāma prathamo'dhyāyaḥ || 1 ||
[Analyze grammar]