Chapter 9

[English text for this chapter is available]

agastya uvāca |
jaṭākuṇḍata āgneyadigdala saṃśritaṃ mahat |
gayākūpamiti khyātaṃ sarvābhīṣṭaphalapradam || 1 ||
[Analyze grammar]

yatra snātvā ca dattvā ca yathāśaktyā jiteṃdriyaḥ |
sarvakāmamavāpnoti śrāddhaṃ kṛtvā dvijottamaḥ || 2 ||
[Analyze grammar]

narakasthāśca ye kecitpitaraśca pitāmahāḥ |
viṣṇuloke tu gacchanti tasmiñcchrāddhe kṛte tu vai || 3 ||
[Analyze grammar]

tasmiñchrāddhe kṛte vipra pitṝṇāmanṛṇo bhavet |
śaktibhiḥ piṃḍadānaṃ tu sayavaiḥ pāyasena ca || 4 ||
[Analyze grammar]

karttavyamṛṣinirdiṣṭaṃ piṇyākena guḍena vā |
śrāddhaṃ tattīrthake proktaṃ pitṝṇāṃ tuṣṭikārakam || 5 ||
[Analyze grammar]

tatra śrāddhaṃ prakarttavyaṃ naraiḥ śraddhāsamanvitaiḥ |
tuṣyaṃti pitarasteṣāṃ tuṣṭāḥ syuḥ sarvadevatāḥ || 6 ||
[Analyze grammar]

tuṣṭeṣu pitṛṣu śrīmāñjāyateputravāṃstathā |
śrāddhena pitarastuṣṭāḥ prayacchaṃti sutānbahūn || 7 ||
[Analyze grammar]

śriyaṃ ca vipulānbhogāñchrāddhakṛdbhayo na saṃśayaḥ |
tasmādatra vidhānena vidhātavyaṃ prayatnataḥ || 8 ||
[Analyze grammar]

śrāddhaṃ śraddhāyutaiḥ samyagabhīṣṭaphalakāṃkṣibhiḥ |
gayākūpe viśeṣeṇa pitṝṇāṃ dattamakṣayam || 9 ||
[Analyze grammar]

somavāreṇa saṃyuktā amāvāsyā yadā bhavet |
tatrānaṃtaphalaṃ śrāddhaṃ pitṝṇāṃ dattamakṣayam || 10 ||
[Analyze grammar]

anyadā somavāreṇa tatra śrāddhaṃ vidhānataḥ |
pitṛsaṃtoṣadaṃ nityaṃ tatra dattākṣayo bhavet || 11 ||
[Analyze grammar]

tatra pūrvadiśābhāge tīrthaṃ sarvottamottamam |
piśācamocanaṃnāma vidyate ca phalapradam || 12 ||
[Analyze grammar]

tatra snātvā ca dattvā ca piśāco naiva jāyate |
tatra snānaṃ tathā dānaṃ śrāddhaṃ caiva viśeṣataḥ |
karttavyaṃ ca prayatnena naraiḥ śraddhāsamanvitaiḥ || 13 ||
[Analyze grammar]

mārgaśīrṣe śuklapakṣe caturdaśyāṃ viśeṣataḥ |
snānaṃ tatra prakarttavyaṃ piśācatvavimuktaye || 14 ||
[Analyze grammar]

tatsaṃnidhau pūrvabhāge mānasaṃnāma nāmataḥ |
tīrthaṃ puṇyanivāsāgryaṃ snātavyaṃ ca viśeṣataḥ |
tatra snānena dānena sarvānkāmānavāpnuyāt || 15 ||
[Analyze grammar]

nānāvidhāni pāpāni merutulyāni vai punaḥ |
tatra snānātkṣayaṃ yāṃti nātra kāryā vicāraṇā || 16 ||
[Analyze grammar]

yatkiñcidvidyate pāpaṃ mānasaṃ kāyikaṃ tathā |
vācikaṃ ca tathā pāpaṃ snānato vilayaṃ vrajet || 17 ||
[Analyze grammar]

prauṣṭhapadyāṃ sadā kāryyā paurṇamāsyāṃ viśeṣataḥ |
yātrā tasya nṛbhirvipra puṇyavadbhiḥ kriyāparaiḥ || 18 ||
[Analyze grammar]

tasmāddakṣiṇadigbhāge varttate sukṛtaikabhūḥ |
tamasānāma taṭinī mahāpātakanāśinī || 19 ||
[Analyze grammar]

yatra snānaṃ tathā dānaṃ sarvapāpaharaṃ sadā |
yasyāstaṭe tathā ramye sarvadā phaladāyake || 20 ||
[Analyze grammar]

nānāvidhāni sthānāni munīnāṃ bhāvitātmanām |
māṇḍavyasya muneḥ sthānaṃ varttate pāpanāśanam || 21 ||
[Analyze grammar]

yasyāstīre muniśreṣṭha sarvatra sumanoharam |
tasyāśramapadaṃ ramyaṃ nānāvṛkṣamanoharam || 22 ||
[Analyze grammar]

yasmātsthānātsamudbhūtā tamasā sutaraṃgiṇī |
tadvanaṃ puṇyamadhikaṃ pāvanaṃ padamuttamam || 23 ||
[Analyze grammar]

yasya darśanato nṝṇāṃ sarvapāpakṣayo bhavet || 24 ||
[Analyze grammar]

praphullanānāvidhagulmaśobhitaṃ latāpratānāvanataṃ manoharam |
virūḍhapuṣpaiḥ paritaḥ priyaṃgubhiḥ suṣuṣpitaiḥ kaṇṭakitaiśca ketakaiḥ || 25 ||
[Analyze grammar]

tamālagulmairnicitaṃ sugaṃdhibhiḥ sakarṇikārairbakulaiśca sarvataḥ |
aśokapunnāgavaraiḥ supuṣpitairdvirephamālākula puṣpasaṃcayaiḥ || 26 ||
[Analyze grammar]

kvacitpraphullāṃbujareṇubhūṣitairvihaṃgamaiścāruphalapracāribhiḥ |
vināditaṃ sārasamutkulādibhiḥ pramattadātyūhakulaiśca valgubhiḥ || 27 ||
[Analyze grammar]

kvacicca cakrāhvaravopanāditaṃ kvacicca kādambakadambakairyutam |
kvacicca kāraṇḍavanādanāditaṃ kvacicca mattālikulākulīkṛtam || 28 ||
[Analyze grammar]

madākulābhirbhramarībhirārānniṣevitaṃ cārusugaṃdhipuṣpavat |
kvacicca puṣpaiḥ sahakāravṛkṣairlatopagūḍhaistilakadrumaiśca || 29 ||
[Analyze grammar]

prahṛṣṭanānāvidhapakṣisevitaṃ pramattahārītakulopanāditam |
samaṃtataḥ sundaradarśanīyatāṃ samudvahattadvanamullasanmahat || 30 ||
[Analyze grammar]

nibiḍaniculanīlaṃ nīlakaṇṭhābhirāmaṃ madamuditavihaṃgīvṛndanādābhirāmam |
kusumitataruśākhālīnamattadvirephaṃnavakisalayaśobhāśobhitaṃ satphalāḍhyam || 31 ||
[Analyze grammar]

ityādibahuśobhāḍhyaṃ sarvadikṣu manoharam |
yatra māṃḍavyamuninā tapastaptaṃ mahatkila |
yatprabhāvādabhūttīrthaṃ pāvanaṃ tatsadā mahat || 32 ||
[Analyze grammar]

tatpūrvaṃ gautamasyarṣerāśramaṃ pāvanaṃ mahat |
tatpūrvaṃ cyavanasyarṣeḥ parāśaramuneridam |
prathamaṃ te muniśreṣṭha pituḥ kila taponidheḥ || 33 ||
[Analyze grammar]

nānāvidhāni tīrthāni cāśramāścaiva sarvaśaḥ |
vartaṃte tāpasānāṃ ca yasyāstīre samaṃtataḥ || 34 ||
[Analyze grammar]

tamasānāma sā jñeyā vartate taṭinī śubhā |
yajñayūpānsamutkhāya śobhitā bahuśo'bhitaḥ || 35 ||
[Analyze grammar]

tatra snānena dānena śrāddhena ca viśeṣataḥ |
sarvakāmārthasiddhiḥ syānnātra kāryā vicāraṇā || 36 ||
[Analyze grammar]

mārgaśīrṣe śuklapakṣe pañcadaśyāṃ viśeṣataḥ |
snānaṃ tasya phalaprāptidāyakaṃ sarvadā nṛṇām || 37 ||
[Analyze grammar]

tasmādatra prakartavyaṃ snānaṃ nirmalamānasaiḥ |
prayatnato muniśreṣṭha sarvakāmārthasiddhidam || 38 ||
[Analyze grammar]

ataḥ paraṃ pravakṣyāmi tamasāparamaṃ śubham |
sītākuṃḍamitikhyātaṃ śrīdugdheśvarasannidhau || 39 ||
[Analyze grammar]

bhādre śuklacaturthyāṃ tu tasya yātrā śubhāvahā |
sarvakāmārthasiddhyarthaṃ pūjyo vipreśvarastathā |
tasya smaraṇamātreṇa sarvavighnavināśanam || 40 ||
[Analyze grammar]

tasmāddakṣiṇadigbhāge bhairavo nāma nāmataḥ |
yaṃ dṛṣṭvā sarvapāpebhyo mucyate nātra saṃśayaḥ || 41 ||
[Analyze grammar]

rakṣito vāsudevena kṣetrarakṣārthamādarāt |
tasya pūjā vidhātavyā prayatnena yathāvidhi |
manobhīṣṭaphalaprāptirbhairavasya sadā'darāt || 42 ||
[Analyze grammar]

mārgaśīrṣasya kṛṣṇāyāmaṣṭamyāṃ tasya nirmitā |
yātrā sāṃvatsarī tatra sarvakāmārthasiddhaye || 43 ||
[Analyze grammar]

paśūpahārasaṃbhūti kartavyaṃ pūjanaṃ janaiḥ |
sarvakāmaphalaprāptirjāyate nātra saṃśayaḥ || 44 ||
[Analyze grammar]

nirvighnaṃ tīrthavasatirbhairavasya prasādataḥ |
jāyate tena kartavyā pūjā tasya prayatnataḥ || 45 ||
[Analyze grammar]

etasminnuttare bhāge ramyaṃ bharatakuṇḍakam |
yatra snātvā naraḥ pāpairmucyate nātra saṃśayaḥ || 46 ||
[Analyze grammar]

tatra snānaṃ tathā dānaṃ sarvamakṣayatāṃ vrajet |
annaṃ bahuvidhaṃ deyaṃ vāsāṃsi vividhānyapi || 47 ||
[Analyze grammar]

yatnato devatāḥ pūjyā vastrādibhiralaṃkṛtaiḥ |
naṃdigrāme vasanpūrvaṃ bharato raghuvaṃśajaḥ || 48 ||
[Analyze grammar]

rāmacandraṃ hṛdi dhyāyannirmalātmā jitendriyaḥ |
tataḥ sthitvā prajāḥ sarvā rarakṣa kṣitivallabhaḥ || 49 ||
[Analyze grammar]

tatra cakre mahatkuṇḍaṃ bharato nāma bhūpatiḥ |
rāmamūrtiṃ ca saṃsthāpya cacāra vijitendriyaḥ || 50 ||
[Analyze grammar]

tatkuṃḍe sumahatpuṇyaṃ nānāpuṇyasamanvitam |
kumudotpalakahlārapuṇḍarīkasamanvitam || 51 ||
[Analyze grammar]

haṃsasārasacakrāhva vihaṃgamavirājitam |
udyānapādapacchāyāsacchāyamamalaṃ sadā || 52 ||
[Analyze grammar]

tatra snānaṃ mahāpuṇyaṃ pramodānandanirmalam |
tatra snānaṃ tathā śrāddhaṃ pitṝnuddiśya kurvataḥ |
pitarastasya tuṣyaṃti tuṣṭāḥ syuḥ sarvadevatāḥ || 53 ||
[Analyze grammar]

svarṇaṃ cānnaṃ vidhānena dātavyaṃ ca dvijanmane |
śraddhāpūrvakametattu kartavyaṃ prayatairnaraiḥ || 54 ||
[Analyze grammar]

tatpaścimadiśābhāge jaṭākuṇḍamanuttamam |
yatra rāmādibhiḥ sarvairjaṭāḥ parihṛtā nijāḥ || 55 ||
[Analyze grammar]

jaṭākuṇḍamiti khyātaṃ sarvatīrthottamottamam |
yatra snānena dānena sarvānkāmānavāpnuyāt || 56 ||
[Analyze grammar]

pūrvakuṇḍeṣu saṃpūjyo bharataḥ śrīsamanvitaḥ |
jaṭākuṇḍeṣu saṃpūjyau sasītau rāmalakṣmaṇau |
caitrakṛṣṇacaturdaśyāṃ yātrā sāṃvatsarī bhavet || 57 ||
[Analyze grammar]

iti paramavidhānaiḥ pūjayedrāmasīte tadanu bharatakuṇḍe lakṣmaṇaṃ ca prapūjya |
vidhivadamṛtakuṇḍe dvaṃdvaṃsamajjanena vasati sukṛtimūrtirvaiṣṇave tatra loke || 58 ||
[Analyze grammar]