Chapter 8

[English text for this chapter is available]

agastya uvāca |
ghoṣārkatīrthādviprarṣe paścime diktaṭe sthitam |
ratikuṇḍamiti khyātaṃ sarvapāpaharaṃ sadā || 1 ||
[Analyze grammar]

yatra snānena dānena parāṃ kāṃtimavāpnuyāt |
tatpaścimadiśābhāge kusumāyudhanāmakam || 2 ||
[Analyze grammar]

kuṃḍaṃ prasiddhamatulaṃ sarvakāmārthasiddhaye |
yatra snānena dānena kandarpasadṛśākṛtim |
labhate nā vidhānena mune nāstyatra saṃśayaḥ || 3 ||
[Analyze grammar]

ratikuṃḍe tathā vipra kusumāyudhakuṇḍake |
śraddhayā kurute snānaṃ sa saukhyaparamo bhavet || 4 ||
[Analyze grammar]

kuṇḍadvaye'tra mithunaṃ yatsnānaṃ kurute kila |
ratikāmāviva khyātau sadā tau suṃdarau tadā || 5 ||
[Analyze grammar]

tasmādatra vidhānena snātavyaṃ dharmakāṃkṣibhiḥ |
dānaṃ deyaṃ yathāśaktyā ratikaṃdarpatuṣṭaye || 6 ||
[Analyze grammar]

bhavetāṃ niyataṃ tasya saṃtuṣṭau ratimanmathau |
māghe viśadapaṃcamyāṃ yatra snānaṃ śubhapradam || 7 ||
[Analyze grammar]

ratikuṃḍe puraḥ snātvā paścātkaṃdarppakuṃḍake |
snātavyaṃ taddine vipra mithunena prayatnataḥ || 8 ||
[Analyze grammar]

ratikaṃdarppayoḥ pūjā vidhātavyā viśeṣataḥ |
vastrādibhiralaṃkāraiḥ saṃpūjyau dvijadaṃpatī || 9 ||
[Analyze grammar]

sarvānkāmānavāpnoti nātra kāryā vicāraṇā || 10 ||
[Analyze grammar]

caṃdanāgurukarpūrakastūrīkuṃkumādibhiḥ |
vāsobhirvividhaiḥ puṣpaiḥ pūjayeddvijadampatī || 11 ||
[Analyze grammar]

evaṃ kṛte na saṃdeho ratikaṃdarpatuṣṭaye |
tadvrajenmiśrunaṃ vipra ratikaṃdarppatulyatām || 12 ||
[Analyze grammar]

kusumāyudhakuṃḍāttu pratīcyāṃ diśi saṃsthitam |
mantreśvara iti khyātaṃ tatsthānaṃ bhuvi durlabham || 13 ||
[Analyze grammar]

tatra tīrthe naraḥ snātvā dṛṣṭvā mantreśvaraṃ vibhum |
na teṣāṃ punarāvṛttiḥ kalpakoṭiśatairapi || 14 ||
[Analyze grammar]

purā rāmo devakāryaṃ vidhāyāmalakarmakṛt |
kālena saha saṃgamya mantraṃ cakre nareśvaraḥ || 15 ||
[Analyze grammar]

svargaṃ prati prayāṇāya yatra snātau jiteṃdriyaḥ |
tatraiva sthāpitaṃ liṃgaṃ mantreśvara iti śrutam || 16 ||
[Analyze grammar]

taduttare saro ramyaṃ kumudotpalamaṃḍitam |
tatra snānaṃ tathā dānaṃ nānāphaladamuttamam || 17 ||
[Analyze grammar]

caitraśuklacaturdaśyāṃ yātrā sāṃvatsarī smṛtā |
tatra snānena dānena brāhmaṇānāṃ ca pūjanāt |
akṣayaṃ svargamāpnoti tatra kāryā vicāraṇā || 16 ||
[Analyze grammar]

maṃtreśvarasya mahimā nahi kenāpi śakyate |
samyagvarṇayituṃ vipra ya uttamaphalapradaḥ |
maṃtreśvarasamaṃ liṃgaṃ na bhūtaṃ na bhaviṣyati || 19 ||
[Analyze grammar]

sugaṃdhipuṣpadhūpādikusumādyanulepanaiḥ |
pūjanīyaḥ prayatnena sarvakāmārthasiddhidaḥ || 20 ||
[Analyze grammar]

evaṃ kṛte na saṃdeho muktistasya kare sthitā |
tatraivottarabhāge tu śītalā vartate'nagha || 21 ||
[Analyze grammar]

tāṃ saṃpūjya naro vidvānsarvapāpaiḥ pramucyate |
sarvadā pūjanaṃ tasyāḥ somavāre viśeṣataḥ |
karttavyaṃ suprayatnena nṛbhiḥ sarvārthasiddhaye || 22 ||
[Analyze grammar]

visphoṭakādikabhaye naraiśca samupasthite |
kartavyaṃ pūjanaṃ samyagrogādibhayanāśanam || 23 ||
[Analyze grammar]

taduttare tu tatraiva devī vandīti viśrutā |
yasyāḥ smaraṇamātreṇa nigaḍādibhayaṃ nahi || 24 ||
[Analyze grammar]

rājñā kruddhena ye baddhāḥ śṛṃkhalānigaḍādibhiḥ |
bandī saṃsmṛtya devīṃ tu muktāḥ syustatkṣaṇāddhi te || 25 ||
[Analyze grammar]

yātrā tasyāḥ prayatnena kartavyā yatnato naraiḥ |
maṃgale hi viśeṣeṇa sarvakāmārthasiddhidā || 26 ||
[Analyze grammar]

gaṃdhaiḥ puṣpaistathā dhūpairdīpairapi ca suvrata |
naivedyairvividhairvāpi pūjanīyā prayatnataḥ || 27 ||
[Analyze grammar]

bandīprītyai muniśreṣṭha deyaṃ brāhmaṇabhojanam |
evaṃ kṛte na saṃdehaḥ sarvānkāmānavāpnuyāt || 28 ||
[Analyze grammar]

taduttarasmiṃstatraiva cuḍakī bhuvi kīrtitā |
vartate paramā siddhirūpiṇī smaraṇānnṛṇām || 29 ||
[Analyze grammar]

susaṃdigdheṣu kāryeṣu bhaye ca samupasthite |
yasyāḥ smaraṇato nṝṇāṃ sarvasiddhiḥ prajāyate || 30 ||
[Analyze grammar]

agre tasyāḥ sadā kāryā nṛbhiraṃguṣṭhato dhvaniḥ |
dīpadānaṃ prayatnena karttavyaṃ niyatātmabhiḥ || 31 ||
[Analyze grammar]

sarvābhīṣṭapradaṃ nṝṇāṃ dīpadānaṃ praśasyate |
caturdaśyāṃ caturdaśyāṃ tasyā yātrā vinirmitā || 32 ||
[Analyze grammar]

tataḥ pūrvadiśābhāge varttate tīrthamuttamam |
mahāratna iti khyātaṃ sarvatīrthottamottamam || 33 ||
[Analyze grammar]

yatra snānena dānena pūjayā ca dvijanmanām |
sarvakarmārthasiddhiḥ syānnātra kāryā vicāraṇā || 34 ||
[Analyze grammar]

bhādre kṛṣṇacaturdaśyāṃ yātrā sāṃvatsarī smṛtā |
yātrā'ste kila mukhyā'sya mahāratnā iti śrutā || 35 ||
[Analyze grammar]

mahāratna iti khyātaṃ tasmāttīrthamanuttamam |
tatra dānaṃ prakarttavyaṃ dvijasaṃtoṣakārakam || 36 ||
[Analyze grammar]

nārībhirapi viprarṣe karttavyo jāgarotsavaḥ |
vīryasaubhāgyasaṃpannasarvasaukhyāya sarvadā |
tatra snānaṃ prayatnena karttavyaṃ śraddhayā naraiḥ || 37 ||
[Analyze grammar]

tato naiṛtyadigbhāge durbharākhyaṃ sarā śubham |
vartate sukṛtodāraṃ mahābharasarastathā || 38 ||
[Analyze grammar]

tatra snānādavāpnoti sadā svargapadaṃ naraḥ |
dhanaṃ bahuvidhaṃ deyaṃ vāsāṃsi vividhāni ca || 39 ||
[Analyze grammar]

śivapūjā prakarttavyā snātvā kuṇḍadvaye naraiḥ |
nānāvidhena bhāvena bhaktyā paramayā yutaiḥ || 40 ||
[Analyze grammar]

gandhādibhiḥ śubhaiḥ puṣpairarccanīyo maheśvaraḥ |
nīlakaṃṭhoṃ'dhakārātirārādhyo yogināmapi || 41 ||
[Analyze grammar]

iti dhyātvā śivaṃ sārddhaṃ niṣpāpaṃ prayato naraḥ |
sarvakāmānavāpyāśu śivaloke vasetsadā || 42 ||
[Analyze grammar]

evaṃ kṛtvā naro vipra sarvapāpaiḥ pramucyate |
mahābhare vare tīrthe tathā durbharasaṃjñake || 43 ||
[Analyze grammar]

bhādrakṛṣṇacaturdaśyāṃ yaḥ kuryyācchraddhayā'nvitaḥ |
śivapūjāṃ ca vidhivaddvijapūjāṃ viśeṣataḥ || 44 ||
[Analyze grammar]

yaḥ karoti naro bhaktyā śivaloke sa saṃvaset |
evaṃ kurvannaro vidvānna muhyati kadācana || 45 ||
[Analyze grammar]

viṣṇurudrau ca tasyātisuprasannau sanātanau |
tayoḥ smaraṇamātreṇa sarvapāpaiḥ pramucyate || 46 ||
[Analyze grammar]

ataḥ kiṃ bahunoktena vipratīrthamanuttamam |
sarvapāpaughaśamanaṃ sarvābhīṣṭakaraṃ sadā || 47 ||
[Analyze grammar]

ataḥ paraṃ pravakṣyāmi tīrthamanyacchubhāvaham |
yatra yātrā tathā dānaṃ vinā bhāgyaṃ na saṃbhavet || 48 ||
[Analyze grammar]

īśāne durbharasthānānmahāvidyābhidhaṃ mahat |
tasya darśanato nṝṇāṃ siddhayaḥ syuḥ kare sthitāḥ || 49 ||
[Analyze grammar]

tadagre sarasi snātvā mahāvidyāṃ tu yo naraḥ |
paśyati śraddhayā bhaktyā sa yāti paramāṃ gatim || 50 ||
[Analyze grammar]

siddhapīṭhaṃ tathā khyātaṃ samyakpratyayakārakam |
tatra pūjā vidhātavyā bhaktyā paramayā dvija || 51 ||
[Analyze grammar]

maṃtraṃ yaḥ śraddhayā vipra śaivaṃ śāktamathāpi vā |
gāṇapatyaṃ vaiṣṇavaṃ vā tatra yaḥ prayato naraḥ || 52 ||
[Analyze grammar]

ekāgramānaso vidvannārādhyāvartayetsadā |
tasya siddhirbhavennityaṃ camatkāro bhaveddvija || 53 ||
[Analyze grammar]

tasmādatra prakartavyaṃ japādikamataṃdritaiḥ |
aṣṭamyāṃ ca navamyāṃ ca yātrā syātpratimāsikī || 54 ||
[Analyze grammar]

deyānyannāni bahuśo nānāvidhaphalāni ca |
kṣīreṇa snapanaṃ kāryaṃ pūjanīyā prayatnataḥ || 55 ||
[Analyze grammar]

uccāṭanādīnyapi ca mohanādi viśeṣataḥ |
atra sthāne viśeṣeṇa duṣṭamantro'pi sidhyati || 56 ||
[Analyze grammar]

siddhasthāne paraṃ mokṣaṃ vaśīkaraṇamuttamam |
japo homastathā dānaṃ sarvamakṣayatāṃ vrajet || 57 ||
[Analyze grammar]

āśvine śuklapakṣasya navarātriṣu suvrata |
yatra gatvā naro vipra sarvapāpaiḥ pramucyate || 58 ||
[Analyze grammar]

yadā pūrvaṃ vinirjitya rāvaṇaṃ lokarāvaṇam |
samāgato raghupatiḥ sītālakṣmaṇasaṃyutaḥ || 59 ||
[Analyze grammar]

yatra gatvā padā vīro bharato rāmakāṃkṣayā |
sthitaḥ sānucaraḥ śrīmāñchriyā paramayā yutaḥ || 60 ||
[Analyze grammar]

tatrāgamatsuragavī prādurbhūtā sravatstanī |
tatstanebhyaḥ prasusrāva dugdhaṃ bahuguṇādhikam || 61 ||
[Analyze grammar]

tadbhūmipatitaṃ dugdhaṃ dṛṣṭvā vānararākṣasāḥ |
vismayaṃ paramaṃ jagmuḥ prapapuste carācaram || 62 ||
[Analyze grammar]

kimetaditi rājeṃdra tānuvāca raghūdvahaḥ |
vasiṣṭho vetti tatsarvaṃ pṛcchāmastaṃ muniṃ vayam || 63 ||
[Analyze grammar]

ityuktāstu tataḥ sarve vasiṣṭhapramukhe sthitāḥ |
te papracchuḥ prāṃjalayaḥ kṛtvā cāgresaraṃ nṛpam || 64 ||
[Analyze grammar]

vasiṣṭho'pi kṣaṇaṃ dhyātvā tamuvāca nirākulam |
rāghavaṃ prati saṃbodhya sarveṣāmagrato muniḥ || 65 ||
[Analyze grammar]

vasiṣṭha uvāca |
śṛṇu rāma mahābāho kāmadhenuriyaṃ śubhā |
samāgatā tava snehātprasravaṃtī stanātpayaḥ || 66 ||
[Analyze grammar]

dugdhamadhye samudbhūto rudrastvāṃ draṣṭumāgataḥ |
niṣpannakāryyaṃ devānāṃ nirjitārātimuttamam || 67 ||
[Analyze grammar]

imaṃ saṃpūjaya kṣiprametatkuṇḍasya sannidhau |
śīghraṃ tvamapi yatnena pūjayemaṃ śivaṃ śubham |
dugdheśvaramiti khyātaṃ kṣīrakuṇḍe pavitrakam || 68 ||
[Analyze grammar]

agastya uvāca |
tato raghupatiḥ śrīmānvasiṣṭhoktavidhānataḥ |
pūjayāmāsa talliṃgaṃ dugdheśvaramiti smṛtam || 69 ||
[Analyze grammar]

sītayā satkṛtaṃ yasmāttatkuṇḍaṃ kṣīrasaṃgamam |
sītākuṃḍamiti khyātiṃ jagāmānupamāṃ tataḥ || 70 ||
[Analyze grammar]

sītākuṇḍe narāḥ snātvā dṛṣṭvā dugdheśvaraṃ prabhum |
sarvapāpaiḥ pramucyaṃte nātra kāryā vicāraṇā || 71 ||
[Analyze grammar]

atra snānaṃ japo homo dānaṃ cākṣayatāṃ vrajet |
sītākuṃḍe tu saṃpūjya sītārāmau salakṣmaṇau || 72 ||
[Analyze grammar]

dugdheśvaraṃ ca saṃpūjya sarvānkāmānavāpnuyāt |
jyeṣṭhe māsi caturdaśyāṃ yātrā sāṃvatsarī smṛtā || 73 ||
[Analyze grammar]

evaṃ yo vidhivatkuryāddayādharmaviśāradaḥ |
sa yāti paramaṃ sthānaṃ yatra gatvā na śocati || 74 ||
[Analyze grammar]

tatra pūrvadiśābhāge sugrīvaracitaṃ mahat |
tīrthaṃ taponidhestatra vartate sannidhau śubham || 75 ||
[Analyze grammar]

yatra snātvā ca dattvā ca rāmaṃ saṃpūjya yatnataḥ |
tasminneva dine tatra sarvānkāmānavāpnuyāt || 76 ||
[Analyze grammar]

tatpratyagdiśi vai sthānaṃ hanumatkuṇḍamityapi |
tasya paścimato vipra vibhīṣaṇasaraḥ dūrara || 77 ||
[Analyze grammar]

tayoḥ snānena dānena rāmasaṃpūjanena ca |
sarvānkāmānavāpnoti tasminneva vidhānataḥ |
iyaṃ sā paramā medhyā'yodhyā dharmanidhiḥ smṛtā || 78 ||
[Analyze grammar]

ityuktāstu tataḥ sarve vasiṣṭhamunimādarāt |
papracchurvinayātkṣipraṃ vibhīṣaṇapuraḥsarāḥ |
kathayasva taporāśe kathāmetāṃ sudurlabhām || 79 ||
[Analyze grammar]

ayodhyāyāḥ paraṃ vipra māhātmyaṃ kathayaṃti yat |
tatsarvaṃ kathaya kṣipraṃ śrutvā māhātmyamuttamam || 80 ||
[Analyze grammar]

yathā yātrāṃ vidhāsyāmaḥ krameṇa ca vidhānataḥ |
tadasmāsu kṛpāṃ kṛtvā kathayasva taponidhe || 81 ||
[Analyze grammar]

vasiṣṭha uvāca |
śṛṇvantu munayaḥ sarve ayodhyāmahimādbhutam |
yacchrutvā sarvapāpebhyo mucyate nātra saṃśaya || 82 ||
[Analyze grammar]

idaṃ guhyataraṃ kṣetramayodhyābhidhamuttamam |
sarveṣāmeva bhūtānāṃ heturmokṣasyaḥ sarvadā || 83 ||
[Analyze grammar]

asminsiddhāḥ sadā devā vaiṣṇavaṃ vratamāsthitāḥ |
nānāliṃgadharā nityaṃ viṣṇulokābhikāṃkṣiṇaḥ || 84 ||
[Analyze grammar]

abhyasyaṃti paraṃ yogaṃ yuktaprāṇā jitendriyāḥ |
nānāvṛkṣasamākīrṇe nānāvihagavāsini || 85 ||
[Analyze grammar]

kamalotpalaśobhāḍhye sarobhiḥ samalaṃkṛte |
apsarogaṇasaṃkīrṇe sarvadā sevite śubhe || 86 ||
[Analyze grammar]

rocate hi sadā vāsaḥ kṣetre nityaṃ hareriha |
manyamānā viṣṇubhaktā viṣṇau sarve'rpitakriyāḥ || 87 ||
[Analyze grammar]

yathā mokṣamihāyāṃti nānyatra hi tathā kvacit |
ataḥ śreṣṭhatamaṃ kṣetraṃ yasmācca vasatirhareḥ |
mahākṣetramidaṃ yasmādayodhyābhidhamuttamam || 88 ||
[Analyze grammar]

naimiṣe ca kurukṣetre gaṃgādvāre ca puṣkare |
snānātsaṃsevanādvāpi na mokṣaḥ prāpyate tathā || 89 ||
[Analyze grammar]

iha saṃprāpyate yadvattata eva viśiṣyate |
prayāge vā bhavenmokṣa iha vā harisaṃśrayāt |
sarvasmādapi tīrthāgryādidameva mahatkṛtam || 90 ||
[Analyze grammar]

avyaktaliṃgairmunibhiḥ sarvaiḥ siddhairmaharṣibhiḥ |
iha saṃprāpyate mokṣo durllabho'nyatra yo mataḥ || 91 ||
[Analyze grammar]

tebhyaḥ prayacchati hariryogamaiśvaryyamuttamam |
ātmanaścaiva sāyujyamīpsitaṃ sthānamuttamam || 92 ||
[Analyze grammar]

brahmā devarṣibhiḥ sārddhaṃ śrīśca vāyurdivākaraḥ |
devarājastathā śakro ye cānye'pi divaukasaḥ || 93 ||
[Analyze grammar]

upāsate mahātmānaḥ sarvatra harimādarāt |
anyepi yoginaḥ siddhāḥ kṣetrarūpā mahāvratāḥ |
ananyamanaso bhūtvā sarvadopāsate harim || 94 ||
[Analyze grammar]

viṣayāsaktacitto'pi tyaktadharmaratirnaraḥ |
iha kṣetre mṛtaḥ sopi saṃsārī na punarbhavet || 95 ||
[Analyze grammar]

ye punarnigamādhīnāḥ satrasthā vijiteṃdriyāḥ |
vratinaśca nirāraṃbhāḥ sarve te haribhāvitāḥ || 96 ||
[Analyze grammar]

dehabhaṃgaṃ samāpadya dhīmaṃtaḥ saṃgavarjitāḥ |
gatāste ca paraṃ mokṣaṃ prasādātsarvadā hareḥ || 97 ||
[Analyze grammar]

janmāntarasahasreṣu yuñjanyogī na cāpnuyāt |
tamihaiva paraṃ mokṣaṃ maraṇādapi gacchati || 98 ||
[Analyze grammar]

etatsaṃkṣepato vacmi kṣetrasya mahimādbhutam |
etadeva paraṃ sthānametadeva paraṃ padam |
etādṛṅnāparaṃ sthānaṃ punaranyatra dṛśyate || 99 ||
[Analyze grammar]

atra gatvā prayatnena yātrā puṇyābhikāṃkṣibhiḥ |
kartavyā vidhivaddhīrāḥ krameṇa śraddhayānvitaiḥ || 100 ||
[Analyze grammar]

prathame'hani karttavya upavāso yatātmabhiḥ |
niyamena tataḥ snānaṃ dānaṃ caiva svaśaktitaḥ || 101 ||
[Analyze grammar]

upāvṛttastu pāpebhyo yasya vāso guṇaiḥ saha |
upavāsaḥ sa vijñeyaḥ sarvabhogavivarjitaḥ || 102 ||
[Analyze grammar]

upavāsaṃ vidhāyāsau cakratīrthe naraḥ kṛtī |
upavāsadine snāyāddadyāccaiva svaśaktitaḥ || 103 ||
[Analyze grammar]

vipraṃ saṃpūjya vidhivatpaśyedviṣṇuhariṃ vibhum |
svargadvāre naraḥ snātvā viṣṇuṃ saṃpūjya yatnataḥ || 104 ||
[Analyze grammar]

kṣauraṃ ca kārayettatra vratī dharmābhidhe tataḥ |
pāpamocanake snānamṛṇamocanake tataḥ || 105 ||
[Analyze grammar]

snātvā sahasradhārāyāṃ śeṣaṃ saṃpūjya yatnataḥ |
dṛṣṭvā caṃdrahariṃ devaṃ tato dharmahariṃ vibhum || 106 ||
[Analyze grammar]

tataścakrahariṃ dṛṣṭvā dadyāccaiva svaśaktitaḥ |
brahmakuṇḍe naraḥ snātvā sarvakāmārthasiddhaye |
mahāvidyāsamīpe tu rātrau jāgaraṇaṃ caret || 107 ||
[Analyze grammar]

tataḥ prabhāte vimale punarutthāya sadvratī |
svargadvāre prayatnena vidhivatsnānamācaret || 108 ||
[Analyze grammar]

śrāddhaṃ ca vidhivatkṛtvā dattvā caiva svaśaktitaḥ |
viṣṇuṃ saṃpūjya vidhivadviprānapi punaḥpunaḥ || 109 ||
[Analyze grammar]

daṃpatī ca prayatnena pūjyau vastrādibhistathā |
śraddhayā parayā yuktairdātavyā bhūridakṣiṇā || 110 ||
[Analyze grammar]

viprānsaṃpūjya vidhivadbhuṃjīta prayato naraḥ || 111 ||
[Analyze grammar]

anyedyurapi cotthāya śraddhayā parayā yutaḥ |
rukmiṇīprabhṛtīnyatra paśyettīrthāni ca kramāt || 112 ||
[Analyze grammar]

tatratatra naraḥ snātvā dattvā caiva svaśaktitaḥ |
viṣṇuṃ saṃpūjya yatnena manovākkāyanirmalaḥ || 113 ||
[Analyze grammar]

yātrāṃ samāpayetsamyaṅniyatātmā śucivrataḥ |
yatra kvāpi mṛto dhīraḥ paraṃ mokṣamavāpnuyāt || 114 ||
[Analyze grammar]

agastya uvāca |
vasiṣṭhoktamiti śrutvā kṛtvā caiva yathāvidhi |
vibhīṣaṇapurogāste babhūvurnirmalāstadā || 115 ||
[Analyze grammar]

iti bahulavidhānaistīrthayātrāṃ vidhāya pracurasukṛtapūrṇāste ca sugrīvamukhyāḥ |
gatamalinasudehāḥ svargacaryāprayatnādupaguṇitaguṇaughāste babhūvuḥ samastāḥ || 116 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṃḍe'yodhyāmāhātmye mahāratnatīrthadurbharamahābharatīrthamahāvidyātīrtha siddhapīṭhakṣīreśvarasītākuṇḍa sugrīvatīrthahanumatkuṇḍa vibhīṣaṇasarastīrthāyodhyāyātrāvidhikramavarṇanaṃnāmāṣṭamo'dhyāyaḥ || 8 ||
[Analyze grammar]