Chapter 6

[English text for this chapter is available]

agastya uvāca |
tasmātsaṃgamato vipra paścime diktaṭe sthitam |
sītākuṇḍamitikhyātaṃ sarvakāmaphalapradam || 1 ||
[Analyze grammar]

yatra snātvā naro vipra sarvapāpaiḥ pramucyate |
sītayā kila tatkuṇḍaṃ svayameva vinirmitam |
rāmeṇa varadānācca mahāphalanidhīkṛtam || 2 ||
[Analyze grammar]

śrīrāma uvāca |
śṛṇu sīte pravakṣyāmi māhātmyaṃ bhuvi yādṛśam |
tvatkuṇḍasyāsya subhage tvatprītyā kathayāmyaham || 3 ||
[Analyze grammar]

atra snānaṃ ca dānaṃ ca japo homastapo'thavā |
sarvamakṣayatāṃ yāti vidhānena śucismite || 4 ||
[Analyze grammar]

mārgakṛṣṇacaturdaśyāṃ tatra snānaṃ viśeṣataḥ |
sarvapāpaharaṃ devi sarvadā snāyināṃ nṛṇām || 5 ||
[Analyze grammar]

iti rāmo varaṃ prādātsītāyai ca prajāpriyaḥ |
tadāprabhṛti sarvatra tattīrthaṃ bhuvi varttate || 6 ||
[Analyze grammar]

sītākuṇḍamiti khyātaṃ janānāṃ paramādbhutam |
tasmiṃstīrthe naraḥ snātvā nūnaṃ rāmamavāpnuyāt || 7 ||
[Analyze grammar]

tatra snānena dānena tapasā ca viśeṣataḥ |
gandhairmālyairdhūpadīpairnnānāvibhavavistaraiḥ |
rāmaṃ saṃpūjya sītāṃ ca muktaḥ syānnātra saṃśayaḥ || 8 ||
[Analyze grammar]

mārge māsi ca snātavyaṃ garbhavāso na jāyate |
anyadāpi naraḥ snātvā viṣṇulokaṃ sa gacchati || 9 ||
[Analyze grammar]

vibhorviṣṇuharervipra ramye paścimadiktaṭe |
devaścakraharirnāma sarvābhīṣṭaphalapradaḥ || 10 ||
[Analyze grammar]

tasya cakraharervipra mahimā na hi mānavaiḥ |
śakyo varṇayituṃ dhīrairapi buddhimatāṃ varaiḥ || 11 ||
[Analyze grammar]

tataḥ paścimadigbhāge nāmnā puṇyaṃ harismṛti |
viṣṇorāyatanaṃ khyātaṃ paramārthaphalapradam |
yasya darśanamātreṇa sarvapāpaiḥ pramucyate || 12 ||
[Analyze grammar]

tayordarśanato yāṃti teṣāṃ pāpāni dehinām |
tāni pāpāni yāvaṃti kurvate bhuvi ye narāḥ || 13 ||
[Analyze grammar]

purā devāsure jāte saṃgrāme bhṛśadāruṇe |
daityairvaramadotsiktairdevā yudhi parājitāḥ || 14 ||
[Analyze grammar]

teṣāṃ palāyamānānāṃ devānāmagraṇīrharaḥ |
saṃstabhya caiva tānsarvānpuraskṛtyāṃbujāsanam || 15 ||
[Analyze grammar]

kṣīrodaśāyinaṃ viṣṇuṃ śeṣaparyyaṃkaśāyinam |
lakṣmyopaviṣṭaṃ pārśve ca caraṇāṃbujahastayā || 16 ||
[Analyze grammar]

nāradādyairmunivarairudgītagugauravam |
garuḍena puraḥsthenāniśamaṃjalinā stutam || 17 ||
[Analyze grammar]

kṣīrābdhijalakallolamadabindvaṃkitāmbaram |
tārakotkaravisphāratārahāravirājitam || 18 ||
[Analyze grammar]

pītāṃbaramatismeravikāśadbhāvabhāvitam |
bibhrataṃ kuṇḍalaṃ sthūlaṃ karṇābhyāṃ mauktikojjvalam || 19 ||
[Analyze grammar]

ratnavallīmiva svacchāṃ śvetadvīpanivāsinīm |
kirīṭaṃ padmarāgāṇāṃ valayaṃ dadhataṃ param || 20 ||
[Analyze grammar]

mitrasya rāhuvitrāsanivarttanamivāparam |
sakaustubhaprabhācakraṃ bibhrāṇaṃ pravalāruṇam || 21 ||
[Analyze grammar]

parāṃ caturmukhotpattikalpasaṃkalpanāmiva |
śaraṇaṃ sa jagāmāśu vinītātmā stuvanniti || 22 ||
[Analyze grammar]

tasminnavasare śaṃbhuḥ sarvadevagaṇaiḥ saha |
tuṣṭāva prayato bhūtvā viṣṇuṃ jiṣṇuṃ suradviṣām || 23 ||
[Analyze grammar]

īśvara uvāca |
saṃsārārṇavasaṃtārasuparṇasukhadāyine |
moha tīvratamo hāri candrāya haraye namaḥ || 24 ||
[Analyze grammar]

sphuratsaṃvinmaṇiśikhāṃ cittasaṃgaticaṃdrikām |
prapadye bhagavadbhaktimānasodyānavāhinīm || 25 ||
[Analyze grammar]

helollasatsamutsāhaśaktiṃ vyāptajagattrayām |
yā pūrvakoṭirbhāvānāṃ sattvānāṃ vaiṣṇavīti vā || 26 ||
[Analyze grammar]

pavanāṃdolitāṃbhojadalaparvāṃtavarttinām |
patatāmiva jantūnāṃ sthairyamekā harismṛtiḥ || 27 ||
[Analyze grammar]

namaḥ sūryyātmane tubhyaṃ saṃvitkiraṇamāline |
hṛtkuśeśayakoṣaśrīsamunmeṣavidhāyine || 28 ||
[Analyze grammar]

namastasmai yamavate yogināṃ gataye sadā |
parameśāya vai pāre mahasāṃ tamasāṃ tathā || 29 ||
[Analyze grammar]

yajñāya bhuktahaviṣa ṛgyajuḥsāmarūpiṇe |
namaḥ sarasvatīgītadivyasadgaṇaśāline || 30 ||
[Analyze grammar]

śāṃtāya dharmanidhaye kṣetrajñāyāmṛtātmane |
śiṣyayogapratiṣṭhāya namo jīvaikahetave |
ghorāya māyāvidhaye sahasraśirase namaḥ || 31 ||
[Analyze grammar]

yoganidrātmane nābhipadmodbhūtajagatsṛje |
namaḥ salilarūpāya kāraṇāya jagatsthiteḥ || 32 ||
[Analyze grammar]

kāryameyāya baline jīvāya paramātmane |
goptre prāṇāya bhūtānāṃ namo viśvāya vedhase || 33 ||
[Analyze grammar]

dṛptāya siṃhavapuṣe daityasaṃhārakāriṇe |
vīryāyānaṃtamanase jagadbhāvabhṛte namaḥ || 34 ||
[Analyze grammar]

saṃsārakāraṇājñānamahāsaṃtamasacchide |
acintyadhāmne guhyāya rudrāyātyudvije namaḥ || 35 ||
[Analyze grammar]

śāntāya śāntakallolakaivalyapadadāyine |
sarvabhāvātiriktāya namaḥ sarvamayātmane || 36 ||
[Analyze grammar]

indīvaradalaśyāmaṃ sphūrjatkiṃjalkavibhramam |
bibhrāṇaṃ kaustubhaṃ viṣṇuṃ naumi netrarasāyanam || 37 ||
[Analyze grammar]

agastya uvāca |
iti stutaḥ prasannātmā varado garuḍadhvajaḥ |
vavarṣa dṛṣṭisudhayā sarvāndevānkṛpānvitaḥ |
uvāca madhuraṃ vākyaṃ praśrayāvanatānsurān || 38 ||
[Analyze grammar]

śrībhagavānuvāca |
jānāmi vibudhāḥ sarvamabhiprāyaṃ samādhitaḥ |
daiteyairvikramākrāntaṃ padaṃ samaradarpitaiḥ || 39 ||
[Analyze grammar]

sabalairbalahīnānāṃ pratāpo vijitaḥ paraiḥ |
sāṃprataṃ tu vidhāsyāmi tapo yuṣmadbalāya vai || 40 ||
[Analyze grammar]

ayodhyānagare gatvā kariṣye tapa uttamam |
gupto bhūtvā bhavattejovivṛddhyai daityaśāntaye || 41 ||
[Analyze grammar]

bhavanto'pi tapastīvraṃ kurvaṃtvamalamānasāḥ |
ayodhyāṃ prāpyatāṃ devā daityanāśāya satvaram || 42 ||
[Analyze grammar]

agastya uvāca |
ityuktvāṃtardadhe devāndevo garuḍavāhanaḥ |
ayodhyāmāgataḥ kṣipraṃ cakāra tapa uttamam || 43 ||
[Analyze grammar]

gupto bhūtvā yadā vidvansuratejobhivṛddhaye |
tena guptaharirnāma devo vikhyātimāgataḥ || 44 ||
[Analyze grammar]

āgatasya hareḥ pūrvaṃ yatra hastatalāccyutam |
sudarśanākhyaṃ taccakraṃ tena cakrahariḥ smṛtaḥ || 45 ||
[Analyze grammar]

tayordarśanamātreṇa sarvapāpaiḥ pramucyate |
harastena prabhāveṇa devāḥ prabalatejasaḥ || 46 ||
[Analyze grammar]

jitvā daityānraṇaiḥ sarvānsaṃprāpya svapadānyatha |
rejire vipulānaṃdairasurānārdayaṃstataḥ || 47 ||
[Analyze grammar]

tataḥ sarve sametyāśu bṛhaspatipurassarāḥ |
devāḥ sarve'namanmaulimālārccita padāmbujam |
hariṃ draṣṭumathāgacchannayodhyāyāṃ samutsukāḥ || 48 ||
[Analyze grammar]

āgatya ca tataḥ śrutvā nānāvidhaguṇādaram |
bhāvaiḥ puṇyaiḥ samabhyarcya natvā prāṃjalayastadā |
harimekāgramanasā dhyāyanto dhyānaniṣṭhitāḥ || 49 ||
[Analyze grammar]

tānāgatānsamālokya padabhaktyā kṛtānatīn |
prasannaḥ prāha viśvātmā pītavāsā janārdanaḥ || 50 ||
[Analyze grammar]

śrībhagavānuvāca |
bhobho devā bhavantaśca cirāddiṣṭayādyasaṃgatāḥ |
adhunā bhavatāmicchāṃ kāṃ karomi surā aham |
tadbrūta tvaritā mahyaṃ kiṃ vilaṃbena nirbhayāḥ || 51 ||
[Analyze grammar]

devā ūcuḥ |
bhagavandevadeveśa tvayā saṃprati sarvaśaḥ |
sarvaṃ samabhavatkāryaṃ niṣpannaṃ vai jagatpate || 52 ||
[Analyze grammar]

tathāpi sarvadā bhāvyaṃ nityaṃ deva tvayā vibho |
asmadrakṣārthamatraiva vijitendriyavartmanā || 53 ||
[Analyze grammar]

evameva sadā kāryaṃ śatrupakṣavināśanam || 54 ||
[Analyze grammar]

śrībhagavānuvāca |
evametatkariṣyāmi bhavatāmarisaṃjayam |
śrīmatāṃ tejaso vṛddhiṃ kariṣyāmi sadāsurāḥ |
katheyaṃ ca sadā khyātiṃ loke yāsyati cottamām || 55 ||
[Analyze grammar]

ayaṃ nāmnā guptaharirdevo bhuvanaviśrutaḥ |
madīyaṃ paramaṃ guhyaṃ sthānaṃ khyātiṃ sameṣyati || 56 ||
[Analyze grammar]

atra yaḥ prāṇināṃ śreṣṭhaḥ pūjāyajñajapādikam |
karoti parayā bhaktyā sa yāti paramāṃ gatim || 57 ||
[Analyze grammar]

atra yaḥ kurute dānaṃ yathāśaktyā jitendriyaḥ |
sa svargamatulaṃ prāpya na śocati kadācana || 58 ||
[Analyze grammar]

atra matprītaye devāḥ prāṇibhirdharmakāṃkṣibhiḥ |
dātavyā gauḥ prayatnena savatsā vidhipūrvakam || 59 ||
[Analyze grammar]

svarṇaśṛṃgī raupyakhurī vastradvayasamāvṛtā |
kāṃsyopadohanā tāmrapṛṣṭhī bahuguṇānvitā || 60 ||
[Analyze grammar]

ratnapucchā dugdhavatī ghaṃṭābharaṇabhūṣitā |
arcitā gaṃdhapuṣpādyaiḥ suprasannā'mṛtaprajā || 61 ||
[Analyze grammar]

dvijāya vedavijñāya guṇine nirmalātmane |
viṣṇubhaktāya viduṣe ānṛśaṃsyaratāya ca || 62 ||
[Analyze grammar]

brāhmaṇāya ca gaurdeyā sarvatrasukhamaśnute |
na deyā dvijamātrāya dātāraṃ so'vapātayet || 63 ||
[Analyze grammar]

matprītaye'tra dātavyā nirmalenāṃtarātmanā || 64 ||
[Analyze grammar]

snātaṃ yaiśca viśuddhyarthamatra madbhaktitatparaiḥ |
teṣāṃ svargatayo nityaṃ muktiḥ karatale sthitā || 65 ||
[Analyze grammar]

tathā cakrahareḥ pīṭhe matprītyai dānamuttamam |
japahomādikaṃ cāpi karttavyaṃ yatnato naraiḥ || 66 ||
[Analyze grammar]

bhavanto'pi vidhānena yātrāṃ kurvaṃtu sattamāḥ |
asmādguptahareḥ sthānānnikaṭe saṃgame śubhe || 67 ||
[Analyze grammar]

pratyagbhāge gopratārādyojanatrayasaṃmite |
ghargharāṃbutaraṃgiṇyā sarayūḥ saṃgatā yataḥ || 68 ||
[Analyze grammar]

atra snātvā vidhānena draṣṭavyo'tra prayatnataḥ |
devo guptaharirnāma sarvakāmārthasiddhidaḥ || 69 ||
[Analyze grammar]

agastya uvāca |
ityuktvāṃtardadhe devaḥ pītāmbaradharo'cyutaḥ |
devā api vidhānena kṛtvā yātrāṃ prayatnataḥ |
ayodhyāyāṃ sthitā nityaṃ harerguṇavimohitāḥ || 70 ||
[Analyze grammar]

tadāprabhṛti vipreṃdra tatsthānaṃ bhuvi paprathe |
kārtikyāṃ tu viśeṣeṇa yātrā sāṃvatsarī bhavet || 71 ||
[Analyze grammar]

vibhorguptaharestatra saṃgamasnānapūrvikā |
gopratāre ca tīrthe'sminsarayūghargharāśrite |
snātvā devo'rcanīyo'yaṃ sarvakāmaphalapradaḥ || 72 ||
[Analyze grammar]

tathā cakrahareryātrā karttavyā suprayatnataḥ |
mārgaśārṣasya viśade pakṣe haritithau naraiḥ || 73 ||
[Analyze grammar]

evaṃ yaḥ kurute yātrāṃ viṣṇuloke sa modate || 74 ||
[Analyze grammar]

śrīsūta uvāca |
evamuktvā tu virate munau kalaśajanmani |
kṛṣṇadvaipāyano vyāsaḥ punarāha savismayaḥ || 75 ||
[Analyze grammar]

vyāsa uvāca |
atyāścaryyamayīṃ brahmankathāmetāṃ tapodhana |
uktavānasi yenaitatsāścaryyaṃ mama mānasam || 76 ||
[Analyze grammar]

vistareṇa mama brūhi māhātmyaṃ paramādbhutam || 77 ||
[Analyze grammar]

śṛṇu saṃgamamāhātmyaṃ vipreṃdra paramādbhutam |
skandadevācchrutaṃ samyakkathayāmi tathā tava || 78 ||
[Analyze grammar]

daśakoṭisahasrāṇi daśakoṭiśatāni ca |
tīrthāni sarayūnadyā ghargharodakasaṃgame |
nivasaṃti sadā vipra skandādavagataṃ mayā || 79 ||
[Analyze grammar]

devatānāṃ surāṇāṃ ca siddhānāṃ yogināṃ tathā |
brahmaviṣṇuśivānāṃ ca sānnidhyaṃ sarvadā sthitam || 80 ||
[Analyze grammar]

tasminsaṃgamasalile naraḥ snātvā samāhitaḥ |
saṃtarpya pitṛdevāṃśca dattvā dānaṃ svaśaktitaḥ || 81 ||
[Analyze grammar]

hutvā vaiṣṇavamaṃtreṇa śuciryatphalamāpnuyāt |
tadihaikamanā vipra śṛṇu yatkathayāmi te || 82 ||
[Analyze grammar]

aśvamedhasahasrasya vājapeyaśatasya ca |
kurukṣetre mahākṣetre rāhugraste divākare || 83 ||
[Analyze grammar]

suvarṇadāne yatpuṇyamahanyahani tadbhavet || 84 ||
[Analyze grammar]

amāvāsyāṃ paurṇamāsyāṃ dvādaśyorubhayorapi |
ayane ca vyatīpāte snānaṃ vaiṣṇavalokadam || 85 ||
[Analyze grammar]

tiṣṭhedyugasahasraṃ tu pādenaikena yaḥ pumān |
vidhivatsaṃgame snāyātpauṣyāṃ tadaviśeṣataḥ || 86 ||
[Analyze grammar]

laṃbate'vākchirā yastu yugānāmayutaṃ pumān |
snātānāṃ śucibhistoyaiḥ saṃgame prayatātmanām || 87 ||
[Analyze grammar]

vyuṣṭirbhavati yā puṃsāṃ na sā kratuśatairapi || 88 ||
[Analyze grammar]

pauṣe māsi viśeṣeṇa snānaṃ bahuphalapradam || 89 ||
[Analyze grammar]

pauṣe māsi viśeṣeṇa yaḥ kuryātsnānamādṛtaḥ |
brāhmaṇaḥ kṣatriyo vaiśyaḥ śūdro vā varṇasaṃkaraḥ |
sa yāti brahmaṇaḥ sthānaṃ punarāvṛttivarjitam || 90 ||
[Analyze grammar]

pauṣe māse tu yo dadyādghṛtāḍhyaṃ dīpamuttamam |
vidhivacchraddhayā vipra śṛṇu tasyāpi yatphalam || 91 ||
[Analyze grammar]

nānājanmārjitaṃ pāpaṃ svalpaṃ bahvapi vā bhavet |
tatsarvaṃ naśyati kṣipraṃ toyasthaṃ lavaṇaṃ yathā || 92 ||
[Analyze grammar]

āyurārogyamaiśvaryaṃ saṃtatīḥ saukhyamuttamam |
prāpnoti phaladaṃ nityaṃ dīpadaḥ puṇyabhāṅnaraḥ || 93 ||
[Analyze grammar]

yastu śuklatrayodaśyāṃ pauṣe'tra prayato vratī |
jāgaraṃ kurute dhīraḥ sa gacchedbhavanaṃ hareḥ || 94 ||
[Analyze grammar]

jāgaraṃ vidadhadrātrau dīpaṃ dattvā tu sarvaśaḥ |
homaṃ ca kārayedvipro niyatātmā śucivrataḥ || 95 ||
[Analyze grammar]

vaiṣṇavo viṣṇupūjāṃ ca kurvañchṛṇvanhareḥ kathām |
gītavāditranṛtyaiśca viṣṇutoṣaṇakārakaiḥ |
kathābhiḥ puṇyayuktābhirjāgṛyāccharvarīṃ naraḥ || 96 ||
[Analyze grammar]

tataḥ prabhāte vimale snātvā vidhivadādarāt |
viṣṇuṃ saṃpūjya viprāṃśca deyaṃ svarṇādi śaktitaḥ || 97 ||
[Analyze grammar]

svarṇaṃ cānnaṃ ca vāsāṃsi yo dadyācchraddhayā'nvitaḥ |
saṃgame vidhivadvidvānsa yāti paramāṃ gatim || 98 ||
[Analyze grammar]

varṣevarṣe tu kartavyo jāgaraḥ puṇyatatparaiḥ || 99 ||
[Analyze grammar]

hariḥ pūjyo dvijāḥ samyaksaṃtoṣyāḥ śaktito naraiḥ |
tena viṣṇoḥ parā tuṣṭiḥ pāpāni viphalāni ca |
bhavaṃti nirviṣāḥ sarpā yathā tārkṣyasya darśanāt || 100 ||
[Analyze grammar]

tatra snāto divaṃ yāti atra snātaḥ sukhī bhaveta || 101 ||
[Analyze grammar]

triṣu lokeṣu ye kecitprāṇinaḥ sarva eva te |
tarpyamāṇāḥ parāṃ tṛptiṃ yāṃti saṃgamajairjalaiḥ || 102 ||
[Analyze grammar]

bhūtānāmiha sarveṣāṃ duḥkhopahatacetasām |
gatimanveṣamāṇānāṃ na saṃgamasamā gatiḥ || 103 ||
[Analyze grammar]

saptāvarānsaptaparānpuruṣaścātmanāsaha |
puṃsastārayate sarvānsaṃgame snānamācaran || 104 ||
[Analyze grammar]

jātyaṃdhairiha te tulyāstathā paṃgubhireva ca |
sametyātra ca na snānti sarayūghargharasaṃgame || 105 ||
[Analyze grammar]

varṇānāṃ brāhmaṇo yadvattathā tīrtheṣu saṃgamaḥ |
sarayūghargharāyoge vaiṣṇavastho naraḥ sadā || 106 ||
[Analyze grammar]

atra snānena dānena yathā śaktyā jiteṃdriyaḥ |
homena vidhipuktena naraḥ svargamavāpnuyāt || 107 ||
[Analyze grammar]

naro vā yadi vā nārī vidhivatsnānamācaret |
svargalokanivāso hi bhavettasya na saṃśayaḥ || 108 ||
[Analyze grammar]

yathā vahnirdahetsarvaṃ śuṣkamārdramathāpi vā |
bhasmībhavaṃti pāpāni tatsamāgamamajjanāt || 109 ||
[Analyze grammar]

ekataḥ sarvatīrthāni nānāvidhiphalāni vai |
sarayūghargharotpannasaṃgamastvadhiko bhavet || 110 ||
[Analyze grammar]

sarvatīrthāvagāhasya phalaṃ yādṛksmṛtaṃ śrutau |
tādṛkphalaṃ nṛṇāṃ samyagbhavetsaṃgamamajjanāt || 111 ||
[Analyze grammar]

gopratārābhidhaṃ tīrthamaparaṃ vartate'nagha |
sannidhau saṃgamasyaiva mahāpātakanāśanam || 112 ||
[Analyze grammar]

yatra snānena dānena na śocati naraḥ kvacit |
gopratārasamaṃ tīrthaṃ na bhūtaṃ na bhaviṣyati || 113 ||
[Analyze grammar]

vārāṇasyāṃ yathā vidvanvarttate maṇikarṇikā |
ujjayinyāṃ yathā vipra mahākālaniketanam || 114 ||
[Analyze grammar]

naimiṣe cakravāpī tu yathā tīrthatamā smṛtā |
ayodhyāyāṃ tathā vipra gopratārābhidhaṃ mahat || 115 ||
[Analyze grammar]

yatra rāmājñayā vidvansāketanagarījanāḥ |
avāpuḥ svargamatulaṃ nimajjya paramāṃbhasi || 116 ||
[Analyze grammar]

vyāsa uvāca |
avāpuste kathaṃ svargaṃ sāketanagarījanāḥ |
kathaṃ ca rāghavo vidvannetatkathaya suvrata || 117 ||
[Analyze grammar]

agastya uvāca |
sāvadhānaḥ śṛṇu mune kathāmetāṃ suvistarāt |
yathājagāma rāmo'sau svargaṃ sa ca purījanaḥ || 118 ||
[Analyze grammar]

purā rāmo vidhāyaiva devakāryyamataṃdritaḥ |
svargaṃ gaṃtuṃ manaścakre bhrātṛbhyāṃ saha vīradhīḥ || 119 ||
[Analyze grammar]

tato niśamya cāreṇa vānarāḥ kāmarūpiṇaḥ |
ṛkṣagopuccharakṣāṃsi samutpeturanekaśaḥ || 120 ||
[Analyze grammar]

devagaṃdharvaputrāśca ṛṣiputrāśca vānarāḥ |
rāmakṣayaṃ viditvā tu sarva eva samāgatāḥ || 121 ||
[Analyze grammar]

te rāmamanugatyocuḥ sarve vānarayūthapāḥ |
tavānugamane rājansaṃprāptāḥ sma ihānagha || 122 ||
[Analyze grammar]

yadi rāma vināsmābhirgacchestvaṃ puruṣarṣabha |
sarve khalu hatāḥ syāma daṇḍena mahatā nṛpa || 123 ||
[Analyze grammar]

śrutvā tu vacanaṃ teṣāmṛkṣavānararakṣasām |
vibhīṣaṇamuvācātha rāghavastatkṣaṇaṃ girā || 224 ||
[Analyze grammar]

yāvatprajā dhariṣyaṃti tāvadeva vibhīṣaṇa |
kārayasva mahadrājyaṃ laṃkāṃ tvaṃ pālayiṣyasi || 125 ||
[Analyze grammar]

śādhi rājyaṃ ca khalvetannānyathā me vacaḥ kuru |
prajāstvaṃ rakṣa dharmeṇa nottaraṃ vaktumarhasi || 126 ||
[Analyze grammar]

evamuktvā tu kākutstho hanumaṃtamathābravīt |
vāyuputra ciraṃ jīva mā pratijñāṃ vṛthā kṛthāḥ || 127 ||
[Analyze grammar]

yāvallokā vadiṣyaṃti matkathāṃ vānararṣabha |
tāvattvaṃ dhāraya prāṇānpratijñāṃ pratipālayan || 128 ||
[Analyze grammar]

maindaśca dvividaścaiva amṛtaprāśanāvubhau |
yāvallokā dhariṣyaṃti tāvadetau dhariṣyataḥ || 129 ||
[Analyze grammar]

putrapautrāśca ye'smākaṃ tānrakṣantviha vānarāḥ |
evamuktvā tu kākutsthaḥ sarvānatha ca vānarān |
mayā sārdhaṃ prayāteti tadā tānrāghavo'bravīt || 130 ||
[Analyze grammar]

prabhātāyāṃ tu śarvaryyāṃ pṛthuvakṣā mahābhujaḥ |
rāmaḥ kamalapatrākṣaḥ purodhasamathābravīt || 131 ||
[Analyze grammar]

agnihotrāṇi yāṃtvagre dīpyamānāni sarvaśaḥ |
vājapeyātirātrāṇi niryātu ca mamāgrataḥ || 132 ||
[Analyze grammar]

tato vasiṣṭhastejasvī sarvaṃ niścitya cetasā |
cakāra vidhivatkarma mahāprāsthānikaṃ vidhim || 133 ||
[Analyze grammar]

tataḥ kṣaumāmbaradharo brahmacaryasamanvitaḥ |
kuśānādāya pāṇibhyāṃ mahāprasthānamudyataḥ || 134 ||
[Analyze grammar]

na vyāharacchubhaṃ kiṃcidaśubhaṃ vā nareśvaraḥ |
niṣkramya nagarāttasmātsāgarādiva caṃdramāḥ || 135 ||
[Analyze grammar]

rāmasya savyapārśve tu sapadmā śrīḥ samāśritā |
dakṣiṇe hrīrviśālākṣī vyavasāyastathāgrataḥ || 136 ||
[Analyze grammar]

nānāvidhāyudhānyatra dhanurjyāprabhṛtīni ca |
anuvrajaṃti kākutsthaṃ sarve puruṣa vigrahāḥ || 137 ||
[Analyze grammar]

vedo brāhmaṇarūpeṇa sāvitrī savyadakṣiṇe |
oṃkāro'tha vaṣaṅkāraḥ sarve rāmaṃ tadā'vrajan || 138 ||
[Analyze grammar]

ṛṣayaśca mahātmānaḥ sarve caiva mahīdharāḥ |
anugacchanti kākutsthaṃ svargadvāramupasthitam || 139 ||
[Analyze grammar]

tathānuyāṃti kākutsthamaṃtaḥpuragatāḥ striyaḥ |
savṛddhābāladāsīkāḥ saparṣaddvārarakṣakāḥ || 140 ||
[Analyze grammar]

sāntaḥpuraśca bharataḥ śatrughnasahito yayau |
rāmaṃ vrajaṃtamāgamya raghuvaṃśamanuvratāḥ || 141 ||
[Analyze grammar]

tato viprā mahātmānaḥ sāgnihotrāḥ samaṃtataḥ |
saputradārāḥ kākutsthamanugacchati sarvaśaḥ || 142 ||
[Analyze grammar]

maṃtriṇo bhṛtyayuktāśca saputrāḥ sahabāṃdhavāḥ |
sarve te sānugāścaiva hyanu gacchaṃti rāghavam || 143 ||
[Analyze grammar]

tataḥ sarvāḥ prakṛtayo hṛṣṭapuṣṭajanāvṛtāḥ |
gacchaṃtamanugacchaṃtirāghavaṃ guṇaraṃjitāḥ || 144 ||
[Analyze grammar]

tathā prajāśca sakalāḥ saputrāśca savabāṃdhavāḥ |
rāghavasyānugāścāsandṛṣṭvā vigatakalmaṣam || 145 ||
[Analyze grammar]

snātāḥ śuklāmbaradharāḥ sarve prayatamānasāḥ |
kṛtvā kilakilāśabdamanuyātāśca rāghavam || 146 ||
[Analyze grammar]

na kaścittatra dīno'bhūnna bhīto nātiduḥkhitaḥ |
prahṛṣṭā muditāḥ sarve vabhūvuḥ paramādbhutāḥ || 147 ||
[Analyze grammar]

draṣṭukāmāśca nirvāṇaṃ rājño janapadāstathā |
saṃprāptāste'pi dṛṣṭvaiva nabhomārgeṇa cakriṇam || 148 ||
[Analyze grammar]

ṛkṣavānararakṣāṃsi janāśca puravāsinaḥ |
āgatya parayā bhaktyā pṛṣṭhataḥ samupāyayuḥ || 149 ||
[Analyze grammar]

tāni bhūtāni nagare hyantardhānagatānyapi |
rāghavaṃ te'pyanuyayuḥ svargadvāramupasthitam || 150 ||
[Analyze grammar]

yāni paśyaṃti kākutsthaṃ sthāvarāṇi carāṇi ca |
sattvāni svargagamane matiṃ kurvaṃti tānyapi || 151 ||
[Analyze grammar]

nāsītsattvamayodhyāyāṃ susūkṣmamapi kiṃcana |
yadrāghavaṃ nānuyāti svargadvāramupasthitam || 152 ||
[Analyze grammar]

athārddhayojanaṃ gatvā nadīṃ paścānmukho yayau |
sarayūṃ puṇyasalilāṃ dadarśa raghunaṃdanaḥ || 153 ||
[Analyze grammar]

atha tasminmuhūrte tu brahmā lokapitāmahaḥ |
sarvaiḥ parivṛto devairṛṣibhiśca mahātmabhiḥ |
āyayau tatra kākutsthaṃ svargadvāramupasthitam || 154 ||
[Analyze grammar]

vimānaśatakoṭībhirdivyābhiḥ sarvato vṛtaḥ |
dīpayansarvato vyoma jyotirbhūtamanuttamam || 155 ||
[Analyze grammar]

svayaṃprabhaiśca tejobhirmahadbhiḥ puṇyakarmabhiḥ |
puṇyā vātā vavustatra gandhavaṃtaḥ sukhapradāḥ || 156 ||
[Analyze grammar]

sapuṇyapuṣpavarṣaṃ ca vāyuyuktaṃ mahājavam |
gandharvairapsarobhiśca tasminsūryaupasthitaḥ || 157 ||
[Analyze grammar]

śarayūsalilaṃ rāmaḥ padbhyāṃ sa samupāspṛśat |
tato brahmā surairyuktaḥ stotuṃ samupacakrame || 158 ||
[Analyze grammar]

tvaṃ hi lokapatirdeva na tvāṃ jānāti kaścana |
ahaṃ te vai viśālākṣa bhūtapūrvaparigrahaḥ || 159 ||
[Analyze grammar]

tvamaciṃtyaṃ mahadbhūtamakṣayaṃ lokasaṃgrahe |
yāmicchasi mahāvīrya tāṃ tanuṃ praviśa svakām || 160 ||
[Analyze grammar]

pitāmahasya vacanādidamevāviśatsvayam |
sudivyaṃ vaiṣṇavaṃ tejaḥ saṃsāraṃ sa sahānujaḥ |
tato viṣṇutanundevāḥ pūjayantaḥ surottamam || 161 ||
[Analyze grammar]

sādhyā marudgaṇāścaiva sendrāḥ sāgnipurogamāḥ |
ye ca divyā ṛṣigaṇā gandharvāpsarasastathā |
suparṇā nāgayakṣāśca daityadānavarākṣasāḥ || 162 ||
[Analyze grammar]

devāḥ prahṛṣṭā muditāḥ sarve pūrṇamanorathāḥ |
sādhusādhviti te sarve tridivasthā babhāṣire || 163 ||
[Analyze grammar]

atha viṣṇurmahātejāḥ pitāmahamuvāca ha |
eṣāṃ lokaṃ janaughānāṃ dātumarhasi suvrata || 164 ||
[Analyze grammar]

ime tu sarve matsnehādāyātāḥ sarvamānavāḥ |
bhaktāśca bhaktimantaśca tyaktātmāno'pi sarvaśaḥ || 165 ||
[Analyze grammar]

tacchrutvā viṣṇukathitaṃ sarvalokeśvaro'bravīt |
lokaṃ santānikaṃ nāma saṃsthāsyaṃti hi mānavāḥ || 166 ||
[Analyze grammar]

svargadvāre'tra vai tīrthe rāmamevānucintayan |
prāṇāṃstyajati bhaktyā vai sa saṃtānaṃ paraṃ labhet || 167 ||
[Analyze grammar]

sarve saṃtānikaṃnāma brahmalokādanantaram |
vānarāśca svakāṃ yoniṃ rākṣasāścāpi rākṣasīm || 168 ||
[Analyze grammar]

yasyā viniḥsṛtā ye vai surāsuratanūdbhavāḥ |
ādityatanayaścaiva sugrīvaḥ sūryamaṇḍalam || 169 ||
[Analyze grammar]

ṛṣayo nāgayakṣāśca prayāsyanti svakāraṇam |
tathā bruvati deveśe gopratāramupasthitam || 170 ||
[Analyze grammar]

tajjalaṃ sarayūṃ bheje paripūrṇaṃ tato jalam |
avagāhya jalaṃ sarve prāṇāṃstyaktvā prahṛṣṭavat || 171 ||
[Analyze grammar]

mānuṣaṃ dehamutsṛjya te vimānānyathāruhan |
tiryagyonigatā ye ca praviśya sarayūṃ tadā || 172 ||
[Analyze grammar]

dehatyāgaṃ ca te tatra kṛtvā divyavapurddharāḥ |
tathānyānyapi sattvāni sthāvarāṇi carāṇi ca || 173 ||
[Analyze grammar]

prāpya cottamadehaṃ vai devalokamupāgaman |
tasmiṃstatra samāpanne vānarā ṛkṣarākṣasāḥ |
te'pi praviviśuḥ sarve dehānnikṣipya vai tadā || 174 ||
[Analyze grammar]

tadā svargaṃ gatāḥ sarve smṛtvā lokaguruṃ vibhum |
jagāma tridaśaiḥ sārddhaṃ rāmo hṛṣṭo mahāmatiḥ || 175 ||
[Analyze grammar]

atastadgopratārākhyaṃ tīrthaṃ vikhyātimāgatam |
gopratāre paro mokṣo nānyatīrtheṣu vidyate || 176 ||
[Analyze grammar]

janmāntaraśatairvipra yogo'yaṃ yadi labhyate |
muktirbhavati tattvekajanmanā labhyate na vā || 177 ||
[Analyze grammar]

gopratāre na sandeho harirbhaktyā suniṣṭhitaḥ |
ekena janmanānyo'pi yogamokṣaṃ ca vindati || 178 ||
[Analyze grammar]

gopratāre naro vidvānyo'pi snāti suniścitaḥ |
viśatyasau paraṃ sthānaṃ yogināmapi durlabham || 179 ||
[Analyze grammar]

kārtikyāṃ ca viśeṣeṇa snātavyaṃ vijitendriyaiḥ |
kārtike māsi viprarṣe sarve devāḥ savāsavāḥ |
snātumāyāntyayodhyāyāṃ gopratāre viśeṣataḥ || 180 ||
[Analyze grammar]

gopratārasamaṃ tīrthaṃ na bhūtaṃ na bhaviṣyati |
yatra prayāgarājo'pi snātumāyāti kārtike || 181 ||
[Analyze grammar]

niṣpāpaḥ kaluṣaṃ tyaktvā śuklāṃgaḥ sitakaṃcukaḥ |
śuddhyarthaṃ sādhukāmo'sau prayāge munisattamaḥ || 182 ||
[Analyze grammar]

yāni kāni ca tīrthāni bhūmau divyāni suvrata |
kārtikyāṃ tāni sarvāṇi gopratāre vasanti vai || 183 ||
[Analyze grammar]

gopratāre japo homaḥ snānaṃ dānaṃ ca śaktitaḥ |
sarvamakṣayatāṃ yāti śraddhayā niyamavratam || 184 ||
[Analyze grammar]

kārtike prāpya tadyanti tīrthāni sakalānyapi |
gopratāraṃ gamiṣyāmaḥ pāpaṃ tyaktumitīcchayā || 185 ||
[Analyze grammar]

gopratāre kṛtaṃ snānaṃ sarvapāpapraṇāśanam |
gopratāre naraḥ snātvā dṛṣṭvā guptahariṃ vibhum |
sarvapāpaiḥ pramucyeta nātra kāryā vicāraṇā || 186 ||
[Analyze grammar]

viṣṇumuddiśya viprāṇāṃ pūjanaṃ ca viśeṣataḥ |
karttavyaṃ śraddhayā yuktaiḥ snānapūrvaṃ yatavrataiḥ || 187 ||
[Analyze grammar]

payasvinī ca gaurdeyā sālaṃkārā ca śaktitaḥ |
viprāya vedaviduṣe niyamavrataśāline |
brāhmaṇāyātiśucaye viṣṇuprītyai yatātmanā || 168 ||
[Analyze grammar]

annaṃ bahuvidhaṃ hema vāsāṃsi vividhāni ca |
dātavyāni hareḥ prāptyai bhaktyā paramayā yutaiḥ || 189 ||
[Analyze grammar]

sūryagrahe kurukṣetre narmadāyāṃ śaśigrahe |
tulādānasya yatpuṇyaṃ tadatra dīpadānataḥ || 190 ||
[Analyze grammar]

ghṛtena dīpako yasya tilataile na vā punaḥ |
jvalate muniśārdūla hayamedhena tasya kim || 191 ||
[Analyze grammar]

teneṣṭaṃ kratubhiḥ sarvaiḥ kṛtaṃ tīrthāvagāhanam |
dīpadānaṃ kṛtaṃ yena kārttike keśavāgrataḥ || 192 ||
[Analyze grammar]

nānāvidhāni tīrthāni bhuktimuktipradāni ca |
gopratārasya tānyatra kalāṃ nārhaṃti ṣoḍaśīm || 193 ||
[Analyze grammar]

svarṇamalpaṃ ca yo dadyādbrāhmaṇe vedapārage |
śubhāṃ gatimavāpnoti hyagnivaccaiva dīpyate || 194 ||
[Analyze grammar]

gopratārābhidhe tīrthe trilokīviśrute dvija |
dattvānnaṃ ca vidhānena na sa bhūyo'bhijāyate || 195 ||
[Analyze grammar]

tatra snānaṃ tu yaḥ kuryādviprānsaṃtarpayennaraḥ |
sautrāmaṇeśca yajñasya phalaṃ prāpnoti mānavaḥ || 196 ||
[Analyze grammar]

ekāhārastu yastiṣṭhenmāsaṃ tatra yatavrataḥ |
yāvajjīvakṛtaṃ pāpaṃ sahasā tasya naśyati || 197 ||
[Analyze grammar]

agnipraveśaṃ ye kuryurgopratāre vidhānataḥ |
te viśaṃti padaṃ viṣṇorniḥsaṃdagdhaṃ tapodhana || 198 ||
[Analyze grammar]

kurvaṃtyanaśanaṃ ye'tra viṣṇubhaktyā suniścitāḥ |
na teṣāṃ punarāvṛttiḥ kalpakoṭiśatairapi || 199 ||
[Analyze grammar]

arcayedyastu goviṃdaṃ gopratāre hi mānavaḥ |
daśasauvarṇikaṃ puṇyaṃ gopratāre prakathyate || 200 ||
[Analyze grammar]

agnihotraphalo dhūpo goviṃdasya samarpitaḥ |
bhūmidānena sadṛśaṃ gaṃdhadānaphalaṃ smṛtam || 201 ||
[Analyze grammar]

atyadbhutamidaṃ vidvansthānametatprakīrtitam |
kārttikyāṃ tu viśeṣeṇa atra snātvā śucivrataḥ || 202 ||
[Analyze grammar]

svargadvāre naraḥ snātvā daśasvarṇaphalaṃ labhet |
svarṇadaḥ svargavāsī ca yo dadyācchraddhayānvitaḥ || 203 ||
[Analyze grammar]

sutīrthe parvaṇi śreṣṭhe daśasvarṇaphalaprade |
jyeṣṭhaśuklacaturdaśyāṃ rātrau jāgaraṇaṃ caret || 204 ||
[Analyze grammar]

upoṣitaḥ śuciḥ snāto viṣṇupūjanatatparaḥ |
dīpaṃ dadyātprayatnena nānāphalavidhāyinam || 205 ||
[Analyze grammar]

tāvadgarjaṃti puṇyāni svarge martye rasātale |
yāvaddadyājjale dīpaṃ kārttike keśavāgrataḥ || 206 ||
[Analyze grammar]

paurṇamāsyāṃ prabhāte tu snātvā nirmalamānasaḥ |
hariṃ saṃpūjya vidhivadvidhāya śrāddhamādarāt || 207 ||
[Analyze grammar]

dattvānnaṃ ca yathāśaktyā saṃtoṣya brāhmaṇāṃstataḥ |
vastrādibhiralaṃkāraiḥ saṃpūjya dvijadaṃpatī || 208 ||
[Analyze grammar]

vibhuṃ guptahariṃ dṛṣṭvā saṃpūjya tu viśeṣataḥ |
namaskṛtyānu tattīrthaṃ śucistadgatamānasaḥ || 209 ||
[Analyze grammar]

svargadvāre ca vidhivanmadhyāhne snānamācaret |
sarvapāpaviśuddhātmā viṣṇuloke mahīyate || 210 ||
[Analyze grammar]

iti paramavidhānairgopratāre vidhāya prathitasukṛtamūrttiḥ snānamuccaiḥ prayatnāt |
kalitanikhilapāpaḥ pūjayitvādareṇācyutamamalavikāśo viṣṇusāyujyameti || 211 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe'yodhyāmāhātmye svargadvāragopratāratīrthamāhātmyavarṇanaṃnāma ṣaṣṭho'dhyāyaḥ || 6 ||
[Analyze grammar]