Chapter 4

[English text for this chapter is available]

agastya uvāca |
tasmāccaṃdraharisthānādāgneyyāṃ diśi saṃsthitaḥ |
devo dharmaharirnnāma kalikalmaṣanāśakaḥ || 1 ||
[Analyze grammar]

vedavedāṅgatattvajñaḥ svakarmapariniṣṭhitaḥ |
purā samāgato dharmastīrthayātrācikīrṣayā || 2 ||
[Analyze grammar]

āgatya ca cakāroccairyātrāṃ tatrādareṇa saḥ |
dṛṣṭvā māhātmyamatulamayodhyāyāḥ savismayaḥ || 3 ||
[Analyze grammar]

vidhāya svabhujāvūrdhvau vipro'vocanmudānvitaḥ |
aho ramyamidaṃ tīrthamaho māhātmyamuttamam || 4 ||
[Analyze grammar]

ayodhyāsadṛśī kāpi dṛśyate nāparā purī |
yā na spṛśati vasudhāṃ viṣṇucakrasthitā'niśam || 5 ||
[Analyze grammar]

yasyāṃ sthito hariḥ sākṣātseyaṃ kenopamīyate |
aho tīrthāni sarvāṇi viṣṇulokapradāni vai || 6 ||
[Analyze grammar]

aho viṣṇuraho tīrthamayodhyā'ho mahāpurī |
aho māhātmyamatulaṃ kiṃ na ślāghyamihāsthitam || 7 ||
[Analyze grammar]

ityuktvā tatra bahuśo nanarta pramadākulaḥ |
dharmo māhātmyamālokya ayodhyāyā viśeṣataḥ || 8 ||
[Analyze grammar]

taṃ tathā nartamānaṃ vai dharmaṃ dṛṣṭvā kṛpānvitaḥ |
āvirbabhūva bhagavānpītavāsā hariḥ svayam |
taṃ praṇamya ca dharmo'tha tuṣṭāva harimādarāt || 9 ||
[Analyze grammar]

dharma uvāca |
namaḥ kṣīrābdhivāsāya namaḥ paryaṃkaśāyine |
namaḥ śaṃkarasaṃspṛṣṭadivyapādāya viṣṇave || 10 ||
[Analyze grammar]

bhaktyārccitasupādāya namo'jādipriyāya te |
śubhāṃgāya sunetrāya mādhavāya namo namaḥ || 11 ||
[Analyze grammar]

namo'ravindapādāya padmanābhāya vai namaḥ |
namaḥ kṣīrābdhikallolaspṛṣṭagātrāya śārṅgiṇe || 12 ||
[Analyze grammar]

oṃ namo yoganidrāya yogarkṣairbhāvitātmane |
tārkṣyāsanāya devāya govindāya namonamaḥ || 13 ||
[Analyze grammar]

sukeśāya sunāsāya sulalāṭāya cakriṇe |
suvastrāya suvarṇāya śrīdharāya namonamaḥ || 14 ||
[Analyze grammar]

subāhave namastubhyaṃ cārujaṃghāya te namaḥ |
suvāsāya sudivyāya suvidyāya gadābhṛte || 15 ||
[Analyze grammar]

keśavāya ca śāṃtāya vāmanāya namonamaḥ |
dharmapriyāya devāya namaste pītavāsase || 16 ||
[Analyze grammar]

agastya uvāca |
iti stuto jagannātho dharmeṇa śrīpatirmudā |
uvāca sa hṛṣīkeśaḥ prīto dharmamudāradhīḥ || 17 ||
[Analyze grammar]

śrībhagavānuvāca |
tuṣṭo'haṃ bhavato dharma stotreṇānena suvrata |
varaṃ varaya dharmajña yaste syānmanasaḥ priyaḥ || 18 ||
[Analyze grammar]

stotreṇānena yaḥ stauti mānavo māmatandritaḥ |
sarvānkāmānavāpnoti pūjitaḥ śrīyutaḥsadā || 19 ||
[Analyze grammar]

dharma uvāca |
yadi tuṣṭosi bhagavandevadeva jagatpate |
tvāmahaṃ sthāpayāmyatra nijanāmnā jagadguro || 20 ||
[Analyze grammar]

agastya uvāca |
evamastviti saṃprocyābhavaddharmaharirvibhuḥ |
smaraṇādeva mucyeta naro dharmaharervibhoḥ || 21 ||
[Analyze grammar]

sarayūsalile snātvā suciṃtākulamānasaḥ |
devaṃ dharmahariṃ paśyetsarvapāpaiḥ pramucyate || 22 ||
[Analyze grammar]

atra dānaṃ tathā homaṃ japo brāhmaṇabhojanam |
sarvamakṣayatāṃ yāti viṣṇuloke nivāsakṛt || 23 ||
[Analyze grammar]

ajñānājjñānato vāpi yatkiṃcidduṣkṛtaṃ bhavet |
prāyaścittaṃ vidhātavyaṃ tannāśāya prayatnataḥ || 24 ||
[Analyze grammar]

prāyaścittena vidhinā pāpaṃ tasya praṇaśyati |
tasmādatra prakarttavyaṃ prāyaścittaṃ vidhānataḥ || 25 ||
[Analyze grammar]

ajñānājjñānato vāpi rājādernigrahāttathā |
nityakarmanivṛttiḥ syādyasya puṃso'vaśātmanaḥ |
tenāpyatra vidhātavyaṃ prāyaścittaṃ prayatnataḥ || 26 ||
[Analyze grammar]

atra sākṣātsvayaṃ devo viṣṇurvasati sādaraḥ |
tasmādvarṇayituṃ śakyo mahimā na hi mānavaiḥ || 27 ||
[Analyze grammar]

āṣāḍhe śukla pakṣasya ekādaśyāṃ dvijottama |
tasya sāṃvatsarī yātrā kartavyā tu vidhānataḥ || 28 ||
[Analyze grammar]

svargadvāre naraḥ snātvā dṛṣṭvā dharmahariṃ vibhum |
sarvapāpaviśuddhātmā viṣṇuloke vasetsadā || 29 ||
[Analyze grammar]

tasmāddakṣiṇadigbhāge svarṇasya khaniruttamā |
yatra cakre svarṇavṛṣṭiṃ kubero raghujādbhayāt || 30 ||
[Analyze grammar]

vyāsa uvāca |
bhagavanbrūhi tattvajña svarṇavṛṣṭirabhūtkatham |
kuberasya kathaṃ bhītirutpannā raghubhūpateḥ || 31 ||
[Analyze grammar]

etatsarvaṃ samācakṣva vistarānmama suvrata |
śrutvā kathārahasyāni na tṛpyati mano mama || 32 ||
[Analyze grammar]

agastya uvāca |
śṛṇu vipra pravakṣyāmi svarṇasyotpattimuttamām |
yasya śravaṇato nṛṇāṃ jāyate vismayo mahān || 33 ||
[Analyze grammar]

āsītpurā raghupatirikṣvākukulavarddhanaḥ |
raghurnijabhujodāravīryaśāsitabhūtalaḥ || 34 ||
[Analyze grammar]

pratāpatāpitārātivargavyākhyātasadyaśāḥ |
prajāḥ pālayatā samyaktenanītimatā satā || 35 ||
[Analyze grammar]

yaśaḥpūreṇa samaliptā diśo daśa sitatviṣā |
sa cakre prauḍhavibhavasādhanāṃ vijayakramāt || 36 ||
[Analyze grammar]

nānādeśānsamākramya caturaṃgabalānvitaḥ |
bhūtāni vaśamānīya vasu jagrāha daṇḍataḥ || 37 ||
[Analyze grammar]

utkṛṣṭānnṛpatīnvīro daṃḍayitvā balādhikān |
ratnāni vividhānyāśu jagrāhātibalastadā || 38 ||
[Analyze grammar]

sa vijitya diśaḥ sarvā gṛhītvā ratnasaṃcayam |
ayodhyāmāgato rājā rājadhānīṃ ca tāṃ śubhām || 39 ||
[Analyze grammar]

tatrāgatya ca kākutstho yajñāyotsukamānasaḥ |
cakāra nirmalāṃ buddhiṃ nijavaṃśocitakriyāma || 40 ||
[Analyze grammar]

vasiṣṭhaṃ munimājñāya vāmadevaṃ ca kaśyapam || 41 ||
[Analyze grammar]

anyānapi muniśreṣṭhānnānātīrthasamāśritān |
samānayadvinītena dvijavaryeṇa bhūpatiḥ || 42 ||
[Analyze grammar]

dṛṣṭvā sthitānsa tānsarvānpradīptāniva pāvakān |
tānāgatānviditvātha raghuḥ parapuraṃjayaḥ |
niścakrāma yathānyāyaṃ svayameva mahāyaśāḥ || 43 ||
[Analyze grammar]

tato vinītavatsarvānkākutstho dvijasattamān |
uvāca dharmayuktaṃ ca vacanaṃ yajñasiddhaye || 44 ||
[Analyze grammar]

raviruvāca |
munayaḥ sarva evaite yūyaṃ śṛṇuta madvacaḥ |
yajñaṃ vidhātumicchāmi tatrājñāṃ dātumarhatha || 45 ||
[Analyze grammar]

sāṃprataṃ māmako yajño yuktaḥ syānmunisattamāḥ |
etadvicāryya tattvena brūta yūyaṃ munīśvarāḥ || 46 ||
[Analyze grammar]

munaya ūcuḥ |
rājanviśvajidākhyāto yajñānāṃ yajña uttamaḥ |
sāṃprataṃ kuru taṃ yatnānmā vilaṃbaṃ vṛthā kṛthāḥ || 47 ||
[Analyze grammar]

agastya uvāca |
nṛpaścakre tato yajñaṃ viśvadigjayasaṃjñitam |
nānāsaṃbhāramadhuraṃ kṛtasarvasvadakṣiṇam || 48 ||
[Analyze grammar]

nānāvidhena dānena munisaṃtoṣaharṣakṛt |
sarvasvameva pradadau dvijebhyo bahumānataḥ || 49 ||
[Analyze grammar]

teṣu viśveṣu yāteṣu pūjiteṣu gṛhānsvakān |
bandhuṣvapi ca tuṣṭeṣu muniṣu praṇateṣu ca || 50 ||
[Analyze grammar]

tena yajñena vidhivadvihitena nareśvaraḥ |
śuśubhe śobhanācāraḥ svarge deveṃdravatkṣaṇāt || 51 ||
[Analyze grammar]

tatrāṃtare samabhyāyānmuniryamavatāṃ varaḥ |
viśvāmitramuneraṃtevāsī kautsa iti smṛtaḥ || 52 ||
[Analyze grammar]

dakṣiṇārthaṃ gurorddhīmānpāvituṃ taṃ nareśvaram |
caturdaśasuvarṇānāṃ koṭīrāhara satvaram || 53 ||
[Analyze grammar]

maddakṣiṇeti guruṇā nirbandhādyācito ruṣā |
āgataḥ sa muniḥ kautsastato yācitumādarāt |
raghuṃ bhūpālatilakaṃ dattasarvasvadakṣiṇam || 54 ||
[Analyze grammar]

tamāgatamabhipretya raghurādaratastadā |
utthāya pūjayāmāsa vidhivatsa paraṃtapaḥ |
saparyyāsīttasya sarvā mṛtpātravihitakriyā || 55 ||
[Analyze grammar]

pūjāsaṃbhāramālokya tādṛśaṃ taṃ munīśvaraḥ |
vismito'bhūnnirānando dakṣiṇā'śāṃ parityajan |
uvāca madhuraṃ vākyaṃ vākyajñānaviśāradaḥ || 56 ||
[Analyze grammar]

kautsa uvāca |
rājannabhyudayaste'stu gacchāmyanyatra sāṃpratam || 57 ||
[Analyze grammar]

gurvarthāharaṇāyaiva dattasarvasvadakṣiṇam |
tvāṃ na yāce dhanābhāvādato'nyatra vrajāmyaham || 58 ||
[Analyze grammar]

agastya uvāca |
ityuktastena muninā raghuḥ parapuraṃjayaḥ |
kṣaṇaṃ dhyātvā'bravīdenaṃ vinayādvihitāṃjaliḥ || 59 ||
[Analyze grammar]

raghuruvāca |
bhagavaṃstiṣṭha me harmye dinamekaṃ munivrata |
yāvadyatiṣye bhagavanbhavadarthārthamuccakaiḥ || 60 ||
[Analyze grammar]

agastya uvāca |
ityuktvā paramodāravaco munimudāradhīḥ |
pratasthe ca raghustatra kuberavijigīṣayā || 61 ||
[Analyze grammar]

tamāyāṃtaṃ kubero'tha vijñāpya vacanoditaiḥ |
prasannamanasaṃ cakre vṛṣṭiṃ svarṇasya cākṣayām || 62 ||
[Analyze grammar]

svarṇavṛṣṭirabhūdyatra sā svarṇakhaniruttamā |
sa muniṃ darśayāmāsa khaniṃ tena niveditām || 63 ||
[Analyze grammar]

tasmai samarpayāmāsa tāṃ raghuḥ khanimuttamām |
munīndro'pi gṛhītvāśu tato gurvarthamādarāt || 64 ||
[Analyze grammar]

rājñe nivedayāmāsa sarvamanyadguṇādhikaḥ |
varānatha dadau tuṣṭaḥ kautso matimatāṃ varaḥ || 65 ||
[Analyze grammar]

kautsa uvāca |
rājaṃllabhasva satputraṃ nijavaṃśaguṇānvitam |
iyaṃ svarṇakhanistūrṇaṃ manobhīṣṭaphalapradā || 66 ||
[Analyze grammar]

bhūyādatra paraṃ tīrthaṃ sarvapāpaharaṃ sadā |
atra snānena dānena nṛṇāṃ lakṣmīḥ prajāyate || 67 ||
[Analyze grammar]

vaiśākhe śukladvādaśyāṃ yātrā sāṃvatsarī smṛtā |
nānābhīṣṭaphalaprāptirbhūyānmadvacasā nṛṇām || 68 ||
[Analyze grammar]

agastya uvāca |
iti dattvā varānrājñe kautsaḥ saṃtuṣṭamānasaḥ |
pratasthe nijakāryārthe gurorāśramamutsukaḥ || 69 ||
[Analyze grammar]

rājā sa kṛtakṛtyo'tha śeṣaṃ saṃgṛhya taddhanam |
dvijebhyo vidhivaddattvā pālayāmāsa vai prajāḥ || 70 ||
[Analyze grammar]

evaṃ svarṇakhanerjātaṃ māhātmyaṃ ca munīśvarāt || 71 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe'yodhyāmāhātmye dharmaharisvarṇakhanimāhātmyavarṇanaṃnāma caturtho'dhyāyaḥ || 4 ||
[Analyze grammar]