Chapter 1

[English text for this chapter is available]

ayodhyāmāhātmyaṃ prārabhyate |
jayati parāśarasūnuḥ satyavatīhṛdayanaṃdano vyāsaḥ |
yasyāsyakamalagalitaṃ vāṅmayamamṛtaṃ jagatpibati || 1 ||
[Analyze grammar]

nārāyaṇaṃ namaskṛtya naraṃ caiva narottamam |
devīṃ sarasvatīṃ caiva tato jayamudīrayet || 2 ||
[Analyze grammar]

vyāsa uvāca |
himavadvāsinaḥ sarve munayo vedapāragāḥ |
trikālajñā mahātmāno naimiṣāraṇyavāsinaḥ || 3 ||
[Analyze grammar]

ye'rbudāraṇyaniratā daṇḍakāraṇyavāsinaḥ |
mahendrādriratā ye vai ye ca vindhyanivāsinaḥ || 4 ||
[Analyze grammar]

jaṃbūvanaratā ye ca ye godāvarivāsinaḥ |
vārāṇasīśritā ye ca mathurāvāsinastathā || 5 ||
[Analyze grammar]

ujjayinyāṃ ratā ye ca prathamāśramavāsinaḥ |
dvārāvatīśritā ye ca badaryyāśrayiṇastathā || 6 ||
[Analyze grammar]

māyāpurīśritā ye ca ye ca kāntīnivāsinaḥ |
ete cānye ca munayaḥ saśiṣyā bahavo'malāḥ || 7 ||
[Analyze grammar]

kurukṣetre mahākṣetre satre dvādaśavārṣike |
vartamāne ca rāmasya kṣitīśasya mahātmanaḥ |
samāgatāḥ samāhūtāḥ sarve te munayo'malāḥ || 8 ||
[Analyze grammar]

sarve te śuddhamanaso vedavedāṃgapāragāḥ |
tatra snātvā yathānyāyaṃ kṛtvā karma japādikam || 9 ||
[Analyze grammar]

bhāradvājaṃ puraskṛtya vedavedāṃgapāragam |
āsaneṣu vicitreṣu bṛṣyādiṣu hyanukramāt || 10 ||
[Analyze grammar]

upaviṣṭāḥ kathāścakrurnānātīrthāśritāstadā |
karmāṃtareṣu satrasya sukhāsīnāḥ parasparam || 11 ||
[Analyze grammar]

kathāṃteṣu tatasteṣāṃ munīnāṃ bhāvitātmanām |
ājagāma mahātejāstatra sūto mahāmatiḥ || 12 ||
[Analyze grammar]

vyāsaśiṣyaḥ purāṇajño samaḥ harṣaṇasaṃjñakaḥ |
tānpraṇamya yathānyāyaṃ munīnupaviveśa saḥ |
upaviṣṭo yathānyāyaṃ munīnāṃ vacanena saḥ || 13 ||
[Analyze grammar]

vyāsaśiṣyaṃ munivaraṃ sūtaṃ vai romaharṣaṇam |
taṃ papracchurmunivarā bhāradvājādayo'malāḥ || 14 ||
[Analyze grammar]

ṛṣaya ūcuḥ |
tvattaḥ śrutā mahābhāga nānātīrthāśritāḥ kathāḥ |
sarahasyāni sarvāṇi purāṇāni mahāmate || 15 ||
[Analyze grammar]

sāṃprataṃ śrotumicchāmaḥ sarahasyaṃ sanātanam |
ayodhyāyā mahāpuryā mahimānaṃ guṇojjvalam || 16 ||
[Analyze grammar]

kīdṛśī sā sadā medhyā'yodhyā viṣṇupriyāpurī |
ādyā sā gīyate vede purīṇāṃ muktidāyikā || 17 ||
[Analyze grammar]

saṃsthānaṃ kīdṛśaṃ tasyāstasyāṃ ke ca mahībhujaḥ |
kāni tīrthāni puṇyāni māhātmyaṃ teṣu kīdṛśam || 18 ||
[Analyze grammar]

ayodhyāsevanānnṛṇāṃ phalaṃ syātsūta kīdṛśam |
kiṃ caritraṃ sūta tasyāḥ kā nadyaḥ ke ca saṃgamāḥ || 19 ||
[Analyze grammar]

tatra snānena kiṃ puṇyaṃ dānena ca mahāmate |
tatsarvaṃ śrotumicchāmastvattaḥ sūta guṇādhika || 20 ||
[Analyze grammar]

etatsarvaṃ krameṇaiva tathyaṃ tvaṃ vettha sāṃpratam |
ayodhyāyā mahāpuryyā māhātmyaṃ vaktumarhasi || 21 ||
[Analyze grammar]

sūta uvāca |
vyāsaprasādājjānāmi purāṇāni tapodhanāḥ |
setihāsāni sarvāṇi sarahasyāni tattvataḥ || 22 ||
[Analyze grammar]

taṃ praṇamya pravakṣyāmi māhātmyaṃ bhavadagrataḥ |
ayodhyāyā mahāpuryā yathāvatsarahasyakam || 23 ||
[Analyze grammar]

vidyāvantaṃ vipulamatidaṃ vedavedāṃgavedyaṃ śreṣṭhaṃ śāntaṃ śamitaviṣayaṃ śuddhatejoviśālam |
vedavyāsaṃ satatavinataṃ viśvavedyaikayoniṃ pārāśaryyaṃ paramapuruṣaṃ sarvadā'haṃ namāmi || 24 ||
[Analyze grammar]

oṃ namo bhagavate tasmai vyāsāyāmitatejase |
yasya prasādājjānāmi hyayodhyāmahimāmaham || 25 ||
[Analyze grammar]

śṛṇvantu munayaḥ sarve sāvadhānāḥ saśiṣyakāḥ |
māhātmyaṃ kathayiṣyāmi ayodhyāyā mahodayam || 26 ||
[Analyze grammar]

udīritamagastyāya skandenāśrāvi nāradāt |
agastyena purā proktaṃ kṛṣṇadvaipāyanāya tat || 27 ||
[Analyze grammar]

kṛṣṇadvaipāyanāccaitanmayā prāptaṃ tapodhanāḥ |
tadahaṃ vacmi yuṣmabhyaṃ śrotukāmebhya ādarāt || 28 ||
[Analyze grammar]

namāmi paramātmānaṃ rāmaṃ rājīvalocanam |
atasīkusumaśyāmaṃ rāvaṇāṃtakamavyayam || 29 ||
[Analyze grammar]

ayodhyā sā parā medhyā purī duṣkṛtidurllabhā |
kasya sevyā ca nā'yodhyā yasyāṃ sākṣāddhariḥ svayam || 30 ||
[Analyze grammar]

sarayūtīramāsādya divyā paramaśobhanā |
amarāvatīnibhā prāyaḥ śritā bahutapodhanaiḥ || 31 ||
[Analyze grammar]

hastyaśvarathapattyāḍhyā saṃpaduccā ca saṃsthitā |
prākārāḍhyapratolībhistoraṇaiḥ kāṃcanaprabhaiḥ || 32 ||
[Analyze grammar]

sānūpaveṣaiḥ sarvatra suvibhaktacatuṣṭayā |
anekabhūmiprāsādā bahubhittisuvikriyā || 33 ||
[Analyze grammar]

padmotphullaśubhodābhirvāpībhirupaśobhitā |
devatāyatanairdivyairvedaghoṣaiśca maṇḍitā || 34 ||
[Analyze grammar]

vīṇāveṇumṛdaṃgādiśabdairutkṛṣṭatāṃ gatā |
śālaistālairnālikeraiḥ panasāmalakaistathā || 35 ||
[Analyze grammar]

tathaivāmrakapitthādyairaśokairupaśobhitā |
ārāmairvividhairyuktā sarvartuphalapādapaiḥ || 36 ||
[Analyze grammar]

mālatījātibakulapāṭalīnāgacaṃpakaiḥ |
karavīraiḥ karṇikāraiḥ ketakībhiralaṃkṛtā || 37 ||
[Analyze grammar]

nimbajaṃvīrakadalīmātuliṃgamahāphalaiḥ |
lasaccaṃdanagaṃdhāḍhyairnāgarairupaśobhitā || 38 ||
[Analyze grammar]

devatulyaprabhāyuktairnṛpaputraiśca saṃyutā |
surūpābhirvarastrībhirdevastrībhirivāvṛtā || 39 ||
[Analyze grammar]

śreṣṭhaiḥ satkavibhiryuktā bṛhaspatisamairdvijaiḥ |
vaṇigjanaistathā pauraiḥ kalpavṛkṣairivāvṛtā || 40 ||
[Analyze grammar]

aśvairuccaiḥśravastulyairdaṃtibhirdiggajairiva |
iti nānāvidhairbhāvairupetendrapurī samā || 41 ||
[Analyze grammar]

yasyāṃ jātā mahīpālāḥ sūryavaṃśasamudbhavāḥ |
ikṣvākupramukhāḥ sarve prajāpālanatatparāḥ || 42 ||
[Analyze grammar]

yasyāstīre puṇyatoyā kūjadbhṛṃgavihaṃgamā |
sarayūrnāma taṭinī mānasaprabhavollasā || 43 ||
[Analyze grammar]

dharmadravaparītā sā ghargharottamasaṃgamā |
munīśvarāśritataṭā jāgarti jagaducchritā || 44 ||
[Analyze grammar]

dakṣiṇāccaraṇāṃguṣṭhānniḥsṛtā jāhnavī hareḥ |
vāmāṃguṣṭhānmunivarāḥ sarayūrnirgatā śubhā || 45 ||
[Analyze grammar]

tasmādime puṇyatame nadyau devanamaskṛte |
etayoḥ snānamātreṇa brahmahatyāṃ vyapohati || 46 ||
[Analyze grammar]

tāmayodhyāmatha prāpto'gastyaḥ kumbhodbhavo muniḥ |
yātrārthaṃ tīrthamāhātmyaṃ jñātvā skandaprasādataḥ || 47 ||
[Analyze grammar]

āgatya tu itaḥ so'pi kṛ'tvā yātrāṃ krameṇa ca |
yathoktena vidhānena snātvā saṃtarpya tānpitṝn || 48 ||
[Analyze grammar]

pūjayitvā yathānyāyaṃ devatāḥ sakalā api |
sarvāṇyapi ca tīrthāni namaskṛtya yathāvidhi || 49 ||
[Analyze grammar]

kṛtakṛtyorjjitānandastīrthamāhātmyadarśanāt |
abhūdagastyo rūpeṇa pulakāṃ citavigrahaḥ || 50 ||
[Analyze grammar]

sa trirātraṃ sthitastatra yātrāṃ kṛtvā yathāvidhi |
stuvannayodhyāmāhātmyaṃ pratasthe munisattamaḥ || 51 ||
[Analyze grammar]

tamāyāṃtaṃ vilokyāśu bahulānandasundaram |
kṛṣṇadvaipāyano vyāsaḥ papracchānaṃdakāraṇam || 52 ||
[Analyze grammar]

vyāsa uvāca |
kutaḥ samāgato brahmansāṃprataṃ munisattamaḥ |
paramānaṃdasaṃdohaḥ samabhūtsāṃprataṃ tava || 53 ||
[Analyze grammar]

kasmādānaṃdapoṣo'bhūttava brahmanvadasva me |
mamāpi bhavadānaṃdātpramodo hṛdi jāyate || 54 ||
[Analyze grammar]

agastya uvāca |
aho mahadathāścaryyaṃ vismayo munisattama |
dṛṣṭvā prabhāvaṃ me'dyābhūdayodhyāyāstapodhana || 55 ||
[Analyze grammar]

tasmādānaṃdasaṃdohaḥ samabhūnmama sāṃpratam |
tacchrutvāgastyavacanaṃ vyāsaḥ provāca taṃ munim || 56 ||
[Analyze grammar]

vyāsa uvāca |
bhagavanbrūhi tattvena vistarātsarahasyakam |
ayodhyāyā mahāpuryā mahimānaṃ guṇādhikam || 57 ||
[Analyze grammar]

kaḥ kramastīrthayātrāyāḥ kāni tīrthāni ko vidhiḥ |
ki phalaṃ snānatastatra dānasya ca mahāmune |
etatsarvaṃ samācakṣva vistarādvadatāṃ vara || 58 ||
[Analyze grammar]

agastya uvāca |
aho dhanyatamā buddhistava jātā tapodhana |
dṛśyate yena pṛcchā te hyayodhyāmahimāśritā || 59 ||
[Analyze grammar]

akāro brahma ca proktaṃ yakāro viṣṇurucyate |
dhakāro rudrarūpaśca ayodhyānāma rājate || 60 ||
[Analyze grammar]

sarvopapātakairyuktairbrahmahatyādipātakaiḥ |
nāyodhyā śakyate yasmāttāmayodhyāṃ tato viduḥ || 61 ||
[Analyze grammar]

viṣṇorādyā purī yeyaṃ kṣitiṃ na spṛśati dvija |
viṣṇoḥ sudarśane cakre sthitā puṇyakarī kṣitau || 62 ||
[Analyze grammar]

kena varṇayituṃ śakyo mahimā'syāstapodhana |
yatra sākṣātsvayaṃ devo viṣṇurvasati sādaraḥ || 63 ||
[Analyze grammar]

sahasradhārāmārabhya yojanaṃ pūrvato diśi |
pratīci diśi tathaiva yojanaṃ samatovadhiḥ || 64 ||
[Analyze grammar]

dakṣiṇottarabhāge tu sarayūtamasāvadhiḥ |
etatkṣetrasya saṃsthānaṃ harerantargṛhaṃ sthitam |
matsyākṛtiriyaṃ vipra purī viṣṇorudīritā || 65 ||
[Analyze grammar]

paścime tasya mūrddhā tu gopratārāsitā dvija || 66 ||
[Analyze grammar]

pūrvataḥ pṛṣṭhabhāgo hi dakṣiṇottaramadhyamaḥ |
tasyāṃ puryyāṃ mahābhāga nāmnā viṣṇurhariḥ svayam |
pūrvaṃdṛṣṭaprabhāvo'sau prādhānyena vasatyapi || 67 ||
[Analyze grammar]

vyāsa uvāca |
bhagavankiṃ prabhāvo'sau yo'yaṃ viṣṇuharistvayā |
kīrtito muniśārdūla prasiddhiṃ gatavānkatham |
etatsarvaṃ samācakṣva vistareṇa mamāgrataḥ || 68 ||
[Analyze grammar]

agastya uvāca |
viṣṇuśarmeti vikhyātaḥ purābhūdbrāhmaṇottamaḥ |
vedavedāṃgatattvajño dharmakarmasamāśritaḥ || 69 ||
[Analyze grammar]

yogadhyānarato nityaṃ viṣṇubhaktiparāyaṇaḥ |
sa kadācittīrthayātrāṃ kurvanvaiṣṇavasattamaḥ |
ayodhyāmāgato viṣṇurviṣṇuḥsākṣādvasediti || 70 ||
[Analyze grammar]

ciṃtayanmanasā vīrastapaḥ kartuṃ samudyataḥ |
sa vai tatra tapastepe śākamūlaphalāśanaḥ || 71 ||
[Analyze grammar]

grīṣme paṃcāgnimadhyastho hyatapatsa mahātapāḥ |
vārṣike ca nirālambo hemante ca sarovare || 72 ||
[Analyze grammar]

snātvā yathoktavidhinā kṛtvā viṣṇostathārcanam |
vaśīkṛtyendriyagrāmaṃ viśuddhenāṃtarātmanā || 73 ||
[Analyze grammar]

mano viṣṇau samāveśya vidhāya prāṇasaṃyamam |
oṃkāroccāraṇāddhīmānhṛdi padmaṃ vikāsayan || 74 ||
[Analyze grammar]

tanmadhye ravisomāgnimaṇḍalāni yathāvidhi |
kalpayitvā hariṃ mūrtaṃ yasmindeśe sanātanam || 75 ||
[Analyze grammar]

pītāṃbaradharaṃ viṣṇuṃ śaṃkhacakragadādharam |
taṃ ca puṣpaiḥ samabhyarcya manastasminniveśya ca || 76 ||
[Analyze grammar]

brahmarūpaṃ hariṃ dhyāyañjapanvai dvādaśākṣaram |
vāyubhakṣaḥ sthitastatra viprastrīnvatsarānvasan || 77 ||
[Analyze grammar]

tato dvijavaro dhyātvā stutiṃ cakre harerimām |
praṇipatya jagannāthaṃ carācaraguruṃ harim |
viṣṇuśarmātha tuṣṭāva nārāyaṇamataṃdritaḥ || 78 ||
[Analyze grammar]

viṣṇuśarmmovāca |
prasīda bhagavanviṣṇo prasīda puruṣottama |
prasīda devadeveśa prasīda kamalekṣaṇa || 79 ||
[Analyze grammar]

jaya kṛṣṇa jayāciṃtya jaya viṣṇo jayāvyaya |
jaya yajñapate nātha jaya viṣṇo pate vibho || 80 ||
[Analyze grammar]

jaya pāpaharānaṃta jaya janmajvarāpaha |
namaḥ kamalanābhāya namaḥ kamalamāline || 81 ||
[Analyze grammar]

namaḥ sarveśa bhūteśa namaḥ kaiṭabhasūdana |
namastrailokyanāthāya jaganmūla jagatpate || 82 ||
[Analyze grammar]

namo devādhidevāya namo nārāyaṇāya vai |
namaḥ kṛṣṇāya rāmāya namaścakrāyudhāya ca || 83 ||
[Analyze grammar]

tvaṃ mātā sarvalokānāṃ tvameva jagataḥ pitā |
bhayārttānāṃ suhṛnmitraṃ tvaṃ pitā tvaṃ pitāmahaḥ || 84 ||
[Analyze grammar]

tvaṃ havistvaṃ vaṣaṭkārastvaṃ prabhustvaṃ hutāśanaḥ |
karaṇaṃ kāraṇaṃ karttā tvameva parameśvaraḥ || 85 ||
[Analyze grammar]

śaṃkhacakragadāpāṇe māṃ samuddhara mādhava || 86 ||
[Analyze grammar]

prasīda maṃdaradhara prasīda madhusūdana |
prasīda kamalākānta prasīda bhuvanādhipa || 87 ||
[Analyze grammar]

agastya uvāca |
ityevaṃ stuvatastasya manobhaktyā mahātmanaḥ |
āvirbabhūva viśvātmā viṣṇurgaruḍavāhanaḥ || 88 ||
[Analyze grammar]

śaṃkhacakragadāpāṇiḥ pītāṃbaradharo'cyutaḥ |
uvāca sa prasannātmā viṣṇuśarmāṇamavyayaḥ || 89 ||
[Analyze grammar]

śrībhagavānuvāca |
tuṣṭo'smi bhavato vatsa mahatā tapasā'dhunā |
stotreṇānena sumate naṣṭapāpo'si sāṃpratam || 90 ||
[Analyze grammar]

varaṃ varaya viprendra varado'haṃ tavāgrataḥ |
nā'taptatapasā draṣṭuṃ śakyaḥ kenāpyahaṃ dvija || 91 ||
[Analyze grammar]

viṣṇuśarmmovāca |
kṛtakṛtyo'smi deveśa sāṃprataṃ tava darśanāt |
tvadbhaktimacalāmekāṃ mama dehi jagatpate || 92 ||
[Analyze grammar]

śrībhagavānuvāca |
bhaktirastvacalā me vai vaiṣṇavī muktidāyinī |
atraivāstvacalā me vai jāhnavī muktidāyinī || 93 ||
[Analyze grammar]

idaṃ sthānaṃ mahābhāga tvannāmnā khyātimeṣyati || 94 ||
[Analyze grammar]

agastya uvāca |
ityuktvā devadeveśaścakreṇotkhāya tatsthalam |
jalaṃ prakaṭayāmāsa gāṃgaṃ pātālamaṃḍalāt || 95 ||
[Analyze grammar]

jalena tena bhagavānpavitreṇa dayāṃbudhiḥ |
nīrajastu bhūmitalaṃ kṣaṇāccakre kṛpāvaśāt || 96 ||
[Analyze grammar]

cakratīrthamiti khyātaṃ tataḥ prabhṛti taddvija |
jātaṃ trailokyavikhyātamaghaughadhvaṃsakṛcchubham || 97 ||
[Analyze grammar]

tatra snānena dānena viṣṇulokaṃ vrajennaraḥ || 98 ||
[Analyze grammar]

tataḥ sa bhagavānbhūyo viṣṇuśarmāṇamacyutaḥ |
kṛpayā parayā yukta uvāca dvijavatsalaḥ || 99 ||
[Analyze grammar]

śrībhagavānuvāca |
tvannāmapūrvikā vipra manmūrtiriha tiṣṭhatu |
viṣṇuharīti vikhyātā bhaktānāṃ muktidāyinī || 100 ||
[Analyze grammar]

agastya uvāca |
iti śrutvā vaco vipro vāsudevasya buddhimān |
svanāmapūrvikāṃ mūrtiṃ sthāpayāmāsa cakriṇaḥ || 101 ||
[Analyze grammar]

tataḥ prabhati vipreśa śaṃkhacakragadādharaḥ |
pītavāsāścaturbāhurnāmnā viṣṇuhariḥ sthitaḥ || 102 ||
[Analyze grammar]

kārtike śuklapakṣasya prārabhya daśamī tithim |
pūrṇimāmavadhiṃ kṛtvā yātrā sāṃvatsarī bhavet || 103 ||
[Analyze grammar]

cakratīrthe naraḥ snātvā sarvapāpaiḥ pramucyate |
bahuvarṣasahasrāṇi svargaloke mahīyate || 104 ||
[Analyze grammar]

pitṝnuddiśya yastatra piṃḍānnirvāpayiṣyati |
tṛptāstu pitaro yānti viṣṇulokaṃ na saṃśayaḥ || 105 ||
[Analyze grammar]

cakratīrthe naraḥ snātvā dṛṣṭvā viṣṇuhariṃ vibhum |
sarvapāpakṣayaṃ prāpya nākapṛṣṭhe mahīyate || 106 ||
[Analyze grammar]

svaśaktyā tatra dānāni dattvā niṣkalmaṣo naraḥ |
viṣṇuloke vaseddhīmānyāvadindrāścaturdaśa || 107 ||
[Analyze grammar]

anyadāpi narastatra cakratīthe jiteṃdriyaḥ |
dṛṣṭvā sakṛddhariṃ devaṃ sarvapāpaiḥ pramucyate || 108 ||
[Analyze grammar]

iti sakalaguṇābdhirdhyeyamūrtiścidātmā haririha paramūrtyā tasthivānmuktihetoḥ |
tamiha bahulabhaktyā cakratīrthābhiṣekī vasati sukṛtimūrttiryo'rcayedviṣṇuloke || 109 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṃḍe'yodhyāmāhātmye viṣṇuharimāhātmyavarṇanaṃnāma prathamo'dhyāyaḥ || 1 ||
[Analyze grammar]