Chapter 19

[English text for this chapter is available]

vyādha uvāca |
viṣṇumuddiśya kartavyā dharmā bhāgavatāḥ śubhāḥ |
tatrā'pi mādhavīyāśca ityuktaṃ tu tvayā purā || 1 ||
[Analyze grammar]

sa viṣṇuḥ kīdṛśo brahmankiṃ vā tasya hi lakṣaṇam |
kiṃ mānaṃ tasya sadbhāvaiḥ kairjñeyo bhagavānvibhuḥ || 2 ||
[Analyze grammar]

kīdṛśā vaiṣṇavā dharmāḥ kenā'sau prīyate hariḥ |
etadācakṣva me brahmankiṃkarāya mahāmate || 3 ||
[Analyze grammar]

iti pṛṣṭastu vyādhena punaḥ prāha sa vai dvijaḥ |
praṇamya jagatāmīśaṃ nārāyaṇamanāmayam || 4 ||
[Analyze grammar]

śaṃkha uvāca |
śṛṇu vyādha pravakṣyāmi viṣṇurūpamakalmaṣam |
yadacintyaṃ viriṃcyādyairmunibhirbhāvitātmabhiḥ || 5 ||
[Analyze grammar]

pūrṇaśaktiḥ pūrṇaguṇo nirdiṣṭaḥ sakaleśvaraḥ |
nirguṇo niṣkalo'naṃtaḥ saccidānandavigrahaḥ || 6 ||
[Analyze grammar]

yadetadakhilaṃ viśvaṃ carācaramanīdṛśam |
sādhiśaṃsā'śrayaṃ yacca yadvaśe niyataṃ sthitam || 7 ||
[Analyze grammar]

atha te lakṣaṇaṃ vacmi brahmaṇaḥ paramātmanaḥ |
utpattisthitisaṃhārā hyāvṛttirniyamastathā || 8 ||
[Analyze grammar]

prakāśau bandhamokṣau ca vṛttiryasmādbhavaṃtyamī |
sa viṣṇurbrahmasaṃjño'sau kavīnāṃ saṃmato vibhuḥ || 9 ||
[Analyze grammar]

sākṣādbrahmeti taṃ prāhuḥ paścādbrahmādikānapi |
brahmaśabdaṃ sopapadaṃ brahmādiṣu vido viduḥ || 10 ||
[Analyze grammar]

nānyeṣāṃ brahmatā kvā'pi tacchaktyekāṃśabhāginām |
tadetacchāstragamyaṃ hi janmādyasya mahāvibhoḥ || 11 ||
[Analyze grammar]

śāstraṃ ca vedāḥ smṛtayaḥ purāṇaṃ vai tadātmakam |
itihāsaḥ paṃcarātraṃ bhārataṃ ca mahāmate || 12 ||
[Analyze grammar]

etaireva mahāviṣṇurjñeyo nānyaiḥ kathaṃcana |
nāvedavidamuṃ viṣṇuṃ manute ca naraḥ kvacit || 13 ||
[Analyze grammar]

neṃdriyairnānumānaiśca na tarkaiḥ śakyate vibhum |
jñātuṃ nārāyaṇaṃ devaṃ vedavedyaṃ sanātanam || 14 ||
[Analyze grammar]

asyaiva janmakarmāṇi guṇāñjñātvā yathāmati |
mucyaṃte jīvasaṃghāśca sadā tadvaśavartinaḥ || 15 ||
[Analyze grammar]

kramādviṣṇośca māhātmyaṃ yathā sātiśayaṃ bhavet |
ekaikasminsthitā śaktirdevarṣipitṛmātṛke || 16 ||
[Analyze grammar]

pratyakṣeṇā'gamenāpi tathaivā'numayā'pi ca |
ādau narottamaṃ vidyādbale jñāne sukhe tathā || 17 ||
[Analyze grammar]

tasmādbhūtaṃ śataguṇaṃ vidyājjñānādibhirvṛtam |
bhūtānmanuṣyagaṃdharvānvidyācchataguṇādhikān || 18 ||
[Analyze grammar]

tattvābhimānino devāstebhyo vidyācchatādhikān |
tattvābhimānidevebhyaḥ saptaiva ṛṣayo varāḥ || 19 ||
[Analyze grammar]

saptarṣibhyo varo hyagniragneḥ sūryādayastathā |
sūryādgururguroḥ prāṇaḥ prāṇādiṃdro mahābalaḥ || 20 ||
[Analyze grammar]

indrācca girijā devī devyāḥ śaṃbhurjagadguruḥ |
śaṃbhorbuddhirmahādevī buddheḥ prāṇo balādhikaḥ || 21 ||
[Analyze grammar]

na prāṇātparamaṃ kiṃcitprāṇe sarvaṃ pratiṣṭhitam |
prāṇājjātamidaṃ viśvaṃ prāṇātmakamidaṃ jagat || 22 ||
[Analyze grammar]

prāṇe protamidaṃ sarvaṃ prāṇādeva hi ceṣṭate |
sarvādhāramimaṃ prāhuḥ sūtraṃ nīlāṃbudaprabham || 23 ||
[Analyze grammar]

lakṣmīkaṭākṣamātreṇa prāṇasyāsya sthitirbhavet |
sā lakṣmīrdevadevasya kṛpāleśaikabhājinī || 24 ||
[Analyze grammar]

na viṣṇoḥ paramaṃ kiṃcinna samo vā kathaṃcana |
vyādha uvāca |
kathaṃ jīveṣvayaṃ prāṇaḥ sūtranāmā'dhiko'bhavat || 25 ||
[Analyze grammar]

nirṇayo vā kathaṃ hyasya prāṇādhikyaṃ kathaṃ vibho |
etadācakṣva me brahmankathaṃ prāṇādvibhuḥ paraḥ || 26 ||
[Analyze grammar]

śaṃkha uvāca |
śṛṇu vyādha pravakṣyāmi yatpṛṣṭo nirṇayastathā |
prāṇādhikyaṃ samuddiśya jīvaiśca sakalairapi || 27 ||
[Analyze grammar]

purā nārāyaṇo devaḥ padmasṛṣṭau sanātanaḥ |
sṛṣṭvā brahmādikāndevānidaṃ prāha janārdanaḥ || 28 ||
[Analyze grammar]

sāmrājye'haṃ sthāpayeyaṃ brahmāṇaṃ vaḥ patiṃ prabhum |
yo yuṣmāsvadhiko devo yauvarājye sureśvarāḥ || 29 ||
[Analyze grammar]

taṃ sthāpayata śīlāḍhyaṃ śauryaudāryaguṇānvitam |
ityuktā vibhunā devāḥ sarve śakrapurogamāḥ || 30 ||
[Analyze grammar]

evaṃ vivadire'nyonyamahaṃ bhūyāmahaṃ tviti |
sarve vivadamānāśca sūryaṃ kecitparaṃ viduḥ || 31 ||
[Analyze grammar]

śakraṃ kecitparaṃ kāmaṃ kecittūṣṇīṃ tu tasthire |
te nirṇayamapaśyaṃtaḥ praṣṭuṃ nārāyaṇaṃ yayuḥ || 32 ||
[Analyze grammar]

namaskṛtya punaḥ prāhuḥ sarve prāṃjalayo'marāḥ |
vicāritaṃ mahāviṣṇo sarvairasmābhiraṃjasā || 33 ||
[Analyze grammar]

asmāsu devamadhikaṃ naiva vidmaḥ kathaṃcana |
tvameva nirṇayaṃ brūhi devāḥ saṃśayinaḥ khalu || 34 ||
[Analyze grammar]

iti pṛṣṭo'maraiḥ sarvaiḥ prahasannidamabravīt |
dehādasmācca vairājādyasminniṣkrāmati hyayam || 35 ||
[Analyze grammar]

patiṣyati praviṣṭe tu yasminvai hyutthito bhavet |
sa devo hyadhiko nūnaṃ nāparastu kathaṃcana || 36 ||
[Analyze grammar]

ityuktāste tataḥ sarve tathāstviti vaco'bruvan |
niścakrāma jayaṃtāhvaḥ pādātpūrvaṃ sureśvaraḥ || 37 ||
[Analyze grammar]

tadā paṃgumamuṃ prāhurna dehaḥ patitastadā |
śṛṇvanpibanvadañjighranpaśyannāste'calannapi || 38 ||
[Analyze grammar]

paścādguhyādviniṣkrāṃto dakṣonāma prajāpatiḥ |
tadā ṣaṃḍhamamuṃ prāhurna dehaḥ patitastadā || 39 ||
[Analyze grammar]

śṛṇvanpibanvadañjighranpaśyannāste calannapi |
paścāddhastādviniṣkrāṃta indraḥ sarvāmareśvaraḥ || 40 ||
[Analyze grammar]

hastahīnamamuṃ prāhurna dehaḥ patitastadā |
śṛṇvanpibanvadañjighranpaśyannāste calannapi || 41 ||
[Analyze grammar]

locanābhyāṃ viniṣkrāṃtaḥ sūryastejasvināṃ varaḥ |
tadā kāṇamamuṃ prāhurna dehaḥ patitastadā || 42 ||
[Analyze grammar]

śṛṇvanpibanvadañjighranpaśyannāste calannapi |
prāṇātpaścādviniṣkrāṃtau nāsatyau viśvabheṣajau |
ajighrāṇamamuṃ prāhurna dehaḥ patitastadā || 43 ||
[Analyze grammar]

śṛṇvanpibanvadannaiva jighrannāste'calannapi |
śrotrāddiśo viniṣkrāṃtā na dehaḥ patitastadā |
tadāmuṃ badhiraṃ prāhurmṛtaṃ naiva kathaṃcana || 44 ||
[Analyze grammar]

pibanvadannapi tadā hyaśṛṇvannacalannapi |
varuṇo rasanāyāstuviniṣkrāṃtastataḥ param |
tadā'rasajñamevāhurna dehaḥ patitastadā || 45 ||
[Analyze grammar]

jīvaṃścalannadannāste tathā jānañcchavasannapi |
tato vāco viniṣkrāṃto vahnirvāgīśvaro vibhuḥ || 46 ||
[Analyze grammar]

tadā mūkamamuṃ prāhurna dehaḥ patitastadā |
jīvaṃścalannadannāste tathā jānañchvasannapi || 47 ||
[Analyze grammar]

paścādrudro viniṣkrāṃto manaso bodhanātmakaḥ |
tadā jaḍamamuṃ prāhurna dehaḥ patitastadā || 48 ||
[Analyze grammar]

jīvaṃścalannadannāste tathā jānañchvasannapi |
paścātprāṇo viniṣkrāṃto mṛtamenaṃ tadā viduḥ |
punarevaṃ tadā prāhurdevā vismitamānasāḥ || 49 ||
[Analyze grammar]

dehamutthā payedyastu punarevaṃ vyavasthitaḥ |
sa eva hyadhiko'smāsu yuvarājā bhaviṣyati || 50 ||
[Analyze grammar]

ityevaṃ tu pratiśrutya viviśuśca yathākramam |
jayaṃtaḥ prāviśatpādau nottasthau tatkalevaram || 51 ||
[Analyze grammar]

guhyaṃ ca prāviśaddakṣo nottasthau tatkalevaram |
indro hastau viveśā'tha nottasthau tatkalevaram || 52 ||
[Analyze grammar]

cakṣuḥ sūryaḥ praviṣṭo'bhūnnottasthau tatkalevaram |
diśaḥ śrotre praviviśurnottasthau tatkalevaram || 53 ||
[Analyze grammar]

varuṇaḥ prāviśajihvāṃ nottasthau tatkalevaram |
nāsāṃ viviśaturdasrau nottasthau tatkalevaram || 54 ||
[Analyze grammar]

vahniśca prāviśadvācaṃ nottasthau tatkalevaram |
manaśca prāviśadrudro nottasthau tatkalevaram || 55 ||
[Analyze grammar]

paścātprāṇo viveśāsau tadottasthau kalevaram |
tadā devā viniścitya prāṇaṃ devādhikaṃ vibhum || 56 ||
[Analyze grammar]

bale jñāne ca dhairye ca vairāgye prāṇane'pi ca |
tato'bhiṣecayāṃcakruryauvarājye mahāprabhum || 57 ||
[Analyze grammar]

utkṛṣṭasthitihetutvādukthamekaṃ tadā jaguḥ |
tasmātprāṇātmakaṃ viśvaṃ sarvaṃ sthāvarajaṃgamam || 58 ||
[Analyze grammar]

aṃśaiḥ pūrṇairbalāḍhyaiśca pūrṇo'yaṃ jagatāṃ patiḥ || 59 ||
[Analyze grammar]

na prāṇahīnaṃ jagadasti kiṃcitprāṇena hīnaṃ na ca vai samedhate |
na prāṇahīnaṃ sthitamatra kiṃcitprāṇena hīnaṃ na ca kiṃcidasti |
tasmātprāṇaḥ sarvajīvādhiko'bhūdbalādhikaḥ sarvajīvāṃtarātmā || 60 ||
[Analyze grammar]

prāṇātko'pi hyadhiko vā samo vā śāstre dṛṣṭaḥ śrutapūrvo na cā'ste || 61 ||
[Analyze grammar]

tattatkāryānugaḥ prāṇo hyeko devo hyanekadhā |
tasmātprāṇaṃ varaṃ prāhuḥ prāṇopāsanatatparāḥ |
līlayaiva jagatsraṣṭuṃ hantuṃ pālayituṃ prabhuḥ || 62 ||
[Analyze grammar]

śeṣā'hiśivaśakrādyāścetanāśca jaḍā api |
vāsudevādṛte ko'pi nainaṃ paribhaviṣyati || 63 ||
[Analyze grammar]

sarvadevātmakaḥ prāṇaḥ sarvadevamayo vibhuḥ |
vāsudevā'nugo nityaṃ tathā viṣṇuvaśasthitaḥ || 64 ||
[Analyze grammar]

vāsudevapratīpaṃ tu na śṛṇoti na paśyati |
devāḥ pratīpaṃ kurvaṃti rudrādyāḥ sureśvarāḥ || 65 ||
[Analyze grammar]

pratīpaṃ kvā'pi kurute na prāṇaḥ sarvagocaraḥ |
tasmātprāṇo mahāviṣṇorbalamāhurmanīṣiṇaḥ || 66 ||
[Analyze grammar]

evaṃ jñātvā mahāviṣṇormāhātmyaṃ lakṣaṇaṃ tathā |
pūrvabandhānugaṃ liṃgaṃ jīrṇāṃ tvacamivoragaḥ || 67 ||
[Analyze grammar]

visṛjya paramaṃ yāti nārāyaṇamanāmayam |
śrutvā śaṃkhoditaṃ vākyaṃ punarvyādhaḥ prasannadhīḥ || 68 ||
[Analyze grammar]

praśrayā'vanato bhūtvā punaḥ papraccha taṃ munim |
brahmanmahānubhāvasya prāṇasyā'sya jagadguroḥ || 69 ||
[Analyze grammar]

na khyāto mahimā loke kathaṃ sarveśvarasya vai |
devānāṃ ca munīnāṃ ca bhūpānāṃ ca mahātmanām || 70 ||
[Analyze grammar]

mahimā śrūyate loke purāṇeṣu sahasraśaḥ |
etadācakṣva me brahmañchrotuṃ kautūhalaṃ hi me || 71 ||
[Analyze grammar]

śaṃkha uvāca |
purā prāṇo hariṃ devaṃ nārāyaṇamanāmayam |
aśvamedhairyaṣṭukāmo gaṅgātīraṃ yayau mudā || 72 ||
[Analyze grammar]

halaiścakāra bhūśuddhiṃ nānāmunigaṇairyutaḥ |
antarvalmīkalīnastu kaṇvo nāma samādhigaḥ || 73 ||
[Analyze grammar]

halotkṛṣṭo viniṣkrāṃtaḥ krodhādidamuvāca ha |
dṛṣṭvā puraḥ sthitaṃ prāṇaṃ śaśāpa ha mahāvibhum || 74 ||
[Analyze grammar]

adyaprabhṛti na khyātiṃ mahimā bhuvanatraye |
tava prāpnoti deveśa bhūloke tu viśeṣataḥ || 75 ||
[Analyze grammar]

prakhyātāste bhaviṣyaṃti hyavatārā jagattraye |
ityukto muninā tena vāyuḥ kodhāttamabravīt || 76 ||
[Analyze grammar]

vināparādhaṃ śapto'smi titikṣuṃ māṃ nirāgasam |
tasmātkaṇva mahābāho gurudrohī bhavā'śu ca || 77 ||
[Analyze grammar]

loke ninditavṛttiśca bhavetyāha sadāgatiḥ |
tataḥ prabhṛti loke'sminprāṇasyā'sya mahāprabho || 78 ||
[Analyze grammar]

na khyāto mahimā loke bhūloke tu viśeṣataḥ |
śāpātkaṇvo guruṃ jagdhvā sūryaśiṣyo'bhavattadā || 79 ||
[Analyze grammar]

ityetatkathitaṃ sarvaṃ yatpṛṣṭaṃ tu tvayā'dhunā |
yacchrotavyamito vyādha pṛccha māṃ mā vicāraya || 80 ||
[Analyze grammar]