Chapter 18

[English text for this chapter is available]

vyādha uvāca |
bhavatā'nugṛhīto'smi mune pāpo'tiduṣṭadhīḥ |
dayālavo mahāṃto hi svabhāvādeva sādhavaḥ || 1 ||
[Analyze grammar]

kva vyādhaścā'kulīno'haṃ kva ca vā matirīdṛśī |
kevalaṃ bhavatāmeva manye'nugrahamuttamam || 2 ||
[Analyze grammar]

atha sādho ca śiṣyosmi kṛpāpātrosmi mānada |
anugrāhyo'smi putro'smi kṛpāṃ kuru dayānidhe || 3 ||
[Analyze grammar]

yathā me na punarbhūyādasanmatiranarthadā |
sadbhistu saṃgateḥ kvāpi nabhūyo duḥkhamaśnute || 4 ||
[Analyze grammar]

tasmādbodhaya māṃ vipra sūktaistairvṛjināpahaiḥ |
yena cāddhā tariṣyaṃti saṃsārābdhiṃ mumukṣavaḥ || 5 ||
[Analyze grammar]

sādhūnāṃ samacittānāṃ tathā bhūtadayāvatām |
na ca hīnottamaḥ kvāpi nātmīyo hi parastathā || 6 ||
[Analyze grammar]

aikāgryeṇa viciṃtyātha cittaśuddhiṃ ca pṛcchati |
sarvadoṣayuto vāpi sarvadharmojjhito'pi vā || 7 ||
[Analyze grammar]

kṛtānutāpaśca yadā yadā pṛcchati vai gurūn |
tadaivopadiśaṃtyaddhā jñānaṃ saṃsāramocakam || 8 ||
[Analyze grammar]

yathā gaṃgā manuṣyāṇāṃ pāpanāśasya bhāvinī |
tathā mandasamuddhārasvabhāvāḥ sādhavaḥ smṛtāḥ || 9 ||
[Analyze grammar]

mā vicāraya māṃ boddhuṃ dayālo bhaktavatsala |
śuśrūṣutvānnatatvācca śuddhatvāttava saṃgateḥ || 10 ||
[Analyze grammar]

iti vyādhavacaḥ śrutvā punarvismitamānasaḥ |
sādhusādhviti saṃbhāṣya dharmānetānuvāca ha || 11 ||
[Analyze grammar]

śaṃkha uvāca |
viṣṇuprītikarāndivyānsaṃsārābdhivimocakān |
kuru dharmāṃśca vaiśākhe yadi vyādha śamicchasi || 12 ||
[Analyze grammar]

ātapo bādhate ghoro na cchāyā nāṃbu cātra ca |
tasmātsthalāṃtaraṃ yāvo yatra cchāyā tu vartate || 13 ||
[Analyze grammar]

tatra gatvā jalaṃ pītvā succhāyāṃ ca samāśritaḥ |
tatra te varṇayiṣyāmi māhātmyaṃ pāpanāśanam || 14 ||
[Analyze grammar]

viṣṇormādhavamāsasya yathādṛṣṭaṃ yathāśrutam |
ityukto muninā tena vyādhaḥ prāha kṛtāñjaliḥ || 15 ||
[Analyze grammar]

ito vidūre salilaṃ vartate ca sarovare |
kapitthāstatra vai saṃti phalabhāreṇa pīḍitāḥ || 16 ||
[Analyze grammar]

gacchāvastatra saṃtuṣṭirbhavitā nātra saṃśayaḥ |
vyādhenaivaṃ samādiṣṭastena sākaṃ yayau muniḥ || 17 ||
[Analyze grammar]

kiyaddūraṃ tato gatvā dadarśāgre sarovaram |
baka kāraṇḍavākīrṇaṃ cakravākopaśobhitam || 18 ||
[Analyze grammar]

haṃsasārasakrauṃcādyaiḥ samaṃtātpariśobhitam |
kīcakaiśca sughoṣaiśca kūjitaṃ bhramarairapi || 19 ||
[Analyze grammar]

nakrakacchapamīnādyairvagāhyaṃ sumanoharam |
kumudotpalakahlāra puṃḍarīkādibhirmahat || 20 ||
[Analyze grammar]

śatapatraiḥ kokanadaiḥ samantātpariśobhitam |
pakṣiṇāṃ ca kalārāvairmukhara nayanotsavam || 21 ||
[Analyze grammar]

taṭe kīcakagulmaiśca tathā vṛkṣaiśca śobhitam |
vaṭaiḥ karaṃjairnīpaiśca ciṃciṇībhistathaiva ca || 22 ||
[Analyze grammar]

nimbaplakṣapriyālaiśca caṃpakairbakulaiḥ śubhaiḥ |
punnāgaistuṃbaraiścaiva kapitthāmalakairapi || 23 ||
[Analyze grammar]

niṣpeṣaṇaiśca jaṃbūbhiḥ samaṃtātpariśobhitam |
vanyamātaṃgasāraṃga varāhamahiṣādibhiḥ || 24 ||
[Analyze grammar]

śaśaiśca śallakaiścaiva gavayairupaśobhitam |
khaṅganābhimṛgādyaiśca vyāghraiḥ siṃhairvṛkairapi || 25 ||
[Analyze grammar]

kharāṃtakaiśca śarabhaiśca marībhiḥ sumaṃḍitam |
śākhāśākhāṃtaraṃ śīghraṃ plavamānaiḥ plavaṃgamaiḥ || 26 ||
[Analyze grammar]

mārjāraiścaiva bhallūkairbhīṣaṇaṃ rurubhistathā |
jhillīśabdaiśca kreṃkāraiḥ kīcakānāṃ ravaistathā || 27 ||
[Analyze grammar]

ghoravāyuvinirghātadārubhāraiḥ samanvitam |
etādṛśaṃ saro divyaṃ vyādhenaiva pradarśitam || 28 ||
[Analyze grammar]

dadarśa muniśārdūlastṛṣayā bādhito bhṛśam |
snātvā madhyāhnavelāyāṃ sarasyasminmanorame || 29 ||
[Analyze grammar]

vāsasī paridhāyā'tha kṛtvā mādhyāhnikīḥ kriyāḥ |
devapūjāṃ tataḥ kṛtvā bhuktvā phalamatandritaḥ || 30 ||
[Analyze grammar]

vyādhopanītaṃ susvādu kapitthaṃ śramahāri ca |
sukhopaviṣṭaḥ papraccha vyādhaṃ dharmarataṃ punaḥ || 31 ||
[Analyze grammar]

kiṃ vaktavyaṃ mayā hyadya tavādau dharmatatpara |
dharmāśca bahavaḥ saṃti nānāmārgāḥ pṛthagvidhāḥ || 32 ||
[Analyze grammar]

tatra vaiśākhamāsoktāḥ sūkṣmā api mahārthadāḥ |
sarveṣāmeva jaṃtūnāmihā'mutra phalapradāḥ || 33 ||
[Analyze grammar]

yatpraṣṭavyaṃ manasi te yaccādau tacca pṛcchatām |
ityukto muninā tena vyādhaḥ prāṃjalirabravīt || 34 ||
[Analyze grammar]

vyādha uvāca |
kena vā karmaṇā cā'sīdvyādhajanma tamomayam |
kena vā cedṛśī buddhiḥ saṃgatirvā mahātmanaḥ || 35 ||
[Analyze grammar]

etaccānyatsamācakṣva yadi māṃ manyase prabho |
ityuktaḥ punarapyāha śaṃkho nāma mahāmuniḥ || 36 ||
[Analyze grammar]

meghagaṃbhīrayā vācā smayamānamukhāṃbujaḥ |
śaṃkha uvāca |
śākale nagare pūrvaṃ dvijastvaṃ vedapāragaḥ || 37 ||
[Analyze grammar]

staṃbo nāma mahātejāstathā śrīvatsagotrajaḥ |
taveṣṭā gaṇikā kācidāsīttatsaṃgadoṣataḥ || 37 ||
[Analyze grammar]

tyaktvā nityakriyā nityaṃ śūdravadgṛhamāgataḥ |
śūnyācārasya duṣṭasya parityaktakriyasya ca || 39 ||
[Analyze grammar]

brāhmaṇī ca tadā cā'sīdbhāryā kāṃtimatī tava |
sā tvāṃ paryacaratsubhrūḥ saveśyaṃ brāhmaṇādhamam || 40 ||
[Analyze grammar]

ubhayoḥ kṣālayaṃtī ca pādāṃstvatpriyakāriṇī |
ubhayorapyadhaḥ śete ubhayorvacane ratā || 41 ||
[Analyze grammar]

veśyayā vāryamāṇā'pi pātivratyavratasthitā |
evaṃ śuśrūṣayaṃtyā hi bhartāraṃ veśyayā saha || 42 ||
[Analyze grammar]

jagāma sumahānkālo duḥkhitāyā mahītale |
aparasmindine bhartā māṣaṃ ca mūlakānvitam || 43 ||
[Analyze grammar]

abhakṣayacchūdradharmānnipāvāṃstilamiśritān |
tadapathyamaśitvā tu vamaṃścaiva virecayan || 44 ||
[Analyze grammar]

apathyāddāruṇo rogo vyajāyata bhagaṃdaraḥ |
sa dahyamāno rogeṇa divārātraṃ tu bhūriśaḥ || 45 ||
[Analyze grammar]

yāvadāste gṛhe vittaṃ tāvadveśyā ca saṃsthitā |
gṛhītvā tasya sā vittaṃ paścānnovāsa maṃdire || 46 ||
[Analyze grammar]

anyasya pārśvamāsādya gatā ghorā sunirghṛṇā |
tataḥ sa dīnavacano vyādhibādhāsupīḍitaḥ || 47 ||
[Analyze grammar]

uktavānsa rudanbhāryāṃ rujā vyākulamānasaḥ |
paripālaya māṃ devi veśyā'saktaṃ suniṣṭhuram || 48 ||
[Analyze grammar]

na mayopakṛtaṃ kiṃcittvayi suṃdari pāvani |
ko bhāryāṃ praṇatāṃ pāpo nānumanyeta garhitaḥ || 49 ||
[Analyze grammar]

sa ṣaṃḍho bhavitā bhadre daśa janmasu paṃcasu |
divārātraṃ mahābhāge nimaditaḥ sādhubhirjanaiḥ || 50 ||
[Analyze grammar]

pāpayonimavāpsyāmi tvāṃ sādhvīmavamanya vai |
ahaṃ krodhena dagdho'smi tavāpamānajena vai || 51 ||
[Analyze grammar]

evaṃ bruvāṇaṃ bhartāraṃ kṛtāñjalipuṭā'bravīt |
na dainyaṃ bhavatā kāryaṃ na vrīḍā kāṃta māṃ prati || 52 ||
[Analyze grammar]

na cā'pi tvayi me krodho yena dagdho vadasyatha |
purā kṛtāni pāpāni duḥkhānīha bhavaṃti hi || 53 ||
[Analyze grammar]

tāni yā kṣamate sādhvī puruṣo vā sa uttamaḥ |
yanmayā pāpayā pāpaṃ kṛtaṃ vai pūrvajanmani || 54 ||
[Analyze grammar]

tadbhuṃjatyā na me duḥkhaṃ na viṣādaḥ kathaṃcana |
ityevamuktvā bhartāraṃ sā subhrūstamapālayat || 55 ||
[Analyze grammar]

ānīya janakādvittaṃ baṃdhubhyo varavarṇinī |
kṣīrodavāsinaṃ devaṃ bharttāraṃ sā tvaciṃtayat || 56 ||
[Analyze grammar]

śodhayantī divārātrau purīṣaṃ mūtrameva ca |
nakhena karṣatī bharttuḥ kṛmīnkaṣṭācchanaiḥśanaiḥ || 57 ||
[Analyze grammar]

na sā svapiti rātrau tu na divā varavarṇinī |
bhartturduḥkhena saṃtaptā duḥkhitedamavocata || 58 ||
[Analyze grammar]

devāśca pātu bhartāraṃ pitaro ye ca viśrutāḥ |
kurvaṃtu rogahīnaṃ me bharttāraṃ gatakalmaṣam || 59 ||
[Analyze grammar]

caṃḍikāyai pradāsyāmi raktamāṃsasamudbhavam |
suṣṭhavannaṃ māhiṣopetaṃ bhartturārogyahetave || 60 ||
[Analyze grammar]

modakānkārayiṣyāmi vighneśāya mahātmane |
mandavāre kariṣyāmi copavāsāndaśaiva tu || 61 ||
[Analyze grammar]

nopabhuṃjāmi madhuraṃ nopabhuṃjāmi vai ghṛtam |
tailābhyaṃgavihīnāhaṃ sthāsye naivātra saṃśayaḥ || 62 ||
[Analyze grammar]

jīvatādrogahīno'yaṃ bharttā me śaradāṃ śatam |
evaṃ sā vyāharaddevī vāsare vāsare gate || 63 ||
[Analyze grammar]

tadā cā'gānmuniḥ kaścinmahātmā devalāhvayaḥ |
vaiśākhe māsi gharmārtaḥ sāyāhne tasya vai gṛham || 64 ||
[Analyze grammar]

tadā vai bhāryayā coktaṃ bhiṣagvai gṛhamāgataḥ |
tena vai rogahāniḥ syāttasyā'tithya karomyaham || 65 ||
[Analyze grammar]

jñātvā tvāṃ dharmavimukhaṃ bhiṣagvyājena vaṃcitaḥ |
pādāvanejanaṃ kṛtvā tajjalaṃ mūrdhni sākṣipat || 66 ||
[Analyze grammar]

pānakaṃ ca dadau tasmai gharmārtāya mahātmane |
tvayā'numoditā sāyaṃ gharmatāpanivārakam || 67 ||
[Analyze grammar]

sa prātarudite sūrye muniḥ prāyādyathā'gataḥ |
atha cālpena kālena sannipāto'bhavattava || 68 ||
[Analyze grammar]

trikaṭvyāṃ nīyamānāyāṃ bharttāṃgulimakhaṃḍayat |
ubhayordaṃtayoḥ śleṣaḥ sahasā samapadyata || 69 ||
[Analyze grammar]

tatkhaṃḍamaṃgulervaktre sthitaṃ bhartuḥ sukomalam |
khaṇḍayitvāguliṃ bhartā paṃcatvamagamattadā || 70 ||
[Analyze grammar]

śayyāyāṃ sumanojñāyāṃ smaraṃstāṃ puṃścalī śubhām |
mṛtaṃ vijñāya bharttāraṃ bhāryā kāṃtimatī tava || 71 ||
[Analyze grammar]

vikrīya cā'pi valayaṃ gṛhītvā ceṃdhanaṃ bahu |
cakre citiṃ tena sādhvī madhye kṛtvā patiṃ tadā || 72 ||
[Analyze grammar]

avaguhya bhujābhyāṃ ca pādau cāśliṣya pādayoḥ |
mukhe mukhaṃ vinikṣipya hṛdayaṃ hṛdaye tathā || 73 ||
[Analyze grammar]

jaghane jaghanaṃ devī hyātmānaṃ sanniveśya ca |
dāhayāmāsa kalyāṇī bhartṛdehaṃ rujānvitam |
ātmanā saha kalyāṇī jvalite jātavedasi || 74 ||
[Analyze grammar]

vimucya dehaṃ sahasā jagāma patiṃ samāliṃgya murārilokam |
pānīyadānena ca mādhave'sminpādāvanejādapi yogigamyam || 75 ||
[Analyze grammar]

tvamaṃtakāle gaṇikāviciṃtayā dehaṃ tyaktvā muktasamastakilbiṣaḥ |
janma vyādhyaṃ prāpyase ghorarūpaṃ hiṃsāsaktaḥ sarvadodvegakārī || 76 ||
[Analyze grammar]

dattā tvayā pānakasyā'pi dāne māse'nujñā mādhave sādhujāne |
vyādho jātastena jātā subuddhirdharmānpraṣṭuṃ sarvasaukhyaikahetūn || 77 ||
[Analyze grammar]

dhṛtaṃ mūrdhnā pādaśaucāvaśiṣṭaṃ jalaṃ muneḥ sarvapāpāpahāri |
teneyaṃ te saṃgatirme vane'sminyayā bhūyaḥ saṃpadaḥ santatiśca || 78 ||
[Analyze grammar]

ityetatsarvamākhyātaṃ pūrvajanmani yatkṛtam |
karma puṇyaṃ pāpakaṃ ca dṛṣṭaṃ divyena cakṣuṣā || 79 ||
[Analyze grammar]

gopyaṃ vā te pravakṣyāmi yadbhavāñchrotumicchati |
jātā te cittaśuddhirvai svasti bhūyānmahāmate || 80 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe vaiśākhamāsamāhātmye nāradāṃbarīṣa saṃvāde vyādhopākhyāne vyādhasya pūrvajanmakathanaṃnāmāṣṭādaśo'dhyāyaḥ || 18 ||
[Analyze grammar]