Chapter 10

[English text for this chapter is available]

maithila uvāca |
yatkāmapatnīcaritamaśūnyaśayanaṃ vratam |
devopadiṣṭaṃ tasyā'sya vidhānaṃ brūhi bhūsura || 1 ||
[Analyze grammar]

kiṃ dānaṃ ko vidhistasya pūjanaṃ kiṃ phalaṃ tathā |
etadācakṣva bhūdeva śrotuṃ kautūhalaṃ hi me || 2 ||
[Analyze grammar]

śrutadeva uvāca |
śṛṇu bhūyaḥ pravakṣyāmi vrataṃ pāpapraṇāśanam |
aśūnyaśayanaṃ nāma ramāyai hariṇoditam || 3 ||
[Analyze grammar]

yena cīrṇena deveśo jīmūtā'bhaḥ prasīdati |
lakṣmībhartā jagannāthaḥ samastā'ghaughanāśanaḥ || 4 ||
[Analyze grammar]

akṛtvā yastvidaṃ rājanvrataṃ pātakanāśanam |
gārhasthyamanuvarteta tasyedaṃ niṣphalaṃ bhavet || 5 ||
[Analyze grammar]

śrāvaṇe śuklapakṣe tu dvitīyāyāṃ mahīpate |
aśūnyaśayanākhyaṃ tadgrāhyaṃ vratamanuttamam || 6 ||
[Analyze grammar]

cāturmāsye tu saṃprāpte haviṣyāśī bhavennaraḥ |
caturbhiḥ pāraṇaṃ māsaiḥ samyaṅniṣpādyate prabho || 7 ||
[Analyze grammar]

lakṣmīyukto jagannāthaḥ pūjanīyo janārdanaḥ |
pāraṇe divase prāpte bhakṣyaṃ caiva caturvidham || 8 ||
[Analyze grammar]

upāyanaṃ ca dātavyaṃ brāhmaṇāya kuṭuṃbine |
sauvarṇīṃ rājatīṃ cāpi mūrtiṃ kuryānmanoramām || 9 ||
[Analyze grammar]

pītāmbaradharāṃ divyāṃ vanamālāvibhūṣitām |
śuklapuṣpaiḥ sugaṃdhaiśca pūjayetpuruṣottamam || 10 ||
[Analyze grammar]

śayyādānairvastradānairviprāṇāṃ bhojanaistathā |
dampatyorbhojanaiścaiva dakṣiṇābhiḥ prapūjayet || 11 ||
[Analyze grammar]

evaṃ tu caturo māsānpūjayitvā janārdanam |
mārgaśīrṣādimāseṣu pūjayetpūrvavaddharim || 12 ||
[Analyze grammar]

rakravarṇaṃ hariṃ dhyāyedrukmiṇīsahitaṃ tathā |
caitrādīṃścaturo māsānevaṃ saṃpūjayettataḥ || 13 ||
[Analyze grammar]

bhūmyā saha sthitaṃ devamarcayedbhaktipūrvakam |
sanaṃdanādyairmunibhiḥ stūyamānamakalmaṣam || 14 ||
[Analyze grammar]

āṣāḍhasya ca māsasya dvitīyāyāṃ samāpayet |
aṣṭākṣareṇa maṃtreṇa juhuyādanale śubhe || 15 ||
[Analyze grammar]

mārgaśīrṣādimāsānāṃ pāraṇe bhūmipālaka |
juhuyādviṣṇugāyatryā caitrādīnāṃ nibodhaya || 16 ||
[Analyze grammar]

pauruṣeṇa ca maṃtreṇa juhuyādanale śubhe |
pañcāmṛtaṃ pāyasaṃ ca hyapūpaṃ ghṛtapācitam || 17 ||
[Analyze grammar]

evaṃ krameṇa dravyāṇi pratimāsu nibodhaya |
sauvarṇī pratimāṃ dadyāllakṣmīnārāyaṇasya ca || 18 ||
[Analyze grammar]

sauvarṇīṃ madhyame dadyātkṛṣṇasya paramātmanaḥ |
rājatīṃ tvaṃtime dadyādvarāhasya mahātmanaḥ || 19 ||
[Analyze grammar]

brāhmaṇānbhojayetpaścānnāmabhiḥ keśavādibhiḥ |
vastrayugmairalaṃkārairyathāvittānusārataḥ || 20 ||
[Analyze grammar]

arcayitvā tato dadyādapūpānghṛtapācitān |
upāyanārthe viprebhyo dvādaśabhyo nivedayet || 21 ||
[Analyze grammar]

ācāryāya tato dadyātpratimāṃ pūrvakalpitām |
śayyāṃ saṃkalpitāṃ pūrṇāṃ sarvālaṃkārabhūṣitām || 22 ||
[Analyze grammar]

tasyāmabhyarcya vidhivallakṣmīnārāyaṇaṃ param |
kāṃsyapātreṇa sahitāmapūpairbahubhistathā || 23 ||
[Analyze grammar]

vastrālaṃkārasahitāṃ dakṣiṇābhistathaiva ca |
brāhmaṇāya viśiṣṭāya vaiṣṇavāya kuṭuṃbine || 24 ||
[Analyze grammar]

dātavyā vidhivatpūjya brāhmaṇāṃścāpi bhojayet |
dānamantraḥ |
lakṣmyā aśūnyaṃ śayanaṃ yathā tava janārdana || 25 ||
[Analyze grammar]

śayyā mamāpyaśūnyā syāddānenā'nena keśava |
evaṃ samprārthya deveśaṃ svayaṃ bhojanamācaret || 26 ||
[Analyze grammar]

puruṣo vā satī vā'pi vidhavā vā samācaret |
aśūnyaśayanārthaṃ ca kartavyaṃ vratamuttamam || 27 ||
[Analyze grammar]

evaṃ tava mayā khyātaṃ vistarānnṛpasattama |
suprasanne jagannāthe bhaveyurvividhāḥ prajāḥ || 28 ||
[Analyze grammar]

tasmiṃstuṣṭe tu deveśe devānāmapi durlabhāḥ |
tasmātsarvaprayatnena vratametatsamācaret || 29 ||
[Analyze grammar]

avaśyaṃ gantukāmena tadviṣṇoḥ paramaṃ padam |
evamuktaṃ mayā sarvaṃ kimanyacchrotumicchasi || 30 ||
[Analyze grammar]

ityuktastena rājarṣiḥ punarapyāha taṃ munim |
vaiśākhe chatradānasya māhātmyaṃ vistarādvada || 31 ||
[Analyze grammar]

śṛṇvato'pi na tṛptirme vaiśākhoktāñcchubhāvahān || 32 ||
[Analyze grammar]

iti tadvacanaṃ śrutvā yaśasyaṃ puṇyavarddhanam |
pratyuvāca mahābhāgaṃ śrutadevo mahāyaśāḥ || 33 ||
[Analyze grammar]

śrutadeva uvāca |
vaiśākhe gharmataptānāṃ mānavānāṃ mahātmanām |
ye kurvantyātapatrāṇaṃ teṣāṃ puṇyamanaṃtakam || 34 ||
[Analyze grammar]

atraivodāharantīmamiti hāsaṃ purātanam |
vaiśākhadharmamuddiśya purā kṛtayuge kṛtam || 35 ||
[Analyze grammar]

vaṅgadeśe purā kaściddhemakānta iti śrutaḥ |
kuśaketoḥ suto dhīmānrājā śastrabhṛtāṃ varaḥ |
ekadā mṛgayā'sakto gahanaṃ vanamāviśat || 36 ||
[Analyze grammar]

tatra nānāvidhānhatvā mṛgānkroḍādikānbahūn |
śrāṃto madhyāhnavelāyāṃ munīnāmāśramaṃ yayau || 37 ||
[Analyze grammar]

tadā śatarcinonāma ṛṣayaḥ śaṃsitavratāḥ |
samādhisthā na jānanti bāhyakṛtyaṃ ca kiṃcana || 38 ||
[Analyze grammar]

tāndṛṣṭvā niścalānviprānkruddho haṃtuṃ mano dadhe |
bhūpaṃ nivārayāmāsa śiṣyāṇāmayutaṃ tadā || 39 ||
[Analyze grammar]

durbuddha śṛṇu no vākyaṃ guravastu samādhigāḥ |
no jānanti bahiḥkṛtyaṃ tasmātkrodhaṃ na cārhasi || 40 ||
[Analyze grammar]

tataḥ śiṣyānuvācedaṃ vacanaṃ krodhavihvalaḥ |
yūyaṃ kurudhvamātithyamadhvaśrāṃtasya me dvijāḥ || 41 ||
[Analyze grammar]

evamuktāśca bhūpena śiṣyā ūcustadā nṛpam |
nā'jñaptā gurubhirbhūpa vayaṃ bhikṣāśinaḥ punaḥ || 42 ||
[Analyze grammar]

gurutantrāḥ kathaṃ kartumātithyaṃ te vayaṃ kṣamāḥ |
pratyākhyāto nṛpaḥ śiṣyaistānhaṃtuṃ dhanurādade || 43 ||
[Analyze grammar]

mṛgadasyubhayādibhyo bahudhā rakṣitā mayā |
te māmevopaśikṣaṃti mayā dattapratigrahāḥ || 44 ||
[Analyze grammar]

ete māṃ na vijānaṃti kṛtaghnā bhūrimāninaḥ |
ghnatopi me na doṣaḥ syādetānvai hyātatāyinaḥ || 45 ||
[Analyze grammar]

evaṃ vikruddhamānaḥ sañcharānmuṃcañccharāsanāt |
tānvidrutānanudrutya jaghne śiṣyaśatatrayam || 46 ||
[Analyze grammar]

dudruvurbhayataḥ sarve vihāyā'śramamañjasā |
vidrāviteṣu śiṣyeṣu balādāśramasaṃsthitān || 47 ||
[Analyze grammar]

saṃbhārāñjagṛhuḥ śīghraṃ sainikāḥ pāpabuddhayaḥ |
yatheṣṭaṃ bhojanaṃ cakrurnṛpeṇaivānumoditāḥ || 48 ||
[Analyze grammar]

tataḥ senā'vṛto rājā purīmāgāddinātyaye |
kuśaketustataḥ śrutvā tanayasya viceṣṭitam || 49 ||
[Analyze grammar]

purānniryātayāmāsa garhayangarhayansutam |
rājyānarhaṃ kṣamāhīnaṃ svadeśādapi bhūmipa || 50 ||
[Analyze grammar]

pitrā tyaktastato rājā hemakāṃto'tivihvalaḥ |
vanaṃ viveśa gahanaṃ hatyābhiśca supīḍitaḥ || 51 ||
[Analyze grammar]

bahukālamavāsīcca gahvare nirjane vane |
āhāraṃ kalpayāmāsa vyādhadharmamupāśritaḥ || 52 ||
[Analyze grammar]

na kvā'pi sthitimāpede hatyayā'bhidruto bhṛśam |
aṣṭāviṃśativarṣāṇi gatānyasya durātmanaḥ || 53 ||
[Analyze grammar]

tīrthayātrāprasaṃgena trito nāma mahāmuniḥ |
tasminnaraṇye vaiśākhe ravau madhyaṃdine gate || 54 ||
[Analyze grammar]

gacchannātapaviklāṃtastṛṣayā cā'pi pīḍitaḥ |
kvacidvṛkṣavihīne tu pradeśe mūrcchito'bhavat || 55 ||
[Analyze grammar]

daivāddṛṣṭvā hemakāṃtastritaṃ nāma mahāmunim |
tṛṣārtaṃ mūrchitaṃ śrāṃtaṃ kṛpāṃ cakre nṛpādhamaḥ || 56 ||
[Analyze grammar]

brahmapatraistadā chatraṃ kṛtvā cā'tapavāraṇam |
munerjagrāha śirasi hyalābusthaṃ jalaṃ dadau || 57 ||
[Analyze grammar]

labdhasaṃjño'bhavattena hyupacāreṇa vai muniḥ |
patracchatraṃ kṣatradattaṃ gṛhītvā gataviklamaḥ || 58 ||
[Analyze grammar]

grāmaṃ kvacicchanaiḥ prāpya kiñcidāpyāyitendriyaḥ |
tena puṇyaprabhāvena brahmahatyāśatatrayam || 59 ||
[Analyze grammar]

vinaṣṭamabhavattasya kṣaṇādeva mahātmanaḥ |
tato vismayamāpanno hemakānto mahārathaḥ || 60 ||
[Analyze grammar]

bahudhā pīḍyamānasya brahmahatyāḥ kathaṃ gatāḥ |
kenā'pi niṣkṛtā hyetāḥ kva gatāḥ kena hetunā || 61 ||
[Analyze grammar]

ityevaṃ cintayāmāsa brahmahatyāvimocanam |
evaṃ cā'jñasthite rājñi yamadūtā athā'gaman || 62 ||
[Analyze grammar]

netumenaṃ mahātmānaṃ hemakāṃtaṃ vane sthitam |
grahaṇīṃ janayāmāsuḥ prāṇānhartuṃ mahātmanaḥ || 63 ||
[Analyze grammar]

tadā prāṇaviyogārtaḥ puruṣāṃstrīndadarśa ha |
yamadūtānmahāghorānūrdhvakeśānbhayaṃkarān || 64 ||
[Analyze grammar]

cintayānaḥ svakarmāṇi tūṣṇīmāsīttadā nṛpaḥ |
chatradānaprabhāvena jātā viṣṇusmṛtirnṛpa || 65 ||
[Analyze grammar]

tena smṛto mahāviṣṇurviṣvaksena svamaṃtriṇam |
uvāca tūrṇaṃ tvaṃ gaccha yamadūtānnivāraya || 66 ||
[Analyze grammar]

vaiśākhadharmanirataṃ hemakāṃtaṃ tu pālaya |
niṣpāpamenaṃ madbhaktaṃ pitre dehi puraṃ gataḥ || 67 ||
[Analyze grammar]

madīritena vākyena kuśaketuṃ ca bodhaya |
sarvadharmmojjhito vāpi brahmacaryādivarjitaḥ || 68 ||
[Analyze grammar]

vaiśākhadharmanirato matpriyaḥ syānna saṃśayaḥ |
kṛtāgāścā'pi tvatputro munitrāṇaparāyaṇaḥ || 69 ||
[Analyze grammar]

vaiśākhe chatradānena niṣpāpo nā'tra saṃśayaḥ |
tena puṇyaprabhāvena śāṃto dāntaścirāyuṣaḥ || 70 ||
[Analyze grammar]

śauryodāryaguṇopetastvatsamo'yaṃ guṇairapi |
tasmādenaṃ rājyabhāre saṃsthāpaya mahābalam || 71 ||
[Analyze grammar]

viṣṇunaiva samājñaptamityādiśya nṛpottamam |
piturvaṃśe hemakāṃtaṃ sthāpyā'yāhi ca māṃ punaḥ || 72 ||
[Analyze grammar]

ityādiṣṭo bhagavatā viṣvakseno mahābalaḥ |
hemakāntaṃ samāsādya yamadūtānnivārya ca || 73 ||
[Analyze grammar]

pāṇinā śaṃtamenaiva pasparśāṃgeṣu bhūmipam |
bhagavadbhaktasaṃsparśāddhatavyādhiḥ kṣaṇādabhūt || 74 ||
[Analyze grammar]

viṣvaksenastatastena saha tasya purīṃ yayau |
taṃ dṛṣṭvā vismito bhūtvā kuśaketurmahāprabhuḥ || 75 ||
[Analyze grammar]

nanāma śirasā bhaktyā daṇḍavatpatito bhuvi |
gṛhaṃ praveśayāmāsa pārṣadaṃ paramātmanaḥ || 76 ||
[Analyze grammar]

stutvā ca vividhaiḥ stotraiḥ pūjayāmāsa vaibhavaiḥ |
tasmai prītamanāḥ prāha viṣvakseno mahābalaḥ || 77 ||
[Analyze grammar]

hemakāntaṃ samuddiśya yaduktaṃ viṣṇunā purā |
tacchrutvā kuśaketuśca putraṃ rājye niveśya ca || 78 ||
[Analyze grammar]

viṣvaksenābhyanujñātaḥ sabhāryo vanamāviśat |
viṣvakseno hemakāntamanumaṃtryābhipūjya ca || 79 ||
[Analyze grammar]

śvetadvīpaṃ yayau dhīmānviṣṇupārśve mahāmanāḥ |
hemakāṃtastato rājā vaiśākhoktāñcchubhāvahāna || 80 ||
[Analyze grammar]

viṣṇuprītikarāndharmānprativarṣaṃ cakāra ha |
brahmaṇyo dharmamārgasthaḥ śānto dānto jitendriyaḥ || 81 ||
[Analyze grammar]

dayāluḥ sarvabhūteṣu sarvayajñeṣu dīkṣitaḥ |
pravṛddhaḥ sarvasampadbhiḥ putrapautrādibhirvṛtaḥ || 82 ||
[Analyze grammar]

bhuktvā bhogānsamastāṃśca viṣṇulokamavāptavān || 83 ||
[Analyze grammar]

nekṣe tu vaiśākhasamāṃśca dharmānsukhaprayatnānbahupuṇyahetūn |
pāpendhanādyagninibhānsulabhyāndharmādimokṣāntapumarthahetūn || 84 ||
[Analyze grammar]

iti śrīskānde mahāpurāṇa ekāśīti sāhasryāṃ saṃhitāyāṃ dvitīye vaiṣṇavakhaṃḍe vaiśākhamāsamāhātmye nāradāmbarīṣasaṃvāde chatradānapraśaṃsane hemakāṃtasya brahmahatyādi pāpaśamanavarṇanaṃ nāma daśamo'dhyāyaḥ || 10 ||
[Analyze grammar]