Chapter 8

[English text for this chapter is available]

maithila uvāca |
brahmannikṣvākutanayo jalā'dānācca cātakaḥ |
trivāramabhavatpaścānmadgṛhe godhikā tathā || 1 ||
[Analyze grammar]

karmānuguṇametaddhi yuktaṃ tasyākṛtātmanaḥ |
satāmasevanāttasya gṛdhratvaṃ sārameyatā || 2 ||
[Analyze grammar]

saptavāramiti proktaṃ tanme bhāti ca nocitam |
saṃto na dūṣitāstena na tathā kṛpaṇā api || 3 ||
[Analyze grammar]

tasmādasevinastasya phalā'bhāvo bhaveddhruvam |
nānarthakaraṇābhāvādidaṃ hi parapīḍanam || 4 ||
[Analyze grammar]

animittamidaṃ kasmātkuyonitvamavāptavān |
tadetaṃ saṃśayaṃ chiṃdhi śiṣyasyā'tmapriyasya ca || 5 ||
[Analyze grammar]

iti rājñā susaṃpṛṣṭaḥ śrutadevo mahāyaśāḥ |
sādhusādhviti saṃbhāṣya vaco vyāhartumādadhe || 6 ||
[Analyze grammar]

śrutadeva uvāca |
śṛṇu rājanpravakṣyāmi yatpṛṣṭaṃ tu tvayā'nagha |
śivāyai ca śivenoktaṃ kailāsaśikhare'male || 7 ||
[Analyze grammar]

sṛṣṭvemānsakalāṃllokānpaścātteṣāmavasthitim |
āmuṣmikīmaihikīṃ ca dvividhāṃ paryakalpayat || 8 ||
[Analyze grammar]

hetutrayaṃ ca pratyekaṃ hetusthityai mahāprabhuḥ |
jalasevā cānnasevā sevā caivauṣadhasya ca || 9 ||
[Analyze grammar]

yatra caite mahābhāga hyaihikasthiti hetavaḥ |
evamāmuṣmike rājaṃstraya everitāḥ śrutau || 10 ||
[Analyze grammar]

sādhusevā viṣṇusevā sevā dharmapathasya ca |
purā sampāditā hyete paralokasya hetavaḥ || 11 ||
[Analyze grammar]

gṛhe saṃpāditaṃ yadvatpātheyaṃ paddhatau yathā |
aihikā hetavo rājansadyaḥ saṃ pāditārthadāḥ || 12 ||
[Analyze grammar]

kiṃ ceṣṭamapi sādhūnāṃ manaso yadi dussaham |
kutaścitkāraṇādrājaṃstaccānarthāya kalpate || 13 ||
[Analyze grammar]

apriyaṃ kimu vaktavyaṃ duḥkhaheturiti sphuṭam |
atraivodāharantīmamitihāsaṃ purātanam || 14 ||
[Analyze grammar]

pāpaghnaṃ mahadāścaryaṃ śṛṇvatāṃ romaharṣaṇam |
yajñadīkṣāmupagataḥ purā dakṣaḥ prajāpatiḥ || 15 ||
[Analyze grammar]

āhvānārthaṃ bhūtapateragamadrajatācalam |
taṃ dṛṣṭvā notthitaḥ śaṃbhustasyaiva hitakāmyayā || 16 ||
[Analyze grammar]

sarvāmaraguruścā'haṃ chandogamyaḥ sanātanaḥ |
bhṛtyā hyete baliharāścandrendrādyāḥ sureśvarāḥ || 17 ||
[Analyze grammar]

svāmī bhṛtyāya nottiṣṭhetsvabhāryāyai patistathā |
guruḥ śiṣyāya nottiṣṭhediti śāstravidāṃ matam || 18 ||
[Analyze grammar]

na saṃbandho gurutve ca kāraṇaṃ tviti vai śrutiḥ |
balaṃ jñānaṃ tapaḥ śāṃtiryatra caivā'dhikaṃ bhavet || 19 ||
[Analyze grammar]

sa guruścetareṣāṃ ca nīcā īyuśca preṣyatām |
uttiṣṭhanti ca svāmyādyā bhṛtyādīnyadi cā'grahāt || 20 ||
[Analyze grammar]

āyurvittaṃ yaśasteṣāṃ sadyo naśyati santatiḥ |
tasmādahaṃ tu nottiṣṭhe priyo'yaṃ śvaśuro mama || 21 ||
[Analyze grammar]

iti tasya hitānveṣī noccacālā'sanādvibhuḥ |
notthitaṃ tu mṛḍaṃ dṛṣṭvā kupito'bhūtprajāpatiḥ || 22 ||
[Analyze grammar]

aniṃdadbahudhā tasmai purato girijāpateḥ |
aho darpamaho darpaṃ daridrasyā'kṛtātmanaḥ || 23 ||
[Analyze grammar]

yasya vittaṃ bahuvayā vṛṣaścarmāvaśeṣitaḥ |
ata eva kapālāsthidharaḥ pākhaṇḍagocaraḥ || 24 ||
[Analyze grammar]

vṛthā'haṃkāriṇo daivaṃ kuto dāsyati maṃgalam |
loke kṛtyena karmāṇi śucīnīti vido viduḥ || 25 ||
[Analyze grammar]

dhatte daridraḥ śītārtaḥ pavitraṃ ca gajājinam |
veśma śmaśānaṃ yasya syādbhujaṃgaḥ kila bhūṣaṇam || 26 ||
[Analyze grammar]

na dhīratā'pi ca jñānaṃ vṛkāttasmātpalāyite |
bhūtapretapiśācādi durjanaiḥ saṃgato'niśam || 27 ||
[Analyze grammar]

na kulaṃ śrūyate kvā'pi nā'sau vai sādhusa mmataḥ |
vṛthā viśraṃbhitaḥ pūrvaṃ nāradena durātmanā || 28 ||
[Analyze grammar]

yenā'haṃ bodhitaḥ prādāṃ kanyāṃ caitāṃ satīṃ mama |
pṛthagdharmagatā caiṣā sukhaṃ vasatu tadgṛhe || 29 ||
[Analyze grammar]

nāsmābhiḥ ślāghanīyo'sau matsutā'pi kathaṃcana |
yathā kulālakalaśaścaṃḍālasya vaśaṃ gataḥ || 30 ||
[Analyze grammar]

iti dakṣo vimūḍhātmā hyumāṃ nāhūya taṃ mṛḍam |
bahudhā taṃ vinirbhartsya tūṣṇīmeva gṛhaṃ yayau || 31 ||
[Analyze grammar]

yajñavāṭaṃ tato gatvā ṛtvigbhirmunibhiḥ saha |
īje yajñavidhānena niṃdanneva mahāprabhum || 32 ||
[Analyze grammar]

brahmaviṣṇū vihāyaiva sarve devāḥ samāgatāḥ |
siddhacāraṇagandharvā yakṣarākṣasakinnarāḥ || 33 ||
[Analyze grammar]

tadā devī satī puṇyā strīcāñcalyātpralobhitā |
utsukā cotsavaṃ draṣṭuṃ bandhūṃstatra samāgatān || 34 ||
[Analyze grammar]

nivāryamāṇā rudreṇa taralā strīsvabhāvataḥ |
pratyuktā'pi punaścaiva gantavyamiti niścitā || 35 ||
[Analyze grammar]

sa nindati sabhāmadhye sadā māṃ varavarṇini |
taccāsahyaṃ ca tvaṃ śrutvā kāyaṃ satyaṃ prahāsyasi || 36 ||
[Analyze grammar]

asahyamapi soḍhavyaṃ mayā'pi gṛhamicchatā |
mayā yathā kṛtaṃ devi tathā tvaṃ naiva vartase || 37 ||
[Analyze grammar]

tasmānmā gaccha śālāṃ vai na śubhaṃ tu bhaveddhruvam |
ityevaṃ bodhitā devī cāpalyaṃ punarāgamat || 38 ||
[Analyze grammar]

niścakrāma satī gehādekākī pādacāriṇī |
tāṃ dṛṣṭvā vṛṣabhastūṣṇīṃ pṛṣṭhe devīmuvāha saḥ || 39 ||
[Analyze grammar]

koṭiśo bhūtasaṃghāśca hyanujagmuḥ satīṃ tadā |
yajñavāṭaṃ tu sā gatvā patnīśālāṃ yayau purā || 40 ||
[Analyze grammar]

tūṣṇīmāsa satīṃ dṛṣṭvā khedāttasmādvinirgatā |
pativākyaṃ tu saṃsmṛtya jagāmottaravedikām || 41 ||
[Analyze grammar]

pitā sabhyāśca tāṃ dṛṣṭvā sthitāstūṣṇīṃ hatāśiṣaḥ |
sā rudrāhutiparyaṃtaṃ paśyantī pitṛceṣṭitam |
tyaktvā rudraṃ ca juhvaṃtamuvācā'śrukulekṣaṇā || 42 ||
[Analyze grammar]

devyuvāca |
mahadullaṃghanaṃ puṃsāṃ na prāyaḥ śreyase bhavet |
lokakartā lokabhartā sarveṣāṃ prabhuravyayaḥ || 43 ||
[Analyze grammar]

evaṃbhūtasya rudrasya kathaṃ no dīyate haviḥ |
jātāṃ na kiṃ te durbuddhiṃ haraṃtyanye samāgatāḥ || 44 ||
[Analyze grammar]

na cedṛśā mahātmānaḥ kimeṣāṃ vimukho vidhiḥ || 45 ||
[Analyze grammar]

ityevaṃ bhāṣamāṇāṃ tāṃ pūṣā devo jahāsa ha |
śmaśrūṇāṃ cālanaṃ cakre bhṛgurhataśubhastathā || 46 ||
[Analyze grammar]

bhujapādorukakṣā ṇāṃ sphālanaṃ cakrire pare |
bahudhā nindanaṃ cakre tatpitā hatabhāgyavān || 47 ||
[Analyze grammar]

tacchrutvā rudrabhāryā sā kopākulitamānasā |
prāyaścittaṃ śruteḥ kartuṃ dehaṃ tatyāja sā satī |
homāgnau vedikāmadhye sarveṣāmeva paśyatām || 48 ||
[Analyze grammar]

hāhākāro mahānāsīddudruvuḥ pramathā drutam |
ācakhyurdevadevāya vṛttāntamakhilaṃ tadā || 49 ||
[Analyze grammar]

tacchrutvā sahasotthāya rudraḥ kālāṃtakopamaḥ |
jaṭāmutpāṭya hastena bhūtale tāmatāḍayat || 50 ||
[Analyze grammar]

tato'bhavanmahākāyo vīrabhadro mahābalaḥ |
sahasrabāhurabhavatkālāṃtakasamaprabhaḥ || 51 ||
[Analyze grammar]

baddhāṃjalipuṭo bhūtvā vyājahāra haraṃ tadā |
matsṛṣṭistu yadarthaṃ te tadarthaṃ mā niyojaya || 52 ||
[Analyze grammar]

ityuktaḥ prāha taṃ kruddho dhūrjaṭiśca puraḥ sthitam || 53 ||
[Analyze grammar]

hana tvaṃ nindakaṃ dakṣaṃ yadarthe matpriyā hatā |
bhūtasaṃghāstu gacchantu sahaitena mahābalāḥ || 54 ||
[Analyze grammar]

ityādiṣṭā bhagavatā yayuryajñasabhāṃ tadā |
jaghnuḥ sarvānmahāvīrāndevāsuranarādikān || 55 ||
[Analyze grammar]

pūṣṇaśca hasato daṃtāñjaṭābhūśca babhañja ha |
śmaśrūṇyutpāṭayāṃcakre bhṛgostasya durātmanaḥ || 56 ||
[Analyze grammar]

yadyadāsphālitaṃ pūrvaṃ tattacciccheda vīryavān |
tato dakṣaśiro hartuṃ bahūdyogaṃ cakāra ha || 57 ||
[Analyze grammar]

munimaṃtrapraguptaṃ tu naiva kṛṃtati tadbalāt |
haro jñātvā tu ciccheda svayametya durātmanaḥ || 58 ||
[Analyze grammar]

evaṃ makhagatānhatvā sā'nugaḥ svālayaṃ yayau |
hatāvaśiṣṭāḥ kecittu brahmāṇaṃ śaraṇaṃ yayuḥ || 59 ||
[Analyze grammar]

tairanvito yayau brahmā kailāsaṃ tu śivālayam |
tato rudraṃ sāntvayitvā vacobhirvividhairapi || 60 ||
[Analyze grammar]

tenaiva sahitaḥ prāgādyajñavāṭaṃ mahāprabhuḥ |
tenaivojjīvayāmāsa sarvānyajñasamāgatān || 61 ||
[Analyze grammar]

khyātyai prādādajamukhaṃ dakṣasya tu tadā śivaḥ |
ajaśmaśrūṇyadācchaṃbhurbhṛgave tu mahātmane || 62 ||
[Analyze grammar]

pūṣṇaśca daṃtānna prādātpiṣṭādaṃ ca cakāra ha |
tadaṅgānāṃ vyatikaraṃ keṣāṃcidapi vai śivaḥ || 63 ||
[Analyze grammar]

śivamāpuśca te sarve brahmaṇā ca śivena ca |
punaḥ pravartito yajño yathāpūrvaṃ mahātmanaḥ || 64 ||
[Analyze grammar]

yajñānte sarvadevāśca jagmuste svasvamālayam |
naiṣṭhikaṃ brahmacaryaṃ tu kṛtvā rudro mahātapāḥ || 65 ||
[Analyze grammar]

tepe gaṃgātaṭe rudraḥ punnāgatarumūlagaḥ |
dakṣātmajā satī devī tyaktadehā pativratā || 66 ||
[Analyze grammar]

jajñe himādrermenakyāṃ vavṛdhe tasya veśmani |
etasminneva kāle tu tārakākhyo mahāsuraḥ || 67 ||
[Analyze grammar]

sa tīvratapasā'rādhya brahmāṇaṃ parameṣṭhinam |
avadhyatvaṃ varaṃ vavre devāsuranaroragaiḥ || 68 ||
[Analyze grammar]

āyudhairastrasaṃghaiśca sarvaireva mahābalaiḥ |
rudraputraṃ vinā daitya hyavadhyaḥ sakalairapi || 69 ||
[Analyze grammar]

iti tasmai varaṃ prādādbrahmā lokapitāmahaḥ |
astrīkatvādaputratvādrudrasyeti tathāstviti || 70 ||
[Analyze grammar]

varaṃ gṛhītvā svagṛhaṃ prāpya lokānbabādha ha |
dāsā devā mārjanādau dāsyo devyaśca tadgṛhe || 71 ||
[Analyze grammar]

tatastatpīḍitā devā brahmāṇaṃ śaraṇaṃ yayuḥ |
taiḥ pīḍāṃ varṇitāṃ śrutvā vedhāḥ prāha surānidam || 72 ||
[Analyze grammar]

varapradānakāle'haṃ rudraputraṃ vinā surāḥ |
nakhyaivadhya iti prādāṃ varaṃ tasmai durātmane || 73 ||
[Analyze grammar]

purā satī rudrapatnī satre tyaktakalevarā |
jātā himavataḥ putrī pārvatīti ca yāṃ viduḥ || 74 ||
[Analyze grammar]

rudro himavataḥ pṛṣṭhe tapaścarati duścaram |
yojayadhvaṃ ca pārvatyā rudraṃ lokeśvaraṃ prabhum || 75 ||
[Analyze grammar]

punardevendrasadane saṃgatairamareśvaraiḥ |
dhiṣaṇenā'pi sammaṃtrya deveṃdraḥ pākaśāsanaḥ || 76 ||
[Analyze grammar]

sasmāra ca sa kāryārthaṃ nāradaṃ smarameva ca |
tatrā'gatau tatastau tu balabhidvākyamabravīt || 77 ||
[Analyze grammar]

himavantaṃ bhavāngatvā vacasā taṃ nibodhaya |
putrī tava prāgdakṣasya harapatnī sutā satī || 78 ||
[Analyze grammar]

tapaścarati te śṛṃge viyuktā daśakanyayā |
mṛḍastasya saparyāyai viniyojaya tatpriyām || 79 ||
[Analyze grammar]

tasyaiva patnī bhavitā sa eva bhavitā patiḥ |
ityā'diṣṭo maghonā ca nāradopetya taṃ girim || 80 ||
[Analyze grammar]

tathaiva kārayāmāsa devendreṇoditaṃ yathā |
paścātkāmaṃ samāhūya maghavānida māha ca || 81 ||
[Analyze grammar]

devānāṃ ca hitārthāya tathā mṛḍahitāya ca |
vasantena samāyukto gatvā rudratapovanam || 82 ||
[Analyze grammar]

guṇānvijṛmbha yitvā tu vāsaṃ tānhṛcchayāvahān |
yadā sannihitā devī pārvatī tu mṛḍasya ca || 83 ||
[Analyze grammar]

tadā prayujya tvaṃ vāṇānmohayasva mahāprabhum |
tayostu saṃgame jāte kāryaṃ no'ddhā bhaviṣyati || 84 ||
[Analyze grammar]

ityādiṣṭaḥ smarastūrṇaṃ pratasthe bāḍhamityatha |
savasaṃtaḥ saratikaḥ sānugastadvanaṃ yayau || 85 ||
[Analyze grammar]

akāle tu vasaṃtartuṃ jṛṃbhayitvā svaśaktitaḥ |
tadvane sarvato ramye mandā'nilaniṣevite || 86 ||
[Analyze grammar]

kadāciddevadevo'pi pārvatyāśca saparyayā |
prītaḥ svāṅkaṃ samāropya kiṃcidvyāhartumārabhat || 87 ||
[Analyze grammar]

prāṇapriyā saṅgamasya kālo'yamiti niścitaḥ |
peśalaṃ dhanurādāya sa tasthau harapṛṣṭhataḥ || 88 ||
[Analyze grammar]

kṛtvā javanikāṃ vṛkṣaṃ bāṇamekaṃ mumoca ha |
dvitīyamapi saṃdhāya cakre moktuṃ mahodyamam || 89 ||
[Analyze grammar]

atha kṣubdhamanā bhūtvā mṛḍaściṃtāmavāpa ha |
na me manaścaletkvāpi kena vā kaśmalīkṛtam || 90 ||
[Analyze grammar]

iti cintākulo vāme pārśve kāmaṃ dadarśa ha |
kruddhonmīlya lalāṭākṣaṃ svāṅkāddevīmapāsya ca || 91 ||
[Analyze grammar]

tasyākṣṇaḥ samabhūdagnistīkṣṇo lokavibhīṣaṇaḥ |
tena dagdho'bhavatsadyo manmathaḥ saśarāsanaḥ || 92 ||
[Analyze grammar]

kāryasiddhiṃ ca paśyaṃto dudruvuścāmarā divam |
śaṃkamānāḥ svadaṇḍaṃ ca vasanto ratireva ca || 93 ||
[Analyze grammar]

nimīlya locane bhītā devī dūraṃ pradudruve |
sannidhānaṃ striyo hartuṃ mṛḍopyaṃtaradhīyata || 94 ||
[Analyze grammar]

rudrasyeṣṭaṃ prakurvāṇo devaśca manaso hitam |
lebhe'narthamanirvṛttaṃ vipriyaṃ kurvatastu kim || 95 ||
[Analyze grammar]

tasmādikṣvākutanayaḥ sādhūnāmapriyaḥ sadā |
tasmādātmahitāṃ sevāṃ nā'karonmandadhīḥ satām || 96 ||
[Analyze grammar]

anubhūtaṃ mahadduḥkhaṃ tasmādduryonireva ca |
tasmātkuryāttu sādhūnāṃ sevāṃ sarvārthasādhinīm || 97 ||
[Analyze grammar]

rudrasyā'priyakāritvātsmaro bhāvini janmani |
duḥkhaṃ tu bahulaṃ lebhe janmakāle mahāprabhuḥ || 98 ||
[Analyze grammar]

itihāsamimaṃ puṇyaṃ ye śṛṇvanti divāniśam |
janmamṛtyujarādibhyo mucyaṃtenā'tra saṃśayaḥ || 99 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe vaiśākhamāsamāhātmye nāradāmbarīṣasaṃvāde dākṣāyaṇyapamāne dakṣayajñavidhvaṃsapūrvakapārvatī janmādikāmadahanavarṇanaṃnāmāṣṭamo'dhyāyaḥ || 8 ||
[Analyze grammar]