Chapter 7

[English text for this chapter is available]

nārada uvāca |
rājā tadadbhutaṃ dṛṣṭvā maithilo dharmavittamaḥ |
kṛtāñjaliḥ sukhāsīnaṃ vismito vākyamabravīt || 1 ||
[Analyze grammar]

maithila uvāca |
dṛṣṭametanmahāścaryaṃ sādhūnāṃ caritaṃ tathā |
yena dharmeṇa mukto'bhūdrājā cekṣvākunandanaḥ || 2 ||
[Analyze grammar]

taṃ dharmaṃ vistareṇaiva śrotuṃ kautūhalaṃ hi me |
mahyaṃ śraddhāvate vidvatkṛpayā vistarādvada || 3 ||
[Analyze grammar]

iti rājñā susaṃpṛṣṭaḥ śrutadevo mahāmanāḥ |
sādhusādhviti saṃbhāṣya vyājahāra nṛpottamam || 4 ||
[Analyze grammar]

śrutadeva uvāca |
samyagvyavasitā buddhistava rājarṣisattama |
vāsudevapriyāndharmāñchrotuṃ yasmānmatistava || 5 ||
[Analyze grammar]

bahujanmārjitaṃ puṇyaṃ vinā kasyāpi dehinaḥ |
vāsudevakathālāpe matinaivopajāyate || 6 ||
[Analyze grammar]

yūne rājādhirājāya jāteyaṃ matirīdṛśī |
śuddhaṃ bhāgavataṃ manye tena tvāṃ sādhusattamam || 7 ||
[Analyze grammar]

tasmāttubhyaṃ bruve saumya dharmānbhāgavatāñcchubhān |
yāñjñātvā mucyate jaṃturjanmasaṃsārabandhanāt || 8 ||
[Analyze grammar]

yathā śaucaṃ yathā snānaṃ yathā sandhyā ca tarpaṇam |
agnihotraṃ yathā śrāddhaṃ tathā vaiśākhasatkriyāḥ || 9 ||
[Analyze grammar]

vaiśākhe mādhave dharmānakṛtvā nordhvago bhavet |
na vaiśākhasamo dharmo dharmajāteṣu vidyate || 10 ||
[Analyze grammar]

saṃtyeva bahavo dharmāḥ prajāścārājakā iva |
upadravaiśca lupyaṃti nātra kāryā vicāraṇā || 11 ||
[Analyze grammar]

sulabhāḥ sakalā dharmāḥ kartuṃ vaiśākhacoditāḥ |
udakumbhaṃ prapādānaṃ pathicchāyādinirmitiḥ || 12 ||
[Analyze grammar]

upānatpādukādānaṃ chatravyajanayostathā |
tilayuktamadhordānaṃ gorasānāṃ śramāpaham || 13 ||
[Analyze grammar]

vāpīkūpataḍāgādikaraṇaṃ pathikāśrayam |
nārikelekṣukarpūrakastūrīdānameva ca || 14 ||
[Analyze grammar]

gandhānulepanaṃ śayyā khaṭvā dānaṃ tathaiva ca |
tathā cūtaphalaṃ ramyamurvāruka rasāyanam || 15 ||
[Analyze grammar]

dānaṃ damanapuṣpāṇāṃ tathā sāyaṃ guḍodakam |
citrāṇyannāni pūrṇāyāṃ dadhyannaṃ pratyahaṃ tathā || 16 ||
[Analyze grammar]

tāṃbūlasya sadā dānaṃ caitradarśe karīrakam |
ravāvanudite sūrye prātaḥ snānaṃ dinedine || 17 ||
[Analyze grammar]

madhusūdanapūjā ca kathāyāḥ śravaṇaṃ tathā |
abhyaṃgavarjane caiva tathā vai patrabhojanam || 18 ||
[Analyze grammar]

madhyemadhye śramārtānāṃ vījanaṃ vyajanena ca |
sugaṃdhaiḥ komalaiḥ puṣpaiḥ pratyahaṃ pūjanaṃ hareḥ || 19 ||
[Analyze grammar]

phalaṃ dadhyanna naivedyaṃ dhūpadīpau dinedine |
gogrāsaṃ vṛṣapatnīnāṃ dvijapādāvanejanam || 20 ||
[Analyze grammar]

guḍanāgaradānaṃ ca dhātrīpiṣṭapradāpanam |
pathikānāṃ praśrayaṃ ca dānaṃ tandula śākayoḥ |
ete dharmāḥ praśastā hi vaiśākhe mādhavapriye || 21 ||
[Analyze grammar]

tathā ca viṣṇauḥ kusumārpaṇaṃ hareḥ pūjā ca kālocita pallavādyaiḥ |
dadhyannanaivedyanivedanaṃ ca samastapāpaugha vināśahetuḥ || 22 ||
[Analyze grammar]

nārī puṣpairmādhavaṃ nārcayedyā kālotpannairmandire vā gṛhe vā |
putraṃ saukhyaṃ kvā'pi nāpnoti haṃti cāyurbhartuḥ svātmano vā mahātman || 23 ||
[Analyze grammar]

ramāsahāye mādhave māsi viṣṇau parīkṣāyai dharmasetoḥ prajānām |
gṛhaṃ yāte munibhirdaivataiśca kāle puṣpairnārcayedyastu mūḍhaḥ || 24 ||
[Analyze grammar]

sa mūḍhātmā rauravaṃ prāpya paścādyāyādyoniṃ rākṣasīṃ pañcavāram |
jalaṃ cānnaṃ sarvadā deyamasminkṣudhārtānāṃ prāṇināṃ prāṇahetuḥ || 25 ||
[Analyze grammar]

tiryagjaṃturjāyate vāryadānādannādānājjāyate vai piśācaḥ |
annādāne cānubhūtāṃ kathāṃ te hyahaṃ vakṣye cādbhutāṃ bhūmipāla || 26 ||
[Analyze grammar]

revātīre matpitā'bhūtpiśācaḥ svamāṃsāśī kṣuttṛṣāśrāṃtagātraḥ |
chāyāhīne śālmalīvṛkṣamūle hyannābhāvānnaṣṭacaitanya eṣaḥ || 27 ||
[Analyze grammar]

kṣudhā tṛṣā karmaṇā yasya bahvī sūkṣmaṃ chidraṃ kaṇṭhanālasya cā'sīt |
māṃsaṃ cāntaḥkaṇṭhamadhye niṣaṇṇaṃ kuryātpīḍāṃ prāṇaparyantameva || 28 ||
[Analyze grammar]

jalaṃ dṛṣṭvā kālakūṭaprakalpaṃ kaupyaṃ śītaṃ vā'pi kāsārasaṃstham |
tasyāstīre cāgataṃ daivayogādgaṅgāyātrākāraṇānmārgamadhye || 29 ||
[Analyze grammar]

dṛṣṭvā'dbhutaṃ śālmalī vṛkṣamūle truṭavā truṭvā bhakṣayantaṃ svamāṃsam |
krośantaṃ taṃ bahudhā śocamānaṃ kṣudhātṛṣāvyādhitaṃ karmabhiḥ svaiḥ || 30 ||
[Analyze grammar]

sa māṃ hantuṃ prādravatpāpakarmā mattejasā nihato dudruve ca |
taṃ cā'bravaṃ kṛpayā klinnacitto mā bhaiṣṭa tvaṃ hyabhayaṃ me hi dattam || 31 ||
[Analyze grammar]

kastvaṃ tāta brūhi sadyo'tra hetuṃ kṛcchrādasmānmocaye mā viṣīda |
ityukto māṃ prāha putraṃ tvajānanpurānarte bhūvarākhye pure ca || 32 ||
[Analyze grammar]

nāmnā maitraḥ sāṃkṛtergotrajo'haṃ tapovidyādānayajñādiniṣṭhaḥ |
mayā'dhītādhyāpitāḥ sarvavidyāḥ kṛto mayā sarvatīrthā'vagāhaḥ || 33 ||
[Analyze grammar]

dattaṃ nā'nnaṃ māsi vaiśākhasaṃjñe lobhādbhikṣāmātramapyeva kāle |
śoce cā'haṃ prāpya paiśācayoniṃ nā'nyo hetuḥ satyamevoktamaṅga || 34 ||
[Analyze grammar]

putro'dhunā vartate madgṛhe ca bhūrikhyātiḥ śrutadevā'bhidhānaḥ |
vācyā tasmai maddaśā cā'tmajāya vaiśākhānnādānato'bhūtpiśācaḥ || 35 ||
[Analyze grammar]

dṛṣṭastīre te pitā narmadāyā nordhvaṃ gato vartate vṛkṣamūle |
khādanmāṃsaṃ svīyamevā'nvakhidyatpiturmuktyai māsi vaiśākhasaṃjñe || 36 ||
[Analyze grammar]

prātaḥ snātvā pūjayitvā ca viṣṇuṃ nirvyājānmāṃ tarpayitvā jalaiśca |
deyaṃ cā'nnaṃ dvijavarye guṇāḍhye mukto yo vai yāti viṣṇoḥ padaṃ ca || 37 ||
[Analyze grammar]

itthaṃ coktaṃ tvatpurastādvadeti dayā caiṣā matkṛte nā'tra śaṃkā |
bhadraṃ bhūyātsarvato maṃgalaṃ te śrutvā cā'haṃ bhāṣitaṃ me pituśca || 38 ||
[Analyze grammar]

duḥkhātkāyaṃ daṃḍavatpātayitvā bhṛśārto'haṃ pādayorbhūrikālam |
nidannidanbhūryahaṃ bāṣpanetraḥ putro'haṃ te tāta daivā'gato'ham || 39 ||
[Analyze grammar]

karmabhraṣṭo bhūsurāṇāṃ vinindyo nā'bhūdyasmātkleśamokṣaḥ pitṝṇām |
ākhyāhi tvaṃ karmaṇā kena mukto bhavitā vai tatkaromi dvijeṃdra || 40 ||
[Analyze grammar]

tataḥ prāha prītasarvāntarātmā yātrāṃ kṛtvā śīghramāgatya geham |
prāpte māse meṣasaṃsthe ca bhānau nivedyā'nnaṃ viṣṇave tvaṃ guṇāḍhyam || 41 ||
[Analyze grammar]

dānaṃ dehi dvijavarye mahātmaṃstasmānmokṣo bhavitā sānvayasya |
pitrā'diṣṭaḥ kṛtayātraḥ svagehe prāpyā'karaṃ mādhave cā'nnadānam || 42 ||
[Analyze grammar]

tasmānmukto matpitā māṃ sametya yānārūḍho hyabhinaṃdyā'śiṣā ca |
gato lokaṃ śrīpaterdurvibhāvyaṃ yasmingatā na nivartaṃti bhūyaḥ || 43 ||
[Analyze grammar]

tasmāddānaṃ sarvaśāstreṣu coktaṃ tubhyaṃ proktaṃ dharmasāraṃ sudharmyam |
kimanyatte śrotumicchā vadasva śrutvā sarvaṃ te vadāmīti satyam || 44 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe vaiśākhamāsamāhātmye nāradāmbarīṣasaṃvāde piśācamokṣaprāptirnāma saptamo'dhyāyaḥ || 7 ||
[Analyze grammar]