Chapter 2

[English text for this chapter is available]

nārada uvāca |
na mādhavasamo māso na kṛtena yugaṃ samam |
na ca vedasamaṃ śāstraṃ na tīrthaṃ gaṃgayā samam || 1 ||
[Analyze grammar]

na jalena samaṃ dānaṃ na sukhaṃ bhāryayā samam |
na kṛṣestu samaṃ vittaṃ na lābho jīvitātparaḥ || 2 ||
[Analyze grammar]

na tapo'naśanāttulyaṃ na dānātparamaṃ sukham |
na dharmastu dayātulyo na jyotiścakṣuṣā samam || 3 ||
[Analyze grammar]

na tṛptiraśanāttulyā na vāṇijyaṃ kṛṣeḥ samam |
na dharmeṇa samaṃ mitraṃ na satyena samaṃ yaśaḥ || 4 ||
[Analyze grammar]

nārogyasamamutthānaṃ na trātā keśavātparaḥ |
na mādhavasamaṃ loke pavitraṃ kavayo viduḥ || 5 ||
[Analyze grammar]

mādhavaḥ paramo māsaḥ śeṣaśāyipriyaḥ sadā |
avratena kṣipedyastu māsaṃ mādhavavallabham || 6 ||
[Analyze grammar]

tiryagyoniṃ sa yātyāśu sarvadharmabahiṣkṛtaḥ |
avratena gato yeṣāṃ mādhavo martyadharmiṇām || 7 ||
[Analyze grammar]

iṣṭāpūrte vṛthā teṣāṃ dharmodharmabhṛtāṃ varaḥ |
pravṛttānāṃ tu bhakṣyāṇāṃ mādhave'niyame kṛte || 8 ||
[Analyze grammar]

avaśyaṃ viṣṇusāyujyaṃ prāpnotyeva na saṃśayaḥ |
saṃtīha bahuvittāni vratāni vividhāni ca || 9 ||
[Analyze grammar]

dehā'yāsakarāṇyeva punarjanmapradāni ca |
vaiśākhasnānamātreṇa na punarjāyate bhuvi || 10 ||
[Analyze grammar]

sarva dāneṣu yatpuṇyaṃ sarvatīrtheṣu yatphalam |
tatphalaṃ samavāpnoti mādhave jaladānataḥ || 11 ||
[Analyze grammar]

jaladānāsamarthena parasyāpi prabodhanam |
kartavyaṃ bhūtikāmena sarvadānādhikaṃ hitam || 12 ||
[Analyze grammar]

ekataḥ sarvadānāni jaladānaṃ hi caikataḥ |
tulāmāropitaṃ pūrvaṃ jaladānaṃ viśiṣyate || 13 ||
[Analyze grammar]

mārge'dhvagānāṃ yo martyaḥ prapādānaṃ karoti hi |
sa koṭikulamuddhṛtya viṣṇuloke mahīyate || 14 ||
[Analyze grammar]

devānāṃ ca pitṝṇāṃ ca ṛṣīṇāṃ rājasattama |
atyaṃta prītidaṃ satyaṃ prapādānaṃ na saṃśayaḥ || 15 ||
[Analyze grammar]

prapādānena saṃtuṣṭā yenā'dhvaśramakarṣitāḥ |
toṣitāstena devāśca brahmaviṣṇuśivādaya || 16 ||
[Analyze grammar]

salilaṃ salilecchūnāṃ chatraṃ chāyāmapīcchatām |
vyajanaṃ vyajanecchūnā vaiśākhe māsi bhūmipa || 17 ||
[Analyze grammar]

jalaṃ chatraṃ ca vyajanaṃ dānaṃ yeṣāṃ viśiṣyate |
mādhave māsi saṃprāpte brāhmaṇāya kuṭumbine || 18 ||
[Analyze grammar]

adattvodakakumbhaṃ ca cātako jāyate bhuvi || 19 ||
[Analyze grammar]

yo dadyācchītalaṃ toyaṃ tṛṣārtāya mahātmane |
tāvanmātreṇa rājeṃdra rājasūyāyutaṃ labhet || 20 ||
[Analyze grammar]

gharmaśramārtaviprāya vījayedvyajanena yaḥ |
tāvanmātreṇa niṣpāpo vihagādhipatirbhaveta || 21 ||
[Analyze grammar]

adattvā vyajanaṃ bhūpa vaiśākhe tu dvijātaye |
vātarogaśatākīrṇo narakāneva viṃdati || 22 ||
[Analyze grammar]

yo vījayetpaṭenā'pi pathi śrāṃtaṃ dvijottamam |
tāvatātha vimukto'sau viṣṇusāyujyamāpnuyāt || 23 ||
[Analyze grammar]

yāstālavyajanaṃ vā'pi dattvā śuddhena cetasā |
vidhūya sarvapāpāni brahmalokaṃ sa gacchati || 24 ||
[Analyze grammar]

sadyaḥ śramaharaṃ puṇyaṃ na dadyādvyajanaṃ naraḥ |
nārakīṃ yātanāṃ bhuktvā kaśmalo jāyate bhuvi || 25 ||
[Analyze grammar]

ādhyātmikādiduḥkhānāṃ śāṃtaye manujeśvara |
chatraṃ dadyātprayatnena vaiśākhe māsi vāsakṛt || 26 ||
[Analyze grammar]

acchatrado naro yastu vaiśākhe mādhavapriye |
chāyāhīno mahākrūraḥ piśāco bhuvi jāyate || 27 ||
[Analyze grammar]

yo dadyātpāduke divye mādhave mādhavapriye |
yamadūtau tiraskṛtya viṣṇulokaṃ sa gacchati || 28 ||
[Analyze grammar]

pādatrāṇaṃ tu yo dadyādvaiśākhe mādhavāgame |
na tasya nārako loko na kleśā aihikāśca ye || 29 ||
[Analyze grammar]

pāduke yācamānāya yo dadyādbrāhmaṇāya ca |
sa bhūpālo bhavedbhūmau koṭijanmasvasaṃśayam || 30 ||
[Analyze grammar]

anāthamaṃḍapaṃ mārge śramahāri karoti yaḥ |
tasya puṇyaphalaṃ vaktuṃ brahmaṇā'pi na śakyate || 31 ||
[Analyze grammar]

madhyāhne brāhmaṇaṃ prāptamatithiṃ bhojayedyadi |
na tasya phalaviśrāṃtirbrahmaṇā'pi nirūpitā || 32 ||
[Analyze grammar]

sadyaḥ svāpyāyanaṃ nṛṇāmannadānaṃ narādhipa |
tasmānnānnena sadṛśaṃ dānaṃ lokeṣu vidyate || 33 ||
[Analyze grammar]

mārgaśrāṃtāya viprāya praśrayaṃ pradadāti yaḥ |
tasya puṇyaphalaṃ vaktuṃ brahmaṇā'pi na śakyate || 34 ||
[Analyze grammar]

dārāpatyagṛhādīni vāso'laṃkārabhūṣaṇam |
asahyaṃ nāśnataḥ puṃsaḥ sahyaṃ bhuktavato dhruvam || 35 ||
[Analyze grammar]

tasmādannasamaṃ dānaṃ na bhūtaṃ na bhaviṣyati |
vaiśākhe yena cādattaṃ mārgaśrāṃte ca bhūsure || 36 ||
[Analyze grammar]

sa piśāco bhavedbhūmau svamāṃsānyeva khādati |
yathāvibhūti dātavyaṃ tasmādannaṃ dvijātaye || 37 ||
[Analyze grammar]

annado mātṛpitrādīnvismārayati bhūmipa |
tasmādannaṃ praśaṃsaṃti lokāstrailokyavartinaḥ || 38 ||
[Analyze grammar]

mātaraḥ pitaraścāpi kevalaṃ janmahetavaḥ |
annadaṃ pitaraṃ loke vadanti ca manīṣiṇaḥ || 39 ||
[Analyze grammar]

annade sarvatīrthāni annade sarvadevatāḥ |
annade sarvadharmāśca tiṣṭhaṃtyaridharājaya || 40 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe vaiśākhamāsamāhātmye nāradāmbarīṣasaṃvāde dānanirūpaṇaṃnāma dvitīyo'dhyāyaḥ || 2 ||
[Analyze grammar]