Chapter 3

[English text for this chapter is available]

śrīsūta uvāca |
athoddhavastu tāndṛṣṭvā kṛṣṇakīrtanatatparān |
satkṛtyātha pariṣvajya parīkṣitamuvāca ha || 1 ||
[Analyze grammar]

uddhava uvāca |
dhanyo'si rājankṛṣṇaikabhaktyā pūrṇo'si nityadā |
yastvaṃ nimagnacitto'si kṛṣṇasaṃkīrtanotsave || 2 ||
[Analyze grammar]

kṛṣṇapatnīṣu vajre ca diṣṭyā prītiḥ pravartitā |
tavocitamidaṃ tāta kṛṣṇadattāṃga vaibhava || 3 ||
[Analyze grammar]

dvārakāstheṣu sarveṣu dhanyā ete na saṃśayaḥ |
yeṣāṃ vrajanivāsāya pārthamādiṣṭavānprabhuḥ || 4 ||
[Analyze grammar]

śrīkṛṣṇasya manaścaṃdro rādhāsyaprabhayānvitaḥ |
tadvihāravanaṃ gobhirmaṇḍayanrocate sadā || 5 ||
[Analyze grammar]

kṛṣṇacandraḥ sadā pūrṇastasya ṣoḍaśa yāḥ kalāḥ |
citsahasraprabhābhinnā atrāste tatsvarūpatā || 6 ||
[Analyze grammar]

evaṃ vajrastu rājendra prapannabhayabhañjakaḥ |
śrīkṛṣṇadakṣiṇe pāde sthānametasya vartate || 7 ||
[Analyze grammar]

avatāre'tra kṛṣṇena yogamāyā'ti bhāvitā |
tadbalenātmavismṛtyā sīdantyete na saṃśayaḥ || 8 ||
[Analyze grammar]

ṛte kṛṣṇaprakāśaṃ tu svātmabodho na kasyacit |
tatprakāśastu jīvānāṃ māyayā pihitaḥ sadā || 9 ||
[Analyze grammar]

aṣṭāviṃśe dvāparānte svayameva yadā hariḥ |
utsārayennijāṃ māyāṃ tatprakāśo bhavettadā || 10 ||
[Analyze grammar]

sa tu kālo vyatikrāṃtastenedamaparaṃ śṛṇu |
anyadā tatprakāśastu śrīmadbhāgavatādbhavet || 11 ||
[Analyze grammar]

śrīmadbhāgavataṃ śāstraṃ yatra bhāgavatairyadā |
kīrtyate śrūyate cāpi śrīkṛṣṇastatra niścitam || 12 ||
[Analyze grammar]

śrīmadbhāgavataṃ yatra ślokaṃ ślokārddhameva ca |
tatrāpi bhagavānkṛṣṇo ballavībhirvirājate || 13 ||
[Analyze grammar]

bhārate mānavaṃ janma prāpya bhāgavataṃ na yaiḥ |
śrutaṃ pāpaparādhīnairātmaghātastu taiḥ kṛtaḥ || 14 ||
[Analyze grammar]

śrīmadbhāgavataṃ śāstraṃ nityaṃ yaiḥ parisevitam |
piturmātuśca bhāryāyāḥ kulapaṃktiḥ sutāritā || 15 ||
[Analyze grammar]

vidyāprakāśo viprāṇāṃ rājāṃ śatrujayo viśām |
dhanaṃ svāsthyaṃ ca śūdrāṇāṃ śrīmadbhāgavatādbhavet || 16 ||
[Analyze grammar]

yoṣitāmapareṣāṃ ca sarvavāṃchitapūraṇam |
ato bhāgavataṃ nityaṃ ko na seveta bhāgyavān || 17 ||
[Analyze grammar]

anekajanmasaṃsiddhaḥ śrīmadbhāgavataṃ labhet |
prakāśo bhagavadbhakterudbhavastatra jāyate || 18 ||
[Analyze grammar]

sāṃkhyāyanaprasādāptaṃ śrīmadbhāgavataṃ purā |
bṛhaspatirdattavānme tenāhaṃ kṛṣṇavallabhaḥ || 19 ||
[Analyze grammar]

ākhyāyikā ca tenoktā viṣṇurāta nibodha tām |
jñāyate saṃpradāyo'pi yatra bhāgavataśruteḥ || 20 ||
[Analyze grammar]

śrībṛhaspatiruvāca |
īkṣāṃcakre yadā kṛṣṇo māyāpuruṣarūpadhṛk |
brahmā viṣṇuḥ śivaścāpi rajaḥsattvatamoguṇaiḥ || 21 ||
[Analyze grammar]

puruṣāstraya uttasthuradhikārāṃstadādiśat |
utpattau pālane caiva saṃhāre prakrameṇa tān || 22 ||
[Analyze grammar]

brahmā tu nābhikamalādutpannastaṃ vyajijñapat |
śrībrahmovāca |
nārāyaṇādipuruṣa paramātmannamo'stu te || 23 ||
[Analyze grammar]

tvayā sarge niyukto'smi pāpīyānmāṃ rajoguṇaḥ |
tvatsmṛtau naiva bādheta tathaiva kṛpayā prabho || 24 ||
[Analyze grammar]

śrībṛhaspatiruvāca |
yadā tu bhagavāṃstasmai śrīmadbhāgavataṃ purā |
upadiśyābravīdbrahmansevasvainatsvasiddhaye || 25 ||
[Analyze grammar]

brahmā tu paramaprītastena kṛṣṇāptaye'niśam |
saptāvaraṇabhaṃgāya saptāhaṃ samavartayat || 26 ||
[Analyze grammar]

śrībhāgavatasaptāhasevanāptamanorathaḥ |
sṛṣṭiṃ vitanute nityaṃ sasaptāhaḥ punaḥpunaḥ || 27 ||
[Analyze grammar]

viṣṇurapyarthayāmāsa pumāṃsaṃ svārthasiddhaye |
prajānāṃ pālane puṃsā yadanenāpi kalpitaḥ || 28 ||
[Analyze grammar]

śrīviṣṇuruvāca |
prajānāṃ pālanaṃ deva kariṣyāmi yathocitam |
pravṛttyā ca nivṛttyā ca karmajñānaprayojanāt || 29 ||
[Analyze grammar]

yadāyadaiva kālena dharmaglānirbhaviṣyati |
dharmaṃ saṃsthāpayiṣyāmi hyavatāraistadā tadā || 30 ||
[Analyze grammar]

bhogārthibhyastu yajñādiphalaṃ dāsyāmi niścitam |
mokṣārthibhyo viraktebhyo muktiṃ pañcavidhāṃ tathā || 31 ||
[Analyze grammar]

ye'pi mokṣaṃ na vāñchanti tānkathaṃ pālayāmyaham |
ātmānaṃ ca śriyaṃ cāpi pālayāmi kathaṃ vada || 32 ||
[Analyze grammar]

tasmā api pumānādyaḥ śrībhāgavatamādiśat |
uvāca ca paṭhasvainattava sarvārthasiddhaye || 33 ||
[Analyze grammar]

tato viṣṇuḥ prasannātmā paramārthakapālane |
samartho'bhūcchriyā māsimāsi bhāgavataṃ smaran || 34 ||
[Analyze grammar]

yadā viṣṇuḥ svayaṃ vaktā lakṣmīśca śravaṇe ratā |
tadā bhāgavataśrāvo māsenaiva punaḥpunaḥ || 35 ||
[Analyze grammar]

yadā lakṣmīḥ svayaṃ vaktrī viṣṇuśca śravaṇe rataḥ |
māsadvayaṃ rasāsvādastadātīva suśobhate || 36 ||
[Analyze grammar]

adhikāre sthito viṣṇurlakṣmīrniścintamānasā |
tena bhāgavatāsvādastasyā bhūri prakāśate || 37 ||
[Analyze grammar]

atha rudro'pi taṃ devaṃ saṃhārādhikṛtaḥ purā |
pumāṃsaṃ prārthayāmāsa svasāmarthyavivṛddhaye || 38 ||
[Analyze grammar]

śrīrudra uvāca |
nitye naimittike caiva saṃhāre prākṛte tathā |
śaktayo mama vidyante devadeva mama prabho || 39 ||
[Analyze grammar]

ātyaṃtike tu saṃhāre mama śaktirna vidyate |
mahadduḥkhaṃ mamaitattu tena tvāṃ prārthayāmyaham || 40 ||
[Analyze grammar]

śrībṛhaspatiruvāca |
śrīmadbhāgavataṃ tasmā api nārāyaṇo dadau |
sa tu saṃsevanādasya jigye cāpi tamoguṇam || 41 ||
[Analyze grammar]

kathā bhāgavatī tena sevitā varṣamātrataḥ |
laye tvātyaṃtike tenāvāpa śaktiṃ sadāśivaḥ || 42 ||
[Analyze grammar]

uddhava uvāca |
śrībhāgavatamāhātmya imāmākhyāyikāṃ guroḥ |
śrutvā bhāgavataṃ labdhvā mumude'haṃ praṇamya tam || 43 ||
[Analyze grammar]

tatastu vaiṣṇavīṃ rītiṃ gṛhītvā māsamātrataḥ |
śrīmadbhāgavatāsvādo mayā samyaṅniṣevitaḥ || 44 ||
[Analyze grammar]

tāvataiva babhūvāhaṃ kṛṣṇasya dayitaḥ sakhā |
kṛṣṇenātha niyukto'haṃ vraje svapreyasīgaṇe || 45 ||
[Analyze grammar]

virahārttāsu gopīṣu svayaṃ nityavihāriṇā |
śrībhāgavatasaṃdeśo manmukhena prayojitaḥ || 46 ||
[Analyze grammar]

taṃ yathāmati labdhvā tā āsanvirahavarjjitāḥ |
nājñāsiṣaṃ rahasyaṃ taccamatkārastu lokitaḥ || 47 ||
[Analyze grammar]

svarvāsaṃ prārthya kṛṣṇaṃ ca brahmādyeṣu gateṣu me |
śrīmadbhāgavate kṛṣṇastadrahasyaṃ svayaṃ dadau || 48 ||
[Analyze grammar]

purato'śvatthamūlasya cakāra mayi taddṛḍham |
tenātra vrajavallīṣu vasāmi badarīṃ gataḥ || 49 ||
[Analyze grammar]

tasmānnāradakuṇḍe'tra tiṣṭhāmi svecchayā sadā |
kṛṣṇaprakāśo bhaktānāṃ śrīmadbhāgavatādbhavet || 50 ||
[Analyze grammar]

tadeṣāmapi kāryyārthaṃ śrīmadbhāgavataṃ tvaham |
pravakṣyāmi sahāyo'tra tvayaivānuṣṭhito bhavet || 51 ||
[Analyze grammar]

śrīsūta uvāca |
viṣṇurātastu śrutvā taduddhavaṃ praṇato'bravīt |
śrīparīkṣiduvāca |
haridāsa tvayā kāryyaṃ śrībhāgavatakīrtanam || 52 ||
[Analyze grammar]

ājñāpyo'haṃ yathākāryyaṃ sahāyo'tra mayā tathā |
śrīsūta uvāca |
śrutvaitaduddhavo vākyamuvāca prītamānasaḥ || 53 ||
[Analyze grammar]

uddhava uvāca |
śrīkṛṣṇena parityakte bhūtale balavānkaliḥ |
kariṣyati paraṃ vighnaṃ satkārye samupasthite || 54 ||
[Analyze grammar]

tasmāddigvijayaṃ yāhi kalinigrahamācara |
ahaṃ tu māsamātreṇa vaiṣṇavīṃ rītimāsthitaḥ || 55 ||
[Analyze grammar]

śrīmadbhāgavatāsvādaṃ pracārya tvatsahāyataḥ |
etānsamprāpayiṣyāmi nityadhāmni madhudviṣaḥ || 56 ||
[Analyze grammar]

śrīsūta uvāca |
śrutvaivaṃ tadvaco rājā muditaścintayāturaḥ |
tadā vijñāpayāmāsa svābhiprāyaṃ tamuddhavam || 57 ||
[Analyze grammar]

śrīparīkṣiduvāca |
kaliṃ tu nigrahīṣyāmi tāta te vacasi sthitaḥ |
śrībhāgavatasaṃprāptiḥ kathaṃ mama bhaviṣyati || 58 ||
[Analyze grammar]

ahaṃ tu samanugrāhyastava pādatale śritaḥ |
śrīsūta uvāca |
śrutvaitadvacanaṃ bhūyo'pyuddhavastamuvāca ha || 59 ||
[Analyze grammar]

uddhava uvāca |
rājaṃścintā tu te kā'pi naiva kāryyā kathaṃcana |
tavaiva bhagavacchāstre yato mukhyādhikāritā || 60 ||
[Analyze grammar]

etāvatkālaparyyantaṃ prāyo bhāgavataśruteḥ |
vārtāmapi na jānanti manuṣyāḥ karmatatparāḥ || 61 ||
[Analyze grammar]

tvatprasādena bahavo manuṣyā bhāratājire |
śrīmadbhāgavataprāptau sukhaṃ prāpsyanti śāśvatam || 62 ||
[Analyze grammar]

nandanandanarūpastu śrīśuko bhagavānṛṣiḥ |
śrīmadbhāgavataṃ tubhyaṃ śrāvayiṣyatyasaṃśayaḥ || 63 ||
[Analyze grammar]

tena prāpsyasi rājaṃstvaṃ nityaṃ dhāma vrajeśituḥ |
śrībhāgavatasaṃcārastato bhuvi bhaviṣyati || 64 ||
[Analyze grammar]

tasmāttvaṃ gaccha rājendra kalinigrahamācara |
śrīsūta uvāca |
ityuktastaṃ parikramya gato rājā diśāṃ jaye || 65 ||
[Analyze grammar]

vajrastu nijarājyeśaṃ pratibāhuṃ vidhāya ca |
tatraiva mātṛbhiḥ sākaṃ tasthau bhāgavatāśayā || 66 ||
[Analyze grammar]

atha vṛndāvane māsaṃ govarddhanasamīpataḥ |
śrīmadbhāgavatāsvādastūddhavena pravartitaḥ || 67 ||
[Analyze grammar]

tasminnāsvādyamāne tu saccidānandarūpiṇī |
pracakāśe harerlīlā sarvataḥ kṛṣṇa eva ca || 68 ||
[Analyze grammar]

ātmānaṃ ca tadantaḥsthaṃ sarve'pi dadṛśustadā |
vajrastu dakṣiṇe dṛṣṭvā kṛṣṇapādasaroruhe || 69 ||
[Analyze grammar]

svātmānaṃ kṛṣṇavaidhuryyānmuktastadbhuvyaśobhata |
tāśca tanmātaraḥ kṛṣṇe rāsarātriprakāśini || 70 ||
[Analyze grammar]

caṃdre kalāprabhārūpamātmānaṃ vīkṣya vismitāḥ |
svapreṣṭha virahavyādhivimuktāḥ svapadaṃ yayuḥ || 71 ||
[Analyze grammar]

ye'nye ca tatra te sarve nityalīlāntaraṃ gatāḥ |
vyāvahārikalokebhyaḥ sadyo'darśanamāgatāḥ || 72 ||
[Analyze grammar]

govarddhananikuñjeṣu goṣu vṛndāvanādiṣu |
nityaṃ kṛṣṇena modante dṛśyante prematatparaiḥ || 73 ||
[Analyze grammar]

śrīsūta uvāca |
ya etāṃ bhagavatprāptiṃ śṛṇuyāccāpi kīrtayet |
tasya vai bhagavatprāptirduḥkhahāniśca jāyate || 74 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe parīkṣiduddhavasaṃvāde śrībhāgavatamāhātmye tṛtīyo'dhyāyaḥ || 3 ||
[Analyze grammar]