Chapter 27

[English text for this chapter is available]

nārada uvāca |
kadācidviṣṇudāso'tha kṛtvā nityavidhiṃ dvija |
sa pākamakarottāvadaharatko'pyalakṣitaḥ || 1 ||
[Analyze grammar]

tamadṛṣṭvā'pyasau pākaṃ punarnaivā'karottadā |
sāyaṃkālā'rcanasyā'sau vratabhaṃgabhayāddvijaḥ || 2 ||
[Analyze grammar]

dvitīye'hni punaḥ pākaṃ kṛtvā yāvatsa viṣṇave |
upahārārpaṇaṃ kartuṃ gataḥ ko'pyaharatpunaḥ || 3 ||
[Analyze grammar]

evaṃ saptadinaṃ tasya pākaṃ ko'pyaharannṛpa |
tataḥ savismayaścātha manasyevamadhārayat || 4 ||
[Analyze grammar]

aho nityaṃ samabhyetya kaḥ pākaṃ harate mama |
kṣetrasaṃnyāsinaḥ sthānaṃ na tyājyaṃ mama sarvathā || 5 ||
[Analyze grammar]

punaḥ pākaṃ vidhāyā'tra bhujyate yadi cenmayā |
sāyaṃkālā'rcanaṃ caiva parityājyaṃ kathaṃ bhavet || 6 ||
[Analyze grammar]

yadi pākaṃ vidhāyaivaṃ bhoktavyaṃ tu mayā na tat |
anivedya harau sarvaṃ vaiṣṇavairnaiva bhujyate || 7 ||
[Analyze grammar]

upoṣito'haṃ saptā'haṃ tiṣṭhāmyatra vratasthitaḥ |
adyasaṃrakṣaṇaṃ samyakpākasyā'tra karomyaham || 8 ||
[Analyze grammar]

iti pākaṃ vidhāyā'sau tatraivā'lakṣitaḥ sthitaḥ |
tāvaddadarśa caṃḍālaṃ pākānnaharaṇe sthitam || 9 ||
[Analyze grammar]

kṣutkṣāmaṃ dīnavadanamasthicarmā'vaśeṣitam |
tamālokya dvijāgryo'bhūtkṛpayā'nvitamānasaḥ || 10 ||
[Analyze grammar]

vilokyā'nnaharaṃ viprastiṣṭhatiṣṭhetyabhāṣata |
kathamaśnāsi tadrūkṣaṃ ghṛtametadgṛhāṇa bhoḥ || 11 ||
[Analyze grammar]

itthaṃ vadaṃtaṃ viprāgryamāyāṃtaṃ sa vilokya ca |
vegādadhāvattadbhītyā mṛrcchitaśca papāta ha || 12 ||
[Analyze grammar]

bhītaṃ saṃmūrcchitaṃ dṛṣṭvā caṃḍālaṃ sa dvijāgraṇīḥ |
vegādabhyetya kṛpayā svavastrāṃtairavījayat || 13 ||
[Analyze grammar]

athotthitaṃ tamevāsau viṣṇudāso vyalokayat |
sākṣānnārāyaṇaṃ devaṃ śaṃkhacakragadādharam || 14 ||
[Analyze grammar]

taṃ dṛṣṭvā sāttvikairbhāvairāvṛto dvijasattamaḥ |
stotuṃ caiva namaskartuṃ tadā nā'laṃ babhūva saḥ || 15 ||
[Analyze grammar]

atha śakrādayo devāstatraivābhyāyayustadā |
gaṃdharvāpsarasaścā'pi jaguśca nanṛturmudā || 16 ||
[Analyze grammar]

vimānaśatasaṃkīrṇaṃ devarṣiśatasaṃkulam |
gītavāditranirghoṣaṃ sthānaṃ tadabhavattadā || 17 ||
[Analyze grammar]

tato viṣṇuḥ samāliṃgya svabhaktaṃ sāttvikavratam |
sārūpyamātmano dattvā'nayadvaikuṇṭhamaṃdiram || 18 ||
[Analyze grammar]

vimānavarasaṃsthaṃ taṃ gacchaṃtaṃ viṣṇusannidhim |
dīkṣitaścolanṛpatirviṣṇudāsaṃ dadarśa saḥ || 19 ||
[Analyze grammar]

vaikuṇṭhabhuvanaṃ yāṃtaṃ viṣṇudāsaṃ vilokya saḥ |
svaguruṃ mudgalaṃ vegādāhūyetthaṃ vaco'bravīt || 20 ||
[Analyze grammar]

cola uvāca |
yatsparddhayā mayā caiva yajñadānādikaṃ kṛtam |
sa viṣṇurūpadhṛgvipro yāti vaikuṇṭhamaṃdiram || 21 ||
[Analyze grammar]

dīkṣitena mayā samyaksatre'sminvaiṣṇave tvayā |
hutamagnau kṛtā viprā dānādyaiḥ pūrṇamānasāḥ || 22 ||
[Analyze grammar]

naivā'dyāpi sa me devaḥ prasanno jāyate dhruvam |
viṣṇudāsasya bhaktyaiva sākṣātkāraṃ dadau hariḥ || 23 ||
[Analyze grammar]

tasmāddānaiśca yajñaiśca naiva viṣṇuḥ prasīdati |
bhaktireva paraṃ tasya nidānaṃ darśane vibhoḥ || 24 ||
[Analyze grammar]

gaṇāvūcatuḥ |
ityuktvā bhāgineyaṃ svamabhyaṣiṃcannṛpāsane |
ābālyāddīkṣito yajñe hyaputratvamagādyataḥ || 25 ||
[Analyze grammar]

tasmādadyā'pi taddeśe sadā rājyāṃ'śabhāginaḥ |
svasreyā eva jāyaṃte tatkṛtāvadhivartinaḥ || 26 ||
[Analyze grammar]

yajñavāṭaṃ tato'bhyetya yajñakuṇḍāgrataḥ sthitaḥ |
triruccairvyājahārā'śu viṣṇuṃ saṃbodhayaṃstadā || 27 ||
[Analyze grammar]

viṣṇo bhaktiṃ sthirāṃ dehi manovākkāya karmabhiḥ |
ityuktvā so'patadvahnau sarveṣāmeva paśyatām || 28 ||
[Analyze grammar]

mudgalastu tadā krodhācchikhāmutpāṭayatsvakām |
tatastvadyāpi tadgotre mudgalā viśikhā babhuḥ || 29 ||
[Analyze grammar]

tāvadāvirabhūdviṣṇuḥ kuṇḍāgnau bhaktavatsalaḥ |
tamāliṃgya vimānāgryaṃ samārohayadacyutaḥ || 30 ||
[Analyze grammar]

tamāliṃgyā'tmasārūpyaṃ dattvā vaikuṇṭhamaṃdiram |
tenaiva saha deveśo jagāma tridaśairvṛtaḥ || 31 ||
[Analyze grammar]

nārada uvāca |
yo viṣṇudāsaḥ sa tu puṇyaśīlo yaścolabhūpaḥ sa suśīlanāmā |
etāvubhau tatsamarūpabhājau dvāḥsthau kṛtau tena ramāpriyeṇa || 32 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye colaviṣṇudāsamuktikathanaṃnāma saptaviṃśo'dhyāyaḥ || 27 ||
[Analyze grammar]