Chapter 23

[English text for this chapter is available]

nārada uvāca |
kṣiptebhyastatra bījebhyo vanaspatyastrayo'bhavan |
dhātrī ca mālatī caiva tulasī ca nṛpottama || 1 ||
[Analyze grammar]

dhātryudbhavā smṛtā dhātrī mābhavā mālatī smṛtā |
gaurībhavā ca tulasī tamaḥsattvarajoguṇāḥ || 2 ||
[Analyze grammar]

strīrūpiṇyau vanaspatyau dṛṣṭvā viṣṇustadā nṛpa |
uttasthau saṃbhramādvṛṃdā rūpātiśayavibhramaḥ || 3 ||
[Analyze grammar]

dṛṣṭvā ca yācate mohātkāmāsaktena cetasā |
taṃ cā'pi tulasīdhātryau rāgeṇaiva vyalokatām || 4 ||
[Analyze grammar]

yacca lakṣmyā purā bījamīrṣyayaiva samarpitam |
tasmāttadudbhavā nārī tasminnīrṣyāparā'bhavat || 5 ||
[Analyze grammar]

ataḥ sā barbarītyākhyāmavāpā'dha vigarhitām |
dhātrītulasyau tadrāgāttasya prītiprade sadā || 6 ||
[Analyze grammar]

tato vismṛtaduḥkho'sau viṣṇustābhyāṃ sahaiva tu |
vaikuṇṭhamagamaddhṛṣṭaḥ sarvadeva namaskṛtaḥ || 7 ||
[Analyze grammar]

kārtikodyāpane viṣṇostasmātpūjā vidhīyate |
tulasīmūladeśe'sya prītidā sā yataḥ smṛtā || 8 ||
[Analyze grammar]

tulasīkānanaṃ rājangṛhe yasyā'vatiṣṭhate |
tadgṛhaṃ tīrtharūpaṃ tu nā'yāṃti yamakiṃkarāḥ || 9 ||
[Analyze grammar]

sarvapāpaharaṃ nityaṃ kāmadaṃ tulasīvanam |
ropayaṃti narāḥ śreṣṭhāste na paśyaṃti bhāskarim || 10 ||
[Analyze grammar]

darśanaṃ narmadāyāstu gaṃgāsnānaṃ tathaiva ca |
tulasīvanasaṃsargaḥ samameva trayaṃ smṛtam || 11 ||
[Analyze grammar]

ropaṇātpālanātsekāddarśanātsparśanānnṛṇām |
tulasī dahate pāpaṃ vāṅmanaḥkāyasaṃcitam || 12 ||
[Analyze grammar]

tulasīmaṃjarībhiryaḥ kuryāddhariharā'rcanam |
na sa garbhagṛhaṃ yāti muktibhāgī na saṃśayaḥ || 13 ||
[Analyze grammar]

puṣkarādyāni tīrthāni gaṃgādyāḥ saritastathā |
vāsudevādayo devāstiṣṭhaṃti tulasīdale || 14 ||
[Analyze grammar]

tulasīmaṃjarīyukto yastu prāṇānvimuṃcati |
yamo'pi nekṣituṃ śakto yuktaṃ pāpaśatairapi || 15 ||
[Analyze grammar]

viṣṇoḥ sāyujyamāpnoti satyaṃ satyaṃ nṛpottama |
tulasīkāṣṭhajaṃ yastu caṃdanaṃ dhārayennaraḥ || 16 ||
[Analyze grammar]

taddehaṃ na spṛśetpāpaṃ kriyamāṇamapīha yat |
tulasīvipinacchāyā yatrayatra bhavennṛpa || 17 ||
[Analyze grammar]

tatra śrāddhaṃ prakartavyaṃ pitṝṇāṃ dattamakṣayam |
dhātrīphalavimiśraiśca tulasīpatramiśritaiḥ || 18 ||
[Analyze grammar]

jalaiḥ snāti narastasya gaṃgāsnānaphalaṃ smṛtam |
devārcanaṃ naraḥ kuryāddhātrīpatraiḥ phalaistathā || 19 ||
[Analyze grammar]

suvarṇamaṇimuktaughairarcanasyāpnuyātphalam |
tīrthāni munayo devā yajñāḥ sarve'pi kārtike || 20 ||
[Analyze grammar]

nityaṃ dhātrīṃ samāśritya tiṣṭhaṃtyarke tulāsthite |
dvādaśyāṃ tulasīpatraṃ dhātrīpatraṃ tu kārtike || 21 ||
[Analyze grammar]

lunāti sa naro gacchennirayānatigarhitān |
dhātrītulasyormāhātmyamapi devaścaturmukhaḥ |
na samartho bhavedvaktuṃ yathā devasya śārṅgiṇaḥ || 22 ||
[Analyze grammar]

dhātrītulasyudbhavakāraṇaṃ yaḥ śṛṇoti yaḥ śrāvayate ca bhaktyā |
vidhūtapāpmā saha pūrvajaiḥ svaiḥ svargaṃ vrajatyagryavimānasaṃsthaiḥ || 23 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye dhātrītulasyutpattivarṇanaṃnāma trayoviṃśo'dhyāyaḥ || 23 ||
[Analyze grammar]