Chapter 22

[English text for this chapter is available]

nārada uvāca |
tato jalaṃdharo dṛṣṭvā rudramadbhutavikramam |
cakāra māyayā gaurīṃ tryaṃbakaṃ mohayanniva || 1 ||
[Analyze grammar]

rathopari ca tāṃ baddhāṃ rudantīṃ pārvatīṃ śivaḥ |
niśuṃbhapramukhādyaiśca vadhyamānāṃ dadarśa saḥ || 2 ||
[Analyze grammar]

gaurīṃ tathāvidhāṃ dṛṣṭvā śivo'pyudvignamānasaḥ |
avāṅmukhaḥ sthitastūṣṇīṃ vismṛtya svaparākramam || 3 ||
[Analyze grammar]

tato jalaṃdharo vegāttribhirvivyādha sāyakaiḥ |
āpuṃkhamagraistaṃ rudraṃ śirasyurasi codare || 4 ||
[Analyze grammar]

tato jajñe sa tāṃ māyāṃ viṣṇunā ca prabodhitaḥ |
raudrarūpadharo jāto jvālāmālā'tibhīṣaṇaḥ || 5 ||
[Analyze grammar]

tasyā'tīva mahāraudraṃ rūpaṃ dṛṣṭvā mahāsurāḥ |
na śekuḥ saṃmukhe sthātuṃ bhejire te diśo daśa || 6 ||
[Analyze grammar]

tataḥ śāpaṃ dadau rudrastayoḥ śuṃbhaniśuṃbhayoḥ |
mama yuddhādapakrāṃtau gauryā badhyau bhaviṣyathaḥ || 7 ||
[Analyze grammar]

punarjalaṃdharo vegādvavarṣa niśitaiḥ śaraiḥ |
bāṇāṃdhakāraiḥ saṃchannaṃ tadā bhūmitalaṃ mahat || 8 ||
[Analyze grammar]

yāvadrudraśca ciccheda tasya bāṇagaṇaṃ javāt |
tāvatsa parigheṇā'śu jaghāna vṛṣabhaṃ balī || 9 ||
[Analyze grammar]

vṛṣastena prahāreṇa parāvṛtto raṇāṃgaṇāt |
rudreṇā'kṛṣyamāṇo'pi na tasthau raṇabhūmiṣu || 10 ||
[Analyze grammar]

tataḥ paramasaṃkuddho rudro raudravapurdharaḥ |
cakraṃ sudarśanaṃ vegāccikṣepā'dityavarcasam || 11 ||
[Analyze grammar]

pradahadrodasī vegātpapāta vasudhātale |
jahāra tacchiraḥ kāyānmahadāyatalocanam || 12 ||
[Analyze grammar]

rathātkāyaḥ papātā'sya nādayanvasudhātalam |
tejaśca nirgataṃ dehāttadrudre layamāgamat || 13 ||
[Analyze grammar]

vṛndādehodbhavaṃ tejastadgauryāṃ vilayaṃ gatam |
atha brahmādayo devā harṣādutphullalocanāḥ || 14 ||
[Analyze grammar]

praṇamya śirasā rudraṃ śaśaṃsurviṣṇuceṣṭitam |
devā ūcuḥ |
mahādeva tvayā devā rakṣitāḥ śatrujādbhayāt || 15 ||
[Analyze grammar]

kiṃcidanyatsamudbhūtaṃ tatra kiṃ karavāmahe |
vṛndālāvaṇyasaṃbhrāṃto viṣṇustiṣṭhati mohitaḥ || 16 ||
[Analyze grammar]

īśvara uvāca |
gacchadhvaṃ śaraṇaṃ devā viṣṇormohāpanuttaye |
śaraṇyāṃ mohinīṃ māyāṃ sā vaḥ kāryaṃ kariṣyati || 17 ||
[Analyze grammar]

nārada uvāca |
ityuktvāṃtardadhe devaḥ sarvabhūtagaṇaistadā |
devāśca tuṣṭuvurmūlaprakṛtiṃ bhaktavatsalām || 18 ||
[Analyze grammar]

devā ūcuḥ |
yadudbhavāḥ sattvarajastamoguṇāḥ sargasthitidhvaṃsanidānakāriṇaḥ |
yadicchayā viśvamidaṃ bhavā'bhavau tanoti mūlaprakṛtiṃ natāḥ sma tām || 19 ||
[Analyze grammar]

yā hi trayoviṃśatibhedaśabditā jagatyaśeṣe samadhiṣṭhitā parā |
yadrūpakarmāṇi jaḍāstrayo'pi devā na vidyuḥ prakṛtiṃ natāḥ sma tām || 20 ||
[Analyze grammar]

yadbhaktiyuktāḥ puruṣāstu nityaṃ dāridryabhīmohaparābhavādīn |
na prāpnuvaṃtyeva hi bhaktavatsalāṃ sadaiva mūlaprakṛtiṃ natāḥ sma tām || 21 ||
[Analyze grammar]

nārada uvāca |
stotrametattrisaṃdhyaṃ yaḥ paṭhedekāgramānasaḥ |
dāridyamohaduḥkhāni na kadācitspṛśaṃti tam || 22 ||
[Analyze grammar]

itthaṃ stuvaṃtaste devāstejomaṇḍalamāsthitam |
dadṛśurgaganaṃ tatra jvālāvyāptadigaṃtaram || 23 ||
[Analyze grammar]

tanmadhyādbhāratīṃ sarve śuśruvurvyomacāriṇīm |
śaktiruvāca |
ahameva tridhā bhinnā tiṣṭhāmi trividhairguṇaiḥ || 24 ||
[Analyze grammar]

gaurī lakṣmī svarā ceti rajaḥsattvatamoguṇaiḥ |
tatra gacchata tāḥ kāryaṃ vidhāsyati ca vaḥ surāḥ || 25 ||
[Analyze grammar]

nārada uvāca |
śṛṇvatāmiti tāṃ vācamaṃtardhānamagānmahaḥ |
devānāṃ vismayotphullanetrāṇāṃ tattadā nṛpa || 26 ||
[Analyze grammar]

tataḥ sarve'pi te devā gatvā tadvākyanoditāḥ |
gaurīṃ lakṣmīṃ svarāṃ caiva praṇemurbhaktitatparāḥ || 27 ||
[Analyze grammar]

tatastāstānsurāndṛṣṭvā praṇatānbhaktavatsalāḥ |
bījāni pradadustebhyo vākyānyūcuśca bhūmipa || 28 ||
[Analyze grammar]

devya ūcuḥ |
imāni tatra bījāni viṣṇuryatrā'vatiṣṭhate |
nirvapadhvaṃ tataḥ kāryaṃ bhavatāṃ siddhimeṣyati || 29 ||
[Analyze grammar]

nārada uvāca |
tatastu hṛṣṭāḥ surasiddhasaṃghāḥ pragṛhya bījāni vicikṣipuste |
vṛṃdānvito bhūmitale sa yatra viṣṇuḥ sadā tiṣṭhati saukhyahīnaḥ || 30 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye jalaṃdharamuktikathanaṃ nāma dvāviṃśo'dhyāyaḥ || 22 ||
[Analyze grammar]