Chapter 41

[English text for this chapter is available]

jaiminiruvāca |
puṣyasnānotsavaṃ vakṣye yathoktaṃ brahmaṇā purā |
puṣyarkṣeṇa ca saṃyuktā paurṇamāsī yadā bhavet || 1 ||
[Analyze grammar]

pauṣe māsi tathā kuryātpuṣyasnānotsavaṃ hareḥ |
ekādaśyāṃ prakurvīta aiśānyāmaṃkurārpaṇam || 2 ||
[Analyze grammar]

tataḥ pratidinaṃ kuryātpratimāyāṃ harergṛhe |
nṛtyagītopahāraiśca pratirātraṃ valiṃ haret || 3 ||
[Analyze grammar]

caturdaśīniśāyāṃ tu kuṃbhānāmadhivāsanam |
ekāśītipramāṇānāṃ tathā svarṇamayāñcchubhān || 4 ||
[Analyze grammar]

gavyasarpiḥprapūrṇāṃśca sthāpayedekaviṃśatim |
kārayetsarvatobhadraṃ maṃḍalaṃ purato hareḥ || 5 ||
[Analyze grammar]

tanmadhye bṛhadādhāraṃ sthāpayeddarpaṇaṃ śubham |
rātrau jāgaraṇaṃ kuryādgītanṛtyādivistaraiḥ || 6 ||
[Analyze grammar]

prabhāte vahnikāryaṃ ca kuryāttaddaivataṃ dvijāḥ |
pālāśībhiḥ samidbhistu caruṇā sarpiṣā tathā || 7 ||
[Analyze grammar]

brahmaviṣṇuśivebhyastu pratyekaṃ tu sahasrakam |
svaliṃgamantrairjuhuyāttadaṃte puruṣottamam || 8 ||
[Analyze grammar]

pūjayedupacāraistairādarśaṃ pratibiṃbitam |
tataḥ puruṣasūktena kumbhāṃstānabhimantrayet || 9 ||
[Analyze grammar]

tenaivācchidradhāreṇa snāpayetpuruṣottamam |
pāvamānīyakairdevāñchrīsūktena tataḥ param || 10 ||
[Analyze grammar]

sarpiḥ kuṃbhaiḥ snāpayecca gāyatryā ca tataḥ param |
vaiṣṇavyā gandhatoyena śrīsūktena samarcayet || 11 ||
[Analyze grammar]

sahasradhārayā devaṃ tato nirmālyamutsṛjet |
devāṃgaṃ lepayedgandhaiścaṃdanena ca vigrahe || 12 ||
[Analyze grammar]

yathāsthānaṃ yathāśobhamalaṃkārāṃśca yojayet |
sugandhasumanomālyairbhūṣayettadanaṃtaram || 13 ||
[Analyze grammar]

aṣṭāyudhāni devasya cakrādīni nyasetpuraḥ |
ratnacchatraṃ samucchritya pūjayetpuruṣottamam || 14 ||
[Analyze grammar]

lakṣmyā yuktaṃ punarviprā upahāraiḥ samṛddhimat |
śaṃkheṣu pūryamāṇeṣu snigdhagaṃbhīranādiṣu || 15 ||
[Analyze grammar]

cāmarāṃdolavyagrāsu veśyāsu rucirāsu ca |
māṃgalyagītanṛtyādyaiḥ stutipāṭheṣu bandinām || 16 ||
[Analyze grammar]

jayaśabdaṃ prakurvatsu dvijātiṣu muhurmuhuḥ |
dūrvākṣatāṃjalibhistribhiḥ saṃpūjya keśavam || 17 ||
[Analyze grammar]

gosarpirdīpakaiḥ svarṇapātrakairatinirmalaiḥ |
nīrājayejjagannāthaṃ karpūrayutavartibhiḥ || 18 ||
[Analyze grammar]

svarṇapātrasthitaṃ cāru tāṃbūlaṃ supariṣkṛtam |
śanaiḥśanairmukhābhyāśe pratyekaṃ vinivedayet || 19 ||
[Analyze grammar]

ācārye dakṣiṇāṃ dadyādbrāhmaṇāṃścaiva pūjayet || 20 ||
[Analyze grammar]

puṣyasnānotsavaṃ puṇyaṃ ye paśyaṃti mudānvitāḥ |
saṃpūrṇasarvakāmāste vrajeyurvaiṣṇavaṃ padam || 21 ||
[Analyze grammar]

rājyabhraṣṭo labhedrājyaṃ sārvabhaumaṃ ca viṃdati |
aputrā mṛtavatsā vā putraṃ dīrghāyuṣaṃ labhet || 22 ||
[Analyze grammar]

dāridryanāśanaṃ dhanyaṃ brahmavarcasakāraṇam |
puṣyasnānaṃ kīrtitaṃ vaḥ śṛṇudhvaṃ cottarāyaṇam || 23 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye puṣyābhiṣekavidhivarṇanaṃ nāmaikacatvāriṃśo'dhyāyaḥ || 41 ||
[Analyze grammar]