Chapter 28

[English text for this chapter is available]

jaiminiruvāca |
tataḥ sa bhagavānmantramahimnā narakesarī |
indradyumnādibhiḥ sarvaidadṛśe'dbhutadarśanaḥ || 1 ||
[Analyze grammar]

lelihāno jagatsarvaṃ samaṃtājjvalajihvayā |
kālāgnirudraṃ sakalaṃ grasaṃtamiva cotthitam || 2 ||
[Analyze grammar]

rodasīkaṃdaraṃ vyāpya tejasā tapatā bhṛśam |
anekākṣimukhagrīvākarapādaśrutirvibhuḥ || 3 ||
[Analyze grammar]

sarvāścaryamayo devaḥ kevalaṃ tejaso nidhiḥ |
bhayatrastāḥ samudvignā neśāḥ stotumapi prabhum || 4 ||
[Analyze grammar]

taṃ tathāvidhamālokya nāradaḥ pitaraṃ tadā |
papraccha bhagavannitthaṃ kathameṣa prakāśate || 5 ||
[Analyze grammar]

nārada uvāca |
anugrahāyāvataratpratyutaiṣa bhayapradaḥ |
sarve bhayātsthiratarāḥ pralayāśaṃkino'dhunā || 6 ||
[Analyze grammar]

tvameva bhagavallīlāṃ jānāsi jagatāṃ pate || 7 ||
[Analyze grammar]

tacchrutvā nāradavacaḥ padmayoniḥ smitānanaḥ |
uvāca kautukaṃ vākyaṃ sarveṣāmupakārakam || 8 ||
[Analyze grammar]

brahmovāca |
avatīrṇaṃ jagannāthaṃ dṛṣṭvā dāruvapurdharam || 9 ||
[Analyze grammar]

avajñāsyaṃti vai lokāḥ sākṣādbrahmasvarūpiṇam |
atattvavedino mūḍhā mahimānaṃ vidaṃtviti || 10 ||
[Analyze grammar]

maṃtrito mantrarājena yenāsau parameṣṭhinā |
purābhimaṃtrito yena vidadāra mahāsuram || 11 ||
[Analyze grammar]

tādṛgrūpaṃ sudurdarśaṃ prāpyameti bhayapradam |
mūrtireṣā parā kāṣṭhā viṣṇoramitatejasaḥ || 12 ||
[Analyze grammar]

yāmabhyarcya gatiṃ yāṃti punarāvṛttidurlabhām |
nṛsiṃhābhimukhaḥ stotramidamāha mudānvitaḥ || 13 ||
[Analyze grammar]

namo'stu te devavaraikasiṃha namo'stu pāpaughagajaikasiṃha |
namo'stu duḥkhārṇavapārasiṃha namo'stu tejomaya divyasiṃha || 14 ||
[Analyze grammar]

namo'stu sarvākṛticitrasiṃha namo'stu te kleśavimuktisiṃha |
namo'stu te divyavapurnṛsiṃha namo'stu te vīravaraikasiṃha || 15 ||
[Analyze grammar]

namo'stu te daityavidārasiṃha namo'stu deveṣvadhi devasiṃha |
namo'stu vedāṃtavanaikasiṃha namo'stu te yogiguhaikasiṃha || 16 ||
[Analyze grammar]

namo'stu te siṃha vṛṣaikasiṃha namo'stu nīlācalaśṛṃgasiṃha || 17 ||
[Analyze grammar]

jaiminiruvāca |
stutvetthaṃ divyasiṃhaṃ tamiṃdradyumnaṃ prajāpatiḥ |
siṃhayaṃtraṃ samālekhya tasyopari niveśya ca || 18 ||
[Analyze grammar]

dīkṣayitvā mantrarājaṃ sākṣādātharvaṇoditam |
āhurvaiṣṇavanirvāṇaṃ yaṃ vedāṃtaparāyaṇāḥ || 19 ||
[Analyze grammar]

yatra vedāśca catvāraḥ sākṣānnityaṃ pratiṣṭhitāḥ |
yamadhītya mahāmantraṃ manuḥ svāyaṃbhuvaḥ purā || 20 ||
[Analyze grammar]

sṛṣṭiṃ cakāra bhagavānprāptamasmāccaturmukhāt |
aṇimādiguṇā yasya phalaṃ syādānuṣaṃgikam || 21 ||
[Analyze grammar]

eka eva mahāmantraḥ puruṣārthacatuṣṭayam |
prāptuṃ kāraṇabhūto hi kiṃ punaḥ kṣudrakāmanām || 22 ||
[Analyze grammar]

eka eva mahāmaṃtraḥ sarvakratuphalapradaḥ |
sarvatīrthapradaḥ sarvadānavrataphalapradaḥ || 23 ||
[Analyze grammar]

yathāyaṃ sarvapāpaughatūlarāśerdavānalaḥ |
divyasiṃhākṛtirdevo maṃtrarājñastathā hyayam || 24 ||
[Analyze grammar]

enamabhyasya yatayo bhavaroga tyajaṃti hi |
yasya grahaṇamātreṇa grahāpasmārarākṣasāḥ || 25 ||
[Analyze grammar]

ḍākinyo bhūtavetālapiśācā uragā grahāḥ |
dūrādeva palāyaṃte neśate vīkṣituṃ ca tam || 26 ||
[Analyze grammar]

maṃtrarājaṃ tato labdhvā indradyumnaścaturmukhāt |
nṛsiṃhaṃ śātavapuṣaṃ lakṣmīsaṃśritavakṣasam || 27 ||
[Analyze grammar]

cakraṃ pinākaṃ dadhataṃ caṃdrasūryāgnicakṣuṣam |
jānuprasāritakarasarojadvaṃdvamunnasam || 28 ||
[Analyze grammar]

yogapaṭṭāsanārūḍhadvātriṃśaddalapadmake |
maṃtravarṇamaye madhye karṇikāpraṇavojjvale || 29 ||
[Analyze grammar]

sukhāsīnaṃ sāṭṭahāsaṃ vīkṣaṃtaṃ śrīmukhāṃbujam |
saṭāmaṃḍitavaktrābjaṃ divyaratnojjvalākṛti || 30 ||
[Analyze grammar]

phaṇāsahasraṃ vistārya paścācchatrākṛtiṃ vibhoḥ |
dadarśa balabhadraṃ taṃ halalāṃgaladhāriṇam || 31 ||
[Analyze grammar]

prajaharṣa nṛpo dṛṣṭvā tādṛśaṃ puruṣottamam |
vismayāviṣṭacetāśca papraccha kamalāsanam || 32 ||
[Analyze grammar]

bhagavaṃścitrametadvai caritaṃ madhughātinaḥ |
vijñātuṃ kathamasmābhiḥ śakyaḥ syāllokabhāvana || 33 ||
[Analyze grammar]

yajñāṃte tādṛśaṃ rūpaṃ babhāra dārunirmitam |
rathasthaṃ bhagavāneva prāsādāṃtarnyaveśayat || 34 ||
[Analyze grammar]

māmāha pūrvaṃ vāṇī sā gaganāṃtaritā tadā |
apauruṣeyataruṇā caturmūrtirbhaviṣyati || 35 ||
[Analyze grammar]

idānīmeka evāsau dṛśyate supratiṣṭhitaḥ |
māyā vā tattvamatha vā tattvato me vada prabho || 36 ||
[Analyze grammar]

śravaṇe yadi māṃ vetsi bhājanaṃ bhavabhāvana |
śrutvaitatpratyuvācātha saṃśayānaṃ nṛpottamam || 37 ||
[Analyze grammar]

brahmovāca |
ādyā mūrtirbhagavato nārasiṃhākṛtirnṛpa |
nārāyaṇena prathitā madanugrahatastvayi || 38 ||
[Analyze grammar]

dāravī mūrtireṣeti pratimābuddhiratra vai |
mā bhūtte nṛpaśārdūla paraṃ brahmākṛtistviyam || 39 ||
[Analyze grammar]

khaṃḍanātsarvaduḥkhānāmakhaṃḍānaṃdadānataḥ |
svabhāvāddārureṣo hi paraṃ brahmābhidhīyate || 40 ||
[Analyze grammar]

itthaṃ dārumayo devaścaturvedānusārataḥ |
sraṣṭā sa jagatāṃ tasmādātmānaṃ cāpi sṛṣṭavān || 41 ||
[Analyze grammar]

śabdabrahma paraṃbrahma nānayorbheda iṣyate |
laye tu ekamevedaṃ sṛṣṭau bhedaḥ pravarttate || 42 ||
[Analyze grammar]

anyonyāpekṣiṇau bhūpa śabdārthau hi parasparam |
arthābhāvena śabdo'sti śabdābhāvena buddhyate || 43 ||
[Analyze grammar]

arthastasmāccaturvedāḥ śabdā hyarthāśca tādṛśāḥ |
ṛgvedarūpī haladhṛksāmavedo nṛkesarī || 44 ||
[Analyze grammar]

yajurmūrttistviyaṃ bhadrā cakramātharvaṇaṃ smṛtam |
vedaścaturddhā bhedo'yamekarāśirabhedataḥ || 45 ||
[Analyze grammar]

ataste saṃśayo mā bhūdekastu bahudhā vibhuḥ |
avatāreṣu cānyeṣu nyāyenaitena varttate || 46 ||
[Analyze grammar]

bhedābhedau tathā khyātau jagannāthasya te nṛpa |
yena te manasastuṣṭistena bhaktyā samācara || 47 ||
[Analyze grammar]

sarvarūpamayo hyeṣa sarvamaṃtramayaḥ prabhuḥ |
ārādhyate yathā yena tathā tasya phalapradaḥ || 48 ||
[Analyze grammar]

yathā suśuddhaṃ kanakaṃ svecchayā ghaṭitaṃ nṛpa |
tattatsaṃjñāmavāpyeha tattatsaṃtoṣakārakam || 49 ||
[Analyze grammar]

evaṃ mahimnā bhagavānatrāvirabhavannṛpa |
yasya yāvāṃstu viśvāsastasya siddhistu tāvatī || 50 ||
[Analyze grammar]

karmaṇā manasā vācā viśuddhenāṃtarātmanā |
samārādhaya goviṃdamatra dāruvapurddharam || 51 ||
[Analyze grammar]

caturvargaphalāvāptyai yathābhilaṣitaṃ tava |
anena maṃtrarājena viṣṇumenaṃ samarcaya || 52 ||
[Analyze grammar]

nātaḥ parataro maṃtro na bhūto na bhaviṣyati |
anenābhyarcito viṣṇuḥ prīto bhavati tatkṣaṇāt || 53 ||
[Analyze grammar]

dadāti svapuraṃ cāpi bhagavānbhaktavatsalaḥ |
yajñaistīrthairvratairdānaistapobhiścāpi tasya kim || 54 ||
[Analyze grammar]

nīlācalasthaṃ yo viṣṇuṃ dārumūrtimupāsti vai |
tattvaṃ bravīmi te bhūpa śrutvaitadavadhāraya || 55 ||
[Analyze grammar]

nyagrodhamūle kūle'sya siṃdhornīlācale sthitam |
dāruvyājāmṛtaṃ brahma dṛṣṭvā mucyenna saṃśaya || 56 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde'ṣṭāviṃśo'dhyāyaḥ || 28 ||
[Analyze grammar]