Chapter 24

[English text for this chapter is available]

jaiminiruvāca |
āgatya ca jagannāthaṃ cirādutkaṃṭhamānasaḥ |
daṃḍavatpraṇanāmāsau ghanaromāṃcakaṃcukaḥ || 1 ||
[Analyze grammar]

namo brahmaṇyadevāya gobrāhmaṇahitāya ca |
praṇatārtivināśāya caturvargaikahetave || 2 ||
[Analyze grammar]

hiraṇyagarbhapuruṣapradhānavyaktarūpiṇe |
oṃ namo vāsudevāya śuddhajñānasvarūpiṇe || 3 ||
[Analyze grammar]

ityuccaranstutiṃ bhūpaḥ sānaṃdāśruvilocanaḥ |
pradakṣiṇaṃ punaḥ kurvannanāma ca punaḥpunaḥ || 4 ||
[Analyze grammar]

tato'nyā devatā yā vai tatrāgacchanmudānvitāḥ |
tuṣṭuvuḥ praṇatā devaṃ kṛtāṃjalipuṭā mudā || 5 ||
[Analyze grammar]

devā ūcuḥ |
sahasraśīrṣā puruṣaḥ sahasrākṣaḥ sahasrapāt |
sa bhūmiṃ sarvato vyāpya adhyatiṣṭhaddaśāṃgulam || 6 ||
[Analyze grammar]

yaḥ pumānparamaṃ brahma paramātmeti gīyate |
bhūtaṃ bhavyaṃ bhaviṣyaṃ ca sarvaṃ puruṣa eva tat || 7 ||
[Analyze grammar]

etāvānasya mahimā jyāyāneṣa pumānprabhuḥ |
pādo'sya viśvā bhūtāni tripādasyāmṛtaṃ divi || 8 ||
[Analyze grammar]

chandāṃsi jajñire tvattastvatto yajñapumānapi |
tvatto'śvāśca vyajāyaṃta gāvo meṣādayastathā || 9 ||
[Analyze grammar]

brāhmaṇā mukhato jātā bāhujāḥ kṣatriyāstava |
viśastavorujā padbhyāṃ tathā śūdrāḥ samāgatāḥ || 10 ||
[Analyze grammar]

manasaścaṃdramā jātaścakṣuṣaste divākaraḥ |
karṇābhyāṃ śvasanaḥ prāṇairjihvāyā havyavāḍapi || 11 ||
[Analyze grammar]

nābhito gaganaṃ dyauśca mūrdhnaste samavarttata |
pādābhyāṃ te dharā jātā diśaścāṣṭau śrutergatāḥ || 12 ||
[Analyze grammar]

saptāsanparidhayastvatta ekaviṃśatsamicca vai |
carācarāḥ sarvabhāvāstvatta eva hi jajñire || 13 ||
[Analyze grammar]

tvameva jagatāṃ nāthastvameva paripālakaḥ |
ugrarūpaśca saṃhartā tvameva parameśvara || 14 ||
[Analyze grammar]

tvameva yajño yajñāṃśastvaṃ yajñeśaḥ parātparaḥ |
śabdabrahmaparaṃ tvaṃ hi śabdabrahmāsi viśvarāṭ || 15 ||
[Analyze grammar]

svarāṭ samrāḍjagannātha virāḍasi jagatpate |
adhaścordhvaṃ ca tiryaktvaṃ tvayā vyāptaṃ jaganmaya || 16 ||
[Analyze grammar]

prāpnuvaṃti paraṃ sthānaṃ tvāṃ yajaṃtaśca yājñikāḥ |
bhojyaṃ bhoktā havirhotā havanaṃ tvaṃ phalapradaḥ || 17 ||
[Analyze grammar]

samastakarmabhoktā tvaṃ sarvakarmātmakaḥ prabho |
sarvakarmopakaraṇaṃ sarvakarmaphalapradaḥ || 18 ||
[Analyze grammar]

karmaprerayitā tvaṃ hi dharmakāmārthasiddhidaḥ |
tvāmṛte muktidaḥ ko'nyo hṛṣīkeśa namo'stu te || 19 ||
[Analyze grammar]

namo'stvanantāya sahasramūrttaye sahasrapādākṣiśirorubāhave |
sahasranāmne puruṣāya śāśvate sahasrakoṭīyugadhāriṇe namaḥ || 20 ||
[Analyze grammar]

vayaṃ cyutādhikārāstvāṃ prapannāḥ śaraṇaṃ prabho |
trāhi naḥ puṃḍarīkākṣa agatīnāṃ gatirbhava || 21 ||
[Analyze grammar]

saṃsārapatitasyaiko jantostvaṃ śaraṇaṃ prabho |
tvatsṛṣṭau tvādṛśo nāsti yo dīnaparipālakaḥ || 22 ||
[Analyze grammar]

dīnānāthaikaśaraṇaṃ pitā tvaṃ jagataḥ prabho |
pātā poṣṭā tvameveśa sarvāpadvinivārakaḥ || 23 ||
[Analyze grammar]

trāhi viṣṇo jagannātha trāhi naḥ parameśvara |
tvāmṛte kamalākāṃta kaḥ śaktaḥ parirakṣaṇe || 24 ||
[Analyze grammar]

antaryāminnamaste'stu sarvatejonidhe namaḥ || 25 ||
[Analyze grammar]

iti stuvaṃtaste devāḥ praṇipatya punaḥpunaḥ |
iṃdradyumnena sahitā bahirbhūya dvijottamāḥ || 26 ||
[Analyze grammar]

kṣetraṃ śrīnarasiṃhasya gatvā taṃ praṇipatya ca |
namaskṛtya parāṃ bhaktiṃ kṛtvābhyarcya nṛkesarim || 27 ||
[Analyze grammar]

nīlācalādreḥ śikharaṃ yatra prāsāda uttamaḥ |
yayuste padmanidhinā sārddhaṃ saṃbhārakāraṇāt || 28 ||
[Analyze grammar]

dadṛśuste mahāprāṃśuṃ vyāptaṃ gaganamaṇḍale |
uttiṣṭhaṃtaṃ viṃdhyagiriṃ roddhuṃ bhānorgatiṃ kimu || 29 ||
[Analyze grammar]

vyaśnuvānaṃ diśaḥ sarvā vicitraghaṭanojjvalam |
bahukālavyatikrāṃtasvastibhaṃgivicitrakam || 30 ||
[Analyze grammar]

tataśca ciṃtayāmāsa indradyumnaḥ sa vaiṣṇavaḥ |
ghaṭanārthe mayā yātaḥ satyalokamitaḥ purā || 31 ||
[Analyze grammar]

sucirāddṛṣṭipathagaḥ pūrṇaḥ prāsāda uttamaḥ |
anugrahādvai devasya nātra mānuṣapauruṣam || 32 ||
[Analyze grammar]

manvaṃtarasamāptiḥ kva sūryacandreṃdrarodhikā |
tathāpi tiṣṭhate cāyaṃ prāsādo hyeṣa durlabhaḥ || 33 ||
[Analyze grammar]

valmīkasadṛśā hyete prāsādā mānuṣaiḥ kṛtāḥ |
śīryaṃti rohaṇairvṛkṣaiḥ svalpakālagatāyuṣaḥ || 34 ||
[Analyze grammar]

madanukrośabuddhyā tu rakṣitaṃ bhavanaṃ hareḥ |
tatastānsa sahāyānvai jagāda praśrayaṃ vacaḥ || 35 ||
[Analyze grammar]

jānīta jagadīśasya prāsādaṃ kāritaṃ mayā |
āvirbabhūva bhagavāndārurūpavapuḥ svayam |
tadāṃtarikṣagā vāṇī māmuvācāśarīriṇī || 36 ||
[Analyze grammar]

sahasrapāṇisaṃmitaṃ nīlādreḥ śikharopari |
prāsādaṃ kārayasveti sthitaye jagadīśituḥ || 37 ||
[Analyze grammar]

etatpratiṣṭhānavidhau svayamatrāgamiṣyati |
padmayoniḥ svayaṃ sārddhaṃ siddhabrahmarṣidaivataiḥ || 38 ||
[Analyze grammar]

tadatra kriyate ko vā saṃbhāro jñāyate katham |
ityuktavaṃtaṃ te procurdevā bhagnādhikāriṇaḥ || 39 ||
[Analyze grammar]

devā ūcuḥ |
na jānīmo vayamapi tadasmākaṃ gururguruḥ |
idānīṃ na vaśe'smākaṃ sa hi svargaparo hitaḥ || 40 ||
[Analyze grammar]

padmanidhiruvāca |
svāminvidheranujñānādāgato'smi tvayā saha |
kartavyaṃ kiṃ mayā cātra kiṃ vā vastu pratīkṣyate || 41 ||
[Analyze grammar]

jaiminiruvāca |
iti hyālapyamānānāṃ nāradaḥ purataḥ sthitaḥ |
brahmaṇā preṣitaḥ pūrvaṃ sarvaśāstraviśāradaḥ || 42 ||
[Analyze grammar]

sarvasaṃbhāravastūni yathāśāstraṃ mune kuru |
saṃpādayiṣyati tava śāsanātpadmako nidhiḥ || 43 ||
[Analyze grammar]

taṃ dṛṣṭvā te mudā yuktā uttasthurbrahmaṇaḥ sutam |
ṣaḍarghyapūjayā tasya pūjāṃ cakre nṛpottamaḥ || 44 ||
[Analyze grammar]

praṇemuste'pi taṃ devā manuṣyākāradhāriṇaḥ |
ūce tamiṃdradyumno'pi pratiṣṭhāvidhivastuni || 45 ||
[Analyze grammar]

nāhaṃ vedmi muniśreṣṭha cirāttyaktaḥ purodhasā |
ādeśaya kramādbrahmansaṃpādyaṃ yadyadeva hi || 46 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde caturviṃśo'dhyāyaḥ || 24 ||
[Analyze grammar]