Chapter 12

[English text for this chapter is available]

jaiminiruvāca |
ukte brahmasutenetthamiṃdradyumno mahīpatiḥ |
munestuvacanaṃ śrutvā prahṛṣṭenāṃtarātmanā |
vicārya parayā buddhyā śramaṃ mene phalāvaham || 1 ||
[Analyze grammar]

aho me paramaṃ bhāgyaṃ bahujanmāṃtarārjitam |
vyavasāye mamodyuktaḥ sarvalokapitāmahaḥ || 2 ||
[Analyze grammar]

jīvanmuktaṃ svatanujaṃ matsahāyamakārayat |
sahāyo yādṛśaḥ puṃsāṃ bhavetkāryaṃ hi tādṛśam || 3 ||
[Analyze grammar]

śrutaṃ sabhāsu sarvāsu iti vṛddhānuśāsanam |
sa itthaṃ ciṃtayanrājā visṛjya ca sabhāsadaḥ || 4 ||
[Analyze grammar]

tato muniṃ kare dhṛtvā viveśāṃtaḥpure dvijāḥ |
tamarcayitvā vidhivatpalyaṃke saha tena vai || 5 ||
[Analyze grammar]

niśāvaśeṣaṃ nṛpatirnināya saṃlapanmithaḥ |
tataḥ prabhāte vimale nityaṃ karma samāpya vai || 6 ||
[Analyze grammar]

pūjayitvā jagannāthaṃ saṃtatāra mahānadīm |
oḍhradeśādhipenāgre gacchatādiṣṭapaddhatiḥ || 7 ||
[Analyze grammar]

ekāmra vanakaṃ kṣetramabhiyāto balānvitaḥ |
sa gatvā kiṃcidadhvānaṃ prāpya gaṃdhavahābhidhām || 8 ||
[Analyze grammar]

nadīṃ vegavatīṃ śītatoyāmākramya vegavān |
pūrvāhnapūjāsamaye koṭiliṃgeśvarasya vai || 9 ||
[Analyze grammar]

carcarīśaṃkhakāhālamṛdaṃgamurajadhvanim |
vyaśnuvānaṃ mahāraṇyaṃ dūrācchuśrāva bhūpatiḥ || 10 ||
[Analyze grammar]

manyamāno bhagavato nīlācala nivāsinaḥ |
uvāca nāradaṃ prīto dhvaniḥ kutra mahāmune || 11 ||
[Analyze grammar]

nīlādriśikharāvāsaḥ prāptaḥ kiṃ parameśvaraḥ |
yadarcāsamaye hyeṣa śrūyate saṃkuladhvaniḥ || 12 ||
[Analyze grammar]

utāhopyanyadevo vā nikaṭe varttate mune |
iti pṛṣṭastadā rājñā provāca munipuṃgavaḥ || 13 ||
[Analyze grammar]

rājansudurlabhaṃ kṣetraṃ gopitaṃ muravairiṇā |
na tatrāstīti bhagavānkairapi jñāyate nṛbhiḥ || 14 ||
[Analyze grammar]

tvaṃ hi bhāgyavatāṃ śreṣṭhastvadbhāgyātte purodhasā |
dṛṣṭaḥ kathaṃcidbhagavānsaṃyateṃdriyavartmanā || 15 ||
[Analyze grammar]

tvaṃ hi tāvadbalairyuktaḥ ṣaḍaṃgainṛpasattama |
sāhase'tipravṛtto'si saṃśayo me mahīpate || 16 ||
[Analyze grammar]

saṃvarttate nīlagiriryojane tu tṛtīyake |
idaṃ tvekāmrakavanaṃ kṣetraṃ gaurīpatervibhoḥ |
nātidūre mahīpāla bhītaḥ sa śaraṇāgataḥ || 17 ||
[Analyze grammar]

iṃdradyumna uvāca |
kathaṃ sa bhīto gaurīśaḥ kaṃ vā śaraṇamāgataḥ || 18 ||
[Analyze grammar]

dadāha tripuraṃ ghoraṃ śareṇaikena yaḥ purā |
atra me vismayo jātaḥ śrotumicchāmi durlabham || 19 ||
[Analyze grammar]

rakṣitā bhavabhītānāṃ bhavaḥ paramapāvanaḥ |
kimarthaṃ bhayabhīto'sau kaḥ samartho'sya vai jaye || 20 ||
[Analyze grammar]

nārada uvāca |
atra te kathayiṣyāmi purāvṛttaṃ mahīpate |
upayeme purā gaurīṃ tapasā vaśamāgataḥ || 21 ||
[Analyze grammar]

brahmacārī himagirau bhagavānnīlalohitaḥ |
utsṛjya brahmacaryaṃ tu so'naṃgaśarapīḍitaḥ || 22 ||
[Analyze grammar]

tayā reme rucirayā yauvanonmattayā nṛpa |
tatpiturviṣaye bhogānbubhuje devakāṃkṣitān || 23 ||
[Analyze grammar]

kadācidatha niryātī svavāsabhavanātsatī |
sāmapūrvaṃ kulastrībhirmātroktā sasmitaṃ vacaḥ || 24 ||
[Analyze grammar]

ārye mahattapastaptaṃ varārthaṃ gahane vane |
niṣkulo nirguṇo vṛddho varaḥ prāpto varānane || 25 ||
[Analyze grammar]

divārātriṃ na tyajasi sannidhiṃ tādṛśasya vai |
ko guṇaḥ kathyatāṃ vatse kiṃ vā patyuḥ prasādajam || 26 ||
[Analyze grammar]

bhūṣaṇācchādanaṃ prāptaṃ mamaiva gṛhavāsinī |
ciraṃ tiṣṭhasi bhadre tvaṃ pitṛbhogopalālitā || 27 ||
[Analyze grammar]

trailokye yāstu kanyā vai pariṇītāḥ piturgṛhāt |
prayātyalaṃkṛtābhartrā bhartṛveśmani śuśruma || 28 ||
[Analyze grammar]

ahaṃ tu mānasī kanyā pitṛṇāṃ pitṛlokataḥ |
āgatā tu mahābhāge pariṇītā himādriṇā || 29 ||
[Analyze grammar]

itthamuktā mayā hāsyānna krodhāccalalocane |
jāmāturagre no vācyaṃ sa hi viṣṇusamo mataḥ || 30 ||
[Analyze grammar]

nārada uvāca |
māturitthaṃ vacaḥ śrutvā bhartṛniṃdāprapīḍitā |
kopaprasphuradoṣṭhī sā vācaṃ noce manāgapi || 31 ||
[Analyze grammar]

prayayāvaṃtikaṃ bharturnihnu vānāṃ'bikāvacaḥ |
jagāda paruṣaṃ vākyaṃ snehagarbhaṃ mitākṣaram || 32 ||
[Analyze grammar]

svāminna sāṃprataṃ caitadyadvāsaḥ śvaśurālaye |
kṣaudrīyasāmapi gurostrailokyasya kathaṃ nu te || 33 ||
[Analyze grammar]

tadāvayornātra yogyā vasatirme priyā vibho |
na saṃti kiṃ te vāsāya yogyā vai bhūmayaḥ prabhoḥ || 34 ||
[Analyze grammar]

ityuktaḥ śivayā so'tha bhagavānvṛṣabhadhvajaḥ |
tayā sārddhaṃ vṛṣārūḍho madhyadeśaṃ yayau tvaran || 35 ||
[Analyze grammar]

vilaṃghya sarva tīrthāni prayāgaṃ pāvanaṃ mahat |
pūrvasāgaragāminyā gaṃgāyā uttare taṭe || 36 ||
[Analyze grammar]

vārāṇasīṃ nāma purīṃ gauryā vāsāya nirmame |
paṃcakrośamitāṃ ramyāṃ varaprāsādaśobhitām || 37 ||
[Analyze grammar]

aṭṭālakaśatairyuktāmasaṃkhyopavanairyutām |
nānātīrthasamāyuktāṃ nānājanasamākulām || 38 ||
[Analyze grammar]

ājñayā dhūrjaṭeḥ śubhrāṃ nirmitāṃ viśvakarmaṇā |
pāvanaiḥ śītalairgaṃgātaraṃgaiḥ kṣapitāṃhasām || 39 ||
[Analyze grammar]

tatra madhye pure svarṇaprākārāṭṭālaśobhite |
ratnastaṃbhaiḥ sughaṭite sarvāśāparipūrake || 40 ||
[Analyze grammar]

tayā reme paśupatiḥ śriyeva madhusūdanaḥ |
sā purī viśvanāthena kadācinnaiva mucyate || 41 ||
[Analyze grammar]

avimukteti sā khyātā nṛṇāṃ muktipradāyinī |
purāsīnmanujādhīśa sevitā bhavabhīrubhiḥ || 42 ||
[Analyze grammar]

tatroṣitā tadā gaurī tena bhartrā svalaṃkṛtā |
mātaraṃ pitaraṃ cāpi na sasmāra mahīpate || 43 ||
[Analyze grammar]

evaṃ bahuyuge'tīte kailāsādriṃ sa jagmivān |
ātmanaḥ koṭiliṃgāni tatra saṃsthāpya vai prabhuḥ || 44 ||
[Analyze grammar]

rājānaḥ pālayāmāsustāṃ purīṃ bahuśo nṛpa |
tatrāsītkāśirājākhyaḥ purā dvāparake yuge || 45 ||
[Analyze grammar]

śaṃbhuṃ saṃtoṣayāmāsa tapasogreṇa vai prabhum |
jarāsandhapurogāṇāṃ rājñāṃ jetāramacyutam || 46 ||
[Analyze grammar]

saṃgrāme prabhaviṣyāmītyabhisaṃdhāya pārthivaḥ |
prādāttasmai varaṃ so'pi pinākī pāritoṣitaḥ || 47 ||
[Analyze grammar]

jetāsi kaṃsahaṃtāraṃ saṃgrāme tvamariṃdama |
tavārthe pramathaiḥ sārddhamahaṃ yotsye vṛṣe sthitaḥ || 48 ||
[Analyze grammar]

śaṃbhoriti varaṃ labdhvā pramattaḥ sa narādhipaḥ |
śaṃkhacakradharaṃ saṃkhye harimāhvata vīryavān || 49 ||
[Analyze grammar]

antaryāmī sa bhagavāñjñātvā vṛttāṃtamīdṛśam |
cakraṃ prasthāpayāmāsa kāśirājasya sūdane || 50 ||
[Analyze grammar]

tadugradarśanaṃ cakraṃ sahasrādityavarcasam |
kāśirājaśiraśchittvā tadbalaṃ tāṃ purīṃ tataḥ || 51 ||
[Analyze grammar]

dadāha kupitaṃ rājanviṣṇorāśayavīryavit |
taddṛṣṭvā sumahatkarma kruddhaḥ paśupatistadā || 52 ||
[Analyze grammar]

gaṇairvṛto vṛṣārūḍhaḥ pinākī tadupādravat |
tataḥ sudarśanaṃ cakraṃ dṛṣṭvā taṃ prathamaṃ puraḥ || 53 ||
[Analyze grammar]

śaṃbhuḥ pāśupatāstraṃ taccakārotpātasannibham |
purā viṣṇorvaraṃ prāptaṃ śaṃbhunā bhaktitoṣitāt || 54 ||
[Analyze grammar]

balenāpyāyayiṣyāmi tavāstraṃ saṃsmṛtastvayā |
mayi cetpratikūlastvaṃ bhaviṣyati ca niṣprabham || 55 ||
[Analyze grammar]

ghore pāśupate cāsminnastre ca viphalīkṛte |
vārāṇasyāṃ ca dagdhāyāṃ bhayatrasto vṛṣadhvajaḥ || 56 ||
[Analyze grammar]

tuṣṭāva jagatāmadimanādiṃ puruṣottamam || 57 ||
[Analyze grammar]

mahādeva uvāca |
nārāyaṇa paraṃdhāma paramātmanparātpara |
saccidānandavibhava nirañjana namo'stu te || 58 ||
[Analyze grammar]

jagatkāraṇasṛṣṭyādi karmakṛdguṇabhedataḥ |
māyayā nijayā gupta svaprakāśa namo'stu te || 59 ||
[Analyze grammar]

nāṃtarbahirbahiścāṃtardūrastho nikaṭāśrayaḥ |
gururlaghuḥ sthiro'ṇīyānsthavīyāṃśca namo'stu te || 60 ||
[Analyze grammar]

koṭayaścaturāsyasya palārddhaṃ mama cātula |
yadapāṃgavilāsotthaṃ tasmai kālātmane namaḥ || 61 ||
[Analyze grammar]

ekaikaromākalitabrahmāṇḍagaṇasaṃvṛtam |
mānātītaṃ vapuryasya tasmai viśvātmane namaḥ || 62 ||
[Analyze grammar]

svakālaparimāṇena vedhasaḥ pralayodbhavau |
manvaṃtarādighaṭanākalanāya namo'stu te || 63 ||
[Analyze grammar]

sṛṣṭo'haṃ tamasā nātha tvatprabhāvānabhijñakaḥ |
tatkṣamasvāparādhaṃ me trāhi māṃ śaraṇāgatam || 64 ||
[Analyze grammar]

stutimitthaṃ prakurvāṇe tasmiṃstripuradāhini |
cakrarūpaṃ parityajya āvirāsīdadhokṣajaḥ || 65 ||
[Analyze grammar]

prasannavadanaḥ śrīmāñchaṃkhacakragadādharaḥ |
tārkṣyapadmāsanagato vanamālāvibhūṣaṇaḥ || 66 ||
[Analyze grammar]

hārakuṇḍalakeyūramukuṭādibhirujjvalaḥ |
vāmotsaṃgagatāṃ lakṣmīṃ satyāṃ dakṣiṇapārśvagām || 67 ||
[Analyze grammar]

bibhrāṇaḥ kṛṣṇajīmūtakāṃtadehaṃ kṛpāmbudhiḥ |
krodhāviṣṭa ivovāca bibhyataṃ girijāpatim || 68 ||
[Analyze grammar]

śrībhagavānuvāca |
kālenaitāvatā śaṃbho durbuddhiḥ kathamāgatā |
hetornṛpatikīṭasya mayā yoddhumupasthitaḥ || 69 ||
[Analyze grammar]

kati vā matprabhāvāste no jñātā dhūrjaṭe tvayā |
satyaṃ pāśupataṃ te'straṃ durjayaṃ sasurāsuraiḥ || 70 ||
[Analyze grammar]

matkrodharūpaṃ taccakraṃ tvāmapi kṣamate na yat |
māmavajñāya jagati bhramati tvāmṛte hi kaḥ || 71 ||
[Analyze grammar]

tapobhirbahubhiḥ pūrvaṃ maccharīratayorjitaḥ |
sāṃprataṃ cecciraṃ raṃtuṃ gauryā sārddhamihecchasi || 72 ||
[Analyze grammar]

purīṃ vārāṇasīṃ cemāṃ yadīcchasi cirasthitām |
mannāmnā bhuvi vikhyātaṃ kṣetraṃ śrīpuruṣottamam || 73 ||
[Analyze grammar]

dakṣiṇasyodadhestīre nīlācalavibhūṣitam |
daśayojanavistīrṇaṃ yāvadvirajamaṇḍalam || 74 ||
[Analyze grammar]

kramaśaḥ pāvanaṃ kṣetraṃ yāvaccitrotpalā nadī |
tataḥ prabhṛti yo deśo yāvatsyāddakṣiṇārṇavaḥ || 75 ||
[Analyze grammar]

padātpadācchreṣṭhatamo nīlādrirapavargadaḥ |
caturdehasthito'haṃ vai yatra nīlamaṇīmayaḥ || 76 ||
[Analyze grammar]

tasyottarasyāṃ vikhyātaṃ vanamekāmrakāhvayam |
pārvatyā tatra nivasa nirbhayastripurāṃtaka || 77 ||
[Analyze grammar]

sṛjatā sarvalokānāṃ mannideśātsvayaṃbhuvā |
tatrāpi koṭiliṃgānāṃ rājā tvamabhiṣekṣyase || 78 ||
[Analyze grammar]

sarvatīrthamayaṃ cedaṃ tīrthaṃ yanmaṇikarṇikam |
ihāhaṃkāramutsṛjya vraja tvaṃ saparicchadaḥ || 79 ||
[Analyze grammar]

nārada uvāca |
ityukto vāsudevena tryaṃbako natakandharaḥ |
kṛtāṃjalipuṭo bhūtvā provāca madhusūdanam || 80 ||
[Analyze grammar]

mahādeva uvāca |
devadeva jagannātha praṇatārtihara prabho |
tvadājñāpālanaṃ śreyaḥ kāraṇaṃ me jagatpate || 81 ||
[Analyze grammar]

yattu mūḍhatayā deva avalepaḥ kṛto mayā |
tavaivānugrahastatra prabho cāṃcalyakāraṇam || 82 ||
[Analyze grammar]

yadādiśasi deveśa prayāṇaṃ puruṣottamam |
tanmūrdhni kṛtvā yāsyāmi kṣetraṃ muktipradaṃ śivam || 83 ||
[Analyze grammar]

abhisaṃdhiṃ kuruṣvādya mamānugrahakāraṇam |
puruṣottamaṃ mama kṣetraṃ tvameva paripālaya || 84 ||
[Analyze grammar]

yathā punarnedṛśaṃ tadvināśamupayāsyati |
itthametatpurā kṣetraṃ mahādevena nirmitam || 85 ||
[Analyze grammar]

balaśrīsahitaṃ devamarcayanpuruṣottamam |
atra sākṣādumākāṃtaḥ sthāpitaḥ parameṣṭhinā || 86 ||
[Analyze grammar]

vayaṃ tatra vrajiṣyāmo drakṣyāmaḥ puranāśanam |
sudṛḍhāṃtastamaḥstomabhāsvaṃtaṃ girijāpatim || 87 ||
[Analyze grammar]

yadetacchāṃbhavaṃ kṣetraṃ tamaso nāśanaṃ param |
rajaḥprakṣālanaṃ śreyaḥ khyātaṃ virajamaṇḍalam || 88 ||
[Analyze grammar]

sattvodriktatayā khyātaṃ muktidaṃ puruṣottamam |
yāvatyanyāni kṣetrāṇi muktidāni śrutāni te || 89 ||
[Analyze grammar]

tāni sarvāṇi rājeṃdra dadate muktimatra vai |
etatkṣetraṃ mahārāja duṣkṛtāvilacetasām || 90 ||
[Analyze grammar]

na viśvāsapathaṃ yāti rahasyaṃ cakrapāṇinaḥ || 91 ||
[Analyze grammar]

jaiminiruvāca |
nāradasya vacaḥ śrutvā prahṛṣṭahṛdayo nṛpaḥ |
uvāca muniśārdūlaṃ vismayotphullalocanaḥ |
sādhu me kathitaṃ brahmankṣetraṃ paramapāvanam || 92 ||
[Analyze grammar]

yatromāpatirāste'sau pālakaḥ puruṣottamaḥ |
avaśyaṃ tatra gacchāmaḥ panthā yadyapi vakrabhūḥ |
uddiṣṭeṣṭapariprāptau yadidaṃ kāraṇaṃ mahat || 93 ||
[Analyze grammar]

jaiminiruvāca |
tatastau munibhūpālau madhyāhnasamaye dvijāḥ |
prāpatuḥ sabalau kṣetramekāmravanasaṃjñakam || 94 ||
[Analyze grammar]

biṃdutīrthe nṛpaḥ snātvā tīrasthaṃ puruṣottamam |
saṃpūjya vidhivadyātaḥ koṭīśvaramahālayam || 95 ||
[Analyze grammar]

tadvāri samyagācāṃtastatprītyai subahūni saḥ |
gajāśvadhanaratnāni vastrālaṃkaraṇāni ca || 96 ||
[Analyze grammar]

dvijebhyaḥ pradadau rājā sāttvikaṃ dharmamāsthitaḥ |
liṃgaṃ tribhuvaneśaṃ taṃ mahāsnānena pūjayan || 97 ||
[Analyze grammar]

atulāṃ prītimālebhe viṣṇoradvaitadarśanaḥ |
stutvā praṇamya bhaktyāsau vīṇayā copagāyya ca || 98 ||
[Analyze grammar]

kṛtāṃjalipuṭo devaprasādanakṛtodyamaḥ |
ananyamanasā tasthau ciṃtayanvṛṣabhadhvajam || 99 ||
[Analyze grammar]

tataḥ prasanno bhagavāṃstryaṃbakaḥ parameśvaraḥ |
sākṣānnṛpamuvācedaṃ spaṣṭākṣarapadaṃ dvijāḥ || 100 ||
[Analyze grammar]

koṭiliṃgeśa uvāca |
indradyumna mahārāja vaiṣṇavastvādṛśo bhuvi |
durlabhaḥ khalu te vāṃchā cirātsamyagbhaviṣyati || 1 ||
[Analyze grammar]

ityuktvāṃtardadhe śaṃbhuḥ paśyatastu mahīkṣitaḥ |
nāradaṃ punarāhedaṃ yadādiṣṭaṃ svayaṃbhuvā || 2 ||
[Analyze grammar]

tatkalpaya mahābhāga vājimedhapuraḥsaram |
viṣṇoḥ kalevare tasminkṣetre śrīpuruṣottame || 3 ||
[Analyze grammar]

aṃtarvedī mahāpuṇyā viṣṇorhṛdayasaṃnibhā |
tasyāḥ saṃrakṣaṇāyāhaṃ sthāpito viṣṇunāṣṭadhā || 4 ||
[Analyze grammar]

śaṃkhākṛteragrabhāge nīlakaṇṭho'hamāsthitaḥ |
durgayā saha vipreṃdra tatremaṃ bhūpatiṃ naya || 5 ||
[Analyze grammar]

antarhitaḥ khalvidānīṃ nīlaratnatanurhariḥ |
tatra śrīnarasiṃhasya kṣetraṃ kuru madājñayā || 6 ||
[Analyze grammar]

tatra naḥ sannidhau vājimedhena yajatāmayam |
sahasreṇa nṛpaśreṣṭha tadante tarumadbhutam || 7 ||
[Analyze grammar]

darśayainaṃ dvijaśreṣṭha brahmarūpamakalmaṣam |
catasraḥ pratimāstena viśvakarmā ghaṭiṣyati || 8 ||
[Analyze grammar]

tāsāṃ pratiṣṭhitau brahmā svayamevāgamiṣyati |
yathāyaṃ kṣīṇapāpaḥ syādvājimedhairyajanharim || 9 ||
[Analyze grammar]

tiṣṭhatvabdasahasraṃ vai tadaṃte lokayiṣyati |
samastajagadādhāraṃ sarvakalmaṣanāśanam || 110 ||
[Analyze grammar]

dāravīṃ tanumāsthāya darśanādapavargadam |
na tasya caritaṃ vetti brahmā'haṃ tvaṃ ca nārada || 11 ||
[Analyze grammar]

ājñānuṣṭhānato bhaktyā prasīdati sa kevalam |
nārado'pi mahādevaṃ praṇipatya jagadgurum |
uvāca prāṃjalirbhūtvā yadādiṣṭaṃ tvayā vibho || 12 ||
[Analyze grammar]

pitāmaho'pi māmitthaṃ nirdideśāsya kalpanam |
pitāmahaśca tvaṃ nātha no bhinnau paramātmanaḥ || 13 ||
[Analyze grammar]

nṛpaterasya bhāgyarddhirīdṛśī yatkṛte vibho |
agocaro'si manasastryāṇāmapyanugrahaḥ || 14 ||
[Analyze grammar]

yatprasaṃgena taraṇaṃ bhavābdherapi duṣkṛtām |
aciṃtyamahimā hyeṣa bhagavānbhūtabhāvanaḥ || 15 ||
[Analyze grammar]

na buddhigocare bhaktiryāvatyā prīyate hyasau |
ciraṃ yataṃtastiṣṭhaṃti vedānuvacanādibhiḥ |
kṣudro'pi labhate muktimanāyāsena karmaṇā || 16 ||
[Analyze grammar]

gavyopajīvyā gopyastu vanacāragṛhoṣitāḥ |
araṇyajīvanāḥ prāpurmuktiṃ kāmopabhogataḥ || 17 ||
[Analyze grammar]

druhanniraṃtaraṃ prāpa śiśupālaḥ sabhāṃtare |
vyādhoḥ hṛdayamāvidhya gatiṃ prāpa sudurlabhām || 18 ||
[Analyze grammar]

vastrākarṣaṃ gṛhaṃ nītvā kubjainaṃ bubhuje purā |
yaṃ dhyānalayamāpannā labhaṃte na surastriyaḥ || 19 ||
[Analyze grammar]

caṃḍālāya dadau muktiṃ dūrasthāyāpi no punaḥ |
āsannāyātibhaktāya śrotriyāya purā vibhuḥ || 120 ||
[Analyze grammar]

māyābhirvaṃcayettvāṃ hi pitāmahamapi prabhuḥ |
tiṣṭhaṃti duḥkhabahulāstapobhirdehabaṃdhanāḥ || 21 ||
[Analyze grammar]

gautamādyā brahmacaryaniṣṭhāḥ kalpāntavāsinaḥ |
īdṛktādṛkparicchedagocaraṃ nāsya ceṣṭitam || 22 ||
[Analyze grammar]

vyavasāyena bahunā kālena mahatā tathā |
nirṇetuṃ śakyate nāsya caritaṃ vā sumedhasaḥ || 23 ||
[Analyze grammar]

upāyā bahavaḥ saṃti ye śāstrapariniṣṭhitāḥ |
viduṣāṃ mocanāyeha bahuśastairyajaṃti vai || 24 ||
[Analyze grammar]

sarveṣāmuttamopāyo vasatiḥ puruṣottame |
yā'vaśyaṃ svāmisāyujyaṃ prāpayetsusakhā yathā || 25 ||
[Analyze grammar]

tadenaṃ māyinaṃ prāptumupāyo nāṃtarīyakaḥ |
svayaṃ nidhāya hariṇā yatra vāsaḥ surakṣitaḥ || 26 ||
[Analyze grammar]

iṃdradyumnaprasaṃgena jāyate sārvalaukikaḥ |
tadājñāpaya deveśa gṛhītvainaṃ balānvitam || 27 ||
[Analyze grammar]

upatyakāyāṃ saṃsthāpya dīkṣayitvā mahākratau |
āgamiṣyāmi pādābjasamīpaṃ te vṛṣadhvaja || 28 ||
[Analyze grammar]

jaiminiruvāca |
tathetyuktvā mahādevaḥ kṣaṇādaṃtardadhe muneḥ |
so'pi rājño rathe tiṣṭhanprayayau kṣetramuttamam || 29 ||
[Analyze grammar]

dvitīye'hni kapoteśasthalīmāsedivānnṛpaḥ |
dairghyāyāmasamāyuktāṃ jalāśayadrumākulām || 130 ||
[Analyze grammar]

bilveśaḥ pūrvasīmāyāṃ samudrataṭamāsthitaḥ |
senāniveśa yogyāṃ tāṃ matriṇā saṃniveditām || 31 ||
[Analyze grammar]

yathāyogyaṃ yathāsthānaṃ sthāpayitvā nṛpottamaḥ |
bilveśvarakapoteśaṃ namaskṛtya prapūjya ca || 32 ||
[Analyze grammar]

rathamāsthāya matimānsahito brahmasūnunā |
manasā vacasā viṣṇuṃ nīlācalanivāsinam |
ciṃtayankīrtayanviprā jagāma saṃnidhiṃ hareḥ || 133 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde dvādaśo'dhyāyaḥ || 12 ||
[Analyze grammar]