Chapter 10

[English text for this chapter is available]

indradyumna uvāca |
janmaprabhṛti tatra tvaṃ na prayāto dvijottama |
kathaṃ vidyādbhavāndivyavṛttāṃtaṃ puruṣottame || 1 ||
[Analyze grammar]

vidyāpatiruvāca |
tatra sthito'haṃ sāyāhne bhagavaṃtamupāgamam |
tasminkāle divyagandho vavau ca śiśiro marut || 2 ||
[Analyze grammar]

udyataḥ saṃkulaḥ śabdaḥ śrūyate sma viyatpathe |
kramādyāhi prayāhīti sa tu varṇamayaḥ svanaḥ || 3 ||
[Analyze grammar]

diviṣṭhānāṃ patatpuṣpavṛṣṭyācchāditaparvataḥ |
samāgamo'bhūtsānnidhye vaikuṃṭhasya mahīpate || 4 ||
[Analyze grammar]

vīṇāveṇumṛdaṃgānāṃ carcarīṇāṃ ca niḥsvanaḥ |
abhūtapūrvastatrāsīddivyagānavimiśritaḥ || 5 ||
[Analyze grammar]

sahasramupacārāṇāṃ prītaye parameśituḥ |
devaiḥ samarpitaṃ tatra manuṣyādṛṣṭapūrvakam || 6 ||
[Analyze grammar]

saṃpūjya vidhivaddevaṃ karamātropalakṣitāḥ |
jayapūrvaiśca taṃ stotraiḥ saṃtoṣya madhusūdanam || 7 ||
[Analyze grammar]

yathāgataṃ te tridaśāḥ prayayustridaśālayam |
teṣu yāteṣu śabaraḥ sakhā viśvāvasurmama || 8 ||
[Analyze grammar]

divyopahārabhojyāni mālyaṃ cedaṃ dadau mama |
anarghyametadamlānaṃ śrīrājyasukhadāyakam || 9 ||
[Analyze grammar]

alakṣmīpāparakṣoghnaṃ yogyaṃ tenāhṛtaṃ mayā |
śṛṇuṣva tasya saṃsthānaṃ viṣṇoryatkṣetramuttamam || 10 ||
[Analyze grammar]

apūrvaśilpanaipuṇyaṃ rūpaṃ cāsya manoharam |
na bhūmijanmanā puṃsā śakyate gadituṃ hi tat || 11 ||
[Analyze grammar]

tadbhāgyapauruṣābhyāṃ tallakṣitaṃ kathayāmi te |
samaṃtādgahanākīrṇaṃ kṣetraṃ nīlādrinābhikam || 12 ||
[Analyze grammar]

āyāmavistṛtibhyāṃ ca vikhyātaṃ krośapaṃcakam |
tīrtharājasya velāyāṃ svarṇavālukayāvṛtam || 13 ||
[Analyze grammar]

adreḥ śṛṃge mahānuccaḥ kalpasthāyī vaṭo mahān |
krośāyataḥ puṣpaphalavarjitaḥ pallavojjvalaḥ || 14 ||
[Analyze grammar]

sūryāpakramaṇe tasya chāyāṃ nāpakrameta vai |
tasya paścātpradeśe hi kuṃḍaṃ rohiṇasaṃjñakam || 15 ||
[Analyze grammar]

jalodgamānnīladṛṣadārohaṇavibhūṣitam |
bahiḥ sphaṭikavedībhiścaturdikṣu parīvṛtam || 16 ||
[Analyze grammar]

aghasaṃghātahārībhiradbhiḥ pūrṇaṃ manoramam |
tatpūrvavedikāmadhye nyagrodhacchāyaśītale || 17 ||
[Analyze grammar]

indranīlamayo deva āste cakragadādharaḥ |
ekāśītyaṃgulamitaḥ svarṇapadmopari sthitaḥ || 18 ||
[Analyze grammar]

aṣṭamīcandraśakalaśobhāvijayibhālabhūḥ |
smereṃdīvarayugmaśrīdhikkārodyatalocanaḥ || 19 ||
[Analyze grammar]

ānanāmṛtabhānūdyatsaṃtāpatrayamocanaḥ |
nāsāpuṭadvayodbhāsitilapuṣpapraśobhanaḥ || 20 ||
[Analyze grammar]

vapuṣo'śmamayatve'pi susmitasrapitādharaḥ |
hāsasaṃphullagaṃḍābhyāṃ ruciraṃ cibukaṃ hanuḥ || 21 ||
[Analyze grammar]

ananyapūrvaghaṭitaṃ sṛkkiṇīyugamaṃjasā |
hāsanimnādharau gaṃḍau cibukaṃ sṛkkiṇī śubhe || 22 ||
[Analyze grammar]

vahannidarśanaṃ devo viśvakarmādiśilpinām |
makarāsyakarṇabhūṣāśobhiśrutiyugena saḥ || 23 ||
[Analyze grammar]

gurubhārgavayormadhye pūrṇacaṃdropahāsakaḥ |
graivayaśobhājanakakaṃṭhadeśena paśyatām || 24 ||
[Analyze grammar]

dakṣiṇāvarttaśaṃkhasya muktājanmābhiśaṃkakṛt |
pīnāyataskaṃdhayugajānudīrghacaturbhujaḥ || 25 ||
[Analyze grammar]

svacchanirmalahāropaśobhakoraḥsthalo vibhuḥ |
dhatte caturdaśajagaddivyakaustubhabiṃbitam || 26 ||
[Analyze grammar]

nimnanābhihradāviṣṭatanuromālimaṃjulaḥ |
hāraṃ trivalimadhyena sthāṇutvapariṇāmakaḥ || 27 ||
[Analyze grammar]

suratnamekhalādāmnā kiṃkiṇīmauktikasrajā |
jagallāvaṇyapuṭake sphicau devasya śobhataḥ || 28 ||
[Analyze grammar]

jaghanālaṃvimuktāsrakpītacailopaśobhitam |
jaṃghāstaṃbhayugaṃ mokṣamāṃgalyatoraṇāśrayam || 29 ||
[Analyze grammar]

vṛttānupūrvajānubhyāṃ mālayā prapadīnayā |
ratnāḍhyavalayābhyāṃ ca śobhete caraṇau vibhoḥ || 30 ||
[Analyze grammar]

hārakaṃkaṇakeyūra mukuṭādyairalaṃkṛtam |
jñānāhaṃkārakaiśvaryaśabdabrahmaṇi keśavaḥ || 31 ||
[Analyze grammar]

cakrapadmagadāśaṃkhapariṇāmāni dhārayan |
sarvāśādyotako devo nīlādrerupari sthitaḥ || 32 ||
[Analyze grammar]

bhaktyā praṇamya dṛṣṭvā yaṃ dehabaṃdhātpramucyate |
vāmapārśvagatā lakṣmīrāśliṣṭā padmapāṇinā || 33 ||
[Analyze grammar]

vallakīvādanaparā bhagavanmukhalocanā |
sarvalāvaṇyavasatiḥ sarvālaṃkārabhūṣitā || 34 ||
[Analyze grammar]

tāvapaśyaṃ hi jagataḥ pitarāvacalasthitau |
tūṣṇīṃbhūtau smeradṛśā'nugṛhṇaṃtau ca paśyataḥ || 35 ||
[Analyze grammar]

sajīvau tāvabudhaṃ bho dīnānugrahakāraṇāt |
chatrībhūtaphaṇāvṛṃdaḥ śeṣaḥ paścādavasthitaḥ || 36 ||
[Analyze grammar]

agre vyavasthitaṃ dṛṣṭaṃ vapurbibhratsudarśanam |
kṛtāṃjalipuṭaṃ tasya paścādgaruḍamāsthitam || 37 ||
[Analyze grammar]

evamadbhutarūpaṃ taṃ dṛṣṭvā sākṣācchriyaḥ patim |
cetorajjubhirākṛṣṭamiva tatraiva dhāvati || 38 ||
[Analyze grammar]

anekajanmasāhasraiḥ sukarmāṇyarjitāni cet |
yugapatparipakvāni yasyāsau taṃ hi paśyati || 39 ||
[Analyze grammar]

tīrthasnānatapodānadevayajñavratairapi |
nālamālokituṃ martyastādṛśaṃ puruṣottamam || 40 ||
[Analyze grammar]

ye nīlamūrtiṃ vimalāṃbarābhaṃ dhyāyaṃti viṣṇuṃ puruṣottamastham |
te kṣīṇabaṃdhāḥ praviśaṃti viṣṇoḥ puraṃ hi yatprāpya na śocatīha || 41 ||
[Analyze grammar]

vidyābhiraṣṭādaśabhiḥ praṇītaṃ nānāvidhaṃ karmaphalaṃ nṛṇāṃ yat |
ekatra tatsarvamamuṣya viṣṇoḥ saṃdarśanasyaiti śatāṃśamānam || 42 ||
[Analyze grammar]

kimatra vācyaṃ tvadhikaṃ kṣitīṃdra puṃso matiryāvadupaiti kāmān |
labheta nīlādripatiṃ praṇamya tato'dhikaṃkṣetrabhuvo mahimnā || 43 ||
[Analyze grammar]

sa eva dātā kratubhiḥ sa yaṣṭā satyapravaktā sa tu dharmaśīlaḥ |
sarvairguṇaiḥ sarvabhavairvariṣṭho nīlādrināthaḥ khalu yena dṛṣṭaḥ || 44 ||
[Analyze grammar]

tatra ye sevakāḥ saṃti mādhavasya jagatpateḥ |
tebhyaḥ sakāśānmāhātmyamidaṃ jñātaṃ mayā nṛpa || 45 ||
[Analyze grammar]

tasminparaṃparāyātamādisṛṣṭeḥ purātanam |
prasiddhamidamākhyānaṃ śrutvā tatrāgato hyaham || 46 ||
[Analyze grammar]

tvadājñayā tatra gatvā dṛṣṭvā śrīpuruṣottamam |
niveditaṃ te rājeṃdra yathecchasi tathā kuru || 47 ||
[Analyze grammar]

iṃdradyumna uvāca |
āptavākyādbhagavataḥ śrutvā rūpamaghāpaham |
kṛtakṛtyo'smi bhagavandivyanirmālyasaṃgamāt || 48 ||
[Analyze grammar]

bahujanmasvarjitāni kṣīṇāni duritāni me |
adhikārī tvahaṃ jāto darśane śrīpateriha || 49 ||
[Analyze grammar]

sarvātmanāhaṃ yāsyāmi rājyena susamṛddhinā |
tatrāvāsaṃ kariṣyāmi puradurgāṇi caiva hi || 50 ||
[Analyze grammar]

kratunā hayamedhena yakṣye prītyai muradviṣaḥ |
śatopacāraiḥ śrīnāthaṃ pūjayiṣye dinedine || 51 ||
[Analyze grammar]

vratopavāsaniyamaiḥ prīṇayiṣye jagadgurum |
vākyāmṛtena saṃtaptaṃ yathā māmabhiṣekṣyati || 52 ||
[Analyze grammar]

dīnānukaṃpī bhagavānsākṣānnārāyaṇo vibhuḥ |
evaṃ sa śraddhayā bhaktyā saṃstute yāvadīśvaram || 53 ||
[Analyze grammar]

nāradastatra saṃprāpto bhuvanālokakautukī |
tamāyāṃtamṛṣiṃ dṛṣṭvā vaiṣṇavāgryaṃ vidheḥ sutam || 54 ||
[Analyze grammar]

āśaśaṃsa svakāryasya siddhiṃ narapatistadā |
utthāya sahasā viprāḥ pādyārghyācamanīyakaiḥ |
varāsanasthaṃ praṇataḥ provācedaṃ kṛtāṃjaliḥ || 55 ||
[Analyze grammar]

indradyumna uvāca |
adya me saphalā yajñā dānamadhyayanaṃ tapaḥ || 56 ||
[Analyze grammar]

yanme gṛhaṃ samāgacchaddvitīyā brahmaṇastanuḥ |
kṛtārtho yadyapi mune āgamānugrahāttava || 57 ||
[Analyze grammar]

tathāpi tvatprasādāya kimājñāṃ karavāṇi te |
kiṃ prayojanamuddiśya bhavanaṃ me pavitritam || 58 ||
[Analyze grammar]

jaiminiruvāca |
tacchrutvā nṛpatervākyaṃ bhaktipraśrayakomalam |
uvāca brahmaṇaḥ putraḥ smitapūrvaṃ mahīpatim || 59 ||
[Analyze grammar]

nārada uvāca |
iṃdradyumna nṛpaśreṣṭha vimalaistvadguṇotkaraiḥ |
prīṇitā devatāḥ siddhā munayo brahmaṇā saha || 60 ||
[Analyze grammar]

svapratiṣṭhā pṛthagyogyā guṇā ekaikaśastava |
brahmaṇaḥ sadane sthityai paryāptāstu samīhitāḥ || 61 ||
[Analyze grammar]

avatīrṇo naraṃ draṣṭuṃ tiṣṭhaṃtaṃ badarāśrame |
taddhyānāvasare jñāto vyavasāyastavedṛśaḥ || 62 ||
[Analyze grammar]

sādhu vyavasitaṃ rājanyābhūtte buddhirīdṛśī |
sahasrajanmasvabhyāsādbhaktirbhavati bhūpate || 63 ||
[Analyze grammar]

nīlācalaguhāvāse mādhave jagatāṃ dhave |
pitāmaho mahāprājño yamārādhya jagatpatim || 64 ||
[Analyze grammar]

vinirmame sṛṣṭimimāṃ lebhe paitāmahaṃ padam |
tadanvayaprasūto'si yuktā te bhaktirīdṛśī || 65 ||
[Analyze grammar]

caturvargaphalā bhaktirviṣṇau nālpatapaḥphalam |
anādyavidyā sudṛḍhapañcakleśavivarddhinī || 66 ||
[Analyze grammar]

ekaiveyaṃ viṣṇubhaktistaducchedāya jāyate |
bhavāraṇye pratipadaṃ duḥkhasaṃkaṭasaṃkule || 67 ||
[Analyze grammar]

narāṇāṃ bhramatāṃ viṣṇubhaktirekā sukhapradā |
nirālaye dvaṃdvavātaprodyatesminsudustare || 68 ||
[Analyze grammar]

nimagnānāṃ bhavāṃbhodhau viṣṇubhaktistariḥ smṛtā |
āśrityaikāṃ bhagavatīṃ viṣṇubhaktiṃ tu mātaram || 69 ||
[Analyze grammar]

santaḥ santuṣṭamanaso na tu śocanti jātucit |
viṣṇubhaktisudhāpānasaṃhṛṣṭānāṃ mahātmanām || 70 ||
[Analyze grammar]

brāhmyaṃ padaṃ svalpalābho bhājanānāṃ vimuktaye |
trividho yoṃ'hasā rāśiḥ sumahāñjanmināṃ nṛpa || 71 ||
[Analyze grammar]

viṣṇubhaktimahādāvavahnau sa śalabhāyate |
prayāgagaṃgāpramukhatīrthāni ca tapāṃsi ca || 72 ||
[Analyze grammar]

aśvamedhaḥ kratuvaro dānāni sumahāṃti ca |
vratopavāsaniyamāḥ sahasrāṇyarjitā api || 73 ||
[Analyze grammar]

samūha eṣāmekatra guṇitaḥ koṭikoṭibhiḥ |
viṣṇubhakteḥ sahasrāṃśasamo'sau na hi kīrtitaḥ || 74 ||
[Analyze grammar]

jaiminiruvāca |
viṣṇubhaktestu māhātmyaṃ śrutvā brahmarṣiṇoditam |
viṣṇubhakteḥ svarūpaṃ hi jñātukāmaḥ kṣitīśvaraḥ || 75 ||
[Analyze grammar]

nāradaṃ punarāhedaṃ vākyaṃ satkārayuktimān || 76 ||
[Analyze grammar]

|indradyumna uvāca |
mahimā viṣṇubhaktestu sādhu prokto mahāmune |
tasyāḥ svarūpa jijñāsā cirānme hṛdi varttate || 77 ||
[Analyze grammar]

lakṣaṇaṃ varṇayedānīṃ bhaktervaiṣṇavapuṃgava |
tvadanyo na hi vaktā syādvijñāto me mahītale || 78 ||
[Analyze grammar]

nārada uvāca |
sādhu rājaṃstvayā pṛṣṭaṃ bhaktilakṣaṇamuttamam |
kathayiṣye yathārthaṃ tvāṃ bhaktibhājanamuttamam || 79 ||
[Analyze grammar]

apātre na hi vācyeyaṃ nareṃ'dhe malināṃtare |
śṛṇuṣvāvahito rājanprocyamānāṃ mayānagha || 80 ||
[Analyze grammar]

sāmānyato viśeṣācca viṣṇorbhaktiṃ sanātanīm |
atyantasukhasaṃprāptau vicchede duḥkhasaṃtateḥ || 81 ||
[Analyze grammar]

hetureko'yameveti saṃśrayādbhaktirucyate |
tridhā sā guṇabhedena turīyā nirguṇā matā || 82 ||
[Analyze grammar]

kāmakrodhābhibhūtānāṃ dṛṣṭvā yānyaṃ na paśyatām |
labdhaye cābhicārāya bhaktiḥ syānnṛpa tāmasī || 83 ||
[Analyze grammar]

yaśase cātiriktāya parasya sparddhayāpi vā |
prasaṃgātparalokāya bhaktiḥ sā rājasī smṛtā || 84 ||
[Analyze grammar]

āmuṣmikaṃ sthirataraṃ dṛṣṭvā bhāvānvinaśvarān |
paśyatāśramavarṇoktāndharmānnaiva jihāsatā || 85 ||
[Analyze grammar]

ātmajñānāya yā bhaktiḥ kriyate sā tu sāttvikī |
jagaccedaṃ jagannātho nānyaṃ cāpi ca kāraṇam || 86 ||
[Analyze grammar]

ahaṃ ca na tato bhinno mattosau na pṛthaksthitaḥ |
hīnaṃ bahirupādhīnāṃ premotkarṣeṇa bhāvanam || 87 ||
[Analyze grammar]

durlabhā bhaktiraiṣā hi muktaye'dvaitasaṃjñitā |
sāttvikyā brahmaṇaḥ sthānaṃ rājasyā śakralokatām || 88 ||
[Analyze grammar]

prayāṃti bhuktvā bhogānhi tāmasyā pitṛlokatām |
punarāgatya bhūrlokaṃ bhaktiṃ tāṃ vaiparītyataḥ || 89 ||
[Analyze grammar]

tāmaso rājasīṃ kuryādrājasaḥ sāttvikīṃ tathā |
sāttviko muktimāpnoti kṛtvā cādvaitabhāvanām || 90 ||
[Analyze grammar]

ekāmapi samāśritya kramānmuktipathaṃ vrajet |
viṣṇubhaktivihīnasya śrautasmārtāśca yāḥ kriyāḥ || 91 ||
[Analyze grammar]

prāyaścittādikaṃ tīrthaṃ yātrā kṛcchrādikaṃ tapaḥ |
kule prasūtiḥ śilpāni sarvaṃ laukikabhūṣaṇam || 92 ||
[Analyze grammar]

kāyakleśaḥ phalaṃ teṣāṃ svairiṇī vyabhicāravat |
kulācāravihīno'pi dṛḍhabhaktirjiteṃdriyaḥ || 93 ||
[Analyze grammar]

praśasyaḥ sarvalokānāṃ na tvaṣṭādaśavidyakaḥ |
bhaktihīno nṛpaśreṣṭha sajjātirddhārmikastathā || 94 ||
[Analyze grammar]

nālpabhāgyasya puṃso hi viṣṇau bhaktiḥ prajāyate |
yāṃ tu saṃpādya yatnena kṛtakṛtyo na sīdati || 95 ||
[Analyze grammar]

yayā vetti jagannāthaṃ sā vidyā parikīrtitā |
yena prīṇāti bhagavāṃstatkarmāśubhanāśanam || 96 ||
[Analyze grammar]

viṣṇubhaktaśca saṃproktastābhyāṃ yukto dṛḍhavrataḥ |
yatpādapāṃsunā viśvaṃ pūyate sacarācaram || 97 ||
[Analyze grammar]

sṛṣṭisthitivināśānāṃ svecchayā prabhavatyasau |
ki punaḥ kṣudrakāmānāṃ bhūmisvargādisaṃpadām || 98 ||
[Analyze grammar]

vāsudevasya bhaktasya na bhedo vidyate'nayoḥ |
vāsudevasya ye bhaktāsteṣāṃ vakṣyāmi lakṣaṇam || 99 ||
[Analyze grammar]

praśāṃtacittāḥ sarveṣāṃ saumyāḥ kāmajiteṃdriyāḥ |
karmaṇā manasā vācā paradrohamanicchavaḥ || 100 ||
[Analyze grammar]

dayārdramanaso nityaṃ steyahiṃsāparāṅmukhāḥ |
guṇeṣu parakāryeṣu pakṣapātamudānvitāḥ || 1 ||
[Analyze grammar]

sadācārāvadātāśca parotsavanijotsavāḥ |
paśyāvaḥ sarvabhūtasthaṃ vāsudevamamatsarāḥ || 2 ||
[Analyze grammar]

dīnānukaṃpino nityaṃ bhṛśaṃ parahitaiṣiṇaḥ |
rājopacārapūjāyāṃ lālanāḥ svakumāravat || 3 ||
[Analyze grammar]

kṛṣṇasarpādiva bhayaṃ bāhye paricaraṃti te |
viṣayeṣvavivekānāṃ yā prītirupajāyate || 4 ||
[Analyze grammar]

vitanvate tu tāṃ prītiṃ śatakoṭiguṇāṃ harau |
nityakartavyatābuddhyā yajaṃtaḥ śaṃkarādikān || 5 ||
[Analyze grammar]

viṣṇusvarūpāndhyāyaṃti bhaktyā pitṛgaṇeṣvapi |
viṣṇoranyaṃ na paśyaṃti viṣṇuṃ nānyatpṛthaggatam || 6 ||
[Analyze grammar]

pārthakyaṃ na ca pārthakyaṃ samaṣṭivyaṣṭirūpiṇaḥ |
jagannātha tavāsmīti dāsastvaṃ cāsmi no pṛthak || 7 ||
[Analyze grammar]

antaryāmī yadā devaḥ sarveṣāṃ hṛdi saṃsthitaḥ |
sevyo vā sevako vāpi tvatto nānyo'sti kaścana || 8 ||
[Analyze grammar]

iti bhāvanayā kṛtāvadhānāḥ praṇamaṃtaḥ satataṃ ca kīrttayaṃtaḥ |
harimabjajavandyapādapadmaṃ prabhajaṃtastṛṇavajjagajjaneṣu || 9 ||
[Analyze grammar]

upakṛtikuśalā jagatsvajasraṃ parakuśalāni nijāni manyamānāḥ |
api paraparibhāvane dayārdrāḥ śivamanasaḥ khalu vaiṣṇavāḥ prasiddhāḥ || 110 ||
[Analyze grammar]

dṛṣadi paradhane ca loṣṭakhaṃḍe paravanitāsu ca kūṭaśālmalīṣu |
sakhiripusahajeṣu bandhuvarge samamatayaḥ khalu vaiṣṇavāḥ prasiddhāḥ || 13 ||
[Analyze grammar]

haricaraṇasarojayugmacittā jaḍimadhiyaḥ sukhaduḥkhasāmyarūpāḥ |
apaciticaturā harau nijātmanatavacasaḥ khalu vaiṣṇavāḥ prasiddhāḥ || 14 ||
[Analyze grammar]

rathacaraṇagadābjaśaṃkhamudrākṛtitilakāṃkitabāhumūlamadhyāḥ |
muraripucaraṇapraṇāmadhūlīdhṛtakavacāḥ khalu vaiṣṇavā jayaṃti || 15 ||
[Analyze grammar]

murajidapadhanāpakṛṣṭagandhottamatulasīdalamālyacaṃdanairye |
varayitumiva muktimāptabhūṣākṛtirucirāḥ khalu vaiṣṇavā jayaṃti || 16 ||
[Analyze grammar]

vigalitamadamānaśuddhacittāḥ prasabhavinasyadahaṃkṛtipraśāṃtāḥ |
naraharimamarāptabaṃdhumiṣṭvā kṣayitaśucaḥ khalu vaiṣṇavā jayaṃti || 17 ||
[Analyze grammar]

bhagavati satataṃ prabhaktibhājāṃ śubhacaritaṃ tava lakṣma nobhyadhāyi |
śrutipathabhavatīrṇamāśu puṃsāṃ harati malaṃ cirasaṃcitaṃ yadetat || 16 ||
[Analyze grammar]

na hi dhanamapi mṛgyate kadācinna khalu śarīrajakhedasaṃprayogaḥ |
mṛdulaghuvacasābhidhānakīrtiṃ bhajanamahaṃ tava dāsya eva ciṃtā || 19 ||
[Analyze grammar]

śubhacaritamapi dviṣaṃti puṃsāṃ svayamiha duścaritānubaṃdhacittāḥ |
mahadakuśalamapyavāpya susthā bhagarasarasikā avaiṣṇavāste || 120 ||
[Analyze grammar]

paramasukhapadaṃ hṛdaṃbujasthaṃ kṣaṇamapi nānusajjaṃti mattabhāvāḥ |
vitathavacanajālakairajasraṃ pidadhati nāma hareravaiṣṇavāste || 21 ||
[Analyze grammar]

parayuvatidhaneṣu nityalubdhāḥ kṛpaṇadhiyo nijakukṣibhārapūrṇāḥ |
niyataparamahattvamanyamānā narapaśavaḥ khalu viṣṇubhaktihīnāḥ || 22 ||
[Analyze grammar]

anavaratamanāryasaṃgaraktāḥ paraparibhāvakahiṃsakā'tiraudrāḥ |
naraharicaraṇasmṛtau viraktā naramalināḥ khalu dūrato hi varjyāḥ || 123 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde daśamo'dhyāyaḥ || 10 ||
[Analyze grammar]