Chapter 9

[English text for this chapter is available]

jaiminiruvāca |
pratyāgate tato vipre sāyāhne surasaṃkule |
mādhavārcanavelāyāṃ vātaścaṃḍagatirvavau || 1 ||
[Analyze grammar]

suvarṇavālukāścāsau vicakāra ca sarvaśaḥ |
tenākuladṛśo devā na śekuravalokane || 2 ||
[Analyze grammar]

śrīkāṃtasya tadā viprā dadhyuste puruṣottamam |
yāvaddhyānasthiradṛśo muhūrtaṃ te divaukasaḥ || 3 ||
[Analyze grammar]

dhyānāṃte vālukārāśiṃ dadṛśuste na mādhavam |
rauhiṇaṃ ca tathā kuṃḍaṃ babhūvurvyākulendriyāḥ || 4 ||
[Analyze grammar]

ciṃtāmavāpurmahatīṃ hāheti rurudurbhṛśam |
kimetanno hi durdaivamekadā samupasthitam || 5 ||
[Analyze grammar]

dṛśāṃ secanakaḥ śrīśaḥ kṣaṇādyannopalabhyate |
aparādhaṃ kimasmākaṃ lakṣitaṃ puruṣottama || 6 ||
[Analyze grammar]

yugapatsevakānsarvānapahāya na dṛśyase |
yeṣāmarthe jagannātha svīcakartha kalevaram || 7 ||
[Analyze grammar]

tānanāthānparityajya kānane kimupekṣase |
svaśarīravibhūtīrno vihāya kamalekṣaṇa || 8 ||
[Analyze grammar]

kimakāṃḍaṃ racayasi kathāśeṣāndivaukasaḥ |
tavāṃśabhūtānnaḥ sarvānyajvānaḥ prayajaṃti vai || 9 ||
[Analyze grammar]

tvatprītyai yajñapuruṣa tvadādiṣṭaphalapradān |
tvadahaṃkāravarṣmāṇastvadanugrahajīvanāḥ || 10 ||
[Analyze grammar]

kāṃdiśīkā kutra yāmaḥ sāṃprataṃ tvadupekṣitāḥ |
divi sthānaiśca kiṃ kāryaṃ tvāmanālokya mādhava || 11 ||
[Analyze grammar]

akṛtārthāstvayā hīnā bhaviṣyāmo vanecarāḥ |
niṣkalaṃkasudhābhānuṃ suṣamāparibhāvukam || 12 ||
[Analyze grammar]

tvadāsyaṃ cenna paśyāmo na yāsyāmaḥ surālayam |
tapa āsthāya paramamatraiva saṃśitavratāḥ || 13 ||
[Analyze grammar]

vartāmahe vanyavṛttyā jaṭāvalkaladhāriṇaḥ |
yāvattvāṃ puṃḍarīkākṣa vilokiṣyāmahe vayam || 14 ||
[Analyze grammar]

nisargakaruṇāṃbhodhe dīnānnastrātumarhasi |
anāthāndīnahadayāṃstvāmeva śaraṇaṃ gatān || 15 ||
[Analyze grammar]

tvadanālokaśokaikapārāvāre nimajjataḥ |
śubhadṛṣṭitaraṇyā naḥ samuddhara jagatpate || 16 ||
[Analyze grammar]

evaṃ pralapatāṃ tatra sarveṣāṃ tridivaukasām |
aśarīrā tadā vāṇī punaḥ prādurbabhūva ha || 17 ||
[Analyze grammar]

atrārthe bhoḥ surā yatnaṃ kartumarhatha no vṛthā |
adyaprabhṛti devasya darśanaṃ durlabhaṃ bhuvi || 18 ||
[Analyze grammar]

atra sthāne'pi taṃ natvā taddarśanaphalaṃ labhet |
svayaṃbhuvoṃ'tikaṃ gatvā hetuṃ jñāsyatha niścitam || 19 ||
[Analyze grammar]

tacchrutvā tridaśāḥ sarve brahmaṇoṃ'tikamāgatāḥ |
yamānugrahavṛttāṃtamavatāraṃ ca dāruṇaḥ || 20 ||
[Analyze grammar]

śrutvā saṃtuṣṭamanasaḥ sarve te tridivaṃ gatāḥ |
sa tu vidyāpatirvipro rathārūḍho'bhyaciṃtayat || 21 ||
[Analyze grammar]

mama kāryaṃ tu niṣpannaṃ yaddṛṣṭo nīlamādhavaḥ |
āsamaṃtātkṣetramidaṃ paribhramyāvalokaye || 22 ||
[Analyze grammar]

adṛṣṭapūrvaṃ paramaṃ supuṇyaṃ saṃkīrtanaṃ yasya malāpahāri |
kṣetrottamaṃ śrīpuruṣottamākhyaṃ pradakṣiṇīkṛtya vrajāmi tūrṇam || 23 ||
[Analyze grammar]

pṛthvīpradakṣiṇaphalaṃ śatadhā bhajaṃte paryaṃti ye sakalakalmaṣadāryaraṇyam |
nīlādrimaṇḍimidaṃ purupottamākhyaṃ mitraṃ mamopadiśati sma samudratīre || 24 ||
[Analyze grammar]

viciṃtyetthaṃ dvijaśreṣṭhaḥ paribabhrāma vai tadā |
kṣetraṃ paśyanvanaṃ caiva nānādrumagaṇānvitam || 25 ||
[Analyze grammar]

nānāpakṣigaṇāghuṣṭaṃ kūjadbhramaraguṃphitam |
apraviṣṭārkakiraṇaṃ chāyātarugaṇāvṛtam || 26 ||
[Analyze grammar]

sarvartukusumopetaṃ latāgulmopaśobhitam |
nānājalāśayādhārakūjatsārasasaṃkulam || 27 ||
[Analyze grammar]

padmakahlārakumudavikacotpalarājitam |
na jalaṃ tatra kusumaparihīnaṃ latādikam || 28 ||
[Analyze grammar]

parītya vegāttatkṣetraṃ jagāmātha dvijottamaḥ |
dhyāyanniraśanaḥ prājñaḥ prāpyāvantīṃ dinātyaye || 29 ||
[Analyze grammar]

dūtairāveditaṃ pūrvaṃ dūrasthasyāgataṃ dvijāḥ |
śrutveṃdradyumno nṛpatiḥ praharṣaṃ paramaṃ yayau || 30 ||
[Analyze grammar]

tadāgamanamākāṃkṣanpūjayitvā janārddanam |
vidvadbhirbrāhmaṇaiḥ sārddhaṃ tasthau saṃhṛṣṭamānasaḥ || 31 ||
[Analyze grammar]

etasminnaṃtare viprāḥ sa tu vidyāpatirdvijaḥ |
prāveśikairvetrahastairdauvārikapuraḥsaraiḥ || 32 ||
[Analyze grammar]

nirdiṣṭamārgaḥ pauraiścā'numataḥ kautukānvitaiḥ |
nirmālyamālāṃ nīlākhya mādhavasya suśobhanām || 33 ||
[Analyze grammar]

nidhāya pāṇau rājāgre praviveśa tvarānvitaḥ |
taṃ dṛṣṭvā nṛpatiḥ so'tha samutthāya varāsanāt |
prasīda jagadīśeti vadannaṃtikamabhyagāt || 34 ||
[Analyze grammar]

adya me jīvitaṃ jātaṃ saphalaṃ janmakarmaṇā |
nirmālyamālāvapuṣaṃ yatpaśyāmīhamādhavam || 35 ||
[Analyze grammar]

mālāṃ mukundaśiraso'nupamapramodalābhādharīkṛtasuradrumakāṃtagandhām |
andhīkṛtālinicayāṃ pavanaprasārigandhapraṇāśitajagatkaluṣāṃ namāmi || 36 ||
[Analyze grammar]

yatpādapaṃkajagaladrajasonuṣaṃgā brahmādayaḥ paramasaṃpadamāpurasya |
viṣṇoḥ kalevarasamujjvalitāṃgarāgasaṃsaktapuṣpanilayāṃ praṇatosmi mālām || 37 ||
[Analyze grammar]

padmāṃ hṛtpadmavasatiṃ sapatnīṃ yā hasatyasau |
vikasvaraiḥ sukusumairviṣṇvaṃkasthitirgarvitām || 38 ||
[Analyze grammar]

kutra sthiteyamāhārṣīnmahimānaṃ sragujvalā |
yā śrīnidheḥ śarīre'bhūtsarvāṃgavyāpinī ciram || 39 ||
[Analyze grammar]

jaya nīlādriśikharabhūṣaṇāghapradṣaṇa |
praṇatārttihara śrīmaṃstrāhi māṃ śaraṇāgatam || 40 ||
[Analyze grammar]

iti bruvāṇaḥ kṣitipo bāṣpagadgadayā girā |
jagāma śirasā bhūmiṃ sphuradromāṃcakaṃcukaḥ || 41 ||
[Analyze grammar]

so'pi vidyāpatirvipraḥ kṣapitāśeṣakalmaṣaḥ |
divyadeho nṛpasyāgre dhyāyanmādhavamāsthitaḥ || 42 ||
[Analyze grammar]

tejasā sarvalokānāṃ pāpāni kṣālayansudhīḥ |
anugṛhṇātu devastvāṃ nīlādriśikharālayaḥ || 43 ||
[Analyze grammar]

śrīpateriyamājñā te mālārūpā prakāśitā |
draṣṭuṃ kṣetrottamagataṃ svaṃ sākṣānmuktidāyakam || 44 ||
[Analyze grammar]

ityuccarannarapaterāmumoca gale srajam |
so'pyutthāya kṣitipatirmālāṃ hṛdayalaṃbinīm || 45 ||
[Analyze grammar]

dṛṣṭvā mene śriyaḥ kāṃtaṃ sākṣāddhṛdayagāminam |
nidhāya pāṇī śirasi daramīlitalocanaḥ || 46 ||
[Analyze grammar]

ānaṃdāśrujalaklinnavadanastuṣṭuve harim || 47 ||
[Analyze grammar]

indradyumna uvāca |
jayākhilajagatsṛṣṭisthitisaṃhāraśilpakṛt |
līlāviśvavapurlomasaṃkhyabrahmāṃḍabhārabhṛt || 48 ||
[Analyze grammar]

aṃtaryāminnaśeṣāṇāṃ praṇatārtihara prabho |
brahmeṃdra rudramukuṭakirmīritapadāṃbuja || 49 ||
[Analyze grammar]

dīnānāthavipannaikasatatatrāṇatatpara |
nirvyājakaruṇāvāripārāvāra parātpara || 50 ||
[Analyze grammar]

tvadekaśaraṇaṃ dīnamanādibhramanirbharam |
paritrāhi jagannātha bhaktāviratavatsala || 51 ||
[Analyze grammar]

iti stuvannarapatiḥ svāsane samupāviśat |
gṛhamedhibrahmacāriyativaikhānasairvṛtaḥ || 52 ||
[Analyze grammar]

aṣṭādaśasu vidyāsu kuśalairyajvabhirdvijaiḥ |
mīnaiḥ sthavirabhṛtyaiśca sārddhaṃ maṃtripuraḥsaraiḥ || 53 ||
[Analyze grammar]

vidyāpati pūjayitvā bahumānapuraḥsaram |
upaveśyāgrataḥ pīṭhe pṛṣṭvā kuśalamāditaḥ || 54 ||
[Analyze grammar]

puruṣottamakṣetrasya viṣṇornīlāśmavarṣmaṇaḥ |
mahimānaṃ svarūpaṃ ca papracchāvahito mudā || 55 ||
[Analyze grammar]

brāhmaṇaḥ kṣatriyeṇāsau pṛṣṭonubhavamātmanaḥ |
bhilladvīpapraveśādimajjanāṃtaṃ saritpateḥ || 56 ||
[Analyze grammar]

kṣetrottamasya vṛttāṃtaṃ kathayāmāsa vistarāt |
nīlādrirohaṇaṃ nīlamādhavasya ca darśanam || 57 ||
[Analyze grammar]

snānaṃ ca rauhiṇe kuṇḍe mahimānaṃ vaṭasya ca |
nṛsiṃhādyaṣṭaśaṃbhūna śaktīnāmaṣṭasaṃsthitim || 58 ||
[Analyze grammar]

rathenākramaṇāddṛṣṭau kṣetrasyāyāmavistarau |
tatsarvaṃ varṇayāmāsa yathāvadanupūrvaśaḥ || 59 ||
[Analyze grammar]

tacchrutvā citramatulaṃ tairthikāveditaṃ purā |
saṃpratīto hṛṣṭamanāḥ punastaṃ kṣitipo'bravīt || 60 ||
[Analyze grammar]

indradyumna uvāca |
śrutapūrvaṃ tu bhagavaṃstvatto'śrauṣaṃ sudurlabham |
kṣetrottamaṃ dvijaśreṣṭha sāṃprataṃ varṇayasva me || 61 ||
[Analyze grammar]

nīlendramaṇimūrtestu viṣṇo rūpaṃ yathātatham |
vidyāpatiruvāca |
haṃta te kathayiṣyāmi divyāṃ mūrtiṃ jagatpateḥ || 62 ||
[Analyze grammar]

yāṃ carmacakṣuṣā dṛṣṭvā jāyate muktibhājanam |
nīlendramaṇipāṣāṇamayī mūrtiḥ purātanī || 63 ||
[Analyze grammar]

yānvahaṃ brahmarudreṃdrapurogairarcitā suraiḥ |
āropiteyaṃ divyā srakpūjāyāṃ hi suparvabhiḥ || 64 ||
[Analyze grammar]

seyaṃ na mlāyati nṛpa na ca gandhena ricyate |
dine bahutithe yāte'pīdṛśī sragdharodbhavā || 65 ||
[Analyze grammar]

divyopahāraḥ nirmālyabhakṣaṇātkṣīṇakalmaṣam |
māṃ na paśyasi kiṃ rājannatimānuṣavarcasam || 66 ||
[Analyze grammar]

sakṛdapyaśanādyasya kṣutpipāsābalakṣayāḥ |
na bādhante nṛpaśreṣṭha dṛṣṭenādṛṣṭakalpanam || 67 ||
[Analyze grammar]

bhuktirmuktiśca vai rājann tatra yugapatsthite |
na jarārogaśokādiduḥkhaṃ tatra hi vidyate || 68 ||
[Analyze grammar]

yatra sākṣājjagannāthaḥ prasannavadano vibhuḥ |
phulleṃdīvarapatrākṣaḥ prapannāmṛtamuktidaḥ || 69 ||
[Analyze grammar]

iti śrīskāṃde mahāpurāṇa ekaśītisāhasryāṃ saṃhitāyāṃ dvitīye vaiṣṇavakhaṇḍe śrīpuruṣottamamāhātmye jaiminiṛṣisaṃvāde navamo'dhyāyaḥ || 9 ||
[Analyze grammar]