Chapter 8

[English text for this chapter is available]

jaiminiruvāca |
ityuktastena vipreṇa śabaraściṃtayākulaḥ |
asmākamupajīvyo'sau rahasyastho janārdanaḥ || 1 ||
[Analyze grammar]

upasthitaṃ no durdaivaṃ yena syātsārvalaukikaḥ |
na darśayāmi cedvipraṃ śāpaṃ me'sau pradāsyati || 2 ||
[Analyze grammar]

sarveṣāṃ brāhmaṇo mānyo viśeṣādatithistvayam |
yasminviphalakāme tu dvau lokau viphalau mama || 3 ||
[Analyze grammar]

evaṃ vicārayanviśvāvasuḥ śabarapuṃgavaḥ |
janapravādaṃ sasmāra purāṇaṃ śabarālaye || 4 ||
[Analyze grammar]

asminnaṃtarhite deve bhūmyaṃtarlīnamādhave |
indradyumno narapatiḥ śakratulyaparākramaḥ || 5 ||
[Analyze grammar]

manuṣyavapuṣā yo vai brahmalokaṃ vrajedapi |
so'sminprajābhirāgatya vājimedhaśatena ca || 6 ||
[Analyze grammar]

iṣṭvā dārumayaṃ viṣṇuṃ caturddhā sthāpayiṣyati |
asya cedbhāgyamutpannaṃ brāhmaṇasyātitherbhṛśam || 7 ||
[Analyze grammar]

aṃtarddhānaṃ bhagavataḥ sannidhānamatho bhavet |
tadenaṃ darśayiṣyāmi nīleṃdramaṇimacyutam || 8 ||
[Analyze grammar]

na pauruṣeyaṃ kasyāpi kartavye devanirmite |
itthaṃ vicārya manasā śabaraśca punaḥpunaḥ || 9 ||
[Analyze grammar]

uvāca vipraṃ purato dhyāyaṃtaṃ viṣṇumavyayam || 10 ||
[Analyze grammar]

śabara uvāca |
asmābhiḥ pūrvato'pyeṣa udaṃtaḥ śruta eva hi |
iṃdradyumno narapatiratra vāsaṃ kariṣyati || 11 ||
[Analyze grammar]

tato'pi bhāgyavāṃstvaṃ hi yadagre nīlamādhavam |
cakṣuṣā paśyase brahmannehi yāmo hyadhityakām || 12 ||
[Analyze grammar]

ityuktvā taṃ kare dhṛtvā vartmanā gahanaṃ yayau |
uparyuparyupāruhya śilāviṣamavartmani || 13 ||
[Analyze grammar]

ekaikanaragamye ca kaṃṭakācitadurgame |
tamaḥprāye pathi gataṃ bodhayanvacasā dvijam || 14 ||
[Analyze grammar]

muhūrtābhyāṃ rauhiṇasya kuṃḍasyāviśatāṃ taṭe |
taṃ dṛṣṭvā so'bravīdvipraṃ kuṃḍametaddvijottama || 15 ||
[Analyze grammar]

rauhiṇākhyaṃ mahattīrthaṃ kāraṇaṃ sarvapāthasām |
atra snātvā naro yāti vaikuṃṭhabhavanaṃ dvija || 16 ||
[Analyze grammar]

etasya pūrvabhāge'so kalpacchāyāvaṭo mahān |
chāyāṃ yasya samākramya brahmahatyāṃ vyapohati || 17 ||
[Analyze grammar]

etayoraṃtare brahmannikuṃjābhyaṃtare sthitam |
paśya sākṣājagannāthaṃ vedāṃtapratipāditam || 18 ||
[Analyze grammar]

dṛṣṭvā jahīhi sakalaṃ vividhaṃ pāpasaṃcayam |
ita ūrdhvaṃ na śocasva patito bhavasāgare || 19 ||
[Analyze grammar]

jaiminiruvāca |
sa tu kuṃḍe dvijaḥ snātvā saṃpradṛṣṭamanāḥ sudhī |
dūrātpraṇamya śirasā manasā vacasā harim || 20 ||
[Analyze grammar]

tuṣṭāva caikāgramanā harṣagadgadayā girā || 21 ||
[Analyze grammar]

vidyāpatiruvāca |
pradhānapuruṣātīta sarvavyāpinparātpara |
carācaraparīṇāma paramārtha namo'stu te || 22 ||
[Analyze grammar]

śrutismṛtipurāṇetihāsa saṃpratipāditaiḥ |
karmabhistvaṃ samārādhya eka eva jagatpate || 23 ||
[Analyze grammar]

tvatta etajjagatsarvaṃ sṛṣṭau saṃpadyate vibho |
tvadādhāramidaṃ deva tvayaiva paripālyate || 24 ||
[Analyze grammar]

kalpāṃte saṃhṛtaṃ sarvaṃ tvatkukṣau sāvakāśakam |
sukhaṃ vasati sarvātmannaṃtaryāminnamo'stu te || 25 ||
[Analyze grammar]

namaste devadevāya trayīrūpāya te namaḥ |
caṃdrasūryādirupeṇa jagadbhāsayate sadā || 26 ||
[Analyze grammar]

sarvatīrthamayī gaṃgā yasya pādābjasaṃgamāt |
punāti sakalāṃllokāṃstasmai pāvayate namaḥ || 27 ||
[Analyze grammar]

havīṃṣi maṃtrapūtāni samyagdattāni vahniṣu |
pariṇāmakṛte tubhyaṃ jagajjīvayate namaḥ || 28 ||
[Analyze grammar]

yadaṃśamupajīvaṃti jagaṃtyānaṃdarūpiṇaḥ |
sarvakalmaṣahīnāya tasmai brahmātmane namaḥ || 29 ||
[Analyze grammar]

nirmalāya svarūpāya śubharūpāya māyine |
sarvasaṃgavihīnāya namaste viśvasākṣiṇe || 30 ||
[Analyze grammar]

bahupādākṣiśīrṣāsyabāhave sarvajiṣṇave |
sarvajīvasvarūpāya namaste sarvarūpiṇe || 31 ||
[Analyze grammar]

namaste kamalākāṃta namaste kamalāsana |
namaḥ kamalapatrākṣa trāhi māṃ puruṣottama || 32 ||
[Analyze grammar]

asārasaṃsāraparibhrameṇa nipīḍyamānaṃ khalu rogaśokaiḥ |
māmuddharāsmādbhavaduḥkhajātātpādābjayoste śaraṇaṃ prapannam || 33 ||
[Analyze grammar]

jaiminiruvāca |
iti stutvā sureśānaṃ devaṃ praṇavarūpiṇam |
praṇataḥ praṇavaṃ maṃtraṃ jajāpa purato hareḥ || 34 ||
[Analyze grammar]

japāṃte śāṃtamanasaṃ kṛtāṃjalimupasthitam |
manyamānaṃ kṛtārthaṃ svaṃ provāca śabaro dvijam || 35 ||
[Analyze grammar]

viśvāvasuruvāca |
kṛtārthastvaṃ prabhuṃ dṛṣṭvā sāṃprataṃ dvijapuṃgava |
dināṃto'bhūdgṛhaṃ yāvaḥ kṣudhito'si śramānvitaḥ || 36 ||
[Analyze grammar]

vāso'pyaraṇye hiṃsrāṇāṃ nāsmākamucitā sthitiḥ |
yāvadbhānorbhāti bhāsastāvadyāmo nijālayam || 37 ||
[Analyze grammar]

ityuktvā brāhmaṇaṃ pāṇau gṛhītvā śabaraḥ punaḥ |
ājagāma dvijaśreṣṭhāḥ svāśramaṃ tvarayānvitaḥ || 38 ||
[Analyze grammar]

brāhmaṇo'pi jagannāthaṃ dhyāyannānaṃdasāgaram |
kṣuttṛṣāśramajātāni duḥkhāni bubudhe na hi || 39 ||
[Analyze grammar]

śilāviṣamamārge'pi kaṃṭakotkaradurgame |
vrajanna duḥkhaṃ lebhe'sau śarīrānāsthayā mudā || 40 ||
[Analyze grammar]

evaṃ vrajaṃtau tau vipra śabarau śabarālayam |
sāyāhne tamanuprāptau vaiṣṇavāgryau tu bho dvijāḥ || 41 ||
[Analyze grammar]

tatrātithimanuprāptaṃ brāhmaṇaṃ śabarottamaḥ |
bhakṣyabhojya vidhānaiśca vividhaiḥ samapūjayat || 42 ||
[Analyze grammar]

tato'bhitṛptastaddattairupacārairnṛpocitaiḥ |
vismayaṃ paramaṃ lebhe śabarasya sudurlabhaiḥ || 43 ||
[Analyze grammar]

śabaro'yaṃ nivasati viṣame kānanāṃtare |
āraṇyakairvarttamānaḥ kathamasya gṛhāṃtare || 44 ||
[Analyze grammar]

rājārhabhakṣyabhojyāni sulabhānyadbhutaṃ mahat |
iti vismayamāpannaṃ brāhmaṇaṃ śabarastadā || 45 ||
[Analyze grammar]

provāca snigdhavacasā vinayāvanato bhṛśam || 46 ||
[Analyze grammar]

śabara uvāca |
bho vipra śramahīno'si kaccitkṣuttṛḍvivarjitaḥ |
āraṇyakānāṃ bhavane nāgarāṇāṃ kutaḥ sukham || 47 ||
[Analyze grammar]

ajñātā nāgarī vṛttiḥ śabaraistu viśeṣataḥ |
rājopajīvināṃ śreṣṭhau rājāmātyapurohitau || 48 ||
[Analyze grammar]

tayo rājasamaḥ pūjyaḥ purodhāḥ śāstrasaṃmataḥ |
indradyumno narapatiḥ sārvabhaumaḥ pratāpavān || 49 ||
[Analyze grammar]

tvayi tuṣṭe sa saṃtuṣṭo dhruvaṃ vipra bhaviṣyati |
ityuktavatyaraṇyasthe sa tu prītataro dvijaḥ |
uvāca śabaraṃ prītyā vinayādbhutavādinam || 50 ||
[Analyze grammar]

vidyāpatiruvāca |
sādho madupacārāya hṛtānyetāni yāni te |
vastunyamānuṣāṇīha yānyadṛṣṭāni rājabhiḥ || 51 ||
[Analyze grammar]

citrametaddivyavastusaṃcayaḥ śabarālaye |
etatkhyātuṃ kautukaṃ me sādho saṃvarddhate mahat || 52 ||
[Analyze grammar]

śabara uvāca |
etatprakāśituṃ vipra matirnotsahate mama |
tathāpi te dvijaśreṣṭhā'tithibhaktyā vadāmyaham || 53 ||
[Analyze grammar]

śakrādayo devagaṇāḥ samāyāntyanvahaṃ dvija |
divyopacārānādāya pūjanāya jagatpateḥ || 54 ||
[Analyze grammar]

pūjayitvā jagannāthaṃ stutvā natvā ca bhaktitaḥ |
gītaśavāditranṛtyaiśca saṃtoṣya puruṣottamam || 55 ||
[Analyze grammar]

punaḥ prayāṃti satataṃ tridivaṃ surasattamāḥ |
divyānyetāni vastūni nirmālyāni jagatpateḥ || 56 ||
[Analyze grammar]

dattāni tubhyaṃ viduṣe kathaṃ vismayate bhavān |
viṣṇornirmālyabhogena kṣīṇarogajarā vayam || 57 ||
[Analyze grammar]

saputrabāṃdhavāḥ sarve nivasāmo'yutāyuṣaḥ |
viṣṇunirmālyabhogena kṣīyate pāpasaṃhatiḥ || 58 ||
[Analyze grammar]

na taccitraṃ dvijaśreṣṭha yena syānmuktibhājanam |
śrutvaitaddurlabhaṃ karma brāhmaṇo romaharṣaṇaḥ || 59 ||
[Analyze grammar]

ānaṃdāśruviluptākṣaḥ svaṃ kṛtārthamamanyata |
aho śabarajanmāsau paśyatyavyayamīśvaram || 60 ||
[Analyze grammar]

taducchiṣṭaṃ divyabhogamupabhuṃkte divāniśam |
nānyo'sya sadṛśo loke pṛthivyāṃ sacarācare || 61 ||
[Analyze grammar]

yādṛśo viṣṇubhakto'yaṃ śabaro nīlaparvate |
kiṃ gatvā svagṛhe me'dya kuṭuṃbenā'sukhātmanā || 62 ||
[Analyze grammar]

anena sakhyaṃ niṣpādya sthāsyāmyatra vanāṃtare |
cintayitvā ciraṃ vipraḥ śrīkṛṣṇāsaktamānasaḥ || 63 ||
[Analyze grammar]

punaḥ provāca śabaraṃ mayi te cedanugrahaḥ |
sādho sakhyaṃ tvayā kāryamiti me niścayo mahān || 64 ||
[Analyze grammar]

kiṃ gatvā sevayā rājñaḥ paratrāsukhahetunā |
atra sthitvā tvayā sārdhamupāsya madhusūdanam || 65 ||
[Analyze grammar]

yathā punardehabaṃdho yatiṣye na bhavenmama |
sādhu mitra tvayā sārddhaṃ bhāgyānme saṃgamo'bhavat || 66 ||
[Analyze grammar]

dustāraṃ bhavasaṃsāraṃ tariṣye tvatprasādataḥ |
sārametatpraśaṃsaṃti saṃsāre bhavasāgare || 67 ||
[Analyze grammar]

yadvaiṣṇavena mitratvaṃ duḥkhasaṃsārapāradam |
mitrasya sahavāsena punaḥ pratyakṣameṣyati || 68 ||
[Analyze grammar]

bhagavānpuṇḍarīkākṣaḥ śaṃkhacakragadādharaḥ |
iṃdradyumno narapatirmayi pratyāgate sakhe || 69 ||
[Analyze grammar]

bhagavaṃtaṃ samārāddhumihaiva sa nivatsyati |
prāsādaṃ vipulaṃ cātra cikīrṣurbhagavatpriyam || 70 ||
[Analyze grammar]

sahasramupacārāṇāṃ pūjanāya jagatpateḥ |
racayiṣyāmīti mahatpratijñāsīnmahīpateḥ || 71 ||
[Analyze grammar]

pratiśrutaṃ tatpurataḥ prītastanme'numanyatām || 72 ||
[Analyze grammar]

śabara uvāca |
sakhe purātanī vārttā prasiddhaivātra tādṛśī || 73 ||
[Analyze grammar]

tvayā yathaiva kathitaṃ indradyumnasamāgamaḥ |
kevalaṃ mādhavaṃ tatra na drakṣyati mahīpatiḥ || 74 ||
[Analyze grammar]

acirādeva bhagavānsvarṇavālukayāvṛtaḥ |
pratijajñe yamāyaitadantarddhānaṃ gamiṣyati || 75 ||
[Analyze grammar]

mahābhāgyaparīpākātpratyakṣo'yaṃ tvayā kṛtaḥ |
indradyumnāgamābhyāse dhruvaṃ sa vyavadhāsyati || 76 ||
[Analyze grammar]

eṣo'rthastu tvayā mitra na vaktavyo nṛpāgrataḥ |
āgatya so'tra nṛpatiradṛṣṭvā parameśvaram || 77 ||
[Analyze grammar]

prāyopaveśavratavānsvapne dṛṣṭvā gadādharam |
tadādeśāddārumayaṃ prabhorliṃgacatuṣṭayam || 78 ||
[Analyze grammar]

pūjayiṣyati bhaktyā ca pratiṣṭhāya svayaṃbhuvā |
sthitiratra hareryāvadāvayorvaṃśasaṃsthitiḥ || 79 ||
[Analyze grammar]

anugrahādbhagavato nātra kāryā vicāraṇā |
tadatrārthe sakhe khedaṃ mā vraja kṣiprameva hi || 80 ||
[Analyze grammar]

nirvartsyate'cirādeva mitredānīṃ sukhaṃ svapa |
prātardṛṣṭvā punardevaṃ nīlendrāśmamayaṃ vibhum || 81 ||
[Analyze grammar]

siṃdhau snātvā tasya taṭe nivāsāya mahīpateḥ |
drakṣyāmaḥ sādhu saṃsthānaṃ yathābhilaṣitaṃ sakhe || 82 ||
[Analyze grammar]

ityanyāśca kathāḥ puṇyāḥ kṛtvā tau ca parasparam |
śubhasthāne cāsvapatāṃ śayane pallavāstṛte || 83 ||
[Analyze grammar]

prabhātāyāṃ tu śarvaryāṃ tīrtharājodakena tau |
snānaṃ nirvartya vidhivanmādhavaṃ praṇipatya ca || 84 ||
[Analyze grammar]

rājārhasthānaṃ nirṇīya nivāsāya gatau punaḥ |
tatra mitreṇābhimantrya rājño nirdeśakāraṇāt || 85 ||
[Analyze grammar]

rathamāruhya vipraḥ sa tvavaṃtīpuramāyayau || 86 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde'ṣṭamo'dhyāyaḥ || 8 ||
[Analyze grammar]