Chapter 7

[English text for this chapter is available]

munaya ūcuḥ |
kasminyuge sa tu nṛpa indradyumno'bhavanmune |
kasmindeśe'sya nagaraṃ kathaṃ vā puruṣottamam || 1 ||
[Analyze grammar]

gatvā ca viṣṇoḥ pratimāṃ kārayāmāsa vā katham |
etatsarvaṃ vistarataḥ kathayasva mahāmune || 2 ||
[Analyze grammar]

yāthātathyena sarvajña paraṃ kautṛhalaṃ hi naḥ || 3 ||
[Analyze grammar]

jaiminiruvāca |
sādhu sādhu dvijaśreṣṭhā yatpṛcchadhvaṃ purātanam |
sarvapāpaharaṃ puṇyaṃ bhuktimuktipradaṃ śubham || 4 ||
[Analyze grammar]

caritaṃ tasya vakṣyāmi tathāvṛttaṃ kṛte yuge |
śṛṇudhvaṃ munayaḥ sarve sāvadhānā jitendriyāḥ || 5 ||
[Analyze grammar]

āsītkṛtayuge viprā indradyumno mahā nṛpaḥ |
sūryavaṃśe sa dharmātmā sraṣṭuḥ paṃcamapūruṣaḥ || 6 ||
[Analyze grammar]

satyavādī sadācāro'vadātaḥ sāttvikāgraṇīḥ |
nyāyātsadā pālayati prajāḥ svā iva sa prajāḥ || 7 ||
[Analyze grammar]

adhyātmavijjñānaśauṃḍaḥ śūraḥ saṃgrāmavarddhanaḥ |
sadodyataḥ sadā viprapūjakaḥ pitṛbhaktimān || 8 ||
[Analyze grammar]

aṣṭādaśasu vidyāsu bṛhaspatirivāparaḥ |
aiśvaryeṇa surādhīśaḥ kuberaḥ koṣasaṃcaye || 9 ||
[Analyze grammar]

rūpavānsubhagaḥ śīlī dātā bhoktā priyaṃvadaḥ |
yaṣṭā samastayajñānāṃ brahmaṇyaḥ satyasaṃgaraḥ || 10 ||
[Analyze grammar]

vallabho naranārīṇāṃ paurṇamāsyāṃ yathā śaśī |
āditya iva duṣprekṣyaḥ śatrupakṣakṣayaṃkaraḥ || 11 ||
[Analyze grammar]

vaiṣṇavaḥ satya saṃpanno jitakrodho jiteṃdriyaḥ |
rājasūyaṃ kratuvaraṃ vājimedhasahasrakam || 12 ||
[Analyze grammar]

iyāja paramaḥ śrīmānmumukṣurdharmatatparaḥ |
evaṃ sarvaguṇopetaḥ sa pṛthvīṃ pālayannṛpaḥ || 13 ||
[Analyze grammar]

avaṃtīṃnāma nagarīṃ mālave bhuvi viśrutām |
uvāsa sarvaratnāḍhyāṃ dvitīyāmamarāvatīm || 14 ||
[Analyze grammar]

tatra sthito narapatirviṣṇau bhaktimanuttamām |
cakāra manasā vācā karmaṇā paramādbhutām || 15 ||
[Analyze grammar]

evaṃ pravartamāno'sau kadācicchrīpatervibhoḥ |
pūjāsamayamāsādya devārcanagṛhāṃtare || 16 ||
[Analyze grammar]

vidvadbhiḥ kavibhiścaiva tīrthayātrāprasiddhibhiḥ |
daivajñaiḥ śrotriyaiḥ sārddhaṃ purohitamavasthitam || 17 ||
[Analyze grammar]

ādṛto vyājahāreda jñāyatāṃ kṣetramuttamam |
yatra sākṣājjagannāthaṃ paśyāmo'nena cakṣuṣā || 18 ||
[Analyze grammar]

evamukto nṛpāgryeṇa vaiṣṇavena purohitaḥ |
tīrthayātṛvrajaṃ paśyannuvāca praśritaṃ vacaḥ || 19 ||
[Analyze grammar]

bhobhostīrthāṭanavyagrā dhārmikāstīrthakovidāḥ |
yadādiśati devo'yaṃ yuṣmābhistacchrutaṃ kila || 20 ||
[Analyze grammar]

vijñāya tasyābhiprāyaṃ kaścitsubahutīrthagaḥ |
uvāca vāggmī rājānaṃ baddhāṃjalipuṭaṃ mudā || 21 ||
[Analyze grammar]

rājannanekatīrthāni vyacāriṣamahaṃ prabho |
āśaiśavātkṣititale śrutānyanyaistu yāni vai || 22 ||
[Analyze grammar]

oḍhradeśa iti khyāto varṣe bhāratasaṃjñite |
dakṣiṇasyodadhestīre kṣetraṃ śrīpuruṣottamam || 23 ||
[Analyze grammar]

yatra nīlagirirnāma samaṃtātkānanāvṛtaḥ |
tasyotsaṃge kalpavṛkṣaḥ samaṃtātkrośasaṃmitaḥ || 24 ||
[Analyze grammar]

tasya chāyāṃ samākramya brahmahatyāṃ vyapohati |
tasya paścāddiśi khyātaṃ kuṃḍaṃ rauhiṇasaṃjñitam || 25 ||
[Analyze grammar]

tatpūrṇaṃ kāraṇāṃbhobhiḥ sparśanādeva muktidam |
tasya prāktaṭamāsthāya nīleṃdramaṇinirmitā || 26 ||
[Analyze grammar]

tanuḥ śrīvāsudevasya sākṣānmuktipradāyinī |
tatra kuṃḍe tu yaḥ snātvā dṛṣṭvā tu puruṣottamam || 27 ||
[Analyze grammar]

aśvamedhasahasrasya phalaṃ prāpya vimucyate |
tatrāsta āśramaśreṣṭhaḥ khyātaḥ śabaradīpakaḥ || 28 ||
[Analyze grammar]

paścimasyāṃ diśi vibhorveṣṭitaḥ śabarālayaiḥ |
yasmādekapadīmārgo yena viṣṇvālayaṃ vrajet || 29 ||
[Analyze grammar]

yatra sākṣājjagannāthaḥ śaṃkhacakragadādharaḥ |
jaṃtūnāṃ darśanānmuktiṃ yo dadāti kṛpānidhiḥ || 30 ||
[Analyze grammar]

tatroṣitaṃ mayā rājanvarṣaṃ śrīpuruṣottame |
tuṣṭyarthaṃ devadevasya vratinā vanavāsinā || 31 ||
[Analyze grammar]

pratirātraṃ bhagavato darśanāya divaukasām |
āgatānāṃ mahārāja divyagaṃdho hyamānuṣaḥ || 32 ||
[Analyze grammar]

nānāstutivacaḥkalpapuṣpavṛṣṭiśca labhyate |
mahimaiṣa na kutrāpi viṣṇoḥ sthāne prakāśate || 33 ||
[Analyze grammar]

paurāṇikī pravṛttiśca śrutā tatra mahīpate |
vāyaso mādhavaṃ dṛṣṭvā tiryagdeho'pi mucyate || 34 ||
[Analyze grammar]

nādhikārī puṇyakṛtye jñānahīno'pi pārthiva |
tṛṣārtto rauhiṇe kuṃḍe jalaṃ pātuṃ samāgataḥ || 35 ||
[Analyze grammar]

tyaktvā kālavaśātprāṇānviṣṇusārūpyamāptavān |
ahamāsaṃ purā mūrkhastatprasādāttu sāṃpratam || 36 ||
[Analyze grammar]

aṣṭādaśasu vidyāsu śeṣo vā syānmamāparaḥ |
matiśca nirmalā jātā viṣṇoḥ paśyāmi nāparam || 37 ||
[Analyze grammar]

tvaṃ yasmādviṣṇubhakto'si satataṃ ca dṛḍhavrataḥ |
atastavopadeśārthamāgato'haṃ tavāṃtikam || 38 ||
[Analyze grammar]

no dhanaṃ na ca bhūmiṃ ca tvattaḥ saṃprārthyate'dhunā |
vyalīkametanmā buddhvā tatrasthaṃ śrīdharaṃ bhaja || 39 ||
[Analyze grammar]

evamuktvā tu jaṭilaḥ sarveṣāṃ paśyatāṃ tadā |
aṃtarddhānaṃ jagāmāśu rājā paramavismayam || 40 ||
[Analyze grammar]

avāpya vyākulamatiḥ kathaṃ me nirvahediti |
purohitamuvācedaṃ tasyaivārthasya sādhane || 41 ||
[Analyze grammar]

indradyumna uvāca |
amānuṣamidaṃ vṛttaṃ śrutvedānīmamānuṣāt |
buddhistvarayate tatra yatrāste'sau gadādharaḥ || 42 ||
[Analyze grammar]

mama dharmārthakāmā hi tvadāyattā dvijottama |
aviruddhāstvatprasādāttrivargaḥ sādhito mayā || 43 ||
[Analyze grammar]

idānīṃ ceddvijaśreṣṭha tvamatrārthe gamiṣyasi |
caturvargastu saṃpūrṇaḥ prāptaḥ syātsāṃprataṃ mayā || 44 ||
[Analyze grammar]

purohita uvāca |
bāḍhametatkariṣyāmi yathā drakṣyasi keśavam |
varmācchāditacakṣurbhyāṃ sākṣānmuktipradaṃ vibhum || 45 ||
[Analyze grammar]

evamatra yatiṣyāmi tatra sarve yathā vayam |
vatsyāmaḥ sasahāyāśca kṣetre śrīpuruṣottame || 46 ||
[Analyze grammar]

sāphalyaṃ kimato rājañjanmino janmano bhavet |
puruṣaṃ tamasaḥ pāraṃ sākṣāddrakṣyasi mādhavam || 47 ||
[Analyze grammar]

bhrātā vidyāpatirnāma kanīyānme vrajiṣyati |
deśabhramaṇaśīlaiśca cāraiḥ saha tavādhunā || 48 ||
[Analyze grammar]

tatra gatvā jagannāthaṃ dṛṣṭvā sa hi girau yathā |
kaṃṭakāvāsasaṃsthānaṃ bhūpradeśaṃ pramīya ca || 49 ||
[Analyze grammar]

tūrṇaṃ pravṛttimānetā śreyo'smākaṃ bhaviṣyati |
tasya tadvacanaṃ śrutvā rājā punaruvāca ha || 50 ||
[Analyze grammar]

indradyumna uvāca |
sādhu brahmansamādhāya vyavasāyo vicāritaḥ |
ahaṃ prathamatopyetacchrutvaiva kṛtaniścayaḥ || 51 ||
[Analyze grammar]

tatra kṣetre bhagavataḥ sannidhau nivasāmyaham |
tadgacchatu tava bhrātā yatheṣṭaṃ sādhayiṣyati || 52 ||
[Analyze grammar]

ityuktvāṃtaḥpuraṃ rājā praviveśa mudānvitaḥ |
purohito'pi tānsarvānyathāvadanupūrvaśaḥ || 53 ||
[Analyze grammar]

rājājñayā pūjayitvā prāhiṇotsvaṃ svamāśramam |
bhrātaraṃ sumuhūrte ca daivajñakṛtaniścaye || 54 ||
[Analyze grammar]

prasthāpayāmāsa tadā kṛtasvastyayanaṃ dvijaiḥ |
apasarpaiḥ pratyayikaiḥ puṣpasyandanamāsthitaḥ || 55 ||
[Analyze grammar]

tataḥ saṃprasthito viprāḥ sa tu vidyāpatirdvijaḥ |
manasā cintayāmāsa madhye syandanamāsthitaḥ || 56 ||
[Analyze grammar]

aho me saphalaṃ janma sukalyā śarvarī ca me |
drakṣyāmi yadbhagavato mukhapadmamaghāpaham || 57 ||
[Analyze grammar]

śravaṇādyairupāyairyaṃ yatamānā aharniśam |
paśyaṃti yatayaḥ cetaḥ puṃḍarīke vyavasthitam || 58 ||
[Analyze grammar]

tamadya nīlaśikhariśṛṃgasthaṃ bibhrataṃ vapuḥ |
vapuḥsaṃbandhaharaṇaṃ sākṣāddrakṣyāmi cakriṇam || 59 ||
[Analyze grammar]

śruti smṛtīhāsapurāṇavākyairyadrūpamāsthāpayituṃ na śakyam |
tacchrīnidhe rūpamadṛṣṭapūrvaṃ dṛṣṭvā tariṣyāmi bhavāṃburāśim || 60 ||
[Analyze grammar]

yannāmasaṃkīrtanatastrivāṃhaḥ saṃghaḥ praṇāśaṃ smaratāṃ prayāti |
tamadya viśveśvaramaprameyaṃ sākṣātkariṣyāmi girau vasantam || 61 ||
[Analyze grammar]

yatpādapadmānanusaṃhitasya padepade duḥkhamupārjitasya |
tamaḥ prakāṃḍaprabhavaṃ kadācinnātmāśritaṃ karmabhireti nāśam || 62 ||
[Analyze grammar]

ārādhya sūkṣmaṃ svaguhānivāsaṃ yaṃ pañcakoṣāvṛtamātmasaṃstham |
vedāṃtagīrāha na cāpi veda vaṃde svavidyaikanivedyamādyam || 63 ||
[Analyze grammar]

brahmāṃḍamālākalitānuromaṃ sahasramūrddhāṃghridṛśaṃ purāṇam |
niḥśvāsavātotthita vedarāśiṃ sarvaprapaṃceśamahaṃ prapadye || 64 ||
[Analyze grammar]

yanmāyayā nirmitakūṭametatsṛṣṭikṣayasthānavilāsi rūpam |
nirūpitāropitaheyarūpasvarūpahīnaṃ praṇavasvarūpam || 65 ||
[Analyze grammar]

tiryaktṛṣāśāṃtinimittato'pi yadṛcchayā yatsavidhaṃ prayātaḥ |
dehena tenaiva sarūpamuktimavāpa taṃ dṛṣṭipathaṃ kariṣye || 66 ||
[Analyze grammar]

aho aho me khalu bhāgyaśaṃsī yatkoṭijanmārjitapuṇya ekaḥ |
samutthito me khalu carmadṛgbhyāṃ vilokayiṣye jagadādikaṃdam || 67 ||
[Analyze grammar]

itthaṃ saṃcintayanvipraḥ prahṛṣṭenāṃtarātmanā |
atītaṃ bahumadhvānaṃ nābudhyadrathavegataḥ || 68 ||
[Analyze grammar]

dinamadhye vyatikrāṃte laṃbite bahuvāsare |
vartmanyadṛśyatāgre tu deśo bhuvanamaṃḍanaḥ || 69 ||
[Analyze grammar]

oḍhrasaṃjñastu bho viprāḥ kṣitimaṃḍalapāvanaḥ |
itthaṃ paśyanvanāṃtāni giridurgāśca mārgagān |
sūryāstamanavelāyāṃ mahānadyāstaṭe'bhavat || 70 ||
[Analyze grammar]

avaruhya rathādvipraḥ kṛtvā cāhnikamādṛtaḥ |
upāsya paścimāṃ sandhyāṃ dadhyau sa madhusūdanam || 71 ||
[Analyze grammar]

rathapṛṣṭhe sthito rātriṃ gamayitvā tvarānvitaḥ |
mahānadīṃ samuttīrya prātaḥkṛtyaṃ samāpya saḥ || 72 ||
[Analyze grammar]

ciṃtayanneva goviṃdaṃ pratasthe rathamāsthitaḥ |
paśyanbhagavato mārgaṃ śrotriyāṇāṃ hi yajvanām || 73 ||
[Analyze grammar]

vahnivarcasvināṃ viprā grāmānpūgairalaṃkṛtān |
vilaṃghyaikāmrakavanaṃ yāvadāyāti sa dvijaḥ || 74 ||
[Analyze grammar]

śaṃkhacakragadāpadmadhāriṇo dadṛśe janān |
janmāṃtaritamātmānaṃ bubudhe divyarūpiṇam || 75 ||
[Analyze grammar]

avaruhya rathāttūrṇaṃ sāṣṭāṃgaṃ praṇipatya ca |
harṣāśrupūrṇanayano nānyatkiṃcidapaśyata || 76 ||
[Analyze grammar]

kevalaṃ manasā viṣṇuṃ paśyanbāhye ca bho dvijāḥ |
evaṃ vrajanyadā vipro dhyāyanpaśyanstuvanharim || 77 ||
[Analyze grammar]

apaśyatkānanākīrṇaṃ kalpanyagrodhabhūṣitam |
nīlācalaṃ likhaṃtaṃ khaṃ paśyatāṃ pāpanāśanam || 78 ||
[Analyze grammar]

atyadbhutaṃ nivasaṃti sākṣāttanubhṛto hareḥ |
upatyakāyāmārūḍhaḥ samaṃtānmārgayandvijaḥ || 79 ||
[Analyze grammar]

mārgaṃ na lebhe vipro'sau mukuṃdālokanotsukaḥ |
asupyata tato bhūmau kuśānāstīrya vāgyataḥ || 80 ||
[Analyze grammar]

darśane tasya devasya tameva śaraṇaṃ yayau |
tataḥ śuśrāva vacanaṃ gireḥ paścādamānuṣam || 81 ||
[Analyze grammar]

bhagavadbhaktiviṣayaṃ saṃlāpaṃ kurvatāṃ mithaḥ |
tato vidyāpatirhṛṣṭo'nusaraṃstaṃ jagāma vai || 82 ||
[Analyze grammar]

dadarśa śabarāgārairveṣṭitaṃ parito dvijāḥ |
kṣetrasya dīpasaṃsthānaṃ khyātaṃ śabaradīpakam || 83 ||
[Analyze grammar]

tatra gatvā śanairvipraḥ praviśya vinayānvitaḥ |
dadarśa viṣṇubhaktāṃstāñchaṃkhacakragadādharān || 84 ||
[Analyze grammar]

praṇamya śirasā viprastasthau baddhāṃjalistadā |
tatoviśvāvasurnāma śabaraḥ palitāṃgakaḥ || 85 ||
[Analyze grammar]

avasāya hareḥ pūjāṃ pūjāśeṣopaśobhitaḥ |
saṃprāpto girimadhyāttu tasminneva kṣaṇe dvijāḥ || 86 ||
[Analyze grammar]

ālokya taṃ dvijo harṣamupayāto vyaciṃtayat |
eṣa prāpto hareḥ sthānācchrāṃto nirmālyabhūṣitaḥ || 87 ||
[Analyze grammar]

vaiṣṇavāgrya ito vārtāṃ viṣṇoḥ prāpsyāmi durlabhām |
ciṃtayanneva vipro'sau śabareṇābhyabhāṣata || 88 ||
[Analyze grammar]

śabara uvāca |
kutaḥ samāgato vipra kānanāṃtaṃ sudustaram |
kṣuttṛḍbhiratiśrāṃtaśca sukhamatrāsyatāṃ ciram || 89 ||
[Analyze grammar]

pādyamāsanamarghaṃ ca dattvā viśvāvasurdvijam |
uvāca praśrayagirā prastutaṃ pratipādayan || 90 ||
[Analyze grammar]

phalaiḥ pākena vā vipra prāṇayātrā bhavettava |
yattubhyaṃ rocate tadvai dīyate'tra mayā dvija || 91 ||
[Analyze grammar]

bhāgyaṃ mamādya bhagavañjīvitaṃ saphalaṃ ca me |
prāpto'si madgṛhaṃ vipra sākṣādviṣṇurivāparaḥ || 92 ||
[Analyze grammar]

iti bruvāṇaṃ śabaraṃ provāca dvijapuṃgavaḥ |
na me phalairna pākena kāryaṃ vaiṣṇavapuṃgava || 93 ||
[Analyze grammar]

yadarthamāgataṃ dūrātsādho tatsaphalaṃ kuru |
indradyumnasya nṛpateravaṃtipuravāsinaḥ || 94 ||
[Analyze grammar]

purohito'haṃ saṃprāpto viṣṇordarśanalālasaḥ |
rājñāgre tairthikānāṃ hi samājāvasare śrutam || 95 ||
[Analyze grammar]

tīrthakṣetraprasaṃgena kenacitprastutaṃ tadā |
tathā niveditaṃ kṣetraṃ rājāgre jaṭilena vai || 96 ||
[Analyze grammar]

ānupūrvyācca tatsarvaṃ kathayāmāsa sa dvijaḥ |
etadarthamahaṃ sādho rājñā cotkaṇṭhitena vai || 97 ||
[Analyze grammar]

preṣito'haṃ hariṃ draṣṭumatrasthaṃ nīlamādhavam |
dṛṣṭvā yāvannarapatervārttāṃ neṣyāmi so'pyaham || 98 ||
[Analyze grammar]

nirāhāro dhruvaṃ sādho tanmāṃ viṣṇuṃ pradarśaya || 99 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde saptamo'dhyāyaḥ || 7 ||
[Analyze grammar]